NSUNZO 18
Okane Dhogana Dhomuyani vina Ovilibihedhe Wakwaniha
“Vilevelé kakamwene wi athu etene one wunuya wa murima wawo.”—1 TIM. 4:15.
JIBO 84 Notene Nivilibihedhe
DHINASUNZE IYO *
1. Dhogana gani dhinfwanyela iyo okana?
IYO NINOMUKWELA Yehova venjene, nona ninofuna omulabela. Wila niwodhe omulabela Yehova ninga munfuneyelani, ninofwanyela okana dhogana dhomuyani, okana mikalelo dha Okristu, osunza mabasa mena, vina oveda marhe owakamihedha attu ena. *
2. Ninfwanyelela nni odhowagavi nunuwaga mpaddi womuyani?
2 Ninfwanyelela nni wunuwa mpaddi womuyani? Yamakamakaya, jawi ninfuna nimwagalalihe Babihu wa wirimu. Yehova onowagalala venjene aganoonaga nilabihedhaga guru dhehu, ewodhelo yehu wi nimwagalalihe. Elobo yina ennittukulela wunuwa mpaddi womuyani jawi ninfuna nakamihedhe venjene abalihu vamodha na arogora. (1 Tes. 4:9, 10) Kintanala mudhidhi olihu mwibaribarini iyo notene ninofwanyela wunuwa mpaddi womuyani. Ndoweni none mukalelo onakosihu ejuwene.
3. Mowiwanana na 1 Timóteo 4:12-16, murumiwi Paulo omulibihile Timóteo okosa eni?
3 Vamulebeli murumiwi Paulo Timóteo karta yoroma, muzombwe oddo wadha alabaga ninga munddimuwa wa mmulogoni. Masiki dhawene Paulo omulibiha wi onuwege mpaddi womuyani. (Kengesa 1 Timóteo 4:12-16.) Ogengesaga mazu amulebeli Paulo Timóteo, onele wona wi Paulo wafuna wi Timóteo avilibihedhe wunuwa dhipaddi bili: onuwihe mikalelo dha Okristu, okwela, nroromelo vina okana murima wottorhorha mwa ovilibihedha wengesa na osunziha. Modhela yotagiha ya Timóteo enowodheya wunuwa mpaddi womuyani nona ninofwanyela okana dhogana vina nivilibihedhe wakwaniha. Ninele wona na mukalelo gani onawodhihu omulabela venjene Yehova.
WUNUWIHE MIKALELO DHA OKRISTU
4. Mowiwanana na Filipi 2:19-22, txini yamuttukulela Yehova omulabihedha Timóteo?
4 Txini yamuttukulela Yehova omulabihedha Timóteo? Yamuttukulela mikalelo dha Okristu dhaniyena. (Kengesa Filipi 2:19-22.) Mowiwanana na dholeba dha Paulo ninowodha wona wi Timóteo wali woviyeviha, woweddeyana, wanziveliwa mabasa, vina wali wokuluveleya. Iyene wanakwela venjene abali vina wali womala-nawale wi akamihedhe. Nona Paulo koova omuttomela mabasa orutxa. (1 Kor. 4:17) Nigakaana mikalelo dha Okristu dhinkwela Yehova ninele olabihedhiwa venjene na mulogo vina Yehova onele onikwela venjene.—Masal. 25:9; 138:6.
Otamele mukalelo wa Okristu ogafuniliwe wunuwiha (Kang’ana ddima 5-6)
5. (a) Txini enawukamihedhe osakula mukalelo onfwanyeliwe wunuwiha? (b) Ninga munlagiha foto, txini enkosa murogora wi awodhe wunuwiha mukalelo wattagaraga?
5 Otamele mukalelo wa Okristu onfuniwe wunuwiha. Kakumbirha nikamihedho na Yehova wi ozinddiyele epaddi gani enfwanyeliwe wunuwiha mwigumini mwawo. Osakule mukalelo mmodha w’Okristu nanda ovilibihedhe wunuwiha. Motagiha, weyo ozindiyela wi onofwanyela ovilibihedha okala muttu wattagaraga, wamurenddele vina wolevelela. Txini enawukamihedhe okana mikalelo esi? Omukumbire mukwawo onimukuluveliwe wi awaddele enfwanyeleliwe okosa wi wunuwihe mikalelo esi.—Gano 27:6.
6. Txini enfwanyeliwe okosa wi wunuwihe mukalelo w’Okristu?
6 Ovilibihedhe wakwaniha yogana yawo. Onakose dhavi? Ovilibihedhe osunza mukalelo w’Okristu onfuniwe wunuwiha. Ogafunaga okala muttu wolevelela enowodheya weyo osunza mwaha wa dhotagiha dha attu anfwanyeya mBibiliani alevelela attu ena vina abale ahalevelelile attu ena. Kobuwela yotagiha ya Yezu, mwa iyene kiyamurutxa walevelela attu ena. (Lk. 7:47, 48) Iyene kaang’ana dhowobana dha attu ena. Wanveda wona mikalelo dhaderetu dha attu. Mottiyana na Afarisi ‘atanya attu ena.’ (Lk. 18:9) Ogamala otanalela dhotagiha esi dhobili kavivuze: ‘Miyo ddinoveda mikalelo dhaderetu dhina attu ena? Onorutxiwa walevelela attu ena?’ Kaleba mikalelo dhaderetu dhina muttuya, ogamala ovivuze: ‘Yezu onimona dhavi muttu oddu? Yezu agahimulevelela?’ Okosa ejuwene enele wukamihedha otxinja mubuwelo wawo. Voroma-vene enodhaga orutxa omulevelela muttu wunyimulile. Ogavilibihedhagavi kinawurutxe walevelela attu ena.
KATAMELA OKANA EWODHELO YINA
Ovivelele wi osunze mabasa a ovenyihedha Numba ya Omwene (Kang’ana ddima 7) *
7. Mowiwanana na Gano 22:29, Yehova onalabihedha dhavi alobwana na ayana ana ttotto?
7 Yogana yina enfwanyeliwe okana ja otamela wunuwiha ewodhelo yina. Karoma otanalela muttengo wa abali onfuneya wi akamihedhe omaga Beteli, Salão de Assembleias vina Numba dha Omwene. Enji mwa awene asunzile modhela wakamihedha abali ana ttotto vina adhile alabaga mwa mudhidhi mwinjene. Ninga munonelihu va fotoni abali na arogora anosunza ewodhelo enadhe wakamihedha ovenyihedha Numba dha Omwene vina Salão de Assembleias. Dhahene Yehova Mulugu, “Mwene wa masaka etene,” vina Yezu Kristu, “Mwene wa amwene,” anodhowavi akosaga dhilobo dhottikiniha alabihedhaga alobwana na ayana ana ttotto. (1 Tim. 1:17; 6:15; kengesa Gano 22:29.) Iyo ninfuna nilabihedhe ttotto yehu wi nimuttittimihena Yehova nihitamelaga wang’aniwa na attu ena.—Jo. 8:54.
8. Txini enawukamihedhe osakula yogana enawodhiwe wunuwiha?
8 Osakule yogana enfuniwe. Yogana gani egafuniliwe wunuwiha? Onkoddelani wavuza anddimuwa a mmulogoni obe nameddelela milogo yogana enfwanyela weyo wunuwiha. Motagiha, txino awene anele wuwaddela wi ovilibihedhe wunuwiha ewodhelo ya osunziha, egapadduwa dhawene wavuze maka-maka mpaddi gani onfwanyeliwe ovilibihedha. Ogamala wogolele mpaddi obuwene. Mbwenye txini enfwanyeliwe okosa wi owodhe wakwaniha?
9. Txini enfwanyelihu okosa wi nunuwihe ttotto ya osunziha?
9 Ovilibihedhe wi wakwanihe yogana yawo. Motagiha, akala onfuna wunuwihe ewodhelo ya osunziha pama. Onofwanyela osunza brochura Ovilibihedhe Wengesa na Osunziha. Ogattomeliwa epaddi mmatugumanoni, osasanyedhe vamodha na mbaliya vina onvuze mpaddi gani onfwanyeliwe wogolela. Masiki akala nihikana ttotto ya osunziha pama enofuneya odhowagavi nisasanyedhaga pama dhipaddi dhinttomeliwehu.—Gano 21:5; 2 Kor. 8:22.
10. Kavaha yotagiha enoniha wi enowodheya wakwaniha yogana masiki egarutxa.
10 Ki akala enorutxa wakwanihedha yogana esakuliliwe? Okalele ntidi! Mbali dhahi onkuweliwa Garry wahikana makattamiho a wengesa. Mbwenye iyene wahivilibehedhavaddiddi. Vina ninga mulogeliye, sabwa ya maswagiho akeleliye, ddabuno onowodha okosa madiskursu mmulogoni, mmatugumanoni a ttattamwa vina a murudda!
11. Dhahene ninga Timóteo, txini enanikamihedhe wakwanihedha pama mabasa anttomeliwihu?
11 Koddi Timóteo wahidha okala namakosa madiskursu vina namasunziha wa ttotto? Bibilia kanloga. Mbwenye kavali waganyedha wi sabwa ya ofwara malago a Paulo Timóteo wahidhowavi avilibihedhaga vina azuzumelaga pama mabasa attomeliwiye. (2 Tim. 3:10) Namukalelo wakene, nigavilibihedha wunuwiha ewodhelo yehu, ninele owodha wakwanihedha pama mabasa anttomeliwihu.
OTAMELE MIKALELO DHOWAKAMIHEDHA ATTU ENA
12. Abali ena awukamihedhile dhavi?
12 Iyo notene ninoziveliwa nigavahiwa nikamihedho na attu ena. Motagiha, iyo nigakala osipitale, ninowagalala wawona anddimuwa a mmulogoni ankosa mpaddi wa Nikuru na Abali Anlaba Mumodhani na Masipitale vina Nikuru Ninawona Aredda Osipitale agadha onona. Nigafwanyiwa makattamiho orutxa mwigumini, ninowagalala wawona anddimuwa a mmulogoni anda onipangarhaza vina onivuruwana. Nigaveda nikamihedho na weddiha nsunzo na Bibilia, ninowagalala okamihedhiwa na pionero wa ttotto nanda omamalelowa anivaha malago a weddiha pama masunzo. Abali na arogora abo anokaana wagalala sabwa ya onivaha nikamihedho. Iyo vina ninele okana wagalala wakene nigavilibihedha wakamihedha abalihu ena. Yezu ohiloga: “Ovaha onothabiha opitha ovahiwa.” (Mer. 20:35) Akala weyo onofuna omulabela Yehova venjene, Txini enokamihedhe wakwanihedha yogana ejo?
13. Ogakana yogana, txini enfwanyeliwe okana muyubuweloni?
13 Otamele yogana wi wakwanihedhe. Motagiha, weyo wubuwela ‘miyo ddinfuna ddikamihedhe venjene mmulogoni.’ Mbwenye sabwa yawi mabasa a okamihedha mmulogoni ahinjiva, txino enodhaga wurutxa wona akala ohakwanihedha obe kuwakwanihedhile vina na mukalelo gani enawodhe weyo wakwanihedha. Enokamihedhe ja oveda yogana enawodhiwe wakwaniha. Egawodheya kaleba yoganaya vina mukalelo onawodhiwe wakwanihedha.
14. Enfuneyela nni ohittigiriga wi nakwanihedhe dhofuna dhehu?
14 Enofuneya ohittigiriga nigafuna wakwaniha dhogana dhehu. Sabwaya? Sabwani iyo kaninwodha wang’anela dhinapadduwe mwigumini mwehu. Karoma otanalela yotagiha ya Paulo: Iyene wahikamihedha wita mulogo o sidadi ya Tesalónika. Kavali waganyedha wi iyene wanfuna wakamihedha abali a wenewale. Mbwenye sabwa ya ofwarafwariwa iyene wahimageleleya obudduwa musidadimwa. (Mer. 17:1-5, 10) Sabwani Paulo kokala wenewale agahika vangovini egumi ya abali. Masiki dhawene Paulo keyeleli mundduni. Iyene wahirumela matxinjo apadduwile mwigumini mwaye. Ottiya ejo, vasogorhova wahimuruma Timóteo wi azuzumele dhofuneya dhomuyani dha abali o Tesálonika. (1 Tes. 3:1-3) Abali o Tesálonika ahagalala venjene sabwa ya Timóteo ovilevela wi akamihedhe.
15. Makattamiho ohijedheleya anda dhavi opatta dhogana dhehu?
15 Iyo ninosunza elobo na ejile epadduwile na Paulo o Tesálonika. Txino ninovilibihedha wi nivahiwe ettomo munikuruni na Yehova, mbwenye makattamiho ohijedheleya agadhile opadduwa mwigumini mwehu anodhaga onitximiha ohakela ettomoya. (Koh. 9:11) Akala elobo ninga eji epadduwa mwigumini mwawo, katamela okana yogana yina enawodhiwe wakwanihedha. Jijuwene ekosile atelani ankuweliwa Ted na Hiedi. Awene alaba o Beteli mbwenye sabwa ya makattamiho a egumi ahittiya mabasa akosani. Masiki dhawene omukwela wawa Yehova ohattukulela okosa elobo yina yottiyana mmabasani a olaleya. Voroma, awene alaba ninga apionero a mudhidhi wetene. Mmalelani ahittomiwa ninga apionero avawoka, vasogorhova Ted wahiroma oswagihiwa wi akale nameddelela milogo wohalelavo. Mudhidhi waswagihiwiye wahiteya matxinjo, attu ana yimo yaye kafwanyelela olaba ninga anameddelela milogo. Eji yahakubanyiha mbwenye awene ahinonelamo wi enowodheya omulabela Yehova na mikalelo dhina. Ted ohiloga, “Iyo nihisunza wi enowodheya omulabela Yehova nittiddaga mabasa ottiyana-ttiyana.”
16. Txini ensunzihu na Galásia 6:4?
16 Iyo kaninwodha wang’anela dhotene dhimpadduwa mwigumini mwehu. Nona kanubuwele wi ttima ena iyo vamentoni va Yehova enda na ettomo ena iyo vina kaniviladdanihege na attu ana ettomo ehina iyo. Hiedi ohiloga dhahi, “Onele oyeleliwa murenddele ogaladdaniha egumi yawo na esile dhinoniwe dhipadduwaga mwigumini mwa attu ena.” (Kengesa Galásia 6:4.) Enfwanyelihu okosa ja otamela mikalelo dhina dha wakamihedha attu ena wi amulabela Yehova. *
17. Txini enawukamihedhe ottomeliwa mabasa mena musogorho?
17 Kinaurutxe omulabela Yehova ogavevutxa egumi yawo vina ogarabela ogula dhilobo dhihilitxi dhofuneya. Enowodheya wimetxa dhogana dhing’ono wi vasogorhova owodhe wakwanihedha dhogana dhinddimuwa. Motagiha, akala onofuna olaba ninga pionero wa mudhidhi wotene, onkoddelani olaba ovanene ninga pionero wokamihedha mwari mwa mudhidhi mwinjene? Akala yogana yawo ja okala mudhari worumeliwa wa vamulogoni, ononamo dhavi oroma olaba venjene mmabasani olaleya, wawona abali ali aredda vina abali owunuwelavo a mmulogoni? Okosa eji enele wukamihedha okala womala-nawale vina ottomeliwa mabasa mena musogorho. Nona kagana okosa muli mwetemwene wi olabe pama mabasa-mabasavi anttomeliwiwe.—Rom. 12:11.
Osakule yogana egawodhiliwe wakwanihedha (Kang’ana ddima 18) *
18. Ninga munonelihu vafotoni, txini ensunzihu na yotagiha ya Beverley?
18 Enowodheya vina abali owunuwelavo okana dhogana dha omuyani. Ndoweni nitanalele yotagiha ya murogora onkuweliwa Beverley ona vyaka 75 dhobaliwa. Sabwa ya makattamiho a oredda iyene wanrutxiwa venjene wedda. Masiki na makattamiho aba a oredda iyene wanfuna okamihedha mabasa origanela a opaka niwobo na Wubuwela Okwa wa Yezu. Nona iyene wahisakula yogana egawodhiliye wakwanihedha. Moneliye wi wawodha wakwanihedha yogana ya opaka niwobo na Wubuwela Okwa wa Yezu, iyene wahagalala vaddiddi. Yotagiha yaye ehattukulela attu enjene olaba mmabasani olaleya. Yehova onovaha ttima mabasa otene ankosa abali aba owunuwelavo, masiki ahiwodhaga okosa dhilobo dhina.—Masal. 71:17, 18.
19. Dhogana gani dhomuyani dhinfwanyelihu wakwanihedha?
19 Otamele dhogana dhinawodhiwe wakwaniha. Wunuwihe mikalelo dha Okristu dhinimuzivela Yehova. Osunze ewodhelo yina enawukamihedhe omulabela venjene Mulugu vina nikuru naye. Otamele mikalelo dhowakamihedha abali na arogora. * Dhahene ninga Timóteo, na nikamihedho na Yehova, “athu etene anele wona wunuwa wawo mpaddi womuyani.”—1 Tim. 4:15.
JIBO 38 Yehova Onele Wulibiha
^ par. 5 Timóteo wali namalaleya wa ttotto vaddiddi. Masiki dhawene murumiwi Paulo omulibiha wi adhowegevi alaleyaga muttaka wapama. Sabwa yowiwelela malago a murumiwi Paulo, Timóteo wahidha okala wattima vamentoni va Yehova nona awodha wakamihedha abali vamodha na arogora. Dhahene ninga Timóteo, weyo onofuna omulabela Yehova venjene vina wakamihedha abali? Kaninaganyedha wi weyo onofuna. Dhogana gani dhinawukamihedhe omutagiha Timóteo? Txini enawukamihedhe wi wakwanihedhe dhogana dhawo?
^ par. 1 ONONELEMO PAMA: Dhogana dhomuyani entapulela okosavo elobo-txilobo nimulabelaga Yehova venjene wi niwodhe omwagalaliha.
^ par. 16 Koona mutoma “Servir Onde Há Mais Necessidade” mu nivuruni Organizado para Fazer a Vontade de Jeová, kapitulo 10, ddima. 6-9.
^ par. 19 Koona lição 60, “Continue a Fortalecer Sua Amizade com Jeová” mu nivuruni Seja Feliz para Sempre!.
