NKHANI YOPHUZILA N.° 18
Kansi tingachite tyani kuti tikonkhala na volinga vauzimu novikwanilisha?
“Ukoganizila ngako vinthu vamene ivi. Lipeleke pa vinthu vamene ivi, kuti ŵanthu onse awone kuti upita pasogolo.”—1 TIM. 4:15.
NYIMBO N.° 84 Tulipeleka mwakhama
VATIKUTI TIPHUNZILE *
1. Kansi ni volinga vauzimu votyani vatingaliikile?
MONGA Akhilisitu achendi, tumukonda ngako Yehova. Tufunishisha kuti tikochita vonse vatingakwanishe pomutumikila. Kuti vamene ivi vikwanishike, tufunika kuliikila volinga vauzimu monga kunkhala na minkhalidwe iweme, kuphunzila maluso othandiza, komasoti kufwana njila zatingayavyile ayakine. *
2. Ndaŵa yanji tufunika kuliikila volinga vauzimu noyeja-yeja kuvikwanilisha?
2 Ndaŵa yanji tufunika kuyeja-yeja kupita pasogolo mwauzimu? Chifukwa chikulu n’chakuti tufuna kukondwelesha Atata ŵasu ŵakululu. Yehova osangalala akatiwona kuti tukatishila ntchito luso yasu mulimonse mwatingakwanishile pomutumikila. Kuyangijila pamene apo, tufuna kupita pasogolo mwauzimu kuti tikoyavya abale na alongo ŵasu. (1 Ates. 4:9, 10) Viliye kanthu kuti tankhala m’choonadi kwa nthawe itali tyani, tonse tingakwanishe kupita pasogolo mwauzimu. Tiyeni tiwone mwatingachitile vamene ivi.
3. Mokatijana na 1 Timoteyo 4:12-16, kansi ntumwi Paulo elimbikisa Timoteyo kuchita chinji?
3 Ntumwi Paulo penzelembela Timoteyo kalata yake yoyamba, mulumbwana wa chisanzo chiweme wamene uyo enzekale nkulu waluso. Koma olo n’tetyo, Paulo emulimbikisa kuti apitilije kupita pasogolo mwauzimu. (Ŵelengani 1 Timoteyo 4:12-16.) Mukaganizila mawu amene aŵa a Paulo, muwone kuti yove enzefuna kuti Timoteyo apite pasogolo mu njila ziŵili izi: kunkhala na minkhalidwe iweme monga chikondi, chikhulupililo komasoti nkhalidwe ituŵa na kuyangijila luso yake poŵelenga pamenso pa ŵanthu, kulimbikisa na kuphunzisa. Poganizila chisanzo cha Timoteyo, tiyeni tikambilane mwamene kunkhala na volinga vatingakwanilishe, mwakungatiyavyile kupita pasogolo mwauzimu. Tikambilanesoti njila ziyakine zamene zingatiyavye kuti tikochita vinyinji pa utumiki wasu.
KUNKHALA NA MINKHALIDWE IWEME
4. Mokatijana na Afilipi 2:19-22, kansi n’chinji chiyavya Timoteyo kuti ankhale ntumiki muweme wa Yehova?
4 Kansi n’chinji chiyavya Timoteyo kunkhala ntumiki muweme wa Yehova? Ni minkhalidwe iweme yenze nayo. (Ŵelengani Afilipi 2:19-22.) Tikawona vinthu vechifotokoza Paulo vokhuza Timoteyo, tinganene kuti yove enze wolichefya, wokhulupilika, wakhama, komasoti wodalilika. Yove enze wachikondi ndipo enzedela nkhaŵa ngako abale. Vamene ivi vichitisha kuti Paulo akomukonda, ndipo enzekaikilalini kuti akwanishe mautumiki ovuta ŵechimupasa. (1 Akor. 4:17) Molingana na vamene ivi, sewo nase Yehova angotikonda ndipo tingoyavya ngako mumpingo tikankhala na minkhalidwe yamene yumukondwelesha.—Sal. 25:9; 138:6
Mukosankha nkhalidwe iweme yamufuna kuti mukoiwonesha ngako (Onani ndime 5-6)
5. (a) Kansi mungachite tyani kuti munkhale na cholinga chofuna kukulisha nkhalidwe iyakine? (b) Kansi mulongo wachisimbi pa chithunzi ichi, ochita votyani kuti akwanilishe cholinga chake chakuti akowonesha ngako chifundo kuli ayakine?
5 Mukosankha cholinga chamufuna kukwanilisha. Mukopemphela noganizila mbali ya umunthu wanu wamufunikila kuchinja. Mukosankha nkhalidwe iyakine yamufunikila kukulisha. Mwachisanzo, kansi mufunishisha kuti mukowonesha ngako chifundo kuli ayakine olo kuyavya Akhilisitu ayanu? Kansi mufunishisha kuti mukonkhala mwantendele na ayakine komasoti kuti mukokhululuka? Mungachite luweme kukonsha muyanu wodalilika kuti akuyavyeni kuziŵa vamungachite kuti mupite pasogolo.—Miy. 27:6.
6. Kansi mungachite tyani kuti mukwanilishe cholinga chanu chofuna kukulisha nkhalidwe iyakine?
6 Mukochita khama kuti mukwanilishe cholinga chanu. Kansi mungachite tyani vamene ivi? Njila imozi ni kuphunzila mosamala nkhalidwe iyakine yamufuna kukulisha. Tiyelekezele kuti mufuna kuyeja-yeja kuti mukokhululukila ayakine. Mungayambe na kuŵelenga komasoti kuganizila ngako za ŵanthu otomolewa m’Baibolo amene enzekhululuka na ntima wonse komasoti ŵala amene enzekhululukalini. Ganizilani chisanzo cha Yesu. Yove enzekhululukila ayakine na ntima wonse. (Lk. 7:47, 48) Yove enzeganizilalini ngako vophoniya vawo, koma enzeŵawona kuti angakwanishe kuchinja. Koma Afarisi a m’nthawe yake enzewona “ayakine onse monga atyala-tyala.” (Lk. 18:9) Pavuli poganizila visanzo vamene ivi, likonsheni kuti: ‘Kansi newo nuwona vinthu votyani muli ayakine? Kansi nusankha kuganizila minkhalidwe yotyani yalinayo?’ Keno vukuvutani kukhululukila munthu muyakine, mukoyeja kulemba pa malo ayakine minkhalidwe inyinji iweme ya munthu wamene uyo. Pavuli pake, mukolikonsha kuti: ‘Kansi Yesu omuwona tyani munthu wamene uyu? Kansi sembe wasankha kumukhululukila?’ Kuphunzila mwa njila yamene iyi, kungatiyavye kuti tichinje mwatuganizila. Poyamba, tingafunike kuyeja-yeja kuti timukhululukile munthu watiphoniyela. Koma tikapitilija kuchita khama, mu kupita kwa nthawe vizankhale vosavuta kuti tikokhululuka.
KUPHUNZILA MALUSO OTHANDIZA
Mukolipeleka kuti muphunzile mwamungakonzele vinthu pa Ng’anda ya Ufumu (Onani ndime 7) *
7. Mokatijana na Miyambo 22:29, kansi Yehova okatishila ntchito tyani ŵanthu aluso masiku ŵano?
7 Cholinga chiyakine chamungaliikile ni kuphunzila luso iyakine yothandiza. Ganizilani za kupaka kwa ŵanthu amene ofunika pomanga maofesi a Nthambi, Malo a Nsonkhano komasoti Ng’anda za Ufumu. Anyinji mwa ŵanthu amene aŵa, efwana luso pokata ntchito pamozi na abale na alongo amene oiziŵa luweme ntchito yamene iyo. Monga mwatuwonela pa chithunzi ichi, abale na alongo ophunzila luso yamene ingaŵayavye pa ntchito yokonza Malo a Nsonkhano na Ng’anda za Ufumu. Njila zamene izi komasoti ziyakine, Yehova Mulungu wamene ni “Mfumu yosasila,” na Yesu Khilisitu wamene ni “Mfumu ya . . . mafumu,” okwanisha kuchita vinthu vikulu pokatishila ntchito ŵanthu aluso. (1 Tim. 1:17; 6:15; ŵelengani Miyambo 22:29.) Tufuna kuti tikochita khama komasoti kukatishila ntchito luso yasu polemekeza Yehova, osati kulilemekeza seka.—Yoh. 8:54.
8. Kansi mungachite tyani kuti muliikile cholinga chofuna kuphunzila luso iyakine?
8 Mukosankha cholinga chamufuna kukwanilisha. Kansi ni luso yotyani yamufuna kuphunzila? Mungakonshe akulu a mumpingo mwanu ndipo payakine mungakonshesoti wopanamila dela wanu kuti akuyavyeni kuziŵa luso yakuwona kuti mungachite luweme kunkhala nayo. Mwachisanzo, keno angakuujeni kuti mufunika kukulisha luso yanu yolaŵila na kuphunzisa, mungaŵakonshe kuti akufotokozeleni luso yolaŵila yamufunika kukatilapo ntchito. Pavuli pake, mukochita khama kuti mukulishe luso yamene iyo. Kansi mungachite tyani vamene ivi?
9. Kansi mungachite tyani kuti mukwanilishe cholinga chanu chofuna kuphunzila luso iyakine?
9 Mukochita khama kuti mukwanilishe cholinga chanu. Tiyelekezele kuti mufuna kukulisha luso yanu yophunzisa. Mungaphunzile mosamala kabuku kakuti Chitani khama pa kuŵelenga na kuphunzisa. Mukapasiwa nkhani pamisonkhano ya nkati mwa sondo, mungasenge m’bale waluso kuti aimvwishile pakali nthawe komasoti kukufotokozelani mwamungafunike kukonza. Kuyangijila pa kunkhala waluso, mukokonzekela mu njila yakuti ŵanthu awone kuti nimwe wakhama komasoti wodalilika.—Miy. 21:5; 2 Akor. 8:22.
10. Pelekani chisanzo chuwonesha mwatingapitile pasogolo pokulisha luso iyakine.
10 Lomba tyani keno mufuna kukulisha luso iyakine yamene mwachibadwa ni yovuta kuli mwewo? Osataya ntima! M’bale muyakine zina yake Garry, venzemuvuta kuŵelenga. Yove okumbukila mwenzechitila nsoni akafuna kuŵelenga pamisonkhano yampingo. Koma eyeja-yeja kuchita khama. Yove onena kuti chifukwa cha vinthu vechiphunzisiwa, palipano okwanisha kulaŵila nkhani mu Ng’anda ya Ufumu, pamisonkhano yadela, komasoti yachigawo!
11. Molingana na Timoteyo, kansi n’chinji chingatiyavye kuti tikochita vinyinji potumikila Yehova?
11 Kansi Timoteyo efwika ponkhala mphunzisi muweme ngako? Baibolo yufotokozalini. Koma n’vosakaikisha kuti chifukwa chokonkheja malangizo a Paulo, yove epitilija kuchita luweme ngako pa utumiki wake. (2 Tim. 3:10) Molingana na vamene ivi, sewo nase keno tukulisha luso yasu tingochita vinyinji potumikila Yehova.
MUKOSAKILA NJILA ZOYAVYILA AYAKINE
12. Kansi ayakine okuyavyani tyani?
12 Tonse tupindula na vakuchita ayakine potiyavya. Tikayonekewa mu chipatala, tutembeja abale a m’Makomiti Olaŵila na Azachipatala olo a m’Magulu Oyendela Olwala akawela kuzatiwona. Tikakumana na mavuto ayakine, tutembeja nkulu wachikondi akapatula nthawe yake kuti atimvwishile komasoti kutilimbikisa. Tikafuna thandizo pa nkhani ya mwatuchitishila phunzilo ya Baibolo, tusangalala mpainiya waluso akavomela kunkhala nase pa phunzilo yamene iyo komasoti kutipasa malangizo. Abale na alongo onse amene awo osangalala kutiyavya. Nase tingosangalala keno tulipeleka kuti tiyavye abale ŵasu. Yesu enena kuti: “Kupasa kuleta chisangalalo chikulu kupambana kulondela.” (Mac. 20:35) Lomba keno mufuna kuchita vinyinji pa mbali zamene izi komasoti mu njila ziyakine, kansi n’chinji chingakuyavyeni kukwanilisha volinga vanu vamene ivo?
13. Keno muliikila cholinga, kansi mufunika kukumbukila chinji?
13 Mukoliikila cholinga ngacho-ngacho chamufuna kuti muchikwanilishe. Mwachisanzo, payakine mungaganize kuti, ‘Nufuna nikochita vinyinji mumpingo.’ Komalomba vingankhale vovuta kuziŵa mwamungakwanilishile cholinga monga n’chamene icho, ndipo payakine mungaziŵelini keno mwachikwanilisha. Tetyo, mukoziŵa ngavo-ngavo vamufuna kuchita. Mungalembe pa malo ayakine cholinga chamene icho na vamufuna kuchita kuti muchikwanilishe.
14. Ndaŵa yanji tufunika kunkhala okonzeka kuchinja pa nkhani ya volinga vatuliikila?
14 Tufunikasoti kunkhala okonzeka kuchinja pa nkhani ya volinga vatuliikila. Ndaŵa yanji? Ndaŵa yakuti tingakwanishelini kulamulila vinthu vonse vuchitika pa moyo wasu. Mwachisanzo, ntumwi Paulo eyavya kunkhazikisha mpingo wanyowani mu tauni ya Tesalonika. Ndipo n’vosakaikisha kuti enze na cholinga chakuti apitilije kunkhala kwamene uko kuti akoyavya Akhilisitu anyowani amene awo. Koma oshusha emukakamija kuti achoke mu tauni yamene iyo. (Mac. 17:1-5, 10) Paulo kuti enkhala mphela kwamene uko, sembe eika abale ŵake amene awo pa ngozi. Koma olo n’tetyo, Paulo aliyeleke kuŵayavya. Mmalomwake, yove evomeleja kuchinja kwamene uku. Pavuli pake, etumija Timoteyo kuti akayavye Akhilisitu anyowani amene awo kunkhala na chikhulupililo chotang’a. (1 Ates. 3:1-3) Akhilisitu aku Tesalonika esangalala ngako kuti Timoteyo elipeleka kuyatumikila kwamene uko!
15. Kansi vinthu vuchitika pa moyo wasu vingakhuze tyani volinga vasu? Pelekani chisanzo.
15 Tingaphunzile vinyinji pa vichitikila Paulo penze ku Tesalonika. Payakine tingofuna kuchita utumiki uyakine, koma vinthu viyakine pa moyo wasu vingatikangishe kukwanilisha cholinga chasu chamene icho. (Mlal. 9:11) Keno vili tetyo kuli mwewo, mukonkhala okonzeka kusankha cholinga chiyakine chamungakwanilishe. Vamene ivi, niye veichita banja ya Ted na Hiedi. Chifukwa cha matenda, ove enzefunika kuleka utumiki wapa Beteli. Koma kukonda Yehova kwiŵachitisha kusakila njila ziyakine zoyangijilila utumiki wawo. Ove eyamba na kuchita upainiya wonkhazikika. Mu kupita kwa nthawe, eikiwa kunkhala apainiya apadela, ndipo Ted ephunzisiwa kuti ankhale wopanamila dela wothandizila. Pavuli pake, penkhala kuchinja pa nkhani ya nsinkhu wangafunikile kutumikila munthu monga wopanamila dela. Pevichitika tetyo, Ted na Hiedi eziŵilatu kuti oyenelelalinisoti utumiki wamene uyu. Olo kuti ekhumudwa, ove eziŵa kuti angakwanishe kutumikila Yehova mu njila ziyakinesoti. Ted enena kuti, “Tiphunzila kuti osati tikoganizila tyala zochita ntundu umozi wa utumiki.”
16. Kansi tuphunzila chinji kufumila pa Agalatiya 6:4?
16 Tingakwanishelini kulamulila chilichonse chuchitika pa moyo wasu. Tetyo, osati tikowona kuti nise ofunika kwa Yehova chifukwa cha utumiki watuchita olosoti kulinganija utumiki wasu na utumiki wa ŵanthu ayakine. Hiedi efotokoza kuti, “Keno ulinganija vuchitika pa moyo wako na vuchitika pa moyo wa ŵanthu ayakine, unkhalalini na ntendele.” (Ŵelengani Agalatiya 6:4.) Tetyo, n’vofunika ngako kuti tikosakila njila zatingayavyile ŵanthu ayakine komasoti kutumikila Yehova. *
17. Kansi mungachite tyani kuti muyenelele kupasiwa utumiki uyakine?
17 Mungakwanishe kuchita vinyinji potumikila Yehova, keno munkhala na moyo wosalila vinthu vinyinji komasoti keno mupewa nkhongole. Mungaliikile volinga vitontho-vitontho vamene vingakuyavyeni kuzakwanilisha volinga vikulu-vikulu kusogolo. Mwachisanzo, keno cholinga chanu chikulu ni kuzachita upainiya wonkhazikika, tyani osayamba palipano kuchita upainiya wothandiza mwezi uliwonse? Keno cholinga chanu ni kunkhala ntumiki wothandiza, kansi mungayangijile nthawe yamulalikila komasoti kunyungila olwala na achikulile mumpingo mwanu? Vamungaphunzile palipano vingayavye kuti muzachite mautumiki osiyana-siyana kusogolo. Mukoyeja-yeja kuchita vonse vamungakwanishe pa utumiki uliwonse wamungapasiwe.—Aro. 12:11.
Mukosankha cholinga ngacho-ngacho chamungakwanilishe (Onani ndime 18) *
18. Monga mwatuwonela pa chithunzi ichi, kansi muphunzilapo chinji pa chisanzo cha Beverley?
18 Uchikulile ungakangishelini munthu kuliikila volinga vauzimu novikwanilisha. Ganizilani chisanzo cha mulongo muyakine wa vyaka 75 zina yake Beverley. Yove enze na matenda ayakine akulu amene enzemuchitisha kuti akovutika kuyenda. Koma enzefuna kukatako mokwanila ntchito yoitila ŵanthu ku Chikumbukilo. Tetyo, eliikila volinga venzefuna kukwanilisha. Mulongo wamene uyo pechikwanilisha volinga vake vamene ivo esangalala ngako. Khama yake ilimbikisa ayakine kuti alipeleke pa ntchito yolalikila. Yehova otembeja ngako ntchito yakukata abale na alongo ŵasu achikulile, olo kuti angakwanishelini kuchita vinyinji mokatijana na mwavilili vinthu pa moyo wawo.—Sal. 71:17, 18.
19. Kansi ni volinga viyakine votyani vauzimu vatingankhale navo?
19 Mukoliikila volinga vamungakwanilishe. Mukoyeja-yeja kunkhala na minkhalidwe yamene ingachitishe kuti Yehova akokukondani. Mukophunzila maluso amene angachitishe kuti Mulungu na gulu yake akokukatishilani ntchito ngako. Mukosakila njila zamungayavyile abale na alongo ŵanu mokwanila. * Molingana na Timoteyo, Yehova akudaliseni ndipo ‘ŵanthu onse awone kuti mupita pasogolo.’—1 Tim. 4:15.
NYIMBO N.° 39 Tipange zina iweme na Mulungu
^ ndime 5 Timoteyo enze mulaliki waluso wa uthenga uweme. Koma olo n’tetyo, Paulo emulimbikisa kuti apitilije mphela kupita pasogolo mwauzimu. Kumvwila malangizo a Paulo amene aŵa, sembe kwichitisha kuti Yehova akomukatishila ntchito ngako komasoti akoyavya ngako abale na alongo ŵake. Kansi mwewo namwe molingana na Timoteyo, mufunishisha kuti mukochita vinyinji potumikila Yehova komasoti Akhilisitu ayanu? Mosakaikila, mwewo mufuna kuchita tetyo. Lomba kansi ni volinga votyani vamene vingakuyavyeni kuchita vamene ivo? Kansi mungachite tyani kuti munkhale na volinga vamene ivo novikwanilisha?
^ ndime 1 KUMVWIKISHA LUWEME: Volinga vauzimu vupamikijapo vonse vatuyeja-yeja kuchita kuti tikotumikila Yehova mokwanila komasoti kumukondwelesha.
^ ndime 16 Onani pa mutu wakuti, “Kutumikira Kumene Kukufunikira Ofalitsa Ambiri,” m’buku ya Gulu Lochita Chifuniro cha Yehova, mutu 10, ndime 6-9.
^ ndime 19 Onani mutu 60 wakuti, “Pitilijani kutang’isha ushamwali wanu na Yehova,” m’buku yakuti Sangalalani na moyo kosasila!
^ ndime 63 MAWU OFOTOKOZA VITHUNZI: M’bale ophunzisa alongo aŵili mwangakonzele vinthu m’Ng’anda ya Ufumu, ndipo ove okatishila ntchito luso yamene iyo yaphunzila.
^ ndime 65 MAWU OFOTOKOZA VITHUNZI: Mulongo wamene angakwanishelini kufuma pang’anda, olalikila kupitila pa foni ndipo oitila ŵanthu ku Chikumbukilo.
