1. N’nga pivifunelo viivi vyauzimu vinofwanelela i-yo dhi-elela?

 I-YO Makristau aimbarimbari ninomdhiveliwana maningi Yohova. Ninofunechecha ira niirenga vilivyothene vinaode i-yo vomlabela. Ira vyevi viodeye ninofwanela dhi-elela vifunelo vyauzimu ninga kaana makalelo apama, funjedha dodoliso lokami-a, no fwanya ndhila dhinango dhinakami-e atu enango. *

2. Mwasiwa ngwan’ni ninofwanela dhi-elela vifunelo vyauzimu, novilimbi-edha ira nivikwakwaneli-edhe?

² Mwasiwa ngwan’ni ninofwanela dhilimbi-edha ira nidhowe vasoglo mwauzimu? Infunelo ilukulu choi ninofuna nimsangalali-e Babi-u wa dhulu. Yohova unosangalala aniona ni-indi-edhanga basa dodoliso li-u mwandhila iliyothene munaodele i-yo vomlabela. Wenjedhela vevo ninofuna ira nidhowe vasogolo mwauzimu ira naakami-enga maningi abali-u naarongoli-u. (1 Atez. 4:9, 10) Akala nili imbarimbarini wa hora yolapela yoi a-vi othenene ninooda dhowa vasogolo mwauzimu. Dhoweni nioneni, malangi-ala munanikami-edhe aliwa malamboano.

3. Movwelana na lemba la 1 Timoteo 4:12-16, n’nga rumiwi Paulo amlimbi-idhe Timoteo ira airen’ni?

³ Rumiwi Paulo vyamlembela liye Timoteo karta loroma, zombwe waifwanafwani-o yapamula ali angali wale ndimuwa wavapingoni wa dodoliso. Mbwenye Paulo atomlibi-a ira adhowenave  dhowa vasogolo mwauzimu. (Muleri 1 Timoteo 4:12-16.) Mwathuulelanga madhu a Paulwala munoona ira liye afuna ira Timoteo adhowe vasogolo mundhila mbili: Kaana makalelo apama ninga, udhivela, iroromelo na kalelo lofwanelela thitho wenjedhela dodolisolee voleri vamwinjini vaatu, limbi-a na funji-a atu. Voona ifwanafwani-o ya Timoteo dhoweni nitapanyeni mwemo kaana vifunelo vinaode i-yo vikwakwaneli-edha unanikami-edhe aliwa dhowa vasogolo mwauzimu. Ninofuna nitapanye thitho vyongo vinango vinanikami-e ira niirenga vyongo vinjinji vaurumiwi-u.

4. Movwelana na lemba la Afilipi 2:19-22, chini yamkami-idhe Timoteo ira akale rumiwi wapama wa Yohova?

⁴ N’nga chini yamkami-idhe Timoteo ira akale rumiwi wapama wa Yohova? Mbamakalelo apama ana liye. (Muleri Afilipi 2:19-22.) Naona vyaongile Paulo vyoonga Timoteo ninooda onga ira liye, ali odhiyevi-a, ororomeleya, wathindhi thitho onyindeleya. Liye ali waudhivela thitho anoakumbanyedha maningi abalee naarongolee. Vyevi vyatoiri-a ira Paulo amdhiveliwengana thitho kaakaikela ira unooda kwakwaneli-edha maurumiwi orucha amva-idhe liye. (1 Akor. 4:17) Molandana na vyevi Yohova unooda nidhiveliwana thitho ninooda kami-a maningi pingoni nakaana makalelo anomsangalali-a Yohova.—Sal. 25:9; 138:6.

5. a) N’nga munaire a-vi ira mukaena ifunelo jinofunanyo jiulukuli-a vakalelo n’nango? b) N’nga rongola wasikana vairuthiruthiniva unaira n’ni ira akwakwaneli-edhe ifunelo jee yoi aavwelenga maningi tangaranga atu enango?

⁵ Musakulenga ifunelo jinofuna nyo jikwakwaneli-edha. Mulobelelenga ikundu yaumutwinyu inofwanelela nyo chinja. Musakulenga kalelo n’nango linofuna nyo ira muode liulukuli-a. Mofwanafwani-a, n’nga munofunechecha ira mwaavwelenga miningi tangaranga venango mwaakami-e Makristau afwinyu? N’nga munofunechecha ira mukalenga mwarendele naatu enango ira thitho mwaalevelelenga? Munooda ira pama mfuka fwinyu onyindeleya ira aukami-eni idhiwa vinairenyo ira muode dhowa vasogolo mwauzimu.—Sang. 27:6.

6. N’nga munaire a-vi ira mukwakwaneli-edhe ifunelo yinyu yofuna ulukuli-a kalelo n’nango?

⁶ Mukaengana thindhi ira mukwakwaneli-edhe ifunelo yinyu. N’nga munaviire a-vi vyevi? Ndhila imbo-i kufunjedha mopwasedha kalelo n’nango linofuna nyo ira muode liwenjedhela. Nifwanafwani-e ira, munofuna muvilimbi-edhe ira mulevelelenga atu enango. Munooda roma leri thitho thuulela modi-a myasa yaatu oongiwa Bibilyani alevelelecha atu narima  wethene thitho naatu ale a-alevelelecha afwiwa. Kathuulelani ifwanafwani-o ya Yesu. Liye anoalevelela atu enango narima wethene. (Luka 7:47, 48) Liye kaathuulelecha maningi vyodawa vyaatwao thitho aaona ira anooda chinja. Mbwenye Afwarisi a hora ya Yesu “taaona atu enango othene ninga o-okaana basa.” (Luka 18:9) Mwamala thuulela vifwanafwani-o vyevi, dhifukeni ira: ‘N’nga miyo ndinoona vyoi a-vi waatu enango? N’nga ndinosakula thuulela makalelo aavi ana aliwa?’ Akala ira vinouruchani levelela mutu mwinango, mudhilimbi-edhenga lemba venangovee vene makalelo manjinji apama a mutuo. Mwamala mudhifuke ira: ‘N’nga Yesu unom’mona a-vi mutula? N’nga liye angasakunle mlevelela?’ Funjedha mwandhila yen’na unoukami-ani ira muchinje moda unathuulela nyo vyongo. Voroma, ninofuneela dhilimbi-edha ira nimlevelele mutu unidawenle. Mbwenye nadhowanave kala athindhi vira wa hora vinodha kala vyo-orucha ira niodenga levelela.

7. Movwelana na lemba la Sanganikho 22:29, n’nga Yohova unaa-indi-edha a-vi basa atu adodoliso malamboano?

⁷ Ifunelo inango jinofwanela nyo dhi-elela kufunjedha dodoliso n’nango lene lokami-a. Kathuulelani injiva waatu anofuneya vomanga maskritorio a tambi, mamburo oirelavo migumano ilukulu na Nyumba dha Umwene. Anjinji mwaatu enala tafunjedhile dodoliso lolaba basali vambo-i naabali naarongola anoidhiwa pama laba basalo. Ninga moda unaonela i-yo vairuthiruthiniva abali naarongola anaafunjedha dodoliso n’nango linaakami-e vabasa losakanya limburo loirelavo migumano milukulu na Nyumba dha Umwene. Mwandila dhedhi na ndila dhinango, Yohova Nlungu wenuo uli “Mwene odhowa nodhowa,” na Yesu Kristu wenuo uli “Mwene wa . . . Mamwene,” anaakwakwaneli-edha vyongo vilukulu vo-indi-edha basa atu adodoliso. (1 Timo. 1:17; 6:15; muleri Sanganikho 22:29.) Ninofuna ira nikaengana thindhi mbwenye thitho i-ndi-edha basa dodoliso li-u vomlemeza Yohova a-kala dhilemezana okene.—Juwau 8:54.

8. N’nga munaire a-vi ira mudhi-elele ifunelo yofuna funjedha dodoliso n’nango?

⁸ Musakulenga ifunelo jinofuna nyo jikwakwaneli-edha. N’nga tidodoliso liivi linofuna nyo funjedhela? Munooda aafuka andimuwa apingonimwinyu venango namaing’anela isinyu, ira toukami-eni idhiwa dodoliso linoona aliwa ira vingakanle pama ira mulikaena ira muode lifunjedha pama no likaana. Mofwanafwani-a, Akala ira atouwandelani ira munofwanela wenjedhela dodoliso linyu voonga no funji-a, munooda afuka ira touwandeleni dodoliso loonga linofwanelela nyo li-indi-edha basalo. Mwamala mukaengana thindhi ira muwenjedhele dodolisolo. N’nga munaviire a-vi vyevi?

9. N’nga munaire a-vi ira mukwakwaneli-edhe ifunelo yinyu yofuna funjedha dodoliso n’nango?

⁹ Mukaengana thindhi ira mukwakwaneli-edhe ifunelo yinyu. Nifwanafwani-edhe ira munofuna muwenjedhele dodoliso linyu lofunji-a. Munooda funjedha ixibukhu joi, Dhilimbi-edheni voleri na funji-a mwadodoliso. Mwava-iwa mwasa vamigumanoni ya wari mwasumana munooda mvepa bali wa dodoliso ira auvuruwaneni hora ya-anafiye thitho oowandeleni munafuneelanyo saka-edhamo pama. Wenjedhela vokala wa dodoliso mukozeelenga paama mwandhila yoi atu taone ira nyo mutokaana thindhi thitho muli onyindeleya.—Sang. 21:5; 2 Akor. 8:22.

10. Ongani ifwanafwani-o yothonyi-edha moda munawenjedhele i-yo dodoliso li-u.

¹⁰ N’nga akala ira munofuna muwenjedhele dodoliso n’nango lene loi mwaibaliwelo wanyo ndi lorucha? Kamutatile rima! Bali mwinango  dhinalee Garry, vyanomrucha maningi ira aleringa. Liye unothuulela moda wakaanelana liye manyadho afuna ira aleri vamigumanoni ya pingo. Mbwenye atovilimbi-edha kaana thindhi. Liye unoonga ira namwasa wavyafunji-iwile liye, mwachineneeva unooda onga mwasa Nyumbani ya Umwene, vamigumanoni ya isa, na yagawo!

11. Mofwanafwana na Timoteo, n’nga chini inanikami-e ira niirenga vyongo vinjinji vomlabela Yohova?

¹¹ N’nga Timoteo atofiya vokala namafunji-a wapama maningi? Bibilya kalinaonga. Mbwenye pyo-okaikela ira namwasa o-arela malangi-o a rumiwi Paulo atodhowanave ira vyongo mwapama maningi vaurumiwee. (2 Timo. 3:10) Molandana na vyevi i-yo thitho nawenjedhelanga dodoliso li-u, ninooda iranga vyongo vinjinji vomlabela Yohova.

12. N’nga atu enango anaukami-eni a-vi?

¹² I-yo othenene ninooda ganyali na vinoira atu enango vonikami-a. Na baxari hospitale, ninosimba abali naarongola amakomisau oongia-ana na mahospitale venango amagurupu oing’anela atu anobulela tadha dhaniona. Nagumanana vyorucha vinango ninosimba ndimuwa waudhivela apambula horee ira adhaode nivuruwana nonilimbi-a. Nafunanga kami-iwa wa moda unafunjedhela i-yo Bibilya vambo-i na mutu, ninosangala painiya wa dodoliso arumela ira akale na i-yo vambo-i vanofunjedha i-yovo noniva-a malangi-o. Abali naarongola othene enala anosangalala vonikami-a. I-yo ninooda sangalala akala ira nitodhivelela ira nikami-e abali-u. Yesu aongile ira: “Va-a unodhi-a sangala ulukulu kwaranya wachela.” (Mayir. 20:35) N’nga akala ira munofuna mwiire vinjinji vavikundu vyevi na ndhila dhinango, chini jinaukami-eni ira muode kwakwaneli-edha vifunelo vinyuvyo?

13. N’nga mwadhi-elelanga ifunelo, munofwanelela thuulelenga n’ni?

¹³ Mudhi-elelenga ifunelo yaimbarimbari jinofunanyo ira mujikwakwaneli-edhe. Mofwanafwani-a, venango munothuulela ira, ‘ndinofuna ndiirenga vinjinji pingoni.’ Mbwenye vinooda kala vyorucha idhiwa moda unakwakwaneli-edhe nyo ifunelo ninga yeyo thitho venango kamunaidhiwe akala mutojikwakwaneli-edha. E-no mwiidhiwenga vyaimbarimbari vinofunanyo ira. Munooda lemba vapapelini vinofunanyo ira, ira mujikwakwaneli-edhe.

14. Mwasiwa ngwan’ni ninofwanelela kala okozeya chinja vamwasa waifunelo idhi-elele i-yo?

 ¹⁴ Ninofwanela kala okozeya chinja vamwasa waifunelo jinodhi-elela i-yo. Mwasiwa ngwan’ni? Namwasa oi i-yo kaninaode vitonga vyongo vyothene vinoireya vaingumi yi-u. Mofwanafwani-a, rumiwi Paulo atokami-a kaathi-a pingo mpya sidade la Tesalonika. E-no pyo-okaikela ira liye atokaana ifunelo joi akalengave wewo ira aakami-enga Makristau apyao. Mbwenye atu oruni-a tatomkanyi-edha ira akumewo sidade lelo. (Mayir. 17:1-5, 10) Paulo aakaleve wewo anga-edhi abaleyao vangovini. Mbwenye Paulo kaa-iidhe akami-a. Malo mwaevyo liye atorumela chinjao. Vasogolovee atomrumao Timoteo ira amakami-enga Makristau apyao ira takaena iroromelo yolimba. (1 Atez. 3:1-3) Makristau au Tesalonika tatosangalala maningi ira Timoteo atodhivelela ira amalabenga wewo!

15. N’nga vyongo vinoniireela vaingumi yi-u vinakuze a-vi vifunelo vi-u? Muonge ifwanafwani-o.

¹⁵ Ninooda funjedha vinjinji dela wa vyam’mwireele Paulo wu Tesalonika. Venango ninooda funa ningalabile urumiwi mwinango mbwenye vyongo vinango vinooda niimanani-a kwakwaneli-edha ifunelo ji-ujo. (Namal. 9:11) Akala ira mwemo pukalele vyongo vaingumi yinyu mukalenga okezeya sakula ifunelo jinango jinaode nyo ikwakwaneli-edha. Vyevi pyaireile na banja n’ngo la Ted na Hiedi. Namwasa wa marenda aliwa tanofuneela i-yachi urumiwi wa Beteli. Mbwenye mdhiveliwana wiwa Yohova watoari-a ira tafunafunengave ndhila dhinango dhowenjedhelela urumiwiwa. Aliwa tatoroma laba basa laupainiya okaatheya. Vira wa hora tato-eliwa kala apainiya avakundu thitho Ted atofunji-iwa ira akale namaing’anela isa o-indedhela. Vingaireile e-no vatokala machinjo vamwasa wa vyawa vinofwanela ira mutu akaena ira akale namaing’anela isa. Vidhaire e-no Ted na Hiedi tatoidhiwi-iwa ira katinofwanelela thitho vaurumiwi wen’ne. Vingalive ira aliwa tatosukwa, aliwa tatozindiyela ira anooda mlabela Yohova mundhila dhinango. Ted aongile ira, “Nitofunjedha ira kanikalelengave thuulela vyoira mwatundu m’mbo-ive waurumiwi kabe.”

16. N’nga ninafunjedhavo n’ni va lemba la Agalata 6:4?

¹⁶ Kaninaoda tonga jilijothene jinaireye vaingumi yi-u. Moi e-no kanionenga ira nili ofuneya maningi wa Yohova namwasa waurumuwi unalaba i-yo venango fwanafwani-edhanga urumiwi-u na waatu enango. Hiedi aongile ira, “Kunakaana rendele wafwanafwani-edhanga vinoireya vaingumiyaa na vyaatu enango.” (Muleri Agalata 6:4.) Moi e-no pyofuneya ira nisakenga ndhila dhinakami-edhena i-yo atu enango thitho nimlabelanga Yohova. *

17. N’nga munaire a-vi ira mufwanelele va-iwa urumiwi mwinango?

 ¹⁷ Munooda laba vinjinji vomlabela Yohova akala ira munokaana ingumi yo-ofuna kaana vyongo vinjinji thitho akala ira munorambela kaangana mangawa. Munooda dhi-elela vifunelo ving’ono ving’ono vinaode ukami-ani dha kwakwaneli-edha vifunelo vinyu viluku vilukulu sogolou. Mofwanafwani-a, akala ira ifunelo jinyu jilukulu choira mudhakale painiya okaatheya n’nga a-vi nyo mwachineneeva roma basa laupainiya okami-a vamwedi uliwethene? Akala ira ifunelo jinyu choi mudhakale rumiwi okami-a, n’nga munooda wenjedhela hora inolaleela nyo thitho mapandhanga atu anobulela naatu oulula apingonimwinyu? Vyevyo vinafunjedhe nyo mwachineneeva vinooda ukami-ani, ira mudhalabe maurumiwi o-iyana-iyana soglou. Muvilimbi-edhenga irana vilivyothene vinaode nyo vaurumiwinyu uliwethene uva-iwilenyo.—Aroma 12:11.

18. Ninga munoonela i-yo vairuthiruthiniva, n’nga ninafunjedhavo n’ni vaifwanafwani-o jarongola Beverley?

¹⁸ Ulula kunam’mwimanani-a mutu ira adhi-elele vifunelo vyauzimu no vikwakwaneli-edha. Kathuulelani ifwanafwani-o ya rongola mwinango wa vyawa 75 dhinalee Beverley. Liye atokaana marenda enango malukulu am’mwiri-a ira aonenga nyarwa awendanga. Mbwenye anofuna angalabilenao basa mokwakwanela loitanela atu wiithuuleloni. Moi e-no atodhi-elela vifunelo vyafuna liye ira aode kwakwaneli-edha. Rongoluo angakwakwaneli-edhe ifuneloyeeyo atoosangalala maningi. Thindhilee latolimbi-a atu enango ira tavilimbi-edhenga vabasa lolaleela. Yohova unosimba basa linolaba abali naarongola oulula angalive ira aliwa katinooda laba vinjinji namwasa wa vyongo moda uli aliwa vaingumi yiwa.—Sal. 71:17, 18.

19. N’nga pivyongo viivi vyoi vinooda ukami-ani kwakwaneli-edha vifunelo vinyu vyauzimu?

¹⁹ Mudhi-elelenga vifunelo vinaode nyo vikwakwaneli-edha. Muvilimbi-edhenga kaana makalelo, anairi-e ira Yohova audhiveliwenganani. Mufunjedhenga madodoliso anairi-e ira Nlungu na gululee tau-indi-edhengani basa maningi. Mufunafunenga ndhila dhinakami-edhenanyo abali naarongolinyu mokwakwanela. * Mofwanafwana na Timoteo Yohova unodha uraeli-ani thitho “atu othene anodha ona ira munodhowa vasogolo.”—1 Timo. 4:15.