1. Әм дькарьн хԝәрʹа чь щурʹә нета дайньн?

 ӘМ МӘСИһИ НӘ, у әм Йаһоԝа гәләк һʹьз дькьн. Ләма жи әм дьхԝазьн бь щурʹе һәри баш ԝирʹа хьзмәт бькьн. Бона ве йәке, лазьм ә ԝәки әм хԝәрʹа нета дайньн. Мәсәлә, лазьм ә кӧ әм һʹӧнӧред баш нав хԝәда пешда биньн, тьштед тʹәзә һин бьн у мәщала бьгәрʹьн, ԝәки али кәсед дьн бькьн. *

2. Чьрʹа фәрз ә кӧ әм хԝәрʹа нета дайньн у хирәт бькьн ԝәки бьгьһижьн ԝан?

² Чьрʹа фәрз ә ԝәки әм рʹӧһʹанида пешда һәрʹьн? Йа һәри фәрз, әм дьхԝазьн дьле Баве хԝәйи әʹзмана ша кьн. Гава Йаһоԝа дьвинә, ԝәки әм һʹӧнӧред хԝә бь дьл у щан хьзмәтеда дьдьнә хәбате, әԝ гәләк ша дьбә. Ӧса жи, әм дьхԝазьн пешда һәрʹьн сәва кӧ бькарьбьн дьһа зедә али хушк-бьра бькьн (1 Тʹесалоники 4:9, 10). Фьрԛи тʹӧнә ида чәнд сал ә кӧ әм Шәʹдед Йаһоԝа нә, әм гьшк жи дькарьн рʹӧһʹанида пешда һәрʹьн. Гәло чаԝа?

3. Ль гора 1 Тимотʹейо 4:12-16, Паԝлосе шанди Тимотʹейорʹа гот ԝәки әԝ чь бькә?

³ Гава Паԝлосе шанди Тимотʹейорʹа нәʹма пешьн ньвиси, әв бьре щаһьл ида рʹуспики щерʹьбанди бу, ле Паԝлос ԝирʹа гот, ԝәки әԝ һе зедә пешда һәрʹә (1 Тимотʹейо 4:12-16 бьхунә). Жь готьнед Паԝлосе шанди те фәʹмкьрьне, ԝәки Тимотʹейо гәрәке дӧ алийада пешда бьчуйа: Әԝи гәрәке һьм һʹӧнӧред ӧса ча һʹьзкьрьн, баԝәри у һʹәлалийе нав хԝәда пешда бьанийа, һьм жи хԝәндьна бәр мәрьва, ширәтдайин у һинкьрьнеда  һе щерʹьбанди буйа. Жь мәсәла Тимотʹейо, әме ньһа бьвиньн кӧ нетед мә ча дькарьн али мә бькьн, ԝәки әм рʹӧһʹанида пешда һәрʹьн. Ӧса жи, әме дина хԝә бьдьне кӧ әм чаԝа дькарьн хьзмәта хԝә дьһа зедә кьн.

4. Ль гора Филипи 2:19-22, Тимотʹейо бь сайа чь бу хьзмәткʹарәки керһати?

⁴ Тимотʹейо чьрʹа хьзмәткʹарәки керһати бу? Чьмки һʹӧнӧред ԝийә баш һәбун (Филипи 2:19-22 бьхунә). Жь готьнед Паԝлос те фәʹмкьрьне кӧ Тимотʹейо йәки мьлук, амьн, хирәт у бь итʹбар бу. Әԝ йәки дьлован бу, у әԝи жь дьл бона хушк-бьра хәм дькьр. Ләма Паԝлос ԝи һʹьз дькьр у щабдарийед мәзьн тʹәсмили ԝи кьр (1 Корьнтʹи 4:17). Һәгәр әм һʹӧнӧред кӧ Йаһоԝа хԝәш тен пешда биньн, Йаһоԝа ԝе жь мә рʹази бә, у әме дьһа кери щьвате бен (Зәбур 25:9; 138:6).

5. (а) Әм ча дькарьн тедәрхьн кӧ кʹижан һʹӧнӧри нав хԝәда пешда биньн? (б) Чаԝа кӧ шькьл нишан дькә, хушка щаһьл чаԝа хирәт дькә ԝәки дьһа дьлшәԝат бә?

⁵ Хԝәрʹа нетәкә конкрет дайнә. Дӧа бькә у бьфькьрә кӧ гәрәке тӧ кʹижан һʹӧнӧра нав хԝәда пешда бини. Һʹӧнӧрәки бьжберә у сәр ве йәке бьхәбьтә. Мәсәлә, тӧ дьбәкә дьхԝази дьлшәԝати, йан хԝәстьна хԝә кӧ али хушк-бьра бьки, дьһа зедә ки. Йан жи тӧ дьхԝази дьһа зедә әʹдьлайиһʹьз би у алийе бахшандьнеда дьһа рʹәʹм би. Тӧ дькари жь һәваләки хԝә бьпьрси, һәла гәрәке тӧ кʹижан алийада пешда һәрʹи (Мәтʹәлок 27:6).

6. Әм чаԝа дькарьн һʹӧнӧрәки баш нав хԝәда пешда биньн?

⁶ Хирәт бькә кӧ бьгьһижи нета хԝә. Тӧ чаԝа дькари бьгьһижи нета хԝә? Һʹӧнӧре кӧ тӧ дьхԝази нав хԝәда пешда бини, кʹур леколин бькә. Соз мәсәлә, тӧ дьхԝази сәр хԝә бьхәбьти ԝәки дьһа зедә бьбахшини мәрьва. Һьнге тӧ дькари сәрһатийед кәсед кӧ һазьр бун бьбахшиньнә мәрьва у сәрһатийед кәсед кӧ ӧса нибун, бьхуни у ль сәр ԝан кʹур бьфькьри. Бәʹса хәбәре, сәр мәсәла Иса бьфькьрә. Әԝи бь дьл дьбахшандә мәрьва (Луԛа 7:47, 48). Әԝи дина хԝә нәдьда шашийед ԝан, ле итʹбарийа хԝә ԝан дьани. Ле ферьси ӧса нибун. Ԝана мәрьва «бәр тьштәки һʹәсаб нәдькьрьн»  (Луԛа 18:9). Сәр ван мәсәла кʹур бьфькьрә у жь хԝә бьпьрсә: «Гәло әз сәр мәрьва ча дьньһерʹьм? Гәло әз дина хԝә дьдьм кʹижан һʹӧнӧред ԝан?» Һәгәр тәрʹа чәтьн ә бьбахшини кәсәки, бьфькьрә кӧ кʹижан һʹӧнӧред баш щәм ви кәси һәнә, у ԝана сәр кʹахазәке бьньвисә. Паше жь хԝә бьпьрсә: «Гәло Иса сәр ви кәси чаԝа дьньһерʹә? Һәгәр Иса дәԝса мьн буйа, гәло ԝе бьбахшанда ԝи?» Леколинәкә ӧса дькарә али мә, бькә кӧ әм фькьред хԝә рʹаст бькьн. Серида дьбәкә мәрʹа нәһеса бә бьбахшиньн ви кәси кӧ дьле мә ешандийә. Ле чьԛас әм хирәт бькьн ԝәки ви алида пешда һәрʹьн, ԝе мәрʹа дьһа һеса бә бьбахшиньнә мәрьва.

7. Ль гора Мәтʹәлок 22:29, Йаһоԝа хәбаткʹаред һостә чаԝа дьдә хәбате?

⁷ Гәло тӧ дькари чь нетед дьн хԝәрʹа дайни? Мәсәлә, тӧ дькари тьштәки тʹәзә һин би. Һәла бьфькьрә кӧ бона авакьрьна авайед Бәйтʹәле, Одед Щьвата у щьватед мәзьн, чьԛас хәбаткʹар лазьм ьн. Гәләк жь ԝан бь сайа һәвкʹарийа тʹәви бьред щерʹьбанди, пʹешед тʹәзә һин бунә. Сәр шькьл әм дьвиньн кӧ хушк-бьра чаԝа пʹешед тʹәзә бона хԝәйкьрьна Одед Щьвата у щьватед мәзьн, һин дьбьн. Рʹасти жи, «Пʹадшайе һʹәтаһʹәтайе» Йаһоԝа, у «Пʹадшайе пʹадша» Иса Мәсиһ, бь сайа хәбаткʹаред һостә у хирәт, шьхӧлед мәзьн тиньн сери (1 Тимотʹейо 1:17; 6:15; Мәтʹәлок 22:29 бьхунә). Ләма жи әм дьхԝазьн бь дьл у щан бьхәбьтьн у фәрәсәтед хԝә нә кӧ бона рʹумәта хԝә, ле бона рʹумәта Йаһоԝа бьдьнә хәбате (Йуһʹәнна 8:54).

8. Тӧ чаԝа дькари хԝәрʹа нет дайни ԝәки фәрәсәтәки тʹәзә нав хԝәда пешда бини?

⁸ Хԝәрʹа нетәкә конкрет дайнә. Гәло тӧ дькари кʹижан фәрәсәт нав хԝәда пешда бини? Жь рʹуспийа йан жи жь бәрпьрсийаре мьһале бьпьрсә, һәла бь ньһерʹандьна ԝан, ԝе баш бә кӧ тӧ кʹижан фәрәсәт нав хԝәда пешда бини. Мәсәлә, һәгәр әԝана ширәте бьдьнә тә, ԝәки тӧ һинкьрьн у хәбәрданеда пешда һәрʹи, жь ԝана бьпьрсә һәла конкрет кʹижан щурʹе хәбәрданеда тӧ гәрәке пешда һәрʹи. Паше, бь дьл у щан хирәт бькә ԝәки бьгьһижи ве нете. Гәло тӧ чаԝа дькари ве йәке бьки?

9. Тӧ чаԝа дькари бьгьһижи нета хԝә кӧ фәрәсәтәкеда пешда һәрʹи?

⁹ Хирәт бькә кӧ тӧ бьгьһижи нета хԝә. Мәсәлә, һәгәр тӧ дьхԝази һинкьрьнеда пешда һәрʹи, брошура «Хԝәндьн у Һинкьрьнеда Щерʹьбанди бә» леколин кә. Пешийа кӧ тӧ сәр щьвате пе дәрсәке дәрейи, жь бьраки щерʹьбанди бьхԝазә ԝәки әԝ гӧһ бьдә готара тә у тәрʹа һьнә ширәта бьдә. Бьра кәсед дәр-дора тә нә тʹәне фәрәсәтед тә бьвиньн, ле ӧса жи бьвиньн кӧ тӧ йәки хирәт у бь итʹбар и (Мәтʹәлок 21:5; 2 Корьнтʹи 8:22).

10. Бьраки фәрәсәтәкеда ча пешда чу?

¹⁰ Һәгәр тәрʹа чәтьн ә фәрәсәтәке нав хԝәда пешда бини, бәрдәԝам кә сәр хԝә бьхәбьтә! Бьраки бь наве Гари серида нькарьбу рʹьнд бьхунә. Щьватеда, әԝи гәләк шәрм дькьр бь дәнге бьльнд бьхунә. Диса жи, әԝи хирәта хԝә ӧнда нәкьр. Ахьрийеда, бь сайа һинкьрьна кӧ әԝи станд, әԝ ида дькарә һьм Ода щьватеда һьм жи сәр щьватед мәзьн жи готара бьхунә.

11. Мина Тимотʹейо, чь ԝе али мә бькә бь щурʹәки дьһа баш Йаһоԝарʹа хьзмәт кьн?

¹¹ Гәло Тимотʹейо ԝәʹдә шунда бу готарванәки зарширьн у дәрсдарәки щерʹьбанди? Әм ве йәке ньзаньн. Ле әм дькарьн баԝәр бьн, кӧ Тимотʹейо гӧһ да ширәта Паԝлос, ләма жи әԝи  щабдарийед хԝә чьԛас дьчу һаԛас дьһа баш дьани сери (2 Тимотʹейо 3:10). Мина Тимотʹейо, һәгәр әм тьштед тʹәзә һин бьн у фәрәсәтед тʹәзә нав хԝәда пешда биньн, әме жи бькарьбьн бь щурʹәки дьһа баш Йаһоԝарʹа хьзмәт кьн.

12. Тә жь аликʹарийа хушк-бьра чаԝа кʹар дитийә?

¹² Әм гьшк жь аликʹарийа хушк-бьра кʹаре дьстиньн, ӧса нинә? Мәсәлә, гава әм дькʹәвьн нәхԝәшхане, гәло әм ша набьн кӧ рʹуспийед жь Комитейа Һәвкʹарийа Нәхԝәшхана у Кʹома Тʹәсәликьрьна Нәхԝәша, тʹәсәлийа мә дькьн? Чахе әм жийина хԝәда рʹасти тәнгасийа тен, гәло әм ша набьн гава рʹуспик ԝәʹдә вәдьԛәтинә, ԝәки гӧһ бьдә мә у бәр дьле мәда бе? Йан жи, гава мәрʹа бона һинбуна Кʹьтеба Пироз аликʹари лазьм ә, гәло әм ша набьн кӧ пешәнгәки щерʹьбанди һазьр ә тʹәви мә бе у ширәтед керһати бьдә мә? Бәле, хушк-бьред мә бь шабуне али мә дькьн. Һәгәр әм жи һазьр бьн кӧ али хушк-бьра бькьн, әме жи ша бьн. Чаԝа Иса готьбу: «Хԝәзи ль дайийа, нә кӧ ль стандийа» (Кʹаред Шандийа 20:35). Һәгәр тӧ дьхԝази хьзмәта хԝә һьнә алийада дьһа зедә бьки, чь дькарә али тә бькә ԝәки тӧ бьгьһижи нетед хԝә?

13. Ԝе баш бә кӧ әм хԝәрʹа чь щурʹә нета дайньн?

¹³ Һьнә кәс хԝәрʹа дьбежьн: «Әз дьхԝазьм щьватеда дьһа зедә шьхӧл бькьм». Ле һәрге әԝана нетәкә конкрет данәйньн пешийа хԝә, әԝана ԝе ньзаньбьн чаԝа бьгьһижьн нета хԝә, у ахьрийеда ԝе фәʹм нәкьн һәла әԝана гьһиштьнә нета хԝә йан на. Ләма жи ԝе дьһа баш бә, ԝәки тӧ нетәкә конкрет дайни пешийа хԝә. Тӧ дькари сәр кʹахазәке бьньвиси һәла нета тә чь йә у гәрәке тӧ чь бьки ԝәки бьгьһижи ве нете.

14. Гава әм хԝәрʹа нета датиньн, чьма фәрз ә кӧ әм сәрԝахт бьн?

¹⁴ Ӧса жи, гава әм хԝәрʹа нета датиньн, гәрәке әм сәрԝахт бьн. Гәло чьрʹа? Чьмки һәр тьшт дәсте мәда нинә. Мәсәлә, бь сайа аликʹарийа Паԝлосе шанди, ль бажаре Тʹесалонике щьватәкә тʹәзә һатә сазкьрьне. Паԝлос бешьк дьхԝәст ль Тʹесалонике бьминә, ԝәки али хушк-бьред тʹәзә бькә. Ле сәва пәйкʹәтьна, Паԝлос мәщбур бу жь  ԝедәре бьрʹәвә (Кʹаред Шандийа 17:1-5, 10). Һәгәр Паԝлос ԝедәре бьма, әԝе сәре хушк-бьра бькьра бәлайе. Диса жи, Паԝлос хирәта хԝә ӧнда нәкьр, ле әԝ һини дәрәщед тʹәзә бу. Паше, әԝи Тимотʹейо шандә Тʹесалонике, ԝәки али ван хушк-бьред тʹәзә бькә (1 Тʹесалоники 3:1-3). Бинә бәр чʹәʹве хԝә, ԝәки хушк-бьред Тʹесалоники чьԛас ша бун, кӧ Тимотʹейо һазьр бу али ԝан бькә.

15. Дәрәщед тʹәзә чаԝа дькарьн сәр нетед мә һʹӧкӧм кьн? Мәсәле бинә.

¹⁵ Гәло әм дькарьн жь сәрһатийа Паԝлосе шанди чь һин бьн? Щарна гава әм дьхԝазьн щабдарик бьстиньн, дьбәкә һьнә дәрәщә рʹийа мә бьгьрьн (Ԝаиз 9:11). Һәгәр ӧса бә, һазьр бә кӧ хԝәрʹа нетәкә дьн дайни. Жьн-мерәки бь наве Һиде у Тед ӧса кьрьн. Йәк жь ԝан нәхԝәш кʹәт у лазьм бу ԝәки әԝана жь Бәйтʹәле һәрʹьн. Ле чьмки ԝана Йаһоԝа һʹьз дькьр, ԝана мәщалед дьн дьгәрʹийа, кӧ хьзмәта хԝә зедә кьн. Пешийе, әԝана бунә пешәнгед һәртʹьм. Ԝәхт шунда, әԝана ча пешәнгед мәхсус һатьнә кʹьфшкьрьне, у Тед һатә һинкьрьне, ԝәки ча аликʹаре бәрпьрсийаре мьһале хьзмәт кә. Паше тʹәшкиләтеда гӧһастьн һатә кьрьне, у әԝи жь бо әʹмьре хԝәйи мәзьн нькарьбу ча бәрпьрсийаре мьһале хьзмәт кә. Рʹаст ә Һиде у Тед гәләк хәмгин бун, ле ԝана фәʹм кьр кӧ әԝана дькарьн бь щурʹед дьн Йаһоԝарʹа хьзмәт бькьн. Тед дьбежә: «Әм ида һин бунә кӧ гәрәке әм дина хԝә нәдьн тʹәне сәр щурʹәки хьзмәте».

16. Әм дькарьн жь Галати 6:4 чь дәрс һин бьн?

¹⁶ Жийина мәда һьнә тьшт дәсте мәда нинә. Ләма жи гәрәке әм бир нәкьн кӧ ԛимәта мә щабдарийед мәва гьредайи нинә, у гәрәке әм щабдарийед хԝә бәрамбәри щабдарийед кәсед дьн нәкьн. Һиде дьбежә: «Һәгәр тӧ жийина хԝә бәрамбәри жийина кәсед дьн бьки, тӧйе дьлрʹьһʹәтийе ӧнда ки» (Галати 6:4 бьхунә). Дәԝса кӧ әм хԝә бәрамбәри кәсәки бькьн, гәрәке әм бьфькьрьн кӧ әм чаԝа дькарьн Йаһоԝарʹа хьзмәт кьн у али кәсед дьн бькьн. *

17. Тӧ чаԝа дькари хԝә бона щабдарийед тʹәзә һазьр ки?

¹⁷ Сәва кӧ тӧ һазьр би ԝәки щабдарийед тʹәзә бьстини, жийина хԝә сьвьк кә у бона тьштед нә лазьм бадиһәԝа нәкʹәвә бьн дәйна. Хԝәрʹа нетед бьчʹук дайнә, йед кӧ ԝе али тә бькьн кӧ бьгьһижи нетед хԝәйә мәзьн. Мәсәлә, һәгәр нета тә әв ә кӧ бьби пешәнге һәртʹьм, пешийе тӧ дькари дәстпеки һәр мәһ ча пешәнге  ԝәʹдәлу хьзмәт ки. Һәгәр нета тә әв ә кӧ бьби бәрдәстийе щьвате, ԝе баш бә ԝәки тӧ бона бәлакьрьна мьзгине йан бона тʹәсәликьрьна хушк-бьред нәхԝәш у әʹмьрда мәзьн, дьһа зедә ԝәʹдә вәԛәтини. Әв йәк ԝе рʹе тәрʹа вәкә кӧ тӧ рʹожәке щабдарийед тʹәзә бьстини. Тӧ чь щабдари жи бьстини, бь дьл у щан бинә сери (Рʹомайи 12:11).

18. Тӧ жь сәрһатийа Беверлийе чь һин дьби? (Дина хԝә бьдә шькьл.)

¹⁸ Кәсед кӧ ида щаһьл ниньн жи, дькарьн хԝәрʹа нета дайньн у бьгьһижьн ван нета. Һәла дина хԝә бьдә сәрһатийа хушкәкә бь наве Беверли, йа кӧ ида 75 сали йә. Рʹуйе нәхԝәшикә гьранда, әԝ нькарьбу рʹе һәрʹә. Ле диса жи, әԝе дьхԝәст пьштгьрийа кампанийа бона Биранине бькә. Ләма жи әԝе һьнә нет дани пешийа хԝә. Гава Беверли гьһиштә нетед хԝә, әԝ гәләк ша бу. Хирәта ԝе кәсед дьн жи һелан кьр, ԝәки мьзгине бь дьл у щан бәла кьн. Бәле, һәгәр сьһʹәт-ԛәԝата хушк-бьред мәйә әʹмьрда мәзьн ида нә мина йа бәре бә жи, Йаһоԝа диса жи хьзмәта ԝан ԛимәт дькә (Зәбур 71:17, 18).

19. Ԝе баш бә кӧ әм хԝәрʹа чь нета дайньн?

¹⁹ Хԝәрʹа нетед ӧса дайнә кӧ ԛәԝата тә дьгьһиже. Һʹӧнӧред баш нав хԝәда пешда бинә у бь ви щурʹәйи дьле Йаһоԝа ша кә. Тьштед тʹәзә һин бә у фәрәсәтед хԝә зедә кә, ԝәки тӧ бькарьби бона Хԝәде у бона тʹәшкиләта ԝи, һе зедә керһати би. Мәщала бьгәрʹә ԝәки дьһа зедә али хушк-бьра бьки. * Мина Тимотʹейо, бьра Йаһоԝа али тә бькә, ԝәки «пешдачуйина тә һʹәмуйава әʹйан бә» (1 Тимотʹейо 4:15).