1. Nama juluk ati ba pengarap ke ulih ditetapka kitai?

 KETEGAL kitai orang Kristian ti bendar, kitai amat rinduka Jehovah. Kitai deka meri utai ti pemadu manah lebuh gawa ke Jehovah. Kena bebendar ngereja nya, kitai patut netapka juluk ati ba pengarap. Ambika chunto, kitai ulih ngemansangka sifat Kristian, belajarka pengelandik ti beguna sereta ngiga chara nulung orang bukai. b

2. Nama kebuah kitai patut netapka juluk ati ba pengarap sereta bebendar nyapai nya?

² Kitai deka ngelantangka ati Jehovah. Nya alai, kitai bebendar deka ngaga pemansang ba pengarap. Jehovah gaga ati lebuh meda kitai ngena pengelandik sereta penau kitai gawa ke Iya. Nambahka nya, kitai deka mansang ba pengarap ngambika ulih nulung bala menyadi Kristian. (1 Tes. 4:9, 10) Semua kitai ulih terus ngaga pemansang ba pengarap enda ngira berapa lama kitai udah nyembah Jehovah. Diatu, aram kitai meda baka ni kitai kemayaharitu ulih ngereja nya.

3. Nitihka 1 Timoti 4:12-16, rasul Paul meransang Timoti ngereja nama?

³ Timoti agi biak lebuh rasul Paul nulis surat ti keterubah  ngagai iya. Tang maya nya, Timoti udah lama nyadi tuai gempuru. Taja pia, Paul agi meransang iya terus ngaga pemansang ba pengarap. (Bacha 1 Timoti 4:12-16.) Ba surat nya, Paul ngasuh Timoti ngaga pemansang ba dua iti chara. Kesatu, ngemansangka sifat Kristian baka pengerindu, pengarap sereta pengidup ti tuchi. Kedua, ngemansangka pengelandik ke bukai baka macha Bup Kudus di mua orang mayuh, nusui Berita Manah sereta ngajar orang. Ari teladan Timoti, kitai deka meda chara netapka juluk ati ke ulih dijapai kitai ngambika ulih mansang ba pengarap. Kitai mega deka bejuraika chara kitai ulih ngereja pengawa nginjil enggau mayuh agi.

4. Nitihka Pilipi 2:19-22, nama utai ke ngasuh Timoti beguna ba Jehovah?

⁴ Nama utai ke ngasuh Timoti beguna ba Jehovah? Iya bisi sifat Kristian ti manah. (Bacha Pilipi 2:19-22.) Utai ke disebut Paul nunjukka, Timoti baruh ati, tetap ati, bagas sereta ulih dikearapka. Lalu iya bisi pengerindu sereta ibuhka bala menyadi Kristian. Ketegal nya, Paul amat rinduka Timoti lalu enda kakang ati meri pengawa ke tusah ngagai Timoti. (1 Kor. 4:17) Sama mega, enti kitai ngemansangka sifat Kristian, Jehovah deka rinduka kitai lalu kitai nyadi orang ti ulih dikearapka ba eklisia.—Mas. 25:9; 138:6.

5. (a) Baka ni nuan ulih milih ni bagi sifat Kristian ke deka dikemansangka nuan? (b) Baka ke dipandangka ba gambar, baka ni menyadi indu ke biak agi nya bebendar deka ibuhka orang bukai?

⁵ Pilih siti sifat ke deka dikemansangka nuan. Nuan patut besampi, berunding sereta milih ni bagi sifat ke deka dikemansangka nuan. Ambika chunto, ulih nuan ngayanka pengibuh enggau manah agi, tauka ngemansangka pengeran deka nyukung bala menyadi Kristian? Kati nuan deka manah agi enggau orang bukai sereta deka rindu agi ngampunka orang? Nuan ulih nanya pangan ke ulih dipechayaka nuan pasal ni bagi sifat ke ulih dikemansangka nuan.—J-lam. 27:6.

6. Baka ni nuan ulih ngemansangka agi sifat Kristian?

⁶ Kereja meh utai ke ulih nulung nuan nyapai juluk ati. Baka ni chara iya? Nuan ulih belajar pasal sifat ke deka dikemansangka nuan. Ambika chunto, nuan engka bebendar agi belajar deka ngampun orang bukai. Nuan ulih macha sereta berunding enggau dalam pasal chunto orang ba Bup Kudus ke deka ngampun enggau orang ke enggai ngampun. Peratika  teladan Jesus ke sanggup ngampun orang bukai. (Luk. 7:47, 48) Iya enda beratika penyalah orang tang meda utai ke ulih digaga sida. Tang, orang Parisi maya jeman Jesus “mechat orang bukai.” (Luk. 18:9) Pengudah berunding enggau dalam pasal tu, tanya meh diri empu: ‘Ni bagi ulah sereta sifat ke diperatika aku ba orang bukai?’ Enti nuan berasai tusah deka ngampunka seseiku orang, nuan ulih nulis semua pemanah ke bisi ba iya. Udah nya tanya meh diri empu: ‘Nama runding Jesus pasal iya? Kati Jesus deka ngampunka iya?’ Enggau ngereja tu, kitai ulih ngubah runding diri. Keterubah iya, kitai engka tusah deka ngampunka orang ti udah ngemediska ati kitai. Tang enti kitai terus ngemansangka sifat deka ngampun, nyau ke lama kitai senang agi deka ngampun.

7. Nitihka Jaku Dalam 22:29, baka ni Jehovah ngena orang ke landik gawa ba gerempung Iya?

⁷ Nuan ulih netapka juluk ati ke bukai, iya nya pengelandik ti beguna. Perundingka pemayuh pekereja ke deka diguna nirika bengunan Betel, Palan Gempuru Besai enggau Palan Gempuru. Mayuh pekereja tu ngemansangka pengelandik lebuh begulai gawa enggau bala menyadi Kristian ke bepeneleba. Baka ke ba gambar, semua menyadi enda ngira lelaki tauka indu, ulih sama belajar pasal pengelandik ke diguna kena nyaga Palan Gempuru enggau Palan Gempuru Besai. Enggau tu, Petara Jehovah, “Raja ke meruan belama iya,” sereta Jesus Kristus, “Raja . . . ke ari atas semua raja,” benung ngena pekereja ti landik kena nembuka pengawa ti besai. (1 Tim. 1:17; 6:15; bacha Jaku Dalam 22:29.) Kitai deka bebendar gawa lalu ngena pengelandik kitai meri mulia ngagai Jehovah, ukai ngagai diri empu.—Jhn. 8:54.

8. Baka ni nuan ulih milih pengelandik ke deka dipelajarka nuan?

⁸ Pilih pengelandik ke deka dipelajarka nuan. Nama pengelandik ke ulih dipelajarka nuan? Tanya meh runding tuai gempuru tauka engka tuai ti ngabas pasal pengelandik ke ulih dikemansangka nuan. Ambika chunto, sida engka meransang nuan ngemansangka pengelandik bejaku sereta ngajar. Nuan ulih ngasuh sida beterus terang madah ni bagi kualiti kena ngajar ke patut dikemansangka nuan. Udah nya, bebendar meh ngemansangka diri ba begian nya. Baka ni nuan ulih ngereja nya?

9. Nama ulih digaga nuan kena nyapai juluk ati belajarka pengelandik ti baru?

⁹ Kereja meh utai ke ulih nulung nuan nyapai juluk ati. Ambika chunto, nuan deka nyadi pengajar ti landik agi. Nuan ulih belajar chara nya ngena brosur Ngemanahka Agi Chara Macha enggau Ngajar. Lebuh nuan nerima tugas ba gempuru tengan minggu, nuan ulih minta seiku menyadi lelaki ke layak ningaka begian ke deka dikenataika nuan sebedau gempuru. Lalu udah nya minta iya meri penemu pasal chara nuan ulih ngemansangka chara ngajar. Nuan patut tumu nyediaka pengawa ke diberi ngambika orang ulih meda pemagas nuan sereta nemu nuan ulih dikearapka.—J-lam. 21:5; 2 Kor. 8:22.

10. Padahka siti chunto baka ni kitai ulih ngemansangka pengelandik.

¹⁰ Nama ulih digaga enti nuan deka nyadi landik ngereja sesiti utai ti tusah dikereja nuan? Enti pia, anang putus asa! Seiku menyadi ke benama Garry enda entu nemu macha. Iya agi ingat, iya berasai amat malu lebuh iya macha ba gempuru. Tang iya enggau bendar ngemansangka pengelandik macha. Taja pia iya madah, latih ke diterima ari bala menyadi lelaki ke layak sereta litaricha Kristian udah mayuh nulung. Diatu iya ulih meri cheramah  ba Palan Gempuru, Gempuru Besai sereta Konvensyen!

11. Baka Timoti, nama ulih nulung kitai gawa mayuh agi ke Jehovah?

¹¹ Kati Timoti ngemansangka pengelandik bejaku ba mua orang mayuh, tauka nyadi pengajar ti landik agi? Bup Kudus nadai madah. Tang Timoti tentu bisi ngaga pemansang laban iya nitihka jaku lalau Paul. (2 Tim. 3:10) Sama mega, enti kitai ngemansangka pengelandik kitai, kitai tentu deka disikap kena ngereja mayuh agi ke Jehovah.

12. Nama penguntung ke diulih nuan ari tulung orang bukai?

¹² Semua kitai tentu bulih penguntung ari tulung orang bukai. Lebuh kitai ba sepital, kitai beterima kasih lebuh bala tuai gempuru ari Komiti Besilih Penemu Sepital tauka Raban Ngabas Orang Sakit ngabas kitai. Lebuh kitai napi penanggul ba pengidup, kitai beterima kasih ngagai bala tuai gempuru ti ibuhka kitai. Sida ngena awak mendingka kitai sereta ngelantangka ati kitai. Pia mega, lebuh kitai begunaka bantu ba pengawa belajarka Bup Kudus, kitai engka minta tulung ari pengerintis ti bepeneleba. Lalu kitai beterima kasih enti sida meri penemu pasal chara kitai ulih ngemansangka pengelandik ngajar. Semua menyadi Kristian tentu gaga ati deka nulung kitai. Kitai ulih sama gaga ati enti kitai seruran deka nulung bala menyadi Kristian. Ku Jesus, “Beberekat agi orang ke meri, ari orang ke nerima.” (SKR. 20:35) Enti nuan deka ngereja mayuh agi ke Jehovah nengah chara tu tauka chara ke bukai, nama ulih nulung nuan nyapai juluk ati nuan?

13. Lebuh netapka juluk ati, nama patut dikingatka kitai?

¹³ Lebuh nuan netapka juluk ati, bejimat meh ngambika enda netapka juluk ati pia-pia aja. Ambika chunto, nuan engka berunding, ‘Aku deka ngereja mayuh agi ba eklisia.’ Enti nuan bisi juluk ati ke baka tu, nuan engka enda nemu chara deka nyapai nya. Lalu nuan mega engka enda nemu sekalika juluk ati nya udah dijapai tauka enda. Nya alai, nuan patut nemu utai ke deka digaga lalu nentuka juluk ati enggau silik. Nuan ulih nuliska juluk ati nya sereta ngaga pelan kena nyapai iya.

14. Nama kebuah kitai patut sedia ngaga ubah lebuh netapka juluk ati?

¹⁴ Kitai mega patut sedia ngaga ubah lebuh netapka juluk ati. Nama kebuah? Laban kitai  enda ulih ngawal utai ke deka nyadi ila. Perundingka tu: Rasul Paul udah nulung numbuhka eklisia ti baru ba Tesalonika. Lalu iya engka bisi juluk ati deka terus diau dia. Iya mega deka nulung sida ke baru nyadi orang Kristian. Tang orang ba dia balat nyakal Paul, lalu iya patut ningalka Tesalonika. (SKR. 17:1-5, 10) Enti Paul mengkang diau dia, iya tentu deka ngenataika penusah ngagai bala menyadi Kristian di Tesalonika. Taja pia, Paul enda ngetu nulung sida. Tang, iya ngaga ubah nitihka situasi nya. Udah nya, iya nganjung Timoti ngagai Tesalonika ngambika ulih nulung sida ke baru nyadi orang Kristian bisi pengarap ti tegap. (1 Tes. 3:1-3) Naka meh pengaga ati bala menyadi ba Tesalonika laban Timoti sanggup nulung sida ba dia!

15. Baka ni juluk ati kitai engka ulih berubah lebuh situasi kitai berubah? Padahka siti chunto.

¹⁵ Nama ulih dipelajarka kitai ari peneleba Paul ba Tesalonika? Kitai engka udah netapka siti juluk ati. Tang situasi kitai engka berubah lalu tu nagang kitai ari nyapai juluk ati nya. (P-jar. 9:11) Enti tu nyadi ba nuan, ulih nuan netapka juluk ati ke bukai ti ulih dijapai nuan? Tu meh utai ke digaga laki bini ke benama Ted enggau Hiedi. Ketegal enda bepengerai, seduai iya patut ninggalka Betel. Tang pengerindu seduai ke Jehovah meransang seduai iya ngiga chara bukai ngereja mayuh agi ba pengawa nginjil. Keterubah, seduai iya nyadi pengerintis biasa. Enda lama udah nya, seduai iya dipilih nyadi pengerintis spesial. Lalu Ted dilatih nyadi pengari tuai ti ngabas. Ketegal bisi ubah ba tatak umur tuai ti ngabas, nya alai Ted enggau Hiedi enda ulih enggau ba pengawa tu. Taja pan asa ati, seduai iya nemu, agi bisi chara bukai ulih gawa ke Jehovah. Ted madah, “Kami belajar kami ulih gawa ke Jehovah enggau mayuh macham chara.”

16. Nama ulih dipelajarka kitai ari Galatia 6:4?

¹⁶ Kitai enda ulih ngawal semua utai ke nyadi ba pengidup kitai. Nya alai, kitai enda patut berunding kitai semina berega ba Jehovah ketegal pengawa kitai aja. Lalu kitai enda patut mandingka pengawa kitai enggau pengawa orang bukai. Hiedi nerangka, “Nuan enda ulih gaga ati enti nuan mandingka pengidup nuan enggau pengidup orang bukai.” (Bacha Galatia 6:4.) c Nya meh kebuah kitai patut terus ngiga chara nulung orang bukai sereta gawa ke Jehovah. d

17. Nama ulih digaga nuan ngambika ulih layak nerima pengawa ti spesial?

¹⁷ Nuan deka senang agi gawa ke Jehovah  enti nuan idup enggau pengumbas iya sereta nyeliahka ari berutang. Netapka juluk ati ti mit ke ulih nulung nuan nyapai juluk ati ti besai. Ambika chunto, enti nuan deka nyadi pengerintis biasa, kati nuan diatu ulih nyadi pengerintis sukung ninting bulan? Enti juluk ati nuan nya nyadi penulung gempuru, kati nuan ulih ngena mayuh agi awak ba pengawa nginjil sereta ngabas bala menyadi ke sakit sereta tuai ba eklisia nuan? Peneleba ke diulih nuan diatu engka ulih nulung nuan gawa mayuh agi ke Jehovah ba chara ti spesial jemah ila. Nya alai, bebendar meh gawa ba sebarang pengawa ke diberi ngagai nuan.—Rom. 12:11.

18. Nama ulih dipelajarka nuan ari teladan menyadi Beverley? (Peda mega gambar.)

¹⁸ Netapka sereta nyapai juluk ati nya enda bepanggai ba umur kitai. Peratika teladan Beverley ke beumur 75 taun. Iya balat sakit lalu tu ngasuh iya tusah deka bejalai. Tang iya keran deka ngereja mayuh agi maya kimpin Ngingatka Pemati Jesus. Nya alai kena ngereja nya, iya netapka juluk ati. Lebuh iya nyapai juluk ati ba kimpin nya, iya amat gaga ati. Pengawa iya meransang menyadi bukai ngereja mayuh agi ba pengawa nginjil. Jehovah beterima kasihka pengawa bala menyadi Kristian ke udah tuai, taja pan sida enda ulih ngereja mayuh.—Mas. 71:17, 18.

19. Nama sekeda juluk ati ke ulih ditetapka kitai?

¹⁹ Nuan ulih netapka juluk ati ke ulih dijapai. Nuan mega ulih ngemansangka sifat ke ulih ngelantangka ati Jehovah. Belajar meh pengelandik ke ulih ngasuh nuan beguna agi ngagai Jehovah sereta gerempung Iya. Lalu ngiga chara kena nulung mayuh agi bala menyadi Kristian. e Baka Jehovah ke merekatka Timoti, Iya mega deka merekatka nuan “ngambika semua orang ulih meda pemansang nuan.”—1 Tim. 4:15.