1. Uskayn gol dɛn wi go ebul fɔ sɛt na Jiova in savis?

 AS TRU Kristian dɛn, wi rili lɛk Jiova. Wi want fɔ du wi bɛst na in savis. Bɔt fɔ lɛ wi du ɔl wetin wi ebul du fɔ Jiova, wi nid fɔ sɛt gol dɛn lɛk fɔ gɛt Kristian kwaliti dɛn, fɔ lan fɔ du fayn tin dɛn, ɛn fɔ luk fɔ we dɛn fɔ ɛp ɔda pipul dɛn. *

2. Wetin mek wi fɔ sɛt gol dɛn na Jiova in savis ɛn tray tranga wan fɔ rich dɛn?

² Wetin mek wi fɔ gladi fɔ du mɔ na Jiova in savis? Di men rizin na bikɔs wi want fɔ mek wi Papa we de na ɛvin ɛn we rili lɛk wi, gladi. Jiova kin gladi we i de si wi de yuz tin dɛn we wi sabi du fɔ du mɔ na in savis. Pantap dat, wi want fɔ de tray fɔ du mɔ na Jiova in savis so dat wi go ebul fɔ ɛp wi brɔda ɛn sista dɛn mɔ ɛn mɔ. (1 Tɛs. 4:​9, 10) I nɔ mata aw lɔng wi dɔn de na di trut, wi ɔl kin ebul fɔ du mɔ na Jiova in savis. Lɛ wi si aw wi go ebul fɔ du dat.

3. Akɔdin to 1 Timoti 4:​12-16, wetin apɔsul Pɔl bin ɛnkɔrej Timoti fɔ du?

³ Pan ɔl we Timoti na bin yɔŋman di tɛm we apɔsul Pɔl bin rayt in fɔs lɛta to am, Timoti bin ɔlrɛdi dɔn bi ɛlda fɔ sɔm tɛm. Bɔt stil, Pɔl bin ɛnkɔrej am fɔ kɔntinyu fɔ du mɔ na Jiova in savis. (Rid 1 Timoti 4:​12-16.) As yu de tink gud wan bɔt Pɔl in wɔd dɛn, yu go kam fɔ no se i bin want Timoti fɔ du mɔ na tu say  dɛn: wan na fɔ gɛt Kristian kwaliti dɛn lɛk lɔv, fet, ɛn fɔ liv klin layf, ɛn tu na fɔ du mɔ fɔ de rid na pɔblik, fɔ ɛnkɔrej ɔda pipul dɛn, ɛn fɔ tich. Wi de kam tɔk bɔt Timoti in ɛgzampul fɔ si aw wi go du mɔ na Jiova in savis we wi sɛt gol dɛn we wi go ebul fɔ rich. Wi go tɔk bak bɔt sɔm we dɛn aw wi go ebul fɔ du mɔ na wi prichin wok.

4. Akɔdin to Filipians 2:​19-22, wetin mek Jiova bin valyu Timoti?

⁴ Wetin mek Jiova bin valyu Timoti? Na bikɔs ɔf in fayn Kristian kwaliti dɛn. (Rid Filipians 2:​19-22.) Frɔm wetin Pɔl bin tɔk bɔt Timoti, wi kin si se i bin ɔmbul, i nɔ de kɔmɔt biɛn pɔsin, i de du tin fayn, ɛn na pɔsin we dɛn kin abop pan. In na pɔsin we bin lɛk ɛn rili bisin bɔt in brɔda dɛn. Bikɔs ɔf dat, Pɔl bin lɛk Timoti, ɛn i nɔ fred fɔ gi am wok dɛn we at fɔ du. (1 Kɔr. 4:​17) Semweso, Jiova go lɛk wi ɛn wi go ebul fɔ du mɔ wok dɛn na di kɔngrigeshɔn we wi tray fɔ gɛt kwaliti dɛn we i lɛk.—Sam 25:​9; 138:​6.

5. (a) Aw yu go ebul disayd us Kristian kwaliti yu want fɔ gɛt? (b) Akɔdin to wetin de na di pikchɔ, aw di yɔŋ sista de tray tranga wan fɔ sho se i de fil fɔ ɔda pipul dɛn?

⁵ Pik wan patikyula gol we yu want fɔ rich. Pre ɛn tink gud wan bɔt uswan pan yu abit dɛn yu go nid fɔ ajɔst. Pik wan patikyula kwaliti we yu go want fɔ pe atɛnshɔn pan. Fɔ ɛgzampul, yu kin disayd se yu nid fɔ lan fɔ fil fɔ ɔda pipul dɛn ɔ fɔ gladi fɔ ɛp yu brɔda ɛn sista dɛn mɔ ɛn mɔ. Yu tink se yu nid fɔ bi pɔsin we de mek pis ɛn we de fɔgiv mɔ ɛn mɔ? I go fayn if yu aks yu tayt padi fɔ ɛp yu fɔ si aw yu go ebul fɔ du mɔ.—Prɔv. 27:​6.

6. Aw yu go ebul wok fɔ rich yu gol fɔ gɛt wan kwaliti?

⁶ Wok fɔ rich yu gol. Aw yu go du dat? Wan we na bay we yu tek tɛm stɔdi di kwaliti we yu want fɔ gɛt mɔ ɛn mɔ. Lɛ wi se yu disayd fɔ bi pɔsin we de fɔgiv ɔda pipul dɛn mɔ. Yu kin stat bay we yu de rid ɛn tink gud wan bɔt pipul dɛn na di Baybul we bin de fɔgiv ɔda pipul dɛn fɔ fri ɛn di wan dɛn we nɔ bin de fɔgiv. Tink bɔt Jizɔs in ɛgzampul. I bin de  gri fɔ fɔgiv ɔda pipul dɛn. (Lyuk 7:​47, 48) Ɛn bak, i nɔ bin de pe atɛnshɔn pan dɛn mistek dɛn, bɔt i bin de pe atɛnshɔn pan wetin dɛn ebul fɔ du. Bɔt di Faresi dɛn insay Jizɔs in tɛm bin de “tink se . . . ɔda pipul dɛn na natin.” (Lyuk 18:​9) We yu dɔn tink gud wan bɔt dɛn ɛgzampul dɛn ya, aks yusɛf: ‘Wetin a de si pan ɔda pipul dɛn? Uswan pan dɛn kwaliti dɛn a go want fɔ pe atɛnshɔn pan?’ If i nɔ izi fɔ lɛ yu fɔgiv pɔsin, tray fɔ rayt ɔl in gud kwaliti dɛn we yu sabi. Dɔn aks yusɛf: ‘Aw Jizɔs de si dis pɔsin? I go fɔgiv am?’ We wi stɔdi dis kayn we, i go ɛp wi fɔ ajɔst di we aw wi de tink. Fɔs, sɔntɛm wi go nid fɔ wok tranga wan fɔ fɔgiv pɔsin we dɔn du wi bad. Bɔt if wi kɔntinyu fɔ tray, wi go ebul fɔ bi pɔsin we de gri fɔ fɔgiv.

7. Akɔdin to Prɔvabs 22:​29 (NWT), aw Jiova de yuz pipul dɛn we sabi wok tide?

⁷ Ɔda gol we yu kin sɛt na fɔ lan fɔ du fayn tin. Tink bɔt di bɔku pipul dɛn we dɛn nid fɔ bil Branch Ɔfis dɛn, Asɛmbli Ɔl dɛn, ɛn Kiŋdɔm Ɔl dɛn. Bɔku pan dɛn lan fɔ du dɛn tin dɛn ya bay we dɛn wok wit brɔda ɛn sista dɛn we rili sabi du di wok. Akɔdin to wetin de na di pikchɔ, brɔda ɛn sista dɛn de lan fɔ du tin dɛn we go mek dɛn ebul ɛp fɔ kia fɔ Asɛmbli Ɔl ɛn Kiŋdɔm Ɔl dɛn. Dɛn wok dɛn ya ɛn ɔda wan dɛn de mek Jiova Gɔd we na “di Kiŋ we bin dɔn de ɛn we go de sote go,” ɛn Krays Jizɔs we na di ‘Kiŋ fɔ kiŋ dɛn,’ ebul fɔ yuz pipul dɛn we sabi du fayn fayn wok fɔ du bɔku wɔndaful tin dɛn. (1 Tim. 1:​17; 6:​15; rid Prɔvabs 22:​29, NWT.) Wi want fɔ wok tranga wan ɛn yuz ɔl wetin wi sabi du fɔ prez Jiova, nɔto wisɛf.—Jɔn 8:​54.

8. Aw yu go ebul disayd wetin yu nid fɔ lan?

⁸ Pik wan patikyula gol we yu want fɔ rich. Wetin yu go want fɔ lan? Aks yu ɛlda dɛn na yu kɔngrigeshɔn ɛn sɔntɛm yu sakit ovasia bɔt wetin dɛn tink se yu go ebul fɔ lan. Lɛ wi se fɔ ɛgzampul, dɛn tɛl yu se i go fayn fɔ lɛ yu lan aw fɔ tɔk ɛn tich mɔ. Yu kin aks dɛn fɔ ɛp yu fɔ no us patikyula spich kwaliti yu nid fɔ du mɔ pan. Dɔn tray tranga wan fɔ du am fayn fayn wan. Aw yu go ebul fɔ du dis?

9. Aw yu go ebul wok fɔ rich yu gol we na fɔ lan aw fɔ du sɔntin?

⁹ Wok fɔ rich yu gol. Lɛ wi se yu want fɔ tray fɔ bi pɔsin we sabi tich fayn fayn wan. Wan tin we yu kin du na fɔ tek tɛm stɔdi di brosho we nem Kɔntinyu fɔ Rid ɛn Tich. We dɛn gi yu pat na di mitin we wi kin gɛt insay di wik, yu kin aks wan kwalifay brɔda fɔ lisin to yu pat bifo tɛm ɛn gi yu advays bɔt say we yu nid fɔ du mɔ. Pripia fɔ yu pat dɛn bifo tɛm so dat pipul dɛn go si se yu de wok tranga wan ɛn dɛn go abop pan yu.—Prɔv. 21:​5; 2 Kɔr. 8:​22.

10. Gi wan ɛgzampul bɔt aw fɔ go bifo we yu de lan sɔntin.

¹⁰ Wetin yu go du if yu gol na fɔ sabi du sɔntin we nɔ izi fɔ yu fɔ du? Nɔ giv-ɔp! Wan brɔda we nem Gari nɔ bin ebul rid fayn. I mɛmba se i bin shem we i bin tray fɔ rid lawd wan na mitin. Bɔt i bin kɔntinyu fɔ tray mɔ ɛn mɔ.  Naw i tɔk se bikɔs ɔf di trenin we i bin gɛt, dat dɔn ɛp am fɔ ebul gi tɔk dɛn na Kiŋdɔm Ɔl, na sakit asɛmbli dɛn, ɛn na kɔnvɛnshɔn dɛn.

11. Lɛk Timoti, wetin go ɛp wi fɔ du mɔ na Jiova in savis?

¹¹ Fɔ se Timoti bin bi pɔsin we rili sabi tɔk ɛn tich? Di Baybul nɔ tɛl wi. Bɔt wan dawt nɔ de se Timoti bin kɔntinyu fɔ go bifo pan in wok bikɔs i fala Pɔl in advays. (2 Tim. 3:​10) Lɛk Timoti, wi go ebul fɔ du mɔ na Jiova in savis if wi lan fɔ du tin dɛn.

12. Aw yu dɔn bɛnifit frɔm di ɛp we ɔda pipul dɛn ɛp yu?

¹² Wi ɔl kin bɛnifit we ɔda pipul dɛn ɛp wi. We wi de na ɔspitul, wi kin gladi we ɛlda dɛn we de sav na di Hospital Liaison Committee ɔ di Patient Visitation Group kam fɛn wi. We wi gɛt prɔblɛm na wi layf, wi kin gladi we ɛlda we bisin bɔt wi de lisin to wi ɛn kɔrej wi. We wi nid ɛp wit wi Baybul stɔdi, wi kin gladi we payɔnia we gɛt ɛkspiriɛns kin jɔyn wi pan wi Baybul stɔdi ɛn gi wi advays. Ɔl dɛn brɔda ɛn sista dɛn ya kin gladi fɔ ɛp wi. Wisɛf go gɛt dis sem gladi-at we wi rɛdi wisɛf fɔ ɛp wi brɔda ɛn sista dɛn. Jizɔs bin tɔk se: “We pɔsin gi, i de gladi mɔ pas we dɛn gi am.” (Akt 20:​35) Wetin go ɛp yu if yu want fɔ du mɔ fɔ Jiova dɛn we dɛn de ɔ ɔda we dɛn?

13. We wi de sɛt gol, wetin wi fɔ mɛmba?

¹³ Nɔ sɛt gol we tu jɛnɛral. Fɔ ɛgzampul, sɔntɛm yu go tink se, ‘A go lɛk fɔ du mɔ na di kɔngrigeshɔn.’ Bɔt sɔntɛm i nɔ go izi fɔ no aw fɔ rich da kayn gol de, ɛn sɔntɛm i nɔ go pɔsibul fɔ no ustɛm yu go rich am. So pik wan patikyula gol. Yu kin ivin rayt di gol ɛn aw yu plan fɔ rich am.

14. Wetin mek wi nid fɔ rɛdi fɔ ajɔst we wi de sɛt gol dɛn?

¹⁴ Wi nid bak fɔ rɛdi fɔ ajɔst we wi de sɛt gol dɛn. Wetin mek? Na bikɔs wi nɔ ebul fɔ kɔntrol ɔl wetin de apin to wi. Fɔ ɛgzampul: Apɔsul Pɔl bin ɛp fɔ stat wan nyu kɔngrigeshɔn na Tɛsalonayka. Ɛn wan dawt nɔ de se in gol na bin fɔ de de ɛn kɔntinyu fɔ ɛp di nyu Kristian  dɛn. Bɔt di pipul dɛn we bin de agens Pɔl bin mek i lɛf di siti. (Akt 17:​1-5, 10) If Pɔl fɔ dɔn kɔntinyu fɔ de de, i bin fɔ dɔn put in brɔda ɛn sista dɛn layf pan denja. Bɔt Pɔl nɔ bin giv-ɔp. Bifo dat, i ajɔst to aw tin dɔn chenj. Leta, i bin sɛn Timoti to di nyu Kristian dɛn na Tɛsalonayka fɔ ɛp dɛn fɔ gɛt strɔng fet. (1 Tɛs. 3:​1-3) Di nyu Kristian dɛn na Tɛsalonayka bin rili gladi fɔ gɛt Timoti bikɔs na pɔsin we rɛdi fɔ go ɛnisay dɛn nid am!

15. We tin chenj na wi layf, aw dat kin afɛkt wi gol dɛn? Gi wan ɛgzampul.

¹⁵ Wi kin lan frɔm Pɔl in ɛkspiriɛns na Tɛsalonayka. I go bi se as wi de tray fɔ rich wi gol na wi savis to Jiova, tin kin chenj na wi layf we go stɔp wi fɔ mek wi nɔ rich da gol de. (Ɛkli. 9:​11) If na so i bi fɔ yu, rɛdi fɔ pik ɔda gol we yu go ebul fɔ rich. Na dat wan brɔda ɛn in wɛf we nem Tɛd ɛn Aydi bin du. Bikɔs ɔf wɛlbɔdi prɔblɛm, dɛn bin gɛt fɔ lɛf Bɛtɛl. Bɔt bikɔs dɛn lɛk Jiova, dɛn bin luk fɔ ɔda we dɛn fɔ du mɔ na dɛn prichin wok. Fɔs, dɛn stat fɔ rɛgyula payɔnia. Leta, dɛn kam fɔ bi spɛshal payɔnia, ɛn dɛn bin tren Tɛd fɔ bi sɔbstityut sakit ovasia. We di ej we sakit ovasia dɛn fɔ rich bin chenj, Tɛd ɛn Aydi bin kam fɔ no se dɛn tu ol fɔ kɔntinyu fɔ du di sakit wok. Pan ɔl we dɛn at bin pwɛl, dɛn bin kam fɔ si se dɛn go ebul fɔ sav Jiova ɔda we dɛn. Tɛd se, “Wi dɔn kam fɔ no se nɔto jɔs wangren we de fɔ sav Jiova.”

16. Us lɛsin wi kin lan frɔm Galeshians 6:​4?

¹⁶ Wi nɔ go ebul kɔntrol ɔltin we de apin na wi layf. So i impɔtant fɔ lɛ wi nɔ ɛva tink se na di wok we wi de du na Jiova in savis de sho if Jiova valyu wi ɔ i nɔ valyu wi. Dɔn bak, wi nɔ fɔ kɔmpia wisɛf wit ɔda pipul dɛn we de du wok dɛn we wi nɔ de du. Aydi ɛksplen se, “Yu nɔ go gɛt gladi-at if yu de kɔmpia yu layf wit ɔda pipul dɛn yon.” (Rid Galeshians 6:​4.) I impɔtant fɔ lɛ wi luk fɔ we dɛn fɔ ɛp ɔda pipul dɛn ɛn fɔ sav Jiova. *

17. Wetin yu go du fɔ kwalifay fɔ du mɔ wok na Jiova in savis?

¹⁷ Yu go ebul fɔ du mɔ wok na Jiova in savis if yu de liv simpul layf ɛn yu nɔ de tek dɛt we yu nɔ nid. Sɛt smɔl gol  dɛn we go ɛp yu fɔ rich yu big gol dɛn. Fɔ ɛgzampul, if yu big gol na fɔ bi rɛgyula payɔnia, si if yu go ebul fɔ de ɔgzilari payɔnia ɛni mɔnt rayt naw. If yu gol na fɔ bi ministerial savant, si if yu go ebul fɔ de spɛn mɔ tɛm na fil savis ɛn fɔ go fɛn di wan dɛn we sik ɛn di wan dɛn we dɔn ol na yu kɔngrigeshɔn. Di ɛkspiriɛns we yu de gɛt naw go ɛp yu fɔ gɛt mɔ wok dɛn tumara bambay na Jiova in ɔganayzeshɔn. Mekɔp yu maynd fɔ du yu bɛst pan ɛni wok we dɛn gi yu.—Rom. 12:​11.

18. Akɔdin to di pikchɔ, wetin yu lan frɔm Bɛvali in ɛgzampul?

¹⁸ Ilɛk wi dɔn ol, wi go stil ebul fɔ sɛt ɛn rich gol dɛn na Jiova in savis. Tink bɔt wan 75 ia ol sista we nem Bɛvali in ɛgzampul. I bin gɛt siriɔs wɛlbɔdi prɔblɛm we bin de mek i nɔ izi fɔ lɛ i waka. Bɔt i bin rili want fɔ du mɔ na di Mɛmorial kampen. So i bin sɛt patikyula gol dɛn. We Bɛvali bin rich in gol dɛn fɔ di kampen, i bin rili gladi. In ɛgzampul bin ɛnkɔrej ɔda pipul dɛn fɔ du mɔ na di prichin wok. Jiova de valyu di wok we wi brɔda ɛn sista dɛn we dɔn ol de du, ilɛk i nɔ izi fɔ lɛ dɛn du ɔl wetin dɛn want.—Sam 71:​17, 18.

19. Wetin na sɔm gol dɛn na Jiova in savis we wi go ebul fɔ sɛt?

¹⁹ Sɛt gol dɛn we yu go ebul fɔ rich. Tray fɔ gɛt kwaliti dɛn we go mek Jiova gladi fɔ yu. Lan fɔ du tin dɛn we go mek yu du mɔ fɔ wi Gɔd ɛn in ɔganayzeshɔn. Luk fɔ we dɛn fɔ ɛp yu brɔda ɛn sista dɛn mɔ ɛn mɔ. * Lɛk Timoti, wit Jiova in blɛsin “ɔlman go si klia wan se yu de go bifo pan Gɔd biznɛs.”—1 Tim. 4:​15.