1. Ki lobzektif spiritiel nou kapav fixe?

 NOU bien kontan Zeova parski nou bann vre Kretien! Nou anvi fer nou best pou servi Li. Me pou ki nou reisi fer nou best, nou bizin fixe bann lobzektif spiritiel, kouma par exanp, kiltiv bann kalite Kretien, devlop bann kapasite ki bien itil, ek rod bann fason pou ed lezot. b

2. Kifer nou bizin fixe bann lobzektif spiritiel ek fer zefor pou realiz zot?

² Kifer nou bizin ena dezir pou fer plis dan nou servis pou Zeova? Rezon pli inportan, se parski nou anvi fer plezir nou Papa, Zeova. Li bien kontan kan Li trouv nou servi nou bann kapasite pou fer nou best pou servi Li. Anplis, kan nou fer plis pou Zeova, nou vinn pli itil pou nou bann frer ek ser. (1 Tes. 4:9, 10) Ninport ki kantite letan nou dan laverite, nou tou nou kapav fer plis pou Zeova. Anou gete kouma nou kapav fer sa.

3. Dan 1 Timote 4:12-16, ki kitsoz lapot Pol ti ankouraz Timote pou fer?

³ Mem si Timote ti zenn kan lapot Pol ti ekrir li so premie let, Timote ti deza enn ansien ki ena lexperyans. Kanmem sa, Pol ti ankouraz li pou kontign fer plis pou Zeova. (Lir 1 Timote 4:12-16.) Kan nou reflesi lor bann parol ki Pol ti dir Timote, nou trouve ki li ti anvi ki Timote fer progre dan de domenn. Premierman, Timote ti bizin kontign kiltiv bann kalite Kretien, kouma lamour ek lafwa. Ek deziemman, li ti bizin kontign amelior bann kapasite kouma lir an piblik, ansegn lezot, ek ankouraz zot. Anou gete kouma lexanp Timote kapav ed nou pou fixe bann lobzektif ki rezonab, pou ki nou kapav fer plis  pou Zeova. Nou pou gete osi kouma nou kapav fer plis dan nou minister.

4. Dapre Filipien 2:19-22, kifer Timote ti enn serviter Zeova ki ti bien itil?

⁴ Kifer Timote ti enn serviter Zeova ki ti bien itil? Se parski li ti ena bann zoli kalite Kretien. (Lir Filipien 2:19-22.) Kan nou lir bann parol lapot Pol, nou trouve ki Timote ti ena limilite, li ti fidel, li ti serye dan so travay, ek li ti enn kikenn ki kapav fer konfians. Li ti ena boukou lamour, ek li ti gagn traka so bann frer ek ser. Akoz samem ki Pol ti kontan Timote, ek li pa ti ezite pou donn li bann responsabilite ki difisil. (1 Kor. 4:17) Dan mem fason, si nou kiltiv bann kalite ki fer Zeova plezir, Li pou kontan nou, ek nou pou pli itil dan lasanble.​—Ps. 25:9; 138:6.

5. (a) Kouma to kapav deside ki kalite to anvi devlope? (b) Dapre zimaz pou sa paragraf-la, kouma sa zenn ser-la pe montre ki li’nn fixe li lobzektif pou montre konpasion anver lezot?

⁵ Swazir enn kalite bien presi ki to anvi devlope. Priye Zeova, ek reflesi lor bann kitsoz ki to bizin ameliore dan to personalite. Swazir enn kalite bien presi ki to anvi devlope. Par exanp, kitfwa to kapav desid pou ena plis konpasion, setadir pou ogmant to dezir pou ed to bann frer ek ser? Ouswa to kapav fer zefor pou pardonn lezot ek pou res anpe avek zot? To kapav osi demann enn bon kamarad bann konsey pou to progrese dan sa domenn-la.​—Prov. 27:6.

6. Kouma to kapav devlop enn kalite?

⁶ Fer zefor pou realiz to lobzektif. Kouma to kapav fer sa? Enn fason ki to kapav fer sa, se kan to etidie bien sa kalite ki to anvi devlope la. Fer koumadir to anvi fer plis zefor pou pardonn lezot. Kitfwa to kapav koumans par lir ek reflesi lor lexanp bann personaz Biblik ki ti dispoze pou pardonn lezot, ek osi lor bann ki pa ti anvi pardonn lezot. Anou pran lexanp Zezi. Li ti dispoze pou pardonn lezot. (Lik 7:47, 48) Li pa ti res konsantre lor zot bann erer. Okontrer, li ti trouv bann zefor ki zot ti pe fer. Parkont, bann Farizien ti ena “mepri pou lezot.” (Lik 18:9) Apre ki to’nn bien reflesi lor sa bann lexanp-la, to kapav demann tomem: ‘Kouma eski mo konsider  lezot? Parmi bann kalite ki zot ena, lor lekel mo konsantre mwa?’ Si to gagn difikilte pou pardonn enn kikenn, fer enn lalis bann zoli kalite ki sa dimounn-la ena. Apre sa, demann tomem: ‘Kouma Zezi konsider sa dimounn-la? Eski Zezi ti pou pardonn li?’ Kan nou reflesi lor bann kestion koumsa, sa kapav ed nou pou sanz nou fason panse. O-koumansman, kitfwa nou pou bizin fer boukou zefor pou pardonn enn kikenn ki’nn ofans nou. Me si nou kontign fer zefor, avek letan li pou vinn pli fasil pou nou pardonn lezot.

7. An-akor avek Proverb 22:29, kouma Zeova pe servi bann zouvriye ki kalifie azordi?

⁷ Enn lot lobzektif ki to kapav fixe, se pou devlop enn kapasite ki bien itil. Sey mazine ki kantite dimounn bizin pou aranz bann Betel, bann Lasal Lasanble, ek bann Lasal Renion. Boukou parmi sa bann dimounn-la inn travay ar bann frer ek ser ki ena lexperyans, ek gras-a sa, zot inn vinn bann zouvriye ki kalifie. Parey kouma zimaz pou sa paragraf-la montre, bann frer ek ser inn aprann kouma pou fer mintenans bann Lasal Lasanble ek bann Lasal Renion. Dan sa domenn-la ek dan lezot domenn ankor, Zeova, Lerwa “pou leternite,” ek Zezi, “Lerwa bann lerwa,” pe servi bann zouvriye ki kalifie pou fer bann kitsoz extraordiner. (1 Tim. 1:17; 6:15; lir Proverb 22:29. c) Nou anvi travay dir ek servi nou bann kapasite pou donn laglwar Zeova, pa pou nou rod nou prop laglwar.​—Zan 8:54.

8. Kouma to kapav deside ki kapasite to anvi devlope?

⁸ Swazir enn kapasite bien presi ki to anvi devlope. Ki kapasite to kapav devlope? Demann bann ansien to lasanble, ek kitfwa to responsab sirkonskripsion, ki kapasite zot panse to kapav devlope. Par exanp, si zot konsey twa pou amelior to kapasite pou ansegne ek to fason koze, to kapav demann zot ki kalite kapav ed twa pou fer sa. Lerla, to kapav fer zefor pou to amelior twa dan sa domenn-la. Kouma to kapav fer sa?

9. Kouma to kapav devlop enn kapasite?

⁹ Fer zefor pou realiz to lobzektif. Fer koumadir to anvi amelior to kapasite pou ansegne. To kapav etidie brosir Amelior To Lektir ek To Lansegnman. Si to ena enn size dan renion lasemenn, avan ki to fer li, to kapav demann enn frer ki ena lexperyans pou ekout twa ek pou donn twa bann konsey. Prepar to bann size bien an-avans, pou ki lezot trouve ki to enn kikenn ki serye ek ki kapav fer konfians.​—Prov. 21:5; 2 Kor. 8:22.

10. Donn enn lexanp pou montre kouma nou kapav fer zefor pou devlop enn kapasite.

¹⁰ Ki to pou fer si to lobzektif se pou devlop enn kapasite ki to trouv difisil? Fode pa to dekouraze! Enn frer ki apel Garry pa ti tro konn lir. Li ankor rapel kouma li ti gagn onte kan li ti lir dan renion. Me Garry ti kontign fer zefor pou amelior so lektir. Gras-a formasion ki li’nn gagne ar bann frer ki ena lexperyans ek ar bann konsey ki ena dan bann piblikasion, azordi Garry pe fer bann diskour dan renion ek dan bann lasanble.

11. Parey kouma Timote, ki kitsoz kapav ed nou pou fer plis pou Zeova?

 ¹¹ Eski Timote ti vinn enn bon orater ouswa enn bon ansegnan? Labib pa dir nanye lor-la. Me nou kapav sir ki Timote ti reisi asim so bann responsabilite pli bien parski li ti swiv konsey lapot Pol. (2 Tim. 3:10) Dan mem fason, si nou devlop nou bann kapasite, nou pou kapav fer plis dan nou servis pou Zeova.

12. Explike kouma lezot inn ed twa.

¹² Nou tou nou kontan kan lezot ed nou. Par exanp, kan nou lopital, nou bien kontan kan nou gagn vizit bann ansien ki form parti dan Komite Liezon Ospitalie ouswa dan Group Vizit Malad. Kan nou gagn enn problem personel, nou bien kontan kan enn ansien pran letan pou ekout nou ek ankouraz nou. Kan nou bizin ed nou etidian Labib, nou bien kontan kan enn pionie ki ena lexperyans akonpagn nou pou nou letid, pou donn nou enn koudme. Tou sa bann frer ek ser-la bien kontan pou ed nou. Nou osi nou pou konn sa lazwa-la kan nou dispoze pou ed lezot. Zezi ti dir: “Ena plis benediksion kan done, ki kan resevwar.” (Zist. 20:35) Si to anvi fer plis pou Zeova dan sa domenn-la, ouswa dan lezot domenn osi, ki kitsoz kapav ed twa?

13. Kan nou fixe enn lobzektif, ki kitsoz nou bizin rapel?

¹³ Kan nou fixe enn lobzektif, nou bizin fixe enn lobzektif ki bien presi. Par exanp, to kapav dir ar tomem, ‘Mo anvi fer plis dan lasanble.’ Me si to fixe twa sa lobzektif-la, to kapav gagn difikilte pou kone kouma to pou realiz sa lobzektif-la, ek kan eski to pou reisi realiz li. Alor, fixe enn lobzektif ki bien presi. To kapav osi ekrir to lobzektif lor enn papie ek ekrir osi seki to pou fer pou realiz li.

14. Kifer nou bizin rezonab kan nou fixe bann lobzektif?

¹⁴ Nou bizin rezonab kan nou fixe bann lobzektif. Kifer? Parski nou sitiasion kapav sanze san ki nou atann. Anou pran enn lexanp. Lapot Pol ti ede pou form enn nouvo lasanble dan lavil  Tesalonik. Ek sirman li ti fixe li lobzektif pou res dan Tesalonik, pou li ed sa bann nouvo Kretien-la. Me bann lennmi ti obliz Pol pou kit lavil Tesalonik. (Zist. 17:1-5, 10) Si Pol pa ti ale, li ti pou met lavi so bann frer ek ser an-danze. Me Pol pa ti dekouraze. Okontrer, li ti adapte li ar so nouvo sitiasion. Li ti avoy Timote dan Tesalonik pou ki li ranforsi lafwa so bann frer ek ser. (1 Tes. 3:1-3) Sirman bann Tesalonisien ti bien kontan ki Timote ti dispoze pou al servi kot ti bizin led!

15. Kouma nou lobzektif kapav sanze kan nou sitiasion sanze? Donn enn lexanp.

¹⁵ Nou kapav tir enn leson ar seki ti ariv Pol dan Tesalonik. Kitfwa nou’nn fixe nou enn lobzektif, me parski nou sitiasion inn sanze, nou nepli kapav realiz li. (Ekle. 9:11) Si to dan sa sitiasion-la, fixe enn lot lobzektif ki to kapav realize. Se seki Ted ek Hiedi ti fer. Sa koup-la ti bizin kit Betel akoz enn problem lasante. Me zot lamour pou Zeova ti pous zot pou rod bann lezot fason pou zot fer plis dan zot minister. Pou koumanse, zot ti pran servis pionie permanan. Avek letan, zot ti nome pionie spesial, ek Ted ti gagn formasion pou vinn enn ranplasan responsab sirkonskripsion. Me apre, ti gagn bann nouvo instriksion konsernan laz bann responsab sirkonskripsion. Ted ek Hiedi ti tro vie pou kontign servi dan sa form servis-la. Mem si zot ti bien sagrin, zot ti kone ki zot ti kapav servi Zeova dan lezot fason. Ted dir: “Nou kone ki nou kapav servi Zeova dan plizir fason.”

16. Ki leson nou kapav aprann dan Galat 6:4?

¹⁶ Nou pena kontrol lor tou seki kapav arive dan nou lavi. Alor, fode pa nou panse ki nou ena valer pou Zeova zis akoz bann responsabilite ki nou ena. Fode pa osi ki nou konpar nou ar bann frer ek ser ki ena bann responsabilite ki nou nou pena. Hiedi dir: “To pou bien tris si to konpar to lavi ar lavi lezot.” (Lir Galat 6:4.) Li bien inportan ki nou rod bann fason pou nou ed lezot ek pou nou servi Zeova. d

17. Ki to kapav fer pou to gagn bann lezot responsabilite?

¹⁷ To pou kapav fer plis pou servi Zeova si to ena enn lavi sinp ek si to pa fer bann det ki initil. To kapav osi fixe bann ti lobzektif ki pou ed twa pou realiz  bann pli gran lobzektif. Par exanp, si to lobzektif se pou vinn pionie permanan, eski pou linstan to kapav fer pionie tanporer toule mwa? Si to lobzektif se pou vinn enn asistan ministeryel, eski to kapav fer plis dan predikasion, ek vizit to bann frer ek ser ki malad ek ki aze? Lexperyans ki to pou gagne kan to pou fer sa bann kitsoz-la, pou kapav ed twa pou gagn plis responsabilite dan lavenir. To bizin bien determine pou fer to best dan ninport ki responsabilite ki to gagne.​—Rom. 12:11.

18. Dapre zimaz pou sa paragraf-la, ki nou kapav aprann ar lexanp Beverley?

¹⁸ Fode zame nou panse ki nou tro vie pou fixe ek realiz bann lobzektif spiritiel. Anou get lexanp Beverley, enn ser ki ena 75 an. Li ena enn maladi bien grav, ek akoz sa, li gagn difikilte pou marse. Me Beverley ti anvi fer plis pou kanpagn Memoryal. Alor, li ti fixe li bann lobzektif bien presi. Kan Beverley ti reisi realiz so bann lobzektif pou kanpagn Memoryal, li ti extra kontan. Anplis, so lexanp ti ankouraz lezot pou fer plis dan zot minister. Mem si zot sitiasion pa permet zot pou fer boukou, Zeova bien kontan bann zefor ki nou bann frer ek ser aze fer pou servi Li.​—Ps. 71:17, 18.

19. Sit sertin lobzektif spiritiel ki nou kapav fixe.

¹⁹ Fixe bann lobzektif ki to kapav realize. Kiltiv bann kalite ki pou fer Zeova plezir. Aprann ek devlop bann kapasite pou ki to vinn pli itil pou Zeova ek so lorganizasion. Rod bann fason pou to ed plis to bann frer ek ser. e Lerla, parey kouma Timote, Zeova pou beni twa ek “tou dimoun pou trouv to progre.”​—1 Tim. 4:15.