1. Sar daisaras te bariuvas spiritualo?

 SAR ciace creștini amen iubisaras zurales but le Iehovas. Anda codoia, camas te cheras chichi mai mișto amari buchi anda leste. Tha, caște cheras sea so daisaras anda o Iehova, trebul te bariuvas spiritualo hai cadaia însemnol te bariaras calități creștino, te sichioas te cheras buchia neve hai te rodas te ajutisaras averen.

2. Sostar trebul te bariuvas spiritualo hai sar daisaras te arăsas te cheras cadaia?

² Sostar trebul te das sea amari zor caște bariuvas spiritualo? Mai anglal, anda codoia că camas te avas cuci andel iacha amare Dadesche cerisco. O ilo le Iehovasco bariol cana dichel că amen folosisaras amare talentea hai le buchia cai jianas te cheras-le mișto ande lesco servicio. Pala codoia, amen cheras cadai buchi anda codoia că camas te ajutisaras amare phralen hai pheian. (1 Tes. 4:9, 10) Chiar cana sam de mai but timpo co ciacimos sau de mai țâra timpo, savore daisaras te bariuvas spiritualo. Mai dur, va avela te dichas sar daisaras te cheras cadaia.

3. Cadea sar sicavel-pe ando 1 Timotei 4:12-16, so zuriardea o Pavel le Timoteios te cherel?

³ Cana o apostolo Pavel scriisardea pesco dintuno lil caring o Timotei, cado, chiar cana sas-lo tărno, slujilas de but timpo sar phuro de congregație. Cu sea cadala, o Pavel zuriardea-les te bariol vi mai dur spiritualo. (Citisar 1 Timotei 4:12-16.) Cadea sar daisaras te dichas vi anda so phendea o Pavel, o Timotei trebulas te bariol spiritualo ande dui moduri: te bariarel calități creștino sar avenas i iubirea, o pachiamos hai o ujimos moralo hai te sichiol te cherel mai mișto chichiva buchia sar avenas te citil mai șucar, te zuriarel mai mișto le phralen hai te avel iech sicaitorii mai lașio. Acana te încăras ande amari goghi o exemplo le Timoteiosco hai te dichas sar daisaras te cheras vi amen  mai mișto amari buchi anda o Iehova. Sa cadea, va avela te hachiaras sar daiasaras te cheras mai but buchia ando servicio le Iehovasco.

4. Cadea sar phenel-pe ando Filipeni 2:19-22, sostar daisardea te folosisarel o Iehova le Timoteios mai but ande lesco servicio?

⁴ Sostar daisardea te folosiarel o Iehova le Timoteios mai but ande lesco servicio? Anda codoia că sas-les șucar calități creștino. (Citisar Filipeni 2:19-22.) O Pavel phendea anda o Timotei că sas iech phral umilo, loialo, vreanico hai demno pachiamasco. Vo sicadea iech bari iubirea anda lesche phrala hai camelas anda sea o ilo lengo miștimos. Cadea că, o Pavel iubisardea le Timoteios hai bi te încărel-pe parpale dea-les te cherel buchia importanto. (1 Cor. 4:17) Sa cadea, cana vi amen bariaras calități creștino sam zurales cuci andel iacha le Iehovasche hai daisaras te slujisaras vi mai but amare phralenghe. (Ps. 25:9; 138:6)

5. a) Sar daștis te jianes ca so calitatea creștino trebul te cheres buchi? b) Cadea sar dichiol-pe andel imagini, sar del peschi zor i phei mai tărni te sicavel mai but empatia caring aver?

⁵ Alosar iech anumime calitatea cai cames te bariares-la. Mang le Iehovas te ajutil-tu te hachiares ca savi calitatea mai trebul te cheres buchi. Pala codoia, de sea chi zor caște bariares-la. Sar exemplo, pachias că trebul te sicaves mai but empatia sau cames te slujis vi mai but le phralenghe? Cames te aves iech manuș cai rodel sea o timpo i pacea hai cai silo iertătorii? Daștis te pușes ieche amales cai silo mai pașă tutar so calități pachial că trebulas te bariares vi mai but. (Prov. 27:6)

6. So daștis te cheres caște arăsăs te sicaves vi mai but iech calitatea?

⁶ De chi zor te arăsăs te bariares mai but calități creștino. Daștis te cheres cadaia cana rodes te prinjianes mai but buchia anda i calitatea cai cames te sicaves-la vi mai but. Te phenas că cames te aves mai iertătorii. Mai anglal, daștis te les i Biblia caște citisares andal manușa cai daisarde te iertisaren averen hai anda codola cai ci daisarde te cheren cadai buchi. Dich vi o exemplo le Isusosco. Vo iertisardea lașimaia averen. (Luca 7:47, 48) Vo dichlea părdal lenghe doșa hai rodelas sea o timpo te dichel le lașe buchia cai daștinas te cheren-le. Tha le farisei „dichenas le coaveren sar iech chanci”. (Luca 18:9) Pala so gândisares-tu mișto ca cadal exemplea, șiu tuche le pușimata: „Sar dichav averen? So alosarav te  dichav lende?”. Cana na-i tuche ușoro te iertis varecas, daștis te scriis pe iech lista sea le lașe buchia cai dichlean-le cadale manușeste. Pala codoia șiu tuche le pușimata: „Sar dichel-les o Isus? Vo iertisarelas-les?”. Cana cheres cadea, daștis te paruves chio modo gândimasco. Daștil-pe că ci va avela te aves de pe iech ghies pe aver mai iertătorii hai daștil-pe că va avela tuche pharo te iertis varecas cai holiardea-tu. Tha, dacă des sea chi zor caște aves mai iertătorii, va avela tuche mai ușoro te sicaves cadai calitatea.

7. Cadea sar phenel-pe andel Proverbe 22:29, sar cherel o Iehova bare buchia prin le phrala hai pheia cai cheren mișto penghi buchi?

⁷ Iech aver buchi cai ajutil-tu te barios spiritualo si te sichios te cheres iech buchi mișto. Gândisar-tu chichi de bute phralendar si nevoia te vazden-pe le Beteluri, le săli andal congresea hai le săli le Regatosche. But anda cadala sichile te cheren neve buchia cana cărde buchi pașa le phrala cai jianenas te cheren buchi mișto. Cadea sar dichiol-pe andi imaginea, vi phrala hai vi pheia, sichion te cheren neve buchia, cana len partea ca i buchi ande savi lel-pe sama catar le săli andal congresea hai le săli le Regatosche. Cadea, o Iehova Del, ‘o Rege anda sea o timpo’, hai o Cristos Isus, ‘o Rege le regengo’, cheren bare buchia prin phrala hai pheia cai cheren mișto penghi buchi. (1 Tim. 1:17; 6:15; citisar Proverbe 22:29.) Amen camas te das sea amari zor hai te folosisaras le buchia cai jianas te cheras-le mișto caște anas pachiv le Iehovasche, na amenghe. (Ioan 8:54)

8. Sar daștis te jianes so trebul te sichios te cheres mai mișto?

⁸ Alosar te sichios te cheres mișto iech anumime buchi. So buchi cames te sichios te cheres-la mișto? Daștis te pușes le phuren andai congregația sau chiar le supraveghetoros de circumscripție. Dacă von pachian că trebul te lașiares o modo ande savo încăres teme sau sicaves averen, mang-le te phenen tuche ca so trebul te cheres buchi. Pala codoia, de chi zor te cheres cadal buchia chichi mai mișto.

9. So daștis te cheres caște arăsăs te cheres mai mișto iech anumime buchi?

⁹ De chi zor te arăsăs te cheres anumime buchia mai mișto. Dacă șiutean tuche andi goghi te lașiares o modo ande savo sicaves averen, daștis te diches atento i broșura Dedichisar-tu te citisares hai te sicaves. Cana si tuche dini iech tema ca i întrunirea anda o mașcar le curchesco, daștis te manghes ieche phrales cai jianel te încărel șucar teme, te așunel-tu sar încăres chi tema angal so te încăres-la ca i sala le Regatoschi hai te phenel tuche so daștis te cheres mai mișto. De chi zor te aves prinjiando sar iech phral vreanico hai demno pachiamasco, na numai sar iech phral cai jianel te încărel șucar teme. (Prov. 21:5; 2 Cor. 8:22)

10. Den iech exemplo cai sicavel sar daisaras te cheras sea mai mișto iech anumime buchi.

¹⁰ Tha dacă cames te aves mai lașio ca iech buchi cai si tuche pharo te cheres-la? Na mech-tu! Iech phral po anav Garry citilas mai phares. Vo anel pesche amintea chichi lajiav sas lesche cana trebulas te citil ca la întruniri la congregațiache. Tha vo dea mai dur peschi zor hai cărdea phari buchi caște citil chichi mai mișto. Aghies, anda codoia că le phrala ajutisarde-les hai sicade-les, vo daștil te încărel șucar teme ca i sala le Regatoschi, tha vi ca le întruniri mai bare sar avenas le congresea.

11. Cadea sar o Timotei, so va ajutila-ame te cheras mai but buchia ando servicio le Iehovasco?

¹¹ Arăslea o Timotei te del duma zurales șucar angla aver sau te avel iech sicaitorii zurales lașio? I Biblia ci phenel cadaia. Tha daisaras te  pachias că anda codoia că lea-pe pala o sfato le Pavelosco, o Timotei daisardea te cherel peschi buchi anda o Iehova sea mai mișto. (2 Tim. 3:10) Sa cadea, dacă vi amen sichioas te cheras chichi mai mișto anumime buchia, va avela te daisaras te cheras mai but buchia ando servicio le Iehovasco.

12. Sar sanas ajutime averendar?

¹² Savore țârdas miștimata cana le coaver ajutin-ame. Sar exemplo, dacă sam ando spitalo, sam bucurime cana aven amende le phure de congregație cai cheren partea anda iech comiteto cai încărel o phanglimos le spitalența sau anda iech grupo cai rodel le phralen nasfale ando spitalo. Sau, cana nachas prin pharimata ande amari viața, sam zurales recunoscătorii cana iech phuro de congregație cherel pesche timpo te așunel-ame hai te zuriarel-ame. Sau, cana încăras iech studio biblico varecasa hai trebul amenghe ajutorii, sam bucurime cana iech pionierii cai jianel te sicavel mișto averen avel amența co studio hai phenel amenghe so te cheras. Sea cadala phrala hai pheia sile zurales bucurime cana ajutin-ame. Vi amen daștil te avel amen cadai bucuria cana rodas te ajutisaras averen. O Isus phendea: „Si mai but fericirea te des sar te primis”. (Fap. 20:35) So daștis te cheres dacă cames te slujis vi mai but averenghe?

13. So trebul te încăras ande amari goghi cana camas te sichioas te cheras iech buchi mai mișto?

¹³ Cana cames te cheres mai but anda o Iehova, șiu ande chi goghi exacto so cames te cheres. Sar exemplo daștil-pe că phenes: „Camav te cherav mai but andi congregația”. Tha dacă gândis cadea, va avela tuche pharo te jianes ciaces so trebul te cheres hai cana arăsăs te jianes te cheres mișto iech buchi. Cadea că, alosar iech anumime buchi cai cames te sichios te cheres-la mai mișto. Chiar daștis te scriis tuche tele so cames te sichios te cheres mai mișto hai te gândis-tu sar daștis te arăsăs te cheres cadaia.

14. Sostar trebul te paruvas le buchia cai camas te cheras-le anda o Iehova pala amari situația?

¹⁴ Sostar trebul te paruvas le buchia cai camas te cheras-le anda o Iehova pala amari situația? Anda codoia că ci jianas so paruimata va avena ande amari viața. Vi o apostolo Pavel nachlea prin cadaia. Vo ajutisardea te avel cărdi iech nevi congregația ando foro Tesalonic hai, si ciaces, că camelas te așel  code caște ajutil le creștinen neve bolde. Tha, anda codoia că le manușa așile lesche contra, o Pavel trebuisardea te tiliarel anda o foro. (Fap. 17:1-5, 10) Dacă avileas te așel, avileas te cherel numai nasul le phralenghe. Tha o Pavel, ci mechlea-pe hai camlea te ajutil-le vi mai dur, cadea că vo parudea-pe pala i nevi situația. Mai târzio, o Pavel bișaldea le Timoteios caște zuriarel i nevi congregația. (1 Tes. 3:1-3) Daisaras te pachias că le creștini anda Tesalonic sas-le zurales bucurime cana dichle că o Timotei camlea anda sea o ilo te slujil hai te ajutil le phralen oricai trebulas.

15. So buchia daisaras te rodas te cheras ando servicio le Iehovasco cana amari situația paruvel-pe bi te ajucăras-ame? Den iech exemplo.

¹⁵ Daisaras te sichioas but buchia anda so nachlea o Pavel ando Tesalonic. Daștil-pe că camas te cheras mai but ando servicio le Iehovasco, tha bi te ajucăras-ame avel iech paruimos ande amari viața cai ci mai mechel-ame te cheras cadaia. (Ecl. 9:11) Cana nachas prin cadaia, trebul te gândisaras-ame ca so daisaras te cheras anda o Iehova pala amari situația. Sar exemplo, o Ted hai i Hiedi ci mai daisarde te slujin co Betelo anda codoia că iech anda lende pelea nasfalo. Tha anda codoia că i iubirea anda o Iehova thabolas ande lengo ilo, von dine penghi zor te roden aver buchia cai daștinas te cheren-le ande lesco servicio. Mai anglal, von astarde te cheren o pionierato regularo. Pala iech timpo, von sas-le numime pionieri speciali, hai o Ted sas-lo sicado te avel locțiitoro le supraveghetorosco de circumscripție. Pala codoia, le bărșa ji cana iech phral daștilas te slujil sar supraveghetoro de circumscripție parude-pe, cadea că von ci mai daisarde te cheren cadai buchi anda o Iehova. Chiar cana sas-le perade, von hachiarde că daștinas te slujin le Iehovasche vi ande aver moduri. O Ted phenel: „Sichileam că trebul te dichas părdal le buchia cai ci mai daisaras te cheras-le hai hachiardeam că daisaras te slujisaras le Iehovasche na numai prin iech corcoro modo”.

16. So sichioas anda Galateni 6:4?

¹⁶ Ci daisaras te așiavas le paruimata cai aven ande amari viața. Anda codoia, si zurales importanto te na pachias că sam cuci andel iacha le Iehovasche numai cana daisaras te cheras but buchia ande lesco servicio, hai te na dichas că le coaver daștin te cheren mai but sar amen. I Hiedi phenel: „Cana șios chi viața pașa le coaverenghi hai diches so daștin te cheren von hai tu nici, hasares chi pacea”. (Citisar Galateni 6:4.) Si mișto te hachiaras so daisaras amen te cheras andi organizația le Iehovaschi. b

17. So daștis te cheres caște arăsăs te cheres mai but buchia ando servicio le Iehovasco?

 ¹⁷ Va avela te daștis te cheres mai but anda o Iehova dacă des chi zor te avel-tu iech viața simplo hai ci cheres tuche camimata. Rode te cheres le buchia țâra po țâra hai cadea va avela te arăsăs te cheres sea mai but anda o Iehova. Sar exemplo, dacă cames te cheres pionierato regularo, daștis mai anglal te cheres pionierato auxiliaro ande fiesavo șion. Dacă cames te aves slujitoro auxiliaro, daștis te jias mai but andi predicarea sau te jias te diches codolen nasfale sau codolen phure andai congregația. I experiența cai chides-la acana, daștil te pâtrăl tuche o drom caring neve buchia cai daștis te cheres-le ando servicio le Iehovasco. De sea chi zor caște cheres chichi mai mișto orisavi buchi cai si tuche dini. (Rom. 12:11)

18. Cadea sar dichiol-pe vi andi imaginea, so daisaras te sichioas catar i phei Beverley?

¹⁸ Ci sam niciechdata prea phure caște cheras mai but anda o Iehova. Sar exemplo, iech phei cai sila 75 bărșa, po anav Beverley sas-li zurales nasfali hai phirelas zurales phares. Tha voi camelas anda sea o ilo te cherel mai but andi predicarea cana sas i campania anda i Comemorarea. Cadea că voi șiutea ande peschi goghi te cherel cadaia hai sas zurales bucurime că daisardea te cherel mai but. O fapto că voi dea sea peschi zor te cherel mai but andi predicarea, cărdea vi averen te len-pe pala laco exemplo. Anda o Iehova si zurales cuci i buchi cai cheren-la cadal phrala hai pheia mai phure, chiar cana lenghi situația ci mechel-le te cheren prea but. (Ps. 71:17, 18)

19. So daștil te ajutil-tu te cheres mai but anda o Iehova?

¹⁹ De chi zor te barios spiritualo. Bariar calități cai cheren-tu mai cuci andel iacha le Iehovasche hai sichio te cheres buchia cai ajutin-tu te cheres mai but ande leschi organizația. Rode te slujis vi mai but che phralenghe hai pheianghe. c Dacă va avela te cheres cadea, o Iehova va dela-tu but miștimata hai, cadea sar o Timotei, ‘chio bariarimos spiritualo va avela dichlo savorendar’. (1 Tim. 4:15)