1. Kuyini esingahlela ukukwenza?

 SIYAMTHANDA sibili uJehova. Yikho sifuna ukwenza konke okusemandleni ethu ekumkhonzeni. Kodwa ukuze sithuthuke kumele sihlele lokho esifuna ukukwenza. Singahlela ukuba lobuntu amaKhristu okumele abe labo, ukufunda ukwenza ezinye izinto lokudinga indlela esingancedisa ngazo abanye.

2. Kungani kumele sihlele esifuna ukukwenza ekukhonzeni futhi sizimisele ukusebenza nzima ukuze sikwenze?

² Kungani kumele sizimisele ukuthuthuka? Isizatho esiqakathekileyo yikuthi sifuna ukuthokozisa uBaba wethu osezulwini. UJehova uyathokoza nxa sizisebenzisa ngokugcweleyo iziphiwo zethu ekumkhonzeni. Okunye okwenza sithuthuke ekukhonzeni yikuthi sifuna ukuncedisa abafowethu labodadewethu. (1 Thes. 4:9, 10) Sonke singathuthuka ekukhonzeni kungelani lokuthi sesilesikhathi esinganani singoFakazi. Ake sixoxe ngokuthi singakwenza njani lokho.

3. Ngokwalokho okutshiwo ku-1 Thimothi 4:12-16, umphostoli uPhawuli wakhuthaza uThimothi ukuthi enzeni?

³ Lanxa uThimothi wayeselesikhathi engumdala, encwadini yokuqala umphostoli uPhawuli ambhalela yona wamkhuthaza ukuthi aqhubeke ethuthuka. (Bala u-1 Thimothi 4:12-16.) Ngesikhathi ubala amazwi kaPhawuli uzananzelela ukuthi wayefuna uThimothi athuthuke ekutshengiseni uthando lokholo lasekubeni msulwa. Kanti njalo kwakumele akhuthalele ukubalela uzulu wonke lokweluleka kanye lokufundisa. Sizaxoxa ngesibonelo sikaThimothi ukuze sibone ukuthi ukuhlela lokho  esingakwenza ekukhonzeni kungasinceda njani ukuthi sithuthuke. Sizaphinda sibone ukuthi singenzani ukuze senze okunengi ekutshumayeleni.

4. Ngokwalokho okutshiwo kuFiliphi 2:19-22, kuyini okwenza uThimothi wasetshenziswa nguJehova?

⁴ UThimothi wasetshenziswa nguJehova ngenxa yokuthi wayelobuntu obumthokozisayo. (Bala uFiliphi 2:19-22.) UPhawuli wathi uThimothi wayethobekile, ethembekile njalo ekhuthele. Wayebathanda abafowabo labodadewabo futhi elendaba labo. Lokhu yikho okwenza uPhawuli wamthanda njalo wamnika imisebenzi eqakathekileyo. (1 Khor. 4:17) Lathi nxa silobuntu obuthokozisa uJehova, uzasithanda njalo sizanceda abafowethu labodadewethu ebandleni.—Hubo. 25:9; 138:6.

5. (a) Kuyini okungakunceda ubone ubuntu okumele ubuthuthukise? (b) Udade osepikitsheni ukwenza njani lokho akuhlelileyo?

⁵ Khetha lokho ofuna ukukwenza. Thandaza njalo ucabangisise ngokuthi kungaphi lapho odinga ukuthuthukisa khona. Khetha ubuntu ongafuna ukubuthuthukisa. Ungakhetha ukuthuthuka ekubeni lozwelo kumbe ukuzimisela ukuncedisa abafowenu labodadewenu. Ungakhetha ukuthuthuka ekwenzeni ukuthi kube lokuthula lasekuthetheleleni abanye. Okunye ongakwenza yikucela umngane wakho ukuthi akutshele lapho okumele uthuthukise khona.—Zaga. 27:6.

6. Ungenzani ukuze ube lobuntu obuhle?

⁶ Sebenza nzima ukuze uphumelele. Ungakwenza njani lokho? Okunye ongakwenza yikutaditsha ngobuntu ofuna ukubuthuthukisa. Ake sithi ufuna ukuba ngumuntu othethelelayo. Ungaqala ngokubala langokucabangisisa ngabantu okukhulunywa ngabo eBhayibhilini abaxolela abanye ngenhliziyo yonke labangazange babaxolele. Omunye owaxolela abanye ngenhliziyo yonke nguJesu. (Luk. 7:47, 48) Kazange azihluphe kangako ngamaphutha abo kodwa wayeqakathekisa lokho ababesenelisa ukukwenza. AbaFarisi bona ‘babekhangelela abanye phansi.’ (Luk. 18:9) Nxa usucabangisise ngezibonelo lezi usungazibuza imibuzo  elandelayo: ‘Mina ngibonani kwabanye? Ngikhangela kakhulu amaphutha abo kumbe okuhle abakwenzayo?’ Nxa kukuthwalisa nzima ukuxolela omunye zama ukucabanga izinto ezinhle azenzayo ubusuzibhala phansi. Ngemva kwalokho zibuze imibuzo elandelayo: ‘UJesu umbona njani umuntu lo? Ubengamxolela yini?’ Ukwenza lokhu kungasinceda ukuthi sitshintshe indlela esimbona ngayo. Ekuqaliseni kungaba nzima ukuthi sixolele umuntu osiphambanisileyo. Kodwa nxa singaqhubeka sizama kuzabalula ukuthi simxolele.

7. Ngokwalokho okutshiwo kuZaga 22:29, uJehova ubasebenzisa njani abafowethu labodadewethu abazingcitshi emsebenzini?

⁷ Okunye ongahlela ukukwenza yikufunda ukwenza umsebenzi othile. Kufuneka abafowethu labodadewethu abanengi ukuthi bakhe amaBhetheli, amaWolu Emihlangano Emikhulu kanye lamaWolu oMbuso. Abanengi bafunda ukwenza imisebenzi le ngokusebenza labafowethu labodadewethu abazingcitshi kuyo. Njengoba sibona epikitsheni, abafowethu labodadewethu bafunda ukwenza imisebenzi ezabanceda ukuthi bagcine amaWolu Emihlangano Emikhulu kanye lamaWolu oMbuso esesimeni esihle. UJehova uNkulunkulu ‘oyiNkosi yaPhakade’ loJesu Khristu ‘oyiNkosi Yamakhosi’ benza imisebenzi emikhulu sibili besebenzisa abafowethu labodadewethu laba abazingcitshi. (1 Tim. 1:17; 6:15; bala iZaga 22:29.) Sifuna ukusebenza nzima ukuthi sisebenzise iziphiwo zethu ukuze kudunyiswe uJehova hatshi thina.—Joh. 8:54.

8. Kuyini okungakunceda ubone lapho odinga ukuthuthukisa khona?

⁸ Khetha lokho ofuna ukukwenza. Kungaphi lapho ongafisa ukuthuthukisa khona ebandleni? Ungacela abadala bebandla lombonisi wesiqinti bakutshele lapho ongathuthukisa khona. Nxa bengathi kumele uthuthukise indlela ofundisa ngayo babuze ukuthi yikuphi ongakuthuthukisa ekufundiseni. Ngemva kwalokho sebenza nzima ukuze uthuthuke. Kuyini okungakunceda?   

9. Kuyini okungakunceda ukuthi wenelise ukufundisa kuhle?

⁹ Sebenza nzima ukuze uphumelele. Ake sithi ufuna ukuthuthuka endleleni ofundisa ngayo. Ukuhlola ibhukwana elithi Khuthalela Ukubala Lokufundisa kuzakunceda. Nxa ungaphiwa inkulumo emhlanganweni waphakathi kweviki, ungacela umfowethu ofundisa kuhle ukuthi aqale ayilalele abesekutshela lapho ongayithuthukisa khona. Lungiselela kuseselesikhathi ukuze abafowethu labodadewethu babone ukuthi usebenza nzima lokuthi bangakuthemba.—Zaga. 21:5; 2 Khor. 8:22.

10. Omunye umfowethu wenzani ukuze athuthuke?

¹⁰ Ungakhalali nxa ufuna ukuthuthuka ekwenzeni into ekuthwalisa nzima. Umfowethu okuthiwa nguTom Garry wayengenelisi ukubala kuhle. Lokhu kwakusenza ayangeke nxa sekumele abalele ibandla. Kodwa waqhubeka esebenza nzima ukuze athuthuke. Khathesi uthi usesenelisa ukwenza inkulumo ebandleni lemihlanganweni yesiqinti kanye leyesabelo ngenxa yokuqeqetshwa akutholayo.

11. Kuyini okuzasinceda ukuthi senze okunengi ekukhonzeni?

 ¹¹ IBhayibhili alisitsheli ukuthi uThimothi waba yingcitshi yini ekufundiseni ebandleni. Kodwa akuthandabuzwa ukuthi ukulalela iseluleko sikaPhawuli kwamnceda ukuthi athuthuke. (2 Tim. 3:10) Lathi nxa singazama ukuthuthuka ekwenzeni ulutho oluthile, sizakwenza okunengi ekukhonzeni.

12. Abanye bakuncedise njani?

¹² Sonke siyafuna ukuncediswa ngabanye. Nxa sisesibhedlela siyathokoza nxa sivakatshelwa ngabadala abakuKhomithi Esebenzelana Lezibhedlela kumbe abasemaqenjini avakatshela izigulane. Siyambonga umdala ozinika isikhathi sokuthi asilalele njalo asiduduze nxa siphakathi kohlupho. Kanti njalo siyathokoza nxa iphayona livuma ukuhamba lathi emuntwini esifunda laye iBhayibhili njalo lisincedisa. Abafowethu labodadewethu laba bazimisele ukusincedisa. Lathi singabalingisela ngokuzimisela ukuncedisa abanye. UJesu wathi: “Ukupha kuyathokozisa kakhulu ukwedlula ukwamukela.” (ImiSeb. 20:35) Kuyini okungakunceda ukuthi uphumelele?

13. Kumele senzeni ukuze lokho esikuhlelayo kuphumelele?

¹³ Hlela khona kanye ofuna ukukwenza. Phela nxa ungazitshela ukuthi ufuna ukwenza okunengi ebandleni kodwa ungahlelanga khona kanye ofuna ukukwenza kungaba nzima ukubona ukuthi ungakwenza njani lokuthi usukwenzile. Yikho akucace ukuthi ufuna ukwenzani. Ungabhala phansi lokho ofuna ukukwenza lokuthi uhlela ukukwenza njani.

14. Kungani kumele sizimisele ukutshintsha lokho esiyabe sikuhlelile?

¹⁴ Kumele sizimisele ukutshintsha lokho esiyabe sikuhlelile ngoba izimo lazo zingatshintsha. Ngokwesibonelo, umphostoli uPhawuli wancedisa ngesikhathi kubunjwa ibandla edolobheni leThesalonika. Akuthandabuzwa ukuthi wayefuna ukuqhubeka elapho, encedisa amaKhristu ebandla lelo. Kodwa abaphikisi benza ukuthi uPhawuli acine esuka edolobheni lelo. (ImiSeb. 17: 1-5, 10) Ngabe uPhawuli kasukanga, abafowabo labodadewabo babezahlukuluzwa. Kodwa uPhawuli kazange ayekele ukubancedisa. Akwenzayo yikutshintsha lokho ayekuhlelile njengoba izimo lazo zasezitshintshile. Ngokuhamba kwesikhathi wathuma uThimothi ukuthi ayeqinisa amaKhristu eThesalonika. (1 Thes. 3:1-3) Akuthandabuzwa ukuthi athokoza ngokuthi uThimothi wayevumile ukusuka lapho ayekhona ukuze azowancedisa.

15. Ukutshintsha kwezimo kungabangela ukuthi senzeni? Nika isibonelo.

¹⁵ Sifundani kulokho okwenziwa nguPhawuli? Singahlela esifuna ukukwenza kodwa izimo zitshintshe besekusiba nzima ukuthi sikwenze. (UmTshu. 9:11) Nxa lokho kungenzakala, hlela okunye ongenelisa ukukwenza. Lokhu yikho kanye okwenziwa nguTed lomkakhe uHiedi. Kwasekumele basuke eBhetheli ngenxa yokuthi omunye wabo wayesegula. Kodwa babemthanda uJehova yikho badinga indlela zokwenza okunengi ekutshumayeleni. Baqalisa ngokuba ngamaphayona esikhathi sonke. Ngokuhamba kwesikhathi baba ngamaphayona aqakathekileyo njalo uTed waqeqetshwa ukuthi abambele umhambeli. Kodwa iminyaka umuntu okumele ame ngayo ukuhambela yatshintshwa njalo uTed loHiedi basebeyifikisile iminyaka leyo, yikho bama ukuhambela. Lanxa badana babekwazi ukuthi kukhona okunye abangakwenzela uJehova. UTed uthi: “Safunda ukuthi akumelanga sihlele ukwenza umsebenzi owodwa kuphela ekukhonzeni uJehova.”

16. Sifundani kuGalathiya 6:4?

¹⁶ Izinto azihlali zihamba ngendlela esiyabe sifisa ukuthi zihambe ngayo. Yikho akumelanga sicabange ukuthi okwenza siqakatheke kuJehova yimisebenzi yenkonzo esilayo njalo akumelanga siqathanise imisebenzi yenkonzo esiyenzayo leyabanye. UHiedi uthi: “Ucina ungathokozi nxa uziqathanisa labanye.” (Bala uGalathiya 6:4.) Okuqakathekileyo yikukhonza uJehova lokudinga indlela zokuncedisa abanye. *

17. Ungenzani ukuze uphiwe eminye imisebenzi?

¹⁷ Sizenelisa ukwenza okunengi ekukhonzeni uJehova nxa singaphila singelazinto ezinengi njalo singabi lezikwelede  ezingadingakaliyo. Hlela ukwenza izinto ezincane ezizakunceda ukuthi uphumelele ukwenza izinto ezinkulu ozihlelileyo. Ngokwesibonelo, ake sithi ufuna ukuba liphayona lesikhathi sonke. Ungaqalisa ngokuba liphayona elisizayo eliqhubekayo. Nxa ufuna ukuba yinceku ekhonzayo ungazama ukukhuthala ekutshumayeleni lokuvakatshela abagulayo lasebekhulile ebandleni. Nxa ungakwenza lokho ungaphiwa eminye imisebenzi ngesikhathi esizayo. Zimisele ukukhuthala kuloba yiwuphi umsebenzi owuphiwayo.—Rom. 12:11.

18. Ufundani kudadewethu uBeverley osepikitsheni?

¹⁸ Lanxa sesikhulile singenelisa ukuhlela esingakwenza. Ake sixoxe ngodade okuthiwa nguBeverley oleminyaka engu-75. Ulomkhuhlane owenza kube nzima ukuthi ahambe, kodwa wayefisa sibili ukwenza okunengi ngesikhathi seSikhumbuzo. Yikho wahlela khona kanye ayefuna ukukwenza. Wathokoza sibili esephumelele ukwenza lokho ayekuhlelile. Akwenzayo kwakhuthaza labanye ukuthi bakhuthale ekutshumayeleni. UJehova uyakuqakathekisa okwenziwa ngabafowethu labodadewethu asebekhulile lanxa izimo zingasabavumeli ukuthi benze okunengi.—Hubo. 71:17, 18.

19. Singahlela ukwenzani?

¹⁹ Hlela lokho ongenelisa ukukwenza. Woba lobuntu obuthokozisa uJehova. Funda ukwenza izinto ezizakwenza uJehova akusebenzise enhlanganisweni yakhe. Dinga indlela zokuncedisa abafowenu labodadewenu. * Lawe njengoThimothi uJehova uzakubusisa njalo ‘abantu bazayibona ngokucacileyo intuthuko yakho.’—1 Tim. 4:15.