1. Dholuba baani nnahowelihu okanna?

 IYO nnomudhivela vanlubale Yehova. Bumwahaya nnafuna nerena nnandihu wa Yehova. Mbwenye wihina nerena nnandihu nnofwanela okanna dholuba dhomuzimuni, ninga okanna dhikalelo dheekiristawu, ohudhera dhithu dhixa ni wasayela makalelo owakavihera athu amodha. *

2. Mwahaya bwaddi nigahowela okanna dholuba dhomuzimuni ni egafuneya wilibihera wihina nakwanelihe?

² Mwahaya bwaddi nigahowela okanna efunelo yowunnuwelavo epaddi yomuzimuni? Yathimaya mwaha nnafuna nimuhagalase Babihu oodhulu. Yehova onohagalala vanlubale anonaga nlabihedhaga dhithu nnonihu wihina nimulabelena oliye. Ethu emodha enanthukulela wunnuwelavo epaddi yomuzimuni, sowihina ni makalelo yala nnere wakavihera addibilihu ni arogolihu. (1 Tes. 4:9, 10) Naarive nikanne yaka dhowinjhivadhene mwibaribarini, iyo aatene podi wunnuwelavo epaddi yomuzimuni. Vano, nnafuna noone makalelo nnafuna werana.

3. Mowiwanana ni 1 Timóteo 4:12-16, murumiwi Pawulo amukongomedhe Timotiyu wera ddi?

³ Murumiwi Pawulo amulebelega karta noobajha Timotiyu, aali namaholela mulogo aaxagenle mabasaye. Naarive dhigari ndo, Pawulo omukongomedha wihina adhowegenave unnuwelegevove epaddi yomuzimuni. (Omwileri 1 Timóteo 4:12-16.) Wilerigi karta Pawulo amulebeliye Timotiyu, we onere woonelamo wihina oliye afuna wi Timotiyu unnuwelegevo dhipaddi biili dhomuzimuni asayelaga okanna; dhikalelo dheekiristawu ninga odhivela, nroromelo, ohukanna nihonya ni owomihedha ekalelo yaye yoowileri vaanamwinjhi ni owomihedha ekalelo  yaye yohudhiha ni yowoga mwaha dhavathaddo. Yotajhiha ya Timotiyu enere onikavihera woona wihina negi nunnuwelevo epaddi yomuzimuni, nnohowela okanna dholuba nnandihu wakwaneliha, ohiya eyo nnere woona ethu nnahowelihu wihina nimulabele Yehova.

4. Mowiwanana ni Filipenses 2:19-22, yamuthukulela Yehova omparihedhagave mabasa Timotiyu yaari ddi?

⁴ Yamuthukulela Timotiyu olabihedhagave ni Yehova dhaali dhikalelo dheekiristawu anniyena. (Omwileri Filipenses 2:19-22.) Madhu Pawulo amulebeliye Timotiyu iyo podi wawona wihina oliye aali owiyeviha, oodhivela ohunamala, ooviheya ni mabasa ni ororomeleya. Oliye owadhivela addibila ni murimaye wamutene ni ofuna wakavihera, bumwahaya Pawulo koova onvaha Timotiyu mutholo dhorusa. (1 Cor. 4:17) Nimakalelo mamodhave nakanna dhikalelo dheekiristawu, nnerege oparihedhiwa mabasa mmulogoni, teto Yehova anerege othabwa onidhivela. — Sal. 25:9; 138:6.

5. a) Enukavihere ddi osakula yoluba onahoweliwe wakwaneliha? b) Mowiwanana ni fotu, ethu baani anerana murogola ola wihina akale muthu anthebwa?

⁵ Osakule yoluba onafuniwe wakwaneliha. Omulobe Yehova wihina ukavihere wi wande woona ethu onahoweliye owomihedha mwigumini mwawo. Windo, osakule yoluba onafuniwe wakwaneliha ni wilibihere wihina wakwanelihe. Podi wera onere woona wihina onohowela okala muthu anthebwa obe onere woona wihina onofwanelela wawerela dhithu dhowinjhiva addibila. Mudhidhi onahudherigiwe okala muthu amurenddele ni oolevelela, ethu enukavihere fuumukoha mukwawo onamuroromeliwe wuwaddela dhithu baani onahoweliwe owomihedha.—Prov. 27:6.

6. Dhithu baani onahoweliwe werana wihina wenjhedhedhe dhikalelo dhawo dheekiristawu?

⁶ Wilibihere wihina wakwanelihe yoluba yawo. Onande addi werana ndo? Ethu yokweya fuhudhera ekalelo onahoweliwe owomihedha. Motajhiha, wahakale ninga onafuna okale muthu oolevelela, we podi ohudhera mBibliyani dhotajhiha dhaathu yanonne olevelela ni amodhaya yahanonne olevelela. Omubuwele Yesu, oliye kayamurusa walevelela athu amodha. (Luc 7:47, 48) Yesu kathabwa osugwera dhooviriganiha dhaathu amodha, mbwenye oliye athabwa osugwera dhikalelo dhapama yanniwana, mohiyana ni aFarizewu ‘yahaavaha thima athu amodha.’ (Luc 18:9) Wubuwela dhotajhiha dhendha biili, we podi wikoha weka wegihina; miyo ginawona aavi athu amodha? Miyo ginoopwasedha osugwa dhikalelo  dhapama aliwa enniwana? Akala enowurusa walevelela athu amodha, olebele dhikalelo dhatedhene dhapama athu yayo enniwana. Windo wikohe wegi: Yesu anamoona aavi muthu yola? Ahakale oliye eere omulevelela? Werana ndo podi wukavihera osaddula moonelo wawo. Podi wera omambelelowene wihina omulevelele muthu uwukuunle enere wurusa vang’ono. Mbwenye wilibiheraga wihina ogonjhihe ekalelo ela, kinurusege walevelela athu amodha.

7. Mowiwanana ni Provérbios 22:29, Yehova analabihedha aavi peeno addibila yaxagenle mabasiwa ni enivelela?

⁷ Yoluba emodha onahoweliwe okanna, fuhudhera ethu exa. Wawubuwele addibila angasi enahoweleya ni enivelela wihina yapare mabasa oomaga oBeteli, nyumba dha musonkano obe nyumba dha Omwene. Owinjhiva wa addibila yala enivelela ehasuza mabasa ala woodhela wakavihera addibila yakovelele pamadhene wapara mabasa ala. Ninga nnonihu vafotuni addibila vamodha naarogola ennana ohudhera dhithu dhinaakavihere olabihera yavenyihedhaga nyumba dha musonkano ni dha Omwene. Mowindala Yehova Mulugu mwene ahinakwa ni Yesu Kiristu mwene aanamathonga, enna werana dhithu dhotikiniha yalabihedhaga alobwana ni ahiyana athotho. (1 Tim. 1:17; 6:15; omwileri Pro. 22:29.) Iyo nnafuna nikale athu owiyeviha ni mabasa ni nlabihedhe dhithu ninnihu wihina nakavihere mabasa a Yehova ohiya withukulaga.—João 8:54.

8. Enuukavihere ddi osakula ekalelo onahoweliwe owomihedha?

⁸ Osakule yoluba onafuniwe wakwaneliha. Ekalelo baani onahoweliwe wenjhedhedha? Ononamo aavi wakoha anamaholela mulogo amulogo wawo obe nameeddela mulogo, ekalelo baani onahoweliwe wenjhedhedha. Motajhiha, podi wera aliwa enere wuwaddela wihina onohowela owomihedha makalelo awo ohudhiha. Akala siyeyo, walobe wihina yukavihere onona epaddi baani onahoweliwe owomihedha. Windo wilibihedhe epaddi yela. Onande addi werana ndo?

9. Onere ddi wihina owomihedhe makalelo awo ohudhiha?

⁹ Wilibihere wihina wakwanelihe yoluba yawo. Yahere ninga onafuna owomihedhe ekalelo yawo yohudhiha, yukavihere wixagiha fuhudhera ni wilibihera oparihedha mabasa buruxura Wilibihere Wileri ni Ohudhiha. Vano nlabo onafuniwe wakela epaddi ya mutugumano dha vaari vasumana, orajhihe wixagiha vamodha ni ddibila ni omwaddela wihina ukavihere epaddi baani onafuniwe owomihedha. Naarive niganna makalelo apama ohudhiha, naakela epaddi nnohowela wiwegeredha pamadhene.—Pro. 21:5; 2 Cor. 8:22.

10. Owoge yotajhiha ononiha wi enowandeya owomidhagave makalelo ehu oohudhiha naarive dhinirusaga?

¹⁰ Kito akala enowurusa wenjhedhedha dholuba osakunliwe? Kuselele! Ddibila dhaala anithaniwa Gaary ahikanna makathamiho owileri, oliye wera wi okanna manyazo egi ileri nindhu nootama omutugumanoni. Mbwenye oliye wilibihera wihina iwomihedhe wodhela oxagihiwa. Peeno onowoga mwaha dhavathaddo mmulogoni, vamusonkanoni dha nlabo nimodha ni dha malabo mararu.

11. Mowindala ninga Timotiyu, naakela epaddi wihina needdihe enanikavihere ddi wakwaneliha pama?

¹¹ Nerege Timotiyu ahinona owoga mwaha dhavathaddo nuwindo okala namahudhiha oovuwa? Bibliya kanasoriha. Mbwenye iyo podi okanna ebaribari wihina Timotiyu owakwaneliha mutholo dhaye mwamakalelo apama, nnikavihero na murumiwi Pawulo. (2 Tim. 3:10) Nimakalelo mamodhave, nilibihedhaga wenjhedhedha dhikalelo dhimodha, nnerege  wanda wakwaneliha pamadhene dhipaddi nnakelihu munikuruni mwa Yehova.

12. Addibila amodha yukavihere nimakalelo baani?

¹² Nnodhiveliwa athu amodha yanikavihedhaga. Motajhiha, nakala Ospitale, nnohagalala vanlubale nawonaga anamaholela mulogo enalaba ni komisawu dha Ospitale ni enalaba nnikuru nnapada aredda edhaaga onipada. Naafwanyiwaga makathamiho mwigumini, sapama waredheliwa nnamaholela mulogo oodhivela wihina anivuruwane ni anilibihe. Teto nahowelaga nikavihero wihina needdihe ohudhera wa Bibliya, nnodhiveliwa vanlubale namoona piyonero aaxagenle mabasa oolaleya, athananihaga ohudhera wehu wa Bibliya ni anaddelaga dhithu nnahowelihu owomihedha. Addibila ni arogola ala, yanikaviheraga naaliwaya enohagalala, nihiyoya podi okanna ohagalala wimodhave wodhela wileva wihina naakavihere addibilihu. Yesu erile: ‘Ovaha winothabwa ohagalasa opitha ovahiwa.’ (At. 20:35) Akala we onafuna wawenjhedhedhe mabasaawo onampareliwe Yehova, enuukavihere ddi wakwaneliha yoluba yawo?

13. Wafunaga osakula yoluba, ethu baani ohunahoweliwe oddiwala?

¹³ Osakule yoluba onafuniwe wihina wakwanelihe. Podi wera onowubuwela weegi, “Miyo gafuna gawenjhedhedhe mabasaaga ginaaparimi mmulogoni.” Mbwenye woona wi yoluba ela athu owinjhiva ehikanna, podi wera enowurusa wihina onone makalelo owakwanelihaya, obe podi wurusaga onona akala ohakwaneliha yoluba ela. Bumwahaya, sapama osakula yoluba ononniwe ni onahoweliwe wakwaneliha. Dhenyeya we podi olebela yoluba onafuniwe ni ethu onafuniwe werana wihina wakwanelihe.

14. Mwahaya bwaddi egafwanelelaga okala owaguva naafunaga osakula yoluba?

¹⁴ Iyo nnofwanelela okala owaguva nafunaga osakula yoluba. Mwaha malabo owinjhiva makathamiho enanifwanya mwigumini mwehu iyo kannanona. Kubuwela ethu yereye ni murumiwi Pawulo: Oliye ahikavihera wimesa mulogo luwani yo Tesalonika. Mwebaribarene oliye ahikanna yoluba yowakavihera addibila a mulogo yole. Mbwenye mwaha woharahariwa oliye ahiwaddihedhiwa ohiya luwani yele ahifunaga. (At. 17:1-5, 10) Pawulo ahakaleve luwani yele, oliye eere opweha  egumi ya addibila amodha vangovini. Naarive ni masadduwo yala oliye kaaselele. Oliye ahanda wisaddula mowiwanana ni mudhidhi wafwanyeyiye. Vasogolova, oliye omuruma Timotiyu wihina akabelele epaddi yomuzimuni ya addibila oTesalonika. (1 Tes. 3:1-3) Mwebaribarene addibila oTesalonika yahihagalala vanlubale mwaha Timotiyu nuwivahedha wihina akavihere.

15. Makathamiho nihinandihu wasugwedha enavolowela avi dholuba nafunihu? Owogemo wodhela nladdaniho.

¹⁵ Iyo podi ohudheravo ethu niile empadduwele murumiwi Pawulo oTesalonika. Podi wera ninna wilibihera wihina nikanne mutholo nnafunihu, mbwenye makathamiho nihinandihu wasugwedha podi onlepeliha mutholo nafunihu. (Ecl. 9:11) Akala siyeyo enupadduwela, onofwanelela okala muthu owaguva ni osakule yoluba emodhaya onandiwe wakwaneliha. Siyeyo Ted ni Hiedi yenriwana. Anamatelana ala enalaba oBeteli, mbwenye yahirajhiha ohiya mutholo wewa mwaha wamakathamiho mwigumini. Naarive dhigaari ndo, odhivela enniwana ni Yehova, wahathukulela wasayela makalelo mamodha owapara masa a Yehova. Vobajhavene, aliwa wambela olaba ninga apiyonero amudhidhi wamutene, nuuvira mwana mudhidhi, aliwa othomiwa okala apiyonero avayekiwa. Teto Ted eera oxagihiwa wihina akale namakavihera anameeddela mulogo. Nuwindo, woona wi mutholo ola ohukanna yakadha dhinahoweleya, vano wakakanihiwa. Bumwahaya Ted ni Hiedi kiyavahiwe mutholo yahoweliwa. Aliwa wukuuwa vanlubale mwaha wa yeyo, nuwindo aliwa wonelamo wi podi wawenjhedhedha mabasiwa enampareliwa Yehova mwamakalelo mamodha. Ted anihina, “Iyo nihudhera wihina kanthabwege wubuwela wihina nnanda omulabela Yehova nakanna mutholo nnahowelihu.”

16. Va Gálatas 6:4, nnahudheravo ddi?

¹⁶ Iyo kannanda osugwera dhithu dhatedhene dhinanipadduwela mwigumini mwehu. Bumwahaya, sapama ohuthabwaga wubuwela wihina thima ninnihuna vamentoni va Yehova enadha mwaha wokanna mutholo, teto kaniliganihege mutholo dhaathu amodha ni mutholo ninnihuna. Hiedi anosoriha egi, “ Onere oyelela murenddele onniwena wathabwaga oliganiha egumi yawo ni egumi enna athu amodha.” (Omwileri Gálatas 6:4.) Iyo nnohowela wafwanya makalelo mamodha nnandihu wakavihera athu amodha nimulabelaga Yehova. *

17. Wihina ofwanelele wakela mutholo dhimodha enahoweleya were ddi?

¹⁷ Enere wukweyela wawenjhedhedha mabasa onampareliwe Yehova, wakweyiha egumawo  ni wahinongaga korowa ni dhithu dhihinna mabasa. We podi osakula dholuba dhig’ono, wihina wande wakwaneliha wafiya mudhidhi dholuba dhinlubale onniwena. Motajhiha, akala yoluba yawo fuukala piyonero amudhidhi wamutene, onoonamo avi olaba ninga piyonero amudhidhi wamutene ovanene? Akala yoluba yawo fulaba ninga mudhaari ookavihera, onoonamo avi ojhaga mudhidhi wowinjhivene waaparaga mabasa oolaleya, wawaredhelaga aredda ni addibila eri anakalaba ammulogoni mwawo? Eyo enere wukavihera okala ooxaga, ni enere wufugulela musiwo wihina wakele mutholo dhimodha osogolo. Mowindala, wikome werana yele onandiwe wakela mutholo bu mutholo mmulogoni.—Rom. 12:11.

18. Ninga nnoonihu vafotuni, nnahudheravo ddi ni murogola Beverley?

¹⁸ Kaavo athambwe okala mwanakalaba ahinafwanelela wakwaneliha dholuba dhomuzimuni. Kasugwa yotajhiha ya murogola anithaniwa Beverley anna yaka 75. Oliye ahikanna makathamiho oweedda mwaha egumaye. Mbwenye oofuna wawenjhedhedha mabasa ampareliye Yehova nufiya mudhidhi wa kampanya yomugawa konviti owubuwela okwa wa Yesu. Bumwahaya oliye osakula dholuba andiye wakwaneliha. Beverley nuwakwaniha dholuba ndha wodhela omugawa konviti, oliye ohagalala vanlubale. Yotajhiha yaye, ehaathukulela addibila amodha wawenjhedhedha mabasiwa mmalaleyelo. Yehova anovaha thima mabasa amatene addibilihu eri anakalaba enaapariwa, naarive efwanyiwaga makathamiho.—Sal. 71:17, 18.

19. Enaanikavihere ddi wakwaneliha dholuba dhomuzimuni nthomilihu?

¹⁹ Osakule dholuba onandiwe wakwaneliha. Wilibihere wihina okanne dhikalelo dhinamuhagalase Yehova. Ohudhere dhikalelo dhixa dhinuthukulele oparihedhiwa mabasa ni Yehova vamodha ni nikuru naaye. Dhenyeya wasayelege makalelo mamodha owakavihera addibila ammulogoni mwawo. * Mowindala ninga ni Timotiyu, ni mareeliho a Yehova ‘wunnuwelavo wawo womuzimuni woniwege ni athu aatene.’—1 Tim. 4:15.