1. ¿Imacunataraj rurashwan Jehovata más sirvinanchipaj?

 RASUNPA caj cristianucunaga Jehovata cuyashpanchimi calpachacunchi payta más sirvinapaj. Chaycunata logranapäga caycunatarämi rurashwan: más ali cristianuman ticrashwan, imalatapis shumaj yachacushwan y hermanunchicunatapis yanapänapaj camäpacushwan.

2. ¿Imanirtaj ali cristianuman ticranapäga calpachacushwanraj?

² ¿Imanirtaj ali cristianuman ticrananchipaj calpachacushwan? Taytalanchi Jehová chasquicalämänanchitami munanchi y payga alapami cushicun imaycanopapis payta sirviptinchi. Jinamanpis ali cristianuman ticrayta munanchi hermanunchicunata más yanapänapaj (1Tes. 4:9, 10). Unaypitana Jehovata sirviycarpis lapanchi calpachacunanchi ali cristianuman ticranapaj. Ricärishun imanopataj chayta rurashwan.

3. ¿Imatataj Pablo consejargan Timoteuta? (1 Timoteo 4:12-16).

³ Pabluga Timoteuta punta caj cartanta guelgapaptin, Timoteo mozula caycarpis ancianunona yanapacuycargan. Chayno captinpis Pabluga nergan más ali cristianuman ticrananpaj (leiriy 1 Timoteo 4:12-16). Pablo nishgancunawanga Timoteuta yanapaycargan caycunata rurananpaj: más ali cristianuman ticrananpaj, yäracoj car y juchacunamanpis  mana ishquir; y cristiano masincunata Diospita shumaj yachachinanpaj y aconsejananpäpis yanapargan. Canan yachacushun imatataj rurashwan Timoteuno más ali cristianuman ticranapaj y espiritual cajcho maslata rurananchipaj.

4. Filipenses 2:19-22 nishganno, Timoteo ali shongu cashpan, ¿imatataj paywan rurargan Jehová?

⁴ Ali cristiano captinchi Timoteuga Jehovapa shongunpäno runa cargan (leiriy Filipenses 2:19-22). Timoteupita Pablo nergan ñampu shongu, Diospa cajcho ali aroj y yäracuypaj runa cashganta. Cristiano masincunatapis shongupita cuyapargan. Chaymi Pabluga Timoteuta cuyargan y imata rurananpäpis payman yäracurgan (1 Cor. 4:17). Noganchitapis Jehová cuyamäshun imatapis shongunpäno ruraptinchi y congregaciunchopis más yanapacuyta puedishun (Sal. 25:9; 138:6).

5. 1) ¿Imatataj rurashwan imalachopis mejorananchipaj captenga? 2) Fotucho ricashganchi cristianaga, ¿imata ruraycan más cuyacoj cananpaj?

⁵ Imano cananchipäpis yarpachacushun. Jehovata mañacushun cawayninchicho imalachopis mejorananchipaj. Alichi canman cayno yarpachacuptinchi ‘capazchi más cuyapäcoj y más yanapacoj cäman y pï maywanpis jaucala cawacunäpäga shongupita perdunacoj canäpaj pishiycäman’ nir. Jina, cuyashganchi amigunchicunata ‘¿imalachotaj mejorarcöman?’ nir tapucushwan (Prov. 27:6).

6. ¿Imatataj rurashwan imalachopis mejoranapaj captenga?

⁶ Imalachopis mejoranapaj calpachacushun. Imano mejoranapäga publicaciunninchicunacho yanapacuyta ashishun. ¿Shongupitachu perdunayta munanchi? Alimi. Chaypäga Biblia wilacämushgancunaman yarpachacuy, pïcunataj shongupita perdunacoj cargan y pïcunataj mana. Jesusga pï maytapis shongupita perdunargan (Luc. 7:47, 48). Payga waquincuna ali rurashgan cajcunatami valuraj. Fariseucunami ichanga runacunata “manacajman churaj” (Luc. 18:9). ¿Imata más ruranquiman? Caycunaman yarpachacuy: “¿Imanotaj waquincunata ricä? ¿Ali rurashgancunalamanchu yarpachacö?”. Öraga  perdunanapaj sasa captenga alichi canman ali rurashgancunalaman yarparcur guelgaycuptinchi, nircur tapucushun: “¿Jesusga perdunaycunmanchuraj?”. Cay rurashganchicunaga yanapämäshun shumaj yarpachacunapaj. Pilapis ofendimaptinchi jucla perdunanapäga sasachi canman, pero calpachacuptinchega perdunacoj cristianumanmi ticrashun.

7. ¿Imanopataj Jehová utilizan imacunalachopis aroj yachajcunata? (Proverbios 22:29).

⁷ Yarpachacushwanmi ima aruycunalachopis yanapacunapaj. Achca hermanunchicunami yanapacun sucursalcunata, jatun localcunata y Diospa wasinta sharcachiycho. Chaychomi paycunaga ima ruraytapis yachacush experienciayoj hermanunchicunapita. Fotucho ricashganchino waugui paninchicuna yanapacurcaycan Asambleanchipa Localcunata y Diospa wasintapis alchacänanpaj. Jehová, “imayyaqpis kawaq” Rey; y Jesús, lapan ‘mandaqkunapa mandaqnin’, ishcancuna sirvejnincuna imacunata rurananpäpis yanaparcaycan (1 Tim. 1:17; 6:15; leiriy Proverbios 22:29). Noganchipis imayca arushganchiwan yanapacuyta munanchi Jehovata alabanapaj (Juan 8:54).

8. ¿Imataj yanapämäshun imalachopis maslata yachacurcunapaj?

⁸ Imata rurashwan imalatapis más yachacunapaj. Ancianunchicunata y watucamoj hermanunchitapis tapupashwan: ‘¿imacunachotaj mejoräman?’ nir. Y paycuna ali yachachicoj canapaj consejamaptinchega, calpachacushwan nimashganchi cajcho mejoranapaj. ¿Imanopataj chayta rurashwan?

9. ¿Imatataj rurashwan más ali yachachicoj canapaj?

⁹ Calpachacushun yarpashganchicunata ruranapaj. Más ali yachachicoj cayta munarga Seamos mejores lectores y maestros nishgan folletuta estudiashwan. Pulan semana reuniunninchipaj ima asignaciunninchi captenga, más ali yachachicoj hermanunchita yanapämänanchipaj nishwan. Y asignaciunninchita tiempuwan preparacurga más ali yachachicojmanmi ticrashun, waquincunapa ricayninchopis yäracuypaj cashun (Prov. 21:5; 2 Cor. 8:22).

10. ¿Imata rurashwan imalatapis yachacunapaj sasa captenga? Garry wauguinchi pasashganpita wilacaramuy.

¹⁰ ¿Imatataj rurashwan imalatapis yachacunapaj sasa captenga? ¡Jinala calpachacuy! Garry hermanunchi pasashganpita yachacushun. Reuniuncunacho leinanpäga sasashi cargan y chayraycur alapashi manchacurgan. Y alapa sasa captinpis payga jinalashi calpachacurgan. Hermanunchicuna y publicaciunninchicunapis yanaparganshi. Cananga reuniuncunacho y jatun asambleacunachopis ali discursamun.

11. ¿Imaraj yanapämäshun Timoteuno más cargucunata chasquinapaj?

¹¹ ¿Timoteuga ticrarganchuraj ali yachachicojman? Biblia mana wilacuptinpis musyanchimi Pablupa consejuncunata cäsucushganpita. Ichiclapa ichiclapa más ali yachachicojmanmi ticrargan, ima cargucunachopis alichi yanapacurgan (2 Tim. 3:10). Timoteunopis más ali yachachicojman ticraptinchega ima cargucunatapis chasquishunmi.

12. ¿Hermanunchicuna imanotaj gamta yanapäshushcanqui?

¹² ¡Waquincuna yanapämaptinchega cushicunchimi! Hospitalcho gueshyar caycaptinchi Comité de Enlace nishgan hermanunchicuna visitamaptinchega alapa cushicunchi. Cawayninchicho sasacunapa pasaptinchega alapa cushicunchi ancianucuna tiempunta camarcachir shacyächimänanchipaj visitamaptinchi. Pilatapis Bibliapita yachachinapaj sasa captenga cushicuypämi precursorcuna yanapämaptinchi y imalachopis mejoranapaj nimaptinchi. Jesús nergan: “Imatapis chaskir kushikushqantsipitapis mas kushikuypaqmi kaykan pitapis yanapashqantsi” (Hech. 20:35). Y noganchipis y hermanunchicunapis chaynola juccunata yanaparga cushicurcushunmi. Jehovapa cajcho imaycunanopapis yanapacunapäga, ¿imaraj yanapämäshun?

13. Imatapis ruranapäga, ¿imataraj yarpashwan?

¹³ Lapantaraj ruranayquipaj ama yarpaychu. Capazchi “congregaciuncho más yanapacuyta munä” ninquiman. Chayga alimi, pero imano chayta rurayta mana musyarga rasun cajchoga imatapis mana ruranquichu. Chauraga alichi canman ‘naupataga imatarätaj ruräman’ nir yarpachacuptiqui y ruranayquipaj cajcunata anotacurcuptiquipis.

14. ¿Imanirtaj öraga imapis munashganchino yargunchu?

¹⁴ Ama yarpaychu imapis munashgayquino ruracänanpaj cajtaga. Öraga mana yarpashganchicunapis pasanmanmi. Pablupis Tesalonicacho juc congregación ruracänanpaj yanapacurgan, payga chaycho quedacuytachi munargan hermanuncunata yanapänanpaj. Pero chiquejnincunaraycur chaypita gueshpir aywacurgan (Hech. 17:1-5, 10). Mana chayta rurarga waquin hermanuncunatachi peligruman churanman cargan. Chayno captinpis Pabluga jinalami munaycargan hermanuncunata yanapayta y Timoteuta mandargan chaycho mushoj cristianucunata shacyächinanpaj (1 Tes. 3:1-3). Tesalonicacho  hermanucunaga alapachi cushicurgan Timoteuta imano yanapashganta ricar.

15. Yarpashganchino imapis mana ruracaptenga, ¿imaraj pasanman? Ted y Hiedi hermanunchicunapita wilacaramuy.

¹⁵ ¿Imata yachacushwan Pabluta Tesalonicacho pasashganpita? Noganchipis Jehovapa cajcho yanapacunapaj calpachacuycashwan, pero ilajpita imapis pasanman y yarpashganchino imatapis rurayta puedinchinachu (Ecl. 9:11). Chayno captenga puedishganchilaman yanapacunapaj yarpashun. Ted y Hiedi hermanunchicuna chaypa pasargan. Gueshyashganraycur Betelta jaguiripäcurgan. Pero Jehovata cuyashpanmi imaycanopapis sirviyta munargan. Puntataga precursor regularno yanapacärergan, nircur precursor especial capäcurgan Ted wauguinchitapis capacitargan congregaciunta watucojpa yanapajnin cananpaj. Pero chayno yanapacuytaga puedirgannachu edayashganraycur. Chay cargucho manana yanapacurga laquicärerganshi. Chayno captinpis jinalashi Jehovataga sirvipäcurgan. Ted cayno nin: “Yachacärishcä Jehovapaj arunapäga imayca ruranapaj cashganta”.

16. ¿Imata yachacunchi Gálatas 6:4 textupita?

¹⁶ Cawayninchicho ilajpitami imapis pasanman. Ima carguta mana charaptinchipis Jehovaga cuyaycalämanchimi, chaytaga ama gongashunchu. Jinamanpis waquincuna rurashganwanga ama tincuchicushunchu. Paninchi Hiedi cayno nin: “Cawayninchita waquinpa cawayninwan tincuchiptinchega laquicuycarlami caycäshun” (leiriy Gálatas 6:4). Chaymi más ali canga imanopapis mana uticaypa Jehovata sirviptinchi y waquincunata yanapaycar caycaptinchi. b

17. ¿Imatataj ruranquiman imalachopis masraj yanapacuyta munarga?

¹⁷ Charashgalayquiwan cawar y jagaman mana yaycurga tiempuyquita camacächinqui Jehovapa cajcho imalachopis masta yanapacunayquipaj. Cananpitana imatapis ruranayquipaj cajman yarpachacuy y tiempuwan maslata yanapacunayquipäpis. Chayga canman precursor regularno yanapacunayquipaj, pero puntataga precursor auxiliarno yanapacunquiman. O siervo ministerial cayta munarga, alichi canman  congregaciunniquicho edayashga y gueshyaycaj hermanunchicunata watucamunayquipaj calpachacuptiqui. Chayno mana uticaypa arurga listo caycanqui masta yanapacunayquipaj. Chauraga alimi canga imaycata rurar shongupita Jehovata sirviptiqui (Rom. 12:11).

18. ¿Beverley hermananchipita imata yachacunchi? (Fotupitapis parlacaramuy).

¹⁸ Edayashgana caycarpis yarpashwanmi imacunalachopis maslata yanapacunapaj. 75 watayoj Beverley paninchipita parlarcushun. Payga gueshyashganraycurshi japayta puedirgannachu. Pero alapa yanapacuyta munargan Conmemoraciunpaj achca runacunata invitananpaj. Chayta imano rurananpa cajman yarpachacurgan y rurashganpita cushicuycurgan. Pay imano calpachacushganta ricaycurga waquincunapis predicaciuncho más yanapacurgan. Jehovaga edayashga hermanunchita cuyayculanmi payta sirvinanpaj calpachacushganta ricar (Sal. 71:17, 18).

19. Ali cristianuman ticranapäga, ¿imacunatataj rurashwan?

¹⁹ Imaycata rurananchipaj captenga puedishgalanchita rurananchipaj y ali cristianuman ticrananchipaj calpachacushun. Ima aruycunalatapis yachacushun Jehovapa marcancho más yanapacunapaj. Yarpäshun imacunalachopis hermanunchicunata yanapänapaj. c Cay lapancunata ruraptinchega Jehová bendicimäshunmi. Timoteunopis ali cristianuman ticrashganchega ricacangami (1 Tim. 4:15).