1. Yitambo musinke yopampepo natu vhura kulitulira po?

 NGOVAKRISTE wousili, ose kwa hara unene Jehova. Ose tuna hara ku mu ruganena paapa twa hulira. Nye mokuninka asi tu ruganene Jehova paapa twa hulira, twa hepa kulitulira po yitambo yopampepo ngwendi kutunga po yikara yosikriste, kulironga udivi wongandi ntani kupapara nonkedi omu natu vhura kuvatera wopeke. *

2. Morwasinke natu li tulilira po yitambo yopampepo nokurugana unene yipo tu yi sikise mo?

² Morwasinke natu harera kutura po ezokomeho lyopampepo? Unene po morwa tuna hara kuhafesa Guhyetu geharo gemeguru. Jehova kuhafa apa a tu mono kuna kuruganesa udivi wetu paapa twa hulira mosirugana sendi. Mokugwederera ko, ose tuna hara kutura po ezokomeho lyopampepo yipo tu vatere vanavazinyetu. (1 Tes. 4:9, 10) Yikare asi siruwo sokuhura kupi twa kara mousili, natuvenye kuvhura kutura po ezokomeho lyopampepo. Tuzeni tu ka tare omu natu vhura kuyirugana oyo.

3. Ngomu va yi likida mwa-1 Timoteusa 4:12-16, yisinke mupositoli Paurusa ga korangedere Timoteusa a rugane?

³ Apa mupositoli Paurusa ga tjenge mbilive zendi zokuhova kwaTimoteusa, age Timoteusa opo nare mukuronambunga. Nye nampili ngoso, Paurusa kwa mu korangedere yipo a twikire kutura po ezokomeho lyopampepo. (Resa 1 Timoteusa 4:12-16.) Ngomu ono kuresa nonkango daPaurusa, ove kuvhura o dimburure asi age kwa harerere Timoteusa a ture po ezokomeho lyopampepo  mononkedi mbali: Pokutunga po yikara yoSikriste ngwendi eharo, epuro, ukuhuki ntani pokuwapukurura nkedi zendi zokuresera wopeke, nokurondora ntani nokuronga. Tatu kazogera sihonena saTimoteusa esi nasi ka likida omu kulitulira po yitambo yopampepo nayi tu vatera tu kare vakareli vaJehova wovawa. Natu ka zogera hena nonkedi dimwe omu natu lihameka mo unene mosirugana saJehova.

4. Kuliza noVafilipi 2:19-22, yisinke ya ninkisire Timoteusa a kare mukareli gwaJehova gomuwa?

⁴ Yisinke ya ninkisire Timoteusa a kare mukareli gwaJehova gomuwa? Morwa yikara yendi yoyiwa yoSikriste. (Resa Vafilipi 2:19-22.) Kuliza nononkango edi ga uyungire Paurusa kuhamena Timoteusa, ose ta tu mono nawa-nawa asi Timoteusa kwa kere muntu gokulinunupika, gomulimburukwi, gokurugana unene ntani gokuhuguvara. Age kwa kere neharo ntani nga pakere mbili vapuli vakwawo. Ngoyitundwamo, Paurusa kwa ya here Timoteusa ntani kwa mu pere yitumbukira youdigu. (1 Kol. 4:17) Mokulifana, Jehova nga tu hara nose ntani nga tu ruganesa unene mombungakriste nsene tu tungu po yikara eyi ga hara.—Epis. 25:9; 138:6.

5. (a) Ngapi omu no litulira po sitambo sokutunga po sikara soSikriste? (b) Ngomu vana kuyilikida pefano, ngapi omu munazinyetu gomukadi ana kutura pasirugana sitambo sendi sokulikida nkenda kwava wopeke?

⁵ Horowora sitambo songandi esi ono hara kusikisa mo. Kanderera nokugazadara ko kuhamena nkareso zoge ezi ono hara kuwapukurura. Horowora po sikara simwe esi ono hara kuwapukurura. Pasihonena, nampo kuvhura o tokore kuhamena omu no kara nonkenda zonene ndi omu no kara neharo lyenene lyokuvatera vanavazinyetu. Ndi kuvhura o hetekere ko kukara muntu gombili ntani nokugusira po wopeke. Ntani ove nampo kuvhura kupura kaume koge ogu wa huguvara yipo a ku tantere ko nonkedi dimwe omu no wapukurura nkareso zoge.—Yis. 27:6.

6. Yisinke no rugana yipo o sikise mo sitambo soge sokutunga po sikara songandi?

⁶ Litura mo unene yipo o sikise mo sitambo soge. Ngapi omu noyirugana? Nkedi zimwe kuna kara pokukonakona nawa sikara esi ono hara kuwapukurura. Tu tante asi ove nampo ono hara kutunga po nkareso zokugusira po wopeke. Kuvhura o tameke kuresa nokuteda ko koyihorokwa yavamwe womoBibeli ava va gusilire po vakwawo kutundilira komutjima nava va dilire kugusira po vakwawo.  Gazadara ko kosihonena saJesus. Age nga gusire po wopeke kutundilira komutjima. (Ruk. 7:47, 48) Age kapi nga demenene komapuko gawo, nye nga demenene kweyi ngava vhuru kusikisa mo. Nye Vafalisayi womomazuva gaJesus ngava tara “vakwawo asi kwato mulyo.” (Ruk. 18:9) Ano konyima zokuteda ko koyihonena oyo, lipura nyamoge asi: ‘Yisinke ani mono mwava wopeke? Yikara yawo musinke ani demenene po unene?’ Nsene asi ayo kukudigopera kugusira po gumwe, hetekera ko kutjanga yikara yendi nayinye yoyiwa. Makura lipura nyamoge asi: ‘Ngapi omu Jesus a tara muntu ogo? Kuvhura a mu gusire po ndi?’ Nsene tu yi rugana eyi, ayo kuvhura ngayi tu vatere tu tjindje monkedi omu atu gazara. Pomuhowo, nampo kuvhura ngayi dire kutukarera ureru mokugusira po muntu ogu ga tu zonena. Nye nsene tu twikira kuwapukura nkedi zetu zokugusira po, mwa za siruwo ose ngatu gusira po kutundilira komutjima.

7. Kuliza noYisewe 22:29, mononkedi musinke dimwe omu Jehova ana kuruganesa varugani ava va kara nediwo naina?

⁷ Sitambo simwe esi no vhura hena kulitulira po kuna kara sokulironga udivi wongandi. Gazadara ko tupu asi varugani vangapi ava hepa po mokutunga mavango goBeteli, Yinyanga yoyigongi ntani Yinyanga yoUhompa. Sinzi sovarugani ava kwa gwana udivi pokurugana kumwe novanavazinyetu ava va kara noudivi wounzi wokutunga. Ngomu vana yilikida pefano, vanavazinyetu kuna kulironga udivi ou una hepa po mokupakera mbili Yinyanga yoyigongi ntani Yinyanga yoUhompa. Monkedi ezi ntani nomononkedi dimwe hena dapeke, Jehova ‘Karunga gwanarunye’ ntani naJesus Kristusa “Hompa govahompa” kuna kuruganesa varugani ava va kara nediwo lyenzi yipo va sikise mo yininke yoyinene. (1 Tim. 1:17; 6:15; resa Yisewe 22:29.) Ose tuna hara kurugana unene ntani nokuruganesa udivi wetu mokuyererepekesa ko Jehova nye kapisi nyamwetu.—Joh. 8:54.

8. Yisinke norugana yipo o li tulire po sitambo sokulironga udivi wongandi?

⁸ Litulira po sitambo sokulironga udivi wongandi. Udivi musinke ono hara kulironga? Pura vakuronambunga womombungakriste zeni ndi nampo mutareli gonombunga yipo va ku tantere asi udivi musinke ou no vhura kulironga. Pasihonena, nsene va ku tantera asi wa hepa kuwapukurura mbuyungiso zoge ndi nkedi zoge zokuronga, va pura yipo va ku vatere o dimburure ruha rombuyungiso zoge ezi wa hepa kuwapukurura. Makura rugana paapa wa hulira mokutura po marunduruko. Ngapi omu noyirugana eyi?

9. Yisinke no rugana yipo o sikise mo sitambo soge sokulironga udivi wongandi?

⁹ Litura mo unene yipo o sikise mo sitambo soge. Tu tante asi ono hara kuwapukurura monkedi omu o rongo. Ove kuvhura o lironge nawa mbapira Litura mo mokuresa nokuronga. Nsene ono kara noruha mepongo lyomokatji kosivike, kuvhura o pure ko munazinyetu gomugara ogu ga kara noudivi yipo a purakene koruha roge komeho zepongo ntani mu pura a kupe ko magano apa novhura kuwapukurura. Liwapaikira ruha roge nosiruwo yipo vantu va ka dimburure asi ove kurugana unene ntani kuvhura kukuhuguvara.—Yis. 21:5; 2 Kol. 8:22.

10. Gava sihonena omu natu lironga udivi wongandi.

¹⁰ Yisinke no rugana nsene asi sitambo soge sokulironga udivi wongandi kuna kukudigopera kusisikisa mo? Wa ha hageka! Munazinyetu gomugara Garry kwa kere noudigu wokuresa nawa. Age kudiworoka ezuva eli ga lifire nomuga apa ga hetekerere ko kuresa kuziguruka mepongo. Nye age kwa twikilire kurugana unene yipo a wapukurure nkedi zendi zokuresa. Age ngesi kwa tanta asi morwa edeuro eli ga gwana kovanavazinyetu wovagara ava va kara nediwo  ntani kupitira moyimbapiratjangwa, age ngesi kugava yiuyungwa komapongo nokoyigongi.

11. Ngwendi moomu tupu ga yi rugene Timoteusa, yisinke ngayi tu vatera tu rugane yoyinzi mosirugana saJehova?

¹¹ Ngoso Timoteusa kwa kere muuyungi nomurongi gomuwa ndi? Bibeli kapi za yi uyunga oyo. Nye Timoteusa kwa tulire po ezokomeho mosirugana sendi morwa age kwa kweme epukururo lyaPaurusa. (2 Tim. 3:10) Mokulifana, nsene tu diva udivi wongandi, ayo ngayi tu vatera tu rugane yoyinzi mosirugana saJehova.

12. Ngapi omu va ku vatera vanavazinyetu?

¹² Natuvenye kugwanena mo uwa mevatero lyava wopeke. Vamwe kurugana yininke yoyinzi yipo va tu vatere. Pasihonena, ose kuhafa apa ava tu dingura vakuronambunga womoKomitiye zeruganeno kumwe nosipangero ndi womombunga zokudingura vaveli. Apa atu ligwanekere noukaro woudigu meparu lyetu, ose kuhafa apa mukuronambunga gongandi a litulire po siruwo sokutupurakena nokutuhengagwida. Apa atu dili kudiva asi ngapi omu natu vatera murongwa gwetu goBibeli, ose kuhafa apa muzuvhisi gokukarerera a zi kumwe nose komurongwa gwetu goBibeli ntani nokugava magano gendi. Vanavazinyetu navenye ava kuyihafera mokutuvatera. Ose kuvhura tu kare noruhafo nsene tu lizambera mokuvatera vanavazinyetu. Jesus kwa tente asi: “Kugava kureta ruhafo kupitakana kutambura.” (Yirug. 20:35) Nsene ono hara kuruganena Jehova unene monkedi ezi ndi mononkedi hena dapeke, yisinke nayi kuvatera yipo o yi rugane ngoso?

13. Yisinke twa hepa kudiworoka nsene kuna kulitulira po sitambo?

¹³ Litulira po sitambo soureru esi no vhura kusikisa mo. Pasihonena, ove nampo kuvhura o gazare asi ‘Na hara kurugana unene mombungakriste.’ Nye kuvhura yi ku karere udigu kusikisa mo sitambo oso ntani kuvhura ngayi ku karere udigu kudiva nsene wa si sikisa mo ndi hawe. Yipo nye, litulira po sitambo esi no vhura kusikisa mo. Kuvhura o tjange sitambo soge ntani nomu no vhura kusisikisa mo.

14. Morwasinke natu gazadarera ko koukaro wetu nsene kuna kulitulira po yitambo?

¹⁴ Twa hepa kugazadara ko koukaro wetu nsene kuna kulitulira po yitambo. Morwasinke? Morwa ukaro wetu kuvhura kulitjindja. Mokuyifanekesa: Mupositoli Paurusa kwa vaterere mokutulisa po mbungakriste zompe mositata  saTesaronika. Ntani sitambo sendi kwa kere sokukakara moomo nokukavatera Vakriste wovape ava va kere mo, nye varwanesi kwa sininikire Paurusa a tunde mo mositata oso. (Yirug. 17:1-5, 10) Nsene ngano Paurusa ga twikilire kukara mositata oso, age ngano ga tulire vapuli vakwawo mosiponga. Nye Paurusa kapi ga hagekere kuvavatera. Age kwa hetekerere ko kuyika ukaro wendi woupe. Konyima yipo ga tumine Timoteusa a ka vatere Vakriste wovape womoTesaronika yipo va kare nepuro lyokupama. (1 Tes. 3:1-3) Vatesaronika kwa hefe unene konkareso zaTimoteusa zokulizambera pokuza nkenye oku va mu hepere.

15. Ngapi omu ukaro wetu nau vhura kukundama yitambo yetu? Gava sihonena.

¹⁵ Kuvhura tu lirongere ko kosihonena saPaurusa apa ga kere moTesaronika. Ose kuvhura tu litulire po sitambo songandi, nye ukaro wetu kuvhura u litjindje ntani kuvhura kutukondera mokusisikisa mo. (Muud. 9:11) Nsene asi owo yiwo ukaro ono kuligwanekera nawo, hetekera ko kulitulira po sitambo sa peke esi novhura kusikisa mo. Eyi yiyo ga rugene Ted namukadendi Hiedi. Awo va hepere kutunda moBeteli morwa ngava vera-vera. Nye eharo lyawo lyokuhara Jehova kwa va tumangedere va papare nonkedi dapeke yipo va lihameke mo unene mosirugana saJehova. Pomuhowo, awo kwa tamekere kurugana uzuvhisi wokukarerera. Ano konyima yipo va ya kere vazuvhisi wosiruwo nasinye. Ano Ted kwa mu dewire ngomutareli gokukwatera mo. Ano konyima, nomvhura edi da hepa po mokukara mutareli gonombunga kwa ya litjindjire. Ted naHiedi kwa ya dimbwilire asi awo vana kurupa unene mokukarera Jehova mosirugana esi. Nampili ngomu va guvire nye awo va yi divire asi kuvhura hena va karere Jehova mononkedi hena dimwe dapeke. Ted kwa tanta asi: “Ose kwa lironga asi kuvhura tu karere Jehova unene mononkedi dokulisiga-siga.”

16. Sirongwa musinke natu lirongera mo moVagarata 6:4?

¹⁶ Ose kapi tatu vhuru kupangera nkenye eyi ayi horoka meparu lyetu. Yipo nye ya karera nomulyo tu dire kuligazara asi ose mulyo unene kwaJehova, morwa situmbukira esi twa kara naso ntani kapisi tu lihetakanese nava va kara noyitumbukira eyi twa dira kukara nayo. Hiedi kwa faturura asi: “Ove kapi ngo kara noruhafo nsene o hetakanesa eparu lyoge neli lyava wopeke.” (Resa Vagarata 6:4.) Ayo ya kara nomulyo tu papare nonkedi omu natu vatera wopeke ntani yipo va karere Jehova. *

17. Yisinke no rugana yipo o wapere kugwana yitumbukira?

¹⁷ Ayo ngayi kurerupira kurugana unene mosirugana saJehova nsene o rerupika eparu lyoge ntani nokunyokera po makongo ga hana hepero.  Litulira po yitambo yoyinunu eyi ngayi kuvatera o sikise mo yitambo yoyinene. Pasihonena, nsene sitambo soge kuna kara sokukara muzuvhisi gokukarerera, kuvhura o rugane uzuvhisi wokuvatera ngesi nkenye kwedi ndi? Nsene sitambo soge kuna kara sokukara mukwafimbunga, kuvhura o lihameke mo unene mokuzuvhisa ntani nokudingura wokuvera novakurupe womombungakriste zeni ndi? Ediwo eli no vhura kugwana ngesi kuvhura kukuvatera yipo ngo gwane yitumbukira komeho. Tokomena kurugana paapa wa hulira mwankenye sirugana esi vana kupe.—Rom. 12:11.

18. Ngomu vana yi likida pefano, yisinke ono kulirongera ko kosihonena saBeverley?

¹⁸ Ukurupe kapi tau vhuru kutukondera kulitulira po yitambo yopampepo ntani nokuyisikisa mo. Tuzeni tu ka tare sihonena samunazinyetu gomukadi Beverley gonomvhura 75. Age kwa kere nouvera ou ngau mu ninkisa yi mu karere udigu kugenda. Nye age kwa here kulihameka mo unene mezuvhiso lyokuzigida vantu koMurarero gwaHompa. Yipo ga litulilire po yitambo yongandi. Beverley kwa hefe unene apa ga sikisire mo sitambo sendi sokulihameka mo mezuvhiso lyokuzigida vantu koMurarero gwaHompa. Elituromo lyendi kwa vaterere wopeke yipo nawo va lihameke mo unene mokuzuvhisa. Jehova kutara yirugana eyi ava rugana vanavazinyetu wovakurupe asi mulyo unene nampili ngomu ukaro wawo au dili kuvapulisira va lihameke mo unene.—Epis. 71:17, 18.

19. Yitambo musinke yimwe yopampepo natu vhura kulitulira po?

¹⁹ Litulira po yitambo eyi no vhura kusikisa mo. Tunga po yikara eyi nayi hafesa Jehova. Lironga udivi ou ngau kupulisira o ruganene Karunga unene ntani nombunga zendi. Papara nonkedi omu no vatera vanavazinyetu momunene. * Ngwendi Timoteusa, nevatero lyaJehova ‘navenye ngava mona nawa-nawa kukura koge.’—1 Tim. 4:15.