1. Re ka ipeela dilo dife tšeo re nyakago go di fihlelela ka mokgatlong wa Jehofa?

 KA GE re le Bakriste ba therešo, re rata Jehofa kudu. Re nyaka go šoma ka thata tirelong ya Jehofa. E le gore re šome ka thata go hlankela Jehofa, re swanetše go ipeela dilo tšeo re nyakago go di fihlelela, go swana le go hlagolela dika tša Bokriste, go ithutela go ba le bokgoni bjo itšego le go nyaka ditsela tša go thuša bana babo rena le dikgaetšedi.

2. Ke ka baka la’ng re swanetše go ipeela dilo tšeo re nyakago go dira ka mokgatlong wa Jehofa le go šoma ka thata gore re di fihlelele?

² Ke ka lebaka la eng re swanetše go kaonefatša tsela yeo re hlankelago Jehofa ka yona? Lebaka le legolo ke gore re nyaka go thabiša Tatago rena yo lerato wa legodimong Jehofa. Jehofa o a thaba ge a bona re diriša bokgoni bja rena go mo hlankela. Lebaka le lengwe leo le dirago gore re nyake go kaonefatša tsela yeo re hlankelago Jehofa ka yona ke ka gobane re nyaka go oketša tsela yeo re thušago bana babo rena le dikgaetšedi ka yona. (1 Bathes. 4:9, 10) Keletšo yeo Paulo a neilego Timotheo e re bontšha gore go sa šetšwe gore re na le nako e kaakang re le ka mokgatlong wa Modimo, re ka oketša tsela yeo re mo hlankelago ka yona. A re boneng gore keletšo ya Paulo e ka re hola bjang lehono.

3. Paulo o ile a kgothaletša Timotheo go dira eng go 1 Timotheo 4:12-16?

³ Timotheo yoo e bego e le mofsa o be a na le nako e telele  e le mogolo ge Paulo a be a mo ngwalela lengwalo la gagwe la mathomo, eupša Paulo o ile a mo kgothaletša gore a kaonefatše tsela yeo a bego a hlankela Jehofa ka yona. (Bala 1 Timotheo 4:12-16.) Ge o dutše o bala mantšu a Paulo, o tlo bona gore o be a nyaka gore Timotheo a dire tšwelopele ka dilo tše tše pedi: Gore a hlagolele dika tša Bokriste tša go swana le lerato, tumelo le tshekego le ka go kaonefatša bokgoni bja gagwe bja go bala phatlalatša, go eletša le go ruta. Re tlo boledišana ka mohlala wa Timotheo gomme re bone gore re ka kaonefatša bjang gore re be bahlanka ba bakaone ba Jehofa. Le go ithuta kamoo re ka kaonefatšago tsela ya rena ya go ruta batho ka Jehofa.

4. Go ya ka Bafilipi 2:19-22, ke eng seo se dirilego gore Jehofa a diriše Timotheo?

⁴ Ke eng seo se dirilego gore Jehofa a diriše Timotheo? Ke dika tša gagwe tše dibotse tša Bokriste. (Bala Bafilipi 2:19-22.) Mantšu a Paulo a re bontšha gore Timotheo e be e le monna yo a ikokobeditšego, yo a botegago le yo a fišegago. O be a na le lerato e bile a tshwenyega ka bana babo le dikgaetšedi. Seo se dirile gore Paulo a mo rate e bile a se ke a dikadika go mo nea maikarabelo a magolo. (1 Bakor. 4:17) Le rena Jehofa o tlo re rata le go re diriša ka phuthegong ya gagwe ge e ba re hlagolela dika tšeo a di ratago.—Ps. 25:9; 138:6.

5. (a) O ka dira eng gore o tsebe seka seo o ka kaonefatšago go sona? (b) Go ya ka seswantšho sa rena, kgaetšedi wa bo rena wa mofsa o dira eng go kaonefatša seka sa gagwe sa kwelobohloko?

⁵ Kgetha seka seo o nyakago go se kaonefatša. Nagana ka seka seo o nyakago go se kaonefatša gomme o rapele ka sona. Kgetha seka setee gomme o šomele go sona. Ka mohlala, o ka hlagolela go ba le kwelobohloko goba go nyaka go thuša bana beno le dikgaetšedi. Goba na o nyaka seka sa go ba le khutšo le batho ba bangwe le go ba lebalela? Mohlomongwe o ka kgopela mogwera wa gago yo o mo tshepago gore a go botše moo o ka kaonefatšago gona.—Die. 27:6.

6. O ka dira’ng gore o hlagolele seka se itšego?

⁶ Šoma ka thata gore o fihlelele seka seo o nyakago go se kaonefatša. O ka dira seo bjang? Tsela e nngwe ke ka go ithuta ka seka seo o nyakago go se kaonefatša. A re re o nyaka go ithuta go lebalela batho ba  bangwe. O ka thoma go ithuta ka go bala mehlala ya ka Beibeleng ya batho bao ba ilego ba lebalela ba bangwe le bao ba sego ba ka ba lebalela, ke moka wa naganišiša ka mehlala yeo. Nagana ka mohlala wa Jesu, o be a lebalela batho ba bangwe ka bolokologi. (Luka 7:47, 48) O be sa nagane ka diphošo tša bona, eupša o be a nagana ka dilo tšeo ba bego ba ka kgona go di dira. Eupša Bafarisei ba mehleng ya Jesu ba be ba lebelela “batho ba bangwe ka moka e se selo.” (Luka 18:9) Ka morago ga go naganišiša ka mehlala ye, ipotšiše gore: ‘Ke lebelela eng go batho ba bangwe? Ke dika dife tšeo ke kgethago go di lebelela go bona?’ Ge o thatafalelwa ke go lebalela motho yo mongwe, leka go ngwala fase dika tša gagwe tše dibotse. Ke moka o ipotšiše gore: ‘Jesu o lebelela motho yoo bjang, na o be a ka mo lebalela?’ Ge re ka dira bjalo, re tla kaonefatša tsela yeo re naganago ka yona. Mathomong, go ka ba thata go lebalela motho yo a re kgopišitšego. Eupša ge re ka leka go šoma ka thata go lebalela batho ba bangwe, mafelelong re tla kgona go ba lebalela ka bolokologi.

7. Diema 22:29, e bontšha bjang gore Jehofa o diriša bana babo rena bao ba nago le bokgoni lehono?

⁷ Se sengwe seo o ka se dirago ke go ithutela mešomo e itšego. Go hlokagala baithaopi ba bantši bao ba swanetšego go aga meago ya Bethele, meago ya Dikopano le Diholo tša Mmušo. Baithaopi ba bantši bao ba šetšego ba šoma, ba ithutile mošomo wo go bana babo rena bao e lego kgale ba šoma moo. Ka ge re bona mo seswantšhong, bana babo rena le dikgaetšedi ba ithutela mošomo wa go hlokomela Diholo tša Kopano le Diholo tša Mmušo. Jehofa Modimo e lego Kgoši ya bosafelego le Jesu Kriste Kgoši ya dikgoši, ba diriša tsela ye le ditsela tše dingwe go dira dilo tše dikgolo. (1 Tim. 1:17; 6:15; bala Diema 22:29.) Re nyaka go šoma ka thata gore re tagafatše Jehofa, e sego rena.—Joh. 8:54.

8. O ka tseba bjang mo o swanetšego go šomela gona?

⁸ Kgetha selo seo o nyakago go ithuta sona. O ka ithuta go dira eng? Botšiša bagolo ba phuthegong ya geno goba molebeledi wa tikologo gore ba nagana gore o ka kgona go dira eng. Ka mohlala, ge e ba ba go botša gore o kaonefatše bokgoni bja gago bja go bolela le go ruta, ba botšiše gore ke seka sefe seo o swanetšego go kaonefatša go sona. Ke moka o šome ka thata gore o kaonefatše seka seo. O ka dira seo bjang?

9. O ka dira eng gore o be le bokgoni bja go ruta?

⁹ Šoma ka thata go fihlelela seo o nyakago go se dira. A re re o nyaka go kaonefatša bokgoni bja gago bja go ruta. O ka ithuta poroutšha ya Ikgafele go Baleng le go Ruteng. Ge o abetšwe kabelo dibokeng tša gare ga beke, o ka kgopela ngwanabo rena yo a nago le bokgoni gore a theetše tsela yeo o tlago go dira kabelo ya gago ka yona gomme a go botše mo o ka kaonefatšago gona. Lokišetša dikabelo tša gago e sa le pele gore bana beno ba kgone go bona gore o šomile ka thata le gore o a botega.—Die. 21:5; 2 Bakor. 8:22.

10. Nea mohlala wo o bontšhago seo re ka se dirago gore re feleletše re na le bokgoni.

¹⁰ O swanetše go dira eng ge e ba selo seo o nyakago go šomela go sona ka tlhago se go palela? O se ke wa fela matla! Ngwanabo rena yo a bitšwago Garry o be a sa kgone go bala gabotse. O gopola ka tsela yeo a bego a nyamile ka yona ge a be a palelwa ke go bala dibokeng, eupša o ile a dula a šoma ka thata gore a kaonefatše go bala. Gona  bjale o re, ka thušo ya bana babo rena le dikgatišo tša mokgatlo, o kgona go nea dipolelo dibokeng le dikopanong tše dikgolo le tše dinyenyane!

11. Ke eng seo se ka re thušago gore re kgone go hlankela Jehofa ka mo go oketšegilego go swana le Timotheo?

¹¹ Na Timotheo o be a na le bokgoni bja go bolela le go ruta? Beibele ga e re botše. Eupša ga go pelaelo gore Timotheo o ile a kaonefatša kabelo ya gagwe ka go latela keletšo ya Paulo. (2 Tim. 3:10) Le rena ge re ka lwela go ba le bokgoni re ka kgona go hlankela Jehofa ka mo go oketšegilego.

12. Batho ba bangwe ba go thušitše bjang?

¹² Ka moka ga rena re a thaba ge ba bangwe ba re thuša. Ge re le sepetlele re a thaba ge bagolo bao ba lego komiting ya go hloma kwano le dipetlele le bao ba lego sehlopheng sa go etela balwetši ba re etela. Ge re na le mathata re a thaba ge mogolo a re theetša e bile a re homotša. Ge re na bothata bja go swara thuto ya Beibele, re a thaba ge mmulamadibogo a sepela le rena e bile a re nea ditšhišinyo. Bana babo rena ba ka moka le dikgaetšedi ba thabela go re thuša. Le rena re ka thaba ge re ka dira maiteko a go thuša bana babo rena le dikgaetšedi. Jesu o itše: “Go na le lethabo le legolo go neeng go feta go amogeleng.” (Dit. 20:35) Ge e ba o nyaka go hlankela Jehofa ka tsela ye le ka ditsela tše dingwe, ke eng seo se ka go thušago?

13. Ge e ba re nyaka go fihlelela selo se itšego ka phuthegong ya Jehofa, re swanetše go gopola eng?

¹³ O se ke wa no šoma o sa tsebe seo o nyakago go se fihlelela. Ka mohlala o ka re, ‘Ke nyaka go oketša tsela yeo ke hlankelago Jehofa ka yona ka phuthegong,’ eupša o ka no se tsebe ge e ba o fihleletše seo. Ka gona, kgetha ka go lebanya seo o nyakago go se fihlelela. E bile o ka ngwala fase seo o nyakago go se fihlelela le ka tsela yeo o nyakago go se fihlelela ka yona.

14. Ke ka baka la eng re swanetše go ba le tekatekano ge re kgetha dilo tšeo re nyakago go di dira ka mokgatlong wa Jehofa?

¹⁴ Re swanetše go ba le tekatekano ge re kgetha dilo tšeo re nyakago go di dira ka mokgatlong wa Jehofa. Ka baka la’ng? Ka gobane maemo a rena a ka fetoga, ditlalemeso ga di tsebje. Ka mohlala moapostola Paulo o ile a thuša go thoma phuthego kua  Thesalonika. Ga go pelaelo gore o be a nyaka go dula moo gore a thuše Bakriste bao ba bafsa. Eupša baganetši ba ile ba dira gore Paulo a tloge motseng woo. (Dit 17:1-5, 10) Ge nkabe Paulo a no dula moo, o be a tlo bea bana babo kotsing. Eupša Paulo ga se a ka a tlogela go leka go thuša bana babo. Go ena le moo, o ile a fetofetoga le maemo. Ka morago o ile a roma Timotheo gore a ye go thuša Bakriste bao ba bafsa ba Thesalonika gore ba be le tumelo e tiilego. (1 Bathes. 3:1-3) Bathesalonika ba ile ba thaba kudu ge Timotheo a etla go bona go tlo ba thuša.

15. Dilo tšeo re nyakago go di dira ge re hlankela Jehofa, di ka fetoga bjang ge maemo a rena a fetoga? Nea mohlala.

¹⁵ Re ka ithuta se sengwe go seo se diragaletšego Paulo kua Thesalonika. Go ka ba go na le selo seo re nyakago go se dira ka mokgatlong wa Jehofa eupša maemo a rena a se re dumelele. (Mmo. 9:11) Ge e ba seo se ka go diragalela, kgetha mošomo wo o ka o dirago ka mokgatlong wa Jehofa. Se ke seo Ted le mosadi wa gagwe Hiedi ba se dirilego. Ba ile ba swanelwa ke go tloga Bethele ka lebaka la bolwetši. Eupša ba ile ba nyaka ditsela tše dingwe tšeo ba ka hlankelago Jehofa ka tšona ka gobane ba mo rata. Ba ile ba thoma ka go ba babulamadibogo ba ka mehla. Ge nako e dutše e eya ba ile ba kgethwa gore e be babulamadibogo bao ba kgethegilego ke moka ka morago, Ted o ile tlwaetšwa gore e be o mothuši wa molebeledi wa tikologo. Tekanyo ya mengwaga ya balebeledi ba tikologo e ile ya fetolwa, ke moka Ted le Hiedi ba lemoga gore mengwaga ya bona ga e sa ba dumelela gore e be balebeledi ba tikologo. Le ge ba be ba nyamile, ba ile ba lemoga gore ba ka hlankela Jehofa ka ditsela tše dingwe. Ted o re: “Re ile ra ithuta gore re ka kgona go hlankela Jehofa ka ditsela tše dintši.”

16. Re ithuta eng go Bagalatia 6:4?

¹⁶ Re ka se kgone go laola dilo ka moka tšeo di diregago bophelong bja rena. Ka gona, go bohlokwa gore re se ke ra nagana gore Jehofa o re tšeela godimo fela ka lebaka la dikabelo tšeo re nago le tšona, le gona ga se ra swanela go bapetša dikabelo tša rena le tšeo batho ba bangwe ba nago le tšona. Hiedi o bolela gore: “O tlo dula o nyamile ge e ba o ipapetša le batho ba bangwe.” (Bala Bagalatia 6:4.) Go bohlokwa gore re nyake ditsela tša go thuša batho ba bangwe le go hlankela Jehofa. *

17. O ka dira eng gore o kgone go hwetša ditokelo ka phuthegong?

¹⁷ O ka kgona go hlankela Jehofa ka mo go  oketšegilego ge e ba o phela bophelo bjo bonolo e bile o phema go dira dikoloto tšeo di sa nyakegego. Dira mešongwana e menyenyane ka mokgatlong wa Jehofa e le gore o tle o kgone go hwetša ditokelo tšeo di oketšegilego. Ka mohlala, ge e ba o nyaka go tlo ba mmulamadibogo wa ka mehla, gona bjale o ka ba mmulamadibogo wa go thuša. Ge e ba o nyaka go ba mohlanka wa bodiredi, gona bjale o ka fetša nako e ntši tšhemong, wa etela bao ba babjago le bao ba tšofetšego ka phuthegong ya geno. Go dira bjalo go tla go thuša gore nakong e tlago o tle o kgone go hwetša ditokelo tšeo di oketšegilego. Ikemišetše go šoma ka thata kabelong e nngwe le e nngwe yeo o e newago.—Baroma 12:11.

18. Mohlala wa kgaetšedi yo a lego mo seswantšhong o re ruta eng?

¹⁸ Mengwaga ya rena e ka se re šitiše go fihlelela dilo tšeo re nyakago go di dira ka mokgatlong wa Jehofa. Nagana ka mohlala wa kgaetšedi wa mengwaga e 75 yo a bitšwago Beverley. O be a babja kudu e bile a sa kgone go sepela gabotse. Eupša o be a nyaka go tšea karolo lesolong la go memela batho segopotšong. O ile a ipeela seo a bego a nyaka go se fihlelela. Ka morago ga gore, Beverley a thekge lesolo la go memela batho segopotšong, o ile a thaba kudu. Seo se ile sa dira gore batho ba bangwe le bona ba šome ka thata tšhemong. Jehofa o a thaba ge bana babo rena le dikgaetšedi bao ba tšofetšego ba mo hlankela le ge maemo a bona a ba thibela go dira ka mo go oketšegilego.—Ps. 71:17, 18.

19. Ke dilo dife tšeo di tla re thušago go fihlelela dilo tšeo re nyakago go di dira ka mokgatlong wa Jehofa?

¹⁹ Ipeele dilo tšeo o ka kgonago go di fihlelela. Hlagolela dika tšeo di tla dirago gore Jehofa a go rate. Ithute mešomo yeo e tlago go go thuša gore o kgone go hlankela Jehofa ka mo go oketšegilego le go thekga mokgatlo wa gagwe. Nyaka ditsela tšeo o ka kgonago go thuša bana beno le dikgaetšedi ka tšona. * Ka thušo ya Jehofa, “tšwelopele ya gago e tla bonagala go batho bohle” go swana le Timotheo—1 Tim. 4:15.