1. Jimbambe jebhi mu nzumbi jitutena kusuwa?

 KUMA tu Jikidistá, twazolo kyavulu Jihova. Twamesena kubhanga ni uhete woso o sidivisu yetu kwa mwene. Maji phala kubhanga yoso itutena, twabhingi kusola jimbambe, wila o kukala ni idifwa ya Ukidistá, kudilonga mauhete a ubhe ni kusota maukexilu akusidivila akwetu. *

2. Mukonda dyahi twatokala kusuwa jimbambe ni kubhanga yoso phala kujikumbidila?

² Mukonda dyahi twatokala kusota kukula mu nzumbi? Kyadyanga, mukonda twamesena kusangulukisa Tata yetu ya henda, wala kudyulu. Jihova usanguluka kyoso kitubhanga dingi mu sidivisu yê bhukaxi ka mauhete metu. Kyakayadi, twamesena kukula mu nzumbi phala tutene kukwatekesa dingi kyambote o jiphange jetu. (1 Te. 4:9, 10) Kikale se twamateka kusidivila Jihova kindala mba ukulu kya, etwenyoso tutena kukulaku dingi mu nzumbi. Tumone kyebhi kitutena kubhanga kiki.

3. Kala kya kisoneka mu mukanda wa 1 Timote 4:12-16, poxolo Phawulu waswinisa Timote kubhanga ihi?

³ Kyoso poxolo Phawulu kyasoneka o mukanda wê wadyanga kwa Timote, o munzangala Timote wexile kya kafunga mu mivu. Né kiki, Phawulu wamuswinisa kusuluka ni kukula mu nzumbi. (Tanga 1 Timote 4:12-16.) Kyoso kiwatange o izwelu ya Phawulu, watonginina kuma, mwene wamesenene  kwila, Timote ukula mu maukexilu ayadi: Mukukala ni idifwa ya Ukidistá kala o henda, kixikanu ni kuzela; ni kubandekesa o mauhete mê akutanga, kubazela ni kulonga. Twandadilonga o phangu ya Timote phala kumona kyebhi kitutena kusuwa jimbambe jitutena kukumbidila ni kyebhi ki tutena kusidivila dingi kyambote Jihova. Twandadilonga we maukexilu akusanzumuna o ukunji wetu.

4. Kala kilondekesa Filipe 2:19-22, ihi yabhangesa Timote kukala selevende yambote ya Jihova?

⁴ Ihi yabhangesa Timote kukala selevende yambote ya Jihova? O idifwa yê ya Ukidistá. (Tanga Filipe 2:19-22.) Bhukaxi ka izwelu ya Phawulu yalungu ni Timote, tutena kumona kwila, Timote wexile diyala dya lenduka, dya fiyele, wasakamane, wexile muthu wakudyelela. Wexile kafunga ka henda, walange kyambote o jiphange. Kiki kyabhangesa Phawulu kuzola Timote, kyenyiki, kexile ni hele yakumubhana dingi ikalakalu yamukwa yabhonzele. (1 Ko. 4:17) Se tukala ni idifwa kala o henda, Jihova wandatuzola we, twandakwatekesa dingi kyambote o kilunga.—Jisá. 25:9; 138:6.

5. (a) Kyebhi ki utena kusola se idifwa yebhi ya Ukidistá iwamesena kukalakala nayu? (b) Kala kilondekesa o foto kyebhi o phange yamuhatu ya munzangala, kyasolo kulondekesa dingi o kidifwa kya kulondekesa o henda ku akwâ?

⁵ Sola o kidifwa kiwamesena kukala nakyu. Samba ni kuxinganeka mu kidifwa ki watokala kubandekesa. Sola kidifwa kimoxi, bhanga yoso phala kukilondekesa dingi kyambote. Mukifika, o kwila utena kukala ni kifwa kya kwivwa o ndolo yakwenu mba hanji yakukwatekesa o jiphange jé? O kwila wabhingi kukala dingi ni kifwa kya kusota o kutululuka mba kuloloka? Kitena kukukwatekesa, o kwibhwidisa dikamba di wadyelela, n’a kutangela se kidifwa kyahi kiwatokala kubandekesa dingi.—Jisa. 27:6.

6. Ihi i utena kubhanga phala kubandekesa kidifwa kya Ukidistá?

⁶ Sota kukumbidila o mbambe iwasolo. Kyebhi ki utena kubhanga kiki? Ukexilu umoxi wakubhanga kiki, o kutokwesa yalungu ni kidifwa ki wamesena kubandekesa. Xinganeka kuma, wamesena kubandekesa o ukexilu wé wakuloloka akwenu. Utena kumateka ni kutanga milongi yalungu ni kuloloka ni kuxinganeka mu phangu ya yó a atumbula mu Bibidya mukonda dya kuloloka akwâ ni muxima  woso, ni yó akambele kubhanga kiki. Banza ngó mu phangu ya Jezú. Mwene waloloka akwâ ni muxima woso. (Luk. 7:47, 48) Mwene kalungu o mesu mu itondalu yâ, maji wasoto kutonginina o ima yejibhanga kyambote. Maji o Jifalizewu mu izuwa ya Jezú “kakexile mu suwa akwâ.” (Luk. 18:9) Kyoso ki uzubha kuxinganeka mu phangu jiji, dibhwidise: ‘Ihi ingene mumona ku akwetu? Idifwa yebhi yala nayu ene, ingisola kulunga o mesu?’ Se kya mukubhonza kuloloka muthu, soneka o idifwa yê yambote. Mukusuluka, dibhwidise: ‘Kyebhi Jezú kyatala o muthu yú? O kwila Jezú weji muloloka?’ Kubhanga kiki kutukwatekesa kulungulula o ixinganeku yetu. Kudimatekenu, kitena kutubhonza kuloloka watubhange kyayibha. Maji se tubhanga nguzu, mukubhita kithangana kikyanda tubhonza dingi kuloloka akwetu.

7. Kala kilondekesa Jisabhu 22:29, kyebhi Jihova kya kumbidila o vondadi yê bhukaxi ka akalakadi ala ni uhete lelu?

⁷ O mbambe yamukwa i utena kusuwa, o kudilonga uhete wengi. Kwabhingi akalakadi avulu phala kutunga Jibetele, Ididi ya Yonge ya Ilunga, ni Ididi ya Ubhezelu. Jiphange javulu akalakala mu ididi yiyi, adilongo o uhete yú mukukalakala ni jiphange jamukwá ala kya ni uhete. Kala kilondekesa ofoto, o jiphange jamala ni ja ahatu amudilonga uhete wa ubhe, wanda kwakwatekesa mu kikalakalu kya kuyudika ni kulanga o Ididi ya Yonge ya Ilunga, ni Ididi ya Ubhezelu. Mu ukexilu yú ni mu maukexilu amukwá, Jihova Nzambi “O Sobha inangenena,” ni Jezú Kidistu o “Sobha ya jisobha,” amubhanga ima ya madiwanu bhukaxi ka mayala ni ahatu ala ni uhete wasoko. (1 Ti. 1:17; 6:15; tanga Jisabhu 22:29) Bhukaxi ka mauhete metu, twamesena kukalakala ni nguzu phala kuximana Jihova, kana etu.—Nzw. 8:54.

8. Kyebhi ki utena kukumbidila o mbambe ya kudilonga uhete wa ubhe?

⁸ Sola o uhete u uwamesena kukala nawu. Uhete wahi u wamesena kudilonga? Ebhwidisa o tufunga twa kilunga kyé mba o kafunga ka ilunga, se mukixinganeku kyâ, uhete webhi u utena kudilonga. Mu kifika, se akutangela kwila watokala kubandekesa o uhete wé wakutanga ni kulonga, utena kwabhinga n’a kukwatekesa bhwoso bhu wabhingi. Mukusuluka, bhanga yoso phala kubandekesa o uhete wé. Kyebhi ki utena kubhanga kiki?

9. Kyebhi ki utena kukumbidila o mbambe yakudilonga uhete wa ubhe?

⁹ Sota kukumbidila o mbambe iwasolo. Xinganeka kuma, wamesena kubandekesa o uhete wé wakulonga. Utena kudilonga kyambote o kadivulu Ta O Muxima Wé Mu kutanga ni Kulonga. Kyoso ki upelepalala mbandu phala o kyônge kyakaxi ka semana, utena kubhinga kwa phange phala kwivwa o mbandu yé ande dya kizuwa kiwandabhanga o mbandu. Mubhinge phala kukutangela bhebhi bhu wabhingi kuyudika dingi. Pelepalala o jimbandu jé ni kithangana kyasoko, phala akwijiye kala muthu u wakudyelela, ukumbidila o ikalakalu yatambula.—Jisa. 21:5; 2 Ko. 8:22.

10. Kyebhi kitutena kubandekesa o uhete wetu? Bhana phangu.

¹⁰ Abha se wamudilonga kubhanga kima kyabhonzo kyavulu? Kana kubhwila! Sayi phange amwixana Garry, kyamubhonzele kutanga kyambote. Mwene ulembalala kuma, wexile mukala ni jisonyi mukonda dya kukamba kutanga kyambote. Maji mwene wasuluka ni kudilonga. Kindala mwene wamba kwila, o milongi yatambula, yamumukwatekesa kubhanga madiskulusu mu Kididi Kya Ubhezelu  ni mu yônge ya ilunga, katé mwene ni mu yônge ya makota!

11. Kala Timote, ihi yandatukwatekesa kukumbidila kyambote o ikalakalu yetu?

¹¹ O kwila Timote wakituka hete mukubhanga madiskulusu mba kulonga? O Bibidya ki ijimbulula. Maji tutena kudyelela kwila, Timote wabandekesa o mauhete mê, kyoso kyayi ni kukayela o itendelesu ya Phawulu. (2 Ti. 3:10) Se tubandekesa we o mauhete metu, twandatena kukumbidila kyambote o ikalakalu itutambula.

12. Mbote yahi iwakatula kyá mukikwatekesu kya akwenu?

¹² Etwenyoso twene mukatula mbote mu sidivisu ibhanga akwetu. Kyoso kitukala mu inzo yakusaka, tusanguluka kyoso kyatukunda ku tufunga atokala ku Kibuka Kikwatekesa o Jiphange mu Jinzo Jakusaka mba Kibuka kya Kukunda o Jihaxi. Se twamudibhana ni maka kumwenyu, tusanguluka we kyoso o tufunga twa henda kya twivwa ni kutuximbakatesa. Se twabhindamena kikwatekesu mukulonga o Bibidya, tusanguluka kyoso o muboki wa thembu yoso wala kyá ni uhete kyaxikina kuboka n’etu ni kutubhana jindunge. O jiphange jetu joso jiji, atukwatekesa ni kisangusangu kyoso. Tutena we kukala ni kusanguluka kuku, se tudibhakula phala kusidivila we akwetu. Jezú wambe: “O kubhana kusangulukisa dingi, o kutambula ndenge.” (Ika. 20:35) Se wamesena kusanzumuna o ukunji wé mu maukexilu yá mba amukwa, ihi yandakukwatekesa kukumbidila o jimbambe jé?

13. Yalungu ni jimbambe, twatokala kudilanga mu ihi?

¹³ Yalungu ni jimbambe twatokala kudilanga phala ki jikale ngó mu kixinganeku. Mukifika, utena kuzwela: ‘Ngamesena kubhanga dingi mu kilunga.’ Maji kitena kubhonza kwijiya se wakumbidila kyá o mbambe yiyi, mukonda kiwatumbula se mbambe yebhi i wasuwu. Kyenyiki, tumbula mwene o mbambe iwamesena kukumbidila. Se kibhana, utena mwene ku isoneka ni kuxinganeka kyebhi kiwanda ikumbidila.

14. Mukonda dyahi kitutokala kudijijidika kyavulu kyoso kitusola jimbambe?

¹⁴ Kitutokala we kudijijidika kyavulu kyoso kitusola jimbambe. Mukonda dyahi? Mukonda kitwejiya yoso yandabhita netu, o ima  itena kulunguluka. Mukifika: Poxolo Phawulu wakwatekesa kumateka kilunga kya ubhe mu mbanza ya Tesalonika. Sé phata, mwene wasuwu o mbambe ya kukalabhu ni kukwatekesa o kilunga kya ubhe. Maji o jinguma kijamwehela, Phawulu wabhingile kuxisa o mbanza. (Ika. 17:1-5, 10) Se ka tundile mu mbanza, Phawulu wejita o mwenyu wa jiphange jê mukilwezu. Maji mwene kabhwila, kana. Muveji dya kiki, waxikina o ukexilu wa ubhe. Mukubhita kithangana, Phawulu watumikisa Timote phala kulanga o jiphange ja ubhe mu Tesalonika. (1 Te. 3:1-3) Sé phata, akwa Tesalonika asangulukile kyavulu kyoso kya atumikisa Timote phala kwakwatekesa.

15. O ima yatúndu o nguzu yetu itena kyebhi kutufidisa kukumbidila o jimbambe? Bhana phangu.

¹⁵ Tutena kukatula mbote mu ima yabhiti ni Phawulu mu mbanza ya Tesalonika. Tutena kumesena ujitu mukilunga, maji ima yatúndu o nguzu yetu itena kutufidisa ku itambula kindala kiki. (Ndo. 9:11) Se kiki kyamubhita neye, watokala kuxikina kusola mbambe yengi. Kiki kyene kyabhange o dikaza, phange Ted ni Hiedi. Ene axisa o sidivisu ya Betele mukonda dya uhaxi. Maji o henda yâ kwa Jihova ya abhangesa kusanzumuna o ukunji wâ mu maukexilu engi. Kya dyanga, amateka kusidivila kala aboki athembu yoso. Mu kubhita kithangana, a asolo kala aboki a katunda, o phange Ted amateka kumulonga phala kukala mubhingani wa kafunga ka ilunga. Maji mukubhita kithangana, asosolola o kitala kyatokala kukala nakyu o jiphange jikunda o ilunga. Phange Ted ni Hiedi atonginina kwila, kejitena kusuluka dingi ni kukunda o Ilunga mukonda dya kitala kyâ. Sumbala aluwalele, atonginina kwila, ejitena kusidivila Jihova mu maukexilu amukwa. Phange Ted wambe: “Twadilongo kwila, kitutokalele kulunga o mesu mu ukexilu umoxi ngó wakusidivila.”

16. Madisá ebhi utukatula mu mukanda ku akwa Ngalásya 6:4?

¹⁶ Kitutena kwijiya yoso yandabhita kumwenyu wetu. Kyenyikiphe, kitutokala kusokesa o valolo yetu bhukaxi ujitu utwala nawu, mba kusokesa o maujitu metu ni a jiphange jamukwâ. Phange Hiedi wajimbulula: “Kiwandasanguluka se udisokesa ni akwenu.” (Tanga Ngalásya 6:4) Kima kyambote kusota maukexilu akukwatekesa akwetu ni kusidivila Jihova. *

17. Ihi i utena kubhanga phala kuhádya kutambula maujitu mukilunga?

¹⁷ Phala kutambula dingi maujitu mu kilunga,  watokala kusosolola o ukexilu wamwenyu wé ni kulenga o makongo. Suwa jimbambe jofele ji utena kukumbidila mu ithangana yabutu, yene yandakukwatekesa kukumbidila o jimbambe jonene. Mukifika, se wamesena kukala muboki wathembu yoso mu mivu kupholo, o kwila kindala kiki utena kukalakala wila muboki wa ithangana ni ithangana mu jimbeji javulu? Se wamesena kukala mukwatekexi wa tufunga, o kwila utena kubandekesa o kithangana kiwene muboka ni kukunda o jihaxi ni adyakime akuka mu kilunga kyé? O mauhete uwandadilonga mu kubhanga o ima yiyi kindala, wandakukwatekesa kyoso kiwandatambula maujitu amukwa kuhádya. Sota kubhanga yoso iwatena kabasa ujitu uwala nawu kindala kiki.—Lom. 12:11.

18. Kala kilondekesa o foto, ihi iwadilongo ni phange Beverley?

¹⁸ O kitala ki kitufidisa kukumbidila o jimbambe jetu mu kilunga. Tala yabhiti ni phange yamuhatu amwixana Beverley, wala ni 75 amivu. Mwene wala ni uhaxi umubhonzesa kwenda. Maji wamesenene kukalakala ni nguzu mu kambanya ka Lembalasa. Kyenyikiphe, mwene wasolo mbambe imoxi. Mwene wasanguluka kyavulu kyoso kyakumbidila o mbambe yakanene. O nguzu yabhange yaswinisa we akwâ kubhanga dingi mu ukunji. Jihova ubhana valolo mu yoso ibhanga o jiphange jetu akuka, né mwene katena kubhanga dingi yoso yamesena mukonda dya ibhidi.—Jisá. 71:17, 18.

19. Ima yahi yandatukwatekesa kukumbidila o jimbambe jitusuwa?

¹⁹ Sola jimbambe ji utena kukumbidila. Kala ni idifwa isangulukisa Jihova. Dilonge uhete wa ubhe, wandakukwatekesa kubhanga dingi mu kilunga kya Jihova. Sota maukexilu akusidivila dingi o jiphange jé. * Kala kyabhiti ni Timote, ni dibesá dya Jihova “athu oso” andamona “kwila wa mukula kyambote mu nzumbi.”—1 Ti. 4:15.