ATUAQQISSAAGASSAQ 18
Anersaakkut ittunik anguniagaqartuarit
“Tamakku eqqarsaatigiuakkit. Siumukarnerit tamanit takuneqarsinnaaqqullugu aalluttuakkit.” – TIM 1. 4:15.
ERINARSUUT 84 Sapinngisatsinnik ikiuisa
QILANAARTUUT a
1. Anersaakkut ittut suut anguniagarisinnaavagut?
JEHOVA asagatsigu kiffartornitsinni sapinngisatsinnik iliuuseqarusuppugut. Taamaaliussaguttali anersaakkut ittunik anguniagaqartariaqarpugut. b Assersuutigalugu kristumiutut pissuserineqartussanik ineriartortitsisariaqarpugut, atorluarsinnaasatsinnik piginnaaneqalertariaqarpugut allanillu ikiuinissamut periarfissarsiortariaqarluta.
2. Sooq anersaakkut ittunik anguniagaqartuassaagut?
2 Sooq anersaakkut ittunik anguniagaqartuassaagut? Pingaarnertut Ataatarput qilammiusoq asannittoq nuannaartikkusukkatsigu. Kiffartornermi piginnaanitsinnik sapinngisamik atuinerput Jehovap nuannaarutigissavaa. Aamma uppeqatigut pitsaanerpaamik ikiorsinnaaniassagatsigit anersaakkut siumukarusuppugut. (Tes 1. 4:9, 10) Qanoq sivisutigisumik Nalunaajaasuusimanerput apeqqutaatinnagu tamatta anersaakkut ineriartorsinnaavugut. Qanoq taamaaliorsinnaasugut sammeriartigu.
3. Timuutiusimut allakkat siulliit 4:12-16 naapertorlugit apustilip Paulusip Timuutiusi qanoq kajumissaarpaa?
3 Apustilip Paulusip Timuutiusimut allakkani siulliit allammagit Timuutiusi utoqqaanertaavoq inuusuttoq misilittagaqarluartoq. Taamaakkaluartoq Paulusip kajumissaarpaa anersaakkut siumukartuaqqullugu. (Timuutiusimut 1. 4:12-16 atuakkit). Paulusip oqaasiisa atuarnerini maluginiarsinnaavat kissaatigigaa Timuutiusi marlutsigut anersaakkut ineriartussasoq: tassa kristumiutut pissuserineqartussat, soorlu asanninneq uppernerlu, ineriartortissagai aammalu piginnaanerit, soorlu atuffassineq, kajumissaarineq ilinniartitsinerlu, sulissutigissagai. Timuutiusip maligassiaata sammineratigut paasissavarput angusinnaasatsinnik anguniagaqarutta qanoq anersaakkut siumukarsinnaasugut. Aamma sammissavarput kiffartornitsinni qanoq iliuuseqarnerusinnaasugut.
KRISTUMIUTUT PISSUSERINEQARTUSSAT INERIARTORTIKKIT
4. Filippimiut 2:19-22 naapertorlugit sooq Timuutiusi Jehovamit atorneqarluarsinnaava?
4 Sooq Timuutiusi Jehovamit atorneqarluarsinnaava? Kristumiutut pissuserissuugami. (Filippimiut 2:19-22 atuakkit). Paulusip allaatiginninneranit paasivarput Timuutiusi maniguuttuusoq, ilumoorfiginnittuusoq, eqiasuitsuusoq tatiginartuusorlu. Asannittuuvoq qatanngutinillu isumassuilluartuulluni. Taamaattumik Paulusip Timuutiusi asavaa tatigigamiullu ilungersunartunik suliassinnissaa tunuarsimaarfiginagu. (Kor 1. 4:17) Taamatuttaaq pissuserineqartussat Jehovap nuannarisai ineriartortikkutsigit Jehovamit asaneqarnerussallutalu ilagiinni iluaqutaanerussaagut. – Tuss 25:9; 138:6.
5. (a) Qanoq aalajangersinnaaviuk pissuserineqartussat sorliit sulissutiginiarlugit? (b) Assini takutinneqartutut qatanngutip arnap inuusuttup misiginneqataaneq qanoq sulissutigaa?
5 Aalajangersimasumik anguniagaqarit. Jehovamut qinullutillu pissuserineqartussat sorliit sulissutigisariaqarnerlugit eqqarsaatigiuk. Taakkualu ilaat ataaseq sulissutigiuk. Assersuutigalugu misiginneqataanerusinnaavit? Qatanngutinnik ikiuerusussuseqarnerusinnaavit? Imaluunniit eqqisseqatigiissitsisarnissaq isumakkeerfiginninnerlu ineriartortittariaqarpigit? Immaqa qanimut ikinngutigisat siunnersortigisinnaavat. – Uss 27:6.
6. Pissuserineqartussaq aalajangersimasoq qanoq sulissutigisinnaaviuk?
6 Anguniakkat anguniarlugu iliuuseqarit. Qanoq? Pissuserisassaq ineriartortikkusutat pillugu misissueqqissaarit. Assersuutigalugu allanik isumakkeerfiginninnissaq sulissutiginiarlugu aalajangerputit. Isumakkeerfiginnikkumasut isumakkeerfiginnikkumanngitsullu pillugit Biibilimi allassimasut atuarlugillu eqqarsaatigisinnaavatit. Jiisusip maligassiaa eqqarsaatigiuk. Taanna isumakkeerfiginnikkumasarpoq. (Luk 7:47, 48) Allat kukkuneri eqqarsaatigivallaarnagit iliuuserisinnaasaat ajunngitsut eqqarsaatigineruai. Farisiiarilli Jiisusi assiginagu ‘allanik nikaginnittuupput’. (Luk 18:9) Misissukkatit eqqarsaatigeriarlugit imminut ima aperigit: ‘Allat qanoq isumaqarfigaakka? Pissusii sorliit eqqarsaatigineruakka?’ Inuup isumakkeerfigiuminaatsitavit pissusii ajunngitsut allattukkit imminullu ima aperalutit: ‘Jiisusip inuk taanna qanoq isumaqarfigaa? Isumakkeerfigisimassavaa?’ Taamaaliorutta eqqarsartariaaserput allanngortissinnaavarput. Imaassinnaavoq uagutsinnik ajuallatsitsisoq isumakkeerfigiuminaatsikkipput. Sulissutigiuarutsiguli isumakkeerfiginneriaannaanerussaagut.
ATORLUARSINNAASANNIK PIGINNAANEQALERIT
7. Ussatit 22:29 naapertorlugu Jehovap sullarissut qanoq nalitsinni atorluarpai?
7 Atorluarsinnaasannik piginnaaneqalernissat anguniarsinnaavat. Betelinik, ataatsimeersuartarfinnik ataatsimiittarfinnillu sanaartoqataasut qanoq amerlatigisut eqqarsaatigiuk. Taakkua ilarpassui qatanngutinik misilittagaqarluartunik suleqateqarnermikkut nutaanik piginnaaneqalersimapput. Soorlu assini takutinneqartoq, qatanngutit angutit arnallu ataatsimiittarfinnik aserfallatsaaliuinermi piginnaanerit pisariaqartut ilinniartarpaat. Sullarissut taakku atorlugit Jehova Guuti “Kunngiujuartoq” aamma Kristusi Jiisusi ‘kunngit Kunngigisaat’ tupinnangaartunik naammassisaqarsimapput. (Tim 1. 1:17; 6:15; Ussatit 22:29 atuaruk). Imminut ataqqinarsisinniarnata Jehovali ataqqinarsisinniarlugu piginnaanigut atorlugit ilungersorluta sulerusuppugut. – Joh 8:54.
8. Piginnaaneq sorleq ilinniassanerlugu qanoq aalajangersinnaaviuk?
8 Aalajangersimasumik anguniagaqarit. Piginnaaneq sorleq ilinniarsinnaaviuk? Ilagiinni utoqqaanertat immaqalu nakkutilliisoq angalasartoq isumasiorsinnaavatit. Ilinniartitsillaqqinnerulernissannut siunnersuuteqarpata aperikkit ilinniartitseriaaseq sorleq pitsanngorsarsinnaanerlugu. Pikkorinnerulerumallutit iliuuseqartarit. Qanorli taamaaliorsinnaavit?
9. Nutaamik qanoq piginnaaneqalersinnaavit?
9 Anguniakkat angujumallugu iliuuseqarit. Assersuutigalugu ilinniartitsillaqqinnissaq sulissutiginiarlugu aalajangerputit. Quppersagaq Atuffassinermut ajoqersuinermullu pikkorinnerulerit misissoqqissaarsinnaavat. Ulluinnarni ataatsimiinnermi pisassaqaruit qatanngut ilinniartitsillaqqissoq aperisinnaavat saqqummiussassat tusarnaarsinnaaneraa siunnersorsinnaaneraatillu. Piareersarluartarnikkut ersersittarpat eqiasuitsuullutillu tatiginartuullutit. – Uss 21:5; Kor 2. 8:22.
10. Piginnaanermik sulissutiginninnermi qanoq siumukarsinnaanitsinnik assersuuteqarit.
10 Taavami piginnaaneq sulissutigisat ineriartortikkuminaatsikkukku? Tunniutiinnaqinak! Qatanngut angut, Garry, atuarpiarsinnaanngilaq. Eqqaamavaa ataatsimiinnerni atuffassinini kanngusuutigisarsimallugu. Pikkorinnerulernissanili sulissutigiuarpaa. Maanna oqarpoq ilinniartinneqarsimagami ataatsimiinnerni ataatsimeersuarnernilu oqalugiarsinnaalerluni.
11. Timuutiusi assigalugu akisussaaffeqarnerulernissatsinnut suna iluaqutigissavarput?
11 Timuutiusi oqalugiallaqqinnerulerlunilu ilinniartitsillaqqinnerulerpa? Naluarput. Qularnanngilarli Paulusip siunnersuutaa maleruarlugu Timuutiusip akisussaaffini naammassilluarsimagaa. (Tim 2. 3:10) Taamatuttaaq uagut piginnaanigut ineriartortikkutsigit akisussaaffeqarnerulernissatsinnut piukkunnaateqalissaagut.
ALLANIK IKIUINISSANNUT PERIARFISSARSIORTARIT
12. Qanoq allanit ikiorneqarnikuuit?
12 Allanit ikiorneqarnerput tamatta iluaqutigisarparput. Assersuutigalugu napparsimmavimmi uninnganitsinni utoqqaanertanit Napparsimmavinnut Attaveqartartunit pulaarneqartarnerput qujamasuutigisarparput. Ajornartorsiuteqartilluta utoqqaanertamit tusarnaarneqaraangatta tuppallersarneqaraangattalu qujamasuttarpugut. Biibilimik misissueqateqarnitsinni pionerip misilittagartuup ilinniartitsinerput pillugu siunnersuinera nuannaarutigisarparput. Qatanngutitta taama ikiueriaannaanertik namminneq nuannaarutigisarpaat. Uaguttaaq qatanngutitsinnik ikiueriaannaagutta nuannaarneq taama ittoq misigissavarput. Jiisusi ima oqarpoq: “Tunisineq tigusinermit pilluarnarneruvoq.” (ApS 20:35) Tamakkunani arlaatigulluunniit kiffartorninni iliuuseqarnerorusukkuit suut iluaqutigisinnaavigit?
13. Sooq aalajangersimasumik anguniagaqarneq silatusaarnerua?
13 Ilagiinni iliuuseqarnerorusukkuit aalajangersimasumik anguniagaqartariaqarputit. Sooq? Aalajangersimasumik anguniagaqanngikkuit anguniakkat angusimanerlugu angusimannginnerluguluunniit paasiuminaatsissinnaagakku. Taamaattumik anguniakkatit allattukkit angunissaannullu pilersaarusiorlutit.
14. Sooq anguniakkagut pissutsinut naleqqussarsinnaasariaqarpagut?
14 Ilaannikkut pissutsit aqussinnaajuaannarneq ajoratsigit anguniakkagut pissutsinut naleqqussarsinnaasariaqarpagut. Assersuuteqariarta. Apustili Paulusi illoqarfimmi Tessaluunikami ilagiinnik pilersitseqataavoq, qularnanngilarlu kristumiunngorlaat tassaniittut ikiorumallugit illoqarfik qimakkusussimassanngikkaluaraa. Aallanngikkunili qatanngutit akerlilersuisunit navianartorsiortinneqassammata Paulusip Tessaluunika qimattariaqarsimavaa. (ApS 17:1-5, 10) Qatanngutimili taakkua ikiornissaat suli anguniagarigamiuk pissutsinut naleqqussarpoq. Kingusinnerusukkut Timuutiusi aallartippaa kristumiut Tessaluunikamiittut anersaakkut pissatsikkumallugit. (Tes 1. 3:1-3) Timuutiusip sumulluunniit aallartinneqariaannaanera qatanngutit Tessaluunikamiittut nuannaarutigisimassavaat.
15. Pissutsit atukkagut allanngorpata anguniakkagut qanoq allanngortariaqarsinnaappat? Assersuuteqarit.
15 Paulusip Tessaluunikami misigisaa ilinniarfigisinnaavarput. Imaassinnaavoq anguniagarput aalajangersimasoq pissutsit atukkagut allanngormata angusinnaajunnaaripput. (Jaak 4:13, 14) Illit taamatut atugaqaruit angusinnaasannik anguniagaqalerit. Aappariit Ted aamma Hiedi taamaaliorput. Peqqiilliornerli pissutigalugu Betelimi kiffartorunnaarput. Jehovamilli asanninnertik kajumississutigalugu kiffartornerminni iliuuseqarnerunissaminnut periarfissarsiulerput. Aallaqqaammut pioneritut kiffartorput. Piffissap ingerlanerani specialpionerinngorput, kingornalu Ted ilagiinnik nakkutilliisumut taartissatut ilinniartinneqalerpoq. Ilagiinnilli nakkutilliisut qanoq ukioqqortutigeqqusaanerat appartinneqarmat Ted Hiedilu taamatut kiffartorsinnaajunnaarput. Aallaqqaammut tamanna pakatsissutigaat, paasivaalli Jehova arlalitsigut kiffartuussinnaallugu. Ted ima oqarpoq: “Ilikkarnikuuarput kiffartoriaaseq ataasiinnaq pingaartissanngikkipput.”
16. Galaatiamiut 6:4-mi suna paasivarput?
16 Inuunitsinni pisut tamarluinnaasa aqussinnaanngilagut. Taamaattumik eqqarsarnaveersaartariaqarpugut aatsaat aalajangersimasumik kiffartoriaaseqarutta Jehovamit pingaartinneqassalluta, aamma allatut kiffartoriaaseqartunut sanilliunnaveersaartariaqarpugut. Hiedi ima nassuiaavoq: “Inunnut allanut sanilliuttarneq nuannaarunnaassutaaginnartarpoq.” (Galaatiamiut 6:4 atuaruk). Pitsaanerussaaq Jehovamut kiffartornermi allanillu ikiuinermi iliuuserisinnaasagut eqqarsaatigigutsigit. c
17. Kiffartornermi iliuuseqarnerujumallutit susinnaavit?
17 Pilimanianngitsumik inooriaaseqaruit pisariaqanngitsumillu akiitsoqarnaveersaarlutit Jehovamut kiffartorninni iliuuseqarnerunissamut periarfissaqarnerussaatit. Angorusutat ingerlaannaq angusinnaanngisat angujumallugu angoriaannaasannik anguniagaqarit. Assersuutigalugu pionerinngornissaq anguniagarigukku qaammatit tamaasa ikiorti-pioneritut kiffartoqqaarsinnaavit? Ilagiinni kiffartortunngornissaq anguniagarigukku oqaluussinerusinnaavit ilagiinnilu napparsimasut utoqqaallu pulaakulasarnerullugit? Misilittakkatit siunissami akisussaaffilerneqarnerunissannut iluaqutigisinnaavatit. Qanorluunniit suliassinneqaraangavit sapinngisamik iliuuseqartarnissat aalajangiusimajuk. – Rom 12:11.
18. Beverley qanoq ilinniarfigaajuk? (Aamma asseq takuuk).
18 Qassinilluunniit ukioqaraluarutta anersaakkut anguniagaqartuarsinnaavugut. Qatanngut 75-inik ukiulik Beverleymik atilik assersuutigisinnaavarput. Taanna nappaateqarnini pissutigalugu pitsorluppoq. Eqqaaniaanermulli qaaqqusinermi suleqataanerorusukkami aalajangersimasumik imminut anguniagassippoq. Anguniakkanilu angugamiuk nuannaangaarpoq. Maligassiaa allat oqaluussinermi iliuuseqarnerunissaminnut kajumississutigaat. Ilagiinni utoqqartatta iliuuserisinnaasaat killeqaraluartut Jehovap tamaasa pingaartippai. – Tuss 71:17, 18.
19. Anersaakkut ittut suut anguniagarisinnaavagut?
19 Angusinnaasannik anguniagaqarit. Kristumiutut pissuserineqartussat Jehovap iluarisai ineriartortikkit. Guutip taassumalu peqatigiissortaata iluaqutigisinnaasaannik piginnaasaqalerit. Aamma qatanngutitit ikiorumallugit iliuuseqarnerunissannut periarfissarsiortarit. d Taava Timuutiusi assigalugu Jehovap ikiuineratigut ‘siumukarnerit tamanit takuneqarsinnaassaaq’. – Tim 1. 4:15.
ERINARSUUT 38 Nakussatsissavaatit
a Timuutiusi nutaarsiassat nuannersut pillugit oqaluussillaqqikkaluarluni apustilimit Paulusimit kajumissaarneqarpoq anersaakkut ittunik anguniagaqartuarnissamik. Kajumissaarutaanik maleruaagami Jehovamut kiffartornermi iliuuseqarnerusinnaallunilu qatanngutiminik ikiuinerusinnaavoq. Illit Timuutiusitulli Jehovamut kiffartornermi uppeqatinnillu ikiuinermi iliuuseqarnerorusuppit? Qularnanngilaq taamatut kissaateqartutit. Sunik anguniagaqarsinnaavit? Anguniakkatillu taakku anguniarlugit susariaqarpit?
b NASSUIAAT: Anguniakkat anersaakkut ittut tassaasinnaapput Jehova sapinngisatsinnik kiffartorfiginiarlugu nuannaartinniarlugulu iliuuseriniakkagut suulluunniit.
c Takuuk “Tjeneste hvor behovet er større”, atuakkami Organiseret til at gøre Jehovas vilje, kapitali 10, immikkoortut 6-9.
d Atuakkami Et håb om en lys fremtid-imi ilinniagassaq 60 takuuk.
e ASSIMI MALUGISASSAT: Qatanngutip angutip qatanngutit arnat marluk aserfallatsaaliuinermi ilinniartikkai. Kingorna arnat marluk taakku ilikkakkatik atorluarpaat.
f ASSIMI MALUGISASSAT: Qatanngut arnaq angerlarsimaffimminit anisinnaanngitsoq oqarasuaatikkut eqqaaniaanissamut qaaqqusisoq.