1. Ino nshiinshi nsheenga twaciita kwaamba ayi tuye panembo lwakumushimu?

 MBULI Beneklistu bancine, tulimusuni abuumbi Yehova. Tulisuni kusebensela Yehova kushika peela nkusu shesu. Ano kwaamba ayi tucikoonshe kucita shoonse nsheenga twacikonsha muncito yakwe Yehova, tulyeelete kuya panembo lwakumushimu. Inga twacita boobo kwiinda mukuba amibo ya Bwineklistu, kwiiyaako lushibo lucafwa, alimwi akulangoola nshila mbweenga twacafwa bamwi.

2. Ino nceebonshi tulisuni kuya panembo lwakumushimu?

² Ino nceebonshi tulyeelete kubikila maano ku kuya panembo lwakumushimu? Ceebo cinene ncakwaamba ayi tulisuni kusangalasha Ishiwesu wakwiculu shilusuno. Yehova alakondwa na wabona mbotutoosebensesha lushibo lwesu muncito yakwe. Kwiilikaawo, tulisuni kuya panembo lwakumushimu kwaamba ayi tucikoonshe kucita shiinji mukucafwa bamakwesu abenankashi. (1 Tesa. 4:9, 10) Nabi twekala mucancine kwamyaaka iinji buyani, soonse inga twatolelela kuya panembo lwakumushimu. Amuleke tubandike mbweenga twacita boobo.

3. Kweelana a 1 Timoti 4:12-16, ino mutumwi Paulo wakayuminisha Timoti kucita nshi?

³ Mutumwi Paulo ndyaakalembela Timoti nkalata yakutaanguna, Timoti kaali wasebensaako kale mbuli munene kwamyaaka iinji. Nacibi boobo, Paulo wakamuyuminisha kutolelela kuya panembo. (Amubelenge 1 Timoti 4:12-16.) Ndyemutobelenga maswi Paulo ngakalemba, mutoobona kwaamba ayi Paulo wakalinga  kuyuminisha Timoti kuya panembo munshila shobilo: nkokwaamba ayi kuba amibo ya Bwineklistu mbuli lusuno, lushomo, alimwi akulilemeka. Nshila imwi nkuya panembo mukubelenga kubantu baanji, kuyuminisha, alimwi akwiisha. Tutobandika cakubonenaako cakwe Timoti kwaamba ayi tubone mbweenga kusala shakucita nsheenga twacikonsha kwatucafwa kuya panembo lwakumushimu. Tutokwiiya ambweenga twacita shiinji muncito yakushimikila.

4. Kweelana a Bene Filipi 2:19-22, ino nciinshi cakapa kwaamba ayi Timoti abe muntu usebensela kabotu Yehova?

⁴ Ino nciinshi cakacafwa Timoti kusebensela kabotu Yehova? Wakalinga kucite mibo ibotu ya Bwineklistu. (Amubelenge Bene Filipi 2:19-22.) Kweelana a Paulo nshakaamba, Timoti wakalinga muntu uliceesha, ushomeka, usebensa cankusu alimwi cakubikila maano. Wakalinga kucite lusuno alimwi wakalinga kubikila maano abuumbi kubashominyina. Aboobo Paulo wakalinga kumusuni abuumbi Timoti. Alimwi ici cakapa kwaamba ayi amupe mikuli iinji. (1 Koli. 4:17) Aswebo na katutondesha mibo Yehova njaasuni, alatusuna alimwi inga twacafwa bamwi mulibungano.​—Kulu. 25:9; 138:6.

5. (a) Ino inga mwacita buyani kwaamba ayi mushibe kabotu mibo ya Bwineklistu njeenga mwasuna kubaayo? (b) Kweelana acikope catondeshekwa, ino nankashi wacanike atoocita buyani kwaamba ayi abe amubo wakuyeeyelako bamwi?

⁵ Amusale mubo womwi ngweenga mwasuna kubaawo. Amupaile akuyeeya nsheenga mwayandika kusebenselaawo. Lyalo amusale mubo womwi ngweenga mwasuna kubaawo. Kucakubonenaako, mpashi inga mwayeeya kuba amubo wakuyeeyelako bamwi na kwiiya kuba alusuno lwakucafwa bashominyinaanu. Na mpashi inga mwayandika kusebensela pakuba amubo wakuyuminisha luumuno akulekelela bamwi. Inga mweepushako shicibusa ngomushoma kwaamba ayi amulwiite nsheenga mwayandika kusebenselaawo.​—Tus. 27:6.

6. Ino inga mwacita buyani kwaamba ayi mucikonshe kuba amubo umwi?

⁶ Amusebense cankusu kwaamba ayi mukumanishe nshemwasala kucita. Ino nshiinshi sheenga shamucafwa? Cintu comwi ceenga camucafwa nkwiiya cakubikila maano pamubo ngomusuni kubaawo. Atwaambe ayi mwasala kuba amubo wakulekelela bamwi. Mpashi inga mwatalika kwiiya pamubo uyu kwiinda mukubelenga akukutumana kuyeeya pashakubonenaako shaambwa mu Baibo, sha baabo bakacikonsha kulekelela bamwi abaabo bakaalilwa kucita  boobo. Amuyeeye cakubonenaako cakwe Yesu. Wakalinga kulibambite kulekelela bamwi. (Luka 7:47, 48) Alimwi taakalinga kubikila bunene maano kushilubo shabo. Sombi ku nsheenga bacikonsha kucita kabotu. Ano mubupusano a Yesu, baFalisi “bakalinga kuyeeya ayi baliluleme kwiinda bamwi boonse.” (Luka 18:9) Pesule lyakukutumana kuyeeya pashakubonenaako ishi, amuliipushe ayi: ‘Ino nshiinshi nshonjeeya na ndabona bamwi? Ino njimibo ili njonsala kubikilako maano?’ Na kuli muntu umwi ngomutookwaalilwa kulekelela, amweeleshe kulemba mibo ibotu yoonse muntu uyo njaacite. Lyalo amuliipushe ayi: ‘Ino Yesu alamubona buyani muntu uyu? Sa inga wamulekelela?’ Kucita boobo inga kwatucafwa kwaalula mbotuyeeya. Pakutaanguna, inga twayandika kusebensa cankusu kwaamba ayi tucikoonshe kulekelela muntu watubishisha. Ano na twatolelela kusebenselawo, mukuya kwaciindi inga tweeya kuba muntu ulibambite kulekelela bamwi.

7. Kweelana a Tushimpi 22:29, ino Yehova alabasebensesha buyani basebenshi bakwe bacite lushibo munshiku shino?

⁷ Cimwi nceenga mwasuna kucita nkuba alwiiyo lucafwa. Amuyeeyebo kufula kwa basebenshi batoyandika kwaamba ayi kuyakwe ma ofesi amisampi, Misena Motucitila Kubungana Kunene, alimwi Amaanda a Bwaami. Baanji balaba alushibo lwakusebensa kabotu muncito ishi, kwiinda mukusebensela pomwi abamakwesu abenankashi basebensa kwamyaaka iinji. Kweelana ambotutoobona pacikope, bamakwesu abenankashi batokwiiya lushibo luyandika mukubamba Misena Motucitila Kubungana Kunene a Maanda a Bwaami. Kwiinda munshila iyi alimwi anshila shimwi, Yehova Lesa, “Mwaami wa lyoonse alyoonse,” alimwi a Klistu Yesu, “Mwaami . . . wa baami,” batookumanisha shintu shinene abuumbi kwiinda mukusebensesha basebenshi bacite lushibo. (1 Timo. 1:17; 6:15; amubelenge Tushimpi 22:29.) Tulisuni kusebensa cankusu akusebensesha lushibo lwesu mukulemeka Yehova, kuteshi kuliletela bulemu.​—Joni 8:54.

8. Ino inga mwacita buyani na kuli lushibo ndomusuni kwiiya?

⁸ Amusale lushibo ndomusuni kwiiya. Ino ndushibo nshi ndweenga mwasuna kwiiya? Amwiipushe bamanene mulibungano linemishaanu na mpashi mutanjilili walubasu kwaamba ayi bamulwiite lushibo ndobatooyeeya ayi inga mweeya. Kucakubonenaako, na bamulwiita ayi inga mwayandika kusebensela pakwiisha akubandika kabotu, amubeepushe kwaamba ayi bamucaafwe kushiba nsheenga mwayandika kucita. Lyalo amusebense cankusu kwaamba ayi muye panembo. Ino nshiinshi nsheenga mwaciita?

9. Ino inga mwacita buyani kwaamba ayi mucikoonshe kukumanisha nshemwasala?

⁹ Amukumanishe nshemwasala kucita. Atwaambe ayi mulisuni kusebensela pakwiisha kabotu. Inga mwasuna kwiiya cakubikila maano buloshuwa ya Amubikile Maano Kukubelenga Akwiisha. Na mwapekwa lubasu pakubungana kwa mukati kansondo, inga mwasenga mukwesu ucishi kabotu kwiisha kwaamba ayi amukutike ndyemutokwiinduluka mulubasu ndomwakapekwa. Pesule inga mwamwiipusha kwaamba ayi amulwiite mpeenga mwayandika kusebensela. Amulibambile kabotu lubasu ndomwakapekwa kwaamba ayi mushibikwe mbuli muntu usebensa cankusu alimwi ushomeka.​—Tus. 21:5; 2 Koli. 8:22.

10. Amwaambe cakubonenaako ca nsheenga twaciita kwaamba ayi tuye panembo ndyetutokwiiya kucita cintu cimwi.

¹⁰ Ino inga mwacita buyani na mulisuni kusebensela palubasu lumwi ndomwaalilwa kucita kabotu? Mutabooleli mwisule! Mukwesu waliina lya Garry takalinga kucishi bwa kubelenga kabotu. Aleebaluka kwaamba ayi wakalinga kunyumfwa  nsoni ndyaakalinga kweelesha kubelenga cakupoosha kumabungano. Nacibi boobo, wakatolelela kusebensa cankusu kwaamba ayi ashibe bwakubelenga kabotu. Ano pacecino ciindi alacikonsha kwaamba makani mu Ŋanda ya Bwaami, pakubungana kwalubasu alimwi apakubungana kunene, ceebo ca lucafwo ndwaakatambula!

11. Ino nciinshi ceshi cikatucafwe kucita shiinji muncito yakwe Yehova bweenka mbuli Timoti?

¹¹ Sa Timoti wakaba mwaambi na shikwiisha ucishi kabotu? Baibo tayaambiwo. Sombi ncakutatoonsha kwaamba ayi wakakonkela kuyuminisha kwakwe Paulo akuya panembo mukusebensa kabotu mikuli yakwe. (2 Timo. 3:10) Aswebo na twaya panembo mulushibo lwesu tulaakucita shiinji muncito yakwe Yehova.

12. Ino bamwi bakamucafwawo buyani?

¹² Soonse tulacafwikwa ceebo cakulyaaba kwa bamwi. Bamwi balacita shiinji kwaamba ayi batucaafwe. Kucakubonenaako, na twaciswa lyalo batutola kucipatela, tulalumba na bamanene basebensa mu Komiti Ilanga Pamakani Akupa Lucafwo Lwakucipatela na mu Makoto Afwakashila Balwashi besa mukutufwakashila. Alimwi na tutokwiinda mumapensho tulanyumfwa kabotu na bamanene babikila maano bacana ciindi ca kutukutika akutuyuminisha. Tulanyumfwa kabotu na painiya ucishi kabotu kwiisha wasumina kuya andiswe kuciiyo cesu ca Baibo akutulwiitako nsheenga twaciita kwaamba ayi tunokwiisha kabotu. Bamakwesu abenankashi boonse aba balikondetwe kutucafwa. Aswebo inga twaba alusangalalo na twalyaaba kucafwa bamakwesu. Yesu wakaamba ayi: ‘Kupa kulapa lusangalalo abuumbi kwiinda kutambula.’ (Milimo 20:35) Ino nciinshi ceenga camucafwa na mulisuni kucita shiinji muncito yakwe Yehova munshila ishi na nshila shimwi shili mbuli sheeshi?

13. Ino nciinshi ncotweelete kwiibaluka ndyetutoolibambila nshetusuni kucita?

¹³ Amusale ciine ncomusuni kucita. Kucakubonenaako, mpashi inga mwayeeya ayi, ‘Inga ndasuna kucita shiinji mulibungano.’ Nacibi boobo, mukwiinga tamuna kusala ciine ncomusuni kucita, inga caba ciyumu kushiba mbweenga mwacikumanisha andyeenga mwacita boobo. Aboobo amusale ciine ncomusuni kucita. Mpashi inga mwacilemba ncomwasala akulemba mbweenga mwacikumanisha.

14. Ino nceebonshi tulyeelete kuba balibambite kwaalula nshetwasala kucita?

 ¹⁴ Tulyeelete kuba balibambite kwaalula nshetwasala kucita. Ino nceebonshi? Nceebo cakwaamba ayi shintu shilaaluka mubuumi. Kucakubonenaako: Mutumwi Paulo wakacafwilisha kwaamba ayi mu tauni ya Tesalonika mube libungano lipya. Alimwi cilyeelete wakalinga kulangila kukalaako kwakaciindi kwaamba ayi acafwe Beneklistu bapya. Nacibi boobo, Paulo wakaswaako ku tauni ilya ceebo ca bantu bakalinga kumupikisha. (Milimo 17:1-5, 10) Naakwiinga wakatolelela kukala kumusena kulya, naakwiinga wakabika bashominyina mumapensho. Sombi taakwe kucileka kweelesha kubacafwa. Muciindi cakuboolela mwisule, wakaalula shintu kweelana abukaalo. Mukuya kwaciindi wakatumako Timoti kwaamba ayi aye ayuminishe Beneklistu baku Tesalonika. (1 Tesa. 3:1-3) Cilyeelete bakakondwa abuumbi bene Tesalonika kwaamba ayi Timoti wakalyaaba kusebensela kuli koonse nkwaakalinga kuyandika!

15. Ino nshetwalinga kusuni kucita inga shaaluka buyani na bukaalo bwesu bwaaluka? Amwaambe cakubonenaako.

¹⁵ Kwiiya shakacitikila Paulo ndyaakalinga ku Tesalonika inga kwatucafwa. Mpashi inga katulibambila kukumanisha mukuli umwi, sombi bukaalo inga bwaaluka akupa kwaamba ayi twaalilwe kukumanisha nshetwalinga kusuni. (Shiku. 9:11) Na ubu mbocibete kuli ndimwe, amulibambile shimwi nsheenga mwacikonsha kukumanisha kweelana abukaalo bwanu. Ishi nsheshakacita beebene bamwi, ba Ted abakaabo ba Hiedi. Bakaswa pa Bethel ceebo cakuciswa. Ano ceebo calusuno lwabo pali Yehova, bakeeya nshila shimwi mbweenga bacita shiinji muncito yakushimikila. Cakutaanguna, bakatalika bupainiya bwaciindi coonse. Lyalo mukuya kwaciindi bakapekwa coolwe cakusebensa mbuli bapainiya balibetele, alimwi ba Ted bakaiishikwa kusebensa mbuli shikucafwilisha mutanjilili walubasu. Lyalo myaaka njeenga muntu watolelela kuba mutanjilili walubasu yakaaluka. Ba Ted aba Hiedi bakesa mukushiba kwaamba ayi kweelana aciimo cabo inga tabeeleli kusebensa muncito iyi. Nabi kwaamba ayi bakalinyumfwa cibiibi, bakesa mukushiba kwaamba ayi kuli nshila shimwi mbweenga basebensela Yehova. Ba Ted bakaamba ayi, “Twakashiba kwaamba ayi inga twasebensela Yehova munshila shimwi shiinji.”

16. Ino nshiinshi nsheenga tweeya kuswa pa lilembo lya Bene Galatiya 6:4?

¹⁶ Tatucitewo nkusu shakupa kwaamba ayi shintu shimwi shitacitiki mubuumi bwesu. Aboobo tatweelete kunooyeeya ayi Yehova alatubona ayi tulayandika ceebo ca mikuli njetucite. Alimwi tatweelete kunoolyelanya kubamwi bacite mikuli njetutacite. Ba Hiedi bakaamba ayi, “Kulyeelanya kubamwi kulaakumupa kutasangalala.” (Amubelenge Bene Galatiya 6:4.)  Cintu ciyandika nkulangoola nshila mbweenga twasebensela Yehova akucafwa bamwi. *

17. Ino inga mwacita buyani kwaamba ayi mweelele kupekwa mikuli?

¹⁷ Inga mwacikonsha kucita shiinji muncito yakwe Yehova, na kamukala buumi bwakutalila shiinji alimwi akuleya kukongola cikongole kongole. Amulibambile shakucita shiniini niini sheenga shamucafwa kucita shiinji kunembo. Kucakubonenaako, na mulisuni kuba painiya waciindi coonse kunembo, mpashi inga mwataanguna kunoocitako bupainiya bwakucafwilisha mweenshi amweenshi. Na mulisuni kweelela kuba musebenshi ucafwilisha, mpashi inga mwasuna kutaanguna kusebensa cankusu muncito yakushimikila alimwi akunoofwakashilako bamakwesu abenankashi balwashi, abacinene mulibungano. Kucita boobo inga kwamucafwa kwaamba ayi mweelele kutambula mikuli kunembo. Amube bashinishite kusebensa kabotu muncito ili yoonse njeenga mwapeekwa.​—Loma. 12:11.

18. Kweelana acikope catondeshekwa, ino nciinshi ncomweeya kuswa kucakubonenaako caba Beverley?

¹⁸ Inga twacikonsha kucita shiinji lwakumushimu nabi ndyetutooya bucembela. Amuyeeye pacakubonenaako cakwe nankashi waliina lya Beverley ucite myaaka 75. Wakalinga kucite bulwashi bunene bwakalinga kumupa kwaalilwa kweenda. Nacibi boobo, wakalinga kusuni kwaabanamo lubasu muncito yakwiita bantu ku Ciibalusho. Aboobo wakalibambila shakucita. Ndyaakacikonsha kwaabanamo lubasu muncito iyi, wakakondwa abuumbi. Cakubonenaako cakwe cakacafwa bamwi kusebensa cankusu muncito yakushimikila. Yehova alalumba pancito shisebensa bamakwesu abenankashi bacinene nabi kwaamba ayi tabacikoonshi kucita shiinji.​—Kulu. 71:17, 18.

19. Ino nshiinshi shimwi nsheenga twasala kucita lwakumushimu?

¹⁹ Amusale shakucita nsheenga mwacikonsha kukumanisha. Amube amibo isangalasha Yehova. Amube alushibo lweenga lwamucafwa kucita shiinji mulibunga lyakwe Lesa. Amubone nsheenga mwaciita kwaamba ayi mucite shiinji mukucafwa bashominyinaanu. * Bweenka mbuli Timoti, Yehova alaakumucafwa ‘kwaamba ayi kuya panembo kwanu kubonekele kubantu boonse.’​—1 Timo. 4:15.