1. Peb yuav teem hom phiaj zoo li cas?

 PEB uas yog ib tug ntseeg xav ua txhua yam rau Yehauvas. Yuav kom peb ua tau npaum li peb ua tau, peb yuav tau muaj hom phiaj ua nws tes hauj lwm. Xws li peb yuav tau muaj cwj pwm zoo, xyaum kom paub ub paub no, thiab nrhiav nrhw kev txhawb lwm tus ntseeg. b

2. Vim li cas peb yuav tau muaj hom phiaj ua Yehauvas tes hauj lwm thiab yuav tau caum kom cuag tej hom phiaj ntawd?

² Peb xav ua txhua yam kom haum peb Leej Txiv Yehauvas siab. Yog li ntawd, tsim nyog peb yuav tau muaj hom phiaj ua nws tes hauj lwm. Yehauvas yuav sov siab so thaum nws pom peb siv peb rab peev xwm los mus ua nws tes hauj lwm npaum li peb ua tau. Ntxiv ntawd, peb yuav pab tau peb cov kwv tij nkauj muam ntseeg zoo dua. (1 Thexalaunikes 4:9, 10) Txawm peb ntseeg Yehauvas tau ntev npaum li cas lawm los peb txhua leej txhua tus haj tseem teem tau hom phiaj.

3. Raws li 1 Timautes 4:12-16, tus tub txib Paulus txhawb kom Timautes ua li cas?

³ Thaum tus tub txib Paulus sau nws thawj tsab ntawv rau Timautes, Timautes twb yog ib tug txwj laus lawm. Txawm li ntawd los, Paulus haj tseem txhawb kom nws rau siab ua Yehauvas tes hauj lwm tiag. (Nyeem 1 Timautes 4:12-16.) Yog peb zaum tsaws xav txog Paulus cov lus, peb yuav pom hais tias nws xav kom Timautes ua 2 yam no ntxiv: (1) muaj tej cwj  pwm xws li kev hlub, kev ntseeg thiab coj lub neej dawb huv. (2) Xyaum kom txawj nyeem ntawv tab meeg sawv daws, txawj txhawb lwm tus, thiab txawj qhia. Cia peb mus piav txog Timautes tus yam ntxwv seb muaj hom phiaj ho pab tau peb ua Yehauvas tes hauj lwm li cas. Tsis tas li ntawd, peb yuav piav txuas ntxiv seb muaj ntau txoj kev tshaj tawm txoj moo zoo li cas.

4. Raws li Filipis 2:19-22, vim li cas Yehauvas thiaj siv tau Timautes ua ntau ntau yam?

⁴ Vim Timautes muaj tej cwj pwm zoo, Yehauvas thiaj siv tau nws. (Nyeem Filipis 2:19-22.) Raws li Paulus piav txog Timautes mas Timautes yog ib tug neeg mloog Yehauvas lus, txo hwj chim, pov los pov khawv, thiab tso siab tau. Nws muaj lub siab hlub thiab pab cov kwv tij ntseeg heev. Yog li ntawd, Paulus thiaj hmov tshua Timautes thiab muab ntau yam hauj lwm tso rau Timautes saib xyuas. (1 Kauleethaus 4:17) Zoo ib yam li ntawd, yog peb xyaum coj tej cwj pwm ntxim qhuas ces Yehauvas yuav txaus siab thiab peb yuav ua tau ntau yam rau cov ntseeg.​—Phau Ntawv Nkauj 25:9; 138:6.

5. (1) Yog peb xav xyaum coj cwj pwm zoo, peb yuav tau ua li cas? (2) Raws li daim duab, tus nkauj muam ntseeg uas yog tus hluas xyaum kom paub xav txog lwm tus li cas?

⁵ Xaiv ib lub hom phiaj. Xav seb tseem tshuav tej cwj pwm twg koj tseem coj tsis tshua tau zoo ces thov Yehauvas pab. Xaiv ib yam ntawm koj tus cwj pwm uas koj xav kom koj coj tau zoo ntxiv. Xws li, koj xaiv tau kom txawj xav txog luag lwm tus los sis muaj lub siab pab cov ntseeg los yeej tau. Hos koj xaiv tau kom muaj kev sib haum xeeb thiab txawj zam txim los tau. Ntxiv ntawd, koj ho mus nug ib tug uas koj tso siab tau seb tseem tshuav qhov twg koj haj tseem coj tsis tshua tau zoo los tau.​—Pajlug 27:6.

6. Yuav ua li cas koj thiaj li ncav cuag koj lub hom phiaj?

⁶ Ncav kom cuag koj lub hom phiaj. Yuav kom koj ncav cuag koj lub hom phiaj, koj yuav tau ua tib zoo soj ntsuas tus cwj pwm uas koj xav xyaum ntawd. Xws li koj xav kom koj ua ib tug neeg txawj zam txim rau luag. Tej zaum koj yuav mus nrhiav tej tug uas sau nyob hauv phau Vajlugkub thiab xav mus xav los seb nws ho txawj zam los sis tsis txawj zam lwm tus lub txim li cas. Cia peb zaum tsaws xav txog Yexus tus yam ntxwv. Nws txaus siab hlo zam lwm  tus lub txhoj. (Lukas 7:47, 48) Nws tsuas saib yam uas luag ua tau. Tiam sis cov Falixais uas nyob rau Yexus tiam “saib tsis taus lwm tus” tib neeg. (Lukas 18:9) Yog li ntawd, ua zoo rau ncoo xav li no: ‘Kuv xav li cas txog tus tib neeg tod? Kuv xam pom tus neeg tod tus cwj pwm twg?’ Yog tias koj zam tsis taus ib tug tib neeg twg, cia li xav rau hauv nruab siab seb nws muaj tej cwj pwm zoo twg. Tom qab ntawd, ua tib zoo xav seb ua li yog Yexus nev, ‘Yexus xav txog tus tib neeg ntawd li cas? Yexus puas yuav zam nws lub txim?’ Yog koj coj tau yam li no, yuav pab tau kom koj txawj thim xav. Thaum xub thawj koj yeej ua npaum li koj ua tau los zam tus tib neeg tod. Tiam sis yog peb pheej xav rau qhov zoo tas zaj tas zog ces ib hnub nram ntsis peb yeej yuav zam tau nws lub txim tiag tiag.

7. Raws li Pajlug 22:29, niaj hnub niam no Yehauvas siv cov uas paub ub paub no los ua dab tsi?

⁷ Muaj ib lub hom phiaj uas peb xyaum tau yog kawm kom paub ub paub no. Zaum tsaws xav seb yuav siv pes tsawg leej neeg thiaj los mus tsa tau tej tsev Npe-ee, tej tsev rooj sib txoos, thiab tej Tsev Nceeg Vaj. Muaj coob leej ntau tus kawm tsa vaj tsa tsev los ntawm cov kwv tij nkauj muam ntseeg uas twb txawj txawj tsa vaj tsa tsev lawm. Raws li daim duab, cov kwv tij nkauj muam ntseeg kawm kom txawj kho tej tsev rau rooj sib txoos thiab tej Tsev Nceeg Vaj. Yehauvas uas yog “tus Vajntxwv uas muaj tshwjchim loj dua ntais” thiab Yexus uas yog “tus Vajntxwv ntawm txhua tus vajntxwv,” nkawv siv tau cov paub ua ub ua no los mus ua ntau yam zoo. (1 Timautes 1:17; 6:15; nyeem Pajlug 22:29.) Tsis txhob siv tej uas peb txawj los nqa peb lub koob meej tiam sis cia tej peb txawj ntawd los txhawb nqa Yehauvas lub koob lub npe.​—Yauhas 8:54.

8. Koj yuav ua li cas koj thiaj paub tias yam twg thiaj zoo rau koj xyaum?

⁸ Xaiv ib yam koj xav xyaum. Yog koj tsis paub txiav txim siab yuav ua yam twg ces kav tsij mus nug cov txwj laus hauv koj lub koom txoos thiab tus saib xyuas thaj tsam seb puas muaj yam twg koj ua tau. Yog hais tias lawv ho kom koj xyaum kom koj txawj piav txawj qhia ces rov nug kom lawv ua zoo piav seb ho yog rau seem twg. Tom qab ntawd, cia li kub siab lug xyaum kom koj txawj seem ntawd. Ua li koj yuav pib tog twg tuaj?

9. Koj yuav ua li cas koj thiaj caum cuag koj lub hom phiaj?

⁹ Ua neeg nquag koj thiaj ncav cuag koj lub hom phiaj. Xws li, yog koj xav kom koj ua ib tug txawj txawj qhuab qhia. Cia li ua tib zoo mus nyeem phau ntawv Xyaum Kom Txawj Nyeem Txawj Qhia. Yog tias koj ho muaj npe ua ib qho yeeb yam nyob rau thaum kev sib txoos 1, tom qab koj npaj qhov yeeb yam ntawd tag ces mus nug kom ib tug kwv tij paub tab nrog mloog seb tseem tshuav qhov twg koj yuav tau kho ntxiv. Nco ntsoov npaj tej yeeb yam los sis lus qhuab qhia uas muab rau koj ua ntej xwv thaum cov kwv tij nkauj muam mloog lawv thiaj paub hais tias koj yog ib tug neeg nquag thiab tso siab tau rau.​—Pajlug 21:5; 2 Kauleethaus 8:22.

10. Piav seb yuav ua li cas thiaj txawj ib yam twg.

¹⁰ Tsis txhob rawm maj tag kev cia siab yog koj tsis tau txawj ib yam twg. Muaj ib tug kwv tij npe hu ua Nkelim (Garry) tsis tshua txawj nyeem ntawv pes tsawg. Thaum nws mus sawv ntsug nyeem ntawv saum sam thiaj rau lub koom txoos mloog mas nws txaj muag kawg nkaus li. Tiam sis nws rau siab ntso xyaum mus xyaum los. Tom qab no, nws txawj txawj tham lus qhuab qhia nyob rau hauv tej koom txoos thiab tej rooj sib txoos yeeb vim yog muaj tej kwv tij paub tab cob qhia nws  thiab nws nyeem tej ntaub ntawv Yehauvas lub koom haum luam tawm.

11. Muaj tej yam twg pab tau peb ua hauj lwm ntau zuj zus rau Yehauvas tib yam li Timautes?

¹¹ Phau Vajlugkub hais tsis txog hais tias Timautes yog ib tug txawj qhuab qhia tshaj plaws tiam sis tom qab Paulus qhuab ntuas tas ces Timautes txawm khaws nkaus nws tej lus ntawd mus coj. (2 Timautes 3:10) Zoo ib yam li Timautes, yog peb rau siab ntso xyaum kom txawj ub txawj no ces Yehauvas yuav siv tau peb mus ua ntau ntau yam.

12. Lwm tus tau pab koj li cas?

¹² Lwm tus yeej pab tau peb txhua leej txhua tus. Xws li thaum peb mus pw tom tsev kho mob, peb yeej ris txiaj ntsig rau pab kwv tij sawv cev kev kho mob los sis pab kwv tij mus txhawb cov muaj mob tuaj xyuas peb. Tsis tas li ntawd, peb ris txiaj ntsig rau cov txwj laus uas tuaj mloog thiab nplig peb lub siab thaum peb raug kev nyuaj siab ntxhov plawv hauv peb lub neej. Ntxiv ntawd, thaum peb qhia Vajlugkub rau ib tug twg, peb ris cov tho kev txiaj ntsig uas lawv kuj lauj sij hawm nrog peb mus thiab tom qab ntawd mam li qhia peb seb tseem tshuav qhov twg peb yuav tau xyaum kom txawj. Txhua leej txhua tus kwv tij nkauj muam no yeej qhib siab lug los pab peb. Ces cia peb ho qhib siab lug mus pab lwm tus. Yexus hais tias: “Thaum yus pub rau luag yus zoo siab heev dua thaum yus tau luag li.” (Tes Haujlwm 20:35) Yog hais tias koj ho xav ua ntau yam pub rau Yehauvas ntxiv, koj yuav tau ua li cas?

13. Thaum peb npaj ib lub hom phiaj twg, peb yuav tau nco ntsoov li cas?

¹³ Tsis txhob lam tau lam npaj hom phiaj. Xws li lam hais tias, ‘Kuv yuav ua ntau ntau yam hauv lub koom txoos.’ Tiam sis tsis paub tias qhov ntau ntau yam yog dab tsi. Yog li ntawd, cia li ua tib zoo xaiv seb yuav ua yam twg tiag tiag. Muab teem cia seb yuav ua yam twg rau yam twg ces thiaj ua tau yam ntawd tiav.

14. Thaum peb npaj ib lub hom phiaj twg, peb yuav tau nco ntsoov li cas yog hais tias tsis mus raws li lub siab xav?

¹⁴ Tej thaum yuav muaj tej yam los cuam tshuam ces peb tej hom phiaj yuav tsis mus raws li lub siab xav. Xws li thaum tus tub txib Paulus mus pab tsa lub koom txoos nyob  rau hauv lub nroog Thexalaunikes. Nws lub hom phiaj yog mus pab thiab mus txhawb cov nyuam qhuav los ntseeg lub zog tiam sis tej neeg ob cag tawm tsam heev heev ua rau nws yuav tau tawm ntawm lub nroog ntawd mus. (Tes Haujlwm 17:1-5, 10) Yog Paulus nyob twj ywm rau hauv lub nroog ntawd ces yuav ua kev phom sij rau cov kwv tij nkauj muam nyob rau ntawd. Txawm li ntawd los Paulus nrhiav lwm txoj hau kev kom pab tau cov ntseeg. Nws thiaj li xa Tiamutes mus txhawb lawv lub zog. (1 Thexalaunikes 3:1-3) Cov ntseeg zoo siab heev thaum Timautes lauj sij hawm tuaj txhawb lawv.

15. Piav seb muaj tej yam twg ho los cuam tshuam tau peb tej hom phiaj.

¹⁵ Peb khaws tau ntau yam ntawm tej Paulus raug hauv lub nroog Thexalaunikes. Tej zaum peb teem tau ib lub hom phiaj tiam sis ho muaj lwm yam los cuam tshuam. (Tej Lus Qhia 9:11) Yog tias muaj li no rau peb thiab, ces cia peb ho teem dua lwm lub hom phiaj uas peb yuav caum cuag. Muaj ib khub txwj nkawm hu ua Thej (Ted) thiab Haidis (Heidi) nkawv tau pauv li no. Nkawv yuav tau tso nkawv tes hauj lwm nyob rau hauv Npe-ee tseg vim muaj mob muaj nkeeg. Txawm li ntawd los nkawv tseem kub siab lug xav ua ntau yam rau Yehauvas. Nkawv thiaj li rau npe ua ob tug tho kev. Tsis ntev tom qab no, nkawv kuj rais mus ua ob tug tho kev tshwj xeeb thiab Thej kuj tau kawm ua ib tug pab tus saib xyuas thaj tsam. Tom qab no, Thej lub hnub nyoog los nchav lawm ces nws kuj ua tsis tau tes hauj lwm saib xyuas thaj tsam. Txawm tias nkawv ua tsis tau tes hauj lwm no lawm los, nkawv xam pom tias tseem tshuav ntau yam nkawv ua tau rau Yehauvas. Thej hais tias: “Wb xam pom tias muaj ntau txoj hau kev wb ua tau rau Yehauvas.”

16. Raws li Kalatias 6:4, peb khaws tau li cas?

¹⁶ Peb tswj tsis taus txhua yam uas cuam tshuam peb lub neej. Yog li ntawd, tsis txhob xav hais tias yog tes hauj lwm uas peb ua, thiaj ua rau peb muaj nuj nqis rau Yehauvas xwb. Tsis tas li ntawd, tsis txhob muab peb piv rau lwm leej lwm tus tias lawv ua tau ntau dua. Haidis hais tias, “Yog yus pheej muab yus piv rau lwm tus ces yuav ua rau yus lub neej nyob tsaus ntuj nti xwb.” (Nyeem Kalatias 6:4.) Yog li ntawd, nrhiav txhua txoj hau kev los pab lwm tus thiab teev tiam Yehauvas. c

17. Yuav ua li cas koj thiaj mus ua tau ntau yam hauj lwm rau Yehauvas?

¹⁷ Ua lub neej kom tab seeb thiab tsis txhob lob ntau yam nuj nqis xwv koj thiaj muaj sij hawm mus ua ntau yam rau Yehauvas. Teem  tej lub hom phiaj kom pab tau koj ncav cuag koj tej hom phiaj yav pem suab. Xws li koj yuav tau npaj ua ib tug pab tho kev ua ntej kom lwm hnub koj thiaj ua tau ib tug tho kev. Hos yog koj xav ua ib tug tub leg num ces koj yuav tau lauj sij hawm mus qhia Vajlugkub thiab mus ntoj mus thuv tej tug muaj mob los sis cov laus nyob hauv koj lub koom txoos. Tej yam koj kub siab lug ua niaj hnub niam no yuav pab tau koj ua ntau yam hauj lwm rau Yehauvas yav tom ntej. Yog li ntawd, cia li rau siab ntso ua tes hauj lwm uas muab tso rau koj tam sim no.​—Loos 12:11.

18. Raws li daim duab, koj khaws tau Npevalis tus yam ntxwv li cas?

¹⁸ Txawm peb plaub hau dawb cuag li cag dos lawm los peb haj tseem teem tau hom phiaj. Muaj ib tug nkauj muam ntseeg npe hu ua Npevalis (Beverly) uas muaj hnub nyoog li 75 xyoos lawm. Nws mob mob laug ua rau nws mus kev deeg puj pauv. Tiam sis nws lub siab qaug lais xav mus caw tib neeg tuaj ua kev cai nco txog Yexus. Nws thiaj npaj hom phiaj. Thaum nws ncav cuag nws lub hom phiaj mas ua rau nws zoo siab kawg nkaus li. Tsis tas li ntawd, nws haj tseem txhawb tau lwm leej lwm tus kom sib zog ntsos mus qhia txoj moo zoo. Yehauvas ris txiaj ntsig kawg li rau peb cov kwv tij nkauj muam ntseeg uas hnub nyoog nchav lawd. Txawm lawv ua tsis tau npaum li yav hluas lawm los lawv tseem kub siab lug.​—Phau Ntawv Nkauj 71:17, 18.

19. Muaj tej hom phiaj twg uas peb teem tau?

¹⁹ Yog peb muaj Yehauvas ua tus pab peb tib yam li Timautes ces yuav zoo li 1 Timautes 4:15 tias: “Sawvdaws thiaj yuav pom hais tias koj tes haujlwm zoo zuj zus ntxiv.” Yog li ntawd, nco ntsoov teem tej lub hom phiaj kom peb caum cuag. Xyaum tej cwj pwm uas raug Yehauvas siab. Mob siab kawm tej ub tej no kom txawj xwv Yehauvas thiaj siv tau peb ua ntau yam hauv nws lub koom haum. Tsis tas li ntawd, nrhiav txhua txoj hau kev los mus txhawb cov kwv tij nkauj muam ntseeg. d