1. Ni bilhubirirwa byahi eby’obunyakirimu ebyo thwanga hiraho?

 ITHWE ng’Abakristayo b’okwenene, thwanzire Yehova ya kutsibu. Thwanzire ithwakolera Yehova n’omuthima wethu wosi. Aliwe erikolera Yehova ngoku thwanga thoka, thutholere ithwahiraho ebilhubirirwa by’obunyakirimu, ng’erikulha-kulhania emibere y’Ekikristayo, erigha erikolha ebyanga wathikya, n’erisondekania esyonzira sy’erikoleramu abandi. *

2. Busana naki thutholere ithwahiraho ebilhubirirwa by’obunyakirimu n’erikolha kutsibu eribihikako?

² Busana naki thutholere ithwanza erikulha-kulhana bunyakirimu? Kutsibu-tsibu, thwanzire eritsemesya Thatha wethu w’olhwanzo ow’elhubulha. Yehova akatsema thukakolesya omwa buswire ebihembo n’amaaka wethu omwa mubiiri wiwe. Eryongera okw’ekyo, thwanzire erikulha-kulhana bunyakirimu nuku thwongere eriwathikya balikyethu. (1 Tes. 4:9, 10) Mbulha thwamaghunza omwa kwenene mw’emyaka mingahi, ithwe bosi thwangana kulha-kulhana bunyakirimu. Thulebaye ngoku thwanga kolha ekyo.

3. Ngoku kiri omu 1 Timoteo 4:12-16, omukwenda Paulo mwahira omu Timoteo mw’omuhwa w’erikolhaki?

³ Omukwenda Paulo abere akahandikira Timoteo y’ebaruha yiwe y’erimbere, omulhwana mubuya oyu abya iniabiribya musyakulhu w’ekithunga oyuwasi bingyi. Nomwabine, Paulo mwamuhira mw’omuhwa w’erilholha embere erikulha-kulhana  bunyakirimu. (Soma 1 Timoteo 4:12-16.) Wukendibya wune mulengekania okwa binywe bya Paulo, wukendi lhangira ngoku aby’anzire Timoteo iniakulha-kulhana omwa nzira ibiri: omw’ikulha-kulhania emibere y’Ekikristayo ng’olhwanzo, erikirirya, n’omuthima athe kw’ebibi n’omw’iwania emibere yiwe y’erisomera abandu, erihana n’erikangirirya. Thun’ibukire eky’erileberyako kya Timoteo, thulebaye erihiraho ebilhubirirwa ebyo thwanga thoka nga kyanga thuwathikya kithi erikulha-kulhana bunyakirimu. Kandi thukendi kania okwa syonzira ndebe esyo thwanga kanyiriryamu omubiiri wethu.

4. Ngoku kiri omwa Abanya Filipi 2:19-22, ni kyahi ekyaleka Timoteo iniabya w’omughaso embere sya Yehova?

⁴ Ni kyahi ekyaleka Timoteo iniabya w’omughaso embere sya Yehova? Emibere yiwe eyuwene ey’Ekikristayo. (Soma Abanya Filipi 2:19-22.) Erikwamana n’ebya Paulo abugha oku Timoteo, thwangana lhangira ngoku Timoteo aby’ayikehirye, muthaleghulha, ow’omuhwa, kandi muyiketherwa. Aby’awithe olhwanzo kandi iniatsomene kutsibu balikyabu. Busana n’ekyo, Paulo mwanza Timoteo kandi mwathasagha erimuha esyongwamirwa esirithohire. (1 Kor. 4:17) Kuthya, nethu Yehova iniakendi thwanza kandi ithwabya b’omughaso omwa kithunga thwamakulha-kulhania emibere ey’anzire.​—Esy. 25:9; 138:6.

5. (a) Ni byahi ebya wanga kolha bikahika okw’ihiraho ekilhubirirwa ky’erikulha-kulhania omubere w’Ekikristayo? (b) Ngoku kikanganibwe omwa kisasani, mwali wethu omulere anemukolha kyahi okwa kilhubirirwa kiwe ky’eryongera erilhumirirwa abandi?

⁵ Sombolha ekilhubirirwa kirebe. Omw’isaba lebaya okwa mibere yawu nga ni wahi ogho wutholere iwuwania. Sombolha omubere mughuma ogho wanzire eryuwania. Ng’eky’erileberyako, mbwino wangan’ongera erikulha-kulhania omubere wawu w’erilhumirirwa abandi kutse eriyisunza lyawu ery’eriwathikya abaramya balikyenyu? Mbwino wukayithagha eryongera eribya w’obuholho n’oyukaghanyira? Kyanganabya kibuya erisaba munywani wawu omuyiketherwa y’amenge w’erikolha esyombinduka.​—Emi. 27:6.

6. Wanga kolhaki erihika okwa kilhubirirwa kyawu ky’erikulha-kulhania omubere mulebe?

⁶ Yira eky’erikolha erihika okwa kilhubirirwa kyawu. Ekyo wanga kikolha wuthi? Enzira nguma ly’eriyeghesya ndeke okwa mubere ogho wanzire eryuwania. Thubughe thuthi iwanza eryongera eribya oyukaghanyira  abandi. Iwanganatsuka omw’isoma n’erighanirya okwa by’erileberyako eby’omwa Biblia eby’abaghanyira abandi erilhua okwa muthima n’abathakolha ekyo. Lengekanaya okwa ky’erileberyako kya Yesu. Iniakaghanyira abandi erilhua okwa muthima. (Lk. 7:47, 48) Kandi iniakakyurukaya ebisobyo byabu by’ameso, iniahiragho okwa bya bangathoka. Aliwe Abafarisayo b’omwa biro bya Yesu ibo “ibakapona abandi.” (Lk. 18:9) Wukendibya wabirighanirya okwa by’erileberyako ebi, yibulhaye: ‘Ni kyahi ekya ngalhangira omwa bandi? Okwa mibere yabu, ni yahi eya nga thwamu erihirako amalengekania?’ Kyamabya ikyabirikukalira erighanyira omundu mulebe, lengaho erihandika emibere mingyi eyuwene ey’omundu oyo eya wang’ibuka. Neryo yibulhaye: ‘Yesu akalhangira athi omundu oyu? Angana mughanyira?’ Eriyeghesya ng’eryo lyangana thuwathikya erihengulha amalengekania wethu. Okw’itsuka, kyangana thuyithaghisya erihiraho akaghalha erighanyira omundu oyuwabirithuhithania. Aliwe thwamalholha embere eryuwania emyatsi, endambi iyikendi hika ithwanza erimughanyira.

7. Yehova anemukolesya athi abakoli abasi erikolha ndeke munabwire? (Emisyo 22:29)

⁷ Ekindi kilhubirirwa ekya wanga hiraho ly’erigha erikolha ekyanga wathikya. Thalengekania okwa bakoli bangyi abakayithaghisibawa erihimba esyo Beteli, ebyumba by’olhuhindano, n’Ebisenge by’Obwami. Abangyi b’okwa bakoli aba bak’igha ebyanga wathikya omw’ikolha haghuma n’abalikyethu abasi bingyi. Ngoku kikanganibwe omwa kisasani, balikyethu banemw’igha emibiiri eyanga wathikya eyikayithaghisibawa eriwathikya okw’isugha ebyumba by’olhuhindano n’Ebisenge by’Obwami. Omwa nzira esi n’esindi, Yehova Nyamuhanga, ‘Omwami w’Erikotha,’ na Kristo Yesu, ‘Omwami w’abami,’ banemuberererya ebindu bingyi erilhabira omwa bakoli abasi bingyi. (1 Tim. 1:17; 6:15; soma Emisyo 22:29.) Thwanzire ithwakolha kutsibu n’erikolesya ebya thwasi eriha Yehova y’olhukengerwa, butsira eriyihalho.​—Yn. 8:54.

8. Wanga kolhaki bikahika okw’ihiraho ekilhubirirwa ky’erigha erikolha kindu kirebe?

⁸ Sombolha ekilhubirirwa kirebe. Ni kyahi ekyo wanzire erigha erikolha? Bulhaya abasyakulhu b’ekithunga kutse obundi omulebererya w’omuthimbo nga ni kyahi ekyo bakalengekanaya bathi wangana kulha-kulhania. Ng’eky’erileberyako, bamabugha bathi wuwanaye emibere yawu y’erikania n’erikangirirya, basabe wuthi bakuwathikaye eriminya omubere mulebe w’erikania ogho wutholere erikolhako. Neryo hiraho akaghalha erighendera okwa menge agho wamahebwa. Eki kyanga kolhwa kithi?

9. Wanga kolhaki erihika okwa kilhubirirwa kyawu ky’erigha erikolha kindu kirebe?

⁹ Yira eky’erikolha erihika okwa kilhubirirwa kyawu. Thubughe thuthi wanzire eryuwania amaaka wawu w’erikangirirya. Iwangana yeghesya ndeke ebrokyuwa Wuyihire okw’Isoma n’Erikangirirya. Wamahebwa ekitsweka omwa mihindano y’ahakathi-kathi k’eyenga, iwangana saba mughalha wethu oyutholere wuthi akuhulikirire wukakilhabya n’erikuwathikya eriminya aho wang’uwania. Isiwasubulira okw’iminywa ng’oyuwasi erikolha ndeke aliwe kandi wutholere iwabya w’omuhwa kandi muyiketherwa.​—Emi. 21:5; 2 Kor. 8:22.

10. Iha eky’erileberyako ekikakanganaya ngoku thwanga kulha-kulhana omw’igha erikolha kindu kirebe.

¹⁰ Kandi ibbwa ekya wanzire erigha erikolha kyamabya ikiri mw’erikolha ebyo wuthasi? Isiwabikyako! Mughalha wethu oyukahulhawamo Garry isyasi erisoma ndeke. Akibuka ngoku aby’akakwa esisoni akalengesya erisoma omwa  mulenge owakowika okwa mihindano. Aliwe mwalholha embere eryuwania emisomere yiwe. Lino akabugha athi busana n’erithendekwa eryo athunga, abirithoka erilhabya emikania okwa Kisenge ky’Obwami, okwa mihindano y’omuthimbo, n’okwa y’erijoni!

11. Nga Timoteo, ni kyahi ekikendi thuwathikya eryongerwa esyongwamirwa?

¹¹ Mbwino Timoteo mwanabya mbuyi kutse mukangirirya mubuya? E Biblia siyiri bugha. Aliwe ahathe erithika-thika Timoteo mwongera erikolha ndeke esyongwamirwa siwe akaghendera okw’ihabulha lya Paulo. (2 Tim. 3:10) Kuthya, thwam’igha erikolha ekindu kirebe, ithukendi tholera erihebwa esindi ngwamirwa.

12. Wabirighasirwa wuthi omwa by’abandi bakakolha?

¹² Ithwe bosi thukaghasirawa omwa by’abandi bakakolha. Omughulhu thuli okwa sipatara, thukatsema abasyakulhu abali okwa Hithunga Ehikakolongana n’Amathambiriro kutse Ehikabalhamira Abalhwere bakathubungira. Omughulhu thuli omwa mibere eyikalire, thukasima omusyakulhu oyutsomene akahiraho obuthuku bw’erithuhulikirira n’erithuhumulikania. Omughulhu thukayithagha obuwathikya bw’erisondolha omwigha, thukatsema omutemburi oyuwasi bingyi akaligha erighenda nethu okwa mwigha n’erithuha okwa menge. Balikyethu abosi aba bakatsema bakathuwathikya. Thwangana bana etseme eyo thwamayihayo erikolera balikyethu. Yesu mwabugha athi: “Erihithya likaletha obutseme kwilhaba erihebwa.” (Emib. 20:35) Wamabya wanzire erikanyirirya omubiiri wawu omwa syonzira esi kutse esindi, ni kyahi ekikendi kuwathikya erihika okwa bilhubirirwa byawu?

13. Wukayihiriraho ekilhubirirwa kirebe, ni kyahi ekya wutholere iwabya iwun’ibukire?

¹³ Yitheghaye okw’ihiraho ekilhubirirwa ekithalhangirikire ndeke nga ni kyahi. Ng’eky’erileberyako, iwangana bugha wuthi, ‘Nganzire ingakolha bingyi omwa kithunga.’ Aliwe kyangana kalha eriminya ngoku wanga hika okwa kilhubirirwa ng’ekyo, kandi iwangana ghana erisyaminya nga wakihikako mughulhu wahi. Kwesi sombolha ekilhubirirwa kirebe ekilhangirikire ndeke. Nibya iwangana handika ekilhubirirwa kandi ngoku wukathegheka erikihikako.

14. Busana naki thutholere ithwaghenda-ghendania n’emibere eyiriho bikahika okw’ihiraho ebilhubirirwa?

 ¹⁴ Kandi thutholere ithwabya ithwangana ghenda-ghendania n’emibere eyiriho bikahika okw’ihiraho ebilhubirirwa. Busana naki? Kundi hanganayira ithwabya isithuwithe ekya thwanga kolha okwa mibere eya thulimu. Ng’eky’erileberyako: Omukwenda Paulo abya iniabiriwathikya okw’itsukisya ekithunga kihyaka omwa tawuni ye Tesalonika. Ahathe erithika-thika, aby’awithe ekilhubirirwa ky’eribyayo n’eriwathikya Abakristayo abahyaka abo. Aliwe abahakani mubaleka Paulo iniabya w’erilhua omwa tawuni eyo. (Emib. 17:1-5, 10) Paulo kwathalhuayo, angahirire engebe y’abalikyabu y’omwa kabi. Aliwe mwathaleka eribawathikya. Omwakanya k’ekyo, mwaghenda-ghendania n’emibere emihyaka eyabyaho. Enyuma waho, Paulo mwathuma Timoteo eriyawathikya bunyakirimu Abakristayo bahyaka abe Tesalonika. (1 Tes. 3:1-3) Abanya Tesalonika batholere eribya imubatsema kundi Timoteo abya inianayitheghekire erikolera ehosi-hosi eyo akayithayisibawa!

15. Emibere eyathuthawitheko ekya thwanga kolha yanga hamba yithi okwa bilhubirirwa byethu? Iha eky’erileberyako.

¹⁵ Thwangan’ighira okwa kyalholirweko kya Paulo iniane Tesalonika. Thwanganabya ithunemusimbirira olhusunzo lhulebe, aliwe ihabanika emibere eyathuthawitheko ekya thwanga kolha neryo iyathukakirya okw’ihebwalho. (Omu. 9:11) Kyamabya ikwakiri kithya, ibya iwunayitheghekire erihiraho ekindi kilhubirirwa ekyo wangana hikako. Eki kya Ted na Hiedi abathahenie bakolha. Busana n’omughuma w’okw’ibo erilhwalha mubabya b’erilhua okwa Beteli. Aliwe olhwanzo olho bawithire Yehova mulhwaleka ibasondekania esindi nzira sy’erikanyiriryamu erithulira lyabu. Okw’itsuka, mubakolha obutemburi bw’omughulhu wosi. Endambi muyahika, bamasombolhwa ng’abatemburi b’embaghane, na Ted amathendekwa ng’omulebererya omuwathikya. Neryo muhabya embinduka omwa myaka y’erilekerako obulebererya. Ted na Hiedi mubaminya ngoku sibanga thasyakolha olhukwamirwa olhu. Nomwakine indi mubayiponera, mubaminya ngoku bangana kolera Yehova omwa sindi nzira. Ted akabugha athi, “Thwabirigha erithendihira amalengekania w’okwa mubiiri mughuma.”

16. N’isomo lyahi eryo thwang’igha omwa Abanya Galatia 6:4?

¹⁶ Sithwanga kakirya obuli kindu ekyanga thuhikako omwa ngebe. Neryo kwesi, sithutholere thukayowa thuthi thuli b’obughuli busana n’esyonzunzo esyo thuwithe kutse erilinganisya esyonzunzo syethu n’esy’abandi. Hiedi akabugha athi, “Wamalinganisya engebe yawu n’ey’abandi, obuholho bukakuhwako.” (Soma Abanya Galatia 6:4.) Ni kikulhu erisondekania  esyonzira esyo thwangaberamo b’omughaso. *

17. Wanga kolhaki eritholera erihebwa esyonzunzo?

¹⁷ Ibya iwunayitheghekire erikolha obuli lhusunzo omwolhobya engebe yawu n’eriyihighulha okwa mabanza awathatholere. Hiraho ebilhubirirwa by’obuthuku buke ebikendi kuwathikya erihika okwa by’obuthuku buuli. Ng’eky’erileberyako, wamabya iwuwithe ekilhubirirwa eky’eribya mutemburi w’omughulhu wosi, mbwino lino si wangabya iwune mukolha ng’omutemburi omuwathikya ow’obuthuku buuli? Wamabya iwuwithe ekilhubirirwa ky’eribya mughombe omuwathikya, mbwino si wang’ongera obuthuku obwa wukaghunza omw’ithulira n’eribungira abalhwere n’abakulire abali omwa kithunga kyenyu? Ebya wukend’igha lino ibikendi kukyungulira olhukyo lhw’erisyahebwa esindi nzunzo. Ithwamu erikolha ndeke olhukwamirwa lhwosi-lhwosi olhwa wukahebawa.​—Abar. 12:11.

18. Wam’ighaki okwa ky’erileberyako kya Beverley? (Lebaya n’ekisasani.)

¹⁸ Sithukulire okw’ihiraho ebilhubirirwa by’obunyakirimu n’eribihikako. Lengekanaya okwa ky’erileberyako kya mwali wethu ow’emyaka 75 oyukahulhawamo Beverley. Awithe ebitsibu by’amaghalha ebikaleka ikyamukalira erighenda. Aliwe mwanza erisangira kutsibu omw’ithererera ly’omwa buthuku bw’Eryibuka. Neryo mwayihiriraho ebilhubirirwa birebe. Beverley abere abirihika okwa bilhubirirwa biwe by’erisangira omw’ithererera, mwatsema kutsibu. Akaghalha kiwe mukahira omwa bandi mw’omuhwa w’erisangira kutsibu omw’ithulira. Yehova akalhangira omubiiri ogho balikyethu abakulire bakakolha mwa w’obughuli nomwakine indi emibere eyo balimu yangana balemesya erikolha bingyi.​—Esy. 71:17, 18.

19. Ni bilhubirirwa nga byahi eby’obunyakirimu ebya thwanga hiraho?

¹⁹ Hiraho ebilhubirirwa ebya wanga hikako. Kulha-kulhanaya emibere eyikendi leka iwatsemesya Yehova. Igha erikolha ebikendi leka iwongera eribya w’omughaso embere sya Nyamuhanga n’ekithunga kiwe. Sondekanaya esyonzira esy’erikoleramu balikyethu omwa buswire. * Nga Timoteo, busana n’obuwathikya bwa Yehova “erilholya embere lyawu liminyikale okwa bosi.”​—1 Tim. 4:15.