1. Save duhovna celija šaj te čhiva amenge?

 ADALESKE so siem čačutne hristijanja, amen but mangaja e Jehova hem mangaja te služina leske ko najšukar način. Te šaj te uspejna ko adava valjani te čhiva amenge duhovna celija sar na primer, te razvina hristijanska osobine, te sikljova korisna veštine hem te roda načinija sar šaj te služina e javerenge. b

2. Soske valjani te čhiva amenge duhovna celija hem te trudina amen te ispolnina len?

² Soske valjani te manga duhovno te napredujna? I najvažno pričina tani, adaleske so mangaja te kera amare nebesno Dadeskiri volja. O Jehova tano bahtalo keda dikhela kaj koristinaja amare talentija hem sposobnostija najšukar so šaj ki leskiri služba. Osven adava, mangaja duhovno te napredujna te šaj ki pobari mera te pomožina amare phralenge hem phenjenge (1. Sol. 4:9, 10). Bizi razlika kobor vreme siem ko čačipe, sarine amen šaj duhovno te napredujna. Te dikha sar šaj te kera adava.

3. Sprema 1. Timotej 4:12-16, so pottikningja o apostol Pavle e Timotee te kerel?

³ O Timotej sine terno hem iskusno starešina keda o Pavle pišingja leske o prvo pismo. Sepak, o Pavle pottikningja le ponadari da duhovno te napredujnel. (Čitin 1. Timotej 4:12-16.) Džikote čitinea e Pavleskere lafija, ka primetine kaj ov pottikningja e Timotee te napredujnel ko duj bukja: te razvinel o hristijanska osobine sar soj mangipe, vera hem čistota, hem te ovel pošukar ko nesave veštine sar soj o javno čitibe, o ohrabribe e javeren hem  o sikajbe. Džikote razmislinaja bašo e Timoteeskoro primer, ka dikha sar adava so ka čhiva amenge razumna celija ka pomožinel amenge duhovno te napredujna. Ka dikha isto agjaar nekobor načinija sar šaj te bajrara amari služba.

4. Sprema Filipjanite 2:19-22, soske o Timotej sine korisno sluga e Jehovaske?

⁴ Soske o Timotej sine korisno sluga e Jehovaske? Adaleske so sine le but šuže hristijanska osobine. (Čitin Filipjanite 2:19-22.) Taro adava so o Pavle pišingja bašo Timotej šaj te dikha kaj ov sine ponizno, verno, vredno hem dostojno baši doverba. Ov but mangela sine e phralen hem čače grižinela pe sine lenge. Adaleske o Pavle but mangela sine e Timotee hem na darala sine te del le phare zadače (1. Kor. 4:17). Ako amen da razvinaja šuže osobine, o Jehova ka mangel amen hem ka ova pokorisna e phralenge taro sobranie (Ps. 25:9; 138:6).

5. a) So šaj te pomožinel tuke te odlučine ki koja hristijansko osobine te kere buti? b) Sar trudinela pe i terni phen soj ki slika te ovel posočuvstvitelno e javerencar?

⁵ Čhiv tuke konkretno cel. Molin tut hem razmislin sar šaj te ove pošukar ličnost. Birin jekh konkretno osobina kolate so mangea te kere buti. Na primer, dali šaj te ove posočuvstvitelno, ili te ovel tut pobari želba te pomožine e phralenge hem e phenjenge? Šaj li te trudine tut te kere mir e javerencar hem te ove pospremno te prostine? Šaj but te pomožinel tuke ako pučea jekhe paše amale te vakerel tuke sar šaj te ove pošukar (Izr. 27:6).

6. Sar šaj te razvine nesavi osobina?

⁶ Trudin tut te ispolnine tli cel. Sar šaj te kere adava? Jekh način tano agjaar so ka proučine baši osobina koja so mangea panda poviše te sikave la. Na primer, šaj nane tuke lokho te prostine e javerenge hem adaleske mangea te kere buti ko adava. Šaj te počmine agjaar so ka čitine hem hor ka razmisline bašo bibliska ličnostija kola so spremno prostinena sine e javerenge hem bašo okola so na kerena sine adava. Razmislin bašo e Isuseskoro primer. Ov spremno prostinela sine e javerenge (Luka 7:47, 48). Isto agjaar, na koncentririnela pe sine ko lengere greške nego dikhela sine save manuša šaj sine te oven ki idnina. Ama o fariseija na sine sar o Isus, ola mislinena sine kaj „o javera na vredinena“ (Luka 18:9).  Otkeda hor ka razmisline bašo akala primerija, puč tut: „So dikhava ko javera? Ko kola taro lengere osobine birinava te koncentririnav man?“ Ako pharo tuke te prostine nekaske, trudin tut te pišine so poviše šukar osobine tari adaja ličnost. Palo adava puč tut: „Sar dikhela o Isus ki leste? Dali ov bi prostinela sine leske?“ Ako keraja adava, ka menina amaro način sar dikhaja ki adaja ličnost. Ko početok šaj ka valjani but te trudina amen te šaj te prostina nekaske so povredingja amen. Ama so poviše trudinaja amen te prostina, sar ka nakhel o vreme ka ovel amenge polokho te kera adava.

7. Savi buti završinela o Jehova adalea so koristinela vešta rabotnikon? (Izreki 22:29).

⁷ Javer cel so šaj te čhive tuke tani te sikljove nesavi korisno veština. Razmislin kobor but rabotnikija valjani te šaj te gradinen pe Betelija, kongresna sale hem dvorane. But džene siklile veštine agjaar so kergje buti iskusna phralencar hem phenjencar. Sar so dikhaja ki slika, hem o phralja hem o phenja sikljovena veštine kola so valjani te šaj te održinen pe o kongresna sale hem o dvorane. Ko asavke hem ko javera načinija, o Jehova, o Devel, „o Cari tari večnost“, hem o Hristos Isus, „[o Cari] upro carija“, kerena bare bukja adaleske so koristinena vešta rabotnikon. (1. Tim. 1:17; 6:15; čitin Izreki 22:29.) Amen mangaja te ova vredna ki amari buti hem te koristina amare veštine te šaj te slavina e Jehova, a na amen (Jovan 8:54).

8. So ka pomožinel tuke te odlučine koja veština te sikljove?

⁸ Čhiv tuke konkretno cel. Koja veština šaj te sikljove? Puč e starešinen taro tlo sobranie hem ako mangea e pokrainsko nadgledniko bašo adava koja veština šaj te sikljove. Na primer, ako vakerena tuke te ove pošukar govorniko hem pošukar te sikave e javeren, zamolin len te vakeren tuke ko so konkretno valjani te kere buti. Palo adava, primenin o sovet te šaj te ove pošukar. Te dikha sar šaj te kere akava.

9. Sar šaj te sikljove nesavi veština?

⁹ Trudin tut te ispolnine tli cel. So ako mangea te ove povešto ko sikajbe? Šaj te proučine i brošura Ov sa pošukar ko čitibe hem sikajbe. Keda ka dobine nesavi zadača ko sostanok Amaro životo hem služba, šaj te puče nesave iskusno phrale te šunel tli zadača angleder te ikere la hem te vakerel tuke nesave predlogija kote so šaj panda te kere buti. Ako spreminea tle zadače dovolno angleder, o javera na samo so ka dikhen kaj sian vešto nego hem ka dikhen kaj sian vredno hem ka ovel len doverba ki tute (Izr. 21:5; 2. Kor. 8:22).

10. Vaker primer kolestar so dikhela pe sar šaj te ova vešta ki nesavi buti koja so nane amenge lokho te kera la.

¹⁰ So ako mangea te ove vešto ki nesavi buti koja so nane tuke lokho te kere la? Ma otkažin tut. Jekh phral so vikinela pe Geri, našti sine šukar te čitinel. Ov setinela pe kobor ladžala sine keda probinela sine te čitinel ko sostanokija. Ama ov but trudinela pe sine te šaj pošukar te čitinel. Ov vakerela kaj i obuka so dobingja la taro iskusna phralja hem taro publikacie pomožingja leske akana te ikerel govorija ki dvorana hem ko kongresija.

11. Isto sar o Timotej, so ka pomožinel amenge da te prifatina poviše odgovornostija?

¹¹ Dali o Timotej ulo but šukar govorniko hem učiteli? I Biblija na vakerela amenge. Ama šaj te ova sigurna kaj o Timotej ulo sa pošukar ko keribe ple zadače  adaleske so šungja e Pavleskoro sovet (2. Tim. 3:10). Slično, ako amen da razvinaja amare veštine, tegani ka ova pospremna te prifatina poviše odgovornostija.

12. Savi pomoš dobingjan javerendar?

¹² Sekova jekh amendar dobingja nesavi pomoš javerendar. Ako siem ki bolnica sigurno ka ova but blagodarna ako posetinena amen nesave starešine kola so služinena ko Odbor so pomožinela maškar o doktorija hem e Jehovaskere svedokija ili ki nesavi Grupa so posetinela e pacienten. Keda nakhaja taro nesave phare situacie ko amaro životo, but ceninaja keda nesavo ljubezno starešina odvojnela vreme te šunel amen hem te utešinel amen. Keda valjani amenge pomoš bašo nesavo biblisko kursi, but ceninaja keda nesavo iskusno pioneri avela amencar ko adava kursi hem dela amen nesave predlogija. Sa akala phralja hem phenja tane bahtale so šaj te pomožinen amenge. Amen da šaj te ova bahtale ako siem spremna te služina amare phralenge. O Isus vakergja: „Poviše isi bahtalipe keda dela pe, nego keda lela pe“ (Dela 20:35). Ako mangea poviše te bajrare tli služba ko akala ili ko javera načinija, so šaj te pomožinel tuke te ispolnine asavke celija?

13. So na valjani te bistra keda čhivaja amenge nesavi cel?

¹³ Ma čhiv tuke cel koja so nane konkretno. Na primer, šaj ka vakere: „Mangava te kerav nešto poviše ko sobranie“. Ama, šaj nane te džane sar te ispolnine adaja cel hem nane te haljove keda ispolningjan la. Adaleske, čhiv tuke jasno hem konkretno cel. Šaj čak te pišine tuke adaja cel hem sar planirinea te ispolnine la.

14. Soske valjani te ova prilagodliva keda čhivaja amenge celija?

¹⁴ Keda čhivaja amenge celija valjani isto agjaar te ova prilagodliva. Soske? Adaleske so nane amen celosno kontrola upro amare okolnostija. Te dikha o primer e Pavleskoro. Ov pomožingja te kerel pe jekh nevo sobranie ko Solun hem sigurno sine le cel te ačhovel adari te šaj te pomožinel e neve phralenge hem phenjenge. Ama adaleske so sine le protivnikija, o Pavle mora sine te džal peske tari adaja diz (Dela  17:1-5, 10). Ov na ačhilo ki adaja diz te šaj te na čhivel ple phralen ki opasno situacija. Ama o Pavle na čhinavgja te pomožinel lenge. Namesto adava, ov prilagodingja pe ko neve okolnostija. Pokasno ov bičhalgja e Timotee te grižinel pe bašo duhovna potrebe e phralengere ko Solun (1. Sol. 3:1-3). O phralja taro Solun sigurno sine but bahtale so o Timotej sine spremno te služinel adari kote so sine pobari potreba.

15. Sar šaj o okolnostija so promeninena pe te vlijajnen upro amare celija? Vaker primer.

¹⁵ Taro e Pavleskoro primer šaj te sikljova jekh but važno pouka. Šaj ka čhiva amenge nesavi cel ama amare okolnostija šaj te meninen pe hem te čhinaven amen te ispolnina la (Prop. 9:11). Ako akava tano slučaj tuja, ov spremno te čhive tuke javer cel koja so šaj te ispolnine la. Akava slučingja pe jekhe bračno pareske so vikinena pe Ted hem Hajdi. Ola mora sine te ikljoven taro Betel soske jekh dženo lendar nasvalilo. Ama o mangipe sprema o Jehova pottikningja len te roden javera načinija te bajraren pumari služba. Ko početok, ola počmingje e opšto pionersko službaja. Palo nesavo vreme ule specijalna pionerija, a o Ted dobingja obuka te ovel zameniko e pokrainsko nadglednikoske. Palo adava sine kerdi promena dži ko kobor berša šaj te služinen o pokrainska nadglednikija. O Ted hem i Hajdi halile kaj našti sine više te služinen e Jehovaske ki adaja zadača. Iako na sine lenge sa jekh, sepak halile kaj šaj te služinen e Jehovaske ko javera da načinija. O Ted vakerela: „Siklilem kaj isi poviše načinija sar šaj te služina e Jehovaske“.

16. So šaj te sikljova taro Galatite 6:4?

¹⁶ Našti te ovel amen kontrola upro sa adava so slučinela pe amenge ko životo. Adaleske but tano važno te na mislina kaj siem vredna anglo Jehova samo adaleske so isi amen nesave zadače hem te na sporedina adava so amen keraja adalea so o javera kerena. I Hajdi vakerela: „Ka našave tlo andruno mir ako sporedinea tlo životo e javerengere životoja“. (Čitin Galatite 6:4.) Važno tano te roda načinija sar šaj te pomožina e javerenge hem te služina e Jehovaske. c

17. So ka pomožinel tuke te phere o uslovija bašo javera zadače hem odgovornostija?

¹⁷ Ka šaj te kere poviše ki služba bašo Jehova ako živinea skromno hem ako izbeginea te čhive tut ko dugija bizi potreba.  Čhiv tuke potikne celija so ka pomožinen tuke te ispolnine o pobare celija. Na primer, ako isi tut cel te ove opšto pioneri, šaj li panda akana sekova masek te služine sar pomošno pioneri? Ili ako isi tut cel te ove sluga-pomošniko, dali šaj te dža poviše vreme ki služba hem te posetine e nasvalen ili e pophuren taro tlo sobranie? O iskustvo so ka steknine le akana ka phravel tuke o udar bašo javera zadače ki idnina. Ov odlučno te de tlo najšukar ki bilo koja zadača so ka dobine la (Rim. 12:11).

18. So sikljovea tari Beverli? Dikh hem i slika.

¹⁸ Nikoj nane doborom phuro so našti te čhivel peske duhovna celija hem te ispolninel len. Razmislin baši jekh phen so vikinela pe Beverli so isi la 75 berš. La sine la jekh pharo nasvalipa kolestar so na sine lake lokho te phirel. Ama oj but mangela sine te učestvujnel ki akcija baši Spomen-svečenost kobor so šaj poviše. Adaleske čhivgja peske konkretna celija. Keda uspejngja te ispolninel ple celija, sine but bahtali. Taro lakoro primer o javera da ko sobranie sine pottiknime te keren poviše ki služba. O Jehova but ceninela o trudo e pophure phralengoro hem e phenjengoro, čak keda lengere okolnostija na dozvolinena lenge te keren doborom kobor so bi mangena (Ps. 71:17, 18).

19. Kola tane nesave duhovna celija so šaj te čhiva amenge?

¹⁹ Čhiv tuke celija kola so šaj te ispolnine len. Razvin osobine kolencar so ka kere bahtalo e Jehova. Sikljov veštine kola so ka pomožinen tuke te ove pokorisno e Jehovaske hem leskere organizacijake. Rode načinija sar šaj ki panda pobari mera te služine tle phralenge hem phenjenge. d Isto sar e Timoteeske, o Jehova ka del tuke da bereketi hem tlo napredok ka dikhen le sarine (1. Tim. 4:15).