1. Vyuma muka vyakushipilitu twatela kulitomena?

 ETU vaka-Kulishitu vamuchano twazanga chikuma Yehova. Twasaka kumuzachila namuchima wetu wosena. Shikaho twatela kulitomena vyuma vyakushipilitu nakuvitesamo. Vyuma kana shina kukafwa vandumbwetu, nakulinangula milimo yayilemu, nakupwa navilinga vyatela vaka-Kulishitu.

2. Mwomwo ika twatela kulitomena vyuma vyakushipilitu nakufwila kukilikita tuvitesemo?

² Mwomwo ika twatela kufwila kuzachila chikuma Yehova? Mwomwo twafwila kumwivwisa chikuma kuwaha. Yehova eji kwivwanga kuwaha kachi nge mwamona natuzachisa uhashi wetu mumilimo yenyi. Kaha nawa twatela kuzovoloka kushipilitu mangana tukafwe chikuma vandumbwetu. (Teso. 1, 4:9, 10) Tuvosena twatela kuzovoloka kushipilitu chamokomoko namyaka tunazachila Kalunga. Tushimutwilenu omwo tunahase kulingilamo ngocho.

3. Kweseka namazu ahali WaChimoteu 1, 4:12-16, uno kaposetolo Paulu akolezezele Chimoteu alinge vyuma muka?

³ Chimoteu apwile mukulwane muchikungulwilo halwola vamusonekelele mukanda watete kuli kaposetolo Paulu. Oloze Paulu amukolezezele atwaleho lika kuzovoloka kushipilitu. (Tangenu WaChimoteu 1, 4:12-16.) Nge namushinganyeka kanawa hamazu aze asonekele Paulu, namuwana nge asakile Chimoteu azovoloke mujijila jivali, yatete asakile Chimoteu apwenga navilinga vize vatela kupwa navyo vaka-Kulishitu vyakufwana nge zangi, nalufwelelo, nakupwa wakutoma, yamuchivali asakile lika kutangilanga kumeso avatu, nakuvalembelelanga, nakunangulanga. Tuchimutwilenu hali Chimoteu mangana tumone omwo kulitomena  vyakulinga vize natutesamo nachitukafwa tuzovoloke kushipilitu. Natushimutwila nawa jijila jikwavo jize tunahase kutohweselamo mulimo wetu wakwambulula.

4. Kweseka namazu ahali Wavaka-Fwilipi 2:19-22, vyuma muka vyalingishile Chimoteu vamuzachise kuli Yehova?

⁴ Vyuma muka vyalingishile Chimoteu apwenga mukakuzachila Yehova watwima? Mwomwo apwile navilinga vize vyatela vaka-Kulishitu. (Tangenu Wavaka-Fwilipi 2:19-22.) Chimoteu apwile wakulinyisa, wakushishika, mukakuzata natwima kaha nawa vandumbwenyi vamufwelelele, ngana muze namulumbununa Paulu. Chimoteu azangile chikuma vandumbwenyi nakuvazakama. Echi chikiko chalingishile Paulu amuhane milimo yayikalu. (Koli. 1, 4:17) Chochimwe nayetu nawa, Yehova atuzanga kaha mwatuzachisa muchikungulwilo nge natupwa navilinga vize azanga.—Samu 25:9; 138:6.

5. (a) Uno namutachikiza ngachilihi chuma chize mwatela kuzachilaho kushipilitu? (b) Kweseka namuvwimbimbi, uno ndumbwetu wapwevo wamukweze ali nakutesamo ngachilihi vyuma nalitomena kulinga mangana apwenga chikuma namuchima wakutetela?

⁵ Sakulenu kulinga chuma chize muli nakufwila kutesamo. Lombenu kuli Yehova nakushinganyeka vyuma vize munahase kuzachilaho mangana muzovoloke. Sakulenu chuma chimwe chize muli nakusaka kuzachilaho. Chakutalilaho, munahase kufwila kupwa chikuma namuchima wakutetela chipwe kufwila kukafwa vandumbwenu. Kutala muli nakufwila kutwama navakwenu mukuunda nakuvakonekelanga tahi? Munahase kuhulisa sepa lyenu uze mwafwelela mangana amilweze vyuma vize munahase kuzachilaho.—Vishi. 27:6.

6. Munahase kutesamo ngachilihi chuma munalitomena kulinga?

⁶ Kilikitenu mutesemo chuma munalitomena kulinga. Uno munahase kulinga ngachilihi ngocho? Jila yimwe munahase kulingilamo ngocho shina kulinangula chuma chize munakufwila kupwa nacho. Achishinganyekenu nge muli nakufwila kupwa namuchima wakukonekelanga vakwenu. Munahase kutanga nakushinganyeka hamijimbu yavatu vaze vasoneka muMbimbiliya vaze vakonekelelenga vakwavo, navaze kavakonekelelenga vakwavoko. Chakutalilaho, Yesu akonekelelenga vakwavo. (Luka 7:47, 48) Kaha nawa katalilenga hatutenga twavoko, oloze atalilenga havyuma vize vateselengamo. Oloze vaFwaliseu vamumakumbi aYesu “vamwenenga vakwavo kupwa vamokomoko.” (Luka 18:9) Nge munashinganyeka lyehi havyakutalilaho  kanevi, lihulisenu ngwenu, ‘Uno vakwetu ngwavamona ngachilihi? Vyuma muka vize ngweji kushishikanga muli vakwetu?’ Kachi nge chili nakumikaluhwila kukonekela mutu umwe, kaha sonekenu vilinga vyamwaza vyavivulu vize atwama navyo mutu kana. Lihulisenu ngwenu: ‘Uno Yesu amumona ngachilihi mutu kana? Uno nahase kumukonekela tahi?’ Kulinga vyuma mujila kana nachimikafwa mwalumune vishinganyeka vyenu. Hakuputuka chinahase kupwa chachikalu kukonekela mutu uze natulingi mwamupi. Oloze nge natutwalaho lika kuzata nangolo mangana tukonekelenga vaze navatulinga mwamupi, kaha nachitwashiwila kukonekela vakwetu kala lwola.

7. Kweseka naVishimo 22:29, Yehova asaka vandumbwetu vazachise ngachilihi uhashi wavo hakumuzachila makumbi ano?

⁷ Chuma chikwavo munahase kulitomena kulinga shina kulinangula mulimo waulemu uze naulingisa vamizachise muliuka lyaYehova. Tachikizenu ngwenu kuli nakusakiwa vandumbwetu vavavulu vakutunga jiMbetele, najiZuvo jaKukunguluka Chachinene najiZuvo jaWangana. Vandumbwetu vavavulu vanatachikiza mwakuzachila milimo kana mwomwo yakuzachila hamwe navandumbwetu vaze vatachikiza kanawa kuzata mulimo kanou. Ngana muze vanasolola hamuvwimbimbi vandumbwetu vosenava vali nakulinangula milimo yize nayivakafwa kulama kanawa jiZuvo jaKukunguluka Chachinene najiZuvo jaWangana. Yehova Kalunga uze apwa “Mwangana wahaya myaka namyaka,” naKulishitu Yesu, uze apwa “Mwangana wavamyangana,” vali nakutesamo vyuma vyavivulu chikuma kuhichila muli ava vandumbwetu. (Chimo. 1, 1:17; 6:15; tangenu Vishimo 22:29.) Twasaka kuzata nangolo mangana tuzachise uhashi wetu tutohwese Yehova keshi kulitohwesa etu vaveneko.—Yowa. 8:54.

8. Uno namutachikiza ngachilihi mulimo mwatela kulinangula?

⁸ Sakulenu kulinga chuma chize muli nakufwila kutesamo. Mulimo muka munakusaka kulinangula? Hulisenu vakulwane muchikungulwilo chenu chipwe kalama wakujinguluka mangana vamikafwe mutachikize mulimo uze munahase kulinangula. Chakutalilaho nge navamilweza ngwavo mwatela kuzachila hauhashi wenu wakuhanjika nakunangula, kaha vaulisenu vamilweze jila mwatela kulingilamo nakukilikita mangana muzovoloke. Uno namuhasa kutesamo ngachilihi vyuma kana?

9. Vyuma muka navimikafwa mutesemo chuma munalitomena?

⁹ Kilikitenu mutesemo chuma munalitomena. Chakutalilaho nge munakusaka kuhotola uhashi wenu wakunangula, kaha mwatela kutanga mbuloshuwa yaLihakeho Kutanganga naKunangulanga. Nge vanamihane chihande hakukunguluka chamukachi kachalumingo, kaha shimbu kanda muchihanjike hulisenu ndumbwetu wakuhya mangana evwilile kuchihande chenu, nakumikafwa vyuma mwatela kuzachilaho. Wahisenu kanawa chihande chenu mulwola nakuzata nangolo mangana mukachihanjike kanawa. Echi nachilingisa vatu vamifwelele.—Vishi. 21:5; Koli. 2, 8:22.

10. Hanenu chakutalilaho chize nachisolola omu tunahase kutesamo chuma tunalitomena.

¹⁰ Nyi ngachilihi nge mulimo munalitomena kuzata kamwautachikiza kanawako? Kaha kanda kuzeyako, twalenuho lika kulinangula. Ndumbwetu Garry katachikijile kutanga kanawako, eji kwanukanga omu evwilenga sonyi kutangilanga helu kukukunguluka chachikungulwilo. Oloze kazeyeleko atwalileho lika kuzachilaho, ambile ngwenyi mwomwo yakuzachisa vyuma vamunangwile oholyapwa jino eji kuhananga vihande kuZuvo yaWangana, nakukukunguluka chachihanda nechi changalila.

11. Vyuma muka navitukafwa tuzate milimo yayivulu muliuka lyaYehova ngana muze alingile Chimoteu?

 ¹¹ Uno Chimoteu apwile mukakuhanjika vihande wakwipangweji tahi? Mbimbiliya kayahanjikahoko. Oloze tunatachikiza ngwetu Chimoteu atwalileho lika kuzovoloka nakuzata milimo yenyi hakukavangiza chakutalilaho chaPaulu. (Chimo. 2, 3:10) Chochimwe nayetu nawa, kachi nge natuhotola uhashi wetu kaha natuzata milimo yayivulu muliuka lyaYehova.

12. Uno vandumbwenu vanamikafwe ngachilihi?

¹² Tuvosena tweji kwivwanga kuwaha nge vandumbwetu navatukafwa. Nge tuli muchipatela tweji kusakwililanga nge navatutambukila kuli vakulwane vaze vazata mujiKomiti jaKulivwasana naVipatela chipwe vaze vazata muMazavu aVaka-Kumenekela Vaveji. Nge tuli nakumona ukalu tweji kwivwanga kuwaha, nge vakulwane navatutambukila nakutwivwilila omu natuhanjika nakutuvendejeka. Nge chilongesa chetu ali naukalu tweji kwivwanga kuwaha kutwaminyina chilongesa kana napayiniya wakulindunuka uze mwatukafwa. Vandumbwetu veji kwivwanga kuwaha kutukafwa. Nayetu tweji kwivwanga kuwaha kulisuula mangana tukafwe vandumbwetu. Yesu ambile ngwenyi: “Kuhana cheji kunehanga kuwahilila chikuma kuhambakana kutambula.” (Vili. 20:35) Nge munakusaka kutohwesako mulimo wenu mujijila kaneji chipwe mujijila jeka, kaha vyuma muka navimikafwa mangana mutesemo vyuma munalitomena?

13. Nge tunakusakula kutesamo chuma chimwe, kaha vyuma muka twatela kwanuka?

¹³ Kanda kuzata kaha chakuzeneka kulitomena chuma muli nakufwila kutesamoko. Chakutalilaho, munahase kushinganyeka ngwenu, ‘nguli nakusaka kuzata milimo yayivulu muchikungulwilo.’ Oloze chinahase kumikaluhwila kutesamo vyuma munalitomena nakwijiva numba nge munavitesamo lyehi. Echi chikiko chatela kumilingisa mulitomene kutesamo chuma chimwe kaha. Munahase kusoneka chuma munalitomena kulinga, nakuwana jila namuchiteselamo.

14. Omu natulitomena vyakulinga, mwomwo ika chapwila chachilemu kutachikiza hakumina ngolo jetu?

¹⁴ Hakulitomena vyakulinga twatela nawa kutachikiza hakumina ngolo jetu. Mwomwo ika? Mwomwo akatwatwama nangolo jakwolola vyuma nge chiyoyelo chetu chinalumukako. Chakutalilaho, Paulu akafwile kutunga chikungulwilo chachihya munganda yaTesolonyika, kaha nawa afwililile kutwama vene kuze mangana akafwe  vaze vaka-Kulishitu vavahya. Oloze achinyinemo mwomwo yakumufumbukila kuli vaka-kole. (Vili. 17:1-5, 10) Nge Paulu atwamine lika kuze kachi ahakile kuyoya chavandumbwenyi muponde. Numba ngocho, Paulu kazeyele kuvakafwako, oloze etavililile vyuma vyalumukile mukuyoya chenyi. Kutwala muze atumine Chimoteu mangana ayenga nakuzakama vandumbwenyi vavahya kushipilitu vaze vapwile muchikungulwilo kana. (Teso. 1, 3:1-3) Twafwelela vandumbwetu muTesolonyika vevwile kuwaha hakumona Chimoteu nalisuula kwiza nakuvakafwa vazachile kanawa Yehova.

15. Uno kwalumuka chavyuma mukuyoya chetu chinahase kukwata ngachilihi havyuma twalitomenene kulinga? Hanenu chakutalilaho.

¹⁵ Tunahase kulinangula kuli Paulu, havyuma vyamusolokelele omu apwile muTesolonyika. Tunahase kufwila kuzata mulimo umwe muliuka, oloze kwalumuka chavyuma vimwe mukuyoya chetu chinahase kutuhonesa kuzata mulimo kana. (Kwambu. 9:11) Nge omu mukiko chili chiyoyelo chenu, kaha sakulenu mulimo weka uze munahase kutesamo kweseka noho hakumina ngolo jenu. Omu mukiko alingile ndumbwetu Ted namukamahyenyi Hiedi. Vafumine haMbetele mwomwo yamisongo, oloze kuzanga Yehova chavakafwile vatonde jijila jeka jakutohweselamo mulimo wavo wakwambulula. Chatete, vaputukile kuzata upayiniya washimbu yosena, kutwala muze vavatongwele kupwa vapayiniya vakulipwila, kaha ndumbwetu Ted vamutongwele kupwa muka-kukwachilako kalama wakujinguluka. Nakushimbula chiku myaka yakusemuka vatongwela tulama vakujinguluka yalumukile. Kaha ava vandumbwetu vatachikijile jino ngwavo kaveshi kuhasa kutwalaho kuzata ou mulimo kanako. Numba tuhu vevwile kupihya mwomwo yakuhona kutwalaho kuzata mulimo kana, oloze vashinganyekele jijila jeka jize najivakafwa kutwalaho kuzachila Yehova. Ndumwetu Ted ambile ngwenyi: “Tunalinangula jijila jajivulu jakuzachilamo Yehova.”

16. Chishina muka natulinangula kumukanda Wavaka-Ngalesha 6:4?

¹⁶ Katweshi nangolo havyuma vinahase kutusolokela mukuyoya chetuko. Shikaho katwatela kushinganyeka ngwetu milimo tweji kuzatanga yikiko yatulingisa Yehova atumone kupwa tuvavalemuko, chipwe kwesekesa milimo yize tuli nakuzata kumilimo yize vali nakuzata vandumbwetuko. Ndumbwetu Hiedi ambile ngwenyi: “Mutu keshi kuhasa kupwa wakuwahililako nge mwalyesekesa kuli vakwavo.” (Tangenu Wavaka-Ngalesha 6:4.) Shikaho chapwa chachilemu kuwanako jijila jakukafwilamo vandumbwetu, nomu nawa tunahase kutwalaho kuzachila Yehova. *

17. Vyuma muka mwatela kulinga mangana mutengamo kuzata milimo muliuka?

 ¹⁷ Munahase kuzachila Yehova milimo yakulisezaseza chikalu kaha kumunashiwisako chiyoyelo chenu nakuhona kulilunjikila mikuli. Litomenenu kutesamo vyuma vyavindende vize navimikafwa kukatesamo vyuma vyavinene. Chakutalilaho, kachi nge mwalitomena kuzata upayiniya washimbu yosena, kaha munahase kuvangila kuzata upayiniya wakukafwa. Nge muli nakusaka kupwa muka-kuzata muchikungulwilo, kaha munahase kuzata chikuma mumulimo wamuwande, nakumenekela vaveji, nakumenekela tushinakaji muchikungulwilo chenu. Milimo namuzata oholili nayimikafwa mukazate kanawa milimo yayivulu kulutwe. Oholili zatenu nangolo kala milimo yosena yize navamihana.—Loma 12:11.

18. Nganomu vanasolola mumuvwimbimbi, vyuma muka natulinangula kuli ndumbwetu Beverley?

¹⁸ Kanda kushinganyeka ngwenu enu jino munakolo kamweshi kuhasa kulitomena vyakulingako. Talenu chakutalilaho chandumbwetu wapwevo Beverley, wamyaka yakusemuka 75, avijile musongo waunene uze wamulingishile ahone kutambuka. Oloze afwililile kwazana mukapeni yamungonde yaKwanuka Kufwa chaMwata kaha alitomenenene vyuma atelelele kulinga. Beverley evwile kuwaha omu ateselemo vyuma alitomenene mangana azane mukapeni kaneyi. Vyuma alitomenenene vyakafwile vandumbwenyi vazate chikuma mumulimo wakwambulula. Yehova eji kumonga milimo veji kumuzachilanga vandumbwetu vatushinakaji kupwa yayilemu numba tuhu ngolo javo jinavakehe.—Samu 71:17, 18.

19. Vyuma muka vyakushipilitu vize tunahase kulitomena kulinga?

¹⁹ Litomenenu vyakulinga vize namuhasa kweseka noho hakumina ngolo jenu. Fwilenu kupwa navilinga vize navilingisa Yehova amizange. Linangulenu milimo yize nayimilingisa vamizachise kuli Yehova nakuliuka lyenyi. Wanenu jijila jize najimikafwa muzachile chikuma vandumbwenu. * Yehova nahase kumikisula “mangana kuzovoloka [chenu] vachimone kuli vatu vosena” ngana muze chapwile kuli Chimoteu.—Chimo. 1, 4:15.