1. Yikonkwanyinyi yitwatela kufwila mumudimu waYehova?

 CHINELI tudi akaKristu alala, twamukeña Yehova nankashi. Tunakukeña kumukalakela Yehova hakumina ñovu jetu. Neyi tunakukeña netu tudikiti nankashi mumudimu waYehova, twatela kwimika yikonkwanyi yidi neyi kwikala nayilwilu yatela kwikala namukaKristu, kudiza yuma yayiha nikuyikalakela amanakwetu niahela.

2. Muloñadi chitwatela kwimikila yikonkwanyi mumudimu waYehova nikuzata nañovu kulonda tuyishikiji?

² Muloñadi chitwatela kufwila kwikalila ambuña aYehova amawahi? Sweje-e, tunakufwila kumutiyisha kuwaha Tata yetu wamwiwulu wukweti kukeña. Yehova watiyaña kuwaha neyi atumona tunakuzatisha waana wetu niñovu chikupu mumudimu windi. Kubombelahu, tunakukeña kuzata nankashi mumudimu waYehova kulonda tuyikwasheña nankashi amanakwetu niahela. (1 Tes. 4:9, 10) Hela chakwila tunashimbuli muchalala twatela kudikita nankashi mumudimu waYehova. Tutalenu chitunateli kwila mwenimu.

3. Neyi chinasonekiwu ha 1 Timotewu 4:12-16, kapostolu Pawulu wamukolesheli Timotewu kwiladi?

³ Hampinji yamusonekeleliwu Timotewu mukanda watachi kudi kapostolu Pawulu, iwu mukwenzi weyala wadiña dehi mukulumpi wakulukila. Hela chochu, Pawulu wamukolesheli kutwalekahu kupaminaku. (Tañenu 1 Timotewu 4:12-16.) Neyi munakutaña awa amazu aPawulu, mukumona nenu wakeñeleña Timotewu ayiliku hambidi munjila jiyedi kuhitila mukwikala nayilwilu yawakaKristu yidi neyi kukeña,  chikuhwelelu, kudihemba nikuwahishaku yuma yimu chidi neyi kutaña kudi antu amavulu, kukonkomwena nikutañisha. Tukuhanjeka hachakutalilahu chaTimotewu kulonda tumoni kwimika yikonkwanyi yayiwahi chikunateli kutukwasha kwikala ambuña aYehova amawahi. Tukuhanjeka cheñi njila mutunateli kudikitila mudimu wetu.

4. Kwesekeja naAFwilipi 2:19-22, chumanyi chaletesheli Timotewu amuzatishi nankashi kudi Yehova?

⁴ Chumanyi chamuletesheli Timotewu amuzatishi nankashi kudi Yehova? Muloña wadiña nayilwilu yayiwahi yawakaKristu. (Tañenu AFwilipi 2:19-22.) Neyi tutala chamulumbulwiliwu Timotewu kudi Pawulu, amushimuna nawu wadiña wadizoza, washinshika, wadikita nawa washindamenewa. Wadiña wayikeña nankashi amanakwindi nawa wayakameneneña. Chafuminimu, Pawulu wamukeñeli nankashi Timotewu nawa wamwinkeli nikuzata nyidimu yakala. (1 Kor. 4:17) Munjila yoyimu, Yehova wakutukeña nawa wukutuzatishaña nankashi muchipompelu neyi twikala nayilwilu yakeñayi.—Mas. 25:9; 138:6.

5. (a) Munateli kufuukulahu ñahi chilwilu chawakaKristu chimunakukeña nenu mwikali nachu? (b) Neyi chinamwekeshiwu hamwevulu, muhela wakansi nakuzata ñahi kwesekeja nachikonkwanyi chindi kulonda ayitiyileña akwawu wushona?

⁵ Tondenu chilwilu chimunakukeña kwikala nachu. Lombelenuhu nikutoñojokahu hachilwilu chimukweti nawa chimunakukeña kuwahishaku. Tondenu chilwilu chimunakukeña kuzatilahu. Chakutalilahu, kwila musweja kwikala nawushona nikukwasha akwenu akakwitiya nehi? Munakukeña kwikala akakuleta kuwunda nawa anakenaña? Munateli kwihulaku ibwambu denu imwakuhwelela kulonda ayilejiku chimunateli kuzatilahu.—Yish. 27:6.

6. Munateli kwila ñahi hakwila nawu mwikali nanochu chilwilu chimunakukeña kwikala nachu?

⁶ Zatenu kulonda mushikiji chikokwanyi chenu. Munateli kuzata ñahi? Njila yimu hikudiza hachilwilu chimu chimunakukeña kuwahishaku. Twili netu munakukeña nankashi mwanakeneña akwenu. Munateli kutachika kutaña nikutoñojoka hansañu yawantu ashimunawu muBayibolu anakeneni akwawu chakufuma hamuchima niabulili kwanakena akwawu. Talenu chakutalilahu chaYesu. Wayanakeneneña antu. (Luka 7:47, 48)  Cheñi, hashileña muchima hayiluwa yawuku, ilaña hayuma yayiwahi yinateli kwilawu. Kwambukaku, Afwarisi mumafuku aYesu “amweneña akwawu nawu amukunkulwayi.” (Luka 18:9) Hanyima yakutoñojoka nankashi haniyi yakutalilahu, dihulenu nenu: ‘Yumanyi yinamonaña mudi akwetu? Yilwilwinyi yikwetiwu yinatela kushinshikahu?’ Neyi chayikalilaña kwanakena muntu, esekenu kusoneka yilwilu yejima yayiwahi yikwetiyi. Nkumininaku dihulenu nenu: ‘Yesu wamumonaña ñahi iwu muntu? Wukumwanakena?’ Neyi tudizaña muniyi njila chikutukwasha kuhimpa yitoñojoka yetu. Chatachi, twatela kuzata nañovu kulonda tumwanakeni muntu wunatuneñeshi. Ilaña neyi tuzataña nañovu kulonda tuwahishiku yilwilu yetu, tukamwanakenaña.

7. Kwesekeja naYishimu 22:29, munjilanyi Yehova mwayizatishilañayi antu eluka nyidimu makonu?

⁷ Chikonkwanyi chikwawu chimunateli kwimika hikudiza mudimu wunateli kuyikwasha. Toñojokenu hakuvula kwawantu anakukeñeka hakutuña maBeteli, Matala Amaneni Akupompela niMatala aWanta. Antu amavulu atuñili adizili nyidimu kuhitila mukuzatila hamu nawamanakwetu niahela eluka nyidimu. Neyi chinamwekeshiwu mumwevulu, awa amanakwetu niahela anakudiza nyidimu yinakukeñeka yikuyikwasha kuhemba chiwahi Matala Amaneni Akupompela niMatala aWanta. Muniji njila ninjila jikwawu, Yehova Nzambi, “Mwanta wahaya nyaaka,” niKristu Yesu, “Mwanta wawanyanta,” anakuzata nyidimu yakuhayamisha kuhitila mudi awa akakukalakala. (1 Tim. 1:17; 6:15; tañenu Yishimu 22:29.) Tunakukeña kuzata nañovu nikuzatisha yuma yitunadizi kulonda tumushimeki Yehova, bayi etu aweniku nehi.—Yow 8:54.

8. Munateli kufuukulahu ñahi hachuma chimunakukeña nenu mudizi?

⁸ Tondenu chikonkwanyi chimunakukeña kuzatilahu. Chumanyi chimunakukeña kuzatilahu? Ihulenu akulumpi amuchipompelu chenu nawa neyi chinatwesheki nkoñi wañinza ayileji chikonkwanyi chinakutoñojokawu nawu mwatela kuzatilahu. Chakutalilahu, neyi ayileja nawu muwahishiku nhoshelu yenu nintañishilu yenu, yilejenu ayileji hachilwilu chimwatela kuzatilahu. Kuhiñahu, zatenu nañovu kulonda muwahishiku. Munateli kuzatilahu ñahi?

9. Munateli kwila ñahi hakwila nawu mushikiji chikonkwanyi chakufwila kwiluka chuma chimu?

⁹ Zatenu nañovu kulonda mushikiji chikonkwanyi chenu. Twili netu munakukeña kwikala ntañishi wamuwahi. Mwatela kudiza nankashi broshuwa yaShenu Muchima Kukutaña nikuKutañisha. Neyi anayinki mpanji mukupompa kwamukachi kamulungu, mwatela kwihulaku manakwetu wapama kulonda atiyilili kumpanji yenu henohu kanda muyihani nawa ayileji himwatela kuwahishaku. Loñeshenu mpanji yenu henohu kuchidi mpinji kulonda antu amoni nawu mwazataña nañovu nawa ayishindamena.—Yish. 21:5; 2 Kor. 8:22.

10. Shimunenu chakutalilahu chimu chinakumwekesha chitunateli kwila neyi tunakukeña kwiluka chuma chitunakufwila.

¹⁰ Indi neyi chuma chimunakukeña kwila munabombeli yuma yimwabula kwiluka? Bayi muzeyaku! Manakwetu Garry wakañenyeña kutaña chiwahi. Wanukaña chatiyiliyi nsonyi hampinji yatañileñayi hakupompa kwachipompelu. Ilaña watwalekelihu kuzata nañovu. Ichi wahoshaña nindi wahanaña jimpanji Mwitala daWanta, hakupompa kwañinza  nihakupompa kweneni muloña wayuma yamudizishiliwu!

11. Kufwana Timotewu, chumanyi chinateli kutukwasha hakwila nawu atushilihu nyidimu yikwawu?

¹¹ Timotewu wekalili nhoshi waya mpuhu tahindi ntañishi wamuwahi? Bayibolu yashimuna wanyi. Ilaña chakadi nikujina Timotewu wazatileña chiwahi nyidimu yindi hamuloña wakulondela kufumba kwaPawulu. (2 Tim. 3:10) Munjila yoyimu, neyi tuzataña nañovu, tukushikahu kulonda atushilihu nyidimu yikwawu.

12. Amanakwenu niahela anayikwashi ñahi?

¹² Wejima wetu twatiyaña kuwaha chatukwashañawu kudi akwetu. Neyi tudi muchipateli, twatiyaña kuwaha chatuhempulañawu kudi akulumpi ekala muKometi Yatiyañanaña naYipatela hela Akulumpi Ayaña Nakuhempula Ayeji. Neyi tudi nakukala muchihandilu chetu, twatiyaña kuwaha neyi mukulumpi wakamenaña enza nakututiyilila nikutukundeja. Neyi tunakukeña netu atukwashiku kulombola kadizi, twatiyaña kuwaha neyi payiniya eteja kuya nakudizisha nindi nawa atukwashaku. Awa amanakwetu niahela ejima atiyaña kuwaha kutukwasha. Ninetu tunateli kwikala namuzañalu neyi tudihanaña kukalakela amanakwetu. Yesu wahosheli nindi: “Mukuhana mwekala muzañalu chikupu kubadika wekala mukutambwila. (Yilw. 20:35) Neyi munakukeña kudikita nankashi mumudimu waYehova muniji njila, chumanyi chinateli kuyikwasha?

13. Chumanyi chitwatela kwanukaña neyi tunakwimika chikonkwanyi?

¹³ Bayi mukumina dakuhosha hohu nenu inakwimika chikonkwanyiku. Chakutalilahu, munateli kutoñojoka nenu, ‘Inakukeña kudikita nyidimu yayivulu muchipompelu.’ Ilaña chinateli kuyikalila kwiluka chimunateli kushikija ochu chikonkwanyi, nawa mukwiluka wanyi neyi munachishikiji hela nehi. Dichi tondenu chikonkwanyi chimunamoni nenu mukuchishikija. Munateli kuchisoneka nikwiluka chimunateli kuchishikija.

14. Muloñadi chitwatela kubula kudikoleshela yuma neyi tunakwimika yikonkwanyi?

¹⁴ Cheñi neyi tunakwimika chikonkwanyi bayi tudikoleshela yumaku. Muloñadi? Muloña yuma yahimpikaña muchihandilu. Tuhanenu chakutalilahu: Kapostolu Pawulu  wakwashiliku kutuña chipompelu mumusumba waTesalonika. Nawa chakadi nikujina wakeñeleña kushakama kuna kulonda akwashi awa akaKristu amaha. Ilaña akakudimbulula amutemwini Pawulu muniwu musumba. (Yilw. 17:1-5, 10) Neyi Pawulu washakamini, wadi kuyisha amanakwindi mukukala. Ilaña Pawulu halekeli kuyikwashaku. Dichi, welili kwesekeja nachadiña yuma. Kuhiñahu, wamutemesheli Timotewu kulonda ayi nakuyikolesha awa akakwitiya amaha muTesalonika. (1 Tes. 3:1-3) ATesalonika atiyili kuwaha chayiliyi Timotewu nakuyikalakela hampinji yakeñeleñawu wukwashu!

15. Chikonkwanyi chetu chinateli kuhimpika ñahi neyi yuma yinahimpiki? Shimunenu chakutalilahu.

¹⁵ Twatela kudizila kuchuma chamumwekeneni Pawulu muTesalonika. Tunateli kwimika chikonkwanyi, ilaña yuma yinateli kuhimpika chakwila yinateli kutukañesha kwila ochu chuma chitunakufwila kwila. (Mukwa. 9:11) Neyi diku kukala kumukweti tondenu chikonkwanyi chacheñi chimukushikija. Ichi dichuma cheliliwu adisumbula aTed naHiedi. Afumini haBeteli muloña wayikatu. Ilaña hamuloña wakumukeña Yehova akeñeli njila yikwawu mwatela kudikitilawu nankashi mudimu wawu. Chatachi, atachikili wupayiniya wampinji yejima. Mukuhita kwampinji, ayitondeli kwikala apayiniya adimena, nawa Ted amudizishili kwikala nkoñi wañinza wakukwasha. Nkumininaku, yaaka yakeñekaña kudi ankoñi añinza yahimpikili. Ted niHiedi elukili nawu anakuli dehi hiyakutwesha kukalakala iwu mudimuku. Hela chakwila aneñeli, elukili nawu anateli kumukalakela Yehova munjila yikwawu. Manakwetu Ted wahosheli nindi: “Tunadizi netu tunateli kumukalakela Yehova munjila jambokamboka bayi munjila yimu hohuku.”

16. Chumanyi chitunakudizila hamukanda waAÑalija 6:4?

¹⁶ Hitunateli kukañesha yuma yejima yamwekanaña muchihandiluku. Dichi, chalema kubula kutoñojoka netu twalema kudi Yehova muloña wanyidimu yitwazataña nikubula kudesekeja nawakwetu akweti nyidimu yitunakubula kuzata. Manakwetu Hiedi walumbulwili nindi, “Neyi wesekejaña yuma yinakumwekana muchihandilu chawakwenu nachihandilu cheyi muzañalu wamanaña.” (Tañenu AÑalija 6:4.) Dichi chalema kukeñaku jinjila mutunateli kukwashila akwetu nikumukalakela Yehova. *

17. Chumanyi chimunateli kwila hakwila nawu mukashikihu kuzata nyidimu yikwawu?

 ¹⁷ Peleshenuku chihandilu chenu nikutondolwela nyikudi kulonda mwiikali nachihandilu chapela chikuyikwasha kuzata nankashi mumudimu waYehova. Imikenu yikonkwanyi yanyanya kulonda yikayikwashiku kushikija yikonkwanyi yamaneni. Chakutalilahu, neyi munakukeña kuzata wupayiniya wampinji yejima, kwila mutachikaku nawupayiniya wakukwasha hadi mpinji yayilehi nehi? Neyi munakukeña kwikala nkoñi wakuzatila zatenuña mpinji yeneni mumudimu wakushimwina kuya nakuhempula ayeji niatushinakaji amuchipompelu chenu. Yuma yimukwiluka chayinu mpinji yikayikwasha kudikita nyidimu yayivulu kumbidi. Fwilenuña kuzata hanakumini ñovu jenu mumudimu wejima wukuyinkawu.—Rom. 12:11.

18. Neyi chinamwekeshiwu mumwevulu, yumanyi yimukudizila kudi Beverley?

¹⁸ Hela chakwila twakula dehi tunateli kwimika yikonkwanyi mumudimu waYehova. Talenu chuma chelili muhela Beverley wudi nayaaka 75. Wakatili nankashi chakwila chamukalilileña kwenda. Ilaña wafwilileña kuzataku nankashi mukampeni yakutambika antu kuChanukishu. Dichi wemikili yikonkwanyi yikutwesha kuzatayi. Muhela Beverley chashikijiliyi chikonkwanyi chindi chakuzata kampeni, wazañaleli nankashi. Chuma cheliliyi chayisañumwini antu amakwawu kuzata nankashi mumudimu wakushimwina. Yehova walemesha nankashi mudimu wazataña amanakwetu niahela akula dehi hela chakwila kudi kukala kwayikañeshaña.—Mas. 71:17, 18.

19. Yikonkwanyi yamuchidinyi yakuspiritu yitwatela kwimika?

¹⁹ Imikenuña yikonkwanyi yimukutwesha kuzata. Ikalenu nayilwilu yamutiyishaña Yehova kuwaha. Dizenu nyidimu yikuletesha Nzambi nikuloñesha kwindi ayizatisheña. Keñakeñenu njila mumunateli kuyikalakela amanakwenu niahela chikupu. * Kufwana Timotewu, Yehova wukuyikiswila nawa ‘kupama kwenu akukumonaña hatooka kudi antu ejima.’—1 Tim. 4:15.