1. Ōmiya nyá nɛ alɔ lɔfu ya ipu ɛ̄gbā ō gba ku Ujehofa a?

 ABƆ alɔ wɛ Ācɛ O Yɛce Ukraist a, alɔ yihɔtu ku Ujehofa nɛɛnɛhi. Alɔ kē tine ō je ofiyɛ duu ku alɔ lɛ ɔ. Amáŋ, o ya ɛɛ ku alɔ ya ɛjɛɛji ɔdā nɛ alɔ tine ō ya lɛ Ujehofa a, alɔ cɛgbá ō miya ɔdā nɛ alɔ géē ya ipu ɛ̄gbā ō gba ku Ujehofa bɛɛka ō lɛ uce ō ya nɛ Ācɛ O Yɛce Ukraist cika ō lɛ, ō nwu uklɔ ɛyɛɛyɛyi nōo cɛgbá, mla ō dɔka ɔwɛ nɛ alɔ géē ta ācɛ ɔhá abɔ.

2. Ɔdiya nɛ alɔ cika ō ya ōmiya ipu ɛ̄gbā ō gba ku alɔ klla yuklɔ lɔfu lɔfu ō ya uwa jila a?

² Ɔdiya nɛ alɔ cika ō yɔ i jɛ gɔbu ipu ɛ̄gbā ō gba ku alɔ a? Ɔdā okpɔcii a wɛ o ya ɛɛ ku Ujehofa Adā alɔ kóō gweeye. Ujehofa gē gweeye nɛhi eko duuma nɛ ó má alɔ yɔ i bi aɔdā nɛ alɔ jé ō ya a le yuklɔ lɔfu lɔfu ipu ɛ̄gbā ō gba ku nu. Alɔ klla gē dɔka ō jɛ gɔbu ohigbu ku alɔ dɔka ō je otabɔ lɛ ayinɛ alɔ. (1 Utes. 4:9, 10) Ɛgɛ duuma nɛ alɔ gboji lɛ ipu ɔkwɛyi a ɛ ma, ɛjɛɛji alɔ lɔfu yɔ i jɛ gɔbu ipu ɛ̄gbā ō gba ku alɔ kpɔ. Alɔ leyi má ɛgɛ nɛ alɔ lɔfu ya ɔɔma a.

3. Ɛgɛ néē ta ɔ ipu ɔkpá ku 1 Utímōti 4:12-16 a, ɔdi nɛ ɔyikpo Upɔlu ta Utimoti ɔtu kwu ɔtu kóō ya a?

³ Naana nɛ Utimoti wɛ ɔyipɛ oklobiya eko nɛ ɔyikpo Upɔlu ta ɔkpá aflɛyi ku nu fu ɔ a, Utimoti wɛ ɔnyakwɔcɛ ku ujɔ nōo le jikoko eko ɔɔma ɛ. Amáŋ, Upɔlu ta ɔ ɔtu kwu kóō yɔ i jɛ gɔbu ipu  ɛ̄gbā ō gba ku nu kpɔ. (Jé 1 Utímōti 4:12-16.) Ɔdaŋ ku a gbɛla tu ɛlā nɛ Upɔlu ka a, a géē má ka ó dɔka ku Utimoti kóō jɛ gɔbu ɔwɛ ɛpa: Ó dɔka kóō lɛ uce ō ya olɔhi ku Ācɛ O Yɛce Ukraist bɛɛka ihɔtu, ɔtu okpoce mla ō lā oyeeyi olɔhi. Ó klla dɔka kóō ya lɔhi fiyɛ ipu ɔkpá ō jé tɛɛcɛ, ō nwu ācɛ ɛlā mla ɛgɛ nɛ ó gē tɔɔna a. Alɔ géē kɛla lɛyikwu ocabɔ mafu ku Utimoti, ku alɔ má ɛgɛ nɛ ō ya ōmiya ipu ɛ̄gbā ō gba ku Ujehofa géē ta alɔ abɔ ō ya lɔhi fiyɛ a. Alɔ klla géē kɛla lɛyikwu ɔwɛ ōhī nɛ alɔ géē ya lɔhi fiyɛ ipu uklɔ ku ɔna ō ta.

4. Oŋma ɛlā nōo yɔ ipu ɔkpá ku Ācɛ Ufílipāyi 2:19-22 a, ɔdi cɛ lɛ Utimoti tiile lɛ Ujehofa a?

⁴ Ɔdi cɛ lɛ Utimoti tiile lɛ Ujehofa a? Ohigbu ka ó lɛ uce ō ya olɔhi ku Ācɛ O Yɛce Ukraist nɛ. (Jé Ācɛ Ufílipāyi 2:19-22.) Ŋma ɔdā nɛ Upɔlu ka lɛyikwu Utimoti a, alɔ má ka Utimoti wɛ ɔcɛ nōo gē ta iyi nu waajɛ, ɔcɛ nōo gē yɔ kwu ɔcɛ gā ajaajɛ, ɔcɛ ō yuklɔ lɔfu lɔfu, mla ɔcɛ néē lɛ ɔtu ce ɔ gla. Ó yihɔtu klla gē leyi kwu ayinɛ nu nɛɛnɛhi. Ohigbu ɛnyā, Upɔlu yihɔtu ku Utimoti nɛɛnɛhi, ó klla gē kpo eko bonu ō je uklɔ olɔnɔ lɛ ɔ ŋ. (1 Ukɔ́r. 4:17) Ɔwɛ ekponu ɔɔma, Ujehofa géē yihɔtu alɔ nɛɛnɛhi, alɔ klla géē tiile lɛ ayinɛ alɔ ipu ujɔ ɔdaŋ ku alɔ lɛ uce ō ya olɔhi ku Ācɛ O Yɛce Ukraist.—Aíjē 25:9; 138:6.

5. (a) Ɛgɛnyá nɛ a lɔfu ya ōmiya lɛyikwu uce ō ya ku Ācɛ O Yɛce Ukraist nɛ a géē dɔka ō ya lɔhi fiyɛ ipu nu a? (b) Ɛgɛ néē ma ɔ fu ipu ifoto a, ɛgɛnyá nɛ ɔyinɛ alɔ nɔnya a yɔ i yuklɔ lɛyikwu ōmiya ku nu ō mafu eyinyinyi lɛ ācɛ ɔhá a?

⁵ Lɛ uce ō ya nɛ a géē dɔka ō ya lɔhi fiyɛ ipu nu piii a miya. Gbɔɔkɔ klla gbɛla lɛyikwu aya ku oyeeyi ku uwɔ nɛ a cɛgbá ō ya lɔhi fiyɛ anu a. Lɛ uce ō ya kpɔcii éyi nɛ a géē dɔka ō ya lɔhi fiyɛ ipu nu a miya. Ocabɔ mafu, a lɔfu ya ōmiya ku a géē cɛgbá ō nwu ɛgɛ nɛ a géē jé ō mafu eyinyinyi, amāŋ ɛgɛ nɛ a géē lɛ ɔtu caca ō je otabɔ lɛ ayinɛ ipu ujɔ fiyɛ. Amāŋ a lɔfu nwu ɛgɛ nɛ a géē jé ō ya ɛbɔ mla ācɛ ɔhá mla ō je ɛlā yɛhi fiya tōōtɔ̄ɔ̄. Ó klla lɔfu ta uwɔ abɔ ɔdaŋ ku a da oklobiya amāŋ ɔncɛnya ku uwɔ nōo kwu uwɔ ajaajɛ, kóō da uwɔ ɛga nɛ a cɛgbá ō ya lɔhi fiyɛ ipu oyeeyi ku uwɔ a.—Aíit. 27:6.

6. Ɛgɛnyá nɛ a géē ya ɔdā nɛ miya lɛyikwu ō lɛ uce ō ya olɔhi éyi a?

⁶ Ceyitikwu ku a lɛ ɔdā nɛ a miya a ya jila. Ɛgɛnyá nɛ a gáā ya ɔɔma a? Ɔwɛ éyi wɛ ō leyi taajɛ lɔɔlɔhi cɛɛ ku a má uce ō ya nɛ a géē cɛgbá ō ya lɔhi fiyɛ anu a. Alɔ je ɔ ku a le miya ō yuklɔ lɛyikwu ɛgɛ nɛ a géē bēē je ya ācɛ ɔhá ɛhi fiya. A lɔfu gbɔɔ mla ō klɔcɛ lɛyikwu ocabɔ  ku ācɛ ipu Ubáyíbu nōo je ɛlā yɛhi ŋma ɔtu mla ācɛ nōo ta ō ya lɛ a, cɛɛ ku a gbɛla tu ɔ lipu lipu. Leyi má ocabɔ ku Ujisɔsi ɛ. Ó je ɛlā ya ācɛ ɛhi ŋma ɔtu mɛɛlɛ. (Ulúk. 7:47, 48) Ó gē leyi ku nu kwu ɛga nɛ ācɛ gē nyileyi a ŋ, ikɔkɔ ɔɔma, ó gē leyi ku nu kwu ɔdā olɔhi néē ya gla a. Amáŋ, ācɛ Ufarisii ku eko ku Ujisɔsi a i gē “je ācɛ ɔhá [kē wɛ] odée ŋ.” (Ulúk. 18:9) Igbihi nɛ a lɛ ɛlá gbo tu ocabɔ nyā, da iyi uwɔ ɔka kahinii: ‘Ɔdi nɛ um gē má ɛgiyi ācɛ ɔhá a? Uce ō ya ku uwa nyá nɛ um gē leyi ku um kwu ɔ a?’ Ɔdaŋ ka ó tɔɔtɛ gā uwɔ ō je ya ɔcɛ éyi ɛhi ŋ, ceyitikwu ku a lɛ uce ō ya olɔhi ku ɔcɛ ɔɔma nɛ a jé a ta taajɛ. Oŋma ɔɔma, da iyi uwɔ ɔka kahinii: ‘Ɛgɛnyá nɛ Ujisɔsi gē leyi má ɔcɛ ɔɔma a? Ó géē je ya ɔ ɛhi?’ Ɔdaŋ ku alɔ lɛ ɛnyā ya, ɛlá ō gbo ku alɔ lɔfu piyabɔ. Eko aflɛyi, alɔ lɔfu yuklɔ nɛhi gbɔbu ɛɛ ku alɔ je ya ɔcɛ ɛhi. Amáŋ ɔdaŋ ku alɔ ceyitikwu cɛɛ ku alɔ ya lɔhi fiyɛ, abɔ eko yɔ i nyɔ a, ō je yɛhi géē tɔɔtɛ lɛ alɔ fiyɛ.

7. Ɛgɛ nɛ ɔkpá ku Aíita 22:29 mafu lɛ a, ɛgɛnyá nɛ Ujehofa gē yuklɔ mla ācɛ nōo jé ō yuklɔ lɔɔlɔhi icɛ a?

⁷ Ɔda ɔhá nɛ a lɔfu miya a o ya a wɛ ō nwu uklɔ nōo cɛgbá. Gbɛla lɛyikwu aluka ku ācɛ ō yuklɔ néē cɛgba ō gwo aɔlɛ ku Ubɛtɛlu, Aagbla ku Ajɔɔcɛ, mla Aagbla ku Ōjila a. Alɛwa ku ācɛ nōo ba nyā nwu ɔdā néē jé a ŋma lɛ ō yuklɔ mla ayinɛ alɔ nōo jé uklɔ a lɔɔlɔhi a. Ɛgɛ néē ma ɔ fu ipu ifoto a, ayinɛ alɔ nɔnyilɔ mla ayinɛ alɔ nɔnya yɔ i nwu uklɔ nōo cɛgbá ō ta Aagbla ku Ojileyi mla Aagbla ku Ōjila bi. Ipu ɔwɛ nyā mla ɔwɛ ɛyɛɛyɛyi ɔhá, Ujehofa Ɔwɔico nōo wɛ “ɔcɛ́ oyēeyī piyóó,” mla Ujisɔsi Ukraist nōo wɛ “ɔcɛ́ kú aɔ́cɛ́” a, yɔ i bi ācɛ nōo jé ō yuklɔ lɔɔlɔhi nyā le ya aɔdā alɛwa. (1 Utím. 1:17; 6:15; jé Aíita 22:29.) Alɔ dɔka ō yuklɔ lɔfu lɔfu mla ō bi aɔdā nɛ alɔ jé a le je owoofu lɛ Ujehofa, ó wɛ iyi alɔ ŋ.—Ujɔ́n. 8:54.

8. Ɛgɛnyá nɛ a lɔfu ya ōmiya ku ɔdā nɛ a géē nwu gla a?

⁸ Lɛ ɔdā okpɔcii nɛ a géē dɔka ō nwu a miya. Ɔdi nɛ a géē lɔfu nwu gla a? Da anyakwɔcɛ ku ujɔ amāŋ ɔcɛ ō leyi kwu usɛkut ku uwɔ ɔka lɛyikwu ɔdā néē gbɛla ku a lɔfu nwu gla a. Ocabɔ mafu, ɔdaŋ kē da uwɔ ku a ya lɔhi fiyɛ ɔwɛ nɛ a gē kɛla klla gē nwu ɛlā a, da uwa kéē ta uwɔ abɔ ku a lɛ abɔ kwu aya ku ɛlā ō ka nɛ a géē dɔka ō ya lɔhi fiyɛ a bɛɛcɛ. Oŋma ɔɔma, ceyitikwu ku a ya lɔhi fiyɛ. Ɛgɛnyá nɛ a lɔfu ya ɛnyā?

9. Ɛgɛnyá nɛ a géē ceyitikwu cɛɛ ku a lɛ ōmiya ku uwɔ ō nwu ɔdā ō cɛgbá a ya jila a?

⁹ Ceyitikwu ku a lɛ ɔdā nɛ a miya a ya jila. Alɔ je ɔ ku a dɔka ō wɛ ɛnɛɛnɛ itica. A lɔfu jé ubrociɔ nōo kahinii: Ō Ya Lɔhi Fiyɛ Ipu Ɔkpá Ō Jé Mla Ō Nwu Ācɛ Ɛlā a lɔɔlɔhi. Ɔdaŋ kē lɛ aya duuma je gā uwɔ ō ya ipu ōjila ku ɔtahɛ, a lɔfu da ɔyinɛ nōo cika jɛ kóō jahɔ tu ɛlā ō ka tɛɛcɛ ku uwɔ ɔɔma gbɔbu ɛɛ ku a ya ɔ ipu ōjila, ka ó klla da uwɔ ɛga nɛ a géē ya lɔhi fiyɛ a. Ya otutu ku aya néē je gā uwɔ a lɔɔlɔhi gbɔbu le eko ɔɔma, o ya ɛɛ ku ācɛ kéē má ku a yuklɔ lɔfu lɔfu klla wɛ ɔcɛ néē lɔtuce gla.—Aíit. 21:5; 2 Ukɔ́r. 8:22.

10. Je ocabɔ ku ɛgɛ nɛ alɔ géē ya lɔhi fiyɛ ō nwu ɔdā éyi nōo cɛgbá a.

¹⁰ Ɔdaŋ ku ɔdā nɛ a miya ō jé ō ya lɔɔlɔhi a wɛ ɔdā nōo géē lɔnɔ tu uwɔ ō ya, ɔdi nɛ a lɔfu ya a? Ɛ̄jɛ̄ ka ó hii jɛ uwɔ ŋ! Ó tɔɔtɛ lɛ ɔyinɛ alɔ nɔnyilɔ éyi nōo lé ka u Garry a kóō jé ɔkpá lɔɔlɔhi ŋ. Ó bla ku uweyi kwu ɔ nɛɛnɛhi eko nɛ ó ceyitikwu kóō jé ɔkpá tɛɛcɛ ipu ōjila ku ujɔ a. Amáŋ ó ceyitikwu kóō ya lɔhi fiyɛ. Ó ku ɛlā ō nwu nɛ ó miyɛ ŋma ɛgiyi ayinɛ alɔ nōo cika jɛ mla aɔkpá ku alɔ a, ta ɔ abɔ nɛɛnɛhi kóō ya ɛlā ō ka tɛɛcɛ ipu Agbla ku Ajɔɔcɛ, ojileyi ku usɛkut, mla ojileyi nɛhi ku alɔ!

11. Bɛɛka Utimoti a, ɔdi gáā ta alɔ abɔ ku alɔ ya lɔhi fiyɛ ipu ɛ̄gbā ō gba ku alɔ lɛ Ujehofa a?

¹¹ Utimoti kwu piya ɔcɛ nōo jé ō ya ɛlā ō ka tɛɛcɛ, amāŋ ɔcɛ nōo jé ō nwu ɛlā lɔɔlɔhi nɛɛ?  Ubáyíbu i da alɔ ŋ. Amáŋ alɔ jé kpɔcii ka Utimoti ya lɔɔlɔhi ipu uklɔ nɛ ó lɛ ipu ɛ̄gbā ō gba ku Ujehofa a, ohigbu ka ó yɛce ocabɔ ku Upɔlu. (2 Utím. 3:10) Ɔwɛ ekponu ɔɔma, ɔdaŋ ku alɔ ceyitikwu ya lɔhi fiyɛ ipu ɔdā duuma nɛ alɔ jé ō ya a, ó géē tɔɔtɛ lɛ alɔ ō ya fiyɛ ipu ɛ̄gbā ō gba ku alɔ lɛ Ujehofa.

12. Ɛgɛnyá nɛ ācɛ ɔhá ta uwɔ abɔ ɛ ma?

¹² Ɛjɛɛji alɔ gē lɛ itene ŋma otabɔ nɛ ācɛ ɔhá gē je lɛ alɔ a. Ocabɔ mafu, ɔdaŋ ku alɔ yɔ inɛci, ó gē jɛ alɔ eyī nɛhi ɔdaŋ ku anyakwɔcɛ ku ujɔ nōo gē yuklɔ mla u Hospital Liaison Committees, amāŋ mla Ígwu Nōo Gē Jila Ayinɛ Alɔ Nōo Gē Doōcē Má a gáā lɛ alɔ jila má ipu inɛci a. Ɔdaŋ ku alɔ lɛ unwalu ipu oyeeyi ku alɔ, ó gē jɛ alɔ eyī nɛhi ɔdaŋ ku ɔnyakwɔcɛ ku ujɔ nōo lɛ ɛlá wu alɔ lɛ eko ku nu taajɛ ō jahɔ tu alɔ, mla ō je ɔtu ō ta kwu ɔtu lɛ alɔ. Ɔdaŋ ku alɔ cɛgbá otabɔ ɛgɛ nɛ alɔ géē jé ō ya oklɔcɛ ku Ubáyíbu mla ɔcɛ, ó gē he alɔ ɔtu nɛhi eko duuma nɛ ɔcɛ ō gbɔbu ɔna ō ta nōo jé ō tɔɔna lɔɔlɔhi cɛ ō ba alɔ iyē ō gáā ya oklɔcɛ a, mla ō da alɔ aɔdā ōhī nɛ alɔ lɔfu ya a. Ɛjɛɛji ayinɛ alɔ nyā gē gweeye ō ta alɔ abɔ. Alɔ lɔfu lɛ ɛdɔ eeye nyā ɔdaŋ ku alɔ je iyi alɔ tɛɛcɛ ō ta ayinɛ alɔ abɔ. Ujisɔsi kahinii: “Aɔ́dā olɔhi [amāŋ eeye] kóō yɔ̄ lɛ ɔ̄cɛ nōo gē je ā fíyɛ́ ɔ̄cɛ nōo gē mīyɛ ā.” (Ācot. 20:35) Ɔdaŋ ku a géē dɔka ō ya lɛ Ujehofa fiyɛ ɔwɛ nyā amāŋ ɔwɛ ɛyɛɛyɛyi ɔhá, ɔdi gáā lɔfu ta uwɔ abɔ ō ya lɛ a?

13. Ɔdaŋ ku alɔ gē miya ɔdā nɛ alɔ dɔka ō ya a, ɔdi nɛ alɔ cika ō bi ipu ɔtu a?

¹³ Bi ɔtu ō ya ōmiya nōo le kpɔcii. Ocabɔ mafu, a lɔfu gbɛla kahinii: ‘N géē dɔka ō ya fiyɛ ipu ujɔ.’ Amáŋ ó lɔfu lɔnɔ ta uwɔ ō jé ɛgɛ nɛ a géē ya ɛdɔ ōmiya ɔɔma jila, a klla géē má ka ó tɔɔtɛ gā uwɔ ō jé ɔdaŋ ku alɔ lɛ ōmiya ɔɔma ya jila ɛ ŋ. Ohigbu ɛnyā, ya ōmiya nōo teyi peee, nɛ a klla lɔfu lɛ abɔ bi ɔ kpɔcii. A kóō lɔfu ta ōmiya a taajɛ, mla ɛgɛ nɛ a géē dɔka ō ya ɔ jila a.

14. Ɔdiya nōó cɛgbá ku alɔ ya ōmiya nōo géē tɔɔtɛ lɛ alɔ ō ya opiyabɔ a?

¹⁴ Alɔ klla cika ō ya ōmiya nōo géē tɔɔtɛ lɛ alɔ ō ya opiyabɔ. Ɔdiya a? Ohigbu ku alɔ i jé ɛgɛ nɛ āhɔ̄ ku alɔ gáā lɛ igbihaajɛ a ŋ. Leyi má ocabɔ mafu nyā ɛ: Ɔyikpo  Upɔlu tabɔ ō lɛ ujɔ ɛpɛpɛ kwaajɛ ipu igeli ku Utesalonika. Ó lɛ aafu ŋ, ó gē lɔfu le miya ō kla abɔ cɛɛ kóō yɔ i ta Ācɛ O Yɛce Ukraist ɛpɛpɛ a abɔ. Amáŋ ācɛ nōo yɔ i ya ɔ ŋmo a kwu ɔ abɔfu kóō ŋma igeli ɔɔma. (Ācot. 17:1-5, 10) Ɔdaŋ ka Upɔlu gē yɛ i kla abɔ nɛɛ, ó gē yɛ i lɛ oyeeyi ku ayinɛ nu kwu ikwū ajaajɛ. Amáŋ Upɔlu i lɛ abɔ ci ō yɔ i ceyitikwu kóō ta uwa abɔ ŋ. Ikɔkɔ ɔɔma, āhɔ̄ ɛpɛpɛ nɛ ó yɔ anu gáā le je ɔ iyē. Igbihaajɛ, ó gáā lɛ Utimoti tɛhɔ gā Utesalonika o ya ɛɛ kóō je otabɔ lɛ Ācɛ O Yɛce Ukraist ɛpɛpɛ nōo yɔ abɔ. (1 Utes. 3:1-3) Ku ɛlā ɔkwɛyi a ba, Ācɛ Utesalonika a gweeye nɛɛnɛhi ka Utimoti le tutu ō gā ɛga duuma néē cɛgbá otabɔ ku nu a!

15. Ɛgɛnyá nɛ aōmiya ku alɔ lɔfu piyabɔ ɔdaŋ ku āhɔ̄ ku alɔ kwu piyabɔ a? Je ocabɔ mafu.

¹⁵ Alɔ lɔfu nwu ɛlā ŋma ɔdā nɛ Upɔlu má ipu Utesalonika a. Alɔ lɔfu lɛ ōmiya ya, amáŋ āhɔ̄ ku alɔ lɔfu piyabɔ, ɛnyā kē lɔfu ci alɔ ŋma ō ya ɔdā nɛ alɔ miya ō ya a. (Ɔ̄cok. 9:11) Ɔdaŋ ku ɛnyā wɛ ɔkwɛyi ipu āhɔ̄ ku uwɔ, le tutu ō je ōmiya ɛyɛɛyɛyi ɔhá nɛ a géē lɔfu ya jila gla. Ɛnyā wɛ ɔdā nɛ ɔba mla ɔnyā éyi nōo lé ka u Ted mla u Hiedi ya a. Ohigbu unwalu ku ōcē, é cɛgbá ō lɛ abɔ ci uklɔ ō ya ipu Ubɛtɛlu. Amáŋ ihɔtu néē lɛ lɛ Ujehofa a lɛ abɔ kwu uwa ɔtu kéē dɔka ɔwɛ ɛyɛɛyɛyi ɔhá néē géē lɔfu ya fiyɛ ipu uklɔ ku ɔna ō ta ku uwa. Aflɛyi, é gbɔɔ ō gbɔbu uklɔ ku ɔna ō ta eko doodu. Igbihaajɛ, é kwu piya ācɛ ō gbɔbu ɔna ō ta ɛdɔ ɛyɛɛyi, Ted klla miya ɛlā ō nwu ō je piya ɔcɛ ō ta ɔcɛ ō leyi kwu usɛkut abɔ. Ihayi nɛ ācɛ ō leyi kwu usɛkut géē wɛ a klla gáā kwu piyabɔ. Ted mla u Hiedi gáā le má kē le hilokplicii nɛɛnɛhi ō gba Ujehofa ɛ̄gbā ipu uklɔ ō ya nyā ɛ. Naana nɛ ɔtu le biya lɛ uwa a, é jé ku aa lɔfu gba Ujehofa ɛ̄gbā ɔwɛ ɛyɛɛyɛyi ɔhá. Ted Kahinii: “Alɔ gáā le nwu ka ó lɛ ɔwɛ alɛwa nɛ alɔ lɔfu gba Ujehofa ɛ̄gbā.”

16. Ɔdi wɛ ɛlā nɛ alɔ lɔfu nwu ŋma ɔkpá ku Ācɛ Ugalésīya 6:4 a?

¹⁶ Alɔ i lɛ íkwu ikpɛyi ku ɛjɛɛji ɔdā nōo gē ya ipu oyeeyi ku alɔ a ŋ. Ohigbu ɛnyā, ó cɛgbá ku alɔ hii gbɛla ku ɔdā nōo ya ɛɛ nɛ alɔ tiile lɛ Ujehofa foofunu a wɛ ohigbu ku alɔ lɛ ɛga ku ɛnɛɛnɛ uklɔ éyi ō ya, amāŋ gbɔɔ ō miya iyi alɔ mla ācɛ ɔhá nōo lɛ ɛga ku uklɔ nɛ alɔ i lɛ ŋ ma ŋ. Hiedi kahinii: “A gáā lɛ eeye ŋ ɔdaŋ ku a gbɔɔ ō miya oyeeyi ku uwɔ mla oyeeyi ku ācɛ ɔhá.” (Jé Ācɛ Ugalésīya 6:4.) Ó cɛgbá ku alɔ dɔka ɔwɛ ɛyɛɛyɛyi nɛ alɔ géē ta ācɛ ɔhá abɔ mla ō gba Ujehofa ɛ̄gbā. *

17. Ɔdi nɛ a lɔfu ya ō cika jɛ ku ɛnɛɛnɛ ɛga ipu ɛ̄gbā ō gba ku Ujehofa a?

¹⁷ Ó géē tɔɔtɛ gā uwɔ ō ya fiyɛ ipu ɛ̄gbā ō gba ku Ujehofa ɔdaŋ ku a lɛ oyeeyi ku uwɔ ya tɔɔtɛ, klla lɛ abɔ ci ɔdā duuma nōó cɛgbá ŋ nōo géē  cɛ gā uwɔ bi ule. Ya ōmiya ligii ligii nōo géē ta uwɔ abɔ ō ya ōmiya nɛhi nōo géē je uwɔ eko a. Ocabɔ mafu, ɔdaŋ ka ōmiya nōo géē je uwɔ eko nɛhi a wɛ ō gbɔnu ɔna ō ta eko doodu, ó tɔɔtɛ nɛ a géē gbɔɔ ō gbɔbu ɔna ō ta ŋma eko teeko babanya gla? Ɔdaŋ ka ōmiya ku uwɔ wɛ ō wɛ ɔcɛ ō ta anyakwɔcɛ ku ujɔ abɔ, ó géē tɔɔtɛ gā uwɔ ō bi eko alɛwa yuklɔ ku ɔna ō ta, mla ō gáā má ācɛ nōo gē doōcē nōo yɔ ipu ujɔ ku uwɔ a? Ɔdā nɛ a yɔ i nwu babanya a géē jɛga gā uwɔ ō lɛ ɛnɛɛnɛ ɛga ipu ɛ̄gbā ō gba ku Ujehofa ɛcɔbu. Lɛ ɔtu ku uwɔ ya ekponu ō je ofiyɛ duu ku uwɔ ipu uklɔ duuma néē je gā uwɔ a.—Uróm 12:11.

18. Ɛgɛ néē ma ɔ fu ipu ifoto a, ɔdi nɛ a nwu ŋma ocabɔ ku Beverley a?

¹⁸ Ó lɛ ɛgɛ duuma nɛ alɔ géē hilokplicii nōo géē ya ka ó hii tɔɔtɛ lɛ alɔ ō ya ōmiya ipu ɛ̄gbā ō gba ku Ujehofa klla ya ɔ jila ŋ. Leyi yɛ ocabɔ mafu ku ɔyinɛ alɔ nɔnya Beverley nōo wɛ ihayi ofu ɛta ce igwo ɛhɔ (75) a ɛ. Ó lɛ ōcē obɔbi éyi nōo gē ya kóō lɔnɔ ta ɔ ō yiyawu. Amáŋ ó dɔka ō ya fiyɛ o ya ɛɛ kóō je otabɔ ipu uklɔ kóō hi ācɛ igwú wa Oblatu Ku Ukraist. Ohigbu ɛnyā, ó lɛ ɔdā okpɔcii nōó dɔka ō ya jila a miya. Eko nɛ ɔyinɛ alɔ nɔnya Beverley lɛ ōmiya ku nu a ya jila a, ó gweeye nɛɛnɛhi. O ceyitikwu ku nu lɛ abɔ kwu ācɛ ɔhá ɔtu kéē yuklɔ lɔfu lɔfu ipu uklɔ ku ɔna ō ta a. Uklɔ nɛ ayinɛ alɔ nōo le hilokplicii ɛ ma gē ya a jɛ Ujehofa eyī nɛhi, ɔdaŋ ku āhɔ̄ néē ya anu a kóō gē ci uwa ŋma ō ya ɛjɛɛji ɔdā néē dɔka ō ya jila a.—Aíjē 71:17, 18.

19. Ɔdi wɛ aɔdā ōhī nɛ alɔ lɔfu miya ō ya ipu ɛ̄gbā ō gba ku Ujehofa a?

¹⁹ Ya ōmiya nɛ a géē lɔfu ya jila gla. Ceyitikwu ku a lɛ auce ō ya nōo he Ujehofa ɔtu. Nwu ɔdā ɛyɛɛyɛyi nōo géē ya ku a tiile lɛ Ɔwɔico ku alɔ mla ɔwa ku nu. Dɔka ɔwɛ nɛ a géē ta ayinɛ uwɔ nɔnyilɔ mla ayinɛ uwɔ nɔnya abɔ gā ajaajɛ. * Bɛɛka Utimoti a, mla ɔhā ku Ujehofa “ɛjɛ̄ɛ̄jī ācɛ kéē [i] má ɛ́gɛ́nɛ̄ a ī jɛ gɔbū lɛ ā.”—1 Utím. 4:15.