1. Nemene la itre mekun hne së hna troa eatrën ngöne la huliwa i Iehova?

 ITRE nyipi Keresiano së pine laka, tru la ihnimi së koi Iehova. Celë hi matre, easa hamëne la ka sisitria koi Nyidrë. Ngo nyipiewekë tro sa thele la itre mekun hne së hna troa eatrën ngöne la huliwa i Iehova, tune la troa eënyine la itre thiina ka lolo, me maca troa xome la ketre hnëqa e hnine la ekalesia, me xatuane la itre xan. b

2. Pine nemene matre nyipiewekë tro sa maca ngöne la huliwa i Akötresie me eatrëne la itre mekune hne së hna xom?

² Pine nemene matre nyipiewekë tro sa maca ngöne la huliwa i Akötresie? Pine laka, easa ajane troa amadrinëne la Keme së ka ihnim e koho hnengödrai. Tru la madrine i Iehova ngöne la easa huliwane la itre hne së hna atrein matre troa nyihlue i Nyidrë me xatuane la itre trejin. (1 Thes. 4:9, 10) Ngacama ekö hë së ngöne la nyipici, ngo nyipiewekë tro palahi sa thele troa maca ngöne la huliwa i Iehova. Tro sa ce wang la aqane tro sa kuca.

3. Thenge la 1 Timoteo 4:12-16, nemene la eamo hna hamën hnei Paulo aposetolo koi Timoteo?

³ Ame lo Paulo aposetolo a cinyanyine la pane tusi nyidrë koi Timoteo ke, ketre qatre thup hë angeic. Ngo hnei Paulo aposetolo hna ithuecatre koi Timoteo troa thele troa maca ngöne la huliwa i Akötresie. (E jë la 1 Timoteo 4:12-16.) Hnei nyidrëti hna upi angeic troa maca ngöne la lue götran. Ame la hnapan, nyipiewekë tro angeice a  eënyine la itre thiina ka lolo, tune la ihnim me lapaun me thiina ka wië. Nge ame la hnaaluen, tro angeic a thele troa maca ngöne la itre hnëqa hna ahnithe koi angeic, tune la troa atreine e tusi hnyawa qëmekene la ka alanyim me eamo me hamë ini. Tro sa ce wang la tulu i Timoteo memine la enyipiewekën troa eatrëne la itre hne së hna mekun troa kuca ngöne la huliwa i Akötresie matre kökötre ngöne la nyipici. Nge tro fe sa ce wang la aqane tro sa catre cainöj.

4. Thenge la Filipi 2:19-22, pine nemene matre hnei Iehova hna ië Timoteo matre troa huliwa koi Nyidrë?

⁴ Pine nemene matre hnei Iehova hna ië Timoteo matre troa huliwa koi Nyidrë? Pine laka, tru catre la itre thiina ka lolo i angeic. (E jë la Filipi 2:19-22.) Öni Paulo göi Timoteo ka hape, ketre atr ka hetre hni ne ipië angeic me mele nyipici me huliwa hnyawa. Ijije hi tro nyidrëti a mejiune koi angeic. Ketre, ka tru koi Timoteo la itre trejin. Celë hi matre, tru la ihnimi Paulo koi Timoteo nge hnei nyidrëti hna hamë hnëqa koi angeic. (1 Kor. 4:17) Tui Timoteo, maine tro sa eënyine la itre thiina ka lolo i Iehova, tro Nyidrëti a kepe së me hamë hnëqa koi së e hnine la ekalesia.​—Sal. 25:9; 138:6.

5. (a) Nemene la nyine tro sa kuca matre atre la thiina nyine tro sa eënyin? (b) Thenge la iatr, nemene la hna kuca hnene la ketre trejin, matre amamane la utipine i eahlo koi itre xan?

⁵ Troa iëne la ketre mekun nyine troa eatrën. Loi e tro sa sipo Iehova troa xatua së matre öhne la ketre thiina nyine tro sa eënyin, tune la troa utipine me xatua itre xan, maine thele tingeting pena me nue la ngazo i ketre. Eje hi, loi e tro sa hnyingëne la ketre sinee së la mekuna i angeic matre troa xatua së.​—Ite edomë 27:6.

6. Nemene la nyine tro sa kuca matre troa eënyine la ketre thiina ka lolo?

⁶ Troa thele matre eatrëne la mekun. Tune kaa? Loi e tro sa pane ithel matre atrepengöne hnyawa la thiina hne së hna ajane troa eënyin. Maine jë, easa ajane troa canga nue la ngazo i ketre. E cili, loi e tro sa pane e me lapa mekun la itre tulu e hnine la Tusi Hmitrötr. Hnei itre xan hna lapa fë trengehni nge hetrenyi fe la itre ka nue la ngazo hna kuca koi angatr, tui Iesu. (Luka 7:47, 48) Isapengöi nyidrëti kö  memine la itre Faresaio. Hnei nyidrëti hna goeëne la itre thiina ka loi thene la itre atr, ngo tha itre tria i angatre kö. Ame pena la itre Faresaio, hnei angatr hna “wangesixa itre xan.” (Luka 18:9) Thupene lai, isa hnyinge jë ka hape: ‘Nemene la hnenge hna goeëne thei itre xan? Eni kö a goeëne la itre thiina ka loi i angatr?’ Maine jole koi së troa nue la ngazo ne la ketre atr, loi e tro sa cinyanyine la itre thiina ka lolo i angeic, me hnying ka hape: ‘Tune kaa la aqane goeë angeice hnei Iesu? Tro kö nyidrëti a nue la ngazo i angeic?’ Celë hi lai ka troa xatua së troa saze la aqane waiewekë së. Eje hi, jole palakö koi së troa nue la ngazo i ketre. Ngo maine tro palahi sa catr, tro ha hmaloi trootro koi së troa nue la ngazo hna kuca.

7. Thenge la Ite Edomë 22:29, tune kaa la aqane huliwa Iehova enehila memine la itre trejin?

⁷ Ijije fe tro sa mekun troa maca ngöne la ketre huliwa. Nemene la hne së hna öhne ngöne la easa goeëne la itre atr ka ixatua ngöne la kola xupi Uma Ne Baselaia, maine Bethela, maine uma ne asabele? Ame la itre xaa trejin, angatr a atreine huliwa ke, hna ini angatre hnene la itre trejin ka macaj. Tune la hna amamane ngöne la iatr, itre trejin trahmanyi me föe a inine troa nyihnyawane la itre uma ne asabele me Uma Ne Baselaia. Eje hi, Iehova Akötresie nge “Joxu ka epine palua,” me Iesu Keriso, “Joxu ne la itre joxu,” a upe la itre ka atreine huliwa troa kuca la itre ewekë ka tru. (1 Tim. 1:17; 6:15; e jë la Ite Edomë 22:29.) Haawe, loi e tro sa catre huliwane la itre hne së hna atreine matre troa atrunyi Iehova, ngo tha easë kö.​—Ioane 8:54.

8. Nemene la ka troa xatua së matre atre la nyine tro sa kuca?

⁸ Troa iëne la ketre mekun nyine troa eatrën. Nemene la nyine tro sa huliwan matre ijije hi tro sa xome la ketre hnëqa? Loi e troa sipo ixatua kowe la itre qatre thup, maine kowe la atre thupëne la sirkoskripsio. Maine angatr a upi së troa pane thel matre maca troa cile fë cainöj me hamë ini, loi e tro sa sipo angatr troa xatua së matre atre la nyine tro sa kuca. Thupene lai, catre jë së trongëne la itre eamo hnei angatr hna hamën. Tune kaa?

9. Nemene la nyine tro sa kuca matre troa maca ngöne la ketre hnëqa?

⁹ Troa thele matre eatrëne la mekun. Maine jë easa ajane troa maca troa hamë ini. E cili, loi e tro sa inine la boroshür hna hape, Troa Atreine e Tus Me Hamë Ini. Maine hetre hnëqa së ngöne la icasikeu e nyipine la wiik, loi e tro sa sipone kowe la ketre trejin ka macaj troa pane drei së me qaja la itre nyine tro sa huliwan. Loi e tro fe a amamane kowe la itre trejin ka hape, ka atreine huliwa së, nge ijije hi tro angatr a mejiun koi së.​—Ite edomë 21:5; 2 Kor. 8:22.

10. Qaja jë la ketre ceitun ka amamane la nyine tro sa kuca matre maca troa xome la ketre hnëqa.

¹⁰ Ngo tune kaa ngöne la easa xom la ketre hnëqa nge thatreine pe së kuca? Tha tro pi kö sa hmacahmaca! Hnei Garry, ketre trejin ka thatreine e tusi hnyawa hna qaja ka hape, angeic a hmahma troa e tusi qëmekene la nöjei atr ngöne la hnë icasikeu. Ame pe, hnei angeice palahi hna thele troa saze ngöne la götrane cili. Jëne la ini hnei angeice hna kapa, atreine hë angeice cile fë cainöj kowe la ekalesia, ngöne la itre asabele ne sirkoskripsio, me asabele katru!

11. Tui Timoteo, nemene la nyine tro sa kuca matre ahnithe koi së la itre xaa hnëqa?

 ¹¹ Hapeu, hnei Timoteo kö hna thele matre maca troa hamë ini? Tha hna qaja kö hnei Tusi Hmitrötr. Ame pe, hnei angeice palahi hna xötrethenge la itre eamo i Paulo. Celë hi lai ka xatua angeic troa xome hnyawa la itre hnëqa hna ahnithe koi angeic. (2 Tim. 3:10) Ketre tu së fe. Maine tro palahi sa thele troa maca, tro ha ahnithe koi së la itre xaa hnëqa.

12. Tune kaa la aqane xatua së hnene la itre xaa trejin?

¹² Easa madrin ngöne la kola xatua së hnene la itre xaa trejin. Ame la kola cipa së e pital hnei droketre, easa madrine la kola traqa troa wai së hnene la itre qatre thup ka huliwa ngöne Komite Ne Ixatua e Pital, maine gurup pena ka wange la itre ka wezipo. Nge ame la kola cile kow la ketre jol hnene la ketre trejin, tru la madrine i angeice ngöne la kola xomi ijin hnene la itre qatre thup matre troa dreng me hamë ithuecatre koi angeic. Maine easë fe a thele troa nyiqaane ini tusi memine la ketre atr, easa madrin troa ce cainöj memine la ketre pionie. Tru la madrinene la itre trejin cili troa ixatua. Eje hi, maine tro fe sa xatuane la itre xan, tro hë sa madrin. Öni Iesu: “Sisitria catre kö la madrine ne la atre ham, hune la atre kapa.” (Itre hu. 20:35) Maine easa ajane troa catre huliwa koi Iehova memine la itre trejin, nemene la nyine tro sa kuca?

13. Nemene la nyine tro sa kuca ngöne la easa mekun la itre ewekë nyine tro sa eatrën?

¹³ Loi e tro sa iëne hnyawa la itre mekun hne së hna ajane troa eatrën. Maine jë, easa ajane troa huliwa catre ngöne la ekalesia. Ngo thatre kö së la nyine troa kuca. Maine pena, tha ijije kö troa eatrëne la huliwa cili. Celë hi kepin matre loi e tro sa iëne hnyawa la itre mekun hne së hna ajane troa eatrën. Ketre, loi e troa cinyihane itre ej me thele la aqane tro sa eatrën.

14. Pine nemene matre easa saze la itre xaa mekun hne së hna ajane troa eatrën?

¹⁴ Ijije hi tro sa saze la itre mekun nyine tro sa eatrën. Pine nemen? Pine laka, thatre kö së la itre ewekë ka troa traqa elany. Hanawang la ketre ceitun. Hnei Paulo aposetolo hna eköthe la ketre ekalesia ka hnyipixe e Thesalonika. Maine jë, Paulo a  ajane troa lapa e cili matre troa xatuane la itre trejin. Ngazo pe, alanyimu la itre ka icilekeu me nyidrë. (Itre hu. 17:1-5, 10) Maine tro Paulo a lapa, tro hë lai a hetre ethane kowe la itre trejin. Ngo tha celë kö lai ka sewe Paulo troa xatuane la itre trejin. Hnei nyidrëti hna upi Timoteo matre troa xatuane la itre trejin ne Thesalonika. (1 Thes. 3:1-3) Eje hi, tru la madrinene la itre trejin ke, hnei Timoteo hna tro kowe la itre götrane gaa aja ixatua tun e Thesalonika.

15. Nemene la itre ewekë ka traqa, matre kola saze la itre mekuna së ngöne la huliwa i Iehova? Qaja jë la ketre ceitun.

¹⁵ Hetre ini hne së hna xome qa ngöne la tulu i Paulo. Maine jë easa ajane troa xome la ketre hnëqa, ngo hetre itre ewekë ka traqa nge ka sewe së troa eatrëne la aja së. (Ate cai. 9:11) Maine celë hi lai ka traqa koi së, loi e tro sa saze mekun, me thele la ketre hnëqa ka ijije tro sa xom. Celë hi lai hna kuca hnei Ted me Hiedi. Hna tithi nyidro hnei mec matre hnei nyidroti hna tro qa ngöne la Bethela. Ngo tru la ihnimi nyidro koi Iehova matre hnei nyidroti hna thele la itre xaa aqane troa catre huliwa koi Nyidrë. Hnei nyidroti hna xome la huliwa ne pionie lapa. Thupene lai, hnei nyidroti hna xome la huliwa ne pionie hut, nge hna acili Ted matre troa nyihnane la atre thupëne la sirkoskripsio. Ngo pine laka, qatre hë nyidro, tha ijiji nyidroti hë troa xome la hnëqa cili. Ame pe, atre hnyawa hi nyidroti laka, ijije palakö tro nyidroti a catre koi Iehova. Öni Ted: “Nyimutre la itre xaa aqane troa huliwa koi Iehova.”

16. Nemene la ini hne së hna xom ngöne Galatia 6:4?

¹⁶ Thatre kö së la itre ewekë ka troa traqa ngöne la mele së. Celë hi matre, tha tro kö sa mekun laka, hnene la itre hnëqa së matre ka sisitria catre së. Ketre, tha tro kö sa meciun me piine la hnëqa i ketre. Öni Hiedi: “Maine easa goeëne la eisapengö së me itre xan me piine la mele i angatr, tha tro hë sa madrin me tingeting.” (E jë la Galatia 6:4.) Ame la ka sisitria catr ke, ene la troa catre huliwa koi Iehova me kowe la itre trejin. c

17. Nemene la nyine tro sa kuca, matre troa hane ahnithe koi së la itre xaa hnëqa e hnine la ekalesia?

¹⁷ Maine easa ajane troa catre huliwa koi Iehova, tha tro kö sa xomi gufa menu. Ngo loi e tro pe sa ahmaloeëne la mele së. Nyipiewekë fe tro sa eatrëne la itre mekun ka co matre hane xome elanyi la itre hnëqa ka tru. Maine easa ajan troa  xome la huliwa ne pionie lapa, loi e tro sa pane xome la huliwa ne pionie ka ixatua e nöjei treu. Nge maine easa ajane troa atre ixatua, loi e tro sa pane catre cainöj me xatuane la itre trejin ka wezipo maine ka qatre hë. Celë hi lai ka troa aijijë së troa hane xome la itre xaa hnëqa ngöne la huliwa i Iehova. Haawe, catre jë së troa eatrëne hnyawa la itre hnëqa hna ahnithe koi së.​—Rom. 12:11.

18. Thenge la iatr, nemene la hna ini së hnene la tulu i Beverley?

¹⁸ Ngacama qatre hë së, ngo ijije hi tro sa thele la itre mekun nyine troa eatrën ngöne la huliwa i Iehova. Celë hi lai hna kuca hnei Beverley, ketre trejine föe ka 75 lao macatre. Hna tithi eahlo hnei meci matre jole hë koi eahlo troa tro. Ngo tru la aja i eahlo troa cainöj me hëne la itre atr kowe la Drai Ne Amekunën. Celë hi matre, hnei eahlo hna iëne la itre mekun hnei eahlo hna atreine eatrën, matre tru catre la madrine i eahlo. Ketre, hnene la tulu i eahlo hna ithuecatre kowe la itre xaa trejin troa hane catre cainöj. Eje hi, ngacama thatreine hë la itre trejin qatr me qatre föe troa cainöj tune ekö, ngo Iehova palahi a wangatrune la itre trengecatre hnei angatre hna kuca.—Sal. 71:17, 18.

19. Nemene la itre xaa ewekë nyine tro sa eatrëne ngöne la huliwa i Iehova?

¹⁹ Loi e tro sa thele la itre mekun hne së hna atreine troa eatrën. Tune la troa eënyine la itre thiina ka lolo nge ka amadrinë Iehova, maine thele troa maca ngöne la ketre hnëqa hna ahnithe koi së. E cili, tro hë Iehova a ië së troa huliwa koi Nyidrë me kowe la organizasio i Nyidrë. Ketre, loi e tro fe sa xatuane la itre trejin. d Nge tui Timoteo, tro hë Iehova a amanathithi së nge tro ha “mama koi nöjei atr asë ka hape, keresiano ka macaje” së.​—1 Tim. 4:15.