NKHANI YOPHUNZILA 18
Mwatingapangile Zolinga Zauzimu Nozikwanilisha
“Sinkhasinkha zinthu izi mozama ndipo uzipeleke pa zinthu izi kuti ŵanthu onse aone kuti upita pasogolo.”—1 TIM. 4:15.
NYIMBO 84 Tuzipeleka na Mtima Wonse
ZATI TIPHUNZILE *
1. Kansi ni zolinga zauzimu zotyani zatingaziikile?
MONGA Akhristu acendi, tumukonda ngako Yehova ndipo tufuna kucita zilizonse zatingakwanishe pomutumikila. Kuti tikwanishe kucita izi, tufunika kuziikila zolinga zauzimu monga kukulisha minkhalidwe yacikhristu, kuphunzila maluso noyesayesa kupeza njila zatingatumikililemo Akhristu ayasu. *
2. Ndaŵa yanji tufunika kuziikila zolinga zauzimu noyesayesa kuzikwanilisha?
2 Ndaŵa yanji tufunika kuziikila zolinga zauzimu? Cifukwa coyamba n’cakuti tufuna kukondwelesha Ausuwasu akululu. Yehova osangalala ngako akaona kuti tuseŵenzesha maluso ŵasu mokwanila pomutumikila. Caciŵili, tufuna kucita zinyinji potumikila akwasu na azilongosi. (1 Ates. 4:9, 10) Mosasamala kanthu kuti tatumikila Yehova kwa nthawi itali tyani, tufunika kupitilizhya kuluta pasogolo mwauzimu. Lomba, tiyeni tione mwatingacitile izi.
3. Molingana na 1 Timoteyo 4:12-16, kansi mtumwi Paulo elimbikisha Timoteyo kuti acitenji?
3 Timoteyo enzotumikila kale monga mkulu pamene mtumwi Paulo enzomulembela kalata yake yoyamba. Olo n’tetyo, Paulo emulimbikisha kuti enzofunika kuluta pasogolo mwauzimu. (Ŵelengani 1 Timoteyo 4:12-16.) Tikaona mau yecilemba Paulo m’kalata iyi, n’zoonekelatu kuti enzofuna kuti Timoteyo aziikile zolinga ziŵili. Coyamba, enzofuna kuti akulishe minkhalidwe yacikhristu monga cikondi na cikhulupililo. Ndipo caciŵili, enzofuna kuti ayangizhyile maluso ŵake monga kuŵelenga bwino pamenso pa ŵanthu na kuphunzisa. M’nkhani ino, tione mwamene cisanzo ca Timoteyo cingatiyavyile kupanga zolinga zauzimu. Tione soti zatingacite kuti tiyangizhyile utumiki wasu.
KULISHANI MINKHALIDWE YACIKHRISTU
4. Molingana na Afilipi 2:19-22, kansi n’cinji ceyavya Timoteyo kuti akwanishe kucita zinyinji potumikila Yehova?
4 Timoteyo ecita zinyinji potumikila Yehova cifukwa enze na minkhalidwe yacikhristu. (Ŵelengani Afilipi 2:19-22.) Tikaona zecilaŵila Paulo, n’zoonekelatu kuti Timoteyo enze wolicefya, wokhulupilika, wakhama koma soti wodalilika. Kuyangizhyila apo, enzokonda Akhristu ayake ndipo enzocita zilizonse zaangakwanishe kuti aŵayavye. Cifukwa ca izi, Paulo enzomukonda ngako Timoteyo ndipo enzomudalila kuti akwanishe kucita utumiki ulionse waangamupase olo kuti ni wovuta. (1 Akor. 4:17) Ngati tuyesayesa kukulisha minkhalidwe yacikhristu, tinkhale pa ushamwali wotang’a na Yehova ndipo tikocita zinyinji poyavya akwasu na azilongosi mumpingo.—Sal. 25:9; 138:6.
Mukosankha nkhalidwe yacikhristu yamungafune kukulisha (Onani ndime 5-6)
5. (a) Kansi mungacitenji kuti mukulishe minkhalidwe yacikhristu? (b) Monga ni mwataonela pa cithunzithunzi, kansi kalongosi wacilumbwana ocitanji kuti akwanilishe colinga cake coonesha cifundo?
5 Ziikileni colinga. Tiyelekezele kuti mufuna kukulisha minkhalidwe yacikhristu. Coyamba, mufunika kupemphela noganizila mbali zamungafunike kuongolela. Pavuli pake mufunika kusankha nkhalidwe imozi yamufuna kukulisha monga cifundo, mtendele na kukhululuka. Nthawi ziyakine, mungafunike kusenga Akhristu acikulile mwauzimu kuti akufotokozeleni zamungacite kuti mukwanilishe colinga ici.—Miy. 27:6.
6. Kansi mungacitenji kuti mukulishe nkhalidwe iyakine?
6 Citani khama kuti mukwanilishe colinga camwaziikila. Njila imozi yamungacitile izi ni kuphunzila mosamala zokhuza nkhalidwe yacikhristu yamwasankha kuti museŵenzelepo. Tiyelekezele kuti mwasankha nkhalidwe ya kukhululuka. Mungayambe na kuŵelenga nosinkhasinkha pa visanzo va m’Baibo va ŵanthu amene ekhululukila ŵanthu ayakine na mtima wonse monga Yesu. (Luka 7:47, 48) Yove enzokwanisha kucita izi cifukwa enzoika maganizo ŵake pa zinthu zeenzocita bwino ŵanthu ayakine osati pa zeenzolakwisa. Kuyangizhyila apo, mufunika kuŵelenga nosinkhasinkha pa visanzo va m’Baibo va ŵanthu amene ekangiwa kukhululukila ŵanthu ayakine monga Afarisi. Ove “enzoona ŵanthu ayakine kunkhala atyalatyala.” (Luka 18:9) Pavuli posinkhasinkha pa visanzo ivi, mungacite bwino kuzikonsha kuti: ‘Kansi ŵanthu ayakine nuŵaona tyani? Kansi nuika maganizo ŵangu pa zinthu zakucita bwino olo pa zophophonya zao?’ Ngati muvutika kukhululukila munthu muyakine, yesayesani kuganizila minkhalidwe iweme yaali nayo noilemba pa pepala. Pavuli pake zikonsheni kuti: ‘Kansi Yesu omuona tyani munthu uyu? Ngati kuti enze yove, kansi sembe wamukhululukila?’ Kucita izi kungakuyavyeni kuti muongolele kaganizidwe kanu. Poyamba, payakine cingokuvutani kukhululukila ayakine ngati akukhumudwishani. Koma ngati mucita izi nthawi na nthawi cikonkhala cosavuta kukhululukila ayakine na mtima wonse.
PHUNZILANI MALUSO AYAKINE
Mukozipeleka kuti muphunzile zamungacite posamalila Ng’anda ya Ufumu (Onani ndime 7) *
7. Molingana na Miyambo 22:29, kansi ni m’njila zotyani mwamene Yehova oseŵenzeshela akwasu na azilongosi amene ali na maluso masiku ŵano?
7 Colinga ciyakine camungaziikile ni kuphunzila maluso yamungaseŵenzeshe m’gulu ya Yehova. Masiku ŵano, pofunika Akhristu anyinji amene angazipeleke kutolako mbali pa nchito yomanga Maofesi a Msambo, Malo Ocitilapo Misonkhano Ikulu-ikulu na Mang’anda a Ufumu. Akhristu anyinji amene ocilikiza pa nchito izi, ephunzila maluso ŵao kufumila kuli akwasu na azilongosi amene ali na maluso amene aŵa. Monga ni mwatuonela pa cithunzithunzi, akwasu na azilongosi ozipeleka kuphunzila maluso yaangaseŵenzeshe posamalila malo ŵasu olambilila. Kulaŵila cendi, ni daliso ikulu ngako kuseŵenzesha maluso ŵasu pokwanilisha cifunilo ca Yehova wamene ni “Mfumu ya muyaya” na Yesu Khristu wamene ni “Mfumu ya . . . mafumu.” (1 Tim. 1:17; 6:15; ŵelengani Miyambo 22:29.) Tetyo, tiyeni tipitilizhye kuseŵenzesha maluso ŵasu potamanda Yehova, osati kuzipezela ulemelelo.—Yoh. 8:54.
8. Kansi mungacitenji kuti muziŵe luso yamungafunike kukulisha?
8 Ziikileni colinga. Kansi mungacitenji kuti muziŵe luso yamufunika kukulisha? Mungasenge akulu a mumpingo mwanu olo woyanganila wadela wanu kuti akuuzhyeni luso yamungafunike kukulisha. Mwacisanzo, ngati angakuuzhyeni kuti mukulishe luso yolaŵila nkhani nophunzisa, mungaŵasenge kuti akuuzhyeni mbali zamungafunikile kuseŵenzelapo. Pavuli pake mukoseŵenzesha malangizo yaangakupaseni. Kansi mungakwanilishe tyani colinga ici?
9. Kansi mungacitenji kuti mukwanilishe colinga cokulisha luso iyakine?
9 Citani khama kuti mukwanilishe colinga canu. Mwacisanzo, ngati mufuna kukulisha luso yophunzisa, mufunika kuŵelenga malangizo yopezeka m’kabulosha kakuti Citani Khama pa Kuŵelenga na Kuphunzisa. Ndipo ngati mwapasiwa nkhani pa misonkhano ya mkati mwa wiki, mukosenga mkwasu wamene ali na luso kuti amvwishile ku nkhani yanu nokuuzhyani mbali yamungacinje ikaliyofwika siku yolaŵila nkhani yanu. Kuyangizhyila apo, mukokonzekela nkhani yanu kukali nthawi kuti ŵanthu aone kuti mucita khama koma soti kuti nimwe wodalilika.—Miy. 21:5; 2 Akor. 8:22.
10. Fotokozani cisanzo coonesha mwatingakulishile luso iyakine.
10 Nanga tyani ngati mufuna kukulisha luso iyakine koma muona kuti ni yovuta? Musataye mtima. Izi niye zecitikila mkwasu Garry. Mkwasu uyu enzovutika kuŵelenga bwino. Olo n’tetyo, epitilizhya kukulisha luso yake. Cifukwa ca malangizo yecilandila kufumila kuli akwasu koma soti zeenzoŵelenga, lomba okwanisha kulaŵila bwino nkhani pa misonkhano ya mpingo, ya dela na ya cigao.
11. Molingana na Timoteyo, kansi n’cinji cingatiyavye kukwanilisha mautumiki yatingalandile?
11 Kansi Timoteyo eyangizhyila maluso ŵake pa nkhani yolaŵila nophunzisa pavuli polandila malangizo a Paulo? Baibo yulaŵila lini ciliconse. Koma catuziŵa n’cakuti malangizo aya yemuyavya kuti akwanilishe bwino maudindo ŵake. (2 Tim. 3:10) Molingana na izi, ngati nase tuyangizhyila maluso ŵasu, zingatiyavye kuti tikwanilishe utumiki ulionse watingapasiwe m’gulu ya Mulungu.
MUKOSAKILA MIPATA YOTUMIKILILAMO AYAKINE
12. Kansi tupindula tyani na thandizo ya ŵanthu ayakine?
12 Tonse tupindula ngako na thandizo ya ŵanthu ayakine. Mwacisanzo, ngati tulwala, tuyamikila ngako ngati akulu amene ali mu Komiti Yolaŵizhyana na Azacipatala awela kuzotiona. Ngati tukumana na vuto iyakine, tuyamikila ngako ngati mkulu watimvwishila notitonthoza. Ndipo ngati tuvutika kusogoza phunzilo ya Baibo, tuyamikila ngako ngati mpainiya wazipeleka kuti apezekepo pa phunzilo yasu notiuzhya mbali zatufunika kuongolela. Akwasu na azilongosi aŵa ozipeleka kuti atiyavye. Nase tingaoneshe kuti tutolela cisanzo cao mwa kunkhala okonzeka kuyavya akwasu na azilongosi nthawi zonse. Yesu elaŵila kuti: “Kupasa kuleta cimwemwe cikulu kupambana kulandila.” (Mac. 20:35) Ngati muona kuti mungafunike kuyangizhyila zamucita pa mbali iyi olo ziyakine, kansi mungacitenji kuti mukwanilishe colinga ici?
13. Kansi tufunika kupewa cinji patuziikila colinga?
13 Mufunika kupewa kuziikila zolinga zisali zacindunji. Mwacisanzo, payakine mungaziikile colinga cakuti, ‘Nufuna kucita zinyinji mumpingo.’ Koma cingankhale covuta kuziŵa zenezene zamungacite kuti mukwanilishe colinga ici olo kuzindikila ngati mwacikwanilisha. Tetyo, mufunika kuziikila zolinga zacindunji. Ngati pali bwino, mungacitolemba colinga camufuna kukwanilisha na zamungacite kuti mucikwanilishe.
14. Ndaŵa yanji tufunika kunkhala okonzeka kucinja zolinga zasu?
14 Tufunika soti kunkhala okonzeka kucinja zolinga zasu. Izi zili teti cifukwa nthawi iliyonse zinthu zingacinje pa umoyo. Mwacisanzo, mtumwi Paulo elalikila mwakhama mumzinda wa Tesalonika ndipo enkhazikisha mpingo. Mosakaikila, yove enze na colinga cakuti ankhale mumzinda uyu kwa kanthawi kuti alimbikishe ŵala amene ebatizika lombapano. Koma pakaliyopita nthawi itali, ŵanthu eyamba kumususha ndipo izi zecitisha kuti acoke mumzinda uyu. (Mac. 17:1-5, 10) Kuti Paulo enze eyumilila kunkhala mumzinda uyu, sembe eika umoyo wa akwasu na azilongosi pa ngozi. Koma aliyofooke. M’malo mwake, ecinja colinga cake kulingana na mwezenzele zinthu pa umoyo. M’kuluta kwa nthawi etumako Timoteyo kuti akalimbikishe Akhristu a ku Tesalonika. (1 Ates. 3:1-3) Mosakaikila, Akhristu aŵa elimbikishiwa ngako na mzimu wecionesha Timoteyo wonkhala okonzeka kuluta kulikonse kwaangatumiwe.
15. Kansi zocitika pa umoyo zingakhuze tyani zolinga zasu? Fotokozani cisanzo.
15 Monga ni zecitikila Paulo ku Tesalonika, nthawi ziyakine tingaziikile colinga koma zinthu pa umoyo wasu zingacinje ndipo izi zingacitishe kuti tisakwanilishe colinga casu. (Mla. 9:11) Zikankhala teti, tufunika kucinja zolinga zasu noziikila zolinga ziyakine zamene tingazikwanilishe. Izi niye zecicita mkwasu Ted na mkazi wake Hiedi. Banja iyi yenzotumikila pa Beteli. Koma eyamba kulwala ndipo izi zecitisha kuti aleke kucita utumiki uyu. Olo n’tetyo, cikondi cao pa Yehova ceŵasonkhezela kuti ayeseko njila ziyakine zaangayangizhyililemo utumiki wao. Coyamba, etola upainiya wanthawi zonse. M’kuluta kwa nthawi eikiwa kunkhala apainiya apadela. Ndipo mkwasu Ted ephunzisiwa kuti ayambe kutumikila monga woyanganila dela wokatizhyila. Koma ca pa nthawi yamene iyo, penkhala masinthidwe okhuza vyaka va ŵala amene angaikiwe kunkhala oyanganila a madela. Mkwasu Ted na mkazi wake ezindikila kuti ove enze akulu kupitilila pa vyaka vakuti angaciteko utumiki uyu. Poyamba, izi zeŵafookesha koma ezindikila kuti pali njila ziyakine zaangatumikililemo Yehova. Mkwasu Ted elaŵila kuti, “Zocitika izi zatiphunzisa kuti tufunika kunkhala okonzeka kucitako mautumiki osiyanasiyana m’malo moika tyala maganizo pa utumiki umozi.”
16. Kansi Agalatiya 6:4 yutiphunzisa cinji?
16 Nthawi zonse tikokumbukila kuti tiliye mphamvu yocinja zinthu zuticitikila pa umoyo. Tetyo, tufunika lini kuganiza kuti nise ofunika ngako kwa Yehova, tyala cifukwa ca utumiki watucita olo kulinganizhya zatucita m’gulu ya Yehova na zaakucita ayakine. Kalongosi Hiedi elaŵila kuti: “Kuzilinganizhya na ayakine kungacitishe kuti osati tikonkhala acimwemwe.” (Ŵelengani Agalatiya 6:4.) Tetyo, m’malo mozilinganizhya na ŵanthu ayakine, tufunika kuyesayesa kupeza njila zatingatumikililemo Yehova na Akhristu ayasu. *
17. Kansi mungacitenji kuti muyenelele kucitako mautumiki ayakine?
17 Kuti mukwanishe kucita zinyinji potumikila Yehova, mufunika kunkhala umoyo wosalila zinyinji nopewa nkhongole. Kuyangizhyila apo, mufunika kuziikila zolinga zitontho-zitontho zamene zingakuyavyeni kukwanilisha zolinga zikulu-zikulu. Mwacisanzo, ngati mufuna kuyamba upainiya wanthawi zonse, mungayambile kutolako upainiya woyavya kwa miyezi inyinji. Ndipo ngati mufuna kutumikila monga mtumiki woyavya, mungacite bwino kuseŵenzesha nthawi yanu ikulu mu utumiki nozipeleka kuyoona Akhristu olwala na acikulile a mumpingo mwanu. Zinthu zamungaphunzile pocita izi, zingakuyavyeni kuti mukakwanishe kucita utumiki ulionse wamungapasiwe msogolo. Tetyo, mukocita khama pocita utumiki ulionse wamuli nao pali lomba.—Aro. 12:11.
Mukoziikila colinga cacindunji camene mungacikwanilishe (Onani ndime 18) *
18. Kansi mwaphunzilapo cinji pa cisanzo ca kalongosi Beverley watuona pa cithunzithunzi?
18 Tonse tufunika kuziikila zolinga zauzimu mosasamala kanthu za msinkhu wasu. Ganizilani cisanzo ca kalongosi Beverley wa vyaka 75. Yove enzolwala matenda yamene yenzocitisha kuti akovutika kuyenda. Koma enzofuna kucita zinyinji pocilikiza kampeni yoitila ŵanthu ku Cikumbuso. Tetyo, eziikila zolinga zacindunji. Kalongosi uyu pecikwanilisha zolinga zake esangalala ngako. Ndipo cisanzo cake celimbikisha ayakine mumpingo kucita khama pa nchito yolalikila. Yehova oyamikila ngako zakucita akwasu na azilongosi acikulile pomutumikila olo kuti zocitika pa umoyo zucitisha kuti osati akocita zinyinji.—Sal. 71:17, 18.
19. Kansi ziyakine mwa zolinga zauzimu zatingaziikile n’zotyani?
19 Mukoziikila zolinga zauzimu zamene mungazikwanilishe. Kulishani minkhalidwe yacikhristu yamene ingakuyavyeni kunkhala pa ushamwali wotang’a na Yehova. Phunzilani maluso yamene mungayaseŵenzeshe m’gulu ya Mulungu. Ndipo mukoyesayesa kusakila mipata yamungatumikililemo akwasu na azilongosi. * Ngati mucita izi, ‘kuluta kwanu pasogolo kuonekele ku ŵanthu onse’ monga ni mwecicitila Timoteyo.—1 Tim. 4:15.
NYIMBO 38 Mulungu Akupase Mphamvu
^ Timoteyo enze mlaliki waluso wa uthenga uweme. Olo n’tetyo, mtumwi Paulo emulimbikisha kuti apitilizhye kuyangizhyila maluso ŵake. Cifukwa cakuti ekonkha malangizo a Paulo, Timoteyo ecita zinyinji potumikila Yehova koma soti akwasu na azilongosi. Molingana na Timoteyo, nase tufuna kucita zinyinji potumikila Yehova na okhulupilila ayasu. Kansi ni zolinga zotyani zatingaziikile? Ndipo tingacitenji kuti tizikwanilishe?
^ TANTHAUZO YA MAU AYAKINE: Zolinga zauzimu zuyangizhyilapo zilizonse zatucita kuti tiyangizhyile utumiki wasu kwa Yehova na colinga cakuti tim’kondweleshe.
^ Onani nkhani yakuti “Kutumikira Kumene Kukufunikira Ofalitsa Ambiri” m’buku ya Chichewa ya Gulu Lochita Chifuniro cha Mulungu mutu 10 ndime 6-9.
^ Onani mutu 60 wakuti “Pitilizhyani Kupita Pasogolo” m’buku yakuti Sangalalani na Moyo Kosasila!
