مطالعے دا مضمون نمبر 18
خدا دی خدمت لئی منصوبے بناؤ تے ایہناں نُوں پورا کرو
ایہناں گلاں تے سوچوچار کر، ایہناں چ مگن رہ تاکہ سارے لوک ویکھ سکن کہ تُوں پُختہ ہوندا جا رہیا ایں۔—1-تیمُتھیُس 4:15۔
گیت نمبر 84: خدمت لئی ہر پل تیار
مضمون تے اِک نظر a
1. اَسی یہوواہ دی خدمت لئی کیہو جہے منصوبے بنا سکنے آں؟
اَسی سارے یہوواہ نُوں بوہت پیار کرنے آں تے جی جان نال اوہدی خدمت کرنا چاہنے آں۔ پر اِنج کرن لئی سانوں خدا دی خدمت لئی ہور منصوبے بنانے چاہی دے نیں۔ تُسی ایہو جہے منصوبے بنا سکدے او جیویں کہ اپنے اندر اوہ خوبیاں پیدا کرو جیہڑیاں خدا نُوں پسند نیں، نوِیاں مہارتاں سکھو تے دُوجیاں دی مدد کرن دے ہور طریقے لبھو۔
2. سانوں خدا دی خدمت لئی کیہڑے منصوبے بنانے چاہی دے نیں تے اوہناں نُوں پورا کرن لئی محنت کیوں کرنی چاہی دی اے؟
2 خدا دی خدمت لئی منصوبے بنانا ضروری کیوں اے؟ ایہدی سب توں خاص وجہ ایہہ وے کہ اَسی اپنے اسمانی باپ نُوں خوش کرنا چاہنے آں۔ جدوں اَسی یہوواہ دی خدمت چ اپنیاں صلاحیتاں نُوں استمال کرن دی پوری کوشش کرنے آں تے اوہ بڑا خوش ہوندا اے۔ سانوں ایس لئی وی منصوبے بنانے چاہی دے نیں تاکہ اَسی اپنے بھین بھراواں دی ہور مدد کر سکئے۔ (1-تھسلُنیکیوں 4:9، 10) بھانویں اَسی بڑے سالاں توں یہوواہ دے گواہ واں پر فیر وی اَسی اپنی خدمت نُوں ودھا سکنے آں۔آؤ ویکھئے کہ اَسی اِنج کیویں کر سکنے آں۔
3. 1-تیمُتھیُس 4:12-16 چ پولُس رسول نے تیمُتھیُس نُوں کیہڑی نصیحت کیتی؟
3 جدوں پولُس نے تیمُتھیُس دے ناں پہلا خط لکھیا تے اوہ پہلاں توں ای کلیسیا چ بزرگ دے طور تے خدمت کر رہیا سی۔ پر فیر وی پولُس نے اوہنوں کہیا کہ اوہ ہور وی پُختہ بنن دی کوشش کردا رہوے۔ (1-تیمُتھیُس 4:12-16 نُوں پڑھو۔) پولُس دی ایس گل توں پتہ چلدا اے کہ اوہ چاہندا سی کہ تیمُتھیُس دو طریقیاں نال پُختہ ہووے۔ اِک طریقہ ایہہ سی کہ اوہ محبت، ایمان تے پاکیزگی جہیاں خوبیاں نُوں نکھارے تے دُوجا ایہہ کہ اوہ اپنیاں صلاحیتاں جیویں کہ دُوجیاں نُوں ہدیت دین، تلیم دین تے پاک کلام نُوں پڑھن چ ہور بہتری لیائے۔ ایس مضمون چ اَسی تیمُتھیُس دی مثال تے غور کر کے سکھاں گے کہ خدا دی خدمت لئی منصوبے بنان نال اَسی ہور پُختہ کیویں ہو سکنے آں۔ اَسی کجھ ایہو جہے طریقیاں تے وی گل کراں گے جنہاں دے ذریعے اَسی ہور ودھچڑھ کے یہوواہ دی خدمت کر سکنے آں۔
اپنیاں خوبیاں نُوں نکھارو
4. فِلپّیوں 2:19-22 دے مطابق تیمُتھیُس یہوواہ دا اِک چنگا خادم کیوں سی؟
4 تیمُتھیُس یہوواہ دا اِک چنگا خادم کیوں سی؟ اپنیاں خوبیاں دی وجہ توں۔ (فِلپّیوں 2:19-22 نُوں پڑھو۔) پولُس نے تیمُتھیُس بارے جو کجھ کہیا اوہدے توں پتہ چلدا اے کہ تیمُتھیُس خاکسار، محنتی تے بھروسے دے لائق سی۔ تیمُتھیُس سچے دل نال بھین بھراواں دی فکر رکھدا سی تے اوہناں نال پیار کردا سی۔ ایسے وجہ توں پولُس وی تیمُتھیُس نُوں بوہت زیادہ پیار کردا سی تے اوہ بےفکر ہو کے اوہنوں مشکل توں مشکل ذمےداریاں وی دے دیندا سی۔ (1-کُرنتھیوں 4:17) جے اَسی وی اپنے اندر اوہ خوبیاں پیدا کراں گے جیہڑیاں یہوواہ نُوں پسند نیں تے یہوواہ سانوں ہور وی زیادہ پیار کرے گا تے اَسی اپنے بھین بھراواں دی ودھچڑھ کے مدد کر پانواں گے۔—زبور 25:9؛ 138:6۔
کسے ایہو جہی خوبی بارے سوچو جنہوں تُسی نکھارنا چاہندے او۔ (پیراگراف نمبر 5، 6 نُوں ویکھو۔)
5. (الف) تُسی ایہہ کیویں ویکھ سکدے او کہ توانوں اپنے اندر کیہڑی خوبی پیدا کرنی چاہی دی اے؟ (ب) تصویر دے مطابق اِک جوان بھین نے کیہڑی خوبی نُوں نکھارن دا منصوبہ بنایا اے تے اوہ ایس منصوبے تے کیویں کم کر رہی اے؟
5 سوچو کہ تُسی کیہڑی خوبی نکھارنا چاہندے او۔ دُعا کر کے ایس گل تے غور کرو کہ توانوں اپنی شخصیت چ کتھے بہتری لیان دی ضرورت اے۔ کوئی اِک خوبی چُنو جنہوں تُسی خاص طور تے نکھارنا چاہندے او۔ مثال لئی، تُسی دُوجیاں لئی ہور زیادہ ہمدردی وکھا سکدے او، بھین بھراواں دے ہور زیادہ کم آ سکدے او، زیادہ صلح پسند بن سکدے او یاں دُوجیاں نُوں دل کھول کے معاف کر سکدے او۔ تُسی اپنے کسے قریبی دوست نُوں پچھ سکدے او کہ تُسی کیہڑے طریقیاں نال اپنے اندر بہتری لیا سکدے او۔—امثال 27:6۔
6. تُسی جیہڑی خوبی نُوں نکھارن دا منصوبہ بنایا اے، اوہنوں تُسی کیویں پورا کر سکدے او؟
6 اپنے منصوبے پورے کرن لئی محنت کرو۔ اِنج کرن دا اِک طریقہ ایہہ وے کہ تُسی اوس خوبی بارے پڑھو جنہوں تُسی نکھارنا چاہندے او۔ شاید تُسی منصوبہ بنایا اے کہ تُسی دُوجیاں نُوں دلوں معاف کرو گے۔ ایہدے لئی تُسی پاک کلام چوں اوہناں لوکاں دِیاں مثالاں تے غور کر سکدے او جنہاں نے دل کھول کے دُوجیاں نُوں معاف کیتا تے جنہاں نے اِنج نئیں کیتا۔ ذرا یسوع مسیح بارے سوچو۔ اوہ ہمیشاں دُوجیاں نُوں معاف کرن لئی تیار رہندا سی۔ (لُوقا 7:47، 48) اوہ لوکاں دِیاں خامیاں تے نئیں سگوں اوہناں دِیاں خوبیاں تے دھیان دیندا سی۔ پر اوہدے زمانے دے فریسی دُوجیاں نُوں بوہت حقیر سمجھدے سن۔ (لُوقا 18:9) ایہناں مثالاں تے غور کرن توں بعد اپنے آپ کولوں پچھو: ”کیہہ میں دُوجیاں دِیاں خامیاں تے دھیان دینا واں یاں فیر اوہناں دِیاں خوبیاں تے؟“ جے توانوں کسے نُوں معاف کرنا مشکل لگ رہیا اے تے سوچو کہ اوس بندے چ کیہڑیاں کیہڑیاں خوبیاں نیں تے اوہناں نُوں لکھ لوو۔ فیر اپنے آپ کولوں ایہہ سوال پچھو: ”یسوع دی نظر چ اوہ بندہ کیہو جیہا اے؟ کیہہ یسوع اوہنوں معاف کرے گا؟“ اِنج تُسی اپنی سوچ نُوں بدل پاؤ گے۔ ایہہ سچ اے کہ شروع شروع چ سانوں کسے ایہو جہے بندے نُوں معاف کرنا مشکل لگے گا جنہے ساڈا دل دُکھایا اے پر جے اَسی اِنج کرن دی کوشش کردے رہواں گے تے وقت دے نال نال سانوں دُوجیاں نُوں معاف کرنا اسان لگے گا۔
نوِیاں مہارتاں سکھو
کوئی ایہو جہی مہارت سکھو جدے نال تُسی اپنی عبادتگاہ دی دیکھبھال کر سکو۔ (پیراگراف نمبر 7 نُوں ویکھو۔) c
7. امثال 22:29 دے مطابق یہوواہ اوہناں لوکاں نُوں کیویں استمال کردا اے جیہڑے اپنیاں مہارتاں نُوں نکھار دے نیں؟
7 تُسی یہوواہ دی خدمت لئی کسے نوِیں مہارت نُوں سکھن دا منصوبہ وی بنا سکدے او۔ ذرا سوچو کہ بیت ایل دِیاں عمارتاں تے ساڈیاں عبادت گاہواں نُوں بنان لئی کِنّے زیادہ بھین بھراواں دی ضرورت ہوندی اے۔ ایہناں وچوں بوہت سارے بھین بھرا تجربہ کار بھین بھراواں نال کم کرکے نویں ہنر سکھدے نیں۔ جیویں تصویر چ وکھایا گیا اے بھین بھرا عبادتگاہواں دی دیکھبھال کرن لئی مہارتاں سکھ سکدے نیں۔ اِنج ابدیت دا بادشاہ یہوواہ خدا تے بادشاہواں دا بادشاہ یسوع مسیح ہنرمند بندیاں دے ذریعے وڈے وڈے کم کر رہے نیں۔ (1-تیمُتھیُس 1:17؛ 6:15؛ امثال 22:29 نُوں پڑھو۔) اَسی چاہنے آں کہ اَسی اپنیاں صلاحیتاں دے ذریعے ہور ودھچڑھ کے یہوواہ دی خدمت کرئیے تے اَسی ایہہ اپنی وڈیائی لئی نئیں سگوں یہوواہ دی وڈیائی لئی کرنا چاہنے آں۔—یوحنا 8:54۔
8. تُسی ایہہ فیصلہ کیویں کر سکدے او کہ توانوں کیہڑا ہنر سکھنا چاہی دا اے؟
8 سوچو کہ تُسی کیہڑا ہنر سکھنا چاہندے او۔ ایس بارے تُسی اپنی کلیسیا دے بزرگاں یاں حلقے دے نگہبان توں پچھ سکدے او۔ فرض کرو اوہ توانوں کہندے نیں کہ تُسی تلیم دین دی مہارت نُوں نکھارو۔ تُسی اوہناں کولوں پچھو: ”میں ایہدے چ خاص طور تے کتھے بہتری لیا سکنا واں؟“ تے فیر اوہناں دے مشوریاں تے عمل کرو۔ پر تُسی اِنج کیویں کر سکدے او؟
9. تُسی جیہڑی مہارت نُوں نکھارن دا منصوبہ بنایا اے، اوہنوں تُسی کیویں پورا کر سکدے او؟
9 اپنے منصوبے نُوں پورا کرو۔ جے تُسی تلیم دین دی اپنی مہارت نُوں ہور نکھارنا چاہندے او تے توانوں کتاب ”تلیم دین تے پڑھن چ ماہر بنو“ دا چنگی طرحاں مطالعیا کرنا چاہی دا اے۔ جدوں مسیحی زندگی تے خدمت والی عبادت چ تواڈا حصہ ہوندا اے تے تُسی کسے تجربہ کار بھرا نُوں کہہ سکدے او کہ اوہ پہلے تواڈا حصہ سُنے تے دَسے کہ تُسی ایہنوں ہور بہتر کیویں کر سکدے او۔ جے تُسی اپنے حصیاں دی پہلاں توں تیاری کرو گے تے ساریاں نُوں نظر آئے گا کہ تُسی ایہناں نُوں محنت نال تیار کردے او تے اوس کم نُوں ضرور پورا کردے او جیہڑا توانوں دِتا جاندا اے۔—امثال 21:5؛ 2-کُرنتھیوں 8:22۔
10. اِک مثال دے ذریعے دَسو کہ تُسی اپنی کسے صلاحیت نُوں کیویں نکھار سکدے او۔
10 جے تُسی کوئی ایہو جہی صلاحیت پیدا کرن دی کوشش کر رہے او جیہڑی تواڈے چ نئیں اے تے ہمت نہ ہارو۔ ذرا بھرا گیری دی مثال تے غور کرو۔ اوہ چنگی طرحاں پڑھ نئیں سکدا سی تے اوہ کہندا اے کہ عبادتاں تے ایس وجہ توں اوہنوں بڑی شرمندگی ہوندی سی۔ پر اوہنے محنت کرنی نئیں چھڈی۔ اوہنوں تجربہ کار بھراواں تے تنظیم دِیاں کتاباں توں جیہڑی تربیت مِلی اوہدی وجہ توں ہُن اوہ عبادتاں تے کنونشناں تے تقریراں وی کردا اے۔
11. تیمُتھیُس وانگوں اَسی ہور ودھچڑھ کے یہوواہ دی خدمت کیویں کر سکنے آں؟
11 کیہہ تیمُتھیُس اِک زبردست اُستاد تے مقرر بن گیا سی؟ بائبل چ ایہدے بارے کجھ نئیں دَسیا گیا۔ پر اَسی ایہہ ضرور کہہ سکنے آں کہ پولُس دی نصیحت تے عمل کرن نال اوہ اپنیاں ذمےداریاں نُوں چنگی طرحاں نبھان دے قابل ہو گیا۔ (2-تیمُتھیُس 3:10) جے اَسی وی اپنیاں مہارتاں نُوں نکھاراں گے تے اَسی وی ہور ودھچڑھ کے یہوواہ دی خدمت کر پانواں گے۔
دُوجیاں دی مدد کرن دے طریقے لبھو
12. دُوجیاں نے کیویں تواڈی مدد کیتی اے؟
12 جدوں دُوجے ساڈی مدد کردے نیں تے سانوں بڑا فائدہ ہوندا اے۔ مثال لئی، جے اَسی ہسپتال چ داخل آں تے سانوں ہسپتال رابطہ کمیٹی دے بھرا یاں بیمار بھین بھراواں نال ملاقات کرن والے گروپ دے بھرا مِلن آن تے سانوں بوہت چنگا لگدا۔ جے اَسی کسے مشکل چوں لنگھ رہے آں تے کوئی بزرگ ساڈی گل سُنن لئی وقت کڈھے تے سانوں تسلی دَوے تے ساڈی پریشانی گھٹ ہو جاندی اے۔ یاں فیر ہو سکدا اے کہ سانوں بائبل کورس کران لئی مدد دی ضرورت اے تے کوئی تجربہ کار پہلکار ساڈی بائبل کورس کران چ مدد کرے تے سانوں مشورے دَوے تے سانوں بڑی خوشی ہوئے گی۔ ساڈی مدد کر کے اوہناں بھین بھراواں نُوں وی بوہت چنگا لگدا اے۔ جے اَسی وی دُوجیاں دی مدد کرن لئی ہمیشاں تیار رہواں گے تے سانوں وی خوشی ملے گی۔ یسوع مسیح نے کہیا سی کہ لین نالوں دین وچ بوہتی خوشی مِلدی اے۔ (اعمال 20:35) جے تُسی وی ایہناں طریقیاں نال یاں کسے ہور طریقے نال یہوواہ دی ہور خدمت کرنا چاہندے او تے تُسی کیہہ کر سکدے او؟
13. جدوں اَسی کوئی منصوبہ بنانے آں تے سانوں کیہڑی گل یاد رکھنی چاہی دی اے؟
13 جدوں تُسی یہوواہ دی خدمت کرن لئی کوئی منصوبہ بناندے او تے کسے خاص گل بارے سوچو۔ مثال لئی، ایہہ سوچن دی بجائے کہ میں کلیسیا لئی ہور زیادہ کم کرنا چاہنا واں ایہہ سوچو کہ تُسی کلیسیا دی مدد کرن لئی خاص طور تے کیہہ کر سکدے او۔ اِنج تواڈے لئی اپنے منصوبیاں نُوں پورا کرنا تے ایس گل دا حساب رکھنا اسان ہو جائے گا کہ تُسی ایہناں نُوں پورا کرن چ کیس حد تک کامیاب ہوئے او۔ تُسی ایہہ لکھ وی سکدے او کہ تواڈا منصوبہ کیہہ اے تے تُسی ایہنوں کیویں پورا کرو گے۔
14. کوئی وی منصوبہ بناندے ویلے سانوں ایہہ گل کیوں یاد رکھنی چاہی دی اے کہ سانوں ایہدے چ تبدیلی کرنی پے سکدی اے؟
14 کوئی وی منصوبہ بناندے ویلے ایس گل نُوں ذہن چ رکھنا ضروری اے کہ سانوں ایس منصوبے چ تبدیلی کرنی پے سکدی اے کیونکہ کدی کدار حالات ساڈے وَسوں باہر ہوندے نیں۔ ذرا پولُس رسول دی مثال تے غور کرو۔ اوہنے شہر تھسلُنیکے چ نوِیں کلیسیا بنان چ مدد کیتی سی۔ بےشک پولُس دا منصوبہ سی کہ اوہ اوتھے رہ کے نویں مسیحیاں دی مدد کرے گا۔ پر مخالفاں دی وجہ توں پولُس نُوں اوہ شہر چھڈ کے جانا پیا۔ (اعمال 17:1-5، 10) جے اوہ اوتھے رُک جاندا تے ایہدی وجہ توں بھین بھراواں دی جان خطرے چ پے جانی سی۔ پر پولُس ایہناں بھین بھراواں دی مدد کرن توں پچھے نئیں ہٹیا۔ اوہنے اپنے حالاتاں مطابق اپنے منصوبے چ تھوڑی تبدیلی کیتی۔ فیر اوہنے تھسلُنیکے چ نویں مسیحیاں دے ایمان نُوں مضبوط کرن لئی تیمُتھیُس نُوں اوہناں کول گھلیا۔ (1-تھسلُنیکیوں 3:1-3) ذرا سوچو کہ تھسلُنیکے دے مسیحی ایہہ ویکھ کے کِنّے خوش ہوئے ہون گے کہ تیمُتھیُس اوہناں دی مدد کرن لئی تیار سی۔
15. مثال دے کے دَسو کہ جدوں ساڈے حالات بدلدے نیں تے ایہدا ساڈے منصوبیاں تے کیہہ اثر پے سکدا اے۔
15 پولُس رسول دی مثال توں اَسی اِک خاص گل سمجھن دے قابل ہنے آں۔ شاید اَسی یہوواہ دی خدمت دے حوالے نال کوئی منصوبہ بنایا اے پر فیر حالات ساڈے وَسوں باہر ہو گئے نیں تے ساڈے لئی اوس منصوبے نُوں پورا کرنا مشکل ہو گیا اے۔ (واعظ 9:11) جے تواڈے نال وی کدی اِنج ہووے تے کوئی ایہو جیہا منصوبہ بنان لئی تیار رہوو جنہوں پورا کرنا تواڈے وَس چ ہووے۔ ایس بارے ذرا بھرا ٹیڈ تے بھین ہائیڈی دی مثال تے غور کرو۔ صحت دے مسئلیاں دی وجہ توں ایس جوڑے نُوں بیتایل چھڈنا پیا۔ پر یہوواہ نال پیار کرن دی وجہ توں اوہناں نے دُوجے طریقے لبھے تاکہ اوہ ودھچڑھ کے یہوواہ دی خدمت کر سکن۔ اوہ پہلکار بن گئے۔ فیر تنظیم نے اوہناں نُوں خصوصی پہلکار بنا دِتا تے بھرا ٹیڈ نُوں کدی کدار حلقے دے نگہبان دی جگہ کم کرن لئی تربیت دِتی۔ فیر کجھ عرصے دے بعد تنظیم وَلّوں ایہہ ہدیت آئی کہ بھرا اِک خاص عمر تک پونچن دے بعد حلقے دے نگہبان دے طور تے خدمت نئیں کر سکدے۔ بھرا ٹیڈ تے بھین ہائیڈی سمجھ گئے کہ اپنی عمر دی وجہ توں ہُن اوہ ایس طرحاں یہوواہ دی خدمت جاری نئیں رکھ پان گے۔ اوہ تھوڑے مایوس تے ہو گئے پر اوہ جان دے سن کہ اوہ دُوجے طریقیاں نال یہوواہ دی خدمت کر سکدے نیں۔ بھرا ٹیڈ کہندے نیں: ”میں سکھیا اے کہ اَسی فرق فرق طریقیاں نال یہوواہ دی خدمت کر سکنے آں۔“
16. اَسی گلتیوں 6:4 توں کیہہ سکھنے آں؟
16 ساڈے حالات بدلدے رہندے نیں ایس لئی سانوں ایہہ نئیں سوچنا چاہی دا کہ جے ساڈے کول کوئی خاص ذمےداری ہوئے گی تے فیر ای یہوواہ ساڈی قدر کرے گا۔ سانوں اپنے اوہناں بھین بھراواں نال مقابلہ نئیں کرنا چاہی دا جنہاں کول کوئی خاص ذمےداری اے۔ بھین ہائیڈی کہندی اے: ”جے تُسی اپنی زندگی دا مقابلے دُوجیاں دی زندگی نال کرو گے تے تواڈی خوشی ختم ہو جائے گی۔“ (گلتیوں 6:4 نُوں پڑھو۔) ایہہ بڑا ضروری اے کہ اَسی ایہو جہے طریقے لبھدے رہیے جنہاں دی مدد نال اَسی یہوواہ تے اپنے بھین بھراواں دے ہور کم آ سکئے۔
17. تُسی کیہہ کر سکدے او تاکہ تُسی یہوواہ دی ہور زیادہ خدمت کرن لئی اپنے آپ نُوں پیش کر سکو؟
17 اپنی زندگی نُوں سادہ رکھو تے بِلاوجہ قرضہ نہ چکو تاکہ تُسی ہور ودھچڑھ کے اپنے آپ نُوں یہوواہ دی خدمت لئی پیش کر سکو۔ اپنے کسے وڈے منصوبے نُوں پورا کرن توں پہلاں چھوٹے چھوٹے منصوبے بناؤ۔ مثال لئی، جے تُسی پہلکار بنن دا منصوبہ بنایا ہویا اے تے ایہدے توں پہلاں تُسی کجھ مہینیاں تک مددگار پہلکار دے طور تے خدمت کر سکدے او۔ جے تُسی کلیسیا چ خادم بنن دا منصوبہ بنایا اے تے تُسی زیادہ توں زیادہ مُنادی کر سکدے او تے کلیسیا دے بیمار تے بُڈھے بھین بھراواں نُوں مِلن جا سکدے او۔ ایہو جہے چھوٹے چھوٹے منصوبیاں نُوں پورا کر کے تُسی جو کجھ سکھو گے اوہدی وجہ توں تُسی اَگے چل کے یہوواہ دی خدمت چ ہور زیادہ ذمےداریاں چُکن دے قابل بن جاؤ گے۔ پکا ارادہ کرو کہ توانوں جیہڑی وی ذمےداری ملے گی تُسی جی جان نال اوہنوں پورا کرو گے۔—رومیوں 12:11۔
کسے ایہو جہے منصوبے بارے سوچو جنہوں تُسی پورا کر سکدے او۔ (پیراگراف نمبر 18 نُوں ویکھو۔) d
18. بھین بیورلی تصویر چ جو کر رہی اے اوہدے توں اَسی کیہہ سکھنے آں؟
18 ساڈی عمر بھانویں جو وی ہووے اَسی یہوواہ دی خدمت لئی منصوبے بنا سکنے آں تے اوہناں نُوں پورا کر سکنے آں۔ ذرا بھین بیورلی دی مثال تے غور کرو جدی عمر 75 سال اے۔ اوہنوں صحت دا ایہو جیہا مسئلہ اے جدی وجہ توں اوہدے لئی ٹُرناپھرنا مشکل اے۔ پر اوہدی دِلی خواہش سی کہ اوہ یادگیری دی مہم چ ودھچڑھ کے حصہ لوَے۔ ایس کم لئی اوہنے کجھ خاص منصوبے بنائے۔ جدوں اوہنے اپنے ایہناں منصوبیاں نُوں پورا کیتا تے اوہنوں بوہت خوشی ہوئی۔ اوہدیاں کوششاں نُوں ویکھ کے دُوجے بھین بھراواں دے دل چ وی ایہہ خواہش پیدا ہوئی کہ اوہ ودھچڑھ کے مُنادی کرن۔ بھانویں کہ وڈیرے بھین بھرا یہوواہ دی زیادہ خدمت نئیں کر پاندے پر فیر وی یہوواہ اوہناں دی بوہت قدر کردا اے۔—زبور 71:17، 18۔
19. اَسی خدا دی خدمت لئی کیہڑے منصوبے بنا سکنے آں؟
19 ایہو جہے منصوبے بناؤ جنہاں نُوں تُسی پورا کر سکو۔ اپنے اندر ایہوجہیاں خوبیاں پیدا کرو جیہڑیاں یہوواہ نُوں پسند نیں۔ ایہوجہیاں مہارتاں سکھو جنہاں دی وجہ توں تُسی یہوواہ تے اوہدی تنظیم دے ہور کم آ سکو۔ بھین بھراواں دی مدد کرن دے فرق فرق طریقے لبھو۔ b فیر یہوواہ تیمُتھیُس وانگوں توانوں وی برکت دَوے گا تے سارے لوک ویکھ سکن گے کہ تُسی پُختہ ہوندے جا رہے او۔—1-تیمُتھیُس 4:15۔
گیت نمبر 38: اوہ توانوں تگڑا کرے گا
a تیمُتھیُس بڑی مہارت نال لوکاں نُوں خوشخبری سناندا سی۔ پر فیر وی پولُس رسول نے اوہنوں ہدیت دِتی کہ اوہ ودھچڑھ کے خدا دی خدمت کرے۔ تیمُتھیُس نے پولُس دی ایس ہدیت تے عمل کیتا۔ایس لئی اوہ یہوواہ تے اپنے بھین بھراواں لئی ہور زیادہ کم کر پایا۔ کیہہ تُسی وی ہور ودھچڑھ کے یہوواہ دی خدمت کرنا تے اپنے بھین بھراواں دی مدد کرنا چاہندے او؟ ایہدے لئی تُسی کیہڑے منصوبے بنا سکدے او تے اوہناں نُوں کیویں پورا کر سکدے او؟
b کتاب ”خوشیاں بھری زندگی پاؤ—ہُن تے ہمیشاں تک“ دے سبق نمبر 60 ”یہوواہ نال اپنا رشتہ مضبوط کردے رہوو“ نُوں ویکھو۔
c تصویر دی وضاحت: اِک بھرا دو بھیناں نُوں عبادتگاہ دی دیکھبھال کرنا سکھا رہیا اے تے بھیناں نے جو سکھیا اے اوہ اوہدے مطابق کم کر رہیاں نیں۔
d تصویر دی وضاحت: اِک بھین جیہڑی بیماری تے بڑھاپے دی وجہ توں گھروں زیادہ باہر نئیں نکل سکدی، اوہ فون تے گواہی دے رہی اے تے لوکاں نُوں یسوع دی موت دی یادگیری تے آن دی دعوت دے رہی اے۔