1. Edena tahua gaudia ita atoa be namo?

 ITA BE Keristani taudia korikori dainai, Iehova ita lalokau henia bada. Ita ura Iena hesiai gaukara lalonai iseda nega bona goada ita henia. To, unai bamona ita karaia totona, tahua gaudia ita atoa be namo, hegeregere Keristani kara namodia ita hahedinaraia noho, gaukara idauidau ita dibaia noho, bona dala ita tahua ma haida ita hesiai henia noho.

2. Dahaka dainai ita gaukara goada Iehova ena hesiai tauna namona ai ita lao totona?

² Dahaka dainai ita gaukara goada Iehova ena hesiai tauna namona ai ita lao totona? Ginigunana be, ita ura iseda lalokau guba Tamana ita hamoalea. Iehova ia itaia iena hesiai gaukara lalonai iseda diba bona goada ita gaukaralaia neganai, ia moale. Danu, ita ura Iehova ena hesiai tauna namona ai ita lao, unai amo iseda tadikaka bona taihu ita durua namonamo. (1 Tes. 4:9, 10) Ena be hereva momokani lalonai lagani daudau ita noho, to Iehova ena hesiai tauna namona ai ita lao diba. Mani unai ita karaia dalana ita herevalaia.

3. Timoteo Ginigunana 4:12-16 hegeregerena, aposetolo Paulo ese Timoteo ia hagoadaia dahaka ia karaia totona?

³ Aposetolo Paulo ese Timoteo dekenai ena revareva ginigunana ia siaia neganai, Timoteo be elda maduna ia abia vadaeni.  To, Paulo ese ia hagoadaia Iehova ena hesiai tauna namona ai ia lao totona. (1 Timoteo 4:12-16 duahia.) Paulo ena hereva oi laloa neganai, do oi itaia ia ura Timoteo ese inai dala rua ia hanamoa noho: (1) Keristani kara namodia, hegeregere lalokau, abidadama, bona kara goeva ia hahedinaraia, bona (2) taunimanima vairanai duahiduahi, sisiba henia, bona hadibaia karana ia hanamoa. Timoteo ena haheitalai amo, do ita itaia tahua gaudia namodia ita atoa neganai, unai ese ita do ia durua Iehova ena hesiai tauna namona ai ita lao totona. Bona iseda hesiai gaukara ita habadaia daladia haida do ita herevalaia danu.

4. Filipi 2:19-22 hegeregerena, dahaka ese Timoteo ia durua Iehova ena hesiai tauna namona ai ia lao totona?

⁴ Dahaka ese Timoteo ia durua Iehova ena hesiai tauna namona ai ia lao totona? Ia ese Keristani kara namodia ia hahedinaraia noho. (Filipi 2:19-22 duahia.) Paulo ese Timoteo ia herevalaia dalana amo ita diba, ia be manau, abidadama, bona gaukara goada tauna. Ia be ena tadikaka taihu ia lalokau henia bona laloa bada. Unai dainai, Paulo ese Timoteo ia lalokau henia bona ia auka lasi ia dekenai asainmen badadia ia henia totona. (1 Kor. 4:17) Unai hegeregerena, Iehova ese ia ura henia karadia ita habadaia neganai, ita do ia lalokau henia bona kongrigeisen lalonai gaukara idauidau ita karaia diba.​—Sal. 25:9; 138:6.

5. (a) Keristani karana ta oi hanamoa totona dahaka oi karaia be namo? (b) Laulau hegeregerena, taihu matamata ta ena tahua gauna, ma haida hebogahisi henia karana, be edena bamona ia badinaia?

⁵ Tahua gauna ta oi atoa. Oi guriguri bona do oi hanamoa karadia oi laloa be namo. Bena kara ta oi abia hidi do oi hanamoa totona. Hegeregere, oi ura hebogahisi karana oi habadaia, eiava emu ura oi hagoadaia tadikaka taihu oi durua totona, a? Oi ura maino bona dika gwauatao karana oi habadaia, a? Emu tura namona ta ena heduru oi tahua, emu kara oi hanamoa daladia ia gwauraia totona.​—Aon. 27:6.

6. Edena dala ai emu kara ta oi hanamoa diba?

⁶ Oi gaukara goada emu tahua gauna oi hagugurua totona. Edena bamona unai do oi karaia? Dala ta be oi ura hanamoa karana oi stadilaia. Bema oi ura ma haida edia dika gwauatao karana oi hanamoa,  namona be Baibel ai dika idia gwauatao bona idia gwauatao lasi taudia edia sivarai oi duahia bona laloa dobu. Iesu ena haheitalai oi laloa. Ia be mai ura ida ma haida edia dika ia gwauatao. (Luka 7:47, 48) Danu, edia kerere ia laloa momo lasi, to idia hagugurua diba gaudia ia laloa. To, Iesu ena negai idia noho Farisea taudia be idau, badina idia ese “ma haida idia laloa maragi.” (Luka 18:9) Unai haheitalai oi laloa dobu murinai, sibona oi nanadaia: ‘Ma haida be edena bamona lau laloa? Edia kara amo edena lau laloa bada?’ Bema ta ena dika oi gwauatao be auka, pepa dekenai unai tauna ena kara namodia momo oi torea. Bena sibona oi nanadaia: ‘Iesu ese unai tau be edena bamona ia laloa? Ena dika do ia gwauatao, a?’ Bema unai bamona ita karaia, iseda lalohadai ita hamaoromaoroa diba. Matamanai, reana ta ena dika ita gwauatao be auka. To, bema unai bamona ita karaia noho, do ia auka lasi dika ita gwauatao totona.

7. Aonega Herevadia 22:29 hegeregerena, edena dala ai Iehova ese gaukara idia diba namonamo taudia ia gaukaralaia?

⁷ Tahua gauna namona ma ta be, gaukara ta oi dibaia. Mani oi laloa, Betele rumadia, Assembly Hall, bona Kingdom Hall haginia totona gaukara taudia momo idia noho be namo. Idia momo be ekspiriens tadikaka taihu ida idia gaukara hebou dainai diba ma haida idia abia. Laulau hegeregerena, tadikaka bona taihu be gaukara ma haida idia dibaia, unai ese idia ia durua Assembly Hall bona Kingdom Hall idia hanamoa totona. Iehova Dirava, “noho hanaihanai King,” bona Keriso Iesu, “king ibounai edia King” ese gaukara idia diba namonamo taudia idia gaukaralaia, gaukara badadia idia hagugurua totona. (1 Tim. 1:17; 6:15; Aonega Herevadia 22:29 duahia.) Ita ura ita gaukara goada bona iseda diba ita gaukaralaia Iehova ita hanamoa totona, to ita sibona hanamoa totona lasi.​—Ioa. 8:54.

8. Bema oi ura gaukara ta oi dibaia, dahaka oi karaia be namo?

⁸ Tahua gauna ta oi abia hidi. Oi ura edena gaukara oi dibaia? Emu kongrigeisen elda bona reana emu sekit naria tauna oi nanadaia edena gaukara oi karaia diba. Hegeregere, bema idia gwau emu haroro bona hadibaia dalana oi hanamoa, idia oi nanadaia do oi hanamoa kahana dekenai oi idia durua. Bena oi gaukara goada unai oi hanamoa totona. Edena dala ai unai oi hagugurua diba?

9. Edena dala ai emu tahua gauna oi hagugurua diba?

⁹ Oi gaukara goada emu tahua gauna oi hagugurua totona. Bema oi ura hadibaia tauna namona ai oi lao, Duahiduahi Bona Hadibaia Karana Oi Hanamoa buklet oi stadilaia namonamo. Oi dekenai wiki ena hebou totona kahana ta idia henia neganai, ekspiriens tadikaka ta oi noia do oi henia kahana ia kamonai bona hanamoa gaudia ia herevalaia totona. Namona be nega bada ia noho lalonai emu kahana oi hegaegaelaia, unai amo taunimanima idia itaia oi gaukara goada bona emu gaukara oi hagugurua.​—Aon. 21:5; 2 Kor. 8:22.

10. Ita diba lasi gaukara ta ita hagugurua ena haheitalai ta gwauraia.

¹⁰ Bema oi diba lasi gaukarana ta oi ura hagugurua, dahaka do oi karaia? Oi hesiku lasi! Tadikaka ta ladana Garry be ia duahiduahi namonamo lasi. Ia laloatao kongrigeisen heboudia dekenai ia ura duahiduahi neganai, ia hemarai momokani. To ia hekwarahi noho. Ia gwau diba momo tadikaka bona pablikeisen ese idia durua dainai, hari Kingdom Hall, sekit hebouhebou, bona rijinol hebouhebou ai tok ia henia diba!

11. Timoteo hegeregerena, dahaka ese ita ia durua Iehova ena hesiai gaukara ma haida ita karaia totona?

 ¹¹ Timoteo be hereva namonamo tauna eiava hadibaia tauna namona ai ia lao, a? Baibel ese unai ia gwauraia lasi. To Timoteo be Paulo ena sisiba ia badinaia dainai ena gaukara ia karaia namonamo. (2 Tim. 3:10) Unai hegeregerena, bema iseda diba ita habadaia, Iehova ena hesiai gaukara ma haida ita karaia diba.

12. Ma haida edia hesiai gaukara amo dahaka namo oi davaria?

¹² Ita ibounai be ma haida edia hesiai gaukara amo namo ita davaria. Ma haida be gau momo idia karaia ita idia durua totona. Hegeregere, hospital dekenai ita noho neganai, Hospital Liesen Komiti o Patient Visitation Group ai idia gaukara elda taudia ese ita idia vadivadi henia neganai ita moale. Hekwakwanai ta ita davaria dainai, elda ta ese iseda hereva ia kamonai namonamo bona ita ia hagoadaia neganai, ita moale. Ekspiriens painia ta be iseda stadi dekenai ia helai bona heduru herevadia ia gwauraia neganai ita moale. Unai tadikaka bona taihu be idia moale ita idia durua totona. Bema dala ita tahua iseda tadikaka taihu ita hesiai henia, do ita moale danu. Iesu ia gwau: “Henia kara ena moale be bada, to abia kara ena moale be maragi.” (Kara 20:35) Bema oi ura unai bamona dala idauidau ai emu hesiai gaukara oi habadaia, dahaka ese oi do ia durua emu tahua gaudia oi hagugurua totona?

13. Tahua gauna ta ita abia hidi neganai, dahaka ita laloatao be namo?

¹³ Namo lasi tahua gaudia momo be nega tamona oi abia hidi. Hegeregere, reana oi laloa, ‘Lau ura kongrigeisen ai gaukara idauidau lau karaia.’ To unai tahua gauna hagugurua dalana bona oi hagugurua negana oi diba lasi. Unai dainai tahua gauna ta oi abia hidi be namo. Reana emu tahua gauna bona oi hagugurua dalana be pepa dekenai oi torea diba.

14. Tahua gauna ita abia hidi neganai, dahaka dainai idia vara gaudia ita laloa be namo?

¹⁴ Tahua gaudia ita abia hidi neganai, do idia vara gaudia ita laloa danu. Dahaka dainai? Badina ita dekenai idia vara gaudia haida ita haidaua diba lasi. Haheitalai be inai: Aposetolo Paulo ena heduru amo Tesalonika dekenai kongrigeisen matamata idia haginia. Bona  ena tahua gauna be, unai kongrigeisen ai idia noho taudia do ia durua. To haida ese idia dagedage henia unai siti ia rakatania totona. (Kara 17:1-5, 10) Bema Paulo be unai siti ia rakatania lasi, reana ena tadikaka do idia dagedage henia danu. To Paulo ese idia ia durua noho. Iena noho dalana ia haidaua. Gabeai, ia ese Timoteo ia siaia Tesalonika ai idia noho Keristani taudia ia hagoadaia totona. (1 Tes. 3:1-3) Tesalonika ai tadikaka taihu idia moale bada, badina Timoteo be mai ura ida hesiai gaukara idauidau ia karaia!

15. Noho dalana ia idau neganai, edena dala ai unai ese iseda tahua gaudia ia haidaua diba? Haheitalai gwauraia.

¹⁵ Tesalonika dekenai Paulo ena sivarai amo diba ita abia. Reana tahua gauna ta ita atoa, to noho dalana ia idau dainai ita hagugurua diba lasi. (Had. 9:11) Bema oi dekenai unai ia vara, oi hagugurua diba tahua gauna ma ta oi abia hidi. Tadikaka ta ladana Ted bona ena adavana Heidi be unai bamona idia karaia. Gorere dainai Betele idia rakatania. To Iehova idia lalokau henia dainai, dala ma ta amo edia hesiai gaukara idia habadaia. Matamanai, regula painia gaukara idia karaia. Gabeai, spesel painia gaukara idia karaia, bona Ted be sekit gaukara durua totona treinini ia abia. Bena sekit taudia totona mauri lagani dainai senisi ia vara. Ted bona Heidi idia laloparara sekit gaukara do idia karaia diba lasi. Ena be idia lalohisihisi, to idia diba dala ma haida ai Iehova do idia hesiai henia. Ted ia gwau: “Ai dibaia gauna be, dala idauidau ai Iehova ita hesiai henia diba.”

16. Galatia 6:4 amo dahaka ita dibaia?

¹⁶ Iseda mauri lalonai idia vara gaudia ita haidaua diba lasi. Unai dainai, namo lasi ita laloa ita karaia asainmen dainai Iehova ese ita ia laloa bada eiava ita karaia gaukarana be ma haida ida ita hahegeregerea. Heidi ia gwau, “Bema oi karaia gaudia be ma haida ida oi hahegeregerea, do oi moale lasi.” (Galatia 6:4 duahia.) Gau badana be dala idauidau ita tahua ma haida ita durua bona Iehova ita hesiai henia. b

17. Hesiai gaukara oi habadaia totona, dahaka oi karaia be namo?

¹⁷ Bema emu mauri ai gau momo oi tahua lasi bona abitorehai momo oi karaia lasi, Iehova ena hesiai gaukara oi habadaia diba. Tahua gaudia maragidia oi hagugurua neganai, unai ese oi do ia durua tahua gaudia badadia oi hagugurua. Hegeregere, bema emu tahua gauna be regula painia gaukara, hari hua ta ta ai heduru painia do oi karaia, a? Bema emu tahua gauna be hesiai tauna ai oi lao, haroro  gaukara oi habadaia bona emu kongrigeisen ai gorere bona buruka taudia do oi vadivadi henia, a? Hari oi dibaia gaudia ese dala do ia kehoa, nega vaira ai hesiai gaukara ma haida oi karaia totona. Emu lalona oi hadaia oi dekenai idia henia gaukaradia oi hagugurua totona.​—Roma 12:11.

18. Laulau hegeregerena, Beverley ena haheitalai amo dahaka oi dibaia?

¹⁸ Ena be ita be buruka, to Iehova ena hesiai tauna namona ai ita lao diba. Taihu Beverly, ena mauri lagani be 75, ena haheitalai mani ita laloa. Ia be gorere badana ta ia davaria dainai ia raka diba lasi. To ia ura bada Memorial kempein gaukarana ia durua. Unai dainai tahua gaudia haida ia atoa. Beverly ese kempein totona ena tahua gaudia ia hagugurua neganai, ia moale bada. Ena haheitalai ese ma haida ia durua edia hesiai gaukara idia habadaia totona. Oibe, ena be buruka tadikaka taihu ese gaukara momo idia karaia diba lasi, to Iehova ese idia karaia gaukarana ia laloa bada.​—Sal. 71:17, 18.

19. Dahaka ese ita ia durua Dirava hesiai henia totona tahua gaudia ita atoa?

¹⁹ Oi hagugurua diba tahua gauna oi atoa. Iehova ese ia moalelaia karadia oi hahedinaraia noho. Gaukara idauidau oi dibaia, unai amo Dirava bona ena orea ese oi do idia gaukaralaia. Dala oi tahua emu tadikaka bona taihu edia hesiai gaukara oi karaia totona. c Timoteo hegeregerena, Iehova ese oi ia hanamoa dainai “taunimanima ibounai do idia itaia oi be oi goada noho.”​—1 Tim. 4:15.