1. ¿Sribi ja üaire meden ni raba mike nuaindre jai?

 NI KRISTIANO metre tä Jehová tarere krubäte aune ni tö ja di ngwanbätä sribikäre bäri kwin niara kräke. Ye rabadre bare nie yekäre nikwe sribi ja üaire mikadre nuaindre jai. Ñodre, ja töi mikadre kwin ni kristiano erere, nikwe ja töi mikadre sribi mada nuainne bäri kwin aune kukwe nuainne ni mada kräke. b

2. ¿Ñobätä nikwe sribi ja üaire mikadre nuaindre jai aune ja di ngwandre rabadre nikwe yekäre?

² ¿Ñobätä nikwe sribi ja üaire mikadre nuaindre jai aune ja di ngwandre rabadre nikwe yekäre? Metrere ni tö kukwe kwin nuaindi Jehová okwäbiti yebätä. Kukwe nuain gare nie yebiti nita ja di ngwen sribikäre Jehová kräke ye käita nemen jutobätä. Ne madakäre, ni tö ja töi ükatebätä bäri kwin ni kristiano erere ja mräkätre dimikakäre (1 Tes. 4:9, 10). Kä nuäi nibiti Jehová mikabätä täte, akwa ni jökrä rabadre nirien jankunu kukwe ja üairebiti. Raba nemen bare ño nie ye ani mike gare jai.

3. ¿Kukwe meden niebare Pablokwe Timoteo ie mäträkärebätä? (1 Timoteo 4:12-16).

³ Timoteo nämäne bati ye ngwane Pablokwe tärä kena tikani ie, akwa Timoteo sribibarera ni umbre ji ngwanka erere yebätä kukwe nämänena gare krubäte ie. Akwa yebiti ta, Pablokwe kukwe niebare ie ne kwe rabadre nirien jankunu kukwe ja üairebiti (ñäkädre 1 Timoteo 4:12-16 yebätä). Kukwe niebare Pablokwe ie yebätä nita töbiketari ngwane, Timoteo rabadre ja töi ükete kukwe ketebu känti, ye ie Pablo tö namani nemen gare metre nie. Ñodre keteiti abokän, Timoteo rabadre ja töi ükete kwin ni kristiano erere,  rabadre ni mada tarere, tödeke aune ja ngibiare kwin ni kaibe erere. Aune ketebukäre abokän, rabadre ja töi mike ñäke bäri kwin täräbätä nitre ngwärekri, mäträre bäri kwin aune dirire bäri kwin. Timoteo kukwe bämikani aune kukwe raba nemen bare nie ye nikwe diain nuaindre ja ye käkwe ni dimikai nirien jankunu kukwe ja üairebiti ye nikwe mikai gare jai kukwe ja tötikara nekänti. Aune kukwe ruäre meden ni raba mike nuaindre jai sribikäre bäri Jehová kräke, ye nikwe mikai gare jai arato.

4. Filipenses 2:19-22 tä niere erere, ¿ñobätä Jehovakwe sribi mikani krubäte Timoteo kisete?

⁴ ¿Ñobätä Jehovakwe sribi mikani Timoteo kisete? Ñobätä ñan aune niara töi nämene kwin krubäte ni kristiano erere (ñäkädre Filipenses 2:19-22 yebätä). Timoteo ye abokän töi bobre, ja ngwen metre, sribire balente aune tö ngwan raba ie, ye nemen gare metre nie Pablokwe kukwe niebarebätä yebiti. Timoteo nämäne ja mräkätre tarere aune nämäne ja töi mike bökän ja mräkätrebätä. Yebätä Pablo nämäne tarere krubäte aune ñan töbikabare bati bubu kwe sribi ütiäte mikakäre kisete (1 Cor. 4:17). Töi kwin, tuin kwin Jehovai ye erere nikwe ja töi mikadre nuainne ngwane, Jehovakwe ni taredi aune sribi mikadi bäri kwe ni kisete konkrekasionte (Sal. 25:9; 138:6).

5. a) Ni töita ño yebätä täbe ja ükadrete nie, ¿ye ñokänti raba nemen gare nie? b) Meri testiko bämikata üaibätä, ¿ye tä dre nuainne ni mada töi mikakäre nüke gare bäri jai?

⁵ Nikwe ja töi mikadre kukwe keteiti nuainne. Töi meden känti täbe ja töi ükadrete nie, yebätä Jehovakwe ni dimikadre ye nikwe ribedre ie orasionte. Nikwe kukwe keteiti ye diandre nuaindre jai aune ja töi mikadre kwatibe nuainkäre. ¿Täbe ja töi ükadrete bäri tie ni mada töi mikakäre nüke gare jai o ja töi mikakäre bäri ni mada dimikakäre? ¿Täbe ja töi ükadrete tie ja töi mikakäre nüne jäme ni madabe o rabakäre bäri juto biare ngite juankäre ta ni madabiti? Ni töi ño metrere ñaka gare jabätä nie ngwane, ja ketamuko ie nita tö ngwen ye ie nikwe ngwandretari ni töi ño metrere (Prov. 27:6).

6. Nita ja töi mike ja töi ükatekäre kukwe keteitibätä, ¿ye raba nemen bare ño nie?

⁶ Nita kukwe meden mike nuaindre jai ye nikwe ja di ngwandre rabadre nikwe yekäre. ¿Ni raba nuainne ño? Töi medenbätä ni tö ja töi ükatebätä bäri kwin, yebätä kukwe känändre jai. Ñodre, ni rabadre ja töi mike juto biare ngite juankäre ta ni madabiti rabadre gare nie yebätä ani töbike. Nitre kädekateta Bibliabätä namani juto biare ngite juankäre ta ni madabiti töi bökänbiti  aune mada ñaka namani juto biare ngite juankäre ta ni madabiti, yebätä ni rabadre ñäke aune töbiketaribätä. Ani töbike Jesús yebätä. Niara nämäne juto biare ngite juankäre ta ni madabiti (Luc. 7:47, 48). Kukwe nämäne nainte nitre ie yebätä ñan nämäne ja töi mike metrere, ñakare aune kukwe meden nuainne nämäne kwin kwetre yebätä nämäne ja töi mike metrere. Akwa “ni mda mda nämane tuen käme” nitre fariseo ie (Luc. 18:9). Kukwe bämikani nebätä nikwe töbikadretari biti ni raba kukwe ne erere ngwentari jai: “¿Tita ni mada mike tuin ño jai? ¿Töi meden kwinbätä ye tita mike ñärärä?”. Ñaka nemen nuäre ni kräke ngite juankäre ta ni madabiti ngwane, töi kwin meden tärä ni madakwe ye ni raba tike täräbätä jai, biti ni raba kukwe ne ngwentari jai: “¿Ni ye tuin ño Jesús ie? ¿Raba ngite juen tabiti?”. Nikwe kukwe ne kwrere nuaindi ja tötikakäre ye raba ni dimike ja töi ükete. Ni madakwe kukwe tare nuainbare nibätä ye kenanbe ñaka raba nemen nuäre ni kräke ngite juankäre tabiti. Akwa nikwe ja di ngwain ngwane ni raba ja töi ükete nita ja töi mike ño yebätä.

7. ¿Nitre ie sribi nuain gare yebiti Jehovata dre nuainne kä nengwane? (Proverbios 22:29).

⁷ Kukwe mada ni raba mike nuaindre jai, ye abokän nikwe ja töi mikadre kukwe mada nuainne. Ja mräkätre tä sribire sukursal, Ju Gätä Krikri aune Ju Ja Ükarakrö sribebätä yebätä ani töbike. Ja mräkätre kwati ne ie kukwe gare ñobätä ñan aune ja mräkätre ie kukwe gare yebe sribibarera kwe yebätä. Tä mikani üaibätä erere, ja mräkätre aune ja ngwaitre ye tä ja kite Ju Gätä Krikri nuainkäre aune Ju Ja Ükarakrö ye ngibiakäre kwin. Kukwe ne kwrere aune kukwe mada madabiti Jehová “Rei kärekäre” aune Jesús “Rei bäri kri nitre tä reire ye kräke” ye tä nitre ie kukwe garebiti, kukwe kwin krubäte nuainne (1 Tim. 1:17; 6:15; ñäkädre Proverbios 22:29 yebätä). c Ni tö sribibätä jume aune kukwe nuain gare nie yebiti ni tö kukwe nuainbätä ñan ja mikakäre ütiäte, ñakare aune Jehová mikakäre ütiäte (Juan 8:54).

8. Kukwe meden ni tö nuainbätä bäri kwin, ¿ye dre raba ni dimike nuainne?

⁸ Nikwe ja töi mikadre kukwe keteiti mike nuaindre jai. ¿Kukwe meden nuaindre bäri kwin nikwe abokänbätä nikwe ja töi mikadre? Kukwe meden nuaindre bäri kwin nikwe, ye ni umbre ji ngwanka aune ni circuito tuabitikä käkwe niedre nie ye nikwe ribedre ietre. Ñodre, nikwe kukwe kädriedre bäri kwin o diridre ño bäri kwin niedre kwetre nie ngwane, metrere kukwe medenkänti nikwe nuaindre bäri kwin, ye nikwe ngwandretari ietre. Biti, nikwe ja töi mikadre kukwe ye nuainne. ¿Ni raba nuainne ño?

9. ¿Kukwe nuain rabadre gare kwin nie yekäre ni raba dre nuainne?

⁹ Nita kukwe mike nuaindre jai ye nikwe ja di ngwandre mike nemen bare. Ni tö diribätä bäri kwin ye ani bämike ja töite. Yekäre ni raba ja tötike nguseta täräkwata Ñäkädre kwin täräbätä aune diridre kwin yebätä. Kukwe tä kädriedre mäi gätä bämän ngrabare ye kräke ngwane, känenkri ja mräkä iti ie kukwe gare krubäte käkwe mä kukwe nuadre aune kukwe meden nuaindre bäri kwin mäkwe, ye niedre kwe mäi ye mäkwe ribedre ie. Kukwe meden tä kädriedre nie ye nikwe nuaindre biarebe köböi rükadre ye känenkri, ye köböire ni rabai dirikä bäri kwin, sribire kwin krubäte aune tö ngwan raba nie ye jutuai nitre ie (Prov. 21:5; 2 Cor. 8:22).

10. Ni raba dre nuainne kukwe keteiti nuainkäre bäri kwin ye mä raba bämike kukwe keteitibiti.

¹⁰ Ni tö kukwe keteiti nuainbätä bäri kwin akwa nierare ñan tä nemen bare kwin nie ngwane, ¿nikwe dre nuaindre? ¡Nikwe ñaka ja di ngwandre nekä! Ja mräkä kädekata Garry abokän  kräke ñan nämäne nemen nuäre ñäkäkäre täräbätä yebätä ani blite. Niara nämäne ñäke täräbätä konkrekasionte ngwane, nämene nemen ja gaire krubäte törö ie. Akwa ñaka ja di ngwani nekä kwe aune ja di ngwani kwe ñäke bäri kwin täräbätä. Ja mräkätre mada käkwe dimikani aune täräkwata ye köböire nengwane tä kukwe kädriere gätäte, gätä kri circuito aune gätä kri regional yete.

11. Timoteo erere, ¿dre käkwe ni dimikai rabakäre juto biare sribi mada biandre nuaindre nie yekäre?

¹¹ ¿Timoteo namani kukwe kädriekä kwin aune dirikä kwin? Biblia ñaka mike gare, akwa Pablokwe dre niebare ie ye mikani täte kwe ye gare nie. Aisete bätärekä bätärekä Timoteo jatani kukwe nuainne bäri kwin aune ye köböire sribi meden nämäne kötärä ye jatani nuainne bäri kwin raba ruin nie (2 Tim. 3:10). Timoteo erere nikwe sribi nuaindi bäri kwin ngwane, ni tädi juto biarebe sribi mada nuainkäre.

12. ¿Nitre mada käkwe mä dimikanina ño?

¹² ¡Nitre mada tä ni dimike ye käita nemen juto krubäte nibätä! Ñodre, nita bren hospitalte ngwane ja mräkätre comité de enlace con los Hospitales o Grupo de Visita a Pacientes tä ni tuinbiti ngwane, tä ni dimike krubäte. O nita ja tuen kukwe tare ben ngwane, ni umbre ji ngwanka iti kä diandrekä jai ni kukwe nuakäre aune ni töi mikakäre jäme, yebätä nita debe bien krubäte. Aune ni iti tötikadre yebätä ni dimikadre ye nita ribere jai ngwane, prekursor iti ie kukwe gare krubäte rikadre ni mukore aune kukwe niedre kwe nie dirikäre bäri kwin, ye tä nemen kwin ni kräke. Jesukwe niebare: “Nita jändrän bien ni mdaye, btä käta neme bäri nuäre nibtä ni jändrän kaka ngäbti ye ngwä” (Hech. 20:35). Ja mräkätre tä ni dimike ngwane kätä nemen juto krubäte bätätre. Aune nikwe ye erere nuaindi ngwane, kä rabai juto krubäte nibätä arato. Ni tö kukwe ne o kukwe mada nuaindi sribikäre bäri Jehová kräke ngwane, ¿ni rabadre dre nuainne rabadre nikwe yekäre?

13. Nikwe ja töi mikadre kukwe nuainne ngwane, ¿nikwe dre ngwandre törö jai?

¹³ Nikwe ñaka ja töi mikadre sribi jökrä nuainne gwairebe. Ñodre, ni raba töbike: “Ti tö sribidi bäri konkrekasionte”. Akwa meden nikwe nuaindre käne aune meden namanina nikwe, ye ñaka rabai nuäre ni kräke mikakäre gare jai. Aisete metrere meden ni tö nuainbätä käne, ye nikwe diandre nuaindre jai. Nikwe dre nuaindre rabadre nikwe yekäre, ye ni rabadre tike jai täräbätä.

14. Nita kukwe mike nuaindre jai ngwane, ¿ñobätä nikwe töbikadre kwin?

 ¹⁴ Mätä kukwe mike nuaindre jai ngwane mäkwe töbika kwin. ¿Ñobätä? Ñobätä ñan aune dreta nemen bare ni bäre ye ni ñaka raba ketebätä. Ñodre, apóstol Pablo käkwe konkrekasion Tesalónica ye ükaninte, yebätä tö namani rabai yete kä ruäre te nitre ja mikani mrä kristiano dimikakäre raba ruin nie. Akwa nitre ja mikaka niara rüere käkwe juanintari juta yebätä (Hech. 17:1-5, 10). Pablo rabadre yete akräke, konkrekasion ye mikadre kukwe kri te kwe. Akwa niarakwe ñaka ja di ngwani nekä. Ñakare aune kukwe meden ererebätä ja töi mikani kwe kukwe nuainne aune ja känenkäre Timoteo juani kwe tödeka ja mräkätre ye mike dite (1 Tes. 3:1-3). Medente ja di ribere nämene yekänti Timoteo nikani, ye käi namani juto krubäte nitre tesalonicensebätä.

15. Nita ja töi mike kukwe keteiti nuainne akwa kukwe jene rabadre bare, ye köböite dre raba nemen bare, ye mä raba bämike kukwe keteitibiti.

¹⁵ Pablokwe kukwe bämikani aune dre namani barebätä Tesalónica, yebätä kukwe raba nemen gare nie. Nikwe ja töi mikani sribi keteiti nuainkäre Jehová kräke, akwa te batibe kore kukwe jene rabadre bare aune ñan raba nemen nuäre ni kräke sribi ye mikakäre nemen bare (Ecl. 9:11). ¿Nikwe dre nuaindi? Sribi mada raba nemen bare nie yebätä nikwe töbikadre. Kukwe ye erere namani bare Ted aune Hiedi yebätä. Niaratre näkäni bren, yebätä sribi Betelte ye tuanimetre kwetre. Akwa nämäne Jehová tarere, yebätä bengwairebe ja töi mikani kwetre sribi mada nuainne Jehová kräke. Käne namani sribi prekursor regular nuainne, biti kädekani sribi prekursor especial aune Ted kitani sribi ni circuito tuabitikä sustituto ye nuainkäre. Akwa kä nuäi ribeta ja mräkätre ie sribi circuito tuabitikä ye ükaninte, yebätä Ted aune Hiedi ñan raba sribi circuito ye nuainne ye nükani gare jabätä ietre. Kenanbe namanintre di nekä, akwa raba kukwe mada nuainne sribikäre Jehová kräke ye nükani gare ietre. Ted tä niere: “Nun ñaka rabadre ja töi mike kukwe keteitibe aibe nuainne sribikäre Jehová kräke, ye nükanina gare nunye”.

16. ¿Gálatas 6:4 tä dre driere nie ja töi kräke?

¹⁶ Dre dre rabadre bare nibätä ye jökrä ni ñan raba ketebätä. Aisete sribi meden bianta nuaindre nie ye ñan tä ni mike bäri ütiäte Jehová okwäkänti, ye nikwe ngwandre törö jai. Sribi meden tä ni mada kisete aune ñaka nikwe yebätä nikwe ja töi mikadre krubäte ngwane, ye ñan raba ni dimike. Hiedi tä niere: “Nita nüne ño ye nikwe ketadre ni madabätä ngwane, ni ñan tädi jäme” (ñäkädre Gálatas 6:4 yebätä). Ye medenbätä nikwe ja töi mikadre sribi ño erere nuainne Jehová kräke aune nitre mada dimikadre ye bäri kwin. d

17. Sribi mada mikadre ni kisete ie ni tö ngwane, ¿ni raba dre nuainne?

 ¹⁷ Nita nüne jondron braibebiti aune rürübän ütiä ñaka ni kisete ngwane, ni raba ja mike juto sribi mada ka ngäbitikäre. Sribi meden köböire sribi mada raba nemen mäkwe ye mäkwe ja töi mika nuainne ngwä ngwane. Ñodre, mä tö sribi prekursor regular nuainbätä ngwane, ¿mä raba sribi prekursor ausiliar nuainne kä ruäre te? O mä tö rababätä siervo ministerial ngwane, ¿mä raba kä denkä jai kukwe driekäre bäri o ja mräkätre umbre aune bren konkrekasionte ye tuabitikäre? Kukwe meden raba nemen gare mäi gwä ngwane, ye köböire sribi raba nemen bäri mäkwe ja känenkäre. Meden erere, akwa mäkwe ja töi mika kwatibe sribikäre bäri Jehová kräke (Rom. 12:11).

18. ¿Beverley kukwe nuainbare ye tä dre driere nie? (Üai ye mikadre ñärärä).

¹⁸ Nikwe sribi mikadre nuaindre jai aune ja di ngwandre rabakäre nikwe yekäre ni ñaka umbre. Meri testiko abokänbiti kä 75 kädekata Beverleybätä kukwe namani bare ye tä kukwe ye mike gare metre. Bren köböite ñan tä dikekä kwin. Akwa campaña Conmemoración kräke yebätä tö namani sribidi bäri. ¿Dre nuainbare kwe? Niarakwe ja töi mikani kwatibe kukwe keteitibe nuainne aune namani bare ie ngwane, kä namani juto krubätebätä. Niarakwe ja di ngwani, ye käkwe nitre mada töi mikani sribi nuainne bäri arato. Ja mräkätre umbre ñaka raba kukwe jökrä nuainne, akwa tätre dre nuainne ye ütiäte krubäte Jehová kräke (Sal. 71:17, 18).

19. ¿Ni raba sribi meden ja üaire mike nuaindre jai?

¹⁹ Sribi meden raba nemen bare nie ye erere nikwe ja töi mikadre nuainne. Töi kwinkwin tuen kwin Jehovai ye nikwe ja töi mikadre nuainne. Nikwe ja töi mikadre kukwe nuainkäre bäri kwin, ye köböire Jehová aune juta kwe raba sribi mike bäri ni kisete. Nikwe ja töi mikadre kukwe ño erere nuainne kukwe nuainkäre bäri ja mräkätre kräke. e Nikwe ye erere nuaindi ngwane, Jehovakwe kukwe kwin mikai nemen bare ni kräke aune namani bare Timoteobätä erere, nita nirien kukwe ja üairebiti ye jutuai ni jökrä ie (1 Tim. 4:15).