1. ¿Kʼãrẽta odaibara Daizezedebema audre bia odaita?

 KRISTIANORA wãrĩnuarabara Daizezeta mejãcha kãgapanʉ baera Daizezedebema opanʉra, audre bia okĩrãpanʉ. Mawũã odaira dayirãbara krĩchadaibara Daizezedebemata okĩrãnaita. Bari jaraita, sode audre nebia erbaibara, nekʼãrẽ okʼawuaibara akʉza jʉrʉibara sãwũã kʼarebaita wuabemarata.

2. ¿Kʼãrẽa krĩchadaibara Daizezedebemata audre okĩrãita?

² ¿Kʼãrẽa krĩchadaibara Daizezedebemata audre okĩrãita? Nããra, mejãchade kãgapanʉ baera Daizeze Jeowa sobiabita. Jeowara sobiabʉ baera dayirãba nekʼãrẽ okʼawuabʉdeba akʉza daya nekʼãrẽ erbʉdeba iya zokʼabʉta obʉde. Ũmeta, kristiano bia bakĩrãpanʉ wuabema mebẽrã kʼarebadaita (1 Tes. 4:9, 10). Pabloba Timoteoʼa ũragʼa diadabara ũdubibʉ dayirã Daizeze odebʉta poaga dããrabamina, jõmaʉ̃ba Daizezedebemata audre bia oibarata. Atia akʉdayi sãwũã Pabloba ũrãgʼa diadaba kʼarebaseabʉta dayirãra.

3. 1 Timoteo 4:12-16de jarabʉbara, ¿Pablobara kʼãrẽ ũrãgʼata diasi Timoteoʼa?

³ Pabloba Timoteoʼa karta bʉdata diabʉesidera, Timoteora warrabasi akʉza zõrãrã kõngregasionebemabasi, mawũãsidu Pablobara jarasi Timoteoʼa iya obʉra audre bia obamarẽã (akʉra 1 Timoteo 4:12-16). Dayirãba bia krĩchapanʉbʉrʉ Pabloba Timoteoʼa ũrãgʼa diadata, naʉ̃ba dayirã ũdubibʉ Pablobara kãgabasita, Timoteoba iyi sode nebia erbʉra audre bia omarẽã. Bari jaraita, audre ĩjãbamarẽã, neneẽã bamarẽã akʉza audre kãgata ũdubimarẽã. Adewara Pablobara kãgabasi Timoteoba okʼawuabʉra audre bia omarẽã. Bari jaraita, wuabemara daidu nemi jĩgʉa lebʉra audre bia omarẽã, audre ũrãgʼa  bia diamarẽã akʉza audre bia jaradia kʼawuamarẽã. Atia akʉdayi sãwũã Timoteo yizaba kʼarebabʉta dayirãba Daizezedebemata audre okĩrãnaita akʉza akʉdayi dayirãba sãwũã audre oseabʉta Daizezedebemata.

4. Filipenses 2:19-22bayeda jarabʉdera, ¿kʼãrẽa Jeowabara jʉrʉsi Timoteora iya zokʼabʉta omarẽã?

⁴ ¿Kʼãrẽa Jeowabara jʉrʉsi Timoteota iya zokʼabʉ omarẽã? Timoteode ũdusi baera iyi sode nebia erbʉta (akʉra Filipenses 2:19-22). Pabloba Timoteo ʉ̃rʉ jarasi, iyira eda krĩchabasita, kʼẽrẽpabasita, trajamiabasita akʉza iyide ĩjãseapanasita akʉza jarasi Timoteobara mebẽrã kãgabʉta ũdubibasita adewara mebẽrã ʉ̃rʉ krĩchabʉta ũdubibasita. Maʉ̃ kʼarea Pablobara mejãcha kãgabasi Timoteora, adewara edaʉde trajo zareabʉta diabasi iya omarẽã (1 Cor. 4:17). Dayirãba dayi sode nebia Jeowaba kãgabʉta erbʉbʉrʉ, mawũãra Jeowara sobiabayi adewara kongregasione zokʼadayi nekʼãrẽ bio odamarẽã (Sal. 25:9; 138:6).

5. (1) ¿Sãwũã kʼawuai dayirãbara dayi sode nebia erbʉdebemara saʉ̃ta ara oibarata? (2) ¿Kʼãrẽta obʉ mebẽã potodebemabara wuabemara ʉ̃rʉ audre krĩchabʉta ũdubita?

⁵ Krĩchara bʉa kʼãrẽta audre bia oseabʉta. Jeowaʼa widira kʼarebamarẽã dayi sode nebia erbʉdebemara saʉ̃ta audre bia oibarata kʼawuabimarẽã. Dayirã aba abakaʉba dayikʉza naʉ̃ta widibara: «¿Mʉ̃ara nesidabʉka wuabemara ʉ̃rʉ audre krĩchaita, mawũã ẽ bʉrʉ wuabemara kʼarebakĩrãita?, ¿mʉ̃ara nesidabʉka audre kĩrãdua kʼawuaita wuabemaraba nemitia obʉra, mawũã ẽ bʉrʉ audre aduʼa bʼaita wuabemabawara? Mõbe, maʉ̃ta bia krĩcha kʼãrãpe aba jidara akʉza maʉ̃ta audre bia oita krĩchara, mamina bʉa kʼawua ẽ bʉrʉ naʉ̃ra nebiadebemata saʉ̃ta ara oita waebʉta, widira bʉ neũdukʼawuara maʉ̃ta ũdubimarẽã (Prov. 27:6).

6. ¿Sãwũã zarea oibara daya krĩchada aripe oita?

⁶ Zarea oibara daya krĩchada aripe oita. ¿Sãwũã? Dayirãba jʉrʉ jʉ̃drʉseabʉ kartara Jeowa organizasionebemane, nama ũduyi dayirãba aba nekʼãrẽ bia okĩrãbʉdebemata sãwũã audre bia oita. Bari jaraita, dayirãba nesidabʉbʉrʉ audre kĩrãdua kʼawuaita wuabemaba  nemitia obʉta, akʉseabʉ nããrabema ẽbẽra Daizeze odebada yizarata, Jesura yiza bia iya kĩrãduasi baera wuabemaba nemitia obʉra (Luc. 7:47, 48). Jesubara akʉba ẽ basi ẽbẽrarãba nemitia obʉtrʉ, awuarabʉrʉ akʉbasi ãya nekʼãrẽ bia obʉta. Mamina pariseorãra awuara krĩchapanasi ãyara krĩchapanasi ẽbẽrarãra jipa zeri ẽãta (Luc. 18:9). Kartara Jeowa organizasionebʉta leda tẽã dayikʉza widiseabʉ: «¿Mʉ̃ara sãwũã akʉbʉ wuabema ẽbẽrarã?, ¿mʉ̃ara akʉbʉka ãyi sode nebia erbʉta?». Dayirãta zareabʉbʉrʉ wuabemaba nemitia odata kĩrãduaita, dayirãbara bʉseabʉ kartade ãyi sode kʼãrẽ nebia erbʉta, adewara naʉ̃ta widiseabʉ: «¿Jesubara sãwũã akʉbʉ naʉ̃ ẽbẽrarã?, ¿iya kĩrãduaika naʉ̃ ẽbẽraba nemitia odara?». Mawũã odara kʼarebayi awuara krĩchaita naʉ̃ ẽbẽra ʉ̃rʉ. Edaʉde dayirãitara zareabʉ wuabemaba dayi nemitia oda kĩrãduaita, mamina zarea opanʉbʉrʉ krĩcha mitia ãĩ bʉeita mawũãra idubʉyi.

7. Proverbios 22:29de jarabʉbara, ¿Jeowabara sãwũã zokʼabʉ ẽbẽrarã nekʼãrẽ okʼawuabʉta?

⁷ Bʉta Jeowaita audre trajakĩrãbʉbʉrʉ krĩchaseabʉ bʉa nekʼãrẽ okata kʼawuaita. Bari jaraita, ʉ̃kʉrʉ Betel de obʉrata, mawũã ẽ bʉrʉ Daizeze Nokʼo ʉ̃rʉ bedʼeabari de obʉrata, ãyara nããra parãkabasi, mamina trajasi baera yi okʼawuabʉbawara idira bia kʼawuabʉ sãwũã oita. Potode ũdubibʉ kĩrãkʼa yumakẽrãra mawũã ẽ bʉrʉ yuwẽrãraba kʼawuaseabʉ Daizeze de sãwũã arao erbaita akʉza Jeowa Jesuʼʉ̃meba zokʼabʉ naʉ̃ra ẽbẽrarãta nekʼãrẽ bio oita (1 Tim. 1:17; 6:15; akʉra Proverbios 22:29). Maʉ̃ kʼarea dayirãba okʼawuabʉta zokʼakĩrãpanʉ Jeowa ʉ̃rʉ ibia bedʼeabita, mawũã dayirã kʼarea ẽ (Juan 8:54).

8. ¿Kʼãrẽba kʼarebai bʉa kʼawuaita nekʼãrẽ bʉa kʼawuabʉdebemata saʉ̃ta audre bia oita?

⁸ Krĩchara bʉa kʼãrẽta audre bia oseabʉta. ¿Kʼãrẽba kʼarebai bʉa kʼawuaita nekʼãrẽ bʉa kʼawuadadebemata saʉ̃ta audre bia oita? Maʉ̃ kʼawuaita widiseabʉ zõrãrã kongregasionebema mawũã ẽ bʉrʉ zõrãrã kongregasionebema akʉbariʼa, ãya jaradamarẽã kʼãrẽne audre bia oseabʉta. Ãya jaradara waebʉta daya bia jaradiaita aramaʉ̃ta dayirãba widiseabʉ sãwũã oibarata, maʉ̃ tẽã ãya jarada kĩrãkʼa aripe ora.

9. ¿Kʼãrẽta oibara nejaradiabari bia bʼaita?

⁹ Zarea oibara daya krĩchada aripe oita. Bʉta nejaradiabari bia bakĩrãbʉbʉrʉ, akʉra karta Zarea ora bia leita akʉza jaradiaita akʉza ãba yi jʉrebari demae diskurso diai naweda widira yi jaradia kʼawʉabʉʼa kʼãrẽne audre bia oibarata, adewara diskurso diai naweda bʉa bia estudiabʉbʉrʉ nejaradiabari biabayi, adewara wuabemarabara akʉdayi bʉra trajamiata akʉza bʉde ĩjãnañi (Prov. 21:5; 2 Cor. 8:22).

10. Jara ũrĩbira kʼãrẽta osita Garryʼba iya obʉra audre bia oita.

¹⁰ Edaʉde daya nekʼãrẽ jõma aripe okĩrãbʉmina zare maʉ̃ oita. Mawũã berabaribʉrʉdera paerãra maʉ̃ oita. Akʉdaya yiza Garryʼdeta, iyitara zareabasi leita. Maʉ̃ba nããrara ãba yi jʉrebarimae leita pera sentibasi, mamina iyira zarea obasi bia leita, mebẽrã kʼarebadeba akʉza kartade ũrãgʼa sãwũã bia lei ʉ̃rʉ jarabʉ akʉbʉba, naʉba kʼarebasi iyira diskurso bia diaita ãba yi jʉrebʉrʉde akʉza asambleade.

11. Timoteoba oda kĩrãkʼa oita, ¿kʼãrẽta oibara zokʼadamarẽã audre Daizezedebema oita?

 ¹¹ Daizeze Bedʼeabara jara ẽ Timoteora nejaradiabari biabasita mamina dayirãba kʼawuapanʉ iyara ũrĩsita Pabloba ũrãgʼa diabʉra. Maʉ̃ kʼarea Timoteobara iya obʉra audre bia owãsi akʉza iya omarẽã jaradapeadara bia osi (2 Tim. 3:10). Dayirãsida zarea opanʉbʉrʉ daya okʼawuabʉta audre bia oita Timoteode kĩrãkʼa, mawũãra biode zokʼadayi Daizezedebema oita.

12. ¿Awuruba bʉra sãwũã kʼarebabada?

¹² Dayirãra mejãcha sobiapanʉ awuruba dayira kʼarebabʉrʉdera. Bari jaraita, dayirãta ospitalde kayaba bʉbʉrʉ mebẽrã medikobawara bedʼeabʉba akʉ jʉ̃ẽbʉrʉdera, dayirãra mejãcha sobiapanañi. Adewara dayirã bedʼea zroma berabaribʉrʉdera sobiapanañi zõrãrã kongregasionebemata ewari jʉrʉpe, dayirã bedʼeata ũrĩpe akʉza dayirã so zarea diapanʉbʉrʉ. Adewara daya bia jaradiaita kʼarebata nesidabʉbʉrʉ, yibiabayi yi nãã edebari 70 ora obʉba dayiʉ̃me Daizeze Bedʼea jaradia wãita akʉza ũrãgʼa diamarẽã sãwũã bia jaradiaita. Jesuba jarasi: «Audre sobiabʉ daya diabʉde dayaʼa diapanʉira» (Hech. 20:35). Mebẽrã awurura kʼarebapanʉrãra mejãchade sobiapanʉ, dayirãsida sobiabaseabʉ awururata kʼarebabʉrʉde. Atia akʉdaya Jeowaita audre nebiata diakĩrãpanʉbʉrʉ, ¿kʼãrẽta odaibarata?

13. ¿Dayirãba nekʼãrẽ bio oita krĩchabʉrʉdera kʼãrẽta bia krĩchaibara?

¹³ Bʉa Daizezedebemata oita krĩchabʉrʉdera, krĩcharãra maʉ̃ra jõma aripe oita, awuarabʉrʉ jidara aba maʉ̃ta audre bia oita. Mõbe, maʉ̃ta kartade bʉseabʉ bʉa kʼãrẽta audre bia okĩrãbʉta akʉza bʉseabʉ kʼãrẽta oibarata maʉ̃ ũduita. Bari jaraita, edaʉde bʉa krĩchabʉ nekʼãrẽ oita kongregasione, mamina edaʉde zareabʉ bʉa kʼawua ẽ baera samareba ojʉ̃drʉita. Maʉ̃ kʼarea yibia dayirãba nekʼãrẽ oita bio krĩchabʉdebemara aba jida kʼãrãpe maʉ̃ta audre bia oita.

14. ¿Kʼãrẽa edaʉde awuara krĩchaibara daya oita krĩchadara?

¹⁴ Edaʉde dayirãba krĩchabʉra aripe obeda ẽ, ¿kʼãrẽa? Dayirãba oauda ẽ baera  daya krĩchabʉta aripe berabarimarẽã, maʉ̃ kʼarea yibiabayi dayirãba oita krĩchabʉra awuara oita krĩchaita. Bari jaraita, Pabloba kʼarebasi Tesalónicade kongregasionta bamarẽã, maʉ̃ kʼarea iyira mama bakĩrãbasi mebẽrã kʼarebaita, mamina iyi nejʉraraba iyita pẽwãpanasi baera mamaʉ̃ba ãĩ wãibarabasi. Pablota mama ariya besibʉrʉ, neida okasida iyita akʉza mebẽrã kongregasionebemata (Hech. 17:1-5, 10). Mamina maʉ̃ kʼarea Pablora pae ẽ basi iyi krĩchabada oita, awuara krĩchasi nekʼãrẽ awuara oita akʉza maʉ̃ tẽã iya zokʼabʉesi Timoteora, mebẽrãba ĩjãbʉta audre zarea ĩjãbimarẽã (1 Tes. 3:1-3). Mebẽrã Tesalónicadebemara mejãcha sobiapanasibaibara Timoteoba ãyi akʉ jʉ̃ẽsi baera ãyi kʼarebaita.

15. Jara ũrĩbira kʼãrẽta berabarisita mebẽã Ted akʉza Hiediʼta.

¹⁵ Idi ewadebida dayirãbara Pablo Tesalónicade berabaridadeba nekʼawuaseabʉ, dayirãba krĩchabʉbaibara nebia audre diaita Jeowaʼa, mamina edaʉde dayirã nei berabaribʉba maʉ̃ra aripe obe ẽ (Ecl. 9:11). Dayirãta mawũã berabarira krĩchaseabʉ nekʼãrẽ awuara oita. Mawũã berabarisi mebẽrã yi trʉ̃ Ted akʉza Hiediʼta. Ãyira kʼayapanasi maʉ̃ba wãibarabasi Beteldeba mamina ãya Jeowata mejãcha kãgapanʉ baera maʉ̃ awuara jʉrʉsida sãwũã audre nebia diaita Jeowaʼa. Nããrara ãyira 70 ora diabaribasida, tẽã yi nãã edebari 130 ora diabaribasi, maʉ̃are jaradiasida zõrãrã kongregasion akʉbari kʼarebabari bamarẽã. Maʉ̃ tẽã mebẽã Tedʼbara wua obe ẽ basi iyita zõnabasi baera, mawũã berabarida kʼarea ãyira wiña krĩcha opanasi, mamina kʼawuabasi nekʼãrẽ awuara oseapanʉta Jeowa nebia diaita. Mebẽã Tedʼba jarabʉ: «Daiba kʼawuabʉda Daizezeʼa nebia diaita kĩrã abapaibʉ ẽãta».

16. ¿Kʼãrẽta jaradiabʉ Gálatas 6:4bara?

¹⁶ Dayirãbara obeda ẽ jõma daya kãgabʉra aripe berabarimarẽã. Maʉ̃ kʼarea kĩrãbedaibara Jeowabara dayirãra kãgabʉta dayirãba iyi kʼarea nekʼãrẽ ozebʉrʉ kʼarea, mawũã dayirãba pribilegio erbʉ kʼarea kãga ẽ Jeowabara. Adewara krĩchada ẽ baibara, ʉ̃kʉrʉ mebẽrãba pribilegio erbʉde kõbe dayirãbara erbʉ ẽãta. Mebẽã Hiediʼba jarabʉ: «Dayirãba badua akʉpanʉbʉrʉ ʉ̃kʉrʉ mebẽrãba pribilegio erbʉta, kõbe dayirãbara erbʉ ẽãta, mawũãra aduʼa pana ẽ bayi» (akʉra Gálatas 6:4). Maʉ̃ kʼarea yibia bayi jʉrʉita sãwũã audre diaita Jeowaʼa adewara sãwũã kʼarebaita wuabemarãra. *

17. ¿Bʉa kãgabʉbʉrʉ audre zokadamarẽã kongregasione kʼãrẽta oibara?

 ¹⁷ Bʉa jʉrʉ ẽ bʉrʉ netata mejãcha erbaita akʉza debeta mejãcha oẽ bʉrʉ, kongregasione zokʼadayi bʉa nekʼãrẽta mejãcha omarẽã. Krĩchara nekʼãrẽ wiña bʉta oita Daizezedebemata, tẽãne maʉ̃ ʉ̃tabʉta oita. Bari jaraita, bʉta yi nãã edebari bakĩrãbʉbʉrʉ ojʉ̃drʉra yi nãã edebari 50 ora diabarita, tẽãne yi 70 ora diabari oita. Adewara bʉta zõrãrã kʼarebabari bakĩrãbʉbʉrʉ, audre ẽãne akʉbaibara zõrãrãta, yi kayabʉta akʉza audre Daizeze Bedʼea jaradiabaibara. Idi bʉa nekʼãrẽ okʼawuabʉrʉba, kʼarebayi bʉta audre zokʼadamarẽã kongregasione nekʼãrẽ odaita. Bʉa nekʼãrẽ jõma obʉra bʉya diaseabʉta jõma diara Jeowaʼa (Rom. 12:11).

18. ¿Kʼãrẽta kʼawuapanʉ dayirãbara Beverleyʼneba?

¹⁸ Mebẽrã kĩrãdawuarabʉbida krĩchaseabʉ nekʼãrẽ oita Jeowaita. Akʉdadrʉ mebẽã Beverleyʼba 75 poagabadaba kʼãrẽta odata. Iyira mejãcha kayabʉ baera wãbe ẽ basi, iyara mejãchade kãgabasi ẽbẽrarã jarakʼa wãita Jesu beida jẽda kĩrãbepanʉ ʉ̃rʉ. Mawũẽra iya krĩchabadara aripe osi, maʉ̃ba mejãcha sobiabasi, Beverleyʼra zarea osi iya oseabʉta jõma aripe oita. Mebẽrãba iyi mawũã zarea obʉta ũdusida baera abarika oita krĩchasida, zarea odaita Daizeze Bedʼea jaradiaita akʉza ãya oseabʉta jõma odaita. Jeowabara bia akʉbʉ mebẽrã kĩrãdawuarasidu, ãyira zarea opanʉ baera Jeowaʼa ãya oseabʉta diaita (Sal. 71:17, 18).

19. ¿Kʼãrẽta oseapanʉ Daizezedebema audre odaita?

¹⁹ Krĩchadadrʉ odaita dayirãba oseabʉta. Zarea odaibara dayi sode nebia erbʉra audre bia odaita, daya okʼawua bʉra audre bia ora, mawũã ẽ bʉrʉ nekʼãrẽ kʼawuara Jeowaita audre trajaita, jʉrʉdadrʉ sãwũã audre kʼarebaita mebẽrãra. * Mawũã odara Jeowabara nebiata mejãcha diayi akʉza Timoteo kĩrãkʼa wuabemaraba ũdudayi dayirãba audre bia owanata (1 Tim. 4:15).