1. Hadia manö gohitö dödö ba wamati si tola tatatugöi?

 YAʼITA niha Keriso sindruhu, tatu taʼomasiʼö sibai Yehowa. Omasi ita tafalua wondrege zi sökhi ba wamosumange yaʼia. Hizaʼi, enaʼö tola tafalua daʼö, moguna tatatugöi gohitö dödöda ba wamati. Duma-dumania, tadouʼö mbua-bua niha Keriso, tafahaʼö ita ba nekhe-nekhe danga si bohou, ba taʼalui lala ba wanolo ira talifusöda. b

2. Hana wa moguna tatatugöi gohitö dödöda ba wamati ba taforege wogamö yaʼia?

² Hana wa terou dödöda ba wondrouʼö yaʼita ba wamati? Si oföna, omasi ita taʼomusoiʼö dödö Namada sebua faʼomasi si so ba zorugo. Omuso dödö Yehowa na taʼogunaʼö waʼatua-tua hegöi faʼabölöda ba wamosumange yaʼia. Baero daʼö, terou dödöda ba wondrouʼö yaʼita ba wamati enaʼö tola itugu oya nifaluada ba wanolo ira talifusöda. (1 Te. 4:9, 10) Gofu hawaʼara no so ita ba zindruhu, tola nasa tadouʼö ita ba wamati. Datatutunö hewisa lalada ba wamalua daʼö.

3. Simane nisura ba 1 Timoteo 4:12-16, hadia wamarou dödö nibeʼe zinenge sotöi Faulo khö Dimoteo?

³ Hewaʼae na awuyu-wuyu nasa Dimoteo me itema zura siföföna moroi khö zinenge sotöi Faulo, no saʼae ara mangai halöwö ia tobali satua sokubaloi. Hewaʼae simanö, ifarou ia  Faulo enaʼö lö tebulö idouʼö ia ba wamati. (Baso 1 Timoteo 4:12-16.) Ba ginötö tabaso wehede Waulo, tola taʼila wa omasi ia na iforomaʼö waʼatedou Timoteo ba zi dombua ngawalö andre: Si oföna, idouʼö mbua-bua niha Keriso simane faʼomasi, famati, ba faʼohau-hau. Si dua, idouʼö waʼonekhenia ba wombaso föna niha sato, ba wameʼe mene-mene, hegöi ba wamahaʼö niha. Datatutunö duma-duma nibeʼe Dimoteo enaʼö aboto ba dödöda hewisa wa tola itugu tedou ita ba wamati na no tatatugöi gohitö dödö si tola takhamö. Tatutunö göi hewisa lala enaʼö itugu oya halöwö ba wamati si tola tafalua.

4. Moloʼö Filifi 2:19-22, hadia mbörö wa omasi Yehowa wangogunaʼö Timoteo tobali sangai halöwö khönia?

⁴ Hadia mbörö wa omasi Yehowa wangogunaʼö Timoteo tobali sangai halöwö khönia? Börö me iʼokhögö mbua-bua niha Keriso. (Baso Wilifi 2:19-22.) Moroi ba nitutunö Waulo sanandrösa khö Dimoteo, tola taʼila wa yaʼia andrö niha si so fangide-ngideʼö, lö faröi, owölö-ölö, ba tola mufaduhusi tödö. Baero daʼö, iʼomasiʼö ba iʼameʼegö tödö ndra talifusönia. Daʼö mbörö wa iʼomasiʼö ia Faulo ba lö aombö dödönia wamaduhusi tödö khö Dimoteo ngawalö halöwö sagabua. (1 Ko. 4:17) Simanö göi, na tadouʼö mbua-bua somasi Yehowa, itugu iʼomasiʼö ita ba oya zi tola tafalua ba mbanua niha Keriso.—Si. 25:9; 138:6.

5. (a) Hewisa enaʼö tola ötatugöi mbua-bua niha Keriso somasiʼö ödouʼö? (b) Simane niforomaʼö ba gambara, hadia nifalua dalifusöda ira alawe andrö enaʼö itugu iʼameʼegö tödö niha böʼö?

⁵ Tatugöi gohitö dödöu. Angandrö khö Lowalangi ba haogö angeragö hadia manö zinangea ödouʼö. Aefa daʼö, tatugöi sambua mbua-bua somasiʼö ödouʼö. Duma-dumania, hadia moguna itugu öʼameʼegö tödö niha böʼö mazui itugu terou dödömö ba wanolo ira talifusöda? Hadia moguna nasa ödouʼö ndraʼugö ba wondrorogö faʼatulö ba niha böʼö hegöi ba wangefaʼö sala nifaluara? Tola manofu ndraʼugö ba zi fahuwu khöu ba wanutunö hadia manö mbua-bua sinangea ödouʼö.—Amd. 27:6.

6. Hewisa enaʼö tola ödouʼö mbua-bua si no ötatugöi?

⁶ Forege ba wogamö ohitö dödöu. Hewisa lalania? Sambua lala si tola öfalua yaʼia daʼö na öfahaʼö ndraʼugö sanandrösa ba mbua-bua somasiʼö ödouʼö. Duma-dumania, na so gohitö dödöu enaʼö tobali ndraʼugö niha somasi mangefaʼö sala, tola öbaso ba öʼangerönusi duma-duma si so ba Zura Niʼamoniʼö sanandrösa ba niha somasi mangefaʼö sala hegöi si löʼö.  Nehegö atö duma-duma Yesu. Aoha gölönia wangefaʼö sala niha böʼö. (Luk. 7:47, 48) Lö iʼosambuaʼö dödönia ba zala nifaluara ba zilalö, ba faduhu dödönia wa tola lafalua zi sökhi. Faehu sibai ia khö ndra Farizaiʼo me götö daʼö ”sangosiwawöi niha böʼö”. (Luk. 18:9) Me no aefa öʼangerönusi duma-duma andrö, sofu khöu samösa: ’Hewisa wamaigigu niha böʼö? Hadia uʼosambuaʼö dödögu ba mbua-buara si sökhi?’ Na abua khöu wangefaʼö sala zi samösa niha, tandraigö sura fefu mbua-bua si sökhi niʼokhögönia. Aefa daʼö sofu khöu samösa: ’Hewisa wamaigi Yesu yaʼia andre? Hadia omasi Yesu wangefaʼö salania?’ Na tafalua zimane daʼö, tola tabulöʼö lala wangera-ngerada. Ba wamobörö, tola manö moguna taforege ba wangefaʼö sala niha sangafökhöiʼö tödöda. Hizaʼi, na lö tebulö tadouʼö ita ba wamalua daʼö, tola itugu aoha gölöda wangefaʼö sala niha böʼö.

7. Hewisa lala Yehowa ba wangogunaʼö ira sohalöwö sonekhe ba götöda iadaʼa? (Amaedola 22:29)

⁷ Ohitö dödö tanö böʼö si tola ötatugöi yaʼia daʼö ba wamahaʼö yaʼugö ba wamalua halöwö soguna ba organisasi Yehowa. Angeragö atö ndra talifusöda sohalöwö ba wamazökhi fasilitas Mbetieli, Nahia Gangowuloa, hegöi Nahia Gangowuloa Sebua. Ato ba gotaluara nifomaha ba nekhe-nekhe danga si bohou me falulu fohalöwö ira khö ndra talifusöda si no ara mamalua halöwö daʼö. Simane niforomaʼö ba gambara, latema wamomaha ira talifusöda ba wondrorogö Nahia Gangowuloa hegöi Nahia Gangowuloa Sebua. Iʼogunaʼö ndra sohalöwö sonekhe andrö Lowalangi Yehowa, ”Razo götö-götö waʼara”, hegöi Yesu Keriso, ”Razo yawa razo”, ba wamalua ngawalö halöwö sahöli-höli dödö. (1 Ti. 1:17; 6:15; baso Gamaedola 22:29.) Omasi ita taforege wohalöwö ba taʼogunaʼö nekhe-nekhe dangada ba wamolakhömi Yehowa, tenga yaʼita samösa.—Yoh. 8:54.

8. Hewisa enaʼö tola ötatugöi nekhe-nekhe danga mazui faʼatua-tua sinangea ödouʼö?

⁸ Tatugöi gohitö dödöu. Hadia nekhe-nekhe danga mazui faʼatua-tua sinangea ödouʼö? Tola öʼandrö wanuturu lala khö ndra satua sokubaloi mazui satua samasui. Na duma-dumania lafarou ndraʼugö ba wondrouʼö faʼonekhemö ba wahuhuosa hegöi ba wamahaʼö, sofu khöra hadia nasa zinangea ödouʼö. Aefa daʼö, forege enaʼö itugu tedou waʼonekhemö ba wamalua daʼö. Hewisa lalania?

9. Hewisa enaʼö tola ödouʼö waʼonekhemö ba wangai halöwö?

⁹ Forege wogamö ohitö dödöu. Na duma-dumania omasiʼö ödouʼö waʼonekhemö ba wamahaʼö, tola öfahaʼö ndraʼugö ba brosur Odödögö Wombaso hegöi ba Wamahaʼö. Na labeʼe khöu halöwö ba wamaʼema huhuo ba gangowuloa barö migu, andrö khö zi samösa talifusöda ira matua ba wamondrondrongo huhuo nifaʼemamö andrö fatua lö öfaʼema ba gangowuloa, enaʼö tola ibeʼe khöu mene-mene sinangea öʼodödögö. Na no öhaogö wamaʼanö yaʼugö ba wamaʼema halöwö nibeʼe khöu, tola laʼila ira talifusöda wa yaʼugö andrö niha sowölö-ölö ba si tola mufaduhusi tödö.—Amd. 21:5; 2 Ko. 8:22.

10. Hadia nifalua zi samösa talifusöda ira matua ba wondrouʼö faʼonekhenia ba wangai halöwö?

¹⁰ Hewisa na abua khöu wondrouʼö faʼonekhemö ba wamalua si sambua halöwö? Böi awuwu ndraʼugö! Nehegö atö duma-duma dalifusöda ira matua sotöi Garry. Me mböröta, lö onekhe ia mombaso. Itörö tödönia wa aila sibai ia me laʼandrö khönia wombaso ba gangowuloa. Hewaʼae simanö, lö tebulö iforege enaʼö tedou waʼonekhenia. Iadaʼa, börö wamomaha si no itema moroi khö ndra talifusöda hegöi ba  publikasida, tola saʼae ifaʼema huhuo ba gangowuloa hegöi ba gangowuloa sebua!

11. Simane Timoteo, hewisa enaʼö itugu tefaʼanö ita ba wanema halöwö si tohude ba zi so miföna?

¹¹ Hadia no tobali samahaʼö sonekhe Dimoteo mazui atua-tua ia ba wamaʼema huhuo? Lö nitutunö Zura Niʼamoniʼö. Hizaʼi, tatu itugu mofozu ia wamalua noro dödönia börö me no iʼoʼö mene-mene nibeʼe Waulo. (2 Ti. 3:10) Simane Timoteo, na tadouʼö waʼonekheda, tola itugu tefaʼanö ita ba wamalua halöwö si tohude nibeʼe khöda ba zi so miföna.

12. Hadia manö wanolo si no irai ötema moroi ba niha böʼö?

¹² Fefu ita no irai tatema wanolo moroi khö ndra talifusöda. Na so ita ba rumah sakit, tatu taʼandrö sibai saohagölö ba ginötö laʼondrasi ita ira satua sokubaloi sohalöwö ba Panitia Penghubung Rumah Sakit mazui ba Kelompok Pengunjung Pasien. Na alua khöda gabula dödö, tatu taʼandrö sibai saohagölö khö ndra satua sokubaloi sameʼe inötöra ba wamondrondrongo yaʼita hegöi ba wameʼe khöda fondrara dödö. Na moguna khöda wanolo ba wondröniaʼö famahaʼö ba Zura Niʼamoniʼö, omuso dödöda na so perintis somasi fao khöda ba ibeʼe khöda wanuturu lala. Omuso sibai dödö ndra talifusöda andrö ba wanolo yaʼita. Tola göi tarasoi waʼomuso dödö simane daʼö na tatehegö waʼabölöda ba wanolo niha böʼö. Imane Yesu, ”Ohahau dödö ba wameʼe moroi ba wanema.” (Hal. 20:35) Na omasiʼö ödouʼö wamalua daʼö mazui tanö böʼönia, hadia zanolo yaʼugö ba wogamö ohitö dödöu?

13. Hadia zi tebai taʼolifugö na tatatugöi gohitö dödöda?

¹³ Sökhi na ötatugöi hadia sibai gohitö dödöu. Duma-dumania, te ömane tödöu, ’Omasido na itugu oya nifaluagu ba mbanua niha Keriso.’ Hizaʼi, tola manö abua khöu wangiʼila hewisa lala ba wogamö ohitö dödöu andrö, ba lö öʼila hadia no mofozu ndraʼugö wogamö yaʼia mazui löʼö. Börö daʼö, tatugöi hadia sibai gohitö dödö somasiʼö ökhamö. Tola göi ösura ba garate gohitö dödöu andrö hegöi lala nifaluamö ba wogamö yaʼia.

14. Hana wa moguna aoha gölöda ba wamaudugö ohitö dödöda?

¹⁴ Moguna göi aoha gölöda ba wamaudugö ohitö dödöda. Hadia mbörö? Börö me lö khöda faʼabölö ba wotatugöi fefu zalua khöda. Angeragö atö duma-duma zinenge sotöi Faulo. No fao ia ba wamasindro banua niha  Keriso ba Desalonika. Tatu manö, so gohitö dödönia enaʼö lö tebulö toröi ia ba daʼö ba wanolo ira niha Keriso si bohou andrö. Hizaʼi, börö wolohi moroi ba niha si faʼudu khönia, lö tola löʼö iröi mbanua daʼö Faulo. (Hal. 17:1-5, 10) Na lö mofanö ia moroi ba daʼö, tola manö teʼala waʼauri ndra talifusönia. Hewaʼae simanö, lö awuwu Waulo. Ifaudugö gohitö dödönia ba waʼatebulö salua. Ba gafuriata, ifatenge Dimoteo ba wameʼe soguna ba wamati khö ndra niha Keriso si bohou ba Desalonika. (1 Te. 3:1-3) Tatu omuso sibai dödö niha Desalonika börö me omasi Dimoteo wangai halöwö gofu hezo so mufataro ia!

15. Hadia zinangea tafalua na tebulö zalua ba waʼaurida? Beʼe duma-duma.

¹⁵ Tola tafahaʼö ita moroi ba zi no irai alua khö Waulo ba Desalonika. Te so gohitö dödö si no tatatugöi, hizaʼi tebai saʼae takhamö gohitö dödöda andrö börö me no tebulö zalua khöda. (Sango. 9:11) Na daʼö zalua khöu, moguna ötatugöi gohitö dödö tanö böʼö si tola ökhamö. Daʼö nifalua zi sambua fongambatö sotöi Ted hegöi Hiedi. Börö me so samösa ba gotaluara zi göna fökhö, andrö wa laröi Mbetieli. Hizaʼi, börö me laʼomasiʼö sibai Yehowa, terou dödöra ba wangalui lala tanö böʼö ba wondrouʼö halöwöra ba wamati. Ba wamobörö, mangai halöwö ira tobali perintis biasa. Aefa daʼö, mufataro ira tobali perintis istimewa, ba mufomaha dalifusöda Ted tobali salahi zatua samasui. Hizaʼi ba gafuriata, tebulö goi-goi sanandrösa ba waʼalawa ndröfi zatua samasui. Aboto ba dödöra wa tenga saʼae sinangea ira ba wanema halöwö daʼö börö me no alawa ndröfira. Hewaʼae na afatö dödö Ted hegöi Hiedi, aboto ba dödöra wa so lala tanö böʼö si tola lafalua ba wamosumange Yehowa. Imane Ted, ”Mafahaʼö ndraʼaga wa tenga ha sambua lala si tola mafalua ba wangai halöwö khö Yehowa.”

16. Hadia wamahaʼö si tola tahalö moroi ba Galatia 6:4?

¹⁶ Tebai tatatugöi hadia zalua ba waʼaurida. Börö daʼö, böi tasuʼa waʼebua mbölida föna Yehowa moloʼö halöwö si tohude niʼokhögöda. Ba tebai göi tafaedo-faedogö ita ba niha böʼö sangokhögö halöwö si lö nibeʼe khöda. Imane Hiedi, ”Tola taya waʼomuso dödöda na tafaedo-faedogö waʼaurida ba waʼauri niha böʼö.” (Baso Galatia 6:4.) Moguna taʼalui lala tanö böʼö ba wanolo ira talifusöda hegöi ba wangai halöwö khö Yehowa. c

17. Hewisa enaʼö sinangea ndraʼugö wanema halöwö si tohude?

¹⁷ Enaʼö tola tebeʼe khöu halöwö si tohude, moguna öʼöna-önaiʼö waʼaurimö ba böi moʼömö ndraʼugö na lö moguna sibai. Tatugöi gohitö dödö side-ide si tola möi fanolomö ba wogamö  ohitö dödö sabölö ebua. Duma-dumania, na so gohitö dödömö tobali perintis biasa, hadia tola mangai halöwö ndraʼugö iadaʼa tobali perintis ekstra ero waŵa? Na so gohitö dödömö tobali enoni, hadia tola ödouʼö waʼoya ginötö niʼogunaʼömö ba wanuriaigö mazui öfalukhaisi ndra talifusöda sofökhö hegöi si no alawa döfi ba mbanua niha Keriso? Fefu nifaluamö andrö iadaʼa, daʼö zi tobali famokai lala khöu ba wanema halöwö si tohude ba zi so miföna. Halö gangetula ba wamalua fondrege zi sökhi gofu hadia ia halöwö nibeʼe khöu.—Rom. 12:11.

18. Hadia zi tobali famahaʼö khöda moroi ba duma-duma dalifusöda Beverley? (Faigi göi gambara.)

¹⁸ Tola tatatugöi ba takhamö gohitö dödöda ba wamati hewaʼae na no alawa ndröfida. Nehegö atö duma-duma dalifusöda sotöi Beverley, samösa talifusöda ira alawe si 75 fakhe. No göna ia fökhö sabölö-bölö irege tebai mofanö ia. Hewaʼae simanö, omasi ia ifalua wondrege zi sökhi ba wogaoni niha enaʼö laʼondrasi Wanörö Tödö. Börö daʼö, itatugöi hadia manö gohitö dödö somasi ia ikhamö. Me mofozu Beverley ba wogamö ohitö dödönia andrö, omuso sibai dödönia. Börö wamorege nifaluania, itugu terou dödö ndra talifusöda tanö böʼö ba wanuriaigö. Iʼameʼegö tödö sibai Yehowa halöwö nifalua ndra talifusöda si no alawa döfi hewaʼae na lö oya zi tola lafalua.—Si. 71:17, 18.

19. Hadia manö gohitö dödö ba wamati si tola tatatugöi?

¹⁹ Tatugöi gohitö dödö si tola ökhamö. Douʼö mbua-bua sangomusoiʼö tödö Yehowa. Douʼö waʼonekhemö enaʼö itugu oya zi tola öfalua khö Yehowa hegöi ba organisasinia. Alui lala enaʼö itugu oya nifaluamö ba wanolo ira talifusöda. d Börö howu-howu moroi khö Yehowa, tola ”oroma waʼatedoumö ba niha fefu”.—1 Ti. 4:15.