1. Le i bitungo bya muswelo’ka byotubwanya kwitungila?

 BYOTUDI bene Kidishitu ba bine, tusenswe Yehova bininge. Tusakanga mwingilo otumwingidila wikale muyampe kutabuka. Pa kulonga byonso byotubwanya mu mwingilo wa Yehova, tufwaninwe kwitungila bitungo bya ku mushipiditu, kimfwa kutamija ngikadila ya bwine Kidishitu, kwifunda bwino bwa kamweno, ne kukimba miswelo ya kwingidila bakwetu. *

2. Mwanda waka tufwaninwe kwitungila bitungo bya ku mushipiditu ne kulonga bukomo bwa kufikila’po?

² Mwanda waka tusakanga kwikala bengidi bayampe ba Yehova? Dibajinji, tusakanga kusangaja Tata wetu wa buswe udi mūlu. Yehova usangalanga paetumona twingidija bwino bwetu ne pa mfulo mu mwingilo wandi. Ne kadi, tusakanga kwendelela ku mushipiditu mwanda wa kukwasha bininge batutu ne bakaka. (1 Ts. 4:9, 10) Nansha shi ketudi balonge myaka inga mu bubine, batwe bonso tubwanya kwitungila bitungo bya ku mushipiditu. Tutalei muswelo otubwanya kwitungila’byo.

3. Mungya 1 Temote 4:12-16, le mutumibwa Polo wākankamikile Temote alonge bika?

³ Mutumibwa Polo paālembēle Temote mukanda wandi mubajinji, uno nkasampe muyampe wādi kala mukulumpe wa bwino. Inoko, Polo wāmukankamikile endelele nyeke ku mushipiditu. (Tanga 1 Temote 4:12-16.) Potanga binenwa bya Polo, ukamona’mba wādi usakila Temote endelele  mu bintu bibidi: atamije ngikadila ya bwine Kidishitu, kimfwa buswe, lwitabijo, kubulwa disubi ne kulumbulula bwino bwandi bwa kutanga ku meso a bantu, kwisāshila ne bwa kufundija. Na kino kimfwa kya Temote mu ñeni, pano tutalei muswelo otubwanya kwitungila bitungo byendele’mo, bibwanya kwitukwasha twilumbulule ku mushipiditu. Kadi tusa kwisambila ne pa bintu bimobimo byotubwanya kulonga pa kutandabula mwingilo wetu.

4. Mungya Bene Fidipai 2:19-22, le i bika byālengeje Temote bamwingidije bininge kudi Yehova?

⁴ Le i bika byālengeje Temote bamwingidije bininge kudi Yehova? I ngikadila yandi miyampe ya bwine Kidishitu. (Tanga Bene Fidipai 2:19-22.) Kupityila ku byobānenene Temote kudi Polo, tubwanya kumona’mba wādi mwityepeje, wa lulamato, nkanka, kadi ukulupilwa. Kadi wādi usenswe banababo ne kwibata mutyima bininge. O mwanda Polo wādi usenswe Temote, kadi kēkakilepo kumupa mingilo mikomo. (1 Ko. 4:17) Shi tutamija ngikadila isenswe Yehova, nandi uketusanswa kadi tukakwasha kipwilo bininge.​—Ñim. 25:9; 138:6.

5. (a) Le ubwanya kuyuka namani ngikadila ya bwine Kidishitu yosakilwa kulumbulula? (b) Monka mulombwela’kyo kifwatulo, i muswelo’ka ulonga uno kaka nkasampe bukomo bwa kufikila pa kitungo kyandi kya kwivwanina bakwabo lusa?

⁵ Witungile kitungo kipotoloke. Lombela ne kulangulukila pa ngikadila yobwanya kwilumbulula’mo. Tonga ngikadila kampanda yosaka kulumbulula. Le ukokeja kutamija bininge ngikadila ya lusa ne mutyima wa kukwasha batōtyi-nobe? Lelo usakilwa kwikala muntu uleta ndoe ne muntu ulekela bakwabo? Kwipangula mulunda okulupile akulombole mwa kwilumbulwila kukakukwasha.​—Nki. 27:6.

6. Le i muswelo’ka obwanya kutamija ngikadila kampanda?

⁶ Longa bukomo bwa kufikila pa kitungo kyobe. Le ukabwanya kufikila’po namani? Muswelo umo bidi, i na kwifunda senene ngikadila mine yosaka kwilumbulula’mo. Langa’po bidi shi ukimba kulonga bukomo bwa kutamija ngikadila ya kufwila bakwenu lusa. Ubwanya padi kushilula kutanga ne kulangulukila pa bimfwa bya mu Bible bya bantu bālekēle bakwabo na mutyima tō ne boba kebēbalekēlepo. Langulukila pa kimfwa kya Yesu. Wālekēle bakwabo na mutyima tō. (Luka 7:47, 48) Kātelepo mutyima pa bilubo byabo,  ino wātele mutyima pa byobādi babwanya kulonga. Inoko Bafadiseo ba mu mafuku a Yesu, abo “badi bamona bakwabo bu ba bitupu.” (Luka 18:9) Pa kupwa kulangulukila pa bino bimfwa, wiipangule amba: ‘Le i bika byomonanga mudi bakwetu? Le i ngikadila’ka yobadi nayo yontanga’ko mutyima?’ Shi ukomenwanga kulekela mukwenu, tompa kulemba ngikadila mivule miyampe yadi nayo. Kupwa wiipangule amba: ‘Le Yesu umonanga uno muntu namani? Le wadi wa kumulekela?’ Shi ulonge namino, ubwanya kushinta mulangilo obe. Dibajinji, bibwanya padi kwitulomba kulonga bukomo pa kulekela muntu witusanshije. Inoko shi tulonge bukomo bwa kwilumbulula, mwenda mafuku tukapēlelwa kulekela bantu.

7. Kukwatañana na Nkindi 22:29, le Yehova wingidijanga namani bengidi ba bwino dyalelo?

⁷ Kitungo kikwabo kyobwanya kwitungila i kya kwifunda mwa kwikadila na bwino kampanda. Langulukila pa bantu bavule bengilanga mu lūbako lwa mobo a Betele, Mobo a Bitango, ne Mobo a Bulopwe. Bavule mobadi befundanga mwa kwikadila na bwino na kwingila pamo na batutu ne bakaka ba bwino. Monka mokilombwedilwe pa kifwatulo, batutu ne bakaka befundanga mwa kwikadila na bwino bobasakilwa pa kulama Mobo a Bitango ne Mobo a Bulopwe. Mu uno muswelo ne mu miswelo mikwabo, Yehova Leza, “Mulopwe wa nyeke ne nyeke,” ne Yesu Kidishitu, “Mulopwe wa . . . balopwe,” baloñanga bintu bya kutendelwa kupityila ku bano bengidi ba bwino. (1 Tm. 1:17; 6:15; tanga Nkindi 22:29.) Tusakanga kulonga bukomo ne kwingidija bwino bwetu mwanda wa kutumbija Yehova, ke batwe benepo.​—Yoa. 8:54.

8. Le ukayuka namani bwino bosakilwa kwifunda?

⁸ Witungile kitungo kipotoloke. Le i bwino’ka bokimba kwifunda? Ipangula bakulumpe ba pa kyenu kipwilo nansha mutadi wa kipindi, bakulombole bwino bobalanga’mba ye bobwanya kwifunda. Shi kimfwa, abakunena kwilumbulula mu bwino bwa kwisamba ne kufundija, wibepangule bakulombole i bwino’ka bwa buneni bofwaninwe kwilumbulula’mo, kupwa longa bukomo bwa kwilumbulula. Le i muswelo’ka okabwanya kulonga namino?

9. Le ukalonga bukomo namani bwa kufikila pa kitungo kyobe kya kwifunda bwino?

⁹ Longa bukomo bwa kufikila pa kitungo kyobe. Langa’po bidi shi ukimba kulumbulula bwino bobe bwa kufundija. Ukefunda senene boloshile Wielele’ko Kutanga ne Kufundija. Shi abakupe kipindi kya kupityija ku kupwila kwa mu bukata bwa yenga, ubwanya kunena tutu wa bwino akwivwane powiibidija’kyo ne kukulombola muswelo obwanya kwilumbulula. Teakanya bipindi kumeso kwa kitatyi mwanda wa bantu bakamone amba wi nkanka kadi ukulupilwa.​—Nki. 21:5; 2 Ko. 8:22.

10. Leta kimfwa kilombola muswelo wa kwifunda mwa kwikadila na bwino.

¹⁰ Le ukalonga namani shi wi mwitungile kitungo kya kwikala na bwino mu bintu bikomo kulonga? Kokaleka’byo kulonga bukomo! Tutu umo witwa bu Garry kadipo ubwanya kutanga senene. Uvuluka mwaadi wivwanina bumvu shi katange na diwi dikatampe ku kupwila. Ino wadi ulonga bukomo bwa kwilumbulula. Pano unena’mba, kupityila ku bufundiji bobamufundije, ubwanya kunena mīsambo ku Mobo a Bulopwe, ku bitango bya kipindi, ne ku bitango bya ntanda!

11. Pamo bwa Temote, le i bika biketukwasha tulonge bivule mu mwingilo wa Yehova?

¹¹ Lelo Temote wāikele muneni muyampe nansha mufundiji muyampe? Bible kanenene’popo  kintu. Inoko na bubine, Temote wāingile mingilo yandi biyampe mwanda wālondele madingi a Polo. (2 Tm. 3:10) Netu shi tutamije bwino bwetu, tukabwanya kulonga bivule mu mwingilo wa Yehova.

12. Le wamwenine namani mu mingilo ingila bakwenu?

¹² Batwe bonso tumwenanga mu mingilo ingila bakwetu. Kitatyi kyotudi mu lupitalo, tufwijanga’ko pa kupempulwa na bakulumpe bengila mu Komite Utala Myanda ya Lupitalo ne mu Bisumpi bya Bapempula Babela. Kitatyi kyotwikonda na makambakano makatampe mu būmi bwetu, tusangalanga bininge shi mukulumpe wetūdila’ko kitatyi kya kwitwivwana ne kwitusenga. Shi tusakilwa wa kwitukwasha’ko potukendeja kifundwa kya Bible, tusangalanga shi pania wa bwino waitabija kuketutūla potukendeja kifundwa ne kwitupa madingi shi tubapu. Bano batutu ne bakaka bonso basangelanga kwitukwasha. Netu tukekala na ino nsangaji shi twitabija kwingidila banabetu. Yesu wānenene amba: “Nsangaji ya kupāna itabukile ya kupebwa.” (Bil. 20:35) Shi usaka kutandabula mwingilo obe mu ino miswelo nansha mu miswelo mikwabo, le i bika bikakukwasha ufikile pa bitungo byobe?

13. Le i bika byotufwaninwe kuvuluka potwitungila bitungo?

¹³ Koketungila kitungo kyokubwanyapo kufikila’po. Kimfwa ukokeja kulanga’mba, ‘nsakanga kulonga bivule mu kipwilo.’ Inoko padi i bikomo kuyuka muswelo wa kufikila pa kino kitungo, kadi ubwanya kumona’mba kebibwanikapo kuyuka kitatyi kyokafikila’po. O mwanda witungile kitungo kipotoloke kadi kyobwanya kufikila’po. Ubwanya enka ne kulemba kino kitungo ne muswelo obwanya kufikila’po.

14. Mwanda waka tufwaninwe kwikala na mutyima unekena potwitungila bitungo?

¹⁴ Potwitungila bitungo tufwaninwe ne kwikala na mutyima unekena. Mwanda waka? Mwanda ketuyukilepo senene ngikadilo yotubwanya kwikala’mo. Kimfwa, mutumibwa Polo wākweshe’ko pa kushimika kipwilo kipya mu kibundi kya Tesalonika. Kadi na bubine, wādi na kitungo kya kwikala kwine’kwa ne kukwasha bantu ba mu kino kipwilo kipya. Ino balwana bālengeja Polo atambe mu kibundi.  (Bil. 17:1-5, 10) Shi Polo wāshikete’mo, wādi wa kutūla banababo mu kyaka. Inoko Polo kālekele’byopo kwibakwasha. Wāibidile ngikadilo yaātenwe’mo. Kupwa wātuma Temote mu Tesalonika akavuije bisakibwa bya ku mushipiditu bya banababo bapya mu lwitabijo. (1 Ts. 3:1-3) Bine, bene Tesalonika bāsangele pa kwitabija kwāitabije Temote kwingila kokwa kwādi kusakilwa bukwashi!

15. Le kushinta kwa ngikadilo yotudi’mo kubwanya kushinta bitungo byetu namani? Leta kimfwa.

¹⁵ Netu tubwanya kuboila ñeni ku byātene Polo mu Tesalonika. Tubwanya padi kusaka kwingila mwingilo kampanda, ino bintu byoketuyukilepo byetukankaja kwingila mwingilo’wa. (Mus. 9:11) Shi bino ye bikutene, witungile kitungo kikwabo kyobwanya kufikila’po. Bino byo byalongele ba Ted ne Hiedi ba mulume ne mukaji. Batambile ku Betele pa mwanda wa misongo. Inoko buswe bobasenswe Yehova bwebalengeje bakimbe’ko miswelo mikwabo ya kutandabula mwingilo wabo. Dibajinji, bashilula kwingila bu bapania ba lonso. Mwenda mafuku, bebatonga bu bapania ba pa bula, kupwa bafundija Ted mwanda wa kwikala mpingakani wa mutadi wa kipindi. Ebiya myaka yadi itungīlwe batadi ba bipindi yashinta. Ba Ted ne Hiedi bajingulula’mba abakule bininge, kebakibwanyapo kwingila uno mwingilo. Nansha byobatyumukilwe mutyima, bajingulwile amba babwanya kwingidila Yehova mu miswelo mikwabo. Ted unena’mba, “twefundile amba tubwanya kwingidila Yehova mu miswelo mishileshile.”

16. Le i ñeni’ka yotubwanya kuboila ku kisonekwa kya Bene Ngalatea 6:4?

¹⁶ Ketubwanyapo kuyuka bintu byonso bilongeka mu būmi bwetu. O mwanda, ke biyampepo kudingakanya bulēme bwetu na madyese a mingilo otudi nao, nansha kudingakanya madyese adi na bakwetu na oa otudi nao. Hiedi ushintulula’mba, “nsangaji ikakupwa shi udingakanya būmi bobe na byobya bilongeka mu būmi bwa bakwenu.” (Tanga Bene Ngalatea 6:4.) I biyampe tukimbe miswelo yotubwanya kukwasha bakwetu ne kwingidila Yehova. *

17. Le i bika byobwanya kulonga pa kubwanya bisakibwa bya kupebwa mingilo?

¹⁷ Ukabwanya kwikala na dyese dya kwingila bivule mu mwingilo wa Yehova, shi wisuminwe bintu mu būmi bobe ne kuleka kwapula byampikwa kwendela’mo. Witungile bitungo bityebitye bikakukwasha ufikile pa bitungo bikatampe. Kimfwa, shi kitungo kyobe kikatampe  i kya kwikala pania wa lonso, ubulwepo pano kwingila bu pania mukwashi myeji yonso? Shi kitungo kyobe i kya kwingila bu mwingidi wa mingilo, ubulwepo kupityija kitatyi kilampe mu busapudi, kupempula babela ne banunu mu kyenu kipwilo? Byobya byolonga pano, bikakukwasha bakupe mingilo mikwabo mu mafuku a kumeso. Sumininwa kulonga bukomo mu mwingilo o-onso obakupa.​—Loma 12:11.

18. Monka mokilombwedilwe pa kifwatulo, le kimfwa kya kaka Beverley kibakufundija bika?

¹⁸ Ketwakudile bininge byotukomenwa kwitungila bitungo ne kufikila’po. Tulangulukilei bidi pa kimfwa kya kaka umo wa myaka 75, witwa bu Beverley. Wadi na misongo mikatampe yamulengeje akomenwe kwenda. Ino wadi wabila kulonga bivule pa kukwatakanya kampanye ka mu kitatyi kya Kivulukilo. Ebiya wetungila’ko bitungo byabwanya kufikila’po. Beverley paafikīle pa bitungo byandi bya kulonga kampanye ka Kivulukilo, wasangele bininge. Bukomo bwaalongele bwalengeje bakwabo nabo basapule bininge. Yehova umwene na mvubu mingilo ingila batutu ne bakaka banunu, nansha shi ngikadilo yobadi’mo keibalengejapo balonge byobasaka kulonga.​—Ñim. 71:17, 18.

19. Le i bitungo’ka bimobimo bya ku mushipiditu byotubwanya kwitungila?

¹⁹ Witungile bitungo byokokeja kufikila’po. Tamija ngikadila ikalengeja Yehova akusanswe. Wifunde bwino bukakulengeja wingidijibwe bininge na Leza ne na bulongolodi bwandi. Kimba mikenga ya kwingidila batutu ne bakaka bininge. * Pamo bwa Temote, na bukwashi bwa Yehova, “bantu bonso bamone patōkelela kwendelela koendelela.”​—1 Tm. 4:15.