1. Sowtu maiki u sa poti?

 U LOBI Yehofa anga u hii ati, bika wi a tuutuu bakaman fu Yesesi. Neen meke u wani du ala san u poi gi en. Ma efu u wani du a sani ya, u mu e poti maiki di u wani doo. U mu meke moiti fu toon wan moo bun Kelesten. U mu e suku fasi fu yeepi taawan tu.

2. Saide u mu e meke moiti fu go a fesi?

² Saide u mu e meke moiti fu toon wan moo bun Kelesten? Wan fu den sani a taki u wani u Dda di de a hemel piisii. Yehofa e piisii te ai si taki wi e koboloiki den koni di wi abi fu dini en. Du fu tu sani a taki u wani yeepi den baala anga sisa fu u (1 Tes. 4:9, 10). A ná abi toobi on langa u dopu kaba, toku ala u sa toon wan moo bun Kelesten. Meke u luku fa u sa du a sani ya.

3. Sowtu taanga-sikin apostel Pawlesi be gi Timotiyesi a 1 Timotiyesi 4:12-16?

³ A pisiten di apostel Pawlesi sikiifi a fosi biifi gi Timotiyesi, Timotiyesi a be wan yonkuman ete. Ma a be de owluman wan pisiten kaba. Toku Pawlesi be taigi en taki a be mu meke moiti fu go a fesi. (Leisi 1 Timotiyesi 4:12-16.) Pawlesi be gi Timotiyesi taanga-sikin fu du tu sani. A fosi sani, a taki Timotiyesi be mu meke moiti fu kon abi manii enke lobi anga biibi. Du fu tu sani, a taki a be mu meke moiti fu toon wan moo bun leisiman anga leliman. Wi o luku fa den sani di Timotiyesi  be e du, sa yeepi u fu poti maiki di o meke u toon wan moo bun Kelesten. Wi o luku fa u sa du moo gi Yehofa tu.

4. Enke fa Filipisama 2:19-22 e soi, da saide Timoiyesi a be wan bun Kelesten?

⁴ Saide Timotiyesi a be wan bun Kelesten? A fu di a be abi den manii di wan Kelesten mu abi. (Leisi Filipisama 2:19-22.) Den sani di Pawlesi be e taki fu Timotiyesi, e soi taki a be abi sakafasi, a be e du en wooko fayafaya, sama be sa fitoow en tu. Boiti dati, a be lobi sama. A be e booko en ede anga den baala anga sisa. Na a sani ya meke Pawlesi á be e feele fu gi en gaan faantiwowtu (1 Kor. 4:17). Efu useefi e meke moiti fu kon abi den manii ya, Yehofa o moo lobi u. Wi o fende moo faantiwowtu aini a kemeente tu.​—Ps. 25:9; 138:6.

5. (a) Fa yu o du sabi sowtu manii i mu meke moiti fu abi? (b) Enke fa a fowtow e soi, da fa a yonkuu sisa e meke moiti fu e moo soi tyali-ati gi taawan?

⁵ Poti wan maiki di i wani doo. Begi Yehofa, da i luku sowtu manii i mu kengi. Poti wan manii di i wani meke moiti fu abi. I si enke i sa meke moiti fu e moo soi tyali-ati gi taawan? I sa meke moiti fu e moo yeepi den baala anga sisa fi i? I sa meke moiti fu e moo libi bun anga taawan? Efuso fu e moo gi sama paadon? I sa akisi wan bun mati fu taigi i san a si enke i sa du moo bun.​—Odo 27:6.

6. Fa i sa doo den maiki di i poti?

⁶ Meke moiti fu doo a maiki di i poti. Fa i sa du a sani ya? Wan fasi fa i sa du a sani ya, a te yu e sutudeli a manii di i wani abi. I sa leisi toli fu sama aini Beibel di be abi a manii ya, anga sama di á be e soi a manii ya. Teke ten pakisei fa i sa wooko anga den sani di i leisi. Luku a toli fu Yesesi. A be e gi sama paadon anga en hii ati (Luk. 7:47, 48). A á be e poti pakisei a den fowtu di taawan be e meke, ma a be e luku den bun manii fu den. Ma den Faliseiman aini a ten fi en be de taa fasi. Den man ya ‘be e si taawan enke soso sani’ (Luk. 18:9). Te yu e pakisei den toli ya, akisi iseefi taki: ‘Fa mi e si taawan? Mi e poti pakisei a den  bun manii fu den? Efuso a den fowtu di den e meke mi e si ala yuu?’ Efu ai taanga gi i fu gi wan sama paadon, pakisei ala den bun manii fu a sama ya da i sikiifi den poti a pampila. Baka dati akisi iseefi taki: ‘Fa Yesesi e si a sama ya? A be o gi en paadon?’ Efi yu e du den sani ya, yu o poi kengi a fasi fa yu e denki. Biginbigin kande a o taanga gi i fu gi wan sama di du wan hati sani anga i paadon. Ma efu wi e tan meke moiti fu kengi, a sani ya o moo makiliki gi u fu du.

7. Enke fa Odo 22:29 e soi, da fa Yehofa e koboloiki den sama di sabi du wan sani bun?

⁷ I sa meke moiti fu leli fa fu du wan sani fu yeepi a olikanisisasi. A omen sama de fanowdu fu meke den Betel-osu, Kownukondee zaal, anga peesi fu holi gaan komakandaa. Omen fu den sama di e du den wooko ya, leli a wooko fu di den be e wooko makandaa anga taa baala anga sisa di sabi du a wooko kaba. Enke fa a fowtow e soi, da baala anga sisa sa leli fa fu seeka den Kownukondee zaal anga den peesi di wi e holi gaan komakandaa. Aini a ten ya, Yehofa, ‘a Kownu fu teego’, anga Yesesi, ‘a Kownu fu den kownu’, e koboloiki den sowtu baala anga sisa ya fu du omen sani gi den. (1 Tim. 1:17; 6:15; leisi Odo 22:29.) U nai wooko anga den koni di wi abi fu suku balinen, ma wi e wooko anga den fu gi Yehofa gaandi.​—Yoh. 8:54.

8. Fa yu o du sabi san i sa du moo bun?

⁸ Poti wan maiki di i wani doo. Sowtu sani i si enke i sa du moo bun? Akisi den owluman fi i kemeente efuso a kelen owluman fu taigi i sowtu sani den si enke i sa du moo bun. Kande den taigi i taki i sa meke moiti fu e moo gi leli bun. Akisi den sowtu sani den si enke o yeepi i fu du a sani ya moo bun. Baka dati, meke moiti fu wooko anga san den taki. Fa i sa du a sani ya?

9. Fa i sa doo a maiki di i poti?

⁹ Meke moiti fu doo a maiki di i poti. Meke u taki i wani toon wan moo bun leliman. I sa sutudeli a bolosilo di den e kai Meke moiti fu toon wan bun leisiman anga leliman. Te yu abi wan paati na a mindiiwiki komakandaa, i sa akisi wan baala di abi ondoofeni fu luku efu yu e du en bun. Efu a soi i san i sa du moo bun, wooko anga den sani di a taki. I mu e seeka a fesi, da sama o si taki yu e wooko taanga. Den o si taki den sa fitoow i tu.​—Odo 21:5; 2 Kor. 8:22.

10. Gi wan toli di e soi fa u sa meke moiti fu du wan sani moo bun.

¹⁰ San i sa du efu a sani di i wani leli e taanga gi i? Yu á mu gi abaa. Wan baala den e kai Garry á be e leisi bun. A taki sen be e kisi en te a be mu leisi a komakandaa. Ma a meke moiti fu leli leisi moo bun. A taki di a du a sani ya, a be poi holi lezing a komakandaa anga den gaan komakandaa.

11. San o yeepi u fu fende moo faantiwowtu leti enke Timotiyesi?

¹¹ Beibel nai taki efu Timotiyesi be toon wan fu den moo bun leliman fu a ten fi en. Ma u sabi taki di a wooko anga den sani di Pawlesi taki, a be poi du en wooko moo bun (2 Tim. 3:10). Efu useefi e meke moiti fu du u wooko  moo bun, wi o fende moo faantiwowtu.

12. San a wantu fasi fa taawan yeepi i kaba?

¹² Na ala wi e fende wini fu den sani di taawan e du. A omen sani taa sama e du fu yeepi u. Efu u siki go na ati-osu, wi e poolo te den baala fu a ati-osu komte kon luku u. Wi e fii bun te wan owluman kon luku u fu gi u taanga-sikin te wi abi polobelema. Wi e piisii te pionili di abi ondoofeni e tyai u go a den Beibelsutudi fu u, bika den e soi u san u sa du moo bun. Ala den baala anga sisa ya e piisii te den e yeepi u. Efu useefi e meke moiti fu yeepi taawan, wi o piisii tu. Yesesi be taki: ‘Te wan sama e gi taawan sani, ai de koloku moo enke te taawan e gi en sani’ (Toli 20:35). Ma san o yeepi i fu du moo gi Yehofa?

13. San i mu holi a pakisei te yu e poti wan maiki di i wani doo?

¹³ I mu sabi pilisisi sowtu maiki i wani doo. Kande i poti enke maiki fu du moo aini a kemeente. Efi i poti a maiki ya, a o taanga gi i fu doo en bika yu á sabi pilisisi san i wani du. A omen sani i sa du aini a kemeente, neen meke i ná o sabi efi i doo a maiki ya tu. Te i sabi pilisisi sowtu maiki i wani doo, a o moo maikiliki gi i fu doo en. I sa sikiifi a maiki fi yu a pampila. Sikiifi san yu o du fu doo a maiki ya tu.

14. San u mu holi a pakisei te u poti wan maiki?

¹⁴ Te wi e poti maiki, u mu holi a pakisei taki a ná ala yuu sani o waka enke fa u be denki. Saide? Bika sani sa kengi aini u libi. Fu fusutan a sani ya moo bun, wi o luku a toli fu Pawlesi. A be yeepi sete wan nyun kemeente aini a foto Tesalonika. U sabi taki a be o wani tan de fu yeepi den nyun Kelesten di be de aini a kemeente ya. Ma fu di sama be e libi ogii anga en, meke a be abi fu foloisi (Toli 17:1-5, 10). Ogii be sa miti den baala anga sisa fu Tesalonika efu Pawlesi á be foloisi. Sani be  kengi, ma Pawlesi á gi abaa. A sende Timotiyesi fu go yeepi den nyun baala anga sisa aini Tesalonika (1 Tes. 3:1-3). Den baala anga sisa ya be musu poolo taki Timotiyesi be de kabakaba fu kon yeepi den.

15. Gi wan ondoofenitoli di e soi fa den sani di e kengi aini u libi sa meke wi abi fu poti taa maiki.

¹⁵ A omen sani u sa leli fu a sani di be miti Pawlesi a Tesalonika. Kande i be poti wan maiki, ma sani kengi aini i libi di meke yu á poi doo a maiki ya moo (Peleik. 9:11). Efu a sani ya miti i, poti wan taa maiki di i si taki yu o poi doo. Na a sani ya Ted anga en uman Hiedi du. Wan fu den be siki, neen meke den á be poi wooko a Betel moo. Ma den be wani suku wan taa fasi fu du moo gi Yehofa. Neen meke den bigin du a pioniliwooko. Baka dati den be fende a gaandi fu wooko enke spesuutu pionili. Den leli Ted fa fu du a kelenwooko tu. Te a kelen owluman á be de, neen be e teke peesi gi en. Bakaten, den baala kengi a yali di wan kelen owluman mu abi. Ted anga Hiedi be gaandi tumisi fu go doo anga a wooko ya. A sani ya be meke den tyali, ma den be sabi taki den be sa du taa wooko gi Yehofa. Ted taki: ‘U leli taki a omen fasi de fu du moo gi Yehofa.’

16. San Galasiyasama 6:4 e leli u?

¹⁶ Wi á poi kengi ala den sani di e pasa aini u libi. Neen meke yu á mu si enke a te i poi du son sani fosi, da Yehofa o piisii anga i. Yu á mu e maiki iseefi anga taawan tu. Hiedi taki: ‘Efi yu e maiki iseefi anga taawan, i ná o piisii moo anga san i poi du.’ (Leisi Galasiyasama 6:4.) U mu e suku fasi fu yeepi taawan anga fu du moo gi Yehofa. b

17. San o yeepi i fu fende moo faantiwowtu aini a kemeente?

¹⁷ A o moo makiliki gi i fu du moo gi Yehofa te i nai libi bigi, anga te i nai meke paiman sosokaali. I mu e poti pikinpikin maiki di o yeepi i fu doo den gaan maiki fi i. Meke u taki i wani du a pioniliwooko. I sa bigin du a yeepi pionili wooko ala mun. Efuso kande i wani toon wan dinali. I sa meke moo ten fu e go luku den gaandiwan anga den sama di siki. I sa meke ten fu e du moo aini a peleikiwooko tu. Den sani di yu e du  nownow sa yeepi i fu tyai moo faantiwowtu aini a ten di e kon. Te den gi i wan gaandi, meke moiti fu du i wooko bun.​—Rom. 12:11.

18. Enke fa a fowtow e soi, da san a toli fu Beverley e leli i?

¹⁸ Noiti u mu si enke u gaandi tumisi fu poti maiki. Luku a toli fu wan sisa den e kai Beverly. A sisa ya abi 75 yali. A abi wan siki di be meke a á poi waka bun. Ma a be wani du moo na a pisiten fu a Membeefesa. Neen meke a poti wan maiki di a be wani doo. Ná pikin piisii a piisii di a doo a maiki ya. Di den taawan aini a kemeente si a moiti di a meke fu doo a maiki fi en, a sani ya gi den taanga-sikin fu du moo aini a peleikiwooko. Yehofa e piisii anga den sani di den gaandiwan e du aini a kemeente, winsi fa den á poi wooko gi en enke fosi moo.​—Ps. 71:17, 18.

19. San o yeepi i fu doo den maiki di i poti?

¹⁹ Poti maiki di i si taki yu o poi doo. Meke moiti fu kon abi manii di Yehofa lobi. Leli fu du sani di o yeepi i fu wooko gi en tu. Suku fasi fu e yeepi den baala anga sisa fi i. c Efi yu e du den sani ya, Yehofa o belesi i. Boiti dati, ‘ala sama o si taki yu e go a fesi’ leti enke Timotiyesi.​—1 Tim. 4:15.