ISIHLOKO SE- 18
Thuthukisa Bewufikelele Umgomwakho Wokulotjha UJehova
“Cabangisisa ngezintwezi; udzimelele kizo, ukuze ituthukwakho ibe sebaleni kiwo woke umuntu.”—1 THIM. 4:15.
INGOMA 84 Siyasiza
OKUZOKUCOCWA NGAKHO *
1. Ngimiphi imigomo yokulotjha uJehova esingazibekela yona?
NJENGOMBANA simaKrestu wamambala, simthanda khulu uJehova. Sifuna umsebenzi esimenzela wona ube ngophuma phambili. Nasizokwenza lokho ngendlela ephumelelako, kutlhogeka sizibekele imigomo enjengokuba nobuntu obuhle bobuKrestu, ukufunda amakghono alisizo nokuqala iindlela zokusiza abanye. *
2. Kubayini kufuze sizibekele imigomo yokulotjha uZimu begodu sisebenze budisi ukuyifikelela?
2 Kubayini kufuze sibe nekareko yokuzibekela imigomo yokulotjha uZimu? Kungebanga lokuthi sifuna ukuthabisa uBabethu wezulwini. UJehova uyathaba nakasibona sisebenzisa amakghonwethu nezipho zethu ngokuzeleko emsebenzinakhe. Ngaphezu kwalokho, sifuna ukuthuthuka ekulotjheni kwethu uJehova ukwenzela bona sibe lisizo kubafowethu nabodadwethu. (1 Thes. 4:9, 10) Ngitjho nanyana sinesikhathi eside kangangani siseqinisweni, soke singathuthuka ekulotjheni kwethu uZimu. Akhesibone ukuthi singakwenza njani lokho.
3. Njengombana kutlolwe kweyoku-1 kaThimothi 4:12-16, khuyini umpostoli uPowula akhuthaza uThimothi bona ayenze?
3 Ngesikhathi umpostoli uPowula atlola incwadakhe yokuthoma eyakuThimothi, isokaneli besele limdala webandla onelemuko. UPowula wamkhuthaza bona aragele phambili athuthuka ekulotjheni kwakhe uZimu. (Funda yoku-1 kaThimothi 4:12-16.) Njengombana ucabangisisa ngamezwi kaPowula, uzokulemuka bona bekafuna uThimothi athuthuke ngeendlela ezimbili: ngokuthi alwele ukuba nobuntu bobuKrestu njengethando, ukukholwa nokuba msulwa, nokuthi athuthukise amakghonwakhe wokufunda tjhatjhalazi, ekukhuthazeni nekufundiseni. Njengombana sicabanga ngesibonelo sakaThimothi, akhesibone ukuthi ukuzibekela imigomo esingakghona ukuyifikelela kungasisiza njani sithuthuke ekulotjheni kwethu uZimu. Sizokukhuluma nangeendlela esingathuthuka ngazo ekwenzeni umsebenzi wokutjhumayela.
LWELA UKUBA NOBUNTU BOBUKRESTU
4. NgokwebeFilipi 2:19-22, khuyini eyenza uThimothi waba yinceku kaJehova esebenzisekako?
4 Khuyini eyenza uThimothi waba yinceku kaJehova esebenzisekako? Bubuntu bakhe obuhle bobuKrestu. (Funda kwebeFilipi 2:19-22.) Nasiqala indlela uPowula ebekahlathulula ngayo uThimothi, siyabona ukuthi bekamumuntu othobekileko, okhutheleko begodu athembekile. Bekabathanda begodu anendaba khulu nabafowabo nabodadwabo. Umphumela walokho waba kukuthi uPowula wamthanda khulu uThimothi begodu bekangazazi ukumnikela izabelo ezibudisi. (1 Kor. 4:17) Ngendlela efanako siyathandeka kuJehova besisebenziseke ebandleni nasi nobuntu abuthandako.—Rhu. 25:9; 138:6.
Khetha ubuntu bobuKrestu ongathanda ukubuthuthukisa khudlwana (Funda iingaba 5-6)
5. (a) Ungazibekela njani umgomo wokuba nobuntu bobuKrestu? (b) Njengombana kutjengisiwe esithombeni, udadwethu osesemutjha ukulwela njani ukufikelela umgomo wokuba nomusa khudlwana kwabanye?
5 Khetha umgomo ongazibekela wona. Ngomthandazo, cabangisisa ngengcenye yobuntu bakho ekufuze uyithuthukise. Zikhethele umgomo munye ongathanda ukuthuthukisa kiwo. Ngokwesibonelo, kghani ungalwela ukuba nomusa khudlwana namkha ube nesifiso esidephileko sokusekela abafowenu? Kghani utlhoga ukuba nokuthula begodu ube mumuntu olibalelako? Kungakusiza khulu ukubawa umngani omthembako bona akunikele iindlela zokuthuthuka.—IzA. 27:6.
6. Khuyini ongayenza bona ufikelele umgomwakho wokulibalela abanye?
6 Sebenzela ukufikelela umgomwakho. Ungakwenza njani lokho? Lokho ungakwenza ngokuthi wenze irhubhululo lobuntu ofuna ukuthuthuka kibo. Akhesithi ukhetha ukusebenzela endabeni yokulibalela abanye khudlwana. Ungathoma ngokufunda nangokucabangisisa ngeembonelo eziseBhayibhelini zalabo abalibalela abanye ngokutjhaphulukileko nalabo abangakhenge balibalele abanye. Cabanga ngesibonelo sakaJesu. Walibalela abanye ngokutjhaphulukileko. (Luk. 7:47, 48) Akhenge adzimelele emtjhaphwenabo begodu bekaqala okuhle kibo. Ngokuhlukileko, abaFarisi ngeenkhathi zakaJesu ‘bebaqalela abanye phasi.’ (Luk. 18:9) Ngemva kokucabangisisa ngeembonelwezi, zibuze: ‘Khuyini engiyibonako kwabanye? Ngibuphi ubuntu engikhetha ukudzimelela kibo?’ Nangabe kubudisi kuwe ukulibalela omunye umuntu, linga ukutlola phasi ubuntu obuhle bomuntu loyo ngendlela ongakghona ngayo. Ngemva kwalokho, zibuze: ‘UJesu umqala njani umuntu lo? Kghani bekangamlibalela?’ Ukuhlolisisa okunjalo kungakusiza ulungise ukucabanga kwakho. Ekuthomeni kungaba budisi bona silibalele umuntu osikhubileko. Nasiragela phambili sisebenzela kilokho, ngokukhamba kwesikhathi sizokuba babantu abalibalela abanye ngokutjhaphulukileko.
FUNDA UKUBA NAMAKGHONO ATLHOGEKAKO
Funda bona wenziwa njani umsebenzi wokulungisa eWolweni lomBuso okilo (Funda isigaba 7) *
7. Ngokuvumelana nezAga 22:29, ngiziphi iindlela uJehova asebenzisa ngazo iinsebenzi ezinekghono namhlanjesi?
7 Omunye umgomo ongazibekela wona kufunda ukuba nekghono elitlhogekako. Cabanga ngesibalo seensebenzi ezitlhogekako ukwakha imakhiwo yeBethel, amaWolo wemiHlangano kunye namaWolo womBuso. Iinsebenzi ezinengi zifumene amakghono ngokuthi zisebenze nabafowethu abanelemuko. Njengombana kutjengisiwe esithombeni, abafowethu nabodadwethu bafunda amakghono atlhogekako ekulungiseni nekutlhogomeleni amaWolo wemiHlangano namaWolo womBuso. Ngeendlelezi nezinye, uJehova uZimu, ‘iKosi yaphakade,’ noKrestu Jesu, ‘iKosi yamakhosi,’ bakghona ukwenza izinto ezikarisako ngeensebenzi ezinamakghono. (1 Thim. 1:17; 6:15; Funda IzAga. 22:29.) Sifuna ukusebenza budisi bona siphazimulise uJehova, ingasi thina.—Jwa. 8:54.
8. Khuyini ongayenza bona uzibekele umgomo wokufunda ikghono elitjha?
8 Khetha umgomo othileko. Ngiliphi ikghono ongadzimelela kilo? Buza abadala bebandla okilo kunye nombonisi okhambako bona ngiliphi ikghono abacabanga ukuthi ungathuthukisa kilo. Nangabe ngokwesibonelo, babawa bona uthuthukise ikghono lakho lokukhuluma nokufundisa, babawe bakusize ubone ukuthi ngiyiphi indlela yokukhuluma ekufuze uthuthukise kiyo. Ngemva kwalokho, thatha amagadango wokwenza ituthuko. Ungakwenza njani lokhu?
9. Ungakusebenzela njani ukufikelela umgomo wokufunda ikghono elitjha?
9 Sebenzela ukufikelela umgomwakho. Akhesithi bowufuna ukuthuthukisa ikghono lakho lokufundisa. Ungafunda incwajana ethi, Zinikele Ekufundeni Nekufundiseni. Nawunikelwe isabelo emhlanganweni waphakathi neveke, ungabawa umfowethu ofanelekako bona akulalele kusesengaphambili begodu akunikele nendlela ongathuthukisa ngayo. Abantu kufuze bangakwazi kwaphela ngokuthi unekghono kodwana nokuthi ukhuthele nokobana bangathembela kuwe.—IzA. 21:5; 2 Kor. 8:22.
10. Nikela isibonelo sokuthi singathuthuka njani ekwakheni ikghono esilitlhogako?
10 Kuthiwani nange ikghono ofuna ukuthuthuka kilo lifaka hlangana into ongakghoni ukuyenza ngokwemvelo? Ungapheli amandla! Umfowethu ibizo lakhe linguGarry bekatshwenywa kugula okumenza angakghoni ukufunda kuhle. Uyakhumbula bona bekazizwa ahlaziseke kangangani lokha nakalinga ukufunda emihlanganweni yebandla kodwana akhenge alise, waragela phambili nokuzimisela. Nje, uthi ngebanga lebandulo alifumanako, uyakghona ukunikela iinkulumo emaWolweni womBuso, emihlanganweni yesigodi neyesifunda!
11. NjengoThimothi, khuyini engasisiza samukele izabelo ezengeziweko?
11 Kghani uThimothi bekasikhulumi esaziwako namkha bekaziwa njengomfundisi onekghono? IBhayibheli alitjho kodwana akunakuzaza bona uThimothi wathuthuka kuhle begodu waphumelela ekufezeni izabelo zakhe njengombana alandela iseluleko sakaPowula. (2 Thim. 3:10) Ngendlela efanako, nasithuthukisa amakghonwethu, sizokghona ukwamukela izabelo ezengeziweko.
FUNA IINDLELA ZOKUSIZA ABANYE
12. Uzuze njani emsebenzini eyenziwa ngabanye?
12 Soke siyazuza ngokusizwa ngabanye. Lokha nasisesibhedlela, kusithabisa khulu ukuvakatjhelwa badala abasiza eKomidini Yezeembhedlela (Hospital Liaison Committees) namkha isiQhema sabafowethu abaVakatjhela iinGuli esibhedlela (Patient Visitation Groups). Nasiqalene nobujamo obubudisi ekuphileni kwethu, siyakuthabela ukubona umdala azipha isikhathi sokusilalela begodu asiduduze. Nasitlhoga isizo ngesifundo seBhayibheli, siyathaba lokha iphayona elinelemuko likhamba nathi esifundweni begodu lisinikela neendlela esingathuthukisa kizo. Abafowethu nabodadwethwaba bayakuthabela ukusisiza. Nathi singathaba ngendlela efanako nasikulungele ukusiza abafowethu nabodadwethu. UJesu wathi, “Ukupha kuthabisa khulu ukudlula ukwamukela”. (IzE. 20:35) Nawufuna ukuthuthuka ekusizeni abanye namkha kwezinye iindlela ezifana nalezi, khuyini engakusiza ufikelele umgomwakho?
13. Nasizibekela umgomo othileko, khuyini ekufuze sibe nayo engqondweni?
13 Zibekele umgomo wokuthi ufuna ukuthuthuka kuphi ngokunqophileko. Ngokwesibonelo, ungacabanga, ‘Ngifuna ukwenza okungeziweko ebandleni.’ Kungaba budisi ukwazi bona ungathuthuka njani nokuthi sele uwufikelele na umgomo ozibekele wona. Nje-ke khetha ngokunqophileko umgomo ofuna ukuzibekela wona. Ungatlola phasi umgomo nokuthi uhlela ukuwufikelela njani.
14. Kubayini kutlhogeka sivumelane nobujamo nasizibekela imigomo?
14 Kutlhogeka nokuthi sivumelane nobujamo nasizibekela imigomo. Kubayini? Kungombana angekhe sakghona ukulawula ubujamo bethu. Akhesifanekise: Umpostoli uPowula wafumana isizo ukuthoma ibandla elitjha leThesalonika begodu asizazi bona umgomwakhe bekukuhlala endaweni leyo ukuthi asize amaKrestu asesematjha eqinisweni. Abaphikisi bakatelela uPowula bona afuduke edorobhenelo. (IzE. 17:1-5, 10) Ngathana uPowula wahlala, bekazokubeka abafowabo engozini kodwana akhenge aphele amandla. Kunalokho, wavumelanisa ubujamo bakhe namatjhuguluko ebekaqalene nawo. Ngokukhamba kwesikhathi, wathumela uThimothi ukuthi ayokusiza amaKrestu amatjha weThesalonika ukuthi aqinise ukukholwa kwabo. (1 Thes. 3:1-3) Kwabathabisa khulu beThesalonika ukubona uThimothi azokusiza njengombana bebatlhoga isizo.
15. Ubujamo obungaphezu kwamandlethu bungayithinta njani imigomwethu? Fanekisa.
15 Singafunda kilokho uPowula aqalana nakho eThesalonika. Kungenzeka sifuna ukufikelela isabelo esithileko kodwana ubujamo obungaphezu kwamandlethu busikhandele ukufumana isabelweso. (UMtj. 9:11) Nangabe kunjalo nakuwe, zimisele ukukhetha esinye isabelo ongakghona ukusifikelela. Ngilokho abatjhadikazi uTed noHiedi abakwenzileko. Ngebanga lomraro wezepilo, kwafuze bakhambe eBethel kodwana ithando labo ngoJehova labenza bafuna ezinye iindlela zokuthuthukisa umsebenzi abawenzela uJehova. Bathoma ngokuba maphayona wesikhathi esizeleko. Ngokukhamba kwesikhathi, bakhethwa bona babe maphayona akhethekileko begodu uTed wabandulwa bona abemjameli wombonisi okhambako. Ekukhambeni kwesikhathi iminyaka yalabo abangaba babonisi abakhambako yatjhuguluka. UTed noHiedi balemuka bona bebangasafaneleki ukuragela phambili nesabelo sabo sokukhambela amabandla. Nanyana lokho kwabadanisa, balemuka ukuthi bangamsebenzela uJehova nangezinye iindlela. UTed uthi, “Safunda ukungadzimeleli esabelweni sinye ehlanganweni kaJehova.”
16. Ngisiphi isifundo esingasifunda kwebeGalatiya 6:4?
16 Angeze sakghona ukulawula yoke into eyenzeka ekuphileni kwethu. Yeke, asingacabangi bona siqakatheke kuJehova ngebanga lesabelo esikiso begodu asingazimadanisi nabanye abanamalungelo thina esinganawo. UHiedi uhlathulula uthi, “Ukuthula kwakho kuzokuphela nawumadanisa ukuphila kwakho nalokho obona kwenzeka ekuphileni kwabanye.” (Funda kwebeGalatiya 6:4.) Kuqakathekile bona sifune iindlela esingasebenziseka ngazo. *
17. Khuyini ongayenza bona ufumane amalungelo angeziweko wokusebenzela uJehova?
17 Zenze ufumaneke emsebenzini ongawenzela uJehova ngokwenza ukuphila kwakho kube lula nangokubalekela iinkolodo. Zibekele umgomo ozokghona ukuwufikelela msinyana, ozokusiza ukghone nokuzibekela imigomo yesikhathi esizako. Ngokwesibonelo, nangabe umgomwakho wesikhathi eside kukuba liphayona lesikhathi esizeleko, kghani ungakghona ukuba liphayona lesikhatjhana eliragela phambili? Nangabe umgomwakho kukuba yinceku esizako, kghani ungakghona ukuba nesikhathi esingeziweko emsebenzini wokutjhumayela begodu uvakatjhele abagulako nabakhulileko abasebandleni okilo? Ilemuko ozolifumana njenganje lingakusiza likuvulele iminyango yokufumana amalungelo angeziweko esikhathini esizako. Zimisele ukwenza koke okusemandlenakho kinanyana ngisiphi isabelo onikelwa sona.—Rom. 12:11.
Khetha umgomo ongakghona ukuwufikelela (Funda isigaba 18) *
18. Njengombana kutjengiswe esithombeni, khuyini oyifundako esibonelweni sakaBeverley?
18 Ukukhula ngeminyaka akusikhandeli bona sizibekele imigomo yokulotjha uJehova. Akhesicoce ngokwesibonelo ngodadwethu uBeverley oneminyaka ema-75. Bekanomraro wepilo obowumenza angakghoni ukukhamba kodwana bekafisa ukuhlanganyela ngokuzeleko ejimeni lesiKhumbuzo. Yeke wazibekela umgomo. Lokha uBeverley nakafikelela umgomwakhe wokuba nesandla ejimeneli, wathaba khulu. Imizamwakhe yakhuthaza abanye bona basebenze budisi emsebenzini wokutjhumayela. UJehova uyawuthabela umsebenzi wabafowethu nabodadwethu abakhulileko, ngitjho nanyana ubujamo bungabavumeli bona benze lokho ebebangathanda ukukwenza.—Rhu. 71:17, 18.
19. Ngimiphi imigomo yokusebenzela uJehova ongazibekela yona?
19 Zibekele imigomo ozokghona ukuyifikelela. Lwela ukuba nobuntu obuzokwenza uthandwe nguJehova. Funda amakghono azokwenza usetjenziswe nguZimethu ehlanganwenakhe. Funa iindlela zokusiza abafowethu nabodadwethu ngokungeziweko. * NjengoThimothi ngokubusiswa nguJehova, kwanga ‘ituthukwakho ingaba sebaleni kiwo woke umuntu.’—1 Thim. 4:15.
INGOMA 38 UZimu Uzokuqinisa Akuphe Amandla
^ UThimothi bekamtjhumayeli ophumelelako weendaba ezimnandi. Nanyana kunjalo, umpostoli uPowula wamkhuthaza bona aragele phambili athuthuka Ngokulandela iseluleko sakaPowula, uThimothi bekazosebenzela uJehova bekabe lisizo kubafowabo nabodadwabo khudlwana. Kghani nawe ufana noThimothi, uzimisele ukulotjha uJehova kunye nabafowethu ngokuzeleko? Akunakuzaza bona uzimisele. Ngimiphi imigomo engakusiza bona wenze njalo? Khuyini ebandakanyekileko nawuzozibekela imigomo begodu uyifikelele?
^ IHLATHULULO YAMAGAMA: Imigomo yokulotjha uJehova ihlanganisa nanyana yini esiyisebenzela budisi bona sikghone ukulotjha uJehova ngokuzeleko begodu simthabise.
^ Qala isihloko esithi, “Ukukhonza Lapho Kunendingeko Ekulu Khona” encwadini ethi, Ukuhlelelwa Ukwenza Intando KaJehova, isahluko 10, iing. 6-9.
^ Qala isifundo 60 esithi, “Ragela Phambilli Uthuthuka,” encwadini ethi, Thabela Ukuphila Ngokungapheliko!
