1. Gbò éé ní eé láá noo sẹ̀ẹ̀a sĩ́ ea kil ló gè fã̀ Bàrì e?

 DÌ BELÍ kà kà gbò nyòòne nvéè Kráìst, è palàge vùlè Jìhóvà. È gbĩ́ gè naa kọọ̀ bẹẹ sìtóm nè Jìhóvà á dú lé lọ̀l vaá à lee. Be è gbĩ́ gè sí tóm nè Jìhóvà dẹ̀ẹ̀a boo bé e bẹẹ kpóó sim tùlà naa, àé dú bíi kọ é noo nu sẹ̀ẹ̀a sĩ́, dì belí gè toní gbò kpãà neǹ Kráìst, nó kele-kele íb kalì, vaá gbĩ́ sĩ́deè eé nveemà bá nè dõòna gbò. *

2. Éé ní ea náa èé noo nu ea kil ló gè fã̀ Bàrì sẹ̀ẹ̀a sĩ́ vaá pììga boo gè teá tùlàẹ?

² Éé ní ea náa vaá à bọ́ló kọ é íe lèèma mm̀ gbò nú ea é náa kọ é sìm kilsĩ́ mm̀ ge fã̀ Bàrì e? Níà boo béè kọọ̀ è gbĩ́ gè naa nu ea léémá bẹẹ Tẹ̀ ea vulèi, ea di káála. Nyíè Jìhóvà ólò ẹẹ tṍó ea mon kọọ̀ è túù dénè bẹẹ nyìmànù nè kalì siimá tóm nèe. Gbá ló vó, è gbĩ́ gè sìm kilsĩ́ mm̀ bẹẹ gè fã̀ Bàrì kọbé è láá kpáá palàge nvèè bá nè pá vígà. (1 Tẹ̀s. 4:​9, 10) Dénè bẹ̀ì é láá sìm kilsĩ́ mm̀ bẹẹ ge fã̀ Bàrì, e bè náa dẹẹ̀a boo gã́bug gbáá e ni tõoma mm̀ kà kàí. Naanii èé ẹb bé eé láá naa vó naa deè nieí.

3. Dẹ̀ẹ̀a boo nú ea di mm̀ 1 Tímotì 4:​12-16, éé ní e neǹ tóm Pọ́ọ̀l beè siè kpóó ló Tímotì kọ á naa ẽ́?

³ Tṍó e neǹ tóm Pọ́ọ̀l beè emí túá kà a kpá lẹ̀ẹ̀la tóm má Tímotì, beè dú tṍó e nvín ãaí ni dú kànen mm̀ bõ̀ònatõ̀ò e togóe tulà nu. Sõò, Pọ́ọ̀l beè sièe kpóó ló kọ á sìm kilsĩ́ mm̀ a gè fã̀ Bàrì. (Bugi 1 Tímotì 4:​12-16.) Tṍó eo gé bugi togó boo gbò moǹ bel Pọ́ọ̀lí, òó nveè kpíi ló kọ à géè gbĩ́  kọọ̀ Tímotì á sìm kilsĩ́ mm̀ bàà sĩ́ deè: túá kà dú gè toní gbò kpãà neǹ Kráìst dì belí vulà, zìgà, nè ge tõó dùm ea õoà, vaá ní ea égè bàà dú gè sìm kilsĩ́ mm̀ ge olòó bugi nu, ge siè kpóó ló gbò nen, nè ge noòmà nu. Èé gbóó ló bel boo bé e nu dòòmà Tímotì é nveè bá nèi kọ é láá noo gbò nu sẹ̀ẹ̀a sĩ́ ea é válií ló gè teá tùlà kọbé è sim kilsĩ́ mm̀ bẹẹ gbaa ló kilma ló Jìhóvà. Èé ló nágé bel boo sìgà sĩ́deè eé láá bọ̀ọ̀vẹ̀ gbàà bẹẹ sìtóm kọ̀ kpẹ̀a.

4. Dẹ̀ẹ̀a boo nú ea di mm̀ kpá Fílipaì 2:​19-22, éé ní ea beè naa kọọ̀ Jìhóvà á tú Tímotì siimá tóm ẽ́?

⁴ Éé ní ea beè naa kọọ̀ Jìhóvà á tú Tímotì siimá tóm ẽ́? A beè dú boo béè gbò a lé kpãa. (Bugi Fílipaì 2:​19-22.) Tení dú ló bel e Pọ́ọ̀l kọ́ kilma ló Tímotì, èé láá mòn kọọ̀ a beè kìlmà kpá ló kẽ, bọ́ló dẹ̀lẹ̀ nyíé boo, sí tóm agẹlẹ bá, vaá dú nen e bàé láá dẹ̀ẹ̀a boo. À ólò láá zọ̀ dõòna gbò naaá nu vaá palàge bùlà nú ea kil ló pá vígà. Vó beè naa kọọ̀ Pọ́ọ̀l á vùlè Tímotì naa ní ea née gã́bug tóm gè sì. (1 Kọ́r. 4:17) Mm̀ tẽ̀ènè sĩ́deèá, Jìhóvà é vulèi vaá túi siimá gã́bug tóm mm̀ bõ̀ònatõ̀ò be è tóní gbò kpãa ea léémáe.​—Ps. 25:9; 138:6.

5. (a) Mósĩ́ deè ní eo é láá nè béèlàfùl kilma ló íb kpãà neǹ Kráìst eo gbĩ́ gè toní ẽ́? (b) Dì belí bé ea dọa bàlà kẽ mm̀ fùtóá naa, mósĩ́ deè ní e nvín ãaí dì ea gé sí tóm boo a nu sẹ̀ẹ̀a sĩ́ ea kil ló gè kpáá palàge ié tóè sàn kilma ló dõòna gbò e?

⁵ Sà ene kà nu sẹ̀ẹ̀a sĩ́. Tã̀àgã ló Bàrì vaá ò bugi togó boo gbò láb ea dú bíi kọ ó sítóm boo mm̀ o dùm. Sà ene kà kpãa ea é léémá ni gè toní. Dì belí nu dòòmà bá, é kọ òó láá kpáá palàge ié tóè sàn àbèè ge palàge nvèè bá nè pá vígà? É kọ à dú bíi kọọ̀ ó kpáá dú neǹ fẹ́ẹ́-fẹẹ̀ ló vaá ia ló pọ́lọ́ nè dõòna gbò? Òó láá gbĩ́ lọ̀ọ̀gà bùlà lọl bá kóò eo dẹlẹ̀ nyíé boo ea kil ló gbò gá ea dú bíi kọ ó kpáá sí tóm boo.​—Pró. 27:6.

6. Mósĩ́ deè ní eo é láá pììga boo gè sìm tùlà kpãa eo sẹẹ̀a sĩ́ gè toní ẽ́?

⁶ Pììga boo gè sìm tùlà o nu sẹ̀ẹ̀a sĩ́? Mósĩ́ deè ní eo é láá naamá vó é? Enè sĩ́deè dú gè tú ọ̀ẹ̀ dẽe noomá nu ea kil ló kpãa eo gbĩ́ gè sí tóm booá. Tuumá kọọ̀ ò gbĩ́ gè kpáá palàge ia ló nè dõòna gbò. Òó láá dààmà tógó tení dú ló gè bugi vaá bugi togó boo nu dòòmà bá ea di mm̀  Kpá Káí ea kil ló gbò e ba beè pàlage ia ló nè dõòna gbò nè gbò e bà náa beè naa vó. Bugi togó boo nu dòòmà bá Jíízọ̀s. A beè ia ló nè dõòna gbò lọa nyíe. (Lúùk 7:​47, 48) Náa beè ẹ̀b ba gbò lọ̀, sõò a beè mòn gbò lé tóm e bàé láá sì. Sõò pá Fárèsì e ba beè di deè Jíízọ̀sa beè “ẹ̀b dõòna gbò kilma kẽ.” (Lúùk 18:9) Tṍó eo ni bugi togó boo gbò nu dòòmà báí lọ̀l, bĩiná o bá kọọ̀: ‘Éé ní e nda monì mm̀ dõòna gbò e? Mókà ba gbò kpãa ní ea é léémá nda gè ká bùlà gbẹẹ́ boo é?’ Be à tavàlà ní ló gè ia ló nè nen, pììga boo gè emí gã́bug lé kpãa e nená íe. Tṍóá ò gbóó bĩiná o bá kọọ̀: ‘Jíízọ̀s ẹb není naa vàẹ? É kọọ̀ àé ia ló nèe?’ Be è náa vó, àé nveè bá nèi kọ é sí tóm boo bé e bugì togó naa. Dààmà togó, àé láá tàvàlàí ló gè ia ló nè nen ea síi pọ́lọ́. Sõò be è kilsĩ́ gè sí tóm boo, àé beè gbóó valíí ló gè ia ló nè nen.

7. Dẹ̀ẹ̀a boo nú ea di mm̀ kpá Próvẹẹ̀b 22:​29, mósĩ́ deè ní e Jìhóvà dì ea gé tú gbò e bà íe kalì siimá tóm deè nieí é?

⁷ Dõòna kà nu eo é láá sẹ̀ẹ̀a sĩ́ dú gè nó kalì ea é dọ bélè. Bugi togó boo gã́bug gbò e bà dú bíi tṍó ea é dú gè tìb gbò tọọ̀ tóm ea di Bẹ́tẹẹ̀l, Àsémblì Họ́ọ̀l, nè Kíndòm Họ́ọ̀l. Gã́bug gbò e bà gé sí tómí ólò ié gbò kalìí tení dú ló gè zọ̀ pá vígà e bà íe gbò kalìí siá tóm. Dì belí bé ea dọa bàlà kẽ mm̀ fùtóá naa, gbò vígà págbálà nè pábiaí dì e bà gé nó gbò kalì ea dú bíi gè siimá tóm ló Àsémblì Họ́ọ̀l nè Kíndòm Họ́ọ̀l. Níì sìgà sĩ́deè e Jìhóvà Bàrì, ea dú “Méné ea dì lee,” nè Kráìst Jíízọ̀s, ea dú “Méné gbò méné,” gé tú pá a gbò gyóòlo siimá gbò tóm ea dú dũ̀ùnè. (1 Tím. 1:17; 6:15; bugi Próvẹẹ̀b 22:29.) È gbĩ́ gè sí tóm agẹlẹ bá vaá tú bẹẹ kalì nvèèmà ka ló Jìhóvà, níì bẹẹ bá nì.​—Jọ́ọ̀n 8:54.

8. Mósĩ́ deè ní eo é láá sà ene kà kalì sẹ̀ẹ̀a sĩ́ ẽ́?

⁸ Sà ene kà kalì sẹ̀ẹ̀a sĩ́. Mokà kalì ní ea é léémá ni gè iéé? Bĩiná gbò kànen ea di bọọ bõ̀ònatõ̀ò àbèè nen ea ólò kùdẽe ló sẹ́kiùt íb kalì e bà bulà kọ òó láá nò. Dì belí nu dòòmà bá, bàé láá kọ ó kpáá sìm kilsĩ́ mm̀ o kalì ge loomá bel nè ge noòmà nu, kọ́ nèva kọ bàá kọ́ gá ea dú bíi kọ ó sí tóm boo. Vaá ò gbóó naa gbò nu ea é náa kọ ó sìm kilsĩ́ mm̀ ge tú gáá siimá tóm. Mósĩ́ deè ní eo é láá naa níí ẽ́?

9. Mósĩ́ deè ní eo é láá teá tùlà o nu sẹ̀ẹ̀a sĩ́é?

⁹ Pììga boo gè teá tùlà o nu sẹ̀ẹ̀a sĩ́. Tuumá kọọ̀ ò gbĩ́ gè kpáá sìm kilsĩ́ mm̀ o kalì ge noòmà nu. Òó láá tú ọ̀ẹ̀ dẽe noomá bróshọ̀ ea kọlà Nvèè Sĩ́ Ló Gè Olòó Bugi Nu Nè Ge Noòmà Nu. Tṍó e bà né nu ge naa gbẹá nònù èèlè nyíè zẹ̀ẹ̀ sè, òó láá kọ́ nè neǹ vígà e togóe tulà nu kọ á pãane tṍ vaá kọ́ gbò gá eo é sí tóm boo besĩ́ à kálá dọ̀ dee eo é náa. Tú tṍó gbẹẹ́ sĩ́ kpoomá dee ló kọbé bà mon o pììgà vaá dẹlẹ́ ni nyíé boo.​—Pró. 21:5; 2 Kọ́r. 8:22.

10. Nè nu dòòmà bá ea kil ló bé e nen é láá sìm kilsĩ́ mm̀ kalì ea gbĩ́ gè ié naa.

¹⁰ Éé ní eo é náa beè nu sẹ̀ẹ̀a sĩ́ eo gbĩ́ gè teá tùlà dú nu ea ólò tàvàlà ní ló gè naa ẽ́? Lóó ni á gá ọọ! Ene kà vígà págbálà ea bée kọlà Garry náa beè láá bugi nu. À kẽèa boo bé e kẹ́ẹ beè olòó siíe naa tṍó ea bugi nu gbẹá nònù. Sõò a beè pììga boo ge sìm kilsĩ́. Kátogóí, à kọ́ọ̀ boo béè búma ea íèè, à ólò gbóó láá neè lòbèl gbẹá Kíndòm Họ́ọ̀l, sẹ́kiut àsémblì, nè pọ̀bkà bõ̀ònaló!

11. Dì belí Tímotì, éé ní ea é láá nvèè bá nèi kọ é sí gã́bug tóm nè Jìhóvà ẹ?

¹¹ É kọọ̀ Tímotì beè gbóó dú kà lé neǹ  lòbèl nè neǹ nòòmànù? Kpá Káí náa kọ́. Sõò Tímotì beè sí a tóm leevè boo béè kọ a beè gbàntṍ ló dùùlà bá deè tṍ Pọ́ọ̀l. (2 Tím. 3:10) Mm̀ tẽ̀ènè sĩ́deèá, be è sim kilsĩ́ mm̀ bẹẹ gbò kalì, èé sí gã́bug tóm nè Jìhóvà.

12. Mósĩ́ deè ní eo ni íe bélè lọl ló nvèè bá ea aa bá dõòna gbò e?

¹² Dénè bẹ̀ì ólò ié bélè lọl ló nvèè bá ea aa bá dõòna gbò. Tṍó e di tọọ̀ biè, nyíéi ólò ẹẹ tṍó e gbò kànen e bà dṹùnà Hospital Liaison Committee àbèè Patient Visitation Group dú gé kãái. Tṍó e gé téní bá tàvàlà dìtõ̀ò, nyíéi ólò ẹẹ tṍó e neǹ kànen ea bulà nú ea kilíí ló, pãanéi tṍ ló, vaá nvèèi nyíé gbàà. Tṍó e íe bíi ló nvèè bá ea kil ló gè noòmà Kpá Káí nen, nyíéi ólò ẹẹ tṍó e neǹ gyà deèsĩ́ tóm kọ̀ kpẹ̀a e togóe tulà nu gbááaí ló vaá nè gbò lọ̀ọ̀gà bùlà ea dọ bélè. Nyíè dénè pá vígàí ólò ẹẹ gè nvèè bá nèi. Èé láá ié íb zààvàí be è tú lóó nè ge nvèè bá nè pá vígà. Jíízọ̀s beè kọọ̀, “Tã́áná dee bá di ló nen ea ne èlmà nen ea tú.” (Tóm 20:35) Be ò gbĩ́ gè bọ̀ọ̀vẹ̀ gbàà o sìtóm mm̀ na sĩ́deèí àbèè dõòna gbò sĩ́deè, éé ní ea é nveè bá nè ni kọ ó teá tùlà ẹ?

13. Éé ní ea bọ́ló kọ ó kẽ̀èa boo tṍó eo gé noo nu sẹ̀ẹ̀a sĩ́é?

¹³ Ó gá noo gã́bug nu sẹ̀ẹ̀a sĩ́. Dì belí nu dòòmà bá, òó láá bugi togó kọọ̀, ‘Àé léémám gè naa gã́bug nu mm̀ bõ̀ònatõ̀ò.’ Sõò àé láá tàvàlà ge nyimá tṍó eo téà tùlà boo béè kọọ̀ ò noò gã́bug nu sẹ̀ẹ̀a sĩ́. Vóà naa, sà ene kà nu sẹ̀ẹ̀a sĩ́ ea é váli ní ló gè teá tùlà. Òó láá emí o nu sẹ̀ẹ̀a sĩ́ nè bé eo gbĩ́ gè teá tùlà naa.

14. Éé ní ea náa vaá à dú bíi kọ é noo nu sẹ̀ẹ̀a sĩ́ mm̀ sĩ́deè eé láá nyaaná bá ló é?

¹⁴ À dú nágé bíi kọ é noo nu sẹ̀ẹ̀a sĩ́ mm̀ sĩ́deè eé láá nyaaná bá ló. Ló éé? Boo béè kọọ̀ née é láá lẹ̀ẹ̀là bel ló bẹẹ dìtõ̀ò dénè tṍó. Dì belí nu dòòmà bá: Neǹ tóm Pọ́ọ̀l beè nvèè bá nvèè bõ̀ònatõ̀ò mm̀ boǹ Tẹ̀sàlónaikà, vaá a beè ié bùlà ge tõó kĩé nvèè bá nè gbò e bà ã́àa bã mm̀ bõ̀ònatõ̀òa. Sõò gbò nàà uú boo beè naa kọọ̀ Pọ́ọ̀l á teelá aa boná. (Tóm 17:​1-5, 10) Dùm pá vígà gáẹ̀ beè bã kèbá gẹẹ-gẹẹ ló  be Pọ́ọ̀l beè kilsĩ́ gè gbẹá boná. Sõò lóó Pọ́ọ̀l náa beè ọọ. A beè nyaaná bá ló nu nyòòmà dìtõ̀ò ea bã́ kẽ. Tṍó e tṍó téní, a beè lẹ̀ẹ̀là Tímotì kọ á gé nvèè bá siè kpóó ló zìgà gbò e bà ã́àa ba mm̀ bõ̀ònatõ̀ò ea di Tẹ̀sàlónaikàa. (1 Tẹ̀s. 3:​1-3) Nyíè pá vígà e ba beè di Tẹ̀sàlónaikà beè iè ge ẹẹ kọọ̀ Tímotì tú lóó nè gè sí tóm kọ̀láá kiẽ́e e bà íée bíi ló.

15. Mósĩ́ deè ní e bẹẹ dìtõ̀ò é láá naa kọọ̀ bẹẹ nu sẹ̀ẹ̀a sĩ́ á nyaaá ẽ́? Nè nu dòòmà bá.

¹⁵ Èé láá nó nu lọl ló nu e Pọ́ọ̀l beè tení bá gbẹá Tẹ̀sàlónaikà. Àé láá dú kọọ̀ è gé piigà ge teá tùlà ene kà dọ̀ tóm mm̀ bõ̀ònatõ̀ò, sõò bẹẹ dìtõ̀ò náa zigà kọ é láá sìm tùlà. (Èklì. 9:11) Beè níí dú kà kà kilma ló olo, noo dõòna kà nu sẹ̀ẹ̀a sĩ́ eo é láá teá tùlà. Níà nú e dóm nè va e ba bée kọlà Ted nè Hiedi beè naa ẽ́. Zọ̀ kpá ló beè naa kọ bàá aa ló tóm Bẹ́tẹẹ̀l. Sõò ba vulè kilma ló Jìhóvà beè naa kọ bàá gbĩ́ dõòna sĩ́deè ge bọ̀ọ̀vẹ̀ gbàà ba sìtóm kọ̀ kpẹ̀a. Dààmà togó, ba beè bã boo tóm gyà deèsĩ́ tóm kọ̀ kpẹ̀a. Tṍó e tṍó téní, ba beè íva bá ló naamá gbò gyà deèsĩ́ tóm kọ̀ kpẹ̀a ea di kele, vaá ba beè bumá Ted naamá substitute circuit overseer. Tṍóá, ba beè gbóó nyaaná bá ló gbáá e nen é tóólá vaá náa é du ná neǹ ge kùdẽe ló sẹ́kiùt. Ted nè Hiedi beè gbóó nyimá kọọ̀ bà náa é láá kunàè dẽe ló sẹ́kiùt boo béè kọọ̀ ba gbáá a sígá ló. Náa kal ló béè kọọ̀ nyíé va beè bììlà, ba beè dã́tẽ́ ló kọọ̀ bàé láá siè tóm neè Jìhóvà mm̀ kele-kele sĩ́deè. Ted kọ́ọ̀, “È beè nó kọọ̀ née é tú áá tẽ̀ènè sĩ́deè siimá tóm nè Jìhóvà.”

16. Éé ní eé láá nó lọl mm̀ kpá Gàlésìà 6:4 é?

¹⁶ Née é láá lẹ̀ẹ̀là bel ló dénè nu ea é nááaí ló mm̀ dùm. Boo béè vó, à palàge dú bíi kọ é gá bugi togó kọọ̀ gã́bug tóm e síì ní ea é náa kọọ̀ Jìhóvà á nvèèi ka ló é, àbèè ge tú bẹẹ tóm doolé ló níí dõòna gbò. Hiedi kọ́ọ̀, “Nyíé ni náa é ẹ́ẹ na be ò tú o dìtõ̀ò doolé ló níí dõòna gbò.” (Bugi Gàlésìà 6:4.) À palàge dú bíi kọ é gbĩ́ kele-kele sĩ́deè eé láá siimá tóm nè Jìhóvà vaá nvèèmà bá nè dõòna gbò. *

17. Éé ní eo é náa kọbé ò láá sìm tùlà ge sí gbò tóm ea di mm̀ bõ̀ònatõ̀ò ẽ?

¹⁷ Àé váli ní ló gè sí gã́bug tóm nè Jìhóvà be ò tõó dùm ea válí bá vaá òòà aa ló gè dé kom. Noo ńkem̀ nu sẹ̀ẹ̀a sĩ́ ea é nveè bá nè ni kọ ó teá tùlà ní ea bọọ. Dì belí nu dòòmà bá, be ò gbĩ́ gè dú neǹ gyà deèsĩ́ tóm kọ̀ kpẹ̀a dénè tṍó, é kọ òó láá  dààmà togó tení dú ló gè tú gã́bug ẽ́ siimá tóm gyà deèsĩ́ tóm kọ̀ kpẹ̀a kélè dẽè tṍó? Be ò gbĩ́ gè dú neǹ nvèè bá sìtóm mm̀ bõ̀ònatõ̀ò, é kọ òó láá tú gã́bug tṍó kọọmá kpẹ̀a, kãa gbò e kpá ló va zọ, nè gbò e bà dú kànen mm̀ dee e bà di mm̀ bọọ bõ̀ònatõ̀ò? Búma eo íè kátogóí é náa kọ ó ié nèà deè ge siimá gã́bug tóm dì deèsĩ́. Bééláfùl ge tú dénè o kói siimá kọ̀láá kà tóm e bà né ni.​—Róm̀ 12:11.

18. Dì belí bé ea dọa bàlà kẽ mm̀ fùtóá naa, éé ní e nu dòòmà bá Beverley nóòmà ni ẽ́?

¹⁸ Kọ̀láá bé e ni dú kànen naa, èé láá noo nu sẹ̀ẹ̀a sĩ́ ea kil ló gè fã̀ Bàrì vaá teá tùlà. Bugi togó boo nu dòòmà bá vígà pábia ea bée kọlà Beverley ea ni tóólá 75 gbáá. A beè ié kà agẹbá zọ̀ kpá ló ea ólò naa kọ á tàvàlàẹ́ ló gè kyã̀à. Sõò a beè tànie gè vee nu ea kil ló Sẹ̀lẹ̀nù Ge Kẽ̀èa Boo Ú Kráìst. Vó beè naa kọ á noo gbò nu sẹ̀ẹ̀a sĩ́ ea é náa kọ á teá tùlà. Tṍó e Beverley téá tùlà gbò a nu sẹ̀ẹ̀a sĩ́ ea kil ló vèènùa, nyíée beè palàge ẹẹ. A pììgà beè nvèè bá nè dõòna gbò kọ bàá kpáá palàge siá kpóó ló mm̀ ba sìtóm kọ̀ kpẹ̀a. Jìhóvà nvee ka ló tóm e pá vígà págbálà nè pábia e baa ni dú kànen mm̀ dee gé sí, kọbèè ba dìtõ̀ò náa sọtọ́ deè kọ bàá láá sí gã́bug.​—Ps. 71:​17, 18.

19. Sìgà éé ní eé láá noo sẹ̀ẹ̀a sĩ́é?

¹⁹ Noo gbò nu sẹ̀ẹ̀a sĩ́ eo é láá teá tùlà. Toní gbò kpãa ea léémá Jìhóvà. Nó gbò kalì ea é náa kọọ̀ Bàrì á tú ni siimá gã́bug tóm mm̀ a bõ̀ònatõ̀ò. Gbĩ́ gbò sĩ́deè eo é láá kpáá palàge nvèèmà bá nè pá vígà págbálà nè pábia. * Dì belí Tímotì, tã́áná dee bá ea aa bá Jìhóvà é náa kọọ̀ dénè nen á mòn “bé eo [gé] kilsĩ́ naa.”​—1 Tím. 4:15.