1. Ki òbjèktif nou té’é pé ni pou sèvi Bondyé pibyen ?

 KONM nou sé dé vré krétyen, nou enmé Jéova toubònman. Kifè, nou vé ba-y sa nou ni dè méyè. Men pou nou rivé fè sa, fò-nou ni sèwten òbjèktif. Pa ègzanp, nou pé travay sèwten kalité kè on krétyen dwètèt ni, nou pé aprann fè dé biten ki ké itil adan travay an nou pou Jéova, é nou pé gadé pou vwè kijan nou pé édé frè é sè an nou osi.

2. Poukwa fò-nou ni òbjèktif pou sèvi Jéova pibyen é poukwa fò-nou fè tousa nou pé pou atenn-yo ?

² Noutout dwètèt anvi sèvi Jéova pibyen. Poukwa ? Dabò pou yonn, sé pas nou anvi fè Pap’an nou ki an syèl-la é ki enmé-nou plézi. A pa ti kontan Jéova ka kontan lè i ka vwè kè nou ka sèvi èvè sa nou sav fè é èvè kapasité an nou pou nou sèvi-y ! Anplisdisa, nou vé fè plis pwogré adan lavérité pas nou vé édé frè é sè an nou pibyen ankò (1 Tés. 4:9, 10). Ki nou toufré adan lavérité, ki sa ja ka fè onpakèt lanné kè nou adan-y, noutout pé pwogrésé. An-nou vwè kijan nou pé fè sa.

3. Ka lapòt Pòl ankourajé Timoté fè ? (1 Timoté 4:12-16).

³ Menmsi Timoté té jenn toujou lèwvwè lapòt Pòl maké 1^é lèt-la i voyé ba-y la, sa té ja ka fè on bèl moman Timoté té ansyen. Men magrésa, lapòt Pòl ankourajé-y pou i pé sa kontinyé fè pwogré (li 1 Timoté 4:12-16). Lè ou ka réfléchi asi sa Pòl di, ou ka rann-vou kont kè i té vlé kè Timoté pwogrésé adan 2 domenn diféran : 1) i té vlé kè i pwogrésé adan lanmou-la i té ni la, adan fwa-la kè i té ni la é adan jan i té ka menné on vi ki pwòp é kè i travay dòt kalité ankò. 2) I té vlé i apliké-y lè i té ka li an piblik, lè i té ka ankourajé é lè i té ka anségné lézòt pou vin pi filé adan sé domenn-lasa. Nou ké vwè kijan ègzanp a Timoté ka montré-nou kè lèwvwè nou ni òbjèktif ki rézonab, sa pé  édé-nou sèvi Jéova pibyen. É nou ké ègzaminé osi kijan nou pé fè plis adan prédikasyon-la. Pousa nou ké vwè diféran mannyè nou pé fè sa.

4. Dapré Filipyen 2:19-22, poukwa Timoté té itil an men a Jéova ?

⁴ Pou Jéova, Timoté sé té on moun ki té itil toubònman. Poukwa ? Pas i té ni bèl kalité (li Filipyen 2:19-22). Lè Pòl palé dè-y, i di kè sé on moun ki ni imilité, ki fidèl, ki karé an zafè a-y é kè sé on moun ou té pé ni konfyans adan-y. I pa té pè montré frè é sè a-y kè i té enmé-yo é i té ka enkyété-y onlo pou yo. Sé pousa Pòl té enmé-y é i pa té pè ba-y fè sèwten biten ki té difisil (1 Kor. 4:17). Menmjan-la, siwvwè nou osi nou ka fè ansòt pou ni kalité kè Jéova enmé, Jéova ké enmé-nou é nou ké pi itil adan lasanblé-la (Sòm 25:9 ; 138:6).

5. a) Ka ki pé édé-w vwè ki kalité sa té’é byen kè ou travay ? b) Sè-la ki asi imaj-la ka chèché a fè plis pou mété-y anplas a lézòt. Ki éfò i ka fè pou atenn òbjèktif-lasa ?

⁵ Chwazi on òbjèktif ki byen prési. Priyé é réfléchi pou vwè ki biten adan pèwsonalité a-w ou té’é pé chanjé. Chwazi on kalité an pawtikilyé. Pa ègzanp, ès ou té’é pé fè on travay asi-w pou ou mété-w plis anplas a lézòt oben pou ou anvi édé frè é sè a-w plis ankò ? Ès ou té’é pé fè plis éfò pou antann-vou byen èvè lézòt é pou padonné-yo ? Pétèt ou té’é pé mandé on bon zanmi a-w ka ou pé fè pou ou pwogrésé (Pwov. 27:6).

6. Si ou bizwen travay on kalité, ka ou pé fè ?

⁶ Fè ansòt pou ou atenn òbjèktif a-w. Kijan ou pé fè sa ? Si ou bizwen travay on kalité, pétèt kè ou té’é pé fè rèchèch asi kalité-lasa é étidyé tousa ou ka touvé anlè-y. Pa ègzanp, imajiné kè ou bizwen aprann padonné pi fasilman, pétèt kè ou té’é pé li é médité asi ègzanp a moun ki an Bib-la ki té ka padonné èvè tout tchè a yo, é asi ègzanp a moun ki pa té ka fè sa. Réfléchi asi ègzanp a Jézi ki té toujou paré a padonné lézòt (Lik 7:47, 48). I pa té ka rété gadé sé érè-la sé moun-la té ka fè la men i té ka konsantré-y asi sa yo té pé fè. Men pawkont pou sé Farizyen-la ki té ka viv a épòk a-y la, sé moun-la pa té ni pon valè (Lik 18:9). Apré ou pran tan réfléchi asi sé biten-lasa, mi sa pou mandé-w :  « Lè an ka gadé lézòt, asi ki biten an ka konsantré-mwen ? Asi ki kalité a yo an ka chwazi konsantré-mwen ? » Si ou ni dimal a padonné on moun, éséyé maké asi on papyé tout sé bèl kalité-la kè ou ka vwè kè moun-lasa ni. Aprésa, mi sa pou mandé-w : « Kijan Jézi ka vwè moun-lasa ? Èskè li Jézi té’é padonné-y ? » Si ou ka fè sa, sa ké édé-w chanjé mannyè ou ka rézonné. Lè on moun fè-nou on biten pétèt kè odépa sa ké mandé-nou fè onlo éfò pou padonné-y, men si nou ka kontinyé fè éfò nou ké rivé padonné lézòt pi fasilman.

7. Kijan Pwovèb 22:29, ka montré kè Jéova ka sèvi èvè moun ki ka travay byen menm jòdila ?

⁷ Ondòt òbjèktif ou pé ni sé aprann fè sèwten biten. Réfléchi asi kantité volontè ki fo pou konstwi sé Bétèl-la, sé sal a lasanblé-la é pou konstwi sé sal di Wayòm-la. Nou ka rèmawké kè onlo adan yo ka aprann fè sèwten biten lè yo ka travay èvè frè é sè ki sé dé zouti-filé adan travay a yo. Kon nou ka vwè-y asi imaj-la, yo ka ba plizyè frè é sè on fòwmasyon pou yo aprann kijan pou yo pran swen a sé sal a lasanblé-la é a sé sal di Wayòm-la. Jéova Dyé, ki sé ‘Wa étèwnèl la’ é Jézikris ki sé « Wa a sa ki ka dirijé antankè wa » ka sèvi èvè mwayen-lasa é èvè dòt mwayen ankò pou fè dé moun ki sé dé zouti-filé fè dé biten ki èstraòwdinè (1 Tim. 1:17 ; 6:15 ; li Pwovèb 22:29). Sé pousa nou vé travay rèd é sèvi èvè kapasité an nou. Si nou vé fè sa, a pa pou fè-moun pòté-nou anlè men sé pou ba Jéova glwa (Jan 8:54).

8. Ki biten ki pé édé-w vwè ka pou ou aprann fè ?

⁸ Chwazi on òbjèktif ki byen prési. Ka ki pé édé-w chwazi ki biten ou té’é pé aprann fè ? Mandé ansyen a lasanblé a-w déotwa ti konsèy é pétèt ou pé mandé rèsponsab a siwkonskripsyon-la osi. Si yo ka di-w kè fò ou aprann palé pibyen an piblik oben kè fò ou aprann anségné pibyen, mandé-yo ki kalité oben ki pwen ègzaktèman pou ou travay. É aprésa, fè sa ki fo pou ou pé sa pwogrésé adan domenn-lasa. Kijan ou pé fè sa ?

9. Ka ou pé fè lè ou bizwen aprann fè on biten ?

⁹ Travay pou ou pé sa atenn òbjèktif a-w. Imajiné kè ou bizwen aprann anségné pibyen. Ou té’é pé pran on tan pou étidyé bwochi-la Fè éfò pou li é pou anségné plibyen. Siwvwè yo ba-w fè on sijé pannan réinyon a simenn-la, ou té’é pé mandé on frè kò a-y bon adan domenn-lasa kouté-w lè ou ka répété sijé a-w pou i pé sa di-w adan ki biten ou té’é pé pwogrésé. Préparé sijé a-w alavans, konsa toutmoun ké pé vwè jan ou ka travay rèd é jan ou sé on moun yo pé fè konfyans (Pwov. 21:5 ; 2 Kor. 8:22).

10. Bay on ègzanp ki ka montré kijan nou pé pwogrésé lè nou ka fè éfò pou aprann fè on biten.

¹⁰ Imajiné kè ou bizwen aprann fè on biten é kè ou ni dimal a fè sa, ka ou pé fè ? Pa lésé sa kasé 2 bra a-w ! An-nou vwè ègzanp a on frè non a-y sé Garry. I té ni on ti pwoblèm pou li é i ka sonjé kè lè fò i té li douvan toutmoun an réinyon, i té ka santi-y jenné ! Men i kontinyé travay rèd pou i té pé sa pwogrésé. I ka di kè sé frè-la ki ni èkspéryans la é sé piblikasyon-la édé-y onlo. É grasa sa, aprézan i ka rivé fè diskou adan sé lasanblé lokal la, é adan sé lasanblé a siwkonskripsyon la oben adan sé lasanblé réjyonal la.

11. Ka ki ké édé-nou ni plis rèsponsabilité menmjan ki Timoté ?

¹¹ Ès Timoté vin on mèt-a-mannyòk  pou fè diskou oben pou anségné lézòt ? Labib pa’a ban-nou répons-la. Men asirésèten, piti-a-piti Timoté rivé asimé sé rèsponsabilité-la i té ni la pibyen pas i té ka kouté sé konsèy-la Pòl té ka ba-y la (2 Tim. 3:10). Menmjan-la, si nou ka fè éfò pou aprann fè sèwten biten pibyen, nou ké pé ni plis rèsponsabilité.

12. Kijan frè é sè a-w ja édé-w ?

¹² Frè é sè an nou ka fè onlo biten pou édé-nou. Pa ègzanp, lèwvwè nou lopital, nou kontan toubònman lè on ansyen ki ka fè pawti a on komité pou fè lyannaj èvè sé lopital-la ka vin vwè-nou oben on ansyen ki ka fè pawti a on gwoup ki ka rann sé malad-la vizit. Oben lèwvwè nou ka jwenn éprèv, nou kontan toubònman lèwvwè on ansyen ka kouté-nou é kè i ka konsolé-nou. Lèwvwè osi nou bizwen fè on étid é kè nou bizwen kè yo ban-nou on pal, nou kontan lè on pyonyé ki ni èkspéryans ka vin èvè nou adan étid-la é kè i ka ban-nou déotwa ti konsèy. Frè é sè an nou kontan toubònman lèwvwè yo ka édé-nou. É si nou osi nou ka fè tousa nou pé pou édé frè é sè an nou, nou ké ni tchè-kontan kon yo. Mi sa Jézi ni lokazyon di : « On moun ka pli kontan lè i ka bay ki lè i ka rèsèvwa » (Akt 20:35). Si ou bizwen fè plis pou Jéova adan domenn-lasa oben adan dòt domenn ankò, ka ki ké édé-w ?

13. A ki biten fò-nou fè atansyon lè nou ka chwazi on òbjèktif ?

¹³ Lè ou ka chwazi ki òbjèktif ou ké chèché a atenn, fò ou chwazi on òbjèktif ki byen prési. Pa ègzanp, ou té’é pé di an tchè a-w kè ou vlé fè plis adan lasanblé-la. Men konm ou pa chwazi on òbjèktif ki byen prési, pétèt ou ké ni dimal a sav ka pou ou fè pou atenn òbjèktif a-w é anplisdisa ou pé’é jen pé sav a ki moman ou rivé atenn-li. Alò lè ou ka chwazi on òbjèktif, fè ansòt pou òbjèktif-lasa byen klè an lèspri a-w é pou i byen prési. Pétèt ou pé jous maké òbjèktif-lasa on koté é maké osi ka ou ké fè pou ou pé sa atenn-li.

14. Poukwa fò-nou paré a adapté-nou lèwvwè nou ka chwazi on òbjèktif ?

¹⁴ Lèwvwè nou ka chwazi on òbjèktif, fò-nou paré a adapté-nou. Poukwa nou ka di sa ? Pas a pa tout biten nou ka  rivé métrizé. An-nou pran on ègzanp : Lèwvwè yo fòwmé lasanblé a Tésalonik, lapòt Pòl bay on bèl pal. Sèten òbjèktif a-y sé té rété adan vil-lasa pou édé sé nouvo krétyen-la. Men lèwgadé, lènmi a-y fòsé-y pati (Akt 17:1-5, 10). Siwvwè i pa té pati, i té’é mèt vi a sé frè é sè a lasanblé-la andanjé. Magré tousa, i pa lagé-yo. I fè kò èvè nouvo sitiyasyon-la. É pita, i voyé Timoté Tésalonik pou i té pé sa édé sé nouvo krétyen-la ni on fwa ki fò (1 Tés. 3:1-3). A pa ti kontan yo dwèt té kontan kè Timoté té òwganizé-y pou i té pé sa ay toupatou yo té bizwen-y !

15. Lè sitiyasyon an nou ka chanjé, kijan sa pé aji asi òbjèktif an nou ? Bay on ègzanp.

¹⁵ Sa ki rivé Pòl Tésalonik ka aprann-nou onlo biten. Pétèt nou anvi atenn on òbjèktif, men kè ni plizyè biten ki ka fè kè sa pa posib é nou pé pa fè ayen pou chanjé sa (Ékl. 9:11). Si sé ka a-w, chwazi ondòt òbjèktif kè ou ké pé atenn. Sé sa Ted é Heidi fè. Yo té ka viv adan Bétèl-la, men konm yonn adan yo té malad yo té oblijé pati. Men konm yo té enmé Jéova onlo, yo chèché a vwè ka yo té’é pé fè pou fè plis pou Jéova. Prèmyé biten yo fè, sé vin pyonyé pèwmanan. Aprésa yo nonmé-yo pyonyé èspésyal, é Ted risivwè on fòwmasyon pou i té pé sa vin ranplasan a rèsponsab a siwkonskripsyon. Men plita lòwganizasyon désidé kè lèwvwè ou ni on sèwten laj, ou pé pa rété rèsponsab a siwkonskripsyon ankò. Alò Ted et Heidi rann-yo kont kè yo pa té’é pé sèvi Jéova konsa ankò akòz dè laj a yo. Sé vré, sa désèvwa-yo, men yo té sav kè té ni mwayen sèvi Jéova dòt jan ankò. Mi sa Ted ka èspliké : « Nou rann-nou kont kè pa ni onsèl mannyè pou sèvi Jéova. »

16. Ka Galat 6:4 ka aprann-nou ?

¹⁶ Nou pé pa métrizé tousa ki ka pasé adan vi an nou. Sé pousa fò pa nou mèt an tèt an nou kè valè an nou ka dépann dè rèsponsabilité kè nou ni é fò pa nou konparé-nou nonplis èvè dòt frè é sè ki ni rèsponsabilité kè nou nou pa ni. Mi sa Heidi ka èspliké : « Lè ou ka konparé vi a-w èvè sa lézòt ka viv, ou ka pèd jwa a-w » (li Galat 6:4). Sa ki pli enpòwtan, sé kè nou chèché a vwè ka nou pé fè pou nou édé lézòt é pou nou sèvi Jéova b.

17. Ka ou pé fè pou ou pé sa paré pou yo ba-w rèsponsabilité ?

¹⁷ Ou ké pé fè plis pou Jéova si ou ka désidé menné on vi ki senp é si ou pa’a mèt pon dèt initil asi do a-w. Chwazi  déotwa ti òbjèktif ki ké édé-w atenn dòt òbjèktif ki pi gran. Si òbjèktif a-w sé vin pyonyé pèwmanan, ès ou té’é pé koumansé pa vin pyonyé an ranfò chak mwa ? Si òbjèktif a-w sé vin asistan, ès ou té’é pé pasé plis tan an prédikasyon é ès ou té’é pé òwganizé-w pou ay vwè frè é sè ki malad oben ki ja ni on bèl laj adan lasanblé a-w ? Si ou fè sa, sa ké ba-w on bèl èkspéryans kè ou té’é pé itilizé plita lèwvwè yo ké ba-w rèsponsabilité. Fò ou byen désidé a fè tousa ou pé kèlkèswa rèsponsabilité-la ou ni la (Wom. 12:11).

18. Kon imaj-la ka montré-y, ka ègzanp a Berverly ka aprann-nou ?

¹⁸ Pa ni laj pou on moun ni òbjèktif é pou i atenn-yo. Sé sa ègzanp a Berverly ka montré-nou. Sè-lasa ni 75 an é i pa’a rivé maché byen akòz dè on pwoblèm a santé. Men i té tèlman anvi fè plis pou pawtisipé adan prédikasyon èspésyal la ki ka fèt pou Mémoryal-la, alò i chwazi òbjèktif ki té byen prési, é i réyisi atenn-yo. A pa ti kontan i té kontan. Anplisdisa, lè sélézòt frè é sè la vwè sé éfò-la kè sè-la fè la, sa ba-yo plis balan pou yo té pé sa préché plis. Menmsi frè é sè an nou ki ja ni on bèl laj pé pa fè tousa yo té’é vlé akòz dè sitiyasyon a yo, travay-la yo ka fè la ni onlo valè pou Jéova (Sòm 71:17, 18).

19. Bay déotwa òbjèktif nou pé chèché a atenn pou nou pé sa fè plis pou sèvi Jéova.

¹⁹ Chwazi òbjèktif kè ou pé rivé atenn. Travay sèwten kalité ki ké fè Jéova plézi. Aprann fè sèwten biten ki ké fè-w vin pli itil ankò pou Bondyé é pou òwganizasyon a-y. Chèché dòt mannyè pou ou pé sa édé frè é sè a-w adan lasanblé-la c. Konsa, kon Timoté, grasa bénédisyon a Jéova « toutmoun ké vwè kè ou ka fè pwogré » (1 Tim. 4:15).