1. Mejãnkajjik ta ko jemaroñ kõm̦m̦ani?

 ÃINWÕT Kũrjin ro rem̦ool, jej lukkuun yokwe Jeova. Jekõn̦aan bwe jerbal eo ad ñan e en em̦m̦antata. Bõtab bwe jen maroñ kõm̦m̦an jabdewõt men jemaroñe ñan Jeova, jej aikuj kõm̦m̦an mejãnkajjik ko ilo tõmak, ãinwõt kaddekl̦o̦k kadkad ko kadkadin Kũrjin, katak ñan bõk kapeel ko ewõr tokjãer, im pukot wãween ko ñan jipañ ro jet. *

2. Etke jej aikuj kõm̦m̦an mejãnkajjik ko ilo tõmak im lukkuun kate kõj ñan tõpari?

² Etke jej aikuj itoklimo in kõm̦m̦an wõnm̦aanl̦o̦k ko ilo tõmak? Men eo el̦aptata jekõn̦aan kõm̦m̦ane ej kabuñbũruon Jemãdwõj ilañ, eo me el̦ap yokwe ippãn. Jeova ej m̦õn̦õn̦õ ñe ej lo ad lukkuun kõjerbal kapeel im maroñ ko ad ilo jerbal eo an. Bareinwõt, jekõn̦aan kõm̦m̦an wõnm̦aanl̦o̦k ko ilo tõmak bwe jen maroñ kal̦apl̦o̦k ad jipañ ro jeid im jatid. (1 Tes. 4:9, 10) Jekdo̦o̦n ewi toon ad pãd ilo m̦ool eo, ak kõj aolep jemaroñ kõm̦m̦an wõnm̦aanl̦o̦k ko ilo tõmak. Jen lale ewi wãween ad maroñ kõm̦m̦ane men in.

3. Ãinwõt an 1 Timote 4:12-16 kwal̦o̦k, ta eo rijjilõk Paul ear rõjañ Timote bwe en kõm̦m̦ane?

³ Ke rijjilõk Paul ear je lõta eo an kein kajuon ñan Timote, em̦õj an kar Timote erom juon em̦m̦aan ej lale eklejia me el̦ap imminene ko ippãn. Bõtab, Paul ear rõjañe ñan kal̦apl̦o̦k an kõm̦m̦an wõnm̦aanl̦o̦k ko ilo an jerbal ñan Jeova. (Riit 1 Timote 4:12-16.) Ilo am̦ kõl̦mãnl̦o̦kjen̦ kõn naan ko an  Paul, kwõnaaj kile bwe ear kõn̦aan bwe Timote en kõm̦m̦an wõnm̦aanl̦o̦k ko ilo wãween kein ruo: ilo an kaddekl̦o̦k kadkad ko kadkadin Kũrjin ãinwõt yokwe, tõmak, im erreo bareinwõt ilo an kal̦apl̦o̦k kapeel ko ãinwõt riit ilo̦bwilej, lel̦o̦k naanin jiroñ, im katakin. Ilo ad kõl̦mãnl̦o̦kjen̦ kõn joñak eo an Timote, jen lale ewi wãween an kõm̦m̦an mejãnkajjik ko maroñ jipañ kõj ñan kõm̦m̦an wõnm̦aanl̦o̦k. Jenaaj bar lale wãween ko jet jemaroñ kal̦apl̦o̦k ijo kun̦aad ilo jerbalin kwal̦o̦k naan eo ad.

4. Ãinwõt an Pilippai 2:19-22 kwal̦o̦k, ta eo ear kõm̦m̦an bwe Timote en juon ri-karejar eo me Jeova ear maroñ kõjerbale?

⁴ Ta eo ear kõm̦m̦an bwe Timote en juon ri-karejar eo me Jeova ear maroñ kõjerbale? Ear wõr ippãn kadkad ko rem̦m̦an kadkadin Kũrjin. (Riit Pilippai 2:19-22.) Ikijjeen wãween an kar Paul kõnono kõn Timote, jemaroñ lo bwe ear ettã bũruon, etiljek, ekijejeto, im juon eo me remaroñ lõke. Ear juon eo el̦ap yokwe ippãn, im ear lukkuun kea kõn ro jein im jatin. Tokjãn men in, Paul ear yokwe Timote im ear jab ãliklik in lel̦o̦k eddo ko reppen im rel̦l̦apl̦o̦k ñane. (1 Kor. 4:17) Ãindeinl̦o̦k wõt, Jeova enaaj yokwe kõj im enaaj l̦apl̦o̦k ijo kun̦aad ilo eklejia eo el̦aññe jenãj kaddekl̦o̦k kadkad ko me ej yokwi.​—Sam 25:9, UBS; 138:6.

5. (1) Ewi wãween kwõmaroñ kããlõt juon kadkadin Kũrjin me kokõn̦aan kaddekl̦o̦k? (2) Ãinwõt an wal̦o̦k ilo pija eo, ewi wãween an jiroñ eo jeid im jatid jerbale mejãnkajjik eo an ñan kal̦apl̦o̦k an kwal̦o̦k tũriam̦o ñan ro jet?

⁵ Kããlõt juon mejãnkajjik kokõn̦aan tõpare. Lukkuun jar im l̦õmn̦ak kõn ewi wõt iaan kadkad ko kadkadim̦ kwõj aikuj kakõm̦anm̦anl̦o̦k. Innem kããlõt juon iaan kadkad kein me kokõn̦aan kakõm̦anm̦anl̦o̦k. Ñan waanjoñak, kwõmaroñ ke kaddekl̦o̦k im kal̦apl̦o̦k kadkadin tũriam̦o ak juon kõn̦aan ñan rejetake ro m̦õttam̦ ilo tõmak? Kwõj ke aikuj kal̦apl̦o̦k am̦ jel̦a kõm̦m̦an aenõm̦m̦an ippãn ro jet im jel̦ã jol̦o̦k bõd? Kwõmaroñ lo bwe ej juon menin jipañ ñan kajjitõk ippãn juon m̦õttam̦ me kwõj lõke ñan kwal̦o̦k ñan kwe wãween ko kwõmaroñ kakõm̦anm̦anl̦o̦k kadkad ko kadkadim̦.​—JK. 27:6, UBS.

6. Ewi wãween am̦ maroñ kate eok ñan tõpar mejãnkajjik eo am̦ ñan kakõm̦anm̦anl̦o̦k juon iaan kadkad ko kadkadim̦?

⁶ Kate eok ñan tõpar mejãnkajjik eo am̦. Ewi wãween am̦ maroñ kõm̦m̦ane men in? Juon wãween ej ilo am̦ lukkuun katak kõn kadkad eo kokõn̦aan kakõm̦anm̦anl̦o̦k. Bõlen kwõj kããlõt ñan kal̦apl̦o̦k am̦ jel̦ã jol̦o̦k an ro jet  bõd. Kwõmaroñ jino ilo am̦ riit im kõl̦mãnl̦o̦kjen̦ kõn waanjoñak ko ilo Baibõl̦ kõn ro rar m̦õn̦õn̦õ in jol̦o̦k an ro jet bõd im kõn ro me rar jab. L̦õmn̦ak kõn waanjoñak eo an Jesus. Ear m̦õn̦õn̦õ in jol̦o̦k an ro jet bõd. (Luk 7:47, 48) Bareinwõt ear jab l̦õmn̦ak kõn bõd ko aer, ak ear l̦õmn̦ak kõn men ko remaroñ kõm̦m̦ani. Bõtab Parisi ro ilo raan ko an Jesus rar “watõk ro jet bwe ejjel̦o̦k tokjãer.” (Luk 18:9) Ãlikin am̦ kõl̦mãnl̦o̦kjen̦ kõn waanjoñak kein, kajjitõk ippam̦ make: ‘Ewi wãween aõ watõk ro jet? Ta jet iaan kadkad ko kadkadier ij kããlõt ñan l̦õmn̦ak wõt kake?’ El̦aññe epen am̦ jol̦o̦k an juon armej bõd, kajjioñ je aolep kadkad ko rem̦m̦an kõn armej eo joñan wõt am̦ maroñ. Innem kajjitõk ippam̦ make: ‘Ewi wãween an Jesus watõk armej in? Enaaj ke jol̦o̦k an bõd?’ Ilo ad kõm̦m̦ane men in enaaj jipañ kõj ñan kajim̦we l̦õmn̦ak ko ad. Ilo jinoin, jemaroñ aikuj kate kõj ñan jol̦o̦k an armej eo bõd me ear kal̦õkatip kõj. Bõtab el̦aññe jej wõnm̦aanl̦o̦k wõt im kate kõj ñan kõm̦m̦ane men in, jidik kõn jidik enaaj l̦apl̦o̦k ad m̦õn̦õn̦õ in jol̦o̦k bõd.

7. Ãinwõt an Jabõn Kõnnaan 22:29 kwal̦o̦k, ilo wãween et Jeova ej kõjerbal ri-jerbal ro ilo raan kein me ewõr kapeel ko ippãer?

⁷ Mejãnkajjik eo juon kwõmaroñ kõm̦m̦ane ej ñan katak juon kapeel ewõr tokjãn. L̦õmn̦ak kõn joñan ro rej aikuji ñan kalõk m̦õko rej kõjerbali ilo Betel̦, Im̦õn Kweilo̦k ko Rel̦l̦ap, im Im̦õn Kweilo̦k ko. Elõñ iaan ri-jerbal rein rar katak kapeel kein ilo aer kar jerbal ippãn ro jeid im jatid me el̦ap jel̦ã im imminene ko ippãer. Ãinwõt an wal̦o̦k ilo pija eo, em̦m̦aan im kõrã ro jeid im jatid jim̦or rej katak kapeel ko me rej aikuji ñan kõjparok Im̦õn Kweilo̦k ko Rel̦l̦ap im Im̦õn Kweilo̦k ko. Ikijjeen wãween kein im wãween ko jet, Jeova Anij, eo me ej “Kiiñ indeeo,” im Jesus Christ, “Kiiñ eo an kiiñ ro,” rej katõpraki men ko rekabwilõñlõñ ikijjeen aer kõjerbal ri-jerbal ro ewõr kapeel ko ippãer. (1 Tim. 1:17; 6:15; riit Jabõn Kõnnaan 22:29.) Jekõn̦aan kate kõj im kõjerbal kapeel ko ad ñan nõbar Jeova, im jab kõj make.​—Jon 8:54.

8. Ewi wãween kwõmaroñ kããlõt juon kapeel kokõn̦aan katak kilen kõm̦m̦ane?

⁸ Kããlõt juon mejãnkajjik kokõn̦aan tõpare. Ta kapeel ko kwõmaroñ katak kilen kõm̦m̦ani? Kajjitõk ippãn em̦m̦aan ro rej lale eklejia im emaroñ bar em̦m̦aan eo ej lol̦o̦k eklejia kõn ta men ko rej l̦õmn̦ak bwe kwõmaroñ jino katak kilen kõm̦m̦ani. Ñan waanjoñak, el̦aññe rej kajjitõk bwe kwõn kakõm̦anm̦anl̦o̦k wãween am̦ kõnono im katakin, kajjitõk ippãer bwe ren kaalikkar wãween ko rej kile bwe kwõj aikuj kakõm̦anm̦anl̦o̦k. Innem lukkuun kate eok ñan kõm̦m̦an wõnm̦aanl̦o̦k. Ewi wãween am̦ maroñ kõm̦m̦ane men in?

9. Ewi wãween am̦ maroñ kate eok tõpar mejãnkajjik eo am̦ ñan katak juon kapeel?

⁹ Kate eok ñan tõpar mejãnkajjik eo am̦. Jen ba bwe kokõn̦aan kakõm̦anm̦anl̦o̦k wãween am̦ katakin. Kwõmaroñ lukkuun kate eok ñan katak kõn bok eo Kate Eok ñan Kal̦apl̦o̦k Am̦ Jel̦ã Kilen Riit im Katakin. El̦aññe ewõr kun̦aam̦ ilo kweilo̦k eo ilo lukwõl̦pãn wiik, kwõmaroñ kajjitõk ippãn juon jeid im jatid em̦m̦aan bwe en roñjake katak eo am̦ m̦okta jãn am̦ kwal̦o̦ke im emaroñ kwal̦o̦k waj ia ko kwõmaroñ kakõm̦anm̦anl̦o̦k. Ilo am̦ kõppojakl̦o̦k im̦aan kõn katak ko am̦, armej ro renaaj kile am̦ kate eok im juon eo remaroñ lõke.​—JK. 21:5; 2 Kor. 8:22.

10. Kwal̦o̦k juon waanjoñak kõn wãween ad maroñ kõm̦m̦an wõnm̦aanl̦o̦k ilo ad kal̦apl̦o̦k juon kapeel me ewõr ippãd.

¹⁰ Ta el̦aññe kapeel eo kokõn̦aan kal̦apl̦o̦k am̦ jel̦ã ej juon men me epen am̦ kõm̦m̦ane? Kwõn jab ebbweer! Juon jeid im jatid em̦m̦aan etan  Garry epen an katak ñan jel̦ã riit. Ej keememej an kar jook ke ear kajjioñ riit ilo kweilo̦k ko an eklejia. Bõtab ear wõnm̦aanl̦o̦k wõt im kate ilo an kar riit. Ej ba bwe kõn an kar bõk kamminene ko, kiiõ ej maroñ kwal̦o̦k katak ko ilo Im̦õn Kweilo̦k ko, im ilo kweilo̦k ko rel̦l̦ap!

11. Ãinwõt Timote, ta eo enaaj jipañ kõj ñan bõk el̦apl̦o̦k eddo ko?

¹¹ Timote ear ke erom juon eo ewãjepdik an kõnono ak juon eo em̦m̦an an katakin? Baibõl̦ eo ejjab ba. Bõtab ejjel̦o̦k pere bwe Timote ear lo tõprak ilo an kõm̦m̦ani eddo ko an kõnke ear l̦oor naanin kakapilõk ko an Paul. (2 Tim. 3:10) Ejja ãindeinl̦o̦k wõt, el̦aññe jej kate kõj im kal̦apl̦o̦k kapeel ko ad, enaaj l̦apl̦o̦k ad bõk eddo ko ilo jerbal eo ad ñan Jeova.

12. Ewi wãween am̦ kar bõk tokjãn jãn an ro jet kar jipañ eok?

¹² Kõj aolep jej bõk tokjãn jãn jipañ ko an ro jet. Ñe jej pãd ilo aujpitõl̦, jej lukkuun kam̦m̦oolol bwe em̦m̦aan ro rej lale eklejia me rej pãd ilo Hospital Liaison Committees ak Patient Visitation Groups, rej lotok kõj. Ñe jej iioon wãween ko reppen ilo mour ko ad, jej kwal̦o̦k ad kam̦m̦oolol ñan em̦m̦aan ro rej lale eklejia ñe rej bõk iien ñan lukkuun roñjake kõj im letok naanin kaenõm̦m̦an ñan kõj. Ñe jej aikuj jipañ ilo ad katak ippãn rũkkatak Baibõl̦ eo ad, jej lukkuun m̦õn̦õn̦õ ñe juon bainier el̦ap imminene ippãn ej kobatok ippãd ilo iien katak im letok bar jet l̦õmn̦ak ko. Aolep rein jeid im jatid rej m̦õn̦õn̦õ in jipañ kõj. Emaroñ wõr ippãd lañlõñ in ñe jej kaarmejjeteik kõj make im m̦õn̦õn̦õ in jipañ ro jeid im jatid. Jesus ear ba: “El̦apl̦o̦k m̦õn̦õn̦õ ilo lel̦o̦k jãn bõk.” (Jrb. 20:35) El̦aññe kokõn̦aan kal̦apl̦o̦k jerbal eo am̦ ñan Jeova ak wãween ko jet, ta eo enaaj jipañ eok ñan tõpar mejãnkajjik ko am̦?

13. Ñe jej kõm̦m̦ane juon mejãnkajjik, ta eo jej aikuj in keememeje?

¹³ Kõjparok bwe kwõn jab kõm̦m̦an mejãnkajjik ko me ejjab lukkuun alikkar ta eo kwõj aikuj kõm̦m̦ane. Ñan waanjoñak, bõlen kwõmaroñ l̦õmn̦ak im ba, ‘Ikõn̦aan kal̦apl̦o̦k ijo kun̦aõ ilo eklejia eo.’ Bõtab emaroñ pen ñan am̦ jel̦ã wãween am̦ tõpare mejãnkajjik in, im kwõmaroñ lo bwe elukkuun pen ñan am̦ jel̦ã ñããt eo kwõnaaj tõpar mejãnkajjik in. Kõn men in, kããlõt mejãnkajjik eo me ealikkar ippam̦. Bõlen kwõmaroñ je mejãnkajjik eo im wãween am̦ naaj tõpare.

14. Etke jej aikuj jel̦ã ukoktak ñe ej itok ñan kõm̦m̦an mejãnkajjik ko?

 ¹⁴ Bareinwõt jej aikuj jel̦ã ukoktak ñe jej kõm̦m̦an mejãnkajjik ko. Etke? Kõnke ejjel̦o̦k ad maroñ ioon men ko jej iiooni ilo mour ko ad. Ñan waanjoñak: Rijjilõk Paul ear jipañ kajutak juon eklejia ekããl ilo Tessalonika. Im ejjel̦o̦k pere bwe mejãnkajjik eo an ej ñan pãd ijo im jipañ Kũrjin ro rekããl. Bõtab ri-jum̦ae ro rar kõm̦m̦an bwe Paul en diwõjl̦o̦k jãn jikin eo. (Jrb. 17:1-5, 10) El̦aññe Paul en kar pãdwõt, enaaj kar kõm̦m̦an bwe ro jein im jatin ren pãd ilo kauwõtata. Bõtab Paul ear jab ebbweer jãn an kajjioñ jipañ er. Innem, ear kõm̦m̦an ukoktak ekkar ñan men ko rar wal̦o̦k. Tokãlik ear jilkinl̦o̦k Timote bwe en jipañ Kũrjin ro rekããl ilo Tessalonika bwe en kõkajoor wõt tõmak eo aer. (1 Tes. 3:1-3) Alikkar bwe ro ilo Tessalonika rar lukkuun m̦õn̦õn̦õ ke Timote ear kaarmejjeteik e make im etal im jipañ ilo jabdewõt jikin ko me rej aikuji ie.

15. Ewi wãween an men ko jej iiooni maroñ jelõt mejãnkajjik ko ad? Kwal̦o̦k juon waanjoñak.

¹⁵ Jemaroñ katak jãn waanjoñak eo an Paul ilo Tessalonika. Jemaroñ kajjioñ tõpare juon mejãnkajjik, bõtab men ko jej iiooni remaroñ oktak im bõbraik kõj jãn ad tõpare mejãnkajjik eo ad. (Ekl. 9:11) El̦aññe men in ear wal̦o̦k ñan kwe, kwõn m̦õn̦õn̦õ in bar kããlõt juon mejãnkajjik me kwõmaroñ tõpare. Eñin men eo ear wal̦o̦k ñan ruo rippãlele me etaer in Ted im Hiedi. Kõnke erro ar nañinmej, erro ar aikuj in etal jãn Betel̦. Bõtab yokwe eo aer ñan Jeova ear kõm̦akũt erro ñan pukot wãween ko jet ñan kal̦apl̦o̦k ijo kun̦aaerro. M̦oktata, erro ar jino bõk jerbalin rekũl̦ar bainier. Ãlikin jet iien, kar jitõñ erro ñan jipejel̦ bainier, im Ted ear bõk kamminene ñan bõk jerbalin juon eo ej pinej jenkwan eo ej lol̦o̦k eklejia ko. Innem, iiõ in dettan ro me remaroñ lol̦o̦k eklejia ko ear oktak. Kõn men in, Ted im Hiedi rar kile bwe rar jab maroñ bõk jerbal in. Meñe rar bũrom̦õj, bõtab rar kile bwe rar maroñ jerbal ñan Jeova ilo wãween ko jet. Ted ej ba, “Kõm̦ro ar katak bwe jemaroñ jerbal ñan Jeova elõñl̦o̦k jãn juon wãween.”

16. Ta eo jemaroñ katak jãn Galetia 6:4?

¹⁶ Jejjab maroñ kõjbwebweik aolep men ko rej wal̦o̦k ñan kõj ilo mour ko ad. Kõn men in, elukkuun aorõk bwe jen jab l̦õmn̦ak bwe eddo ak jeraam̦m̦an ko jej bũki rej kaalikkar ewi joñan ad aorõk ippãn Jeova, im jen jab keidi kõj make ñan ro jet me ewõr eddo ko ippãer me ejjel̦o̦k ippãd. Hiedi ej ba, “Am̦ aenõm̦m̦an enaaj jako el̦aññe kwõj keidi mour eo am̦ ippãn ro jet.” (Riit Galetia 6:4.) Elukkuun aorõk bwe jen pukot wãween ko ñan jipañ ro jet im jerbal ñan Jeova. *

17. Ta ko kwõmaroñ kõm̦m̦ani bwe kwõn maroñ bõk eddo ak jeraam̦m̦an ko ilo doulul eo an Jeova?

 ¹⁷ Kõm̦m̦an bwe kwõn pojak in bõk jerbal ko ilo doulul eo an Jeova ikijjeen am̦ kõm̦m̦an bwe mour eo am̦ en l̦amwaan im kõjparok eok jãn am̦ m̦uri. Ilo am̦ kõm̦m̦an mejãnkajjik ko reddik, men in enaaj jipañ eok ñan tõpar mejãnkajjik ko rel̦l̦apl̦o̦k. Ñan waanjoñak, el̦aññe mejãnkajjik eo am̦ ej ñan erom juon rekũl̦ar bainier, kwõmaroñ ke jerbalin akjel̦õri bainier kajjojo allõñ jino jãn kiiõ? El̦aññe mejãnkajjik eo am̦ ej ñan juon rijjipañ ilo eklejia eo, kwõmaroñ ke jol̦o̦k el̦ap iien ilo jerbalin kwal̦o̦k naan im lol̦o̦k ro renañinmej im ro rerũtto ilo eklejia eo am̦? Jerbal im imminene ko kwõj bũki kiiõ remaroñ kõm̦m̦an bwe kwõn bõk jeraam̦m̦an ko rel̦l̦apl̦o̦k ilju im jekl̦aj. Kwõn jek ilo bũruom̦ bwe kwõnaaj lukkuun kate eok kõn jabdewõt jerbal ko rej liwaj ñan kwe.​—Rom 12:11.

18. Ãinwõt an wal̦o̦k ilo pija eo, ta eo kwõmaroñ katak jãn joñak eo an Beverley?

¹⁸ Jekdo̦o̦n ñe kwõrũtto ak kwõmaroñ kõm̦m̦an im jibadek mejãnkajjik ko ilo jerbal eo an Jeova. L̦õmn̦ak kõn waanjoñak eo an juon jeid im jatid lel̦l̦ap me 75 an iiõ etan in Beverley. Ear wõr juon an nañinmej el̦ap me ear kõm̦m̦an bwe en pen an etetal. Bõtab ear lukkuun kõn̦aan kal̦apl̦o̦k ijo kun̦aan ilo campaign eo ñan leto-letak pepa in kũr eo ñan Kwõjkwõj eo. Kõn men in, ear kõm̦m̦an mejãnkajjik ko. Ke Beverley ear tõpar mejãnkajjik ko an ñan campaign, ear lukkuun m̦õn̦õn̦õ. An kar kate ear kõm̦akũt ro jet bwe ren bar kate er ilo jerbalin kwal̦o̦k naan. Jeova ej kaorõk jerbal ko an rũtto ro jeid im jatid, meñe ewõr joñan men ko remaroñ kõm̦m̦ani.​—Sam 71:17, 18.

19. Ta jet iaan mejãnkajjik ko ilo tõmak me jemaroñ kõm̦m̦ani?

¹⁹ Kõm̦m̦an mejãnkajjik ko kwõmaroñ tõpari. Kaddek kadkad ko me renaaj kabuñbũruon Jeova. Katak kapeel ko me remaroñ kõm̦m̦an bwe kwõn juon eo me Jeova im doulul eo an remaroñ kõjerbale. Pukot wãween ko ñan kal̦apl̦o̦k am̦ jipañ ro jeim̦ im jatũm̦. * Ãinwõt Timote, am̦ kõm̦m̦an wõnm̦aanl̦o̦k enaaj “lukkuun alikkar ñan armej otemjej” kõn kõjeraam̦m̦an eo jãn Jeova.​—1 Tim. 4:15.