1. Ngozvapi zvido zvoumwari zvatingagaja?

 INGA MAKRISTU o cokwadi, tinoda maningi Jehovha. Tinoda kuti basa ratinomuitira rive raushoni kamare. Asi kuti tiite zvese zvatinokwanisa kuna Jehovha, tinodikana kugaja zvido zvo umwari zvakadari inga kusakurira mugariro jo Cikristu, kujijira kuita mabasa aushoni no kupsaka manera o kushandira vamweni. *

2. Ngenyi tinodikana kugaja zvido zvo umwari no kushanda ngo simba kuti tizvikwanirise?

² Ngenyi tinodikana kuva vashandiri vakanaka va Jehovha? Cokutanga, tinoda kukuja Baba wedu vano rudo vo kudenga. Jehovha anodakara maningi paanotivona tecishandisa simba redu no zvatinokwanisa mu basa rake. Mukuengejera, tinoda kuenderera mberi kudivi ro umwari kuti tikwanise kubesera hama no hambzaji jedu. (1 Vatesaronika 4:9, 10) Azvinenyi dangani tina makore mangana tiri mu cokwadi, tese tingakwanisa kuenderera mberi kudivi ro umwari. Ngatende tivone kuti tingaitisa kudini izvi nyamasi uno.

3. Inga zvakatahwa pana 1 Timoti 4:12-16, mupostori Pauro wakavangisa Timoti kuti aitenyi?

³ Mupostori Pauro paakatara karata yake yokutanga kuna Timoti, iyena wainga waamukuru waanoruzivo. Pikija zvakadaro, Pauro wakavangisa Timoti kuti aenderere mberi eciva mushandiri waushoni wa Jehovha. (Verenganyi 1 Timoti 4:12-16.) Pamunonga meciverenga magama a Pauro, munozovona kuti iyena waida kuti Timoti aenderere mberi kumativi maviri: Rokutanga, asakurire mugariro jo Cikristu jakadari inga rudo, rutendo no uceni. Rocipiri, aitise nane pakuverenga  pamberi po vamweni, kuvangisa vamweni no kuvajijisa. Tecirangarira muezaniso uwu wa Timoti, ngatende tivone kuti kugaja zvido zvo umwari kungatibeseresa kudini. Tinozovonazve njira nganani jatingaengejera ndijona mushando wedu.

4. Mukuzwirana na Vafiripi 2:19-22, ngozvapi zvakaita kuti Timoti ave mushandiri waushoni wa Jehovha?

⁴ Zvicinyi zvakaita kuti Timoti agume pakuva mushandiri waushoni wa Jehovha? Ngo cokuti iyena wainga no mugariro jakanaka jo Cikristu. (Verenganyi Vafiripi 2:19-22.) Inga zvakananga Pauro ngo pamusoro pa Timoti, tinokwanisa kuvona kuti iyena wainga mundhu waijidodokesa, waigondeka no waishanda ngo simba. Iyena wainga no rudo, waitajazve maningi hama jake. Inga muviyo, Pauro waida maningi Timoti perapo wainga acikathyi kumupa mabasa anonesa. (1 Vakorinte 4:17) Mukuezanavo, Jehovha anozotida no kunasa kutishandisa mu ungano kudari tikasakurira mugariro jaanoda.—Nduyo 25:9; 138:6.

5. (a) Mungakhetesa kudini mugariro wo Cikristu wa munoda kusakurira? (b) Inga zviri kukhombijwa pa foto, hambzaji iyi iri musikane, iri kukhombijisa kudini usizi kuno vamweni?

⁵ Sananyi mugariro wamunoda kusakurira. Itanyi mukumbiro no kurangarira ngo divi ro undhu hwenyu hwamunoda kuitisa nane. Psakanyi mugariro umwe wamunoda kusakurira kamare. Inga muezaniso, munoda kuva mundhu anousizi maningi kana ano cido cakavanga kamare cokuda kubesera hama no hambzaji? Munoda kuva mundhu ano runyararo no anoregerera? Psakanyi shamwari inothembeka ingamupa mazano kuti mukwanise kuitisa nane.—Mazwi Akangwara 27:6.

6. Mungaitisa kudini kuti musakurire mugariro jaushoni?

⁶ Shandanyi ngo simba kuti mukwanirise cido cenyu. Mungazviitisa kudini izvi? Njira imwe yamungazviita ndiyona ngo yokunasa kujija mugariro wamunoda kuitisa nane. Ngatiti imwimwi munoda kushanda ngo simba kuti muve mundhu anoregerera vamweni, mungatanga ngo kuverenga no kurangarijisisa ngo muezaniso jinonangwa mu Bhaibheri jo vandhu vakaregerera vamweni no vaya vacikazivi. Vonanyi muezaniso wa Jesu. Iyena wakaregerera vamweni ngo mwoyo wese. (Ruka 7:47, 48) Cimwenizve, iyena aazivi kubatikana maningi pa zviro zvovaiposa asi wakabatikana pa zviya zvavaikwanisa kuita. Ngo njira yakasiyana, Vafarisi vo munjiku ja Jesu vaivona vamweni “inga vacikasisiri.”  (Ruka 18:9) Pakupera kurangarijisisa ngo muezaniso iji, jivhunjisenyi kudari: ‘Ngozvapi zvandinovona kuvamweni? Ngojapi mugariro jaushoni javanajo jandinodikana kubatisisa?’ Kudari muri kuvangisira kuti muregerere ari wese, ejanyi kutara mugariro jakanaka jaanajo. Perapo mojivhunjisa kudari: ‘Jesu anovona kudini mundhu uwu? Kureva kuti iyena waizomuregerera?’ Kuita urongwa uwu wokujija kunozomubesera kuti muitise nane manera enyu okurangarira. Pakutanga, tingatovona zvecinesa kuregerera mundhu anonga atinyangajisa. Asi kudari tikaenderera mberi teciita izvi, pakufamba ko nguva zvinozotirerukira kuregerera ngo mwoyo wese.

7. Mukuzwirana na Mazwi Akangwara 22:29, Jehovha ari kushandisa kudini vandhu vanokwanirisa nyamasi uno?

⁷ Cido cimweni catingagaja ikujijira kuita mabasa aushoni. Amborangariranyi ngo vandhu vakawanda vanodikana kuti vavake Mabheteri, Nyumba jo Magungano no Nyumba jo Umambo. Vazinji vavo vari kukwanisa kuita basa iri ngo kushanda pamwepo no hama no hambzaji jaanoruzivo. Inga zviri kukhombijwa pa foto, vese hama no hambzaji vari kujijira kuita mabasa aushoni anodikana kuti vabesere pakunasirira-nasirira Nyumba jo Magungano no Nyumba jo Umambo. Munjira iji no jimwenivo, Jehovha Mwari, “Mambo acina magumo” pamwepo na Kristu Jesu “Mambo wo majimambo” vari kukwanisa kuita mabasa anoshamaisa vecishandisa vandhu ava. (1 Timoti 1:17; 6:15; verenganyi Mazwi Akangwara 22:29.) Itusu tinoda kushanda ngo simba no kushandisa uzivi hwedu kuti tikuje Jehovha kuciripi itusu pacedu.—Johani 8:54.

8. Mungaitisa kudini kuti muitise nane manera amunojijira mabasa okuita?

⁸ Sananyi basa ramunoda kujijira. Ngorapi basa ramunoda kujijira kuita? Vhunjisanyi vakuru vo ungano yenyu kana muvonereri wenyu wo ndharaundha kuti ngorapi basa ravanorangarira kuti imwimwi mungariita. Inga muezaniso, ivona vangatomuvhunja kuti munodikana kuitisa nane pamanera enyu okuvereketa no okujijisa. Mungakumbira kuti ivona vamubesere kuvona divi ro mugariro wenyu ramunodikana kushandira kuti muitise nane. Perapo shandanyi ngo simba kuti mutoitise nane kamare. Mungazviitisa kudini izvi?

9. Mungashandisa kudini ngo simba kuti mukwanirise cido cenyu cokujijira zviro zvimweni?

⁹ Shandanyi ngo simba kuti mukwanirise cido cenyu. Ngatiti imwimwi munoda kuitisa nane manera enyu okujijisa. Ngo kungwarira kwese jijanyi bhurushura rino musoro unoti Itisanyi Nane pa Kuverenga no Kujijisa. Kudari mukapuwa divi pamusongano wo pakati po sumana, kumbiranyi hama ino ruzivo kuti ipurukire divi renyu mucito mariita pamusongano no kumupa mazano kuti muitise nane. Nasiriranyi divi renyu nguva iciripo. Mukaita kudaro, vandhu vanozovona kuvangisira kwenyu perapo vanozomuthemba.—Mazwi Akangwara 21:5; 2 Vakorinte 8:22.

10. Ipanyi muezaniso unovonesa kuti tingaitisa kudini kuti tikwanise kubudirira pa mabasa atinoda kuita.

¹⁰ Zvicinyi zvamaizoita kudari cido camunodaro kukwanirisa aciripi kuva cakareruka kwamuri? Mucaremba. Hama imweni inodanwa Geri aicaikwanisa ushoni kuverenga. Iyona inoceukija kuti yakapseruka maningi payakaeja kuverenga ngo izwi guru pamusongano jo ungano. Asi yakaenderera mberi yecishanda ngo simba kuti iitise nane. Wari yakananga kuti ngondava yo rovejo yo yakaashira, iri kukwanisa kuita hurukuro pa Nyumba jo Umambo, magungano o ndharaundha no o mutundhu.

11. Inga ndi Timoti, zvicinyi zvinozotibesera kuti tiite mabasa ese atinopuwa?

 ¹¹ Kureva kuti Timoti wakakwanisa kuva mundhu anokwanisa kuvereketa no kujijisa ushoni here? Bhaibheri arinangi zviri zvese ngo pamusoro pazvo. Asi atikani-kani kuti iyena wakakwanisa kubudirira pakukwanirisa mabasa ese aakagajwa ecitevera zano raakapuwa ndi mupostori Pauro. (2 Timoti 3:10) Mukufananavo, kudari itusu tikashanda ngo simba pa manera atinoita zviro tinozokwanisa kuva takanasiririka kuti tiite mabasa ese atinopuwa.

12. Munozobesereka kudini ngo kushandira vamweni?

¹² Tese tinobesereka maningi ngo basa rinoitwa ngo vamweni. Patinonga tiri kushipitari tinodakara maningi patinovhakacihwa ngo vakuru vanoshanda pa Komisau Kuitira Kuvhakacira Zvipitari kana Cikwata co Kuvhakacira Vanohwaja. Patinosongana no zvineso mu upenyu hwedu tinodakara ngo kutajwa kwatinoitwa ngo vakuru pavanopeja nguva vecitipurukira no kutivangisa. Patinoda besero kuti tiitise jijo yo Bhaibheri tinodakarazve apo piyona anoruzivo anotendera kuva na itusu pajijo yedu yo Bhaibheri no kutipa mazano. Hama no hambzaji jese iji, jinodakara maningi ngo kutibesera. Tingavavo no mudakaro kudari tikajipira kuti tishandire hama jedu. Jesu wakati: “Kupekeja kunoviisa mudakaro mukuru kupinda kuashira.” (Mabasa o Vapostori 20:35) Waro kudari munoda kuengejera kushandira kwamunoita Jehovha munjira iyi kana munjira jimweni, zvicinyi zvinozomubesera kuti mukwanirise zvido zvenyu?

13. Pamunogaja cido ciri cese, ngo zvapi zvamunodikana kurangarira?

¹³ Nasanyi kungwarira pamunogaja zvido zvenyu. Inga muezaniso, imwimwi mungarangarira kudari, ‘ndinoda kuita zvizinji mu ungano.’ Asi munganeseka ngo kutama kuziva kuti mungaitisa kudini kuti mukwanirise cido condhoco kana kutovona kuti azvikwanisiki kuziva njiku yamungacikwanirisa. Ngo kudaro, sananyi cido cakanasa kujeka camungakwanirisa kamare. Kangaije mungatotara cido condhoco pari pese no kuita urongwa wo manera amungacikwanirisa.

14. Ngenyi tinodikana kuva takaezanana patinogaja zvido?

¹⁴ Cimwenizve tinodikana kuva vakaezanana patinogaja zvido zvedu. Ngenyi? Ngokuti atikwanisi kuvonerera mugariro wedu.  Inga muezaniso, mupostori Pauro wainga wakabesera kuumba ungano yo kudhorobha ro ku Tesaronika. Pacina kukana-kana iyena wainga no cido cokugara kondhoyo no hama iji ecijibesera. Asi vavengi vakaita kuti mupostori Pauro abude ku dhorobha iri. (Mabasa o Vapostori 17:1-5, 10) Kudari noakagara ku dhorobha rondhoro waizodira upenyu wo hama jake pangozi. Asi Pauro aazivi kuremba. Kusiyapo zvondhozvo, iyena wakaita cinjo mukuzwirana no mugariro uwu. Pakufamba ko nguva wakatuma Timoti kuti aende kobesera hama iji jo Kutesaronika. (1 Vatesaronika 3:1-3) Hama iji jakadakara maningi ngo kuvona kuti Timoti wainga ari kondhoyo kuti avabesere.

15. Zvido zvedu zvingacinjisa kudini mugariro wedu paunocinja? Ipanyi muezaniso.

¹⁵ Itusu tingajija zviri zvese ngo zvakaitika na Pauro Kutesaronika. Zvingaita kuti tiri kupsaka kugajwa basa riri rese, asi mugariro wedu auripi kutitendera kuti tigajwe basa rondhoro. (Mucumaeri 9:11) Kudari ndiwona mugariro wenyu, ivanyi no cido cokugaja zvido zvimweni zvamungakwanirisa. Izvi ndizvona zvakaitwa ndi hama Tedhi no mukaji wavo Heidhi. Ngo ndava yo zvineso zvo uhomi, ivona vakadikana kubuda pa Bheteri. Asi rudo hwavo kuna Jehovha hwakavaita kuti ivona vapsake manera amweni okuengejera mushando wavo. Pakutanga ivona vakatanga kushanda inga mapiyona o nguva jese. Pakufamba ko nguva vakagajwa kuti vashande inga mapiyona anosisira. Hama Tedhi vakatorovejwa kuti vafakeye muvonereri wo ndharaundha. Perapo, ngo ndava yo ndanga yavo, vakaima kushanda inga muvonereri wo ndharaundha. Hama Tedhi no mukaji wavo Heidhi, vakazwisisa kuti ivona vainga vaavasharuka kuti venderere mberi vecishandira Jehovha mubasa iri ravaingari vakagajwa. Pikija ivona vakasuruvara, vakazwisisa kuti vaizokwanisa kuenderera mberi vecishandira Jehovha mu njira jimweni. Hama Tedhi vakati: “Takajijira kuti tingakwanisa kushandira Jehovha munjira jakasiyana-siyana.”

16. Tinojijenyi ngozvatinovona pana Vagaratiya 6:4?

¹⁶ Itusu atikwanisi kuvonerera zvese zvinoitika mu upenyu hwedu. Asi cinosisira ikutama kupima kusisira kwatinoita kuna Jehovha ngo mabasa atinonga takagajwa kana kutoezanisa mabasa edu no mabasa anoitwa ngo vamweni. Hambzaji Heidhi vakasanangura kudari: “Runyararo hwenyu hunopera kudari mukaezanisa upenyu hwenyu no zviri kuitika mu upenyu hwo vandhu vamweni.” (Verenganyi Vagaratiya 6:4.) Cinosisira ikupsaka manera okubesera vamweni no kushandira Jehovha. *

17. Zvicinyi zvamungaita kuti muzokwanirise kugajwa mabasa kumbejiyo?

 ¹⁷ Munozokwanisa kuita zvizinji pakushandira kwenyu Jehovha kudari mukapungura zvimweni mu upenyu hwenyu no kutama kuita magava pacina dikano. Gajanyi zvido zvamungakwanirisa ngo kukasika no zvimweni zvamunozokwanirisa pakufamba ko nguva. Inga muezaniso, kudari munoda kushanda inga piyona wo nguva jese, zvingadini matanga kushanda inga piyona wo besero ko mweji jakawanda? Kudari munoda kushanda inga mubeseri wo ungano, zvakadini kupeja nguva yakawanda wari, mecicumaera, kuvhakacira vanohwaja no vaya vaavasharuka mu ungano yenyu? Zvamunozoziva pamunonga meciita izvi zvinozomubesera pamabasa amunozogajwa kumbejiyo. Temanyi civaringo cokuita zvese zvamunokwanisa pa mabasa amakagajwa.—Varoma 12:11.

18. Inga zvinokhombijwa pa foto, ngozvapi zvatinojija ngo muezaniso wo hambzaji Bhevheri?

¹⁸ Narini atidikani kurangarira kuti taavasharuka maningi kuti tigaje no kukwanirisa zvido. Vonanyi muezaniso wo hambzaji Bhevheri vanomakore anokwana kuita 75. Ivona vanozvineso zvo uhomi zvinoita kuti vanesehwe kufamba. Asi vainga no cido cokuda kuita zvizinji pa fafanya yo Cirangarijo. Ngo kudaro, vakagaja zvido zvavaizokwanirisa. Hambzaji Bhevheri pavakakwanirisa zvido zvavo pafafanya, vakadakara maningi. Kuvangisira kovakaita kwakabesera vamweni kuti vabatikanevo maningi mu basa ro kucumaera. Jehovha anoreremeja maningi basa rinoitwa ngo hama no hambzaji jedu jaavasharuka pikija mugariro wavo aucavatenderi kuti vaite zvondhozvo.—Nduyo 71:17, 18.

19. Ngozvapi zvido zvimweni zvo umwari zvatingagaja?

¹⁹ Gajanyi zvido zvamunozokwanirisa. Sakuriranyi mugariro jinozodakajisa Jehovha. Jijiranyi mabasa anozomuita kuti munase kushandiswa ndi Jehovha no sangano rake. Psakanyi manera okunasa kushandira hama no hambzaji jenyu. * Inga ndi Timoti, ngo besero ra Jehovha ‘kubudirira kwenyu kunozovoneka ngo vandhu vese.’—1 Timoti 4:15.