1. ¿Kasa waʼyataainjatka achiirua suluʼu nupueulose Maleiwa?

 AISHI WAPÜLA Jehová otta aʼyataweeshii waya nümüin süka süpüshuaʼa waaʼin. Süpüla wountuin tia, aʼyataainjana waya süchiirua waneirua kasa suluʼu nupueulose, maʼaka saaʼin anainjatüin wakuwaʼipa namüin na wawalayuukana, wekirajaainjatüin sünain waneirua kasa süpüla watüjain otta wachajaainjatüin sukuwaʼipa süpüla waʼyataainjanain napüleerua na waneinnua.

2. ¿Jamüshii waʼyataainjanaka süchiirua tü eekat süpüla wountuin suluʼu nupueulose Maleiwa?

² ¿Jamüshii waʼyataainjanaka süchiirua tü eekat süpüla wountuin suluʼu nupueulose Maleiwa? Shia süka talateein watuma chi Washi iipünaajachikai. Talatüsü naaʼin Jehová waʼyataale nümüin sükajee tü watüjakalü apüleerua. Keeʼireesü waaʼin anainjatüin wakuwaʼipa sünain anoujaa süpüla wakaalinjain na wawalayuukana (1 Tes. 4:9, 10). Jaʼitainna kakaliainnain waya sünain anoujaa, ayatüinjatü wanouteʼerüin wakuwaʼipa sünain anoujaa jee wakooʼomüinrüinjatü waʼyataain nümüin Maleiwa. Wekirajaa sünain tü waaʼinrajatkat süpüla wountuin tia.

3. ¿Kasa nüküjaka chi aluwataaushikai Pablo nümüin Timoteo suluʼu 1 Timoteo 4:12-16?

³ Wanaa sümaa nüshajüin Pablo tü palajatkat karaloʼuta nümüin Timoteo, eeirü nükalia Timoteo sünain laülaashin nia napüleerua na anoujashiikana. Mayaainjeʼe müin tia atütüleʼennüsü naaʼin nutuma Pablo süpüla kooʼomüin nunoula (paashajeʼera 1 Timoteo 4:12-16). Jülüjale waaʼin tü nümakat Pablo, wayaawateerü aaʼu piamain tü kasa naaʼinrajatkat Timoteo. Palajana, anainjatü nukuwaʼipa sünain anoujaa, maʼaka saaʼin aipüralinjachin nia, kanoulainjachin jee keisalainjachin sümüin  nukuwaʼipa. Otta tü wane shia nütüjainjachin maʼin ekirajaa, aashajeʼeraa karaloʼuta otta achiawaa. Wekirajaweerü anain tü watüjakat nünainjee Timoteo süpüla waʼyataain süchiirua tü eekat süpüla wountuin suluʼu nupueulose Maleiwa, tü aneetkalü atuma wakuwaʼipa sünain anoujaa. Jee wekirajaweerü anain waneirua kasa eeka süpüla wakooʼomüinrüin atuma waʼyataain nümüin Maleiwa.

4. Saashin Filipos 2:19-22, ¿jamüshi jalouika maʼin Timoteo nümüin Jehová?

⁴ ¿Jamüshi jalouika maʼin Timoteo nümüin Jehová? Shia süka anain nukuwaʼipa namüin na anoujashiikana (paashajeʼera Filipos 2:19-22). Sünainjee tü nümakat Pablo nüchiki Timoteo wayaawata aaʼu nnojoluin yaletüin naaʼin, waneepiain nia nümaa Maleiwa, tütüin nia sünain aʼyatawaa jee jüüjüüin nia. Aishii nüpüla na anoujashiikana jee jülüjashii naya naaʼin. Müshijeseʼe alin maʼin Timoteo nüpüla Pablo otta naapüin nümüin aʼyatawaa kaawainka (1 Cor. 4:17). Müleka waʼyataale süchiirua anainjatüin wakuwaʼipa noʼuluʼu Jehová, aijeena waya nüpüla otta naapeerü wamüin aʼyatawaa süpüla wakaalinjain na wawalayuukana (Sal. 25:9; 138:6).

5. (1) ¿Kasa waaʼinrajatka süpüla wayaawatüin saaʼu tü wanouteʼerüinjatkat sünain wakuwaʼipa? (2) ¿Kasa saaʼinraka tü wawala weʼrakat suluʼu tü ayaakuaakat süpüla shiyaawatüin saaʼu jamüin saaʼin wanee wawala?

⁵ Waneeka wanee kasa wanouteʼerajatka sünain wakuwaʼipa. Wachunta nümüin Jehová nükaalinjai waya süpüla weʼrüin wanee kasa wanoutajatka sünain wakuwaʼipa. Eeshiijaʼa süpüla waʼyataain süchiirua wayaawatüin maʼin saaʼu jamüin naaʼin na waneinnua otta keeʼireein maʼin waaʼin wakaalinjain naya. Eeshiijaʼa süpüla waʼyataain maʼin süchiirua paaʼinwajiraain waya namaa na waneinnua jee süpüla mapüleein wamüin motuin waaʼin naainjala. Nnojorüle wayaawatüin maʼin saaʼu wanee kasa wanouteʼerüinjatka sünain wakuwaʼipa, wasakira wanee waʼaleewain eʼraajaka wakuwaʼipa (Prov. 27:6).

6. ¿Kasa waaʼinrajatka süpüla wanoutuinjatüin wanee kasa sünain wakuwaʼipa?

⁶ Waʼyataa süchiirua süpüla wountuin tia. Waaʼinrüin tia wanaa sümaa wachajaain pütchi aashajaaka süchiki tü kasa wanouteʼerüinjatkat sünain wakuwaʼipa. Wayaawatüle saaʼu kapüleein wamüin motuin waaʼin saainjala wayuu, anasü waashajeʼerüle sümaa wasakireʼerüin waaʼin sünain tü ashajünakat suluʼu tü Bibliakat süchiki nakuwaʼipa na wayuu motokana aaʼin saainjala wayuu otta nachiki na nnojoliikana  aaʼinrüin tia. Anasü maʼin wekirajaale süchiki nukuwaʼipa Jesús, chi motokai aaʼin saainjala wayuu (Luc. 7:47, 48). Jülüjasü naaʼin tü kasa anasü naaʼinrakat suulia tü mojukat natuma. Nnojotpejeʼe müin nakuwaʼipa na fariseokana, pülaa aaʼinchii naya (Luc. 18:9). Otta tü wane kasa waaʼinrajatka shia wasakireʼerüinjatüin waaʼin sünain tüü: «¿Kojutushiiche tamüin na waneinnua? ¿Jülüjasüche taaʼin tü kasa anasü naaʼinrakat?». Müleka kapüleere wamüin motuin waaʼin naainjala wanee wayuu, washaja suluʼu wanee karaloʼuta süpüshuaʼa tü kasa anasü naaʼinrakat sümaa wasakireʼerüin waaʼin sünain tüü: «¿Kojutushiche nia nümüin Jesús? ¿Moteetche naaʼin Jesús naainjala?». Müle tü waaʼinrakat süpüla wekirajaain, wanouteʼereerü tü jülüjakat waaʼin. Eesüjaʼa kapüleere wamüin motomaatüin waaʼin naainjala wanee wayuu, wounteetpejeʼe tia wachajaale maʼin sukuwaʼipa süpüla wanoutuin shia.

7. Sünainjee tü sümakat Proverbios 22:29, ¿kasa naaʼinraka Jehová nakajee na wawalayuu atüjakana süpüleerua wanee aʼyatawaa?

⁷ Wanee kasa waʼyataainjatka achiirua shia wekirajaainjatüin sünain wanee kasa süpüla watüjain. Jülüjataa waaʼin nakuwaʼipa na akaalinjakana sünain akumajaa Weteet, Piichi süpülajatka Outkajawaa miyoʼu jee Piichi Outkajaalee. Noʼutku naya wawalayuukana atüjashii sünainjee naʼyataajiraain namaa na wawalayuu atüjakana süpüleerua naʼyataain. Suluʼu tü ayaakuaakalüirua, weʼrüin wawalayuu tooloyuu otta jieyuu ekirajaakana süpüla naaʼinmajüin Piichi süpülajatka Outkajawaa miyoʼu jee Piichi Outkajaalee. Jehová chi aluwataakai waaʼu otta Jesús, chi Nüchon aluwataainjachikai nutuma, naainjain kasa anaka maʼin nakajee na wawalayuukana (1 Tim. 1:17; 6:15, TNM; paashajeʼera Proverbios 22:29). Keeʼireesü maʼin waaʼin waʼyataain nümüin Jehová süka tü watüjakalü apüleerua süpüla kojutuin nia watuma, nnojotsü süpülajatüin waʼwaajünüin (Juan 8:54).

8. ¿Kasa waaʼinrajatka süpüla waneeküin tü watüjeekalü apüleerua?

⁸ Waneeka wanee kasa watüjeeka apüleerua. ¿Kasa waaʼinrajatka süpüla waneeküin tü watüjeekalü apüleerua? Eeshii süpüla wasakirüin na laülaashiikana jee niale chi wawala alapalaaikai waaʼu süpüla naküjain wamüin wanee kasa wekirajaainjatka anain. Natütüleʼerüle waaʼin süpüla anainjatüin maʼin sukuwaʼipa wekirajia, eeshii süpüla wasakirüin naya süchiki tü waaʼinrüinjatkat süpüla watüjain ekirajaa jee waaʼinramaata tü namakat wamüin. ¿Jamüinjatü sukuwaʼipa watuma?

9. ¿Kasa waaʼinrajatka süpüla wountuin watüjain süpüleerua wanee kasa?

⁹ Waʼyataa süchiirua süpüla wountuin tia. Watüjeere maʼin ekirajaa, eeshii süpüla wekirajaain sünain tü poyeetokot Ayata pia sünain aashajeʼeraa otta ekirajaa. Süpülapünaa wekirajüin wanee pütchi sünain tü Outkajawaakat Wakuwaʼipa otta Waʼyataain nümüin Maleiwa, eesü süpüla wachuntuin nümüin wanee wawala atüjakai maʼin ekirajaa süpüla naapajüin wanüiki jee nüküjain wamüin tü wanouteʼerüinjatkat. Wekirajaale maʼin palajana sünain tü pütchi wekirajüinjatkalü anain, atüjeena maʼin waya ekirajaa otta neʼreerü na waneinnua sünain wayuuin tütüshii waya sümaa jüüjüüin (Prov. 21:5; 2 Cor. 8:22).

10. Püküja tü naaʼinrakat wanee wawala süpüla nütüjain wanee kasa isaka nüchiki.

¹⁰ ¿Kasa waaʼinrajatka süpüla watüjain sünain wanee kasa isaka wachiki? Ayata waʼyataain maʼin süchiirua tia. Jülüjataa waaʼin nukuwaʼipa chi wawalakai Garry, isapuʼusü maʼin nüchiki naashajeʼerüin karaloʼuta. Japüishaatashi maʼin naashin naashajeʼerapa wanee pütchi sünain tü outkajawaakat, ayatapejeʼe nia aashajeʼerüin.  Nüchajaain maʼin sukuwaʼipa süpüla nütüjainjachin aashajeʼeraa karaloʼuta. Sutuma nükaalinjünüin natuma waneinnua wawalayuu jee sutuma nikirajaain süchiirua tia, ekirajüshi nia sünain tü outkajawaakat, sünain tü outkajawaa miyoʼu piantuakat juyawai otta sünain tü outkajawaa miyoʼu apünüinkat kaʼi.

11. ¿Kasa waaʼinrajatka süpüla saapünüin sooʼomüin waʼyataain nümüin Maleiwa maʼaka naaʼin Timoteo?

¹¹ ¿Atüjashiche mapa Timoteo ekirajaa wayuu? Nnojotsü süküjain tia tü Bibliakat, watüjaapejeʼe saaʼu naaʼinrüin tü nümakat Pablo nümüin. Eeshijaʼa nütüjale maʼin Timoteo shiʼipaʼaya otta eesüjaʼa anale nutuma tü aʼyatawaa aapünakat nümüin (2 Tim. 3:10, 11). Tütüle maʼin waya sünain tü waaʼinrakat maʼaka naaʼinrüin shia Timoteo, eesü süpüla saapünüin sooʼomüin waʼyataain nümüin Maleiwa.

12. ¿Kasa naaʼinraka waneinnua wawalayuu süpüla nakaalinjain pia?

¹² Talatüsü waaʼin wakaalinjünüle sünain wanee kasa. Jamüshiijaʼa chale waya pitaaraluʼu, atütülaasü waaʼin nawaraijaale waaʼu na wawalayuu akaalinjakana waya suulia shiʼitaanüin isha wanain jee nayale waneinnua wawalayuu. Wanaa sümaa sülatüin kasa kapüleesü wamüin, talatüsü waaʼin yootule wamaa wanee laülaashi jee nümüliajüle waaʼin. Choʼujaale wamüin wakaalinjünüin süpüla watüjain ekirajaa wayuu, anasü maʼin waaʼin nuʼunule wamaa wanee pürekutsoot atüjakai ekirajaa. Nükaalinjeena waya jee nüküjeerü wamüin tü wanoutajatkat süpüla watüjain ekirajaa. Müshi Jesús: «Anakuaippaʼireʼeya chi wayuu aapakai nuulia chi aapünakai amüin» (Aluw. 20:35). Napüshuaʼa naya wawalayuukana, talatüsü naaʼin sutuma nakaalinjain waya, akaʼaya wayakana talateeria waaʼin waaʼinrüle tia. ¿Kasa waaʼinrajatka waʼyataweere maʼin süchiirua wakaalinjain na waneinnua jee shiale sünain waneirua kasa?

13. ¿Jamüsü wapansaajüinjatka tü waʼyataweekalü anain?

¹³ Wapansaajüinjatü tü waʼyataweekalü anain. «Aʼyataweeshi taya sünain akaalinjaa na wawalayuukana», müle wanüiki, eesüjaʼa süpüla nnojoluin watüjaain saaʼu tü waaʼinrajatkat jee nnojoluin wayaawatüin saaʼu wounteerüle shia. Shia anaka aluʼu müle wanüiki mayaa: «Aʼyataweeshi taya sünain akaalinjaa wawalakai chii». Anasü maʼin wapansaajüle tü waʼyataweekalü anain. Eesü süpüla washajüin suluʼu karaloʼuta tü waaʼinrajatkat süpüla wountuin shia.

14. ¿Jamüsü jülüjainjatka waaʼin eein süpüla nnojoluin wountuin wanee kasa waʼyataaka achiirua?

 ¹⁴ Jülüjainjatü waaʼin eein süpüla nnojoluin wountuin wanee kasa waʼyataaka achiirua. ¿Jamüsü jülüjainjatka waaʼin tia? Shia süka eein süpüla sülatalaʼa sümüin wamüin wanee kasa. Jamüshijaʼa chi aluwataaushikai Pablo nükaalinjain na wayuu chajanakana Tesalónica süpüla nanoujain, eeshijaʼa makateere nia kojuya kaʼi süpüla nükaalinjain naya. Nnojotpejeʼe müin tia süka nuʼluwataain Pablo saalinjee mojulaajüin na nüʼünüükana nümüin (Aluw. 17:1-5, 10). Eeshiijaʼa süpüla jamajüin naya anoujashiikana makatüle Pablo. Mayaainjeʼe sülatüin tia nümüin, nnojoishi ayüülajaain nia. Nüchajaain maʼin sukuwaʼipa süpüla nükaalinjain naya anoujashiikana. Nüjütüin mapa Timoteo süpüla nükatchinrüinjatüin nanoula na anoujashii jekenakana (1 Tes. 3:1-3). Nnojoishi oʼunuin Timoteo mojusheeka, talatakajasaʼa naaʼin na anoujashii chajanakana Tesalónica süka neʼrüin müin nukuwaʼipa Timoteo.

15. Püküja tü naaʼinrakat wanee wawala sümaa nuʼwayuuse wanaa sümaa sülatalaʼa sümüin wanee kasa namüin.

¹⁵ Eesia tü kasa watüjakat sünainjee nukuwaʼipa Pablo jee tü alatakat nümüin chaa Tesalónica. Nnojorüle wountuin tü waʼyataweekalü anain suluʼu nupueulose Maleiwa sutuma sülatalaʼa sümüin wanee kasa wamüin, ¿kasa waaʼinrajatka? (Ecl. 9:11). Eesü süpüla waʼwanajaain tü kasa waʼyataweekalü anain sümaa wane eekai süpüla wountuin. Shiaʼaya naaʼinraka tia Ted sümaa Hiedi, ooʼulaashii naya suulia aʼyatawaa suluʼu Weteet sutuma ayuuijaain naya. Süka alin napüla Jehová, nachajaain sukuwaʼipa süpüla naʼyataainjanain süchiirua waneirua kasa eeka süpüla nountuin. Jamüshiijaʼa naya, pürekutsootshii rekulaat jee mapa aneekünüshii naya süpüla pürekutsooliinjanain pesiaat. Jee müshia Ted ekirajünüshi nia süpüla niʼipajanainjachin chi wawala alapalaaikai naaʼu na wawalayuukana. Shiasaʼa mapa, süküjünaka jeʼrainjatüin nuuyase wanee wawala süpüla nuuʼulaainjachin suulia alapalawaa naaʼu na wawalayuukana. Niyaawataka aaʼu Ted sümaa Hiedi laülaainnapain naya süpüla tia aʼyatawaakat. Mayaapejeʼe mojupünaain naaʼin, nayaawata aaʼu eein süpüla naʼyataain nümüin Jehová sünain waneirua kasa. Anuu nünüiki Ted: «Wayaawata aaʼu wainmain tü kasa eekat süpüla waaʼinrüin süpüla waʼyataain nümüin Jehová».

16. ¿Kasa watüjaka sünainjee Galacia 6:4?

¹⁶ Eesia tü kasa alatakat wamüin wapüshuaʼa. Anasüjeseʼe jülüjale waaʼin nnojoluin kojutuin waya nümüin Jehová saaʼujee tü aʼyatawaa aapünakat wamüin. Otta müsia nnojotsü kasain saamüin wamüin isale waaʼin süchiirua tü aʼyatawaa aapünakat namüin na waneinnua. Anuu sünüiki Hiedi: «Wayoujireʼerüle tü kasa waaʼinrakat sümaa tü naaʼinrakat na waneinnua, nnojoleerü talatüin waaʼin» (paashajeʼera  Galacia 6:4). Shiakalaka anain maʼin wachajaale sukuwaʼipa süpüla waʼyataainjanain nümüin Jehová sünain waneirua kasa otta wakaalinjainjanain na waneinnua. b

17. ¿Kasa waaʼinrajatka süpüla saapünüin sooʼomüin aʼyatawaa wamüin?

¹⁷ Nnojorüle waaʼinmaain kamaʼanaa wainma kasa jee nnojoliire kojuyaalain waya, eesü süpüla wakooʼomüinrüin waʼyataain nümüin Jehová. Waʼyataa süchiirua waneirua kasa maaʼulu wasaʼwateetka atuma waneirua aʼyatawaa waʼyataweeka anain. Pürekutsooleere pia rekulaat, eeshi süpüla pürekutsoolin aaʼusiliaat pia palajana. Jee piʼyataweere neʼipajee na laülaashiikana, eeshi süpüla püküjain maʼin pütchi, puwaraijaain naaʼu na laülaayuukana jee na ayuuikana. Sutuma tü pütüjaitpakalü apüleerua müinmaʼa, eesü süpüla saapünüin pümüin sooʼomüin aʼyatawaa mapeena. Shiakalaka anain maʼin piʼyataale nümüin Jehová süka süpüshuaʼa paaʼin (Roma 12:11).

18. ¿Kasa watüjaka sünainjee tü saaʼinrakat Beverley? (Piirakaa sümüin tü ayaakuaakat).

¹⁸ Jaʼitainna laülaayuuin waya eesü süpüla waʼyataain süchiirua wanee kasa jee wountuin shia. Jülüjataa waaʼin sukuwaʼipa wanee wawala Beverley sünülia, 75 suuyase. Kapüleesü sümüin waraittaa sutuma ayuulin shia. Aküjeesü maʼin pütchi süpüla suunejaain wayuu sünain tü Outkajawaakat eere Sotuin Waaʼin Outuin Jesús. ¿Kasakaʼa saaʼinrüin Beverley? Aʼyataasü süchiirua wanee kasa eeka süpüla suuntuin, talatüsü saaʼin suuntapa tia. Shiasaʼa sünainjee tü saaʼinrakat atütülaasü naaʼin waneinnua wawalayuu süpüla naküjain maʼin pütchi. Watüjaa aaʼulu kojutuin nümüin Jehová tü naaʼinrakat na wawalayuu laülaayuuinnakana (Sal. 71:17, 18).

19. Püküja waneirua kasa eeka süpüla piʼyataain süchiirua suluʼu nupueulose Maleiwa.

¹⁹ Waʼyataa süchiirua wanee kasa eeka süpüla wountuin. Wanouteʼera wakuwaʼipa süpüla talatüin Jehová wamaa. Wekirajaa sünain waneirua kasa süpüla jaloulin waya nümüin Maleiwa jee sümüin nupueulose. Wachajaa maʼin sukuwaʼipa süpüla wakaalinjain na wawalayuukana. c Waaʼinrüle tia, eʼreena waya kasa anasü nutuma Jehová otta ayaawatüneerü aaʼu laülaain waaʼin sünain anoujaa maʼaka naaʼin Timoteo (1 Tim. 4:15).