1. Mehn akadei dah kan me kitail kak wiahda?

 NIN duwen Kristian mehlel kei, kitail kin uhdahn poakohng Siohwa. Kitail men wia uwen atail kak koaros nan sapwellimen Siohwa doadoahk. Ahpw pwehn wia uwen atail kak koaros ong Siohwa, kitail anahne wiahda mehn akadei kan, duwehte kakairada irair en Kristian kan, koahiekla ni soahng katapan kan, oh rapahki ahl akan en sewese meteikan. *

2. Dahme kahrehda kitail anahne wiahda mehn akadei kan ong papah Siohwa oh doadoahk laud pwehn lel mehn akadei pwukat?

² Dahme kahrehda kitail men kamwahwihala atail kin papah Siohwa? Keieu, kitail men kaperenda Samatail limpoako nanleng. Siohwa kin ketin kupwurperenki ni eh mahsanih atail kin wia uwen atail kak en doadoahngki atail koahiek pwehn papah ih. Patehng met, kitail men kamwahwihala atail kin papah Siohwa pwe kitail en kak kalaudehla atail sewese riatail Kristian kan. (1 Des. 4:9, 10) Sohte lipilipil ia uwen werei me kitail mi nan padahk mehlel, kitail koaros kak kamwahwihala atail kin papah Siohwa. Kitail pahn kilang ia duwen atail kak wia met.

3. Nin duwen me 1 Timoty 4:12-16 mahsanih, dahme wahnpoaron Pohl kangoange Timoty en wia?

³ Ni ahnsou me wahnpoaron Pohl ntingihla keieun nah kisinlikou ong mwahnakapwo Timoty, Timoty wiahier elder koahiek men. Ahpw Pohl kangoange ih en doulahte kamwahwihala eh kin papah Siohwa. (Wadek 1 Timoty 4:12-16.) Ni omw medewe dahme Pohl koasoia, ke pahn tehkada me Pohl men Timoty en pousehlahte kekeirda ni ahl riau. Keieu, sang ni eh pahn kakairada irair en Kristian kan duwehte limpoak,  pwoson, oh mwakelekel, oh keriau, sang ni eh pahn kamwahwihala eh koahiek en wadawad mwohn meteikan, kihda kangoang, oh wia padahk. Kitail pahn koasoiapene ahn Timoty mehn kahlemeng kan pwehn kasalehda ia duwen atail wiahda mehn akadei kan me kitail kakohng eh kak sewese kitail en kamwahwihala atail kin papah Siohwa. Kitail pil pahn koasoiapene ekei ahl akan me kitail kak kalaudehla atail doadoahk en kalohk.

4. Nin duwen me Pilipai 2:19-22 mahsanih, dahme kahrehiong Timoty en wia sapwellimen Siohwa ladu katapan men?

⁴ Dahme kahrehiong Timoty en wia sapwellimen Siohwa ladu katapan men? Eh irair en Kristian kaselel kan. (Wadek Pilipai 2:19-22.) Sang dahme Pohl ndahki Timoty, kitail kak kilang me Timoty kin aktikitik, loalopwoat, pwerisek, oh meteikan kak koapworopworki. E kin kasalehda limpoak, oh uhdahn nsenohki rie Kristian kan. Pwehki met, Pohl poakohng Timoty oh sohte pweiek en kihong ih pwukoa laud kan. (1 Kor. 4:17) Duwehte met, ni atail kin kakairada irair kan me Siohwa ketin kupwurperenki, e pahn ketin poakohng kitail oh met pil pahn kalaudehla katepatail nan mwomwohdiso.​—Mel. 25:9; 138:6.

5. (a) Ia duwen omw kak akadeiong pwehn kakairada irair en Kristian ehu? (b) Ia duwen sister me mi nan kilelo eh akadeiong kalaudehla eh wehwehki pepehm en meteikan?

⁵ Pilada soangen irair ehu me ke men kakairada. Kapakap oh medewehla soangen irair ehu rehmw me ke men kamwahwihala. Karasepe, ele ke pilada en kalaudehla omw kin wehwehki pepehm en meteikan, de kalaudehla omw men sewese riomw Kristian kan. De ke kak song en kalaudehla omw kin meleilei oh mahkohng meteikan? Ele e pahn sawas ma ke peki rehn kompoakepahmw men me ke likih en padahkihong uhk ia duwen omw kak kamwahwihala soahng pwukat.​—Lep. Pad. 27:6.

6. Ia duwen omw kak akadeiong en kakairada irair mwahu ehu?

⁶ Nantihong lel omw men akadeio. Ia duwen omw kak wia met? Ehu ahl iei en onopki mwahu irairo me ke men kamwahwihala. Ia duwen ma ke akadeiong kalaudehla omw kin mahkohng meteikan? Mwein ke pahn tepte wadek oh doudouloale mehn kahlemeng en irail kan nan Paipel me kin mahkohng meteikan oh irail kan me sohte kin. Medewehla sapwellimen Sises mehn kahlemeng. E  kin kupwurki mahkohng meteikan. (Luk 7:47, 48) E pil sohte kin ketin tetehkte arail sapwung kan ahpw dahme irail kak wia. Weksang met, Parisi ko ni mwehin Siseso “kin medewe me meteikan sohte katepe.” (Luk 18:9) Mwurin omw doudouloale mehn kahlemeng pwukat, pein idek rehmw: ‘Dahme I kin kilang rehn meteikan? Irair dah kan me irail ahneki me I men medemedewe?’ Ma ke apwalki mahkohng emen, song ni uwen omw kak en ntingihedi uwen tohto en irair kaselel kan me aramaso ahneki. Kowe eri pein idek rehmw: ‘Ia duwen Sises eh kin ketin kilangwohng aramaso? E pahn ketin mahkohng ih?’ Ma kitail wia met, kitail kak wekidala atail madamadau. Nin tapio, ele kitail anahne doadoahk laud pwehn mahkohng aramaso me kansensuwedihkitailla. Ahpw ma kitail kin nannanti en wia met, kedekedeo kitail pahn perenkihla kasalehda mahk.

7. Ia duwen Lepin Padahk 22:29 eh kasalehda me Siohwa kin ketin doadoahngki tohndoadoahk koahiek kan rahnwet?

⁷ Pil ehu me ke kak akadeiong iei sukuhlki soangen koahiek ehu me katapan. Medewehla uwen tohtohn tohndoadoahk kan me anahn pwehn kauwada Pedel kan, wasahn mihting tohrohr kan, oh Wasahn Kaudok kan. Tohto irail kin esehla wia soahng kei sang ni arail iang riarail Kristian koahiek kan doadoahk. Nin duwen me kilelo kasalehda, riatail Kristian kan kin sukuhlki soangen koahiek kan me anahn pwehn sewese apwalih wasahn mihting tohrohr kan oh Wasahn Kaudok kan. Ni soangen ahl pwukat oh pil ahl teikan, Siohwa Koht, “Nanmwarki poatopoat,” oh Krais Sises, “Nanmwarki en . . . nanmwarki” kan, kin ketin doadoahngki tohndoadoahk koahiek pwukat pwehn wiahda soahng kaselel kan. (1 Tim. 1:17; 6:15; wadek Lepin Padahk 22:29.) Kitail men doadoahk laud oh doadoahngki atail koahiek katapan kan pwehn kalinganahla Siohwa, a kaidehn pein kitail.​—Sohn 8:54.

8. Ia duwen omw kak pilada soangen koahiek ehu me ke men esehla?

⁸ Pilada soangen koahiek ehu me ke men esehla. Koahiek dahieu me ke men sukuhlki? Idek rehn elder kan nan omw mwomwohdiso oh mwein sounapwalih me kin seiloak soangen koahiek dah me re medewe ke kak kakairada. Karasepe, ma re kangoangeiuk ken kamwahwihala omw koahiek en koasoi oh padahk, peki rehrail ren seweseiuk esehda irair dahieu me ke uhdahn anahne kamwahwihala ni omw koasoi de padahk. Kowe eri nantihong en kamwahwihala. Ia duwen omw kak wia met?

9. Ia duwen omw kak lel omw mehn akadeio en esehla soangen koahiek ehu?

⁹ Nantihong lel omw mehn akadeio. Ia duwen ma ke men kamwahwihala omw koahiek en padahk? Ke kak onopki mwahu kisin pwuhko Nantihong Omw Pwukoahn Wadawad oh Padahk. Ma mie omw padahk nan mihting en nan wihk, ke kak peki rehn emen Kristian koahiek mwohn mihtingo pwehn rong mwomwen omw pahn wia padahko, oh sewesekin uhk ia duwen omw kak kamwahwihala. Kaunopada omw padahko mwohn rahno pwe meteikan pahn kilang me ke kin doadoahk laud oh koapworopworkin uhk.​—Lep. Pad. 21:5; 2 Kor. 8:22.

10. Menlau kihda ehu karasaras duwen atail kak pweida ni atail kakairada soangen koahiek ehu.

¹⁰ Ia duwen ma soangen koahieko me ke nantihong en esehla uhdahn apwal ong uhk en wia? Dehr uhdi! Brother men me adaneki Garry kin uhdahn apwalki wadawad. E tamanda  me e kin uhdahn namenek ni eh song en wadawad ni ngihl laud nan mihting kan en mwomwohdiso. Ahpw e pousehlahte doadoahk laud pwehn kamwahwihala. Met e koasoia me pwehki kaiahn me e kin alehdi, e kakehr wia padahk nan Wasahn Kaudok oh mihting tohrohr kan!

11. Duwehte Timoty, dahme pahn sewese kitail en kalaudehla atail kin papah Siohwa?

¹¹ Ia duwe, Timoty wiahla sounpadahk uhdahn mwahu men? Paipel sohte kasalehda met. Ahpw Timoty uhdahn koahiekla nan eh pwukoa kan pwehki e kapwaiada ahn Pohl kaweid. (2 Tim. 3:10) Duwehte ih, ma kitail kamwahwihala atail koahiek kan, kitail pahn kak kalaudehla atail papah Siohwa.

12. Ia duwen omw kin paiekihda ahn meteikan sawas?

¹² Kitail koaros kin paiekihda ahn meteikan sawas. Ni atail mihmi nan imwen wini, kitail kin kalahnganki elder kan me iang Pwihn me Kin Ehuiong Imwen Wini kan de Pwihn kan me Kin Mwamwaitih me Soumwahu. Ni atail lelohng irair apwal ehu, kitail kin kalahnganki ni elder men eh nsenohki wiahda ahnsou pwehn rong oh kansenamwahwihkitailla. Ni ahnsou me kitail onop Paipel rehn emen oh anahne sawas, kitail kin kalahnganki pioneer koahiek men eh iang kitail oh kihda iren sawas kan. Riatail Kristian pwukat koaros kin perenki sewese kitail. Kitail kak ahneki soangen peren wet ma kitail wiahda ahnsou en sewese riatail kan. Sises mahsanih: “Kihwei kin kaperen sang ale.” (Wiewia 20:35) Ma ke men kalaudehla omw sawas ni soangen ahl pwukat de ni ahl teikan, dahme pahn seweseiuk en wia met?

13. Ni omw pahn wiahda mehn akadei ehu, dahme ke anahne tamataman?

¹³ Dehr wiahda mehn akadei me sohte mengihtikpen omw pahn kapwaiada. Karasepe, ele ke medewe, ‘I men kalaudehla ei sawas nan mwomwohdiso.’ Ahpw ele e apwal en ese ia duwen omw pahn lel mehn akadeio, oh mwein ke sohte kak uhdahn ese iahd me ke pahn lel. Eri, pilada mehn akadei ehu me sansal oh mengihtik. Mwein ke pil kak ntingihedi mehn akadeio oh omw pilahn en kapwaiada.

14. Dahme kahrehda kitail anahne toupahrek ni atail wiahda mehn akadei kan?

¹⁴ Kitail pil anahne toupahrek ni atail wiahda mehn akadei kan. Dahme kahrehda? Pwehki kitail sohte kak uhdahn kaunda atail  irair kan. Karasepe, wahnpoaron Pohl sewese wiahda mwomwohdiso kapw ehu nan kahnimw en Deselonika. Oh mwein e akadeiong en mihmihte wasao oh sewese irail kan me ahpwtehn wiahla Kristian. Ahpw sounuhwong kan kausasang ih nan kahnimwo. (Wiewia 17:1-5, 10) Ma Pohl mihmihte, e kakete kahrehiong rie Kristian ko nan keper. Mendahki met, Pohl sohte uhdihsang sewese irail. E wiahda wekidekla kan pwehki eh irairo wekila. Mwuhr, e kadarala Timoty en sewese kakehlakahda pwoson en Kristian kapw ko nan Deselonika. (1 Des. 3:1-3) Ia uwen arail perenkihda ni Timoty eh kin wiahda ahnsou pwehn sewese wasa kan me anahne sawas!

15. Ia duwen atail mehn akadei kan ar kak wekila pwehki atail irairo wekila? Menlau kihda ehu karasaras.

¹⁵ Kitail kak sukuhlkihsang dahme wiawihong Pohl nan Deselonika. Ele kitail wiahda mehn akadei ehu, ahpw atail irairo wekila oh kahrehda kitail sohte kak lel atail mehn akadeio. (Ekl. 9:11) Ma met wiawihong uhk, pilada ehu mehn akadei tohrohr me ke kak lel. Ih met me pwopwoud ehu, Ted oh Hiedi, wia. Pwehki kahpwal en soumwahu, ira anahne kohkohsang Pedel. Ahpw ara poakohng Siohwa kamwakid ira en rapahki ahl teikan en kalaudehla ara doadoahk en kalohk. Keieu, ira wia doadoahk en pioneer. Kedekedeo, ira wiahla pioneer tohrohr kei, oh Ted ale kaiahn en wia sawasepen sounapwalih me kin seiloak. Mwuhr, mie wekidekla wiawihda ong sounpar depe me sounapwalih me kin seiloak kan anahne uhdihsang pwukoa wet. Ted oh Hiedi ese me ira solahr kak iang wia pwukoa kaselel wet. Mendahki ira nsensuwedkihla met, ira wehwehki me ira pil kak papah Siohwa ni ahl teikan. Ted koasoia, “Se esehla me mie ahl tohto teikan me se kak papah Siohwa.”

16. Dahme kitail kak sukuhlkihsang Kalesia 6:4?

¹⁶ Kitail sohte kak kaunda soahng koaros me kin wiawi nan atail mour. Eri e kesempwal kitail en dehr medewe me kitail kesempwal ong Siohwa ihte pwehki atail pwukoa kan, oh kitail en dehr kapahrekiong kitail meteikan me ahneki pwukoa kan me kitail sohte ahneki. Hiedi koasoia, “Ke pahn nsensuwed ma ke kin kapahrekiong omw mour ong mour en meteikan.” (Wadek Kalesia 6:4.) E kesempwal kitail en rapahki ahl akan en sewese meteikan oh papah Siohwa. *

17. Dahme ke kak wia pwehn elehieng uhk pwais kaselel kan?

¹⁷ Ke kak kalaudehla omw papah Siohwa ma ke kihsang soahng kan me sohte nohn kesempwal nan omw mour oh dehr pweipwand laud. Wiahda mehn akadei tikitik kan me pahn seweseiuk  en lel omw mehn akadei laud kan. Karasepe, ma omw mehn akadei laudo iei en wiahla emen pioneer, ke kak iang sawasepen pioneer nan sounpwong koaros ahnsou wet? Ma omw mehn akadeio iei en wiahla sounsawas men, ke kak kalaudehla omw ahnsou ong kalohk oh mwemweitla rehn me soumwahu oh mah kan nan omw mwomwohdiso? Koahiek me ke ahneki met kak elehieng uhk pwais kaselel kan ni ahnsou kohkohdo. Koasoanehdi teng ken wia uwen omw kak nan soangen pwukoa koaros me ke alehdi.​—Rom 12:11.

18. Nin duwen me kilelo kasalehda, dahme ke kak sukuhlkihsang ahn Beverley mehn kahlemeng?

¹⁸ Sohte lipilipil ma kitail mahla, kitail kak wiahda oh pil lel atail mehn akadei kan. Medewehla mehn kahlemeng en sister men me adaneki Beverley me sounpar 75. E kohwahki soumwahu laud me kahrehda e kin apwalki alu. Ahpw e men kalaudehla eh sewese doadoahk tohrohr ong Katamano. Eri e wiahda mehn akadei kan. Ni Beverley eh lel eh mehn akadei ko, e uhdahn peren. Eh nanti laud kamwakid meteikan en pil doadoahk laud nan kalohk. Siohwa ketin kesempwalki doadoahk laud en riatail Kristian mah kan, mehnda ma arail irairo kahrehiong en apwal en wia dahme re kak wia.​—Mel. 71:17, 18.

19. Ia ekei mehn akadei kan en papah Siohwa me kitail kak wiahda?

¹⁹ Wiahda mehn akadei kan me ke kak lel. Kakairada irair kan me pahn kaperenda Siohwa. Sukuhlki soangen koahiek kan me pahn kalaudehla en Koht oh sapwellime pwihn ar pahn doadoahngkin uhk. Rapahki ahl akan me pahn kalaudehla omw sewese riomw Kristian kan. * Duwehte Timoty, Siohwa en ketin kapaiukada oh “aramas koaros en kilang ni sansal omw kekeirda.”​—1 Tim. 4:15.