NKHANI YAKUPFUNZA 18
Kodi Mungacite Tani Bzizinji Pakutumikira Yahova?
“Kumbukira bwino-bwino bzinthu bzimwebzi ndipo ikha makumbukidwe yako yentse pa bzimwebzi, kuti kuyenda kwako patsogolo kuwonekere padeca kwa wanthu wentse.”—1 TIMOTIO 4:15.
NYIMBO 84 Ticite Basa na Nyongo
BZOMWE TIN’PFUNZA a
1. Kodi ni bzakulinga bziponi bzauzimu bzomwe mungakhale nabzo?
PAKUTI ndife Akristau wacadidi, timbafuna kwene-kwene Yahova. Ndipopa timbafuna kumutumikira na mtima wanthu wentse. Tsono kuti tikwanise kucita bzimwebzi tin’funika kukhala na bzakulinga bzauzimu, ninga kukulisa makhalidwe yacikristau, kupfunza maluso manango na kuwona bzomwe tingacite kuti tithandize anzathu. b
2. Thangwe ranyi tin’funika kucita ciri-centse kuti tiyende patsogolo mwauzimu?
2 Thangwe ranyi tin’funika kucita bzizinji pakutumikira Yahova? Cakuyamba, ni thangwe rakuti tikufuna kuti Baba wathu wakudzulu akomedwe. Yahova ambakomedwa kwene-kwene akambatiwona kuti tikuphatisa basa luso lathu lentse pakumutumikira. Ndipo cinthu cinango n’cakuti, tikacita nyongo kuti tiyende patsogolo mwauzimu, tin’dzakwanisa kuthandiza abale na mpfumakazi zathu. (1 Atesalonika 4:9, 10) Tin’funika kupitiriza kuyenda patsogolo mwauzimu, napo kuti tina magole mazinji tikutumikira Yahova. Mbatiwoneni momwe tingacitire bzimwebzi.
3. Mwakubverana na 1 Timotio 4:12-16, kodi mpostolo Paulo adalimbikisa Timotio kucita ciyani?
3 Pomwe mpostolo Paulo adanembera Timotio tsamba lakuyamba, Timotioyo akhali kale mkulu wa luso. Tsono Paulo adalimbikisa Timotio kuti apitirize kuyenda patsogolo mwauzimu. (Werengani 1 Timotio 4:12-16.) Pomwe Paulo akhapereka malango yamweya, mungakwanise kuwona kuti iye akhalimbikisa Timotio kucita bzinthu bziwiri ibzi: Cakutoma, kuti akulise makhalidwe yacikristau yomwe ni lufoyi, cikhulupiro na makhalidwe yakucena; ndipo caciwiri, kuti akulise luso lace la kuwerenga, kucenjeza na kupfunzisa. Pomwe tikadakumbukira bzomwe Timotio adacita, bwerani tiwone kuti kufuna kucita bzinthu bzizinji kungatithandize tani kukhala Akristau wakukhwima mwauzimu. Ndipo tiniwonambo bzomwe tingacite kuti tithumizire utumiki bwathu.
KHALANI NA MAKHALIDWE YACIKRISTAU
4. Mwakubverana na Afilipi 2:19-22, n’ciyani comwe cidacitisa kuti Timotio athemere kucita bzizinji pakutumikira Yahova?
4 Kodi n’ciyani comwe cidacitisa kuti Timotio athemere kucita bzizinji pakutumikira Yahova? Ni makhalidwe yace yabwino. (Werengani Afilipi 2:19-22.) Mafala yomwe Paulo adalewa yakulatiza kuti Timotio akhali wakubzicepesa, wakukhulupirika, wakulimbikira pa basa, na munthu wakuthembeka. Iye akhalimbo walufoyi ndipo akhafunisisa kuthandiza abale na mpfumakazi. Thangwe ra bzimwebzi Paulo adamufuna ndipo alibe kuzeza kumupasa mabasa makulu-makulu. (1 Akolinto 4:17) Mpsibodzi-bodzimbo na ifepano, tikakhala na makhalidwe yomwe Yahova ambakomedwa nayo, iye an’dzatifuna ndipo an’dzatiphatisa basa mu gwere.—Salimo 25:9; 138:6.
Onani khalidwe lacikristau lomwe mun’funika kukhala nalo (Onani ndime 5-6)
5. (a) Kodi mungadziwe tani khalidwe lacikristau lomwe mun’funika kukhala nalo? (b) Ninga momwe cikulatizira cithunzi-thunzici, kodi mpfumakaziyi ikulatiza tani kudeka mtima kuna mpfumakazi inzace?
5 Sankhulani khalidwe libodzi lomwe mun’funika kukhala nalo. Pembani kwa Yahova ndipo onani makhalidwe yomwe mun’funika kukhala nayo. Sankhulani libodzi lomwe imwepo mun’funa kuyamba kukhala nalo. Pinango imwepo mungafune kukhala munthu wakugwa mpfuwa ayai kufunisisa kuthandiza anzanu. Ndipo pinango imwepo mungacitembo ciri-centse kuti mumbakhale pa mtendere na anzanu na kumbawalekerera akakuphonyerani. Bzingakhale bwino kwene-kwene kubvunza xamwali wanu kuti akuthandizeni kuwona bzinthu bzomwe imwepo mun’funika kucinja.—Mimwani 27:6.
6. Kodi n’ciyani comwe mungacite kuti mukwanise kukhala na makhalidwe yabwino?
6 Citani nyongo kuti mukhale na khalidwe lomwe mwasankhula. Kodi mungacite tani bzimwebzi? Cinthu cibodzi comwe mungacite ni kupfunza khalidwelo kuti mudziwe momwe liriri. Tiyezezere kuti mun’funa kuti bzileke kumbakunesani kulekerera anzanu. Imwepo mungayambe kupfunza na kumbakumbukira nkhani za m’Bibliya zakulewa bza wale omwe adalekerera anzawo na mtima wentse na wale omwe alibe. Mungakumbukirembo bzomwe Jezu adacita. Iye akhalekerera wanthu na mtima wentse. (Luka 7:47, 48) Ndipo iye akhambawonambo bzinthu bzabwino bzomwe wanthuwo angacite sikuti kuphonya kwawo. Jezu akhali wakusiyana kwene-kwene na Afarizeu omwe “akhanyoza anzawo.” (Luka 18:9) Mukamala kukumbukira nkhani zimwezi bzibvunzeni kuti: ‘Kodi nimbatsungira kuwona ciyani kuna anzangu? Kodi nimbandowona kuphonya kwawo?’ Penu bzimbakunesani kulekerera mwanzanu, nembani makhalidwe yabwino yomwe iye anayo. Ndipo mukamala bzibvunzeni kuti: ‘Kodi Jezu ambamuwona tani munthu umweyu? Kodi iye angadamulekerera?’ Kucita bzimwebzi kunʼdzakuthandizani kucinja nzeru zanu. Pakuyamba, pinango bzingatinese kulekerera munthu omwe watiphonyera. Koma tikapitiriza kucita nyongo tin’dzakwanisa kumbalekerera anzathu na mtima wentse.
PFUNZANI KUKHALA NA MALUSO YAKUSIYANA-SIYANA
Sankhulani cinthu comwe mungacite kuti mucite bzizinji pakutumikira Yahova (Onani ndime 7) e
7. Mwakubverana na Mimwani 22:29, kodi Yahova akuphatisa tani basa wanthu wa luso?
7 Cinthu cibodzi comwe imwepo mungacite ni kupfunza kukhala na luso pa basa linango. Kumbukirani kuti kukufunikira abale na mpfumakazi azinji kuti aphate basa lakumanga nyumba za Beteli, Nyumba za Mitsonkhano Mikulu-mikulu na Nyumba za Umambo. Azinji omwe ambacita basa limweri adalipfunza thangwe ra kuphata basa pabodzi na abale omwe ana luso pa basali. Ninga momwe cithunzi-thunzici cikulatizira, abale na mpfumakazi akupfunza bzomwe angacite kuti ambakwanise kukonza bzinthu bzikadzongeka mu Nyumba ya Mitsonkhano Mikulu-mikulu na Nyumba za Umambo. Thangwe ra bzimwebzi Yahova, “Mambo wa nthawe zentse,” na Jezu Kristu, omwe “ni Mambo wa . . . amambo,” akuphatisa basa wanthu wa luso kwene-kwene kuti acite bzinthu bzikulu. (1 Timotio 1:17; 6:15; werengani Mimwani 22:29.) Ifepano tikufuna kuphata basa na nyongo ndipo tiphatisembo basa luso lathu kuti titumbize Yahova sikuti kubzitumbiza tekha.—Juwau 8:54.
8. Kodi mungadziwe tani luso lomwe imwepo mun’funika kukhala nalo?
8 Sankhulani luso lomwe mun’funa kukhala nalo. Kodi ni luso liponi lomwe imwepo mukufuna kukhala nalo? Bvunzani akulu wa gwere kuti akuuzeni kuti ni luso liponi lomwe mungakhale nalo ndipo mungabvunzembo nyakunyang’anira dera. Tiyezezere kuti akuuzani kuti imwepo mun’funika kukulisa luso lanu lakulewalewa na kupfunzisa. Imwepo mungawakumbire kuti akuuzeni kuti n’ciyani maka-maka comwe mun’funika kucita. Mukamala yambani kuwona bzomwe mungacite kuti mukulise lusolo. Kodi mungacite tani bzimwebzi?
9. Kodi n’ciyani comwe mungacite kuti mukwanise kukhala na luso lomwe mukufuna?
9 Citani ciri-centse kuti mukwanise bzomwe mukufunabzo. Tiyezezere kuti imwepo mukufuna kukulisa luso lanu lakupfunzisa. Bzingakhale bwino kwene-kwene kupfunza broxura lakuti Kulisani Luso Lanu la Kuwerenga na Kupfunzisa. Mukakhala kuti mwapasidwa mbali kuti mukacite pa mitsonkhano ya pakati pa sumana, mungakumbire m’bale omwe ana luso kuti akutetekereni kuti abve momwe mwakonzekerera ndipo mukamala angakuuzeni mbali zinango zomwe mun’funika kucinja. Mpsakufunikambo kukonzekera pakana nthawe mbali yomwe mwapasidwayo. Mukacita bzimwebzo abale na mpfumakazi an’dzakwanisa kuwona kuti ndimwe munthu wakulimbikira na wakukhulupirika.—Mimwani 21:5; 2 Akolinto 8:22.
10. Kodi tingacite tani kuti tikhale na luso lomwe tikufuna? Fotokozani ciratizo.
10 Tsono tani penu bzikukunesani kukhala na luso lomwe mukufuna? Lekani kubwerera m’mbuyo. Onani bzomwe bzidacitika na m’bale Garry. Iye akhambaneseka kuwerenga ndipopa akhambacita manyazi pomwe akhambayezera kuwerenga mwakukuwa pa mitsonkhano. Tsono iye alibe kubwerera m’mbuyo! Iye adacita nyongo yakupfunza kuwerengako. Iye adalewa tsapano ambakwanisa kufotokoza nkhani mu Nyumba ya Umambo, pa mitsonkhano ya dera na pa mitsonkhano ya cigawo, thangwe rakuti adathandizidwa na abale na kuwerenga mabukhu yathu.
11. Kodi n’ciyani cidathandiza Timotio kucita bzizinji pakutumikira Yahova ndipo ifepano tingamutewezere tani?
11 Kodi Timotio adakhala mpfunzisi wabwino kwene-kwene? Bibliya limbalewa lini. Tsono, tingakwanise kuwona kuti iye adacitadi bwino-bwino utumiki bwace thangwe rakuti adateweza malango ya mpostolo Paulo. (2 Timotio 3:10) Mpsibodzi-bodzimbo na ifepano, tikakulisa luso lathu tin’dzakwanisa kucita bzizinji pakutumikira Yahova.
ONANI BZOMWE MUNGACITE KUTI MUTUMIKIRE ANZANU
12. Kodi anzanu adakuthandizani tani?
12 Tentsenefe timbagumana phindu na basa lomwe anzathu ambalicita. Kumbukirani ibzi, tikakhala tikuduwala abale wa m’Komiti Yakucezerana na Nyumba za Ulapi, ayai Mathimu Yakuzungira Atenda ambabwera kudzatiwona. Ifepano timbatenda kwene-kwene na bzomwe ambaticitirabzi. Tikakhala tikugumana na mabvuto pamoyo wathu mkulu wa gwere angabwere kumui kwathu ticidzamufotokozera bzomwe tikugumana nabzo acititsangalaza. Timbakomedwa kwene-kwene tikatsangalazidwa ndipo timbakomedwambo bzikakhala kuti mpainiya waluso abvuma kuyenda nafe pabodzi kukacitisa pfunziro, acitifotokozera nfundo zinango zomwe zingatithandize kucitisa bwino pfunzirolo. Ndipo abale na mpfumakazi wentsenewa ambakomedwa kwene-kwene thangwe ra kutithandiza. Ifepano tingakhalembo wakukondwa tikambabzipereka kuti tithandize abale wathu. Jezu adati: “Kupasa kumbabweresa cikondweso cikulu kuposa kutambira.” (Mabasa 20:35) Tsono n’ciyani comwe cingakuthandizeni penu mukufunambo kucita bzizinji pakutumikira Yahova?
13. Kodi mun’funika kukumbukira ciyani mukakhala mukufuna kucita cinthu?
13 Sankhulaniretu cinthu comwe mukufuna kucita. Lekani kundokumbuka kuti, ‘ndikufuna kucita bzizinji m’gwere.’ Thangwe bzingakhale bzakunesa kuna imwepo kudziwa bzomwe mun’funika kucita kuti mukwanise bzomwe mukufunabzo. Ndipopa mpsakufunika kuti musankhuliretu cinthu comwe mukufuna kucita. Ndipo nthawe zinango bzingakhale bwino kunemba bzomwe mukufuna kucitabzo na kuwona momwe mungacitire.
14. Thangwe ranyi tin’funika kukhala wakukonzeka kucinja bzomwe tikufuna kucita?
14 Ifepano tin’funikambo kukhala wakukonzeka kucinja bzomwe tikufuna kucita. Thangwe ranyi? Thangwe pa nthawe iri-yentse bzinthu bzingacinje pa moyo wathu. Kumbukirani bzomwe bzidacitikira mpostolo Paulo, iye adathandiza pa basa lakupfunzisa wanthu ku Tesalonika mpaka kukhala gwere. Ndipo iye akhafuna kukhala kumweko kuti apitirize kulimbikisa Akristauwo. Tsono Adjuda adayambisa phiringu ndipo bzimwebzi bzidacitisa kuti Paulo angingimizidwe kucoka mu mzindamo. (Mabasa 17:1-5, 10) Paulo angadapitiriza kukhala ku Tesalonika, angadaikha moyo wa abale wace pangozi. Tsono Paulo adapitiriza basi kuwathandiza. Ndipo adazolowerana na kucinjako. Pomwe padapita nthawe, iye adatuma Timotio kuti akathandize abale wa ku Tesalonika kukhala na cikhulupiro cakulimba. (1 Atesalonika 3:1-3) Kulewa cadidi, abale wa ku Tesalonika adakomedwa kwene-kwene kuwona kuti Timotio, wabzipereka kuyenda kukatumikira kuli-kwentse komwe kukhafunika thandizo.
15. Kodi kucinja kwa bzinthu pa moyo wathu kumbacinjambo tani bzomwe ifepano tikufuna kucita?
15 Kodi tikupfunza ciyani na bzomwe bzidacitikira Paulo ku Tesalonika? Pinango tingakhale tasankhula kale utumiki bomwe tikufuna kucita, tsono bzinthu bzingacinje pa moyo wathu ticitazira kucita bzomwe tikufunabzo. (Mpalizi 9:11) Penu bzimwebzi bzikukucitikirani, imwepo mungasankhule utumiki bunango bomwe mungakwanise kucita. Bzimwebzi ni bzomwe m’bale Ted na mkazi wawo Hiedi adacita. Iwo akhatumikira pa Beteli, tsono thangwe rakuti m’bodzi wa iwo akhaduwala-duwala, iwo adasiya kutumikira pa Betelipo. Iwo akhafuna Yahova ndipopa adawona bzinthu bzinango bzomwe angacite kuti akwanise kucita bzizinji pakumutumikira. Cakutoma, iwo adayamba kucita upainiya bwakukhazikika. Na kupita kwa nthawe adauzidwa kuti ayambe kucita upainiya bwakupambulika ndipo m’bale Ted adayamba kupfunzisidwa kuti akhale wakuimira nyakunyang’anira dera. Tsono gulu bzinthu m’gulu bzidacinja pa nkhani ya magole yomwe munthu an’funika kukhala nayo kuti akhale nyakunyang’anira dera. Ndipopa Ted na Hiedi adafunika kusiya utumiki bwawobu, thangwe magole yawo yakhadapitirira. N’cadidi kuti adasunama, tsono iwo akhadziwa kuti angadapitiriza basi kutumikira Yahova mwakucita bzinthu bzinango. Ted adati: “Ifepano tidapfunza kuti tingacite bzinthu bzakusiyana-siyana pakutumikira Yahova.”
16. Kodi tikupfunza ciyani na mafala yomwe yali pa Agalatiya 6:4?
16 Ifepano tingatazise lini kuti bzinthu bzakusaya kudikhiririka bzicitike pa moyo wathu. Ndipopa tin’funika kutcenkha kumbakumbuka kuti Yahova ambatifuna thangwe ra utumiki bwathu, ndipo tin’funikambo kumbatcenkha kumbandendemezera utumiki bomwe tikucita na bomwe anzathu akucita. Mpfumakazi Hiedi idafotokoza kuti: “Imwepo mun’dzakhala lini wakukondwa mukambandendemezera moyo wanu na wa anzanu.” (Werengani Agalatiya 6:4.) Ndipo mpsakufunikambo kuwona bzomwe tingacite kuti tithandize anzathu na kupitiriza kutumikira Yahova. c
17. Kodi n’ciyani comwe mungacite kuti muthemere kucita bzizinji pakutumikira Yahova?
17 Imwepo mun’dzakwanisa kucita bzizinji pakutumikira Yahova, mukasaya kufuna bzinthu bzizinji pa moyo wanu na kutcenkha mangawa. Imwepo mukacita bzinthu bzing’ono-bzing’ono, bzin’dzakuthandizani kucita bzinthu bzikulu-bzikulu. Tiyezezere kuti mukufuna kukhala mpainiya wakukhazikika, mun’sairanyi kubakayamba kucita upainiya bwakuthandiza mwezi uli-wentse? Penu mun’funa kukhala mtumiki wakuthandiza, bzingakhale lini bwino kumbamala nthawe izinji muli mu utumiki, kuyenda kukawona abale na mpfumakazi omwe akuduwala na wakukalamba wa m’gwere mwanu? Bzomwe mungapfunze pakali pano, bzin’dzakuthandizani kucita bwino utumiki bwanu kutsogolo. Ndipopa khalani wakutsimikiza kucita bzentse bzomwe mungakwanise pa utumiki bomwe mwapasidwa.—Aroma 12:11.
Sankhulani cakulinga cibodzi comwe mukufuna kucikwanirisa (Onani ndime 18) f
18. Mwakubverana na cithunzi-thunzici, kodi imwepo mwapfunza ciyani na mpfumakazi Beverley?
18 Ifepano tingakhale na bzakulinga bzauzimu napo kuti takalamba. Onani bzomwe idacita mpfumakazi Beverley, yomwe ina magole 75. Iyo ikhambaduwala-duwala ndipo ikhaneseka kufamba. Mpfumakaziyi ikhafuna kucita bzizinji pa kampanya ya kucemerera wanthu ku cikumbuso. Ndipopa iyo idawona bzomwe ingadacita. Pomwe mpfumakazi Beverley idakwanisa bzomwe ikhafuna idakomedwa kwene-kwene. Bzomwe iyo idacitabzi bzidalimbikisa abale na mpfumakazi m’gwere kuti ambacite nyongo mu utumiki. Yahova ambatenda basa lomwe abale na mpfumakazi omwe mbacikulire ambacita, napo kuti angakwanise lini kucita bzinthu bzizinji.—Salimo 71:17, 18.
19. Kodi ni bzinthu bziponi bomwe mungacite pa moyo wanu kuti mukondwese Yahova?
19 Tsungirani kucita utumiki bomwe mungakwanise. Khalani na makhalidwe yomwe yangakuthandizeni kulimbisa uxamwali bwanu na Yahova. Pfunzani maluso yakusiyana-siyana yomwe mungayaphatise basa pakutumikira Mulungu na gulu lace. Onani bzomwe mungacite kuti muthandize abale na mpfumakazi zanu. d Mukacita tenepo, mun’dzakhala ninga Timotio ndipo ‘kuyenda kwanu patsogolo kun’dzawonekera padeca kwa wanthu wentse.’—1 Timotio 4:15.
NYIMBO 38 Yahova An’dzakulimbisa
a Timotio akhali mpalizi waluso kwene-kwene wa mafala yabwino ya Umambo. Napo bzikhali tenepo, mpostolo Paulo adamulimbikisa kuti apitirize kucita ciri-centse kuti ayende patsogolo mwauzimu. Timotio adaphatisa basa malango ya mpostolo Pauloya, ndipopa Yahova adamuphatisa basa kuti acite bzizinji na kuthandizambo abale na mpfumakazi zace. Ninga Timotio, kodi imwepombo mumbafuna kuthandiza abale na mpfumakazi zanu? Tikudziwa kuti mumbafuna. Tsono n’ciyani cingakuthandizeni kucita bzimwebzo? Kodi pana bzinthu bzinango bzomwe bzingakuthandizeni kucita bzomwe mukufunabzo?
b KAFOTOKOZEDWE KA MAFALA MANANGO: Bzakulinga bzauzimu ni cinthu ciri-centse comwe tingacite kuti tikwanise kucita bzizinji pakutumikira Yahova na kumukondwesa.
c Onani nkhani yakuti “Kutumikira Kumene Kukufunikira Ofalisa Ambiri” mu bukhu lakuti Gulu Lochita Chifuniro cha Yehova, mu kapitulo 10, ndime 6-9.
d Onani pfunziro 60, lomwe lina msolo wakuti “Pitirizani Kulimbisa Uxamwali Bwanu na Mulungu,” mu bukhu lakuti Khalani na Moyo Wakukondwa Mpaka Kale-kale!
e BZOMWE BZIKUCITIKA PA CITHUNZI-THUNZI: M’bale akupfunzisa mpfumakazi ziwiri momwe zingakonzere bzinthu bzomwe bzadzongeka mu Nyumba ya Umambo, ndipo izo zikuphatisa basa bzomwe zapfunzabzo.
f BZOMWE BZIKUCITIKA PA CITHUNZI-THUNZI: Mpfumakazi ikucita upalizi bwa pa telefoni ndipo ikucemera wanthu kuti adzagumanike pa msinda wa cikumbuso.
