1. Eaa te au akakoroanga pae vaerua ta tatou ka akanoo?

 EI AU Kerititiano mou, e inangaro maata to tatou ia Iehova. Ka inangaro tatou i te oronga i te mea meitaki rava atu kiaia. Inara, e rauka ai i te tavini maata atu ia Iehova, ka anoanoia tatou kia akanoo i tetai akakoroanga pae vaerua, mei te akaarianga i te au tu Kerititiano, te apii i tetai tu karape, e te tavinianga i tetai ke. b

2. Eaa tatou ka akanoo ei i tetai akakoroanga pae vaerua e kia itae i te reira?

² Eaa tatou ka inangaro ei i te tavini maata atu ia Iehova? Mea mua, ka inangaro tatou i te akamareka i to tatou Metua i te rangi. Ka mareka a Iehova me taangaangaia to tatou tareni e te kite karape no te tavini iaia. Pera katoa, ka inangaro tatou i te tavini maata atu i to tatou au taeake. (1 Tesa. 4:9, 10) Noatu te roa ia tatou i roto i te tuatua mou, ka rauka rai ia tatou i te tavini maata atu i te Atua e te au taeake. Akara tatou akapeea me rave i te reira.

3. Ia 1 Timoteo 4:12-16, eaa ta te apotetoro ko Paulo i akamaroiroi ia Timoteo kia rave?

³ Te tataanga te apotetoro ko Paulo i tana reta mua kia Timoteo, e mapu tane aia te tavini ra ei tangata pakari tukatau. Inara, kua akamaroiroi a Paulo iaia kia tavini maata atu ia Iehova. (E tatau ia 1 Timoteo 4:12-16.) Ka kite mai tatou i roto i ta Paulo tuatua, e kua inangaro aia ia Timoteo kia akameitaki atu i teia nga turanga: te akaari  anga i te au tu Kerititiano mei te aroa, akarongo, te tu viivii kore e kia akameitaki atu i tona tu karape no te tatau, te ako e te apii. Ka uriuri tatou akapeea to Timoteo akaraanga me tauturu ia tatou kia akanoo i te au akakoroanga tau kia rauka i te tavini maata atu ia Iehova. Ka uriuri katoa tatou i te au ravenga no te akamaata atu i ta tatou angaanga tutu aere.

4. Ia Philipi 2:19-22, akapeea a Timoteo te riro anga ei tavini meitaki no Iehova?

⁴ Akapeea a Timoteo te riro anga ei tavini meitaki no Iehova? No tona au tu manea ei Kerititiano. (E tatau ia Philipi 2:19-22.) Kua akataka a Paulo ia Timoteo ei tangata akono meitaki, akaaka, tiratiratu e te irinakiia. E ngakau aroa tona, e te akaperepere maata ra aia i te au taeake. No to Paulo inangaro maata ia Timoteo, kare aia i emiemi ana i te oronga i te au apainga ngatā kiaia. (1 Kori. 4:17) Mei te reira rai, ka rekareka a Iehova me tavini maata atu tatou i te putuputuanga e me akaari tatou i te au tu Tana e akaperepere ra.—Sala. 25:9; 138:6.

5. (a) Akapeea koe me iki e ko teea tu Kerititiano taau ka akameitaki atu? (e) I roto i te tutu, akapeea te tuaine mapu te tauta anga i te akaari i te tu tangi aroa ki etai ke?

⁵ Iki i tetai akakoroanga meitaki. E pure ma te akamanako eaa te tu taau ka inangaro i te akameitaki atu. Ei akaraanga, ka rauka ainei ia koe i te akaari i te tu tangi aroa, me kore kia tauturu maata atu i toou au taeake? Ka anoanoia ainei koe kia akatupu i te ’au me kore kia akakore i te ara a tetai ke? Penei ka pati koe i te tauturu a tetai oa kia akakite mai eaa taau ka anoano kia akameitaki atu.—Mase. 27:6.

6. Akapeea koe me akameitaki atu i tetai tu Kerititiano?

⁶ Tauta i te akatupu i taau i akakoro. Akapeea koe me rave i te reira? Tetai mataara, na te akara meitaki anga i te tu taau ka inangaro i te akameitaki atu. Penei ka iki koe i te tu akakoreanga ara. Ka tatau e ka akamanako oonu koe i te au akaraanga Pipiria no te aronga tei akaari i teia tu e te aronga tei kore i akaari i te reira. Akamanako ana i to Iesu akaraanga. Kua akakore ua aia i te ara a tetai ke. (Luka 7:47, 48) Kua akamou aia ki runga i to ratou tu meitaki, kare i to  ratou tu apa. Kareka te au Pharisea, kua “akavaavaa oki [ratou i] etai ke.” (Luka 18:9) Me akamanako oonu koe i teia au akaraanga, e ui kia koe uaorai: ‘Eaa taku e kite ra i roto i etai ke? Eaa to ratou tu meitaki taku ka akamou ki runga?’ Me te ngatā ra ia koe i te akakore i te ara a tetai ke, e akamanako i tona au tu meitaki. E oti, e ui kia koe uaorai: ‘Eaa to Iesu manako no teia tangata? Ka akakore ainei aia i tana ara?’ Ka tauturu teia ia tatou kia akatikatika i to tatou aerenga manako. Penei i te akamataanga, ka ngatā i te akakore i te ara a te tangata tei akariri mai ia tatou. Inara me tauta tatou, ka rauka ua ia tatou i te akakore i te au ara.

7. Ia Maseli 22:29, akapeea a Iehova me taangaanga i te aronga karape i teia tuatau?

⁷ Tetai akaou akakoroanga, kia apii i tetai tu karape. Akamanako ana, e maata te tangata ka anoanoia no te pātu i te opati Betela, te Are Akaputuputuanga e te Are Uipaanga Patireia. Kua rauka to ratou tu karape na te angaanga kapiti anga ki te au taeake kite i te pātu are. I roto i te tutu, te apiipii ra te taeake e te nga tuaine kia karape ratou i te akono i te Are Akaputuputuanga e te Are Uipaanga Patireia. Na roto i teia tu, te taangaanga ra “te Ariki au mutu kore,” ko Iehova, e “te Ariki o te au ariki,” ko Iesu, i te aronga kite karape no te akatupu i te au angaanga umere. (1 Timo. 1:17; 6:15; e tatau ia Maseli 22:29.) Ka tauta tatou i te taangaanga i to tatou tu karape no te akapaapaa ia Iehova, kare ia tatou uaorai.—Ioa. 8:54.

8. Akapeea koe me iki ko teea tu karape taau ka akameitaki atu?

⁸ Iki i tetai akakoroanga meitaki. Eaa te tu karape taau ka tauta i te akameitaki atu? E ui ki te aronga pakari e penei ki te akaaere kotinga eaa tetai tu karape ta ratou i manako kia akameitaki atu koe. Ei akaraanga, me ka akakite mai ratou e kia akamou koe ki runga i taau tuatua e te apii, e pati kia ratou e ko teea tuanga apii ta ratou e anoano maira. E oti, e tauta i te rave i te au tauianga. Akapeea koe me rave i te reira?

9. Akapeea koe me akameitaki atu i toou tu karape i te apii?

⁹ Tauta i te akatupu i taau i akakoro. Penei ka inangaro koe kia riro mai ei puapii meitaki. Ka rauka ia koe i te apii meitaki i te poroutia Akamaata Atu i to Tatou Karape i te Tatau e te Apii. Me e tuanga taau i runga i te uipaanga epetoma, penei ka pati koe ki tetai taeake tukatau kia akarongo ki taau tuanga e kia akakite mai i te au ngai ka akameitaki atu koe. E tauta kia karape koe i te reira, e kia riro katoa ei taeake akono e te irinakiia.—Mase. 21:5; 2 Kori. 8:22.

10. Akakite mai i tetai akaraanga no te akameitaki atu i tetai tu karape.

¹⁰ Akapeea me te ngatā ra ia koe i te apii i tetai tu karape? Auraka e tuku i te ’au! Kare te taeake ko Garry i kite meitaki ana i te tatau. Te maara ra iaia i tona tu akamā te tatau anga aia i ko i te uipaanga. Inara kua tauta ua rai aia i te akameitaki atu i te reira. Karanga aia, no te au terenianga tei rauka mai, te oronga nei aia i te au akoanga i ko i te Are Uipaanga Patireia, te au akaputuputuanga kotinga e te au uruoaanga!

11. Mei ia Timoteo rai, eaa te ka tauturu ia tatou kia tavini maata atu ia Iehova?

¹¹ Kua riro ainei a Timoteo ei puapii meitaki e te vaa tuatua tukatau? Kare te  Pipiria i akakite mai ana. Inara e mea papu, kua meitaki atu a Timoteo i te rave i tana au apainga no te mea kua akarongo aia ki te akoanga a Paulo. (2 Timo. 3:10) Mei te reira katoa, me meitaki atu to tatou tu karape, ka tavini maata atu tatou ia Iehova.

12. Akapeea koe i puapingaia ai mei te tauturu a tetai ke?

¹² Ka puapingaia tatou mei te au tauturu a tetai ke. Ei akaraanga, me tei roto tatou i te are maki, ka rekareka tatou me atoro mai te au taeake o te Kumiti Are Maki me kore te Pupu Atoro Aronga Maki. Me tupu tetai turanga ngatā i to tatou oraanga, ka mataora tatou me akarongo e me akapumaana tetai tangata pakari ia tatou. Me inangaro tatou i te tauturu no tetai apii Pipiria, ka mataora tatou me aru mai tetai painia tukatau e me oronga mai i te au manako tauturu. Ka mataora teia au taeake e te au tuaine i te tauturu ia tatou. Ka rekareka katoa tatou i te tauturu i to tatou au taeake. Karanga a Iesu: “E mea meitaki i te oronga atu i te rave mai.” (Anga. 20:35) Me ka inangaro koe i te akamaata atu i taau tavini anga, eaa te ka tauturu ia koe kia taeria teia akakoroanga?

13. Eaa taau ka akamaara me akanoo koe i tetai akakoroanga?

¹³ Auraka e akanoo i tetai akakoroanga puapinga kore. Ei akaraanga, penei ka manako koe, ‘Ka inangaro au i te akamaata atu i taku ka rave i roto i te putuputuanga.’ Inara penei ka ngatā i te kite akapeea koe me akatupu i te reira, e me ka rauka rai ia koe. No reira, e akanoo i tetai akakoroanga meitaki. Penei ka tata koe e ka parani akapeea me akatupu i te reira.

14. Eaa ka anoanoia ai kia papa ua i te taui i ta tatou akakoroanga?

¹⁴ Ka anoano katoaia tatou kia papa ua i te taui i ta tatou akakoroanga. No teaa ra? No te mea i tetai taime, e taui ana to tatou turanga. Ei akatutuanga: Kua tauturu te apotetoro ko Paulo i te akatupu i tetai putuputuanga ou i Tesalonia. Mea papu e kua akakoro aia i te noo ki reira no te tauturu i te au Kerititiano ou. Inara no te aronga patoi, kua akaruke a Paulo i tera oire. (Anga. 17:1-5, 10) Naringa a  Paulo i noo ki reira, ka ō atu te au taeake ki roto i te manamanata. Kare a Paulo i tuku ana i te ’au. Mari ra, kua āriki aia i teia tauianga. Muri mai, kua tono aia ia Timoteo kia tauturu i te akamatutu i te akarongo o te au taeake ou i Tesalonia. (1 Tesa. 3:1-3) Papu roa e kua mataora teia au taeake e kua puareinga ua a Timoteo i te tauturu ia ratou!

15. Eaa te ka tupu ki ta tatou akakoroanga me taui to tatou turanga? Akatutu mai.

¹⁵ E apiianga tetai mei tei tupu kia Paulo i Tesalonia. Penei kua akanoo tatou i tetai akakoroanga, inara kare e rauka ia tatou i te itae i te reira no tei taui to tatou turanga. (Kohe. 9:11) Me kua tupu teia kia koe, kia rauka ua ia koe i te taui ki tetai akakoroanga māmā ake. Ko teia ta te nga tokorua ko Ted e Hiedi i rave. No te turanga makimaki, kua anoanoia raua kia akaruke i te Betela. Inara no to raua inangaro maata ia Iehova, kua kimi raua i te au ravenga ke no te akamaata atu i ta raua angaanga tutu aere. Mea mua, kua painia raua. Aere ua rai, kua ikiia raua ei painia takake, e kua tereniia a Ted ei tauturu akaaere kotinga. Muri mai, kua taui te mataiti no te au taeake te ka tavini ei akaaere kotinga. Kare e rauka akaou ia Ted e Hiedi i te rave i teia apainga. Noatu kua tupu te maromaroa, kua āriki raua e ka rauka rai ia raua i te tavini ia Iehova na roto i tetai ravenga ke. Karanga a Ted, “Kua kite mai au e e maata atu te ravenga no te tavini ia Iehova.”

16. Eaa ta tatou ka apii mai mei ia Galatia 6:4?

¹⁶ Kare e rauka ia tatou i te akatere i te au mea katoatoa. No reira, auraka e manako e puapinga atu tatou no te tu o ta tatou tavinianga, me kore kia akaaite ia tatou uaorai ki tetai ke. Akakite a Hiedi, “Kare koe e mataora me akaaite koe i toou oraanga ki te au mea taau e kite ra i roto i te oraanga o tetai ke.” (E tatau ia Galatia 6:4.) E mea puapinga kia kimi tatou i te au ravenga tukeke no te tavini ia Iehova e te tauturu i te au taeake. c

17. Eaa taau ka rave kia rauka i te tavini maata atu?

¹⁷ Ka rauka ia koe i te tavini maata atu me akamāmā koe i toou oraanga e auraka e maani i tetai kaiou. E akanoo i te au akakoroanga rikiriki kia tauturu ia koe no te au akakoroanga maata. Ei akaraanga, me ka inangaro koe i te painia tamou, ka rauka ainei ia koe i te painia tauturu i teianei? Me ka inangaro koe kia  riro mai ei tavini tauturu, ka rauka ainei ia koe i te akapou i te taime ki roto i te angaanga tutu aere, e te atoro i te au taeake makimaki e te ruaine i roto i taau putuputuanga? Ka tauturu teia ia koe kia tavini maata atu a te tuatau ki mua. No reira, e tauta i te rave i taau ka rauka i roto i te tuanga angaanga ka orongaia kia koe.—Roma 12:11.

18. I roto i te tutu, eaa taau ka apii mai mei te akaraanga o Beverley?

¹⁸ Ka rauka katoa i te au taeake ruaine i te akanoo e te akatupu i tetai akakoroanga pae vaerua. Akamanako ana i tei tupu kia Beverley, e tuaine e 75 ona mataiti. E maki kino tona e kare e rauka iaia i te aaere. Inara kua inangaro aia i te piri ki te oronga anga i te au patianga no te Akamaaraanga. Kua akanoo aia i tetai akakoroanga meitaki. Kua mataora tikai a Beverley i te akatupu i tana i akakoro. Kua akakeu tona akaraanga i tetai ke kia akamaata atu i ta ratou tavinianga. Te mareka ra a Iehova i te maroiroi a to tatou au taeake ruaine, noatu e iti ua ta ratou ka rauka i te rave.—Sala. 71:17, 18.

19. Eaa tetai au akakoroanga pae vaerua ka rauka ia tatou i te akanoo?

¹⁹ E akanoo i te au akakoroanga te ka rauka ia koe i te itae. Akatupu i te au tu manea te ka akamareka ia Iehova. E apii i tetai tu karape kia rauka ia koe i te tavini maata atu i te Atua e tana akaaerenga. E kimi i te au ravenga no te tauturu i toou au taeake e te au tuaine. d Mei ia Timoteo rai, ka akameitaki a Iehova ia koe e ka “kite te tangata katoa i te tupu anga o toou kite.”—1 Timo. 4:15.