1. ¿Imakunatan ruwasunman Diosta aswan allinta servinanchispaq?

 CRISTIANOKUNAQA anchatan Jehová Diosta munakunchis, chaymi paytaqa aswan allinta serviyta munanchis. Chaypaqmi ichaqa kallpachakunanchis allin cristiano kananchispaq, allin yachachiq kananchispaq, juj ruwaykunata yachananchispaq, iñiqmasinchiskunatapas astawan yanapananchispaq. b

2. ¿Imanaqtinmi kallpachakunanchis aswan allinta Jehová Diosta servinanchispaq?

² ¿Imanaqtinmi kallpachakunanchis aswan allinta Jehová Diosta servinanchispaq? Jehová Diosta kusichiyta munasqanchisraykun. Jehová Diosqa anchatan kusikun atisqanchisman jina payta serviqtinchis, hermanonchiskunatapas yanapaqtinchis. Chayraykun kallpachakunanchis iñiyninchispi astawan wiñarinanchispaq (1 Tes. 4:9, 10). Chayllaraq otaq unayña Jehová Diosta servishanchis chaypas llapanchismi kallpachakunanchis iñiyninchispi wiñarishanallanchispaq. ¿Imakunata ruwaymi chaypaq yanapawasunman? Chaymantan kaypi yachasun.

3. 1 Timoteo 4:12-16 nisqan jina, ¿imakunapi kallpachakunanpaqmi apóstol Pablo Timoteota yuyaycharan?

³ Timoteoqa waynallaraqmi karan apóstol Pablo ñaupaq kaq cartanta qelqashaqtinqa, chaywanpas payqa umalliqñan karan. Chhaynaña kaqtinpas Pabloqa Timoteotan kallpacharan aswan allinta Diosta servinanpaq (leey 1 Timoteo 4:12-16). Apóstol Pabloqa Timoteotan kallpacharan aswan munakuq, allin iñiyniyoq, ch’uya kausayniyoq kananpaq. Chaymantapas kallpacharanmi allin leeq, allin yachachiq, allin yuyaychaq kananpaq. Kaypin Timoteomanta yachasunchis. Paymanta yachaymi yanapawasun  Diospa llaqtanpi astawan yanapakunanchispaq.

4. Filipenses 2:19-22 nisqan jina, ¿imanaqtinmi Timoteo Diospa llaqtanpi allinta yanapakuran?

⁴ Timoteoqa kallpachakuranmi allin cristiano kananpaq, chaymi Diospa llaqtanpi allinta yanapakuran (leey Filipenses 2:19-22). Apóstol Pabloq nisqan jina Timoteoqa k’umuykukuq, junt’aq sonqo, allin llank’aq, confianapaq jinan karan, allintataqmi iñiqmasikunatapas yanaparan. Chaymi Pabloqa Timoteota munakuran, jinaspapas mana iskayaspan sasa llank’anakunata payman qoran (1 Cor. 4:17). Sichus noqanchispas kallpachasun Timoteo jina allin cristiano kananchispaq chayqa astawanmi Diosqa munakuwasun, llaqtanpipas astawanmi yanapakusun (Sal. 25:9; 138:6).

5. a) ¿Imatan ruwasunman imapichus kallpachakunanchisraq kasqanta reparakunanchispaq? b) Fotopi rikusqanchis jina, ¿imatan hermananchis ruwashan aswan khuyapayakuq kananpaq?

⁵ Qhawariy imapichus kallpachakunaykiraq kashan chayta. Jehová Diosmantan mañakunanchis imakunapichus kallpachakunanchisraq kashan chayta reparachiwananchispaq. Wakinninchisqa yaqapaschá kallpachakunanchisraq kashan aswan khuyapayakuq kananchispaq, hermanonchiskunata yanapananchispaq, thajpi jujkunawan kausananchispaq, perdonakuq kananchispaq ima. Mayninpin ichaqa mana reparakusunmanchu imapichus kallpachakunanchisraq kashan chayta, chhayna kaqtinqa juj allin amigonchistan tapurikusunman imakunapichus kallpachakunanchisraq kashan chayta niwananchispaq (Prov. 27:6).

6. ¿Iman yanapawasunman hermanonchiskunata perdonananchispaq?

⁶ Kallpachakuy imapichus allinyayta munashanki chayta ruwanaykipaq. Chaypaqqa qelqanchiskunata estudiaymi yanapasunki allin cristiano kanaykipaq. Wakinninchispaqqa yaqapaschá sasa kanman jujkunata perdonay, chhayna kaqtinqa ñaupa tiempopi runamasinkuta perdonaq Dios sonqo runakunamanta yachaymi yanapawasunman. Paykunamanta jujninmi karan Jesús, payqa liston kasharan jujkunata perdonananpaq (Luc. 7:47, 48). Jesusqa manan jujkunaq mana allin ruwasqankutachu qhawaran, aswanpas allinkuna ruwasqankutan astawanqa qhawaran. Fariseokunan ichaqa mana chhaynachu karanku, paykunaqa “jujkunatan mana imapaq valeqta jina qhawariqku” (Luc. 18:9). Perdonayta yachaq Dios sonqo runakunamanta estudiashaspan tapukusunman: “¿Imatan jujkunapi astawan rikuni? ¿Allin ruwasqankutachu icha mana allin ruwasqankutachu?”, nispa. Sichus  mana atishanchischu juj hermanonchista perdonayta chayqa imakunatachus allinta ruwan chaykunapin piensananchis, jinaspa tapukunanchis: “¿Imaynatan Jesús payta rikushanman? ¿Perdonanmanchu?”, nispa. Chayta ruwaymi yanapawasun piensasqanchista cambiananchispaq. Qallariypiqa sasapaschá kanqa sonqonchista k’iriwaqninchis hermanonchista perdonayqa, ichaqa kallpachakuspaqa atillasunmi perdonayta.

7. Proverbios 22:29 nisqan jina, ¿imakunata ruwaspan wakin hermanonchiskuna Diospa llaqtanpi yanapakushanku?

⁷ Chaymantapas kallpachakusunmanmi mosoq ruwaykunata yachananchispaq. Yachasun sucursalkunata juñunakunanchis wasikunata jatarichiypi allichaypi yanapakuq hermanonchiskunamanta. Paykunaqa allin experienciayoq hermanonchiskunawan llank’aspan chay ruwaykunata yacharanku. Fotopi rikusqanchis jina, askha iñiqmasikunan yachashanku juñunakunanchis wasikunata allichayta. Paykunawanmi “Wiñay-wiñay rey” Jehová Diospas “reykunaq reynin” Jesuspas kay tiempopi imaymanata ruwachishanku (1 Tim. 1:17; 6:15; leey Proverbios 22:29). Noqanchispas paykuna jinan kallpachakunanchis imachus ruway atisqanchiswan Jehová Diosta jatunchananchispaq (Juan 8:54).

8. ¿Imatan ruwananchis imapichus kallpachakunanchisraq kashan chayta yachananchispaq?

⁸ Qhawariy imapichus kallpachakunaykiraq kashan chayta. Chaypaqqa yaqapaschá tapukusunman umalliqkunata otaq watukuq umalliqtapas imapichus kallpachakunanchisraq kashan chayta willawananchispaq. Chayta tapukuqtinchisqa yaqapaschá niwasun: “Kallpachakuy ñaupaqmanta allinta rimamunaykipaq otaq Diosmanta allinta willanaykipaq”, nispa. Chayta niwaqtinchisqa kallpachakunanchismi yuyaychawasqanchisman jina imatapas ruwananchispaq.

9. ¿Imakunatan ruwanayki allin yachachiq kanaykipaq?

⁹ Kallpachakuy imapichus allinyayta munashanki chayta ruwanaykipaq. Yaqapaschá munashanki allin yachachiq kayta. Chaypaqqa allintan estudianayki Allin leeq allin yachachiq kasun folletota. Chaymantapas sichus chaupi semana juñunakuypi yachachimunki chayqa juj umalliqtan valekuwaq imayna yachachisqaykita uyarinasuykipaq. Chaytaqa manaraq ñaupaqmanta yachachimushaspan ruwanayki, chhaynapin umalliqqa nisunki imapichus allinyanaykiraq kashan chayta. Sichus ñaupaqmantapacha preparakunki chayqa allintan yachachinki. Chaymantapas jujkunan reparanqaku allin llank’aq kasqaykita confianapaq jina kasqaykitapas (Prov. 21:5; 2 Cor. 8:22).

10. ¿Imatan Garry hermanonchis jina ruwananchis?

¹⁰ Yaqapaschá wakinninchispaqqa wakin ruwaykuna sasa kanman. Chhaynaña kaqtinpas manan pisipananchischu. Garry hermanonchismanta yachasun. Payqa manan allintachu leeq, chaymi manchakuq juñunakuykunapi leeyta. Ichaqa manan pisiparanchu, aswanpas kallpachakuranmi pisi-pisimanta aswan allinta leenanpaq. Chaymantapas juj hermanonchiskunaq wakin qelqanchiskunaq nisqantan kasukuran, chaymi yanaparan allin yachachiq kananpaq. Kunanqa allintan juñunakuykunapipas asambleakunapipas yachachin.

11. ¿Imatan ruwananchis Diospa llaqtanpi Timoteo jina allinta yanapakunanchispaq?

¹¹ ¿Allin yachachiqchu Timoteo karan? Bibliaqa manan willanchu, ichaqa Timoteoqa kallpachakuranmi Pabloq yuyaychasqanman jina imatapas ruwananpaq. Chaymi yanaparan iñiq t’aqapi imachus ruwanankunata allinta junt’ananpaq (2 Tim. 3:10). Sichus Diospa llaqtanpi ima ruwaypipas yanapakuyta munashanchis chayqa Timoteo jinan jujkunaq yuyaychawasqanchista kasukunanchis. Chaymi yanapawasun allinta yanapakunanchispaq.

12. ¿Imaynatan juj iñiqmasikuna yanaparasunkiku?

¹² Iñiqmasinchiskunaqa imaymanamantan yanapawanchis. Wakinninchisqa yaqapaschá hospitalpi onqosqa kasharanchis, jinaspa umalliqkuna visitamuwaranchis kallpachawananchispaq otaq hospitalkunapi rimaq umalliqkuna visitamuwaranchis doctorkunawan rimanankupaq. Chhayna llakipi tarikushaspaqa anchatan kusikunchis umalliqkuna kallpachawaqtinchis. Chaymantapas wakin experienciayoq hermanonchiskunaqa yanapawanchismi aswan allinta runakunaman yachachinanchispaq. Chaymi paykunaq yanapayninta mañakunanchis, yuyaychawasqanchistapas kasukunanchis. Chay iñiqmasikunaqa anchatan kusikunku chaykunata ruwaspa. Chaymi Jesuspas niran: “Qoypin aswan kusikuyqa kan, manan chaskiypichu”, nispa (Hech. 20:35). Sichus noqanchispas kallpachakusunchis juj iñiqmasinchiskunata yanapananchispaq chayqa kusisqan kasunchis. Chhaynaqa, ¿imatan ruwasunman Jehová Diosta astawan servinanchispaq?

13. ¿Imatan ruwananchis ima ruwaypipas allinta yanapakunanchispaq?

¹³ Diospa llaqtanpi ima ruwaypipas allinta yanapakunanchispaqqa juj ruwayllamanmi yuyayninchista churananchis. Mayninpiqa yaqapaschá nisunman: “Noqaqa imaymanapin yanapakuyta munani”, nispa. Munasunmanña chaypas manan atisunmanchu llapa ruwaykunapi allinta yanapakuytaqa. Llapanpi yanapakuyta munaspaqa manapaschá yachasunmanchu mayqentaraq ruwayta, otaq mana reparasunmanchu allintachus yanapakushanchis icha manachus chayta. Chhaynaqa juj ruwayllapi allinta yanapakunanchispaqmi yuyaykunanchis. Chaypaqqa qelqasunmanmi imakunatachus ruwasunman chay yuyaykusqanchista junt’ananchispaq chayta.

14. ¿Imaraykun apóstol Pablo jina allin yuyaywan qhawarinanchis imapichus yanapakuyta munashanchis chayta?

¹⁴ Noqanchisqa manan atisunmanchu tukuy imachus pasawasqanchista controlaytaqa. Chaymi allin yuyaywan qhawarinanchis imakunatachus ruwayta munanchis chayta. Yachasun apóstol Pablomanta. Payqa allintan yanapakuran Tesalónica llaqtapi iñiq t’aqa kananpaq. Payqa munaranchá chay llaqtapi juj tiempo qhepakuyta, chhaynapi mosoq cristianokunata allinta yanapananpaq. Ichaqa enemigonkuna qatiykachasqankuraykun chaypi cristianokunaqa Pablota juj llaqtaman kachapuranku (Hech. 17:1-5, 10). Sichus chay llaqtapi  qhepakunman karan chayqa chaypi tiyaq cristianokunatan sasachakuykunaman churanman karan. Manaña apóstol Pablo chay llaqtapi qhepakuyta atiranchu chaypas qhepamanmi Timoteota chay llaqtaman kacharan hermanokunata iñiyninkupi yanapananpaq (1 Tes. 3:1-3). Tesalónica llaqtamanta iñiqmasikunaqa anchatachá kusikuranku Timoteo paykunata yanapananpaq kallpachakusqanta rikuspaqa.

15. ¿Imatan ruwasunman juj casarasqa iñiqmasinchiskuna jina ima sasachakuypipas qonqaylla tarikuspa?

¹⁵ Yaqapaschá noqanchispas Diospa llaqtanpi juj ruwaypi yanapakunanchispaq kallpachakushanchis. Ichaqa apóstol Pablo jinan qonqaylla ima sasachakuypipas tarikusunman, jinaspa manaña yanapakuyta atisunmanchu (Ecl. 9:11). Chhaynapi tarikuspaqa imachus ruway atisqanchispin piensananchis. Chaytan ruwaranku Ted hermanonchis Hiedi esposanpiwan. Paykunaqa onqopusqankuraykun Betelmanta lloqsipuranku. Ichaqa Jehová Diosta munakusqankuraykun imachus ruway atisqankupi yanapakunankupaq kallpachakuranku. Chaymi paykunaqa precursor regular kapuranku, tiempowantaq precursor especial karanku. Chaymantapas Ted hermanonchistan capacitaranku watukuq umalliq jina mayninpi yanapakunanpaq. Ichaqa chayllamanmi Diospa llaqtanpi willakuran kuraq iñiqmasikunaqa manaña watukuq umalliq kanankupaq, chaymi paykunaqa manaña chay llank’aypi yanapakuyta atirankuchu. Chayta yachaspa llakikurankuña chaypas yacharankun juj ruwaykunapi yanapakuyta atisqankuta. Hermanonchis Tedmi nin: “Noqaykuqa yacharaykun Diospa llaqtanpiqa juj ruwaykunapi yanapakuyta atisqaykuta”, nispa.

16. ¿Imatan yachasunman Gálatas 6:4 textopi nisqanmanta?

¹⁶ Vidanchispi imakunachus pasawasqanchistaqa manan llapantaqa controlayta atisunmanchu. Jehová Diosqa manan llaqtanpi juj llank’aypi yanapakusqanchisraykuchu astawanqa munakuwanchis. Chayraykun mana ninanchischu: “Noqaqa manan kay hermano jinachu Diospa llaqtanpiqa yanapakushani”, nispaqa. Jehová Diosqa llapa serviqninkunatan munakuwanchis. Hiedi hermananchismi nin: “Sichus imachus ruwasqanchista juj iñiqmasikunaq ruwasqanwan comparasun chayqa manan kusisqachu Jehová Diosta servisun”, nispa (leey Gálatas 6:4). Chaymi sapankanchis allinta qhawarinanchis imaynatas Jehová Diosta astawan servisunman chayta. c

17. ¿Imatan ruwanayki Diospa llaqtanpi astawan yanapakunaykipaq?

¹⁷ Sichus imachus kapuwaqnillanchiswan kausasunchis manataq yanqapas qasi qolqeta manukusunchu chayqa astawanmi Diospa llaqtanpi yanapakusun. Chay jinaqa kallpachakuy juch’uy ruwaykunata allinta ruwanaykipaq,  chaykunan yanapasunki jatun ruwaykunapi yanapakunaykipaq. Rimasun precursor regular kaymanta, yaqapaschá precursor regular kanaykipaqqa ñaupaqta juj tiempo precursor auxiliar kawaq. Chaymantapas yanapakuq kamachi kanaykipaqqa tiempoykitan t’aqanayki Diosmanta astawan willanaykipaq, kuraq iñiqmasikunata, onqosqa iñiqmasikunatapas yanapanaykipaq. Chaykunata ruwayqa yanapasunkin qhepaman Diospaq llaqtanpi astawan yanapakunaykipaq. Chay jinaqa llapallanchismi kallpachakunanchis Diospa llaqtanpi ima ruway atisqanchispi allinta yanapakunanchispaq (Rom. 12:11).

18. ¿Imatan yachasunman Beverley hermananchismanta? (Kay parrafopaq fotota qhaway).

¹⁸ Kuraqña kaspapas atisunmanmi Diospa llaqtanpi yanapakuytaqa. Yachasun Beverley hermananchismanta, payqa 75 watanpin kashan. Hermananchisqa onqoyniyoq kasqanraykun mana puriyta atinchu. Chaywanpas hermananchisqa munaranmi Jesuspa wañupusqanta yuyarina killapi Diosmanta astawan willayta. Chhaynaqa, ¿imatan ruwaran? Hermananchisqa atisqanman jina chay killapi yanapakunanpaqmi kallpachakuran. Chayta ruwaspan payqa kusisqa Jehová Diosta serviran. Chhayna kallpachakusqanta rikuspan juj iñiqmasikunapas kallpachakuranku Diosmanta astawan willanankupaq. Jehová Diosqa anchatan kusikun kuraq hermanonchiskuna onqosqaña kashaspapas atisqankuman jina payta servisqankuta rikuspa (Sal. 71:17, 18).

19. ¿Imakunatan ruwasunman Diospa llaqtanpi astawan yanapakunanchispaq?

¹⁹ Chay jinaqa imakunatachus ruwayta atisunman chaykunatan allinta qhawarinanchis. Chaymantapas kallpachakunanchismi munakuq, khuyapayakuq, allin cristiano kananchispaq. Chaymantapas kallpachakunanchismi mosoq ruwaykunata yachananchispaq, chhaynapi Diospa llaqtanpi astawan yanapakunanchispaq. Chaymantapas kallpachakunanchismi hermanonchiskunata imachus necesitasqankupi yanapananchispaq. d Chaykunata ruwasunchis chayqa Timoteota jinan Jehová Diosqa bendeciwasun, jujkunapas sut’itan reparanqaku iñiyninchispi wiñarisqanchista (1 Tim. 4:15).