1. Ozondando zeṋe nḓu matu yenene okutwa po motjiungura tja Jehova?

 OTJOVAKRISTE vatjiri, eṱe twa suvera Jehova tjinene. Eṱe tu vanga okuungura ovingi motjiungura tja Jehova otja pu matu yenene. Nungwari kokutja tu ungurire Jehova otja pu matu yenene, eṱe matu hepa okutwa po ozondando motjiungura tje. Ozo ozondando tjimuna okukurisa ovikaṋena vyOukriste, okurihonga okuungura oviṋa pekepeke, nokupaha omiano vyokukarera ovakwetu.

2. Ongwaye tji matu sokutwa po ozondando zokuungura ovingi motjiungura tja Jehova nokuungura oukukutu okuzeyenenisa?

² Ongwaye tji matu sokukara nonḓero yokurira ovakarere va Jehova ovasemba? Tjinene, omena rokutja eṱe tu vanga okutjata ku Tate wetu womeyuru worusuvero. Jehova u kara nonyuṋe, indu tji me tu munu amatu ungurisa oviyandjewa nondjiviro yetu motjiungura tje. Eṱe wina tu vanga okukurisa oupanga wetu ku na Jehova, kokutja tu yenene okuvatera ovakambure ovakwetu. (1 Tes. 4:9, 10) Atuhe matu yenene okukurisa oupanga wetu ku na Jehova, kainatja kutja twa kara orure ndu ṱa pi mouatjiri. Ngatu tare kutja matu yenene vi okutjita nao.

3. Otja komambo nge ri mu 1 Timoteus 4:12-16, omuapostele Paulus wa tunduuza Timoteus okutjita tjike?

³ Nandarire kutja Timoteus wa ri omurumendu omutanda indu omuapostele Paulus tja tjanga orutuu orutenga ku ye, Timoteus wa ri omunene wombongo ngu nondjiviro ombwa. Posi yokutja, Paulus we mu tunduuza kutja ma kayende komurungu okurira omukarere wa Jehova omusemba. (Lesa 1 Timoteus 4:12-16.) Otja tji mo ripura ohunga nomambo wa Paulus, ove mo munu kutja eye aa vanga kutja Timoteus me kure momiano vivari. Omuano umwe, omokuraisa ovikaṋena vyOukriste tjimuna orusuvero,  ongamburiro, noukohoke. Nu outjavari, omokukura mondjiviro ye yokulesera ovandu Omatjangwa, nokuzuvarisa, nokuhonga. Eṱe matu kahungirira kotjihorera tja Timoteus, tji matji tu raisire omuano wokutwa po ozondando nḓu matu yenene okuyenenisa, kokutja tu rire ovakarere va Jehova ovasemba. Wina, matu katara komiano mu matu yenene okuungura ovingi motjiungura tjokuzuvarisa.

4. Otja kOvafilipi 2:19-22, otjikeṋa tji tja tjita kutja Timoteus ma rire omukarere Jehova ngu ma yenene okuungurisa?

⁴ Otjikeṋa tji tja tjita kutja Timoteus ma rire omukarere Jehova ngu ma yenene okuungurisa? Ovikaṋena vye oviwa vyOukriste. (Lesa Ovafilipi 2:19-22.) Okuza komuano Paulus maa hungire ohunga na Timoteus, eṱe matu yenene okumuna kutja Timoteus wa ri omurisusuparise, omuṱakame, epatje, nu wa ri omundu ku mo yenene okuṱaṱera. Eye wa ri norusuvero nu ee rikendere ovakambure ovakwao tjinene. Mena ranao, Paulus wa suverere Timoteus, nu Paulus kaa keyakeya okumupa oviungura ovizeu. (1 Kor. 4:17) Momuano otjingewo, Jehova me tu suvere nu matu yenene okuungurisiwa tjinene mombongo, indu tji matu kurisa ovikaṋena oviwa eye mbya suvera.—Eps. 25:9; 138:6.

5. (a) Mo yenene vi okutoorora kutja otjikaṋena tjiṋe tjOukriste tji mo vanga okuungurira ko? (b) Otja tji pa raisiwa motjiperendero, omomuano uṋe omukazendu omukambure omutanda mu ma ungurire kondando ye yokuraisira varwe otjari?

⁵ Toorora otjikaṋena tjorive tji mo vanga okuungurira ko. Kumba, nu u ripurire kotjikaṋena tji mo hepa okuungurira ko. Yandja ombango kotjikaṋena tjimwe tji mo vanga okuungurira ko. Otjotjihorera, ove mo yenene okukondja okuungurira kotjikaṋena tjimuna otjari. Poo okukurisa onḓero yokuvatera ovakambure ovakweṋu. Poo ove mo yenene okukondja okurira omuhangane nokuisira ovakweṋu oupupu. Ove mo yenene okuningira epanga roye ropopezu okukuraera oviṋa mbi mo sokuungurira ko.—Omiano 27:6.

6. Ovikeṋa mbi mo yenene okutjita kutja u ungurire kotjikaṋena tjorive?

⁶ Ungurira kondando yoye. Omomuano uṋe mu matu yenene okutjita nao? Omuano umwe mu mo yenene okutjita nao, omokukonḓonona nawa otjikaṋena tji mo vanga okuungurira ko. Ngatu tje ove wa tye okuungurira kotjikaṋena tjokuisira varwe. Ove mape ya o utu okulesa nokuripurira ko oukoto kovihorera vyOmbeibela vyaimba mba isira varwe oupupu, na imba mba tjinda ongore. Tara kotjihorera tja Jesus. Eye wa ri nonḓero yokuisira varwe. (Luk. 7:47, 48) Eye wina ke na pa yandja ombango kozondataiziro  zavarwe. Nungwari wa yandja ombango ku imbi mbyaave yenene okutjita. Posi yokutja, Ovafarisei momayuva Jesus tja ri kombanda yehi, va ‘nyengurire ovakwao.’ (Luk. 18:9) Tji wa zu nokuripurira oukoto kovihorera mbi, ripura omuini kutja, ‘Ovikeṋa mbi mbi muna movakwetu? Ovikaṋena viṋe vyawo ku mbi yandja ko ombango?’ Indu tje ri ouzeu okuisira omundu warwe, kondja okutjanga ovikaṋena vye avihe oviwa. Okuzambo ripura omuini omapuriro nga: ‘Hapo Jesus u noumune uṋe ohunga nomundu ngwi? Hapo Jesus mape ya e mu isire?’ Indu tji twa tjiti nao, maku tu vatere okurundurura omeripura wetu. Pomautiro mape ya atu hepa okuungura oukukutu okuisira omundu ngwe tu hihamisa. Posi yokutja, indu tji twa kayenda komurungu okuungurira kotjiṋa ho, otja oruveze pu maru kayenda eṱe matu yenene okukara nonḓero yokuisira varwe.

7. Omiano 22:29 ri raisa vi kutja Jehova u ungurisa ovaungure ozonongo ndino?

⁷ Ondando yarwe ndji mo yenene okutwa po, okurihonga okuungura oviṋa pekepeke. Ripurira kotjivarero tjovaungure mbe hepwa okutunga ozomberoo zoBetel, Omatuwo wOmaworonganeno, nOmatuwo wOmerikotameneno. Ovengi vawo va tjiwa oviungura mbyo mokuungura pu novakambure mbe nondjiviro ombwa. Otja tji pa raisiwa motjiperendero, ovakambure ovarumendu novakazendu mave rihongo oviṋa mbi mave hepa okutjiwa kokutja ve yenene okuvatera okuṱuna Omatuwo wOmaworonganeno nOmatuwo wOmerikotameneno. Momiano mbi na vyarwe, Jehova Mukuru, “Ombara yaaruhe,” na Kristus Jesus, “Ombara yozombara,” ve yenena okuungura oviungura vyapeke okupitira movaungure ozonongo mba. (1 Tim. 1:17; 6:15; lesa Omiano 22:29.) Eṱe tu sokuzera okuungura oukukutu, nokuungurisa ondjiviro ndji tu na yo okuhivirika Jehova, nungwari kaku rihiva oveni.—Joh. 8:54.

8. Mo yenene vi okutya kutja otjikeṋa tji mo hepa okurihonga okutjita?

⁸ Toorora otjiṋa tji mo vanga okurihonga. Otjikeṋa tji mo yenene okurihonga? Pura kovanene vombongo yoye poo nandarire komutarere worukondwa kutja otjikeṋa tji mave munu kutja mo sokuungurira ko. Otjotjihorera, ndoovazu owo ve ku raere kutja mo sokuungurira komuano mbu u hungira nokuhonga, ve pura kutja ve ku vatere okumuna kutja otjikaṋena tjiṋe tjokuhungira tji mo hepa okuungurira ko. Okuzambo kondja nomasa okuungurira kotjiṋa ho. Mo yenene vi okutjita nao?

9. Ovikeṋa mbi mo yenene okutjita tji mo vanga okuungurira kotjikaṋena tjorive?

⁹ Ungurira kondando yoye. Ngatu tje ove mo vanga okuungurira komuano woye wokuhonga. Ove mo yenene okukonḓonona nawa okambo nga Panḓera pokulesa nokuhonga. Indu tji wa pewa orupa mombongarero yomokati kotjivike, ove mo yenene okuningira omurumendu omukambure ngu nondjiviro ombwa okupuratena kehungi roye ngunda au hi ya yandja mombongo, nokutja me ku raere kutja ovikeṋa mbi mo sokuungurira ko. Rirongerisa otupa twoye nawa komurungu woruveze, kokutja ovandu ve mune kutja u ungura oukukutu, nu oove omundu ku mave yenene okuṱaṱera ko.—Omiano 21:5; 2 Kor. 8:22.

10. Yandja otjihorera tji matji raisa kutja matu yenene vi okuungurira kondjiviro ndji matu hepa.

¹⁰ Mo tjiti vi indu otjiṋa tji mo vanga okuungurira ko tji tji ri otjizeu kove okutjita? O rihahiza. Omurumendu omukambure wena Garry wa ri nouzeu wokulesa. Eye aa zemburuka omuano mbwaa ṱohoṋi indu tjaa kondjo okulesa komurungu yombongo. Posi yokutja eye wa kondja okuungurira ko. Eye nai u tja, mena romahongero eye nga muna, u yenena okuyandja omahungi pEtuwo rOmerikotameneno, pomaworonganeno worukondwa nowotukondwa.

11. Otjikeṋa tji matji yenene okutuvatera okuungura ovingi motjiungura tja Jehova tjimuna Timoteus tja tjita?

 ¹¹ Hapo Timoteus wa rira omuhungire omuwa uriri poo wa ri omuhonge omuwa wina? Ombeibela kai hungirire ko. Posi yokutja, Timoteus tjiri wa rira omuungure omuwa motjiungura tja pewa, mena rokutja eye aa yakura ondunge Paulus ndje mu pa. (2 Tim. 3:10) Momuano otjingewo, indu tji twe kurisa ondjiviro yetu, eṱe wina matu yenene okuungura ovingi motjiungura tja Jehova.

12. Ove wa muna vi ouwa mombatero ndji wa pewa i yovakambure ovakweṋu?

¹² Eṱe atuhe tu muna ouwa indu varwe tji mave tu vatere. Tji tu ri mohospitala, eṱe tu tjaterwa indu tji twe yekuvarurwa i yovanene vombongo mbe ri mOzokomiti zOmapangero, poo Oumbumba wOvanene vOmbongo mbe varura Ovakambure mba vere (Patient Visitation Groups). Tji tu nomauzeu omengi mehupo, eṱe tu kara nonyuṋe indu omunene wombongo worusuvero tja twa po oruveze rwokupuratena ku eṱe nokutuyanḓiparisa. Indu tji matu hepa ombatero yokuhonga omuhongwa wetu wOmbeibela momuano omusemba, eṱe tu kara nonyuṋe indu omukandjira wondjiviro tja yakura okuyenda pu na eṱe nokutupa ondunge. Ovarumendu novakazendu ovakambure mba, ve tjaterwa okutuvatera. Eṱe matu yenene okukara nondjoroka otja indjo, indu tji matu riyandjere oveni okukarera ovakambure ovakwetu. Jesus wa tja: “Mokuyandja mu nenyando tjinene pokupewa.” (Oviung. 20:35) Tji mo vanga okuungura ovingi motjiungura tja Jehova momiano mbi poo vyarwe, otjikeṋa tji matji ku vatere okuyenenisa ozondando zoye?

13. Otjikeṋa tji mo sokuzemburuka indu tji mo twa po ondando?

¹³ O twa po ondando ndji he ri ongahu. Otjotjihorera, ove mape ya o ripura kutja, ‘Ami me vanga okuungura ovingi mombongo.’ Nungwari mape ya a rire ouzeu okutjiwa kutja ondando ndjo mo i yenenisa vi. Nu mape ya o ha tjiwa kutja we i yenenisa. Ku nao, kara nondando ongahu poo tjiwa kutja otjikwaye tji mo ungurire ko. Ove mo yenene okutjanga ozondando zoye, nu o twa po kutja wa tanda okuzeyenenisa vi.

14. Ongwaye tji matu sokuyenena okutjita omarundurukiro indu tji matu tjiti ozondando?

¹⁴ Matu sokukara kamwaha okutjita omarundurukiro indu tji matu tjiti ozondando. Omena raye? Mena rokutja eṱe kamaatu yenene okutjiwa kutja ozongaro zetu maze kara vi. Okusasaneka: Omuapostele Paulus wa vatera okuzika  ombongo ombe motjihuro tja Tesalonika. Neye tjiri wa ri nondando yokukara mo, nokuvatera imba mba rira Ovakriste ovape. Posi yokutja ovapirukire va ṋiṋikiza Paulus kutja ma pite motjihuro ho. (Oviung. 17:1-5, 10) Andakuzu Paulus wa panḓa okupita, eye atja eta oumba kovakambure ovakwao. Nungwari Paulus ke na pa isa okukondja okuvevatera. Posi yokutja eye wa yakura ozongaro nḓe ya po, na tjiti omarundurukiro. Kombunda eye wa hinda Timoteus okukavatera Ovakriste ovape moTesalonika okukurisa ongamburiro yawo. (1 Tes. 3:1-3) Ovatesalonika mape ya va ri nondjoroka tjinene kutja Timoteus we riyandjera omuini okukakarera imba pu pe nouhepe.

15. Ozondando zetu mape ya aze runduruka vi indu ozongaro zetu tji za runduruka? Sasaneka.

¹⁵ Eṱe matu yenene okurihongera kotjihorera tja Paulus indu tja ri moTesalonika. Eṱe mape ya atu twa po ondando, posi yokutja ongaro ndje ya po ai ha yandjere kutja tu yenenise ondando ndjo. (Omuzuv. 9:11) Ndoovazu u ri mongaro ndjo, kara nonḓero yokurundurura ondando yoye ku indji ndji mo yenene. Iho ovakupasane ooTed na Hiedi otji va tjita. Mena rouveruke mbu ha ri ouwa, owo aave sokuisa oBetel. Posi yokutja orusuvero rwawo ku Jehova rwe ve hinga kutja ve pahe omiano vyarwe vyokuungura ovingi motjiungura tjokuzuvarisa. Owo rutenga va rira ovakandjira ovakarerere. Kombunda owo va kazikwa otjovakandjira vapeke, nu Ted wa kahongwa okurira omutarere worukondwa omuvatere. Nu okuzambo otjiwondo tji tji undjirwa kovatarere vorukondwa tja rundururwa. Ted na Hiedi va muna kutja owo kave nokuyenena okukarera Jehova motjiungura ho rukwao mena rotjiwondo tjawo. Nandarire kutja va ri nomihihamwatima, owo aave tjiwa kutja mave yenene okukarera Jehova momiano vyarwe. Ted wa tja: “Eṱe twe rihonga kutja matu yenene okukarera Jehova momiano omingi.”

16. Otjikeṋa tji matu rihongere kOvagalate 6:4?

¹⁶ Eṱe kamaatu tjaere oviṋa avihe mbi tjitwa mehupo retu. Ku nao, o tje ri ounanḓengu okuhinokuripura kutja oweṱe ovananḓengu indu tji tu noviungura motjira tja Jehova uriri. Nu katu sokurisasaneka novakwetu mbe noviungura mbi tu hi na vyo. Hiedi wa tja: “Ove komoo kara nondjoroka indu tji mo sasaneke ehupo roye ku nehupo rovakweṋu varwe.” (Lesa Ovagalate 6:4.) Ounanḓengu ku eṱe okupaha omiano mu matu yenene okuvatera varwe, nokukarera Jehova. b

17. Otjikeṋa tji mo yenene okutjita kutja u mune omerizirira motjiungura tja Jehova?

¹⁷ Ma rire oupupu kove okuungura ovingi motjiungura tja Jehova, indu tji mo kara nehupo ndi hi noviṋa ovingi, na tji u hi nozondjo nḓe he ri ohepero. Twa po ozondando ozonḓiṱi, nḓu maze  ku vatere kutja u yenenise ozondando zoye ozonene. Otjotjihorera, indu tji mo vanga okutwa po ondando onene tjimuna yokurira omukandjira omukarerere, onawa okuuta okuungura otjomukandjira omuvatere omueze auhe okuza ku nai. Ndoovazu u nondando yokurira omuvatere wombongo, mape ya a rire nawa tji wa utu okuungura ozoiri ozengi motjiungura tjokuzuvarisa, nokukavarura ovavere novakurundu mombongo yeṋu. Ondjiviro ndji mo munu nai, mai ku vatere kutja u yenene okumuna omerizirira warwe motjiungura tja Jehova moruyaveze. Kondja okuungura nomutima woye auhe motjiungura ngamwa tji wa pewa.—Rom. 12:11.

18. Otja tji pa raisiwa motjiperendero, mo rihongere ko ye kotjihorera tja Beverley?

¹⁸ Oukurundu kau tu tjaere okutwa po nokuyenenisa ozondando motjiungura tja Jehova. Tara kotjihorera tjomukazendu omukambure wozombura 75, wena Beverley. Eye wa ri nomutjise omuzeu mbwaau tjiti kutja ku rire ouzeu ku ye okukayenda. Posi yokutja eye aa zeri okukara norupa okuura momaṋangero wovandu kOmazemburukiro wOnḓiro ya Jesus. Ku nao, eye wa twa po ondando yokukara norupa motjiungura ho. Beverley wa ri nondjoroka tjinene indu tja yenenisa ondando ye ndjo. Ongondjero ye ndjo ya hinga varwe okukondja okuungura oukukutu motjiungura tjokuzuvarisa. Jehova u vara oviungura vyovakambure ovanene motjiwondo pondondo yokombanda, nandarire kutja ongaro yawo kai ve yandjere okuungura otja pu mave vanga.—Eps. 71:17, 18.

19. Ozondando zeṋe tjiva nḓu matu yenene okuritwapera motjiungura tja Jehova?

¹⁹ Twa po ozondando nḓu mo yenene okuyenenisa. Kara novikaṋena oviwa mbi mavi tjata ku Jehova. Rihonga oviṋa mbi mavi ku vatere kutja u ungurisiwe i Jehova notjira tje. Paha omiano vyokuvatera ovakambure ovakweṋu otja Jehova pe undjira ko. c Jehova me ku vatere kutja “omaryameno woye komurungu ye munike kovandu avehe,” tjimuna tja vatera Timoteus.—1 Tim. 4:15.