1. Hiikkuri ayyaanaamittete mixo fushshiˈra dandiineemmo?

 ADDU Kiristaana ikkinoommo daafira Yihowa lowo geeshsha banxeemmo. Yihowara soqqamate dandiinummore baala assa hasiˈneemmo. Tenne assate ayyaanaamittete mixo fushshiˈra hasiissannonke; lawishshaho, Magano hagiirsiissanno akatta lossiˈra, kaaˈlitanno dandoo rosanna woloota kaaˈlineemmo doogga hasiˈra hasiissannonke. b

2. Ayyaanaamittete mixo fushshiˈranna wonshiˈrate diinaggaawa hasiissannonkehu mayiraati?

² Ayyaanaamittetenni lopha hasiˈneemmohu mayiraati? Tenne assa hasiˈneemmohu qaru coyi, baxillaancho iimi Annanke hagiirsiisa hasiˈneemmo daafiraati. Yihowa dandoonke woˈmunni woˈma isira soqqamate horoonsiˈnanna laˈˈanno woyite lowo geeshsha hagiidhanno. Qoleno ayyaanaamittetenni lopha hasiˈneemmohu ammanate roduuwanke albinni roore kaaˈla hasiˈneemmo daafiraati. (1 Tes. 4:9, 10) Halaalu mine keeshshinoommo diri ikki geeshshihano ikkiro, baalunku ayyaanaamittetenni lopha dandiineemmo. Hanni tenne assa dandiineemmohu hiittoonniitiro laˈno.

3. Umi Ximootewoosi 4:12-16 kultanno garinni soqqamaasinchu Phaawuloosi Ximootewoosi ma assanno gede jawaachishinosi?

³ Soqqamaasinchu Phaawuloosi Ximootewoosira umi sokka borreessi woyite, Ximootewoosi wedellicha ikkirono woˈnaalshu noosi cimeessaati. Ikkirono Phaawuloosi Ximootewoosi ayyaanaamittetenni  lopha agurannokki gede jawaachishinosi. (1 Ximootewoosi 4:12-16 nabbawi.) Phaawuloosi Ximootewoosira soyino sokka seekkine hendummoro, isi Ximootewoosi lame doogonni lophara hasiˈrinota huwanteemmo. Umihunni, baxillenna ammana lossiˈranno gede hattono minshe nookkiha ikke heeˈranno gede amaalinosi. Layinkihunni, wolootaho nabbawate, amaalatenna rosiisate dandoosi woyyeessiˈranno gede amaalinosi. Hanni Ximootewoosi lawishsha wodanaho wodhine, wonshiˈra dandiineemmo mixo fushshiˈra ayyaanaamittetenni lophineemmo gede kaaˈlitannonke gara laˈno. Qoleno soqqanshonke halashshiˈra dandiineemmota mite doogga ronseemmo.

4. Filiphisiyusi Sokka 2:19-22 kultanno garinni Ximootewoosi worba Yihowa soqqamaancho ikkanno gede kaaˈlinosiri maati?

⁴ Ximootewoosi worba Yihowa soqqamaancho ikkanno gede kaaˈlinosiri maati? Isira kaajja Maganu baxanno akatta noosi. (Filiphisiyusi Sokka 2:19-22 nabbawi.) Phaawuloosi coyiˈrinorinni Ximootewoosi umosi heeshshi assannoha, ammanaminoha, chaachaara hattono ammaˈninanniha ikkinota huwata dandiineemmo. Isi baxillaanchoho hattono ammanate roduuwisira godowinta hedannoho. Hakko daafira Phaawuloosi Ximootewoosi lowo geeshsha baxannosi; hattono isira shota ikkinokkiha loosu qeecha eeggo uyinosi. (1 Qor. 4:17) Hatteente gede ninkeno Maganu baxanno akatta lossiˈneemmoha ikkiro, Yihowa baxannonke hattono songo albinni roore kaaˈlineemmo.—Far. 25:9; 138:6.

5. (a) Maganu baxanno akata lossiˈrate mixo fushshiˈra dandaattohu hiittoonniiti? (b) Misile leellishshannonte gede, mitte wedellitte rodoo woloota albinni roore mararate fushshidhino mixo wonshiˈrate sharrantanni noohu hiittoonniiti?

⁵ Woyyeessiˈra hasiˈratto akata doorte mixo fushshiˈri. Huuccatto assidhe hiikkonne akata woyyeessiˈra hasiissannohero hedi. Hakkiinni woyyeessiˈrattora hedootto akata doodhi. Lawishshaho albinni roore woloota mararate woy ammanate roduuwakki kaaˈlate hasattokki lexxitanno gede assiˈra dandaatto? Woy albinni roore keere kalaqattohanna gatona yaattoha ikka dandaatto? Maa woyyeessiˈra hasiissannohero kulannohe gede mitto ammanatto jaalakki amaaˈla dandaatto.—Law. 27:6.

6. Mitto akata woyyeessiˈrate fushshiˈrootto mixo wonshiˈrate sharrama dandaattohu hiittoonniiti?

⁶ Mixokki wonshiˈrate sharrami. Tenne assa dandaattohu hiittoonniiti? Tenne assa dandaatto doogga giddo mitte woyyeessiˈra hasiˈrootto  akati daafira xiinxallate. Hanni woloota albinni roore gatona yaa hasiˈrootto yine hendo. Woloota mulla gatona yiinohunna yiinokkihu Qullaawu Maxaafi giddo kulloonni manni lawishsha nabbabbenna hiincite hanafa dandaatto. Hanni Yesuusi lawishsha laˈno. Isi woloota mulla gatona yiino. (Luq. 7:47, 48) Qoleno soˈronsa agure dancha akatansa illachishino. Hatte yannara noo Farisooti kayinni ‘manna mishshanno.’ (Luq. 18:9) Kuri lawishshuwa hiincittohu gedensaanni ateneeto togo yite xaˈmi: ‘Woloota ma garinni laeemmo? Hiikkonne akatansa illachisheemmo?’ Mitto mancho gatona yaa qarra ikkitinoheha ikkiro, hakko manchita dancha akatta borreessate woˈnaali. Hakkiinni ateneeto togo yite xaˈmi: ‘Yesuusi konne mancho laˈˈannohu ma garinniiti? Isi gatona yaannosi?’ Konni garinni xiinxallanke hedonke biddi assiˈneemmo gede kaaˈlitannonke. Koffi assinonke mancho gatona yaa umi qara qarra ikkitankera dandiitanno. Ikkollana akatanke woyyeessiˈrate sharrama agura hoongummoro gatona yaa roore shota ikkitanni hadhannonke.

7. Lawishsha 22:29 kultanno garinni Yihowa xaa yannara dandoo noonsa loosaasine horoonsiˈranni noohu hiittoonniiti?

⁷ Kaaˈlitanno dandoo rosateno mixo fushshiˈra dandiineemmo. Beeteelete minna, Jajjabbu Gambooshshi Addaraashenna Gambooshshu Addaraashe minate lowo roduuwi hasiissannota qaagi. Konne looso loossannori giddo batinyu roduuwi dandoo afidhinohu woˈnaalshu noonsa roduuwi ledo loosseeti. Misile leellishshannonte gede roduuwu Jajjabbu Gambooshshi Addaraashenna Gambooshshu Addaraashe gatamarranni gara rossanni no. “Hegere Moote” Maganu Yihowanna “mootoollete Mootichi” Yesuusi Kiristoosi kuri dandoo noonsa roduuwa horoonsidhe dhagge ikkanno looso loossanni no. (1 Xim. 1:17; 6:15; Lawishsha 22:29 nabbawi.) Dandoonke woyyeessiˈrate diinaggaambe loonseemmohu uminke ayirrinyira ikkikkinni Yihowa ayirranno gede assateeti.—Yoh. 8:54.

8. Mitte dandoo rosate mixo fushshiˈra dandaattohu hiittoonniiti?

⁸ Rosa hasiˈratto dandoo doorte mixo fushshiˈri. Hiittee dandoo woyyeessiˈra hasiˈratto? Woyyeessiˈra hasiissannohe dandoo kultannohe gede songokki cimeeyye xaˈmi woy woradu aliidi laˈˈaanchono xaˈma dandaatto. Lawishshaho insa coyiˈratenna rosiisate dandoo woyyeessiˈra hasiissannoheta kultuhero, ma garinni woyyeessiˈra dandaattoro badde kultannohe gede xaˈmi. Hakkiinni dandookki woyyeessiˈrate kaaˈlannohere assi. Tenne assa dandaattohu hiittoonniiti?

9. Mitte dandoo rosate fushshiˈrootto mixo wonshiˈra dandaattohu hiittoonniiti?

⁹ Mixokki wonshiˈrate sharrami. Hanni rosiisate dandookki woyyeessiˈra hasiˈrootto yine hendo. Nabbawatenna Rosiisate Dandiittore Baala Assi yitanno biroshere seekkite xiinxalla dandaatto. Kiristaanu Heeshshonna Soqqansho Gambooshshira kifile shiqishatto gede kullihero, mittu woˈnaalshu noosi rodii kifile shiqishattora albaanni shiqishatto gara lae woyyeessiˈra hasiissannohere kulannohe gede xaˈmiˈra dandaatto. Dandoo nooheha calla ikkikkinni chaachaaranna ammaˈninanniha ikkite danchu suˈmi heeˈrannohe gede assiˈri.—Law. 21:5; 2 Qor. 8:22.

10. Mitte dandoo sunu sununni woyyeessiˈra dandiinanni gara leellishanno lawishsha kuli.

¹⁰ Woyyeessiˈrate mixo fushshiˈrootto coyi qarrissannohehalla ikki? Hatto ikkiro hexxo mudhitooti! Mittu Geerii yinanni rodii dancha gede nabbawa didandaanno. Isi songote gambooshshiwa huurosi naggi asse nabbawate woˈnaalanno woyite lowo geeshsha saalannota coyiˈrino. Kayinni isi dandoosi woyyeessiˈrate sharrama diagurino. Xa isi qajeelino daafira songote gambooshshiwa, woradu gambooshshiwanna qoqqowu gambooshshiwa lallawo shiqisha dandiinota coyiˈrino!

11. Ximootewoosi gede uyinanninkeha wole looso lende adhate kaaˈlannonkeri maati?

 ¹¹ Ximootewoosi dancha gede coyiˈrannoha woy worba rosiisaancho ikka dandiino? Tenne daafira Qullaawu Maxaafi kulannori dino. Ikkirono isi Phaawuloosi amaalinosi amaale harunse gale hose uyinoonnisi looso dancha gede loosannoha ikkinoti dihuluullissannote. (2 Xim. 3:10) Hatteente gede ninkeno dandoonke woyyeessiˈneemmoha ikkiro, uyinanninkeha wole loosono adhate ikkadda ikkineemmo.

12. Wolootu loossanno loosi kaaˈlinohehu hiittoonniiti?

¹² Ninke baalunku wolootu loossanno loosinni horo afiˈneemmo. Dhiwamme akimete minira haˈnummoro, Hospitaalete Ledo Xaadissanno Komite giddo woy Dhiwantinore Laˈanno Gaamo giddo soqqantanno cimeeyye dagge laˈunkero hagiidhineemmo. Heeshshonke giddo qarru iilleennanke mittu shaqqadu cimeessi yanna gaaˈme qarranke hasaaphinanna macciishshinkeronna sheshifachishinkero tashshi yaannonke. Qoleno Qullaawa Maxaafa xiinxallisate kaaˈlo hasiissunkero mittu woˈnaalshu noosi suwisaanchi ledonke xiinxallise woyyeessiˈra hasiissannonkere kulinkero hagiidhineemmo. Kuri baalunku roduuwi ninke kaaˈlitino daafira tashshi yaannonsa. Ninkeno roduuwanke kaaˈlate ninkeneeto shiqinshummoro togoo hagiirre afiˈra dandiineemmo. Yesuusi “Adhannonkunni aannohu baˈraaˈrinoho” yiino. (Soq. 20:35) Tenne woy wole doogganni soqqanshokki halashshiˈra hasiˈrittoro mixokki wonshiˈrate mayi kaaˈlannohe?

13. Mixo fushshiˈneemmo woyite maa qaaga hasiissannonke?

¹³ Leeltinokki mixo fushshidhooti. Lawishshaho, ‘Songote giddo albinni roore soqqama hasiˈreemmo’ yite hedattoha ikkara dandaanno. Ikkollana togoo mixo wonshiˈra dandaatto gara hattono tenne mixo wonshiˈroottotanna teˈee afa qarra ikkitahera dandiitanno. Hakko daafira leeltino mixo fushshiˈri. Mixokkinna tenne mixo wonshiˈrate hedoottohu hiittoonniitiro borreessite nafa amaxxa dandaatto.

14. Fushshiˈnoommo mixo biddi assiˈra hasiissannonkehu mayiraati?

¹⁴ Fushshiˈnoommo mixo biddi assiˈra hasiissannonke woyiti heeˈrara dandaanno. Mayira? Korkaatuno heeshshonke giddo iillannonke coye woˈmunni woˈma hooˈla didandiineemmo. Lawishshaho soqqamaasinchu Phaawuloosi Teselonqe katamira haaro songo xintantanno gede kaaˈlino. Qoleno isi hakko heeˈre haarote  Kiristaana ikkitinore kaaˈlate mixo fushshiˈrinoti dihuluullissannote. Kayinni iso giwanno manni katamunni fule haˈranno gede giddeessinosi. (Soq. 17:1-5, 10) Phaawuloosi hakko keeshshoommero, ammanate roduuwisi qarru giddo ubbanno. Ikkollana Phaawuloosi hexxo dimudhino. Hatteentenni isi iillinosi coye dandee saino. Gedensoonni isi, Teselonqe heedhannore haarote Kiristaana ikkitino roduuwa ayyaanaamittetenni kaaˈlanno gede Ximootewoosi hakkiira soyino. (1 Tes. 3:1-3) Ximootewoosi kaaˈlo hasiissannowa haˈre soqqamate isonooto shiqishino daafira Teleselonqe heeˈranno Kiristaani lowo geeshsha hagiidhiinoti dihuluullissannote!

15. Heeˈnoommo gari soorramanno woyite mixonke soorrantannohu hiittoonniiti? Lawishsha kuli.

¹⁵ Phaawuloosi, Teselonqe noo yannara iillinosirinni ronseemmori no. Mitte soqqanshote qoosso afiˈrate sharrammanni heeˈnoommoha ikkara dandaanno; kayinni wolqankera aleenni ikkino coyi iillinonke daafira tenne qoosso afiˈra didandiinoommo. (Ros. 9:11) Aterano togoori iillinoheha ikkiro wonshiˈra dandaattota wole mixo fushshiˈri. Teedinna Heyidi yinanni minaanninna minaama hatto assino. Insa giddo mitto dhiwanni waadino daafira Beeteeletenni agurte fultino. Ikkollana Yihowara noonsa baxilli insa soqqanshonsa halashshidhannota wole doogga hasidhanno gede kakkayisinonsa. Insa umo, woˈma yanna suwisaano ikkitino. Gedensoonni baxxitino suwisaano ikkitino; qoleno Teedi riqiwaancho woradu aliidi laˈˈaancho ikkanno gede qajeelsinisi. Hakkiinni kayinni woradu aliidi laˈˈaano soqqanshonsa uurrissanno diro soorrini. Hakko daafira Teedinna Heyidi xaate tenne soqqansho soqqama dandaannokkita huwati. Insa dadillitinoha ikkirono Yihowara wole doogganni soqqama dandiitannota huwattino. Teedi togo yiino: “Mittu gari soqqansho calla illachisha hasiissannonkekkita huwantoommo.”

16. Galatiyu Sokka 6:4​tenni maa ronseemmo?

¹⁶ Heeshshonke giddo iillannonkere woˈmunni woˈma hooˈla didandiineemmo. Hakko daafira Yihowa albaanni noonke waaga noonkete soqqanshote qoossonni keena woy noonke qoosso wolootunnite ledo heewisiisa dihasiissannonke. Heyidi togo yitino: “Kiˈne heeshsho wolootunnite ledo heewisiisa hanaffiniro hagiirriˈne baˈˈanno.” (Galatiyu Sokka 6:4 nabbawi.) Hakko daafira Yihowara soqqama dandiineemmo faro hasiˈra danchate. c

17. Uyinannihete soqqanshote qoossora ikkado ikkate maa assa dandaatto?

¹⁷ Heeshshokki bikkunnita assidhe hattono hasiisannokki asali giddora ea qorophite Yihowara albinni roore soqqamate qixxaawa dandaatto. Seeda yanna mixo wonshiˈrate kaaˈlitannoheta harancho yanna mixo fushshiˈri. Seeda yanna mixokki woˈma yanna suwisaancho ikke  soqqama ikkituro agurittokkinni kaaˈlaancho suwisaancho ikkite soqqama dandaatto? Mixokki songote soqqamaancho ikkite soqqama ikkituro, albinni roore qanchoho soqqamanna songokkira noore dhiwantinore woy geerra roduuwa xaˈma dandaatto? Konni garinni soqqante afiˈratto woˈnaalshi albillitte wole qoosso afiˈratto faro fanahera dandaanno. Uyinannihe looso baala diinaggaabbe loosate murciˈri.—Rom. 12:11.

18. Misile leellishshannonte gede Biverilii lawishshinni maa rosootto?

¹⁸ Diru akkalle amaddunkerono ayyaanaamittete mixo fushshiˈranna wonshiˈra dandiineemmo. Hanni 75 diro ikkannosete rodoo Biverilii woˈnaalsha laˈno. Ise qaafa hoˈlannohu buutote dhibbi waadannose. Ikkirono ise Qaagooshshu Ayyaani zamachira dancha gede soqqama halchitino. Hakko daafira ise mixo fushshidhino. Biverilii konni zamachira soqqamate fushshidino mixo wonshidhuti lowo geeshsha hagiidhitino. Ise assitinori wolootuno diinaggaabbe soqqantanno gede kakkayisinonsa. Geerru roduuwinke albi geeshsha soqqama dandiitannokkiha ikkirono, Yihowa loosonsa naadanno.—Far. 71:17, 18.

19. Fushshiˈra dandiineemmoti mite ayyaanaamittete mixo hiitteeti?

¹⁹ Wonshiˈra dandaatto mixo fushshiˈri. Yihowa baxannohe gede assitanno akatta lossiˈri. Maganinkeranna dirijjitesira albinni roore soqqamate kaaˈlitannohe dandoo rosi. Roduuwakki albinni roore kaaˈla dandaatto doogga hasiˈri. d Hatto assittoro Ximootewoosi gede Yihowa kaaˈlonni, “Lophakki mannu baalu afanno.”—1 Xim. 4:15.