1. Ano nga espirituwal nga mga tulumuron ang puede naton himuon?

 BILANG matuod nga mga Cristiano, palangga gid naton si Jehova. Gani gusto naton himuon ang aton bug-os nga masarangan sa pag-alagad sa iya. Pero para mahimo naton ini, dapat may espirituwal kita nga mga tulumuron, pareho sang pagpanikasog nga ipakita ang Cristiano nga mga kinaiya, pagtuon sang mapuslanon nga mga ikasarang, kag pagtinguha nga makabulig sa iban. b

2. Ngaa dapat naton panikasugan nga himuon ang aton espirituwal nga mga tulumuron?

² Ngaa dapat naton panikasugan nga mag-uswag sa aton pag-alagad kay Jehova? Bangod gusto naton nga malipay sa aton ang aton mahigugmaon nga Amay sa langit. Amo ini ang panguna nga rason. Nalipay si Jehova kon ginagamit naton ang tanan naton nga abilidad kag ikasarang sa pag-alagad sa iya. Ginapanikasugan man naton nga mag-uswag kay gusto naton nga mas makabulig pa gid kita sa aton mga kauturan. (1 Tes. 4:9, 10) Puede kita tanan mag-uswag sa aton pag-alagad kay Jehova. Posible ini bisan pa madugay na kita nga Saksi. Binagbinagon naton kon paano naton ini mahimo.

3. Suno sa 1 Timoteo 4:12-16, ano ang ginpalig-on ni apostol Pablo kay Timoteo nga dapat niya himuon?

³ Sang ginhimo ni apostol Pablo ang iya una nga sulat para sa pamatan-on nga si Timoteo, isa na ka eksperiensiado nga gulang si Timoteo. Pero, ginpalig-on sia ni Pablo nga padayon nga mag-uswag sa iya pag-alagad kay Jehova. (Basaha ang 1 Timoteo 4:12-16.) Kon pamalandungan mo ang ginlaygay ni Pablo, matalupangdan mo nga gusto niya nga himuon ni Timoteo ang duha ka tulumuron.  Gusto niya nga panikasugan ni Timoteo nga ipakita ang Cristiano nga mga kinaiya pareho sang gugma, pagtuo, kag katinlo. Kag gusto niya nga mag-uswag sia sa iya mga ikasarang pareho sang pagbasa sing dayag, paglaygay, kag pagpanudlo. Binagbinagon naton ang halimbawa ni Timoteo para makita naton nga kon may tulumuron kita, makabulig ini para mag-uswag kita sa aton pag-alagad kay Jehova. Binagbinagon man naton ang mga puede naton himuon para madugangan naton ang aton ginahimo sa pagbantala kag pagtudlo sa iban.

4. Suno sa Filipos 2:19-22, ngaa madamo sing nahimo si Timoteo sa iya pag-alagad kay Jehova?

⁴ Ngaa madamo sing nahimo si Timoteo sa iya pag-alagad kay Jehova? Bangod sang iya dalayawon nga Cristiano nga mga kinaiya. (Basaha ang Filipos 2:19-22.) Base sa mga ginsiling ni Pablo parte kay Timoteo, mahangpan naton nga mapainubuson, mainunungon, mapisan, kag masaligan si Timoteo. Mahigugmaon sia kag nagaulikid gid sia sa mga kauturan. Bangod sini, ginpalangga ni Pablo si Timoteo kag wala sia nagpangalag-ag nga hatagan si Timoteo sang mabudlay nga mga asaynment. (1 Cor. 4:17) Kon panikasugan man naton nga ipakita ang mga kinaiya nga gusto ni Jehova nga makita sa iya mga alagad, palanggaon man kita ni Jehova kag mas makabulig pa gid kita sa kongregasyon.—Sal. 25:9; 138:6.

5. (a) Ano ang himuon mo para makapili ka sing Cristiano nga kinaiya nga gusto mo pauswagon? (b) Base sa piktyur, ano ang ginhimo sang isa ka bataon nga sister para mas makapakita sia sing empatiya sa iban?

⁵ Magpili sing kinaiya nga gusto mo panikasugan nga ipakita. Ipangamuyo kag hunahunaa sing maayo kon ano nga mga kinaiya ang dapat mo pauswagon. Dayon magpili sing isa ka kinaiya nga gusto mo panikasugan nga ipakita. Halimbawa, gusto mo bala pauswagon ang pagpakita mo sang empatiya sa iban ukon gusto mo bala nga mangin mas mabinuligon ka pa gid sa mga kauturan? Gusto mo bala nga mangin mas mahidaiton ka kag mas mapinatawaron? Makabulig sa imo kon pamangkuton mo ang imo ginasaligan nga abyan kon ano ang iya mapanugda para mag-uswag ka.—Hulu. 27:6.

6. Ano ang himuon mo para mapakita mo ang ginpili mo nga kinaiya?

⁶ Panikasugi nga ipakita ang ginpili mo nga kinaiya. Paano? Ang isa ka paagi amo ang pagtuon sing maayo parte sa kinaiya nga gusto mo pauswagon. Ibutang ta nga gusto mo mangin mas mapinatawaron sa iban. Puede mo basahon sa Biblia ang mga halimbawa sang nagpatawad kag sang wala nagpatawad sa iban, kag dayon pamalandungi ini. Binagbinaga ang halimbawa ni Jesus nga  kinabubut-on nga nagpatawad sa iban. (Luc. 7:47, 48) Nagpokus man si Jesus sa mga ikasarang sang iban, indi sa ila mga sala. Pero para sa mga Fariseo sang panahon ni Jesus, ‘wala sing pulos ang iban.’ (Luc. 18:9) Pamalandungi ini nga mga halimbawa, kag dayon pamangkuta ang imo kaugalingon: ‘Ano ang makita ko sa iban? Nagapokus bala ako sa ila maayo nga mga kinaiya, ukon sa ila malain nga mga kinaiya?’ Kon nabudlayan ka nga patawaron ang isa ka tawo, tilawi nga isulat ang tanan niya nga maayo nga kinaiya. Dayon pamangkuta ang imo kaugalingon: ‘Paano sia ginatamod ni Jesus? Patawaron bala sia ni Jesus?’ Kon himuon naton ini, posible nga magbag-o ang aton panghunahuna. Sa umpisa, posible nga kinahanglan gid naton magpanikasog para mapatawad naton ang nakasala sa aton. Pero kon pirme naton ini himuon, mangin mas mapinatawaron kita sa ulihi.

7. Base sa Hulubaton 22:29, paano ginagamit ni Jehova ang iya mga alagad nga madamo sing ikasarang?

⁷ Ang isa pa ka tulumuron nga puede mo himuon amo ang pagtuon sang mapuslanon nga mga ikasarang. Hunahunaa kon daw ano kadamo nga mga boluntaryo ang kinahanglan para magpatindog sang mga pasilidad sang Bethel, mga Assembly Hall, kag mga Kingdom Hall. Madamo nga boluntaryo ang nakatuon sang mga ikasarang sa pila ka hilikuton paagi sa pag-obra upod sa mga kauturan nga eksperto sa sini. Makita sa piktyur ang mga kauturan nga nagatuon sang ikasarang nga kinahanglan sa pagmentinar sang mga Assembly Hall kag mga Kingdom Hall. Ginagamit ni Jehova nga Dios, nga “Hari nga dayon,” kag ni Cristo Jesus, nga “Hari sang . . . mga hari,” ang mga kauturan nga madamo sing ikasarang para maghimo sing dalayawon nga mga hilikuton. (1 Tim. 1:17; 6:15; basaha ang Hulubaton 22:29.) Gusto naton himuon ang aton bug-os nga masarangan kag gamiton ang aton mga ikasarang para dayawon si Jehova, indi ang aton kaugalingon.—Juan 8:54.

8. Ano ang himuon mo para makapili ka sing ikasarang nga gusto mo matun-an?

⁸ Magpili sing ikasarang nga gusto mo matun-an. Ano nga ikasarang ang puede mo tun-an? Pamangkuta ang mga gulang sa inyo kongregasyon kon ano nga ikasarang ang sa banta nila dapat mo pauswagon. Puede mo man pamangkuton ang inyo manugtatap sang sirkito parte sa sini. Kon nagpanugda sila nga dapat mo pauswagon ang imo ikasarang sa paghambal kag pagtudlo, pamangkuta sila kon ano gid nga espesipiko nga paagi sang paghambal kag pagtudlo ang dapat mo pauswagon. Dayon panikasugi nga mapauswag mo ini. Paano mo ini mahimo?

9. Ano ang himuon mo para mag-uswag ka sa ikasarang nga ginpili mo?

⁹ Panikasugi nga mag-uswag sa ikasarang nga ginpili mo. Ibutang ta nga gusto mo mag-uswag sa imo ikasarang sa pagtudlo. Puede mo tun-an sing maayo ang brosyur nga Mag-ukod Ka sa Pagbasa kag Pagpanudlo. Kon may bahin ka sa midweek miting, puede mo pangabayon ang isa ka utod nga maayo magtudlo nga pamatian ka samtang ginapraktis mo ini para makahatag sia sing panugda kon paano mo ini pauswagon. Maayo gid kon mapauswag mo ang imo ikasarang sa pagtudlo, pero dapat makita man sang mga kauturan nga masaligan ka kag ginahimo mo ang imo bug-os nga masarangan sa imo mga asaynment.—Hulu. 21:5; 2 Cor. 8:22.

10. Maghatag sing halimbawa kon paano naton mapauswag ang ikasarang nga dapat naton pauswagon.

¹⁰ Pero ano abi kon nabudlayan ka sa ikasarang nga gusto mo pauswagon? Indi mag-untat sa pagpanikasog. Binagbinaga ang isa ka brother nga si Garry. Indi sia maayo magbasa. Nadumduman niya nga grabe ang iya kahuya kon nagabasa sia sing matunog sa mga miting sang kongregasyon. Pero padayon sia nga nagpanikasog para mag-uswag sia. Subong, nagsiling sia nga bangod sa mga paghanas sa iya, nasarangan na niya nga  magpamulongpulong sa mga Kingdom Hall, sa mga sirkito nga asembleya, kag mga kombension.

11. Pareho kay Timoteo, ano ang himuon naton para masarangan man naton nga magbaton sang dugang nga mga responsibilidad?

¹¹ Nangin maayo gid man bala nga humalambal kag manunudlo si Timoteo? Wala sing ginasiling ang Biblia parte sa sini. Pero sigurado kita nga nahimo niya sing mas maayo ang iya mga responsibilidad bangod ginsunod niya ang laygay ni Pablo. (2 Tim. 3:10) Kon pauswagon man naton ang aton mga ikasarang, masarangan man naton nga magbaton sang dugang nga mga responsibilidad.

12. Paano ka nabuligan sang iban?

¹² Madamo sang ginahimo ang iban para buligan kita. Halimbawa, kon naospital kita, nagapasalamat gid kita kon may nagbisita sa aton nga mga gulang nga miembro sang Hospital Liaison Committee ukon sang Patient Visitation Group. Kon may daku kita nga problema, nagapasalamat gid kita kon ginhatagan kita sang tion sang isa ka gulang nga nagaulikid sa aton para pamatian kita kag paumpawan. Kon may Bible study kita kag kinahanglan naton ang bulig, nalipay gid kita kon nagpasugot ang isa ka madugay na nga payunir nga updan kita sa aton study kag kon naghatag sia sing mga panugda. Nalipay gid ini nga mga kauturan sa pagbulig sa aton. Mabatyagan man naton ini nga kalipay kon buligan man naton ang aton mga kauturan. “Mas malipayon ang nagahatag sangsa nagabaton,” siling ni Jesus. (Binu. 20:35) Kon gusto mo man himuon ang ginsambit nga mga halimbawa ukon gusto mo dugangan ang imo ginahimo sa pag-alagad kay Jehova, ano ang makabulig sa imo nga mahimo ini?

13. Kon nagapili sang tulumuron, ano ang dapat naton tandaan?

¹³ Indi maayo kon indi maathag ukon indi espesipiko kon ano gid ang imo tulumuron. Halimbawa, basi magsiling ka, ‘Gusto ko nga dugangan ang akon ginahimo para sa kongregasyon.’ Pero bangod indi ini espesipiko, posible mabudlayan ka kon paano mo ini himuon, kag posible indi mo mabal-an sa ulihi kon bala nahimo mo gid man ang imo tulumuron. Gani tandai nga mas maayo kon maathag kag espesipiko ang imo tulumuron. Puede mo pa gani isulat ang imo tulumuron kag kon paano mo ini himuon.

14. Ngaa dapat handa kita mag-adjust kon magbag-o ang sitwasyon?

¹⁴ Dapat handa man kita mag-adjust kon magbag-o ang sitwasyon. Ngaa? Bangod indi naton kontrolado ang aton kahimtangan. Binagbinaga ang halimbawa ni apostol Pablo. Nakabulig sia  para masugdan ang bag-o nga kongregasyon sa siudad sang Tesalonica. Sigurado gid nga gusto niya magpabilin didto para buligan ang bag-o nga mga Cristiano. Pero naghalin si Pablo sa siudad bangod sang mga nagapamatok. (Binu. 17:1-5, 10) Kon nagpabilin si Pablo sa siudad, posible nga mabutang sa peligro ang iya mga kauturan. Pero wala nag-untat si Pablo sa pagbulig sa ila. Sa baylo, nag-adjust sia kay nagbag-o ang iya sitwasyon. Sang ulihi, ginpadala niya si Timoteo sa Tesalonica para pabakuron ang pagtuo sang bag-o nga mga Cristiano didto. (1 Tes. 3:1-3) Sigurado nga nalipay gid ang mga taga-Tesalonica kay handa mag-alagad si Timoteo bisan diin.

15. Kon nagbag-o ang aton sitwasyon, paano sini maapektuhan ang aton tulumuron? Maghatag sing halimbawa.

¹⁵ May matun-an kita sa eksperiensia ni Pablo sa Tesalonica. Posible may isa ka tulumuron nga gusto naton himuon, pero indi naton ini mahimo kay nagbag-o ang aton sitwasyon. (Man. 9:11) Kon matabo ini sa imo, magpili sing lain nga tulumuron nga masarangan mo nga himuon sa imo sitwasyon. Amo ini ang ginhimo sang mag-asawa nga sanday Ted kag Hiedi. Bangod sang problema sa panglawas, nag-untat sila sa pag-alagad sa Bethel. Pero bangod palangga nila si Jehova, nangita sila sing paagi kon paano nila madugangan ang ila ginahimo sa pag-alagad sa iya. Ang una nila nga ginhimo amo ang pagregular payunir. Sang ulihi, gin-asayn sila bilang mga espesyal payunir, kag ginhanas si Ted nga mag-alagad bilang tal-us nga manugtatap sang sirkito. Sang ulihi, ginsilingan ang mga manugtatap sang sirkito kon asta sa ano nga edad sila puede makaalagad sa sini nga pribilehiyo. Narealisar nanday Ted kag Hiedi nga indi na sila puede sa sini nga pribilehiyo sa pag-alagad. Bisan pa nasubuan sila, kabalo sila nga maalagad nila si Jehova sa iban pa nga mga paagi. Nagsiling si Ted, “Natun-an namon nga indi kami dapat magpokus sa isa lang ka pribilehiyo.”

16. Ano ang matun-an naton sa ginasiling sang Galacia 6:4?

¹⁶ Wala kita sing kontrol sa tanan nga nagakatabo sa aton kabuhi. Gani, importante nga indi naton paghunahunaon nga ginapabaloran lang kita ni Jehova base sa aton mga pribilehiyo, kag indi naton pag-ikumparar ang aton mga pribilehiyo sa mga pribilehiyo sang iban. Si Hiedi nagsiling, “Masubuan ka kon ikumparar mo ang imo kabuhi sa kabuhi sang iban.” (Basaha ang Galacia 6:4.) Importante nga mangita kita sing paagi kon paano kita makabulig sa iban kag maalagad si Jehova. c

17. Ano ang himuon mo para madugangan mo ang imo ginahimo sa pag-alagad kay Jehova?

¹⁷ Madugangan mo ang imo ginahimo sa pag-alagad kay Jehova kon pasimplehon mo ang imo kabuhi kag kon indi ka mangutang kon indi man kinahanglan. Magpili lang anay sang mahapos nga mga tulumuron nga makabulig sa imo nga  mahimo ang gusto mo gid nga tulumuron. Halimbawa, kon gusto mo mangin regular payunir, tinguhai nga mangin auxiliary payunir sing sigesige sa sulod sang pila ka bulan. Kon gusto mo mangin ministeryal nga alagad, tinguhai nga dugangan ang imo oras nga ginagamit sa pagbantala kag sa pagbisita sa mga nagamasakit kag mga tigulang sa inyo kongregasyon. Ang imo mga eksperiensia subong makabulig sa imo nga makabaton sang dugang nga mga pribilehiyo sa ulihi. Himua ang imo bug-os nga masarangan sa bisan ano nga asaynment nga ihatag sa imo.—Roma 12:11.

18. Base sa piktyur, ano ang matun-an mo sa halimbawa ni Beverley?

¹⁸ May mahimo kita gihapon nga espirituwal nga mga tulumuron bisan tigulang na kita. Binagbinaga ang halimbawa sang 75 anyos nga sister nga si Beverley. Nabudlayan sia maglakat bangod sang iya malala nga balatian. Pero gusto gid niya himuon ang iya bug-os nga masarangan sa tion sang kampanya para sa Memoryal. Gani nagpili sia sing espesipiko nga mga tulumuron. Sang nahimo ni Beverley ang iya mga tulumuron sa tion sang kampanya, grabe gid ang iya kalipay. Bangod sang iya mga pagpanikasog, napalig-on ang iban nga himuon man ang ila bug-os nga masarangan sa pagbantala. Bisan pa limitado na lang ang mahimo sang aton tigulang nga mga kauturan, ginapabaloran ini ni Jehova.—Sal. 71:17, 18.

19. Ano ang pila ka espirituwal nga tulumuron nga puede naton himuon?

¹⁹ Magpili sing mga tulumuron nga masarangan mo nga himuon. Panikasugi nga ipakita ang mga kinaiya nga magapasuod sa imo kay Jehova. Tun-i ang mga ikasarang nga makabulig sa imo nga madugangan ang imo ginahimo para sa aton Dios kag sa iya organisasyon. Mangita sing paagi kon paano ka mas makabulig pa gid sa imo mga kauturan. d Pareho kay Timoteo, pakamaayuhon ka ni Jehova kag “ang imo pag-uswag makita sang tanan nga tawo.”—1 Tim. 4:15.