1. Ekoma ɛmɔtshi wɛkɔnge w’okokaso ndawilela?

 ETENGO oyɛso Akristo wa nsɔsɔlɔ, iso ndjokaka Yehova ngandji efula. Iso nkɔpaka dj’olemo wookambelaso ndjala wɔlɔ efula. Koko djɛ nangha kenkfumɔ k’okombolaso nangha lá nkambo djɛ Yehova, iso ladjɛ ndawilela ekoma welá nyuma, ndjɔmbɔmba ndjala la wekeka w’Okristo, ndjeka djɛ ndjala l’akoka amɔtshi wa djonyi, la mpona topo t’okokaso nkambela anto ankina. *

2. Lamo oyɛso ladjɛ ndawilela ekoma welá nyuma edjinge nangha la wolo djɛ nkotshɛ?

² Lamo oyɛso ladjɛ ndapɛyɛ djɛ mfula lá nyuma? Ntondontondo, ladjikɛnde iso nkɔpaka nsasangɛ Papa kɛso kɛ ngandji kel’olongo. Yehova ndjalaka l’osasa winá w’ɔtɛnande tokamba la balo djɛso edjinge l’akoka waso ankfumɔ l’olemo wɔnde. Lonkina, iso nkombolaka mfula lá nyuma djɛ ndjala l’akoka wa nkótshɛ́ wananyɔ l’ankaana yɛso lá lɛdji l’efula. (1 Te. 4:9, 10) Ayale ilá kɛkɔnge kɛ sombewa akambo wa nsɔsɔlɔ, isankfumɔ nkoka mfula lá nyuma. Nyontshɔ tokolenda wopo w’okokaso nangha nkambo djɛsɔ.

3. Etengo yombotepelama lá 1 Timɔte 4:12-16, ɔpɔstɔlɔ Poolo ndakembɛ Timɔte djɛ nangha nge?

³ Winá wɔ ɔpɔstɔlɔ Poolo ndafunela Timɔte onkanda wɔnde wɔ ntondo, ko olangala wɔ wɔlɔ wɔsɔ amboshiyɛká ndjala ikokolo yembopakisɔ. Koko, Poolo okembɛka djɛ nde nkindjɛ mfula lá nyuma. (Wala 1 Timɔte 4:12-16.) Ntsha wɛ ntɔnɔla l’etepela wɛ Poolo, ɔngɛna ente nde akombolaka djɛ Timɔte mfula lá topo tope: Má nyɛnyɛ wekeka w’Okristo lá nanghedji djɛnde ndjɔmbɔmba ngandji, djawo, la nanghedji djɛ piyɔɔ  edjinge mfudjɛ akoka etengo wanɛ, badji djelá ntshandjawala, nkembɛ anto ankina la ndakanyɛ. La ndjɔmbɔmba kɛ Timɔte lá wɔɔngɔ, nyontshɔ tokolenda wopo w’okokaso ndawilelá ekoma wɛ wɔlɔ wekoka ntokotshɛ́ djɛ mfula lá nyuma. Tongoshishima lonkina topo tɔmɔtshi t’okokaso mfudjɛ olemo wɔso.

4. Lá nkilika Filipɛ 2:19-22, kɛkɔnge kekotshisá Timɔte djɛ ndjala onkambi wɔ Yehova wɔ ntshina?

⁴ Kɛkɔnge kekotshisa Timɔte djɛ ndjala onkambi wɔ Yehova wɔ ntshina efula? Wekeka wande wa wɔlɔ w’Okristo. (Wala Filipɛ 2:19-22.) Má wopo wɔ Poolo ndatepelaka lá nkambo djɛ Timɔte, iso nkoka nyɛna ente nde ayalaki l’okitshakitshɛ, la nkɔmano, l’entete, edjinge onto w’iyakoka ndjɛkɛ oloko. Nde okanaki ngandji edjinge ayakiyanyɛki efula lá nkambo djɛ wananyɔ wande. Eposelo weyalisa la nkambo djɛsɔ nde, Poolo akɔpaka Timɔte efula ko atakakandaki kaanga djɛ ndɔpɛyɛ edjito wɛ wolo. (1 Kɔ. 4:17) Wopo wɔk’ɔmɔ ndeke, tɔngɔkɔpama me Yehova edjinge tongoyala la ntshina l’otshumano winá wonanghaso la wolo djɛ ndjala la wekeka w’ɔkɔpande.​—Yee. 25:9; 138:6.

5. a) Okokɛ nangha nge djɛ nyɛnyɛ djekeka mɔtshi dj’Okristo? b) Etengo iyɔmbɛnyɛ lá ntshango, wopo wɔkɔnge nkaana k’oseka ilande welo djɛ nkotshɛ okoma wɔnde wɔ ndeka ndjala la nkɛtshi te anto ankina?

⁵ Sɔna okoma omɔtshi wɔ kɔɔ. Lɔmba edjinge shishima akambo amɔtshi walendana la lonto lɔko wɔyɛ ladjɛ ndɔngɔsɔla. Sɔna djekeka kɔɔ dj’okombolɛ ndalɔngɔsɔla. Ndjɔmbɔmba, opakoke mpona djɛ ndjala la nkɛtshi k’efula kana la mposɛ k’efula kɛ nsuka winako Akristo? Kana okoka nyɛna djonyi djɛ ndeka ndjala entshupa djɛ ndjila vu kana djɛ nyimeyɛ? Wɛ nkoka mba wapɔ má ndjopola ilongo yɛko imɔtshi yɛ ma ma djɛ nde nkoshimela lá akambo wakɔnge w’okokɛ ndalɔngɔsɔla.​—Woo. 27:6.

6. Wopo wɔkɔnge w’okokɛ ndjila welo djɛ nkotshɛ okoma wɔko wɔ nyɛnyɛ djekeka mɔtshi má nanghedji djɛko?

⁶ Ila welo djɛ nkotshɛ okoma wɔko. Wopo wɔkɔnge okokɛ nangha nkambo djɛsɔ? Yopo imɔtshi nde má ndjeka la nkɔmɛ nkfumɔ djekeka djɔkɔpɛ ndjala la djɛkɔ. Kɔsa djɛ ɔmbɔsa nkano djɛ ndeka ndjala entshupa djɛ nyimeyɛ anto ankina. Wɛ nkoka mbanga mbala la ntɔnɔla ndjɔmbɔmba yemá Bible y’anto wimeyɛki anto ankina la yɛ wanɛ watimeyanaki. Kokanela lá ndjɔmbɔmba kɛ Yeso. Nde ayalaki entshupa djɛ nyimeyɛ anto ankina. (Luka 7:47, 48) Lonkina nde atilaki yimba  l’evunga wɛwɔ koko lá kɛnɛ k’oyɛwɔ l’akoka wa nangha. Koko lá lɛdji lotshikitanyi, Afarisɛ wa l’etsho wɛ Yeso ‘w’ɔsaki anto ankina etengo nkete dj’anyanya.’ (Luka 18:9) M’ɔkɔngɔ wɔ ntɔnɔla lá ndjɔmbɔmba yɛsɔ, yawopola ente: ‘Ɔsakami anto ankina ngetemo? Wekeka wawɔ wakɔnge wa mɔmɔsɔna djɛ ndeka ndjila yimba l’eteyi?’ Ntsha olekɔ l’okakasano wɔ nyimeyɛ onto ɔmɔtshi, nangha listɛ lɔ wekeka ankfumɔ wa wɔlɔ w’onto wɔkɔ. Masɔ yawopola ente: ‘Wopo wɔkɔnge Yeso ɔsande onto wɔnɛ? Nde nkoka ndowimeyɛ?’ Nonghanyi kɛ wekelo wɔ nghɔsɔ nkoka nkokotshɛ́ djɛ wɛ ntshikitanyɛ ikanyi yɛko. Má bango, nkoka ndɔmba welo efula djɛ nyimeyɛ onto ɔmɔtshi wotokiyanyisa. Koko ntsha iso ndjila welo djɛ ndalɔngɔsɔla lá nkambo djɛsɔ, tongooleka ndjala entshupa dj’iso nyimeyɛ.

7. Lá nkilika Woongo 22:29, lá topo tɔkɔnge Yehova okambande l’enkambi welekɔ l’akoka lɔɔko kɛnɛ?

⁷ Okoma ɔmɔtshi w’okokɛ ndawilela nde, ndjeka djɛ mfudjɛ nkoka mɔtshi djɛ djonyi. Kokanela wopo w’oyɛwɔ la djonyi efula dj’ankambi y’amvulu yɛ Betɛlɛ, Mvulu yɛ nsanghanyɛ yɛ nkekete, la Amvulu y’Onkfumi. Efula k’ankambi wasɔ wekaka djɛ ndjala l’akoka w’okotshɛwɔ má nkamba esanga la wananyɔ l’ankaana yelekɔ l’awalo lá wayi w’opikelo. Etengo iyɔmbɛnyɛ lá ntshango, wananyɔ l’ankaana weka djɛ ndjala l’akoka w’oyɛwɔ la djonyi djɛ ndɔngɔsɔla Amvulu yɛ nsanghanyɛ yɛ nkekete la y’Onkfumi. Má yopo yɛsɔ kana tonkina, Yehova Ndjambe, ‘Nkfumi kɛ lotshinda,’ la Kristo Yeso, ‘Nkfumi kɛ . . . ankfumi,’ wanangha wayi wa wɔlɔ efula má lotshimbo lɔ enkambi welekɔ l’akoka. (1 Ti. 1:17; 6:15; wala Woongo 22:29.) Iso nkɔpaka nkamba la wolo edjinge nkamba l’akoka w’okotshɛso djɛ numɛ Yehova, koko ape iso sɔmɛlɛ.​—Dj. 8:54.

8. Wopo wɔkɔnge w’okokɛ ndjewa nkoka djɛ kɔɔ dj’oyɛ ladjɛ ndjeka?

⁸ Sɔna okoma ɔmɔtshi wɔ kɔɔ. Nkoka djɛkɔnge dj’okokɛ ndjeka? Opola tokokolo tɔ l’otshumano wɔnyo kana onami wɔ l’edjingadjinga kɛnyo nkoka dj’okanelawɔ dj’okokɛ ndjeka. Ndjɔmbɔmba, ntsha wambɔkɔlɔmba djɛ wɛ ndɔngɔsɔla akoka wako wa ntepela la wa ndakanyɛ, lɔmbawɔ wakokotshɛ djɛ wɛ nsipisoyɛ nkoka dj’ontepedji djɛ kɔɔ dj’oyɛ ladjɛ nkamba la djɛkɔ. Masɔ, nangha la wolo djɛ wɛ ndalɔngɔsɔla. Wopo wɔkɔnge w’okokɛ nangha nkambo djɛsɔ?

9. Okokɛ nangha nge djɛ nkotshɛ okoma wɔ ndjeka nkoka mɔtshi?

⁹ Ila welo djɛ nkotshɛ okoma wɔko. Kɔsa djɛ ɔkɔpa mfudjɛ akoka wako wa ndakanyɛ. Wɛ nkoka ndjeka la nkɔmɛ nkfumɔ inkankanda Yasha lo wadelo ndo l’olakanyelo. Winá wɔkɔpɛyɛwɔ odjito ɔmɔtshi lá losanghanyɛ lel’anteyi kɛ lobengo, wɛ nkoka ndjopola wɔnanyɔ wolekɔ l’akoka efula wa ndakanyɛ djɛ nkekameyɛ lá ntondo kɛ wɛ ntɔpɛyɛ djamba djɛkɔ ko masɔ nde ndɔkɔpɛyɛ alako lá wopo w’okokɛ ndalɔngɔsɔla. Lɔngɔsɔla djamba djɛko wɔlɔ lá ntondo apengo dj’anto nyɛna akoka wako toko, koko edjinge dj’iwɔ ndawɛkɛ tewɛ.​—Woo. 21:5; 2 Kɔ. 8:22.

10. Pɛyɛ ndjɔmbɔmba kɛ wopo w’okokɛ mfudjɛ nkoka mɔtshi dj’oyɛ la djonyi.

¹⁰ Iya otepelaso mo ntsha ɔkɔpa ndjeka nkambo mɔtshi djelekɔ wolo lewɛ djɛ nangha? Topekɔke! Wɔnanyɔ ɔmɔtshi w’etawɔ Garry ayalaki l’okakasano wɔ mbala wɔlɔ. Nde avungɔ wopo wɔ ndookaká nsɔnyi djɛ mbala la djoyi djɛ wolo lá losanghanyɛ l’otshumano. Koko nde akindjɛka ndjila welo djɛ ndalɔngɔsɔla. Winá wɔsɔ nde atepela ante, ngo má okfumbelo wɔ ndawa, nde amboyala l’akoka wa mpɛyɛ wamba lá Mvulu k’Onkfumi, lá nsanghanyɛ yɛ djingadjinga, la yɛ rɛjɔ!

11. Lá ndjɔmbɔmba kɛ Timɔte, kɛkɔnge kengotokotshɛ djɛ mbɛmba edjito enkina efula?

 ¹¹ Timɔte akomaka ontepedji kana wetsha wɔ wɔlɔ wolekɔ l’akoka efula? Bible mpatepela nkambo djɛsɔ. Koko ape l’ehamo Timɔte akotshɛki edjito wɛnde wɔlɔ efula ladjikɛnde nde akilikaki alako wa Poolo. (2 Ti. 3:10) Wopo wɔk’ɔmɔ ndeke, ntsha iso mfudjɛ akoka waso, tongotalekaka ndjala l’akoka wa mbɛmba edjito enkina efula.

12. Wopo wɔkɔnge owakaso wapɔ m’elemo w’anto ankina?

¹² Isankfumɔ mbaka wapɔ m’olemo w’anto ankina. Winá w’oyalakaso l’opitalo, iso ndjalaka l’osasa winá wɔ tokokolo tokamba lá Kɔmite kɛ djokanelo l’epitalo kana l’Iloyi yɛ wawembola wanɛ walekɔ l’elando otowembolawɔ. Winá w’opomanaso l’okakasano ɔmɔtshi wɔ wolo lá lowiko lɔso, iso ndjalaka l’osasa winá wɔ tokokolo ɔsawɔ winá wɔ ntekameyɛ la wɔ ntɔpɛyɛ osukɔ. Winá w’oyɛso la djonyi dj’okotshɔ wɔ ndɔndjɛ wekelo wɔ Bible, iso ndjalaka l’osasa winá wɔ y’atekalo yembopakisɔ awolande ntotshindjeyɛ te ombeki wɔso edjinge ntɔpɛyɛ alako wa djonyi. Wananyɔ l’ankaana inkfumɔ yɛsɔ walekɔ l’osasa djɛ ntokotshɛ́. Iso nkoka ndjala l’osasa wɔsɔ ntsha iso ndapɛyɛ djɛ nkambela wananyɔ waso. Yeso atepelaka ante: ‘Osasa woyɛ má mpɛyɛ ndeka wɔ ndongola.’ (Ele. 20:35) Ntsha wɛ nkombolaka mfudjɛ olemo wɔko lá yopo yɛsɔ kana lá inkina yɛfɔna la yɛsɔ, kɛkɔnge kekoka nkokotshɛ́ djɛ wɛ nkotshɛ okoma wɔko?

13. Winá w’oyawilelɛ okoma ɔmɔtshi, kɛkɔnge k’oyɛ ladjɛ nama lá wɔɔngɔ?

¹³ Wadjɛ dj’ipa ndawilela okoma wopalekɔ kɔɔ. Ndjɔmbɔmba, wɛ nkokaka ntepela ente, ‘lemi nkombolaka nangha akambo efula l’otshumano.’ Koko nkoka ndjala okakasano djɛ nkotshɛ wopo w’okoma wɔ nghɔsɔ, la opangoyala l’akoka wa ndjewa ntsha wombokotshɛma. Djɛkondeke, sɔna okoma wɔ kɔɔ. Wɛ nkoka mfuna kaanga okoma wɔkɔ la wopo w’okokɛ nkotshɛ.

14. Lamo oyɛso ladjɛ ndjala entshupa djɛ ndjekesanela l’akambo wa bango winá woyawilelaso ekoma?

¹⁴ Lonkina iso ladjɛ ndjekesanela l’etshikitano winá w’oyawilelaso ekoma. Lamo? Ladjikɛnde topalekɔ l’akoka wa ntshikitanyɛ akambo ankfumɔ watokomela. Ndjɔmbɔmba:  Ɔpɔstɔlɔ Poolo akotshɛka djɛ nkfumba otshumano wɔ bango lá Tesalɔnika. Ko ape l’ehamo nde ayawilelaka okoma wɔ ntshikala l’eteyi djɛ nkotshɛká Akristo wa bango wasɔ. Koko antonyi watshindaka Poolo djɛ nyima má ngando kɛsɔ la wolo. (Ele. 17:1-5, 10) Poolo otatshikalande, nde atakoka ndjila lowiko lɔ wananyɔ wande lá mbalaka. Koko Poolo atapekɔ. L’edjena kɛ nangha nghɔsɔ, nde ekelaka l’otshikitano wɔ bango wɔsɔ. L’ɔkɔngɔ, nde akambaka la Timɔte djɛ ntokotshɛ ehomba welá nyuma wɛ andjawodji yɛ bango yelá Tesalɔnikɛ. (1 Te. 3:1-3) Ɔsɔngo osasa wɔ ase Tesalɔnikɛ iyayale la wɔkɔ lá wopo wɔ Timɔte ndoyapɛyɛ djɛ ntokamba l’edjena kenkfumɔ k’oyɛwɔ la djonyi!

15. Wopo wɔkɔnge etshikitano wetokomelá lá lowiko oyɛwɔ l’eposelo lá ekoma w’oyawilelaso? Pɛyɛ ndjɔmbɔmba.

¹⁵ Iso nkoka mba olakanyelo má kɛnɛ kekomelisá Poolo lá Tesalɔnikɛ. Iso nkoka ndawilela okoma ɔmɔtshi, koko akambo welá lowiko lɔso nkoka ndotshikitaná ko ndotoshimba dj’ipa nkotshɛ okoma wɔkɔ. (Los. 9:11) Ntsha oyɛwɔnde nghɔsɔ lewɛ, yala entshupa djɛ ndawilela okoma onkina w’otshikitanyi w’okokɛ nkotshɛ. Kɛsɔ ndeke Ted nya Hiedi, wadji la wome ɔmɔtshi iyananghe. M’ɔtɛ w’olando ɔmɔtshi, iwɔ waposaka má Betɛlɛ. Koko ngandji kɛwɔ te Yehova k’atshindaka dj’iwɔ mpona topo tonkina tɔ mfudjɛ olemo wɔwɔ. Ntondontondo, iwɔ wawangaka olemo wɔ yat’ekalo yɛ lotshinda. Ko m’ɔkɔngɔ, watomaka etengo tat’ekalo totshikitanyi, ko wayɛka ndonkfumba Ted etengo onami w’edjingadjinga wokotshɛ́. Masɔ watshikitanyɛka ɛnɔnyi w’iyalɔmbaka enami wɛ djingadjinga. Ted nya Hiedi wasipisoyɛka ambɔ wapookoka nkamba olemo wɔsɔ ladjikɛnde wamboyala nkokolo efula. Kaanga yotasasangá l’otshikitano wɔsɔ, iwɔ wasipisoyɛka ambɔ iwɔ nkoka nkambela Yehova lá topo tonkina. Ted ntepelaka ante: “Tekaka djɛ topakoke ndapɛyɛ ngo lá yopo imɔ y’olemo.”

16. Olakanyelo wɔkɔnge w’okokaso mba má Ngalatiya 6:4?

¹⁶ Topalekɔ l’akoka wa nshimba ikakambo inkfumɔ yetokomela lá lowiko lɔso. Djɛkondeke, alekɔ djonyi dj’ipa nkanela ente tolekɔ la ntshina ngo m’ɔtɛ w’odjito ɔmɔtshi wokotshɛso kana ndawɛdjɛ l’anto ankina walekɔ l’odjito wɔ sopalekɔ la wɔkɔ. Hiedi mpakisolaka ante: “Opangoyala l’osasa ntsha wɛ ndjɛdjɛka lowiko lɔko la lɔ anto ankina.” (Wala Ngalatiya 6:4.) Alekɔ djonyi dj’iso mpona topo tonkina tɔ nkotshɛ́ anto ankina la nkambela Yehova. *

17. Kɛkɔnge k’okokɛ nangha djɛ nkotshɛ kɛnɛ kɛlɔmbama djɛ mba edjito?

 ¹⁷ Ongoyala l’akoka wa ndapɛyɛ efula l’olemo wɔ Yehova ntsha wɛ ntshika lowiko lɔko onghanghunya la ndjewɔ awasa. Yawilela ekoma wɛ daambi wekoka nkokotshɛ́ djɛ wɛ ndokotshɛ ekoma wɛ nkekete. Ndjɔmbɔmba, ntsha okoma wɔko w’ekekete oyɛwɔnde wɔ ndjala yat’ekalo yɛ lotshinda, opakoke nkamba etengo yat’ekalo y’itenyi angɔndɔ inkfumɔ? Ntsha okoma wɔko oyɛwɔnde wɔ nkamba etengo onkambi w’okotshɛ́, opakoke ndekaka mpetshɛ́ winá l’olemo w’ipoposanyɛ la mbembolaka wanɛ walekɔ l’elando edjinge tokokolo tɔnyo tel’otshumano wɔnyo? Balo dj’owɛ winá wɔsɔ nkoka nkokotshɛ́ djɛ wɛ ndowa edjito enkina l’etsho weyaye. Ɔsa nkano djɛ ndapɛyɛ tshɛ l’edjito enkfumɔ wɔkɔpɛyɛwɔ.​—Ɔrɔ. 12:11.

18. Etengo yɔmbɛnyɛ lá ntshango, olakanyelo wɔkɔnge w’owɛ má ndjɔmbɔmba kɛ nkaana Beverley?

¹⁸ Kaanga tomboyala nkokolo iso nkoka ndawilela la nkotshɛ ekoma welá nyuma. Tokolenda ndjɔmbɔmba kɛ nkaana kɛmɔtshi kelekɔ l’ɛnɔnyi 75 k’etawɔ Beverley. Nde ayalaki l’olando ɔmɔtshi wɔ wolo wowilelaki onkeka djɛ nkɛnda. Koko nde akɔpaka ndapɛyɛ tshɛ lá kampanyɛ kɛ Bokfɔ. Djɛkondeke nde ayawilelaka ekoma wɛ kɔɔ. Winá wɔ Beverley ndakotshɛ ekoma wɛnde welendana la kampanyɛ, nde ayalaka l’osasa efula. Welo wɛ ndile wetshindaka anto ankina djɛ ndapɛyɛ efula l’olemo w’ipoposanyɛ. Yehova ndɔsaka olemo wɔ wananyɔ l’ankaana yɛ nkokolo la ntshina, kaanga ntsha ekakasano welekɔ lawɔ ndawilelaka elelo lá kɛnɛ k’okokawɔ nangha.​—Yee. 71:17, 18.

19. Ekoma ɛmɔtshi welá nyuma wɛkɔnge w’okokaso ndawilelá?

¹⁹ Yawilela ekoma w’okokɛ nkotshɛ. Yala la wekeka wangosasangɛ Yehova. Fudjɛ akoka wangokokotshɛ djɛ wɛ ndjala la ntshina te Ndjambe la te olonghanyelo wɔnde. Hona topo tɔ nkambelaka wananyɔ l’ankana yɛko lá lɛdji l’efula. * Ngo ngete Timɔte, Yehova angokokotshɛ djɛ ‘efulelo wɛko nyɛnama papoo le anto ankfumɔ.’​—1 Ti. 4:15.