1. ¿Imasta ruwanapajtaj tukuy atisqanchejta kallpachakunanchej tiyan?

 CRISTIANOSQA Jehovata mayta munakunchej. Jehovataqa tukuy atisqanchejta sirviyta munanchej. Chaypajtaj tukuy atisqanchejta kallpachakunanchej tiyan aswan sumaj cristianos kanapaj, Diospa llajtanpi yanapakunapaj jina sumaj imasta ruwayta yachanapaj, imaynallamantapis wajkunata yanaparinapaj ima.

2. ¿Imajtintaj aswan sumaj cristianos kanapaj kallpachakuyta munanchej?

² Aswan sumaj cristianos kayta munanchej, munakuyniyoj Tatanchej Jehovata kusichiyta munasqanchejrayku. Jehovaqa imastachus ruwayta yachasqanchejwan payta sirvejtinchej, mayta kusikun. Chantapis sumaj cristianos kayta munallanchejtaj hermanosninchejta astawan yanapanapaj (1 Tes. 4:9, 10). Mashkha unayña cristianos kaspapis, tukuyninchej ñaupariyllatapuni atinchej. Imatachus chaypaj ruwananchejta qhawarina.

3. Kay 1 Timoteo 4:12-16 versiculospi, ¿imata ruwanantataj apóstol Pablo Timoteoman yuyaycharqa?

³ Apóstol Pablo Timoteoman ñaupaj kaj cartanta qhelqashajtin, Timoteoqa jovenllaraj kaspapis sumaj experienciayoj ancianoña karqa. Jinapis Pabloqa yuyaycharqa Diosta yupaychaypi ñauparinallantapuni (1 Timoteo 4:12-16 leey). Pablo imastachus Timoteoman yuyaychasqanpi reparanchej, iskay imaspi Timoteo ñauparinanta munasqanta. Pabloqa munarqa Timoteo munakuyniyoj, creeyniyoj, llimphu kausayniyoj kaypi ima ñauparinanta. Munallarqataj ñauparinanta Diosmanta Qhelqasqata wajkunaj ñaupaqenpi leeypi, yuyaychaypi, yachachiypitaj. ¿Imastataj Timoteomanta yachakusunman? Kay yachaqanapeqa qhawarisun, aswan sumaj cristianos kanapaj imastachus Timoteo jina ruwananchejta. Qhawarillasuntaj  imaynasmantachus Diospaj astawan llankʼayta atisqanchejta.

4. Filipenses 2:19-22 nisqanman jina, ¿imaraykutaj Timoteo Jehovata sumajta sirverqa?

⁴ Timoteoqa sumaj cristiano kasqanrayku Jehovata sumajta sirverqa (Filipenses 2:19-22 leey). Pablo imastachus Timoteomanta nisqanpi reparanchej, Timoteoqa kʼumuykukoj sonqo kasqanta, Jehovata munakusqanta, kʼuchi runa kasqanta, ruwanasnintapis sumajta juntʼasqanta. Timoteoqa munakuyniyoj runa karqa, hermanostapis yanapariytapuni munaj. Chayrayku Pabloqa Timoteota munakorqa, congregacionpi jatun ruwaykunatataj qorqa (1 Cor. 4:17). Noqanchejpis Timoteo jina aswan sumaj cristianos kanapaj kallpachakuna. Ajinamanta Jehovapaj aswan munasqa kasun, congregacionpipis astawan yanapakusun (Sal. 25:9; 138:6).

5. 1) ¿Imatá ruwasunman imaspichus astawan ñauparinanchej kasqanta yachanapaj? 2) Fotopi rikunchej jina, ¿imatataj uj joven hermana ruwashan wajkunata munakusqanrayku?

⁵ ¿Imapitaj astawan kallpachakusunman? Imaspichus astawan ñauparinanchej kasqanta yachanapajqa, Jehovamanta mañakuspa sumajta qhawarikuna. Chantá piensarina imayna runachus kayta munasqanchejpi. Ichá astawan kallpachakusunman hermanosta entiendenapaj chayrí paykunata astawan yanapanapaj. Chantapis ichá kallpachakullasunmantaj wajkunawan allinpi kanapaj chayrí perdonayta yachanapaj. Imapichus astawan kallpachakunanchej kasqanta yachanapajqa, sumaj amigonchejta tapurikusunman (Pro. 27:6).

6. ¿Imatá ruwasunman perdonayta yachanapaj?

⁶ Imapichus ñaupariyta munasqanchejta yachaspaña, chayta juntʼanapaj kallpachakuna. Astawan perdonayta necesitanchej chayqa, chaymanta parlaj yachaqanasta estudiasunman. Chaypajqa allin kanman leerinanchej, tʼukurinanchejtaj Diospa ñaupa tiempo kamachisninpi. Paykunamanta wakenqa tukuy sonqo wajkunata perdonarqanku, wakintaj mana. Jesusmanta parlarina. Payqa tukuy sonqo wajkunata perdonarqa (Luc. 7:47, 48). Jesusqa mana runaspa pantasqasnillankutachu qhawarqa, manaqa sumaj imasta ruwayta atisqankutapis. Jinapis chay tiempomanta fariseosqa “wajkunata pisipaj qhawaj kanku” (Luc. 18:9). Chantapis kay tapuykunapi piensarillasunmantaj: “¿Imatataj wajkunapi qhawani? ¿Allin imasta ruwasqantachu astawan qhawani?”.  Pillatapis mana perdonayta atishanchejchu chayqa, allin imasta ruwashasqanta qhawanapaj kallpachakusunman. Chantá piensarisunman imaynatachus Jesús chay runata qhawasqanpi. ¿Pay perdonanmanchu? Ajinata estudiayqa yanapawasunman yuyayninchejta cambianapaj. Ichá qallariypeqa sonqonchejta nanachiwarqanchej chay runata perdonanapaj mayta kallpachakunanchej kanqa. Jinapis perdonanapaj mayta kallpachakusun chayqa, tiempo pasasqanman jina wajkunata perdonayta atillasun.

7. Proverbios 22:29 nisqanman jina, ¿pikunanejtataj Jehová ashkha imasta ruwashan?

⁷ Kallpachakullasunmantaj sumaj imasta ruwayta yachakunapaj. Betel wasista, Jatun Tantakuna wasista, Tantakuna wasista ima ruwaysikuspa yanapakojkunapi piensarina. Paykunamanta ashkhasqa, experienciayoj hermanoswan trabajaspa sumaj imasta ruwayta yachakorqanku. Fotospi rikunchej jina, hermanospis hermanaspis Jatun Tantakuna wasista, Tantakuna wasista ima allinchayta yachakushanku. Chay jinasmanta Jehová Dioswan Jesuswanqa, chay hermanosnejta ashkha imasta ruwashanku. Imajtinchus Jehová Diosqa ‘wiñaypaj wiñaynintinpaj Rey’, Jesucristotaj “kamachejkunaj Reynin” (1 Tim. 1:17; 6:15; Proverbios 22:29 leey). Chayrayku munanchej sinchʼita trabajayta, imastachus ruwayta yachasqanchejwantaj Jehovata jatunchayta, manataj noqanchej jatunchakuytachu (Juan 8:54).

8. ¿Imatá ruwasunman imapichus astawan ñauparinanchej kasqanta yachanapaj?

⁸ ¿Imapitaj astawan kallpachakusunman? Chayta yachananchejpajqa ancianoswan chayrí ichá congregacionesta waturej hermanowan parlarisunman. Paykunaqa ichá yuyaychariwasun imatachus aswan sumajta ruwayta yachakunanchejta. Parlasqanchejpi, yachachisqanchejpi ima astawan ñauparinata yuyaychariwajtinchejqa, tapurisunman imastachus chaypaj ruwananchejta. Chaymantataj yuyaychawasqanchejman jina ruwanapaj kallpachakuna. ¿Imaynatá chayta ruwasunman?

9. ¿Imatá ruwasunman sumaj yachachejkuna kayta munanchej chay?

⁹ Imapichus ñaupariyta munasqanchejta yachaspaña, chayta juntʼanapaj kallpachakuna. Aswan sumajta yachachiyta munanchej chay, ¿imatá ruwasunman? Sumajta estudiasunman Leellaypuni, yachachillaypunitaj nisqa folletota. Chaupi semana tantakuypi uj asignación kapuwanchej chayqa, ñaupajmantaña uj experienciayoj hermanota nisunman uyarinawanchejta, chayman jinataj yuyaycharinawanchejta. Asignacionesninchejta ñaupajmantaña wakichikojtinchejqa, wajkuna reparanqanku kallpachakusqanchejta, ruwanasninchejtapis sumajta juntʼasqanchejta (Pro. 21:5; 2 Cor. 8:22).

10. ¿Imatá hermano Garrymanta yachakunchej?

¹⁰ Imapichus astawan ñaupariyta munashanchej chayta mana ruwayta atillanchejchu chayqa, ama desanimakunachu. Hermano Garrymanta parlarina. Payqa mana sumajta leeyta atillajchu. Pay nin: “Reunionespi jatunmanta leenay kajtenqa mayta pʼenqakoj kani”, nispa. Jinapis sumajta leenanpaj kallpachakullarqapuni. Chantapis hermanoswan, publicacioneswan yanapachikorqa. Kunanqa pay nin: “Leenaypaj kallpachakusqayrayku reunionespi, jatun tantakuykunapi ima discursosta qoyta atini”, nispa.

11. ¿Imataj Timoteota jina yanapawasun Jehovapaj astawan llankʼanapaj?

¹¹ Bibliaqa mana ninchu Timoteo sumaj discursante chayrí sumaj yachachej kasqanta. Jinapis  Pabloj yuyaychasqanta japʼikorqa. Chayrayku pisimanta pisi sumaj discursanteman, sumaj yachachejmantaj tukorqa, ruwanasnintapis sumajta juntʼarqa (2 Tim. 3:10). Noqanchejpis Timoteo jina kanapaj kallpachakusun chayqa, Jehovaj llajtanpi astawan yanapakuyta atisun.

12. ¿Imaynasmantá hermanos yanapariwarqanchej?

¹² Wajkunata yanapayqa noqanchejtapis yanapallawanchejtaj. Hospitalpi kashajtinchej Comité de Enlace con los Hospitales nisqamanta chayrí Grupo de Visita a Pacientes nisqamanta hermanos visitariwasqanchej, mayta kallpachawanchej. Chantapis agradecekunchej llakiypi kashajtinchej uj munakuyniyoj anciano uyariwasqanchejmanta, sonqochariwasqanchejmanta ima. Mayta agradecekullanchejtaj uj experienciayoj precursor estudionchejman acompañarispa yanapariwasqanchejmanta, yuyaychariwasqanchejmanta ima. Tukuy chay hermanosqa mayta kusikunku wajkunata yanaparispa. Noqanchejpis paykuna jina kusikusunman hermanosninchejta yanaparispa. Imajtinchus Jesús nerqa: “Aswan kusisqa kanchej wajman qorispa, qorichikunamanta nisqaqa”, nispa (Hech. 20:35). Chaykunasta ruwaspa chayrí waj jinasmanta Jehovata astawan sirviyta munanchej chay, ¿imatá ruwasunman?

13. ¿Imajtintaj imapichus ñaupariyta munasqanchej sutʼi kanan tiyan?

¹³ Imapichus astawan ñaupariyta munasqanchejqa sutʼi kanan tiyan. Ichá nisunman: “Congregacionpi astawan yanapakuyta munayman”, nispa. Ajinata nispaqa mana yachayta atillasunmanchu imapichus astawan yanapakuyta munasqanchejta, nillataj yachayta atisunmanchu yanapakushasqanchejtañachus manachus. Chayrayku imapichus ñaupariyta munasqanchejta sutʼita yachananchej tiyan. Allin kanman anotakunanchej imapichus ñaupariyta munasqanchejta, imaynatatajchus chayta ruwananchejtapis.

14. Imapichus ñaupariyta munasqanchejta mana juntʼayta atispa, ¿imajtintaj mana llakikunachu tiyan?

¹⁴ Imapichus ñaupariyta munasqanchejta mana munasqanchejman jinapunichu juntʼaspaqa, ama llakikunachu. Imajtinchus kausayninchejpeqa imaspis pasanqapuni. Apóstol Pablomanta parlarina. Payqa Tesalónica llajtapi uj mosoj congregacionta rikhuricherqa.  Maytatajchá munarqa chay congregacionpi qhepakuyta, mosoj cristianostapis yanapariyta. Jinapis Pabloqa enemigosnin payman churanakusqankurayku chay llajtamanta ayqekorqa (Hech. 17:1-5, 10). Pablo chay llajtapi qhepakunman karqa chayqa, hermanostawan llakiypi rikhurichinman karqa. Pabloqa, ajina llakiypi rikukuspapis hermanosta yanapallarqapuni. Aswan qhepamantaj Timoteota kacharqa Tesalonicapi mosoj hermanosta yanapananpaj (1 Tes. 3:1-3). Tesalonicamanta hermanosqa Timoteo paykunata yanaparej risqanmanta maytachá agradecekorqanku.

15. ¿Imajtintaj imapichus kallpachakuyta munashasqanchejta mana juntʼayta atillasunmanchu? Sutʼinchariy.

¹⁵ Pablo Tesalónica llajtapi imapichus rikukusqanmanta mayta yachakusunman. Ichá imapi ñauparinapajpis mayta kallpachakushanchej. Jinapis kausayninchejpi cambios kasqanrayku mana atillanchejchu (Ecl. 9:11). Ajinapi rikukushanchej chayqa, atisqanchejman jina waj imasta ruwanapaj kallpachakuna. Hermanosninchej Tedwan Hiediwan ajinata ruwarqanku. Paykunaqa Betelmanta riporqanku paykunamanta ujninku onqoykusqanrayku. Jinapis Jehovata munakusqankurayku, waj jinasmantañataj payta sirviyta maskʼarqanku. Ñaupajtaqa precursores regulares kayta qallarerqanku. Aswan qhepamantaj precursores especiales karqanku. Tedtaj wakin kutis congregacionesta waturispa yanapakorqa. Jinallapi Diospa llajtanpi cambios karqa. Chayraykutaj edadninkurayku niña aterqankuchu congregacionesta waturispa yanapakuyta. Chaymanta llakikuspapis repararqanku Jehovata waj jinasmanta sirviyta atisqankuta. Ted nin: “Yachakorqayku Jehovataqa tukuy imaynamanta sirviyta atisqaykuta”, nispa.

16. ¿Imatá yachakunchej Gálatas 6:4 versiculomanta?

¹⁶ Kausayninchejpi imaschus pasanantaqa mana ajllayta atinchejchu. Chayrayku ama yuyanachu Jehovaqa asignacionesninchejraykulla allinpaj qhawawasqanchejta. Nitaj kikinchakunachu imaynatachus waj hermanos Jehovata sirvishasqankuwan. Hiedi nin: “Wajkunawan kikinchakuspaqa mana kusisqachu kanchej”, nispa (Gálatas 6:4 leey). Chayrayku allin kanman kallpachakunanchej hermanosninchejta waj jinasmanta yanapanapaj, Jehovatapis waj jinasmanta sirvinapaj. b

17. Jehovapaj astawan llankʼayta munanchej chay, ¿imatá ruwasunman?

¹⁷ Kapuwasqallanchejwan kausakusun, nitaj qhasi manakajta manuchakusunchu chayqa, astawan Jehovaj llajtanpi yanapakunanchejpaj tiemponchej kallanqa. Kunan kallpachakuna imaspichus ñaupariyta munanchej chayta  juntʼananchejpaj. Ajinamanta imastachus aswan qhepaman ruwayta munasqanchejtapis juntʼayta atillasun. Por ejemplo, precursor regular kayta munanchej chayqa, kunan precursor auxiliar kanapaj kallpachakusunman. Siervos ministeriales kayta munanchej chayrí, ¿imatá ruwasunman? Kallpachakusunman astawan predicanapaj, congregacionmanta kuraj hermanitosta, onqosqastapis visitarinapaj. Imastachus kunan ruwasqanchejqa, yanapawasun aswan qhepaman waj asignacionesta japʼinapaj. Chayrayku mayta kallpachakuna Jehovapaj tukuy atisqanchejta imatapis ruwanapaj (Rom. 12:11).

18. ¿Imatá hermana Beverleymanta yachakunchej?

¹⁸ Mayorcitosña kaspapis, Diospa llajtanpi astawan ñauparinapaj kallpachakullasunmanpuni. Qhawarina imatachus hermana Beverley ruwasqanta. Payqa 75 watasniyojña. Onqosqeta kasqanraykutaj mana allinta purikuyta atejchu. Jinapis Jesuspa Wañuyninta Yuyarinapaj tantakuyman, maytapuni runasta wajyariyta munarqa. Chayrayku imaynasmantachus runasta wajyarinanpaj sutʼita yuyaychakorqa. Chayman jina ruwaspataj mayta kusikorqa. Chay hermana mayta kallpachakusqanqa, waj hermanostapis yanapallarqataj Jehovapaj astawan ruwanankupaj. Jehovaqa kuraj hermanitos paypaj tukuy atisqankuta llankʼasqankuta, may allinpaj qhawan (Sal. 71:17, 18).

19. ¿Imastataj ruwasunman astawan ñauparinapaj?

¹⁹ Yachakunchej jina, imaspichus ñaupariyta munasqanchejta sutʼita ajllana. Sumaj cristianos kanapaj kallpachakuna, ajinamanta Jehová Diosta kusichisun. Sumaj imasta ruwayta yachakunallapuni Jehovaj llajtanpi astawan yanapakunapaj. Hermanosninchejtapis imaynallamantapis astawan yanaparina. c Chayta ruwajtinchejqa Jehová bendeciwasun, hermanostaj Timoteopi jina sutʼita reparanqanku ñauparishasqanchejta (1 Tim. 4:15).