1. Ino iaby, ohatsy, ty raha kendrè azontsika tratsiry?

 KRISTIANA marina tsika ka tena tea ani-Jehovah. Lafa manompo azy tsika le teantsika laha ze farani-soa ro ameantsika azy. Fe laha teantsika ty hahavita raha maro ho ani-Jehovah, le mila mametraky raha kendrè ara-panahy tsika. Ohatsy hoe miezaky hana toetsy kristiana, mianatsy raha tena ilà amy fanompoa, noho mila fomba mba hanampea olo. b

2. Manino tsika ro tokony hana raha kendrè ara-panahy noho hiezaky hanatratsy ani-raha rey?

² Manino tsika ro tokony haniry hanao fandrosoa? Satria ty hanao raha mahafalifaly ani-Babantsika be fitiava an-danitsy any iny ro tena vatan-draha amintsika. Falifaly Jehovah lafa mahita antsika mampiasa soa ty fahaizantsika amy fanompoa azy. Ankoatsini-zay, ta hanao fandrosoa koa tsika amy zay afaky manampy soa ani-rahalahy noho anabavintsika reo. (1 Tes. 4:9, 10) Samby afaky handroso ara-panahy iaby tsika, ndre fa ela ndre vo betibety ty nanompoantsika ani-Jehovah. Ndao hodinihintsika hoe akory ty azontsika anaova ani-zay.

3. Nampirisihini-apostoly Paoly hanao ino Timoty laha hentea ty 1 Timoty 4:12-16?

³ Mbo nimpamaraky Timoty tamy ie nanoratani-apostoly Paoly voalohany. Fa anti-panahy za-draharaha Timoty tamy zay, fe mbo nampirisiky azy handroso avao apostoly Paoly. (Vakio 1 Timoty 4:12-16.) Lafa dinihinao soa safàni-Paoly reo, le ho hitanao fa teany hiezahani-Timoty raha roe retoa: Voalohany, miezaky hana toetsy kristiana, ohatsy hoe fitiava,  finoa, noho faliova. Faharoe, miezaky hahay hamaky teny anatrehan’olo maro, handrisiky olo hafa, noho hampianatsy. Ndao hodinihintsika ty modelini-Timoty. Ho hitantsika amy zay hoe manino ty fiezaha hana raha kendrè voalanjalanja ro manampy antsika handroso ara-panahy. Hodinihintsika koa hoe ino ty azontsika atao mba hampitomboa ty fanompoantsika.

4. Laha hentea ty Filipianina 2:19-22, manino Timoty ro niazoni-Jehovah nampiasà?

⁴ Manino Timoty ro niazoni-Jehovah nampiasà? Satria nana toetsy niavaky ie. (Vakio Filipianina 2:19-22.) Hitantsika baka amy raha niresahini-Paoly mikasiky ani-Timoty rey fa olo niambany, tsy nivaliky, nazoto niasa, noho azo niantehera Timoty. Tena be fitiava ie sady nikarakara soa ty mpiara-manompo aminy. Ino ty vokany? Nitea azy Paoly sady natoky azy ka tsy nisalasala nanome azy andraikitsy sarotsy. (1 Kor. 4:17) Manahaky ani-Timoty, le ho tea antsika koa Jehovah ka hanome andraikitsy maro antsika amy fiangona eo laha miezaky hana toetsy teany tsika.​—Sal. 25:9; 138:6.

5. a) Ino ty azonao atao mba hahaizanao hoe ino ty toetsy mbo mila hasoavinao? b) Ta ho soa fanahy amin’olo hafa ranabavy tanora amy sary io. Ino ty ataony mba hanatratsira ani-raha kendreny zay?

⁵ Mifiliana toetsy raiky teanao hanana. Mivavaha le diniho hoe ino amy ty toetsinao ro mila hasoavy. Mifiliana toetsy raiky teanao hohasoavy. Azonao atao, ohatsy, ty miezaky mba tena hiferinay olo na mba hanam-paniria hanampy ani-rahalahy noho anabavinao reo. Na afaky miezaky iha mba hilongo soa amin’olo noho ho mora manenga hadisoa. Mety hitanao koa hoe tena hanampy anao ty miresaky amin’olo raiky tena namanao mba hanoro anao ani-ze raha mila hasoavinao.​—Ohab. 27:6.

6. Ino ty azonao atao laha misy toetsy teanao hanana?

⁶ Miezaha mafy hanatratsy ty raha kendrenao. Akory ty hanaovanao ani-zay? Toy misy raha raiky azonao atao: Anovo hay soa hoe ino toetsy teanao hohasoavy io. Ndao hatao hoe nanapa-kevitsy iha fa hiezaky mafy mba hahay hanenga hadisoa. Mety hanomboky hamaky noho hametsivetsy soa ty tantaran’olo nanenga hadisoa noho tsy nanenga hadisoa voaresaky amy Baiboly ao iha. Diniho ty ohatsini-Jesosy. Tena nanenga ty hadisoan’olo hafa ie. (Lioka 7:47, 48) Tsy nifantoky  tamy ty raha tsy nety nataon-drozy koa ie fa nifantoky tamy ze raha soa nivitan-drozy. Fe tsy nanahaky ani-zay Fariseo tamy androni-Jesosy rey satria “tsy nanisy dikany ty olo hafa” rozy. (Lioka 18:9) Eritsereto zao lafa iha baka nandiniky ani-ohatsy reo: ‘Manao akory ty fahitako ty olo hafa? Ino amy ty toetsin-drozy ro teako hifantoha?’ Ino ty azonao atao laha sarotsy aminao ty manenga hadisoa? Manaova lista, le sorato eo iaby ze toetsy soa ananan’olo iny. Bakeo eritsereto hoe: ‘Manao akory ty fahitani-Jesosy an’olo toy? Ho nanenga ty hadisoany va Jesosy?’ Laha manao ani-zay tsika le ho vitantsika ty hanova ty eritseritsintsika. Mety ho sarotsy amintsika amy voalohany ty hanenga ty hadisoan’olo nanao raha nampalahelo antsika. Fe laha tsika miezaky, le ho vitantsika avao ty hanenga hadisoa.

7. Laha hentea ty Ohabolana 22:29, ino ty mampiseho fa mampiasa mpiasa mahay Jehovah henanizao?

⁷ Azonao atao raha kendrè koa ty mianatsy raha tena ilà amy fanompoa. Eritsereto hoe firy ty isakin’olo ilà lafa misy Betela aory, na Efitrano Fivoriambe, na Efitrano Fanjakà. Maro amin’olo rey ro lasa nahay raha maro lafa niaraky niasa tamy rahalahy noho anabavy mana traikefa. Hitantsika amy sary eo io, fa samby mianatsy rahalahy noho anabavy reo satria tena ilà fahaizan-drozy zay mba hanampea amy fikojakojà Efitrano Fivoriambe noho Efitrano Fanjakà. Mampiasa mpiasa mahay Jehovah Ndranahary, azy “Mpanjakani-mandrakizay” iny, noho Kristy Jesosy, azy “Mpanjakani-mpanjaka” iny, mba hanaova raha bevata. (1 Tim. 1:17; 6:15; vakio Ohabolana 22:29.) Miasa mafy tsika mampiasa ty fahaizantsika, satria Jehovah ro teantsika hamea voninahitsy fa tsy ty vatantsika.​—Jaona 8:54.

8. Akory ty hahaizanao hoe ino ty raha hianaranao?

⁸ Mifiliana raha raiky teanao ho hay. Ino ty raha teanao hianara? Anontaneo ty anti-panahy amy fiangona misy anao na ty mpiandrakitsini-faritsinareo hoe ino ty raha eritseritin-drozy hoe azonao iezaha. Laha mivola aminao, ohatsy, rozy hoe hasoavo ty fahaizanao miresaky noho mampianatsy, le iangavio rozy mba hanampy anao hahita hoe amy azy manao akory iny ro mila iezahanao. Bakeo miezaha mafy, le hasoavo ze mila hasoavy. Akory ty hahavitanao ani-zay?

9. Laha misy raha teanao hianara, ino ty azonao atao mba hahaiza ani-raha iny?

⁹ Miezaha mafy hanatratsy ty raha kendrenao. Laha ta hahay hampianatsy, ohatsy, iha le azonao ianara soa ty bokikely hoe Miezaha Marè amy Vakiteny Noho Fampianara. Lafa mahazo anjara amy fivoria andavanandro iha, le azonao atao ty manontany rahalahy raiky mahay mba hijanjy ani-anjaranao iny alohani-hanaovanao azy am-pivoria any. Volano ie mba hanoro anao ani-ze raha mila hasoavinao. Omano alohaloha sandrany avao ty anjaranao. Ho hitan’olo amy zay hoe niezaky mafy iha sady azo atokisa.​—Ohab. 21:5; 2 Kor. 8:22.

10. Ino ty azontsika atao laha misy raha teantsika ho hay? Manomeza ohatsy.

¹⁰ Manao akory laha raha mbo tsy nataonao mihintsy ro teanao hianara kanefa tena sarotsy aminao ty manao ani-raha iny? Ka kivy fa miezaha avao! Eritsereto rahalahy mana anara Garry toy. Tsy de nahay namaky teny ie. Mbo tiarony avao tamy ie namaky teny tam-pivoria any rezay. Nimenatsy biby ie. Fe niezaky avao ie mba hahay hamaky teny. Nanampy azy hoasany ty fiofana niazony baka amy rahalahy mahay noho baka amy boky noho  gazetintsika rey, le lasa afaky manao lahateny amy Efitrano Fanjakà, amy fivoriambeni-faritsy, noho amy fivoriambeni-vondrom-paritsy ie henanizao!

11. Ino ty hanampy antsika ho afaky hanao raha maro amy fanompoa ani-Jehovah, manahaky nataoni-Timoty iny?

¹¹ Lasa mpandahateny noho mpampianatsy tena nahay va Timoty? Tsy mivola ani-zay ty Baiboly. Fe azo antoky hoe lasa nahay soa ty andraikitsiny Timoty satria norihiny ty torohevitsy nameani-Paoly azy. (2 Tim. 3:10) Laha tsika koa miezaky hanasoa ty fahaizantsika le ho afaky hanao raha maro amy fanompoa ani-Jehovah.

12. Ino ty raha fa nataon’olo ho anao?

¹² Tena mahasoa antsika ty fanampea baka amin’olo hafa. Maro biby ty raha ataon-drozy mba hanampea antsika. Laha marary an-dapotaly any, ohatsy, tsika, le falifaly tsika lafa misy anti-panahy baka amy Komity Mifandramby amy Hopitaly na Mpamangy Marary mitsidiky antsika. Lafa miatriky raha sarotsy tsika, le falifaly tsika lafa misy anti-panahy be fitiava manoka fotoa hijanjìna noho hampahereza antsika. Lafa tsika mila fanampea amy fampianara Baiboly, le falifaly tsika lafa misy mpisava lala za-draharaha maneky hiaraky mampianatsy amintsika noho manoro hevitsy antsika. Falifaly rahalahy noho anabavy iaby reo manampy antsika. Ho falifaly manahaky ani-zay koa tsika laha miezaky manampy ani-rahalahy noho anabavintsika reo. Nivola Jesosy hoe “mahasambatsy marè ty manome tany ty amea.” (Asa. 20:35) Mety ho ta hanao raha manahaky ani-reo iha mba hampitombonao ty fanompoanao ani-Jehovah. Ka ino ty hanampy anao hahavita ani-zay?

13. Ino ty raha tokony hotiarovintsika lafa tsika mametraky raha kendrè?

¹³ Henteo soa tsy no tsy mazava ty raha kendrenao. Mety hieritseritsy, ohatsy, iha hoe: ‘Ta hanao raha maro amy fiangona eo aho.’ Fe mety ho sarotsy ty hanatratsy raha manahaky ani-zay, sady tsy ho hainao mihintsy hoe fa nitratsinao va raha iny. Mametraha zany raha kendrè mazava noho voafaritsy soa. Azonao atao, ohatsy, ty manoratsy ani-raha kendrenao iny noho ty fomba hanatratsiranao azy.

14. Manino tsika ro mila mahay mandanjalanja lafa mametraky raha kendrè?

 ¹⁴ Mila mahay mandanjalanja koa tsika lafa mametraky raha kendrè. Fa manino? Satria tsy haintsika mihintsy hoe hanao akory ty raha iainantsika. Henteo moa raha nahazo ani-apostoly Paoly toy. Nanampy tamy fiforonani-fiangona vaovao ta Tesalonika tany ie. Azo antoky hoe anisani-raha nikendreny ty hoe hijano any, le hanampy ani-Kristiana vaovao reo. Fe nataoni-mpanohitsy rey ze hialàni-Paoly tamy tanà io tao. (Asa. 17:1-5, 10) Laha nijano tao Paoly, le ho niazon-draha rahalahiny reo. Fe niezaky nanampy an-drozy avao Paoly. Niay nifanaraky tamy fiovà zay ie. Tafara atoy, nirahiny ho a Tesalonika any Timoty mba hanampy an-drozy hana finoa matanjaky. (1 Tes. 3:1-3) Azo antoky fa nifalifaly biby Kristiana ta Tesalonika any rey ty nahita ani-Timoty parè handeha amy ze naniraha azy.

15. Manino ro mety hiova ty raha kendrentsika lafa miova ty raha iainantsika? Manomeza ohatsy.

¹⁵ Andrambesantsika fianara raha niainani-Paoly ta Tesalonika any io. Mety misy raha teantsika hatao, fe mety hiova ty raha iainantsika, ka lasa tsy tratsintsika raha kendrentsika iny. (Mpito. 9:11) Laha zay ty raha mahazo anao, le ekeo zay ka ze raha ho vitanao ro tratsiro. Zay mihintsy ty nataoni-mpivaly retoa. Ted noho Hiedi ty anaran-drozy. Voatery niala tamy Betela rozy satria nisy problemo amy resaky fahasalamà ty raiky amin-drozy. Fe tena tea ani-Jehovah rozy, le zay ro nanosiky an-drozy nila fomba hafa mba hampitomboa ty fanompoan-drozy. Voalohany, nanomboky nanao mpisava lala maharitsy rozy. Nivoatendry mpisava lala manoka rozy tafara atoy, le Ted niofana ho mpiandrakitsini-faritsy mpisolo toera. Fe niova ty tao takỳ amy mpiandraikitsini-faritsy. Haini-Ted noho Hiedi fa antitsy rozy ka tsy ho afaky hanohy ani-andraikitsy nanendrea an-drozy iny. Marina fa nikivy rozy, fe nihain-drozy fa misy fomba hafa azon-drozy atao amy fanompoa ani-Jehovah. Hoy Ted: “Lasa hainay hoe tsy voafetra ty raha azontsika atao amy fanompoa ani-Jehovah.”

16. Ino ty raha azontsika ianara baka amy Galatianina 6:4?

¹⁶ Tsy afaky mifily ty raha hiseho amy fiainantsika tsika. Ka soa zany laha tsy mieritseritsy tsika hoe ty fanendrea antsika ro mahavy antsika ho lafovily amy Jehovah. Tsy tokony hampitaha ty vatantsika amin’olo hafa tsika laha mahazo fanendrea rozy kanefa tsika tsy mahazo. Hoy Hiedi: “Lasa tsy ho falifaly iha laha mampitaha ty raha iainanao amy ty raha iainan’olo hafa.” (Vakio Galatianina 6:4.) Ty tena vatan-draha le hoe mila fomba tsika  mba hanampea olo noho hanompoa ani-Jehovah. c

17. Ino ty azonao atao laha misy tombontsoam-panompoa teanao ho azo?

¹⁷ Ho mora aminao ty hanao raha maro amy fanompoa ani-Jehovah laha mana fiaina tsotra avao iha sady tsy militsy trosa amy raha tsy ilà. Mametraha raha kendrè malinidiniky hanampy anao hanatratsy ani-raha bevata teanao ho tratsiry iny. Laha ty hanao mpisava lala maharitsy, ohatsy, ro raha bevata teanao ho tratsiry, tsy no afaky manao mpisava lala mpanampy tse iha sambola? Laha ta ho lasa mpikarakara fiangona ro raha kendrenao, afaky manompo bebe kokoa va iha, na mamangy marary na be tao amy fiangona misy anao eo? Laha henanizao iha ro manao ani-zay, le ho afaky hahazo tombontsoam-panompoa tsy nieritseretinao iha amy hoavy. Miezaha hamita soa ze raha anendrea anao.​—Rom. 12:11.

18. Ino ty ianaranao baka amy ranabavy Beverley? (Henteo koa sary io.)

¹⁸ Samby afaky mametraky noho manatratsy raha kendrè ara-panahy iaby tsika ndre tanora ndre antitsy. Diniho ty ohatsini-Beverley, anabavy 75 tao. Nimaro biby ty arety nahazo azy ka lasa nisarotsy aminy ty mandeha. Fe ta hanao ze fara heriny ie mba handrambesa anjara amy ezaky manoka amy Fahatiarova. Farany ie nametraky raha kendrè voafaritsy soa. Nifalifaly biby ranabavy Beverley, lafa nitratsiny raha nikendreny iny. Lasa nisy vokany tamin’olo hafa ezaky nataony rey, ka voatosiky hiasa mafy amy fanompoa ani-Jehovah rozy. Tena lafovily amy Jehovah ty asa ataoni-rahalahy noho anabavintsika be tao reo, ndre voafetra aza ty raha azon-drozy atao vokatsini-raha iainan-drozy.​—Sal. 71:17, 18.

19. Ino ty raha sisany azontsika atao raha kendrè?

¹⁹ Mametraha raha kendrè azonao tratsiry. Miezaha hana toetsy mahafalifaly ani-Jehovah. Mianara raha tena ilà amy fanompoa, soa ho azoni-Ndranaharintsika iny noho ty fandaminany hampiasà amy fomba maro iha. Milà fomba maro hanompoa ani-rahalahy noho anabavinao reo. d Hitahy anao Jehovah, manahaky ty nitahiany ani-Timoty, ka ho “hitan’olo iaby ty fandrosoanao.”​—1 Tim. 4:15.