MUISAMBOA WA KULONGA 18
Mushindo wa kuata bipatshila bia mu kikudi na kuibilombasha
‘Epaane ngofu mu bino bintu ; wemwikale obe ooso, bwa’shi kwenda kwobe kwa ku kumpala kumwekwe patooka kwi bantu booso.’—1 TIM. 4:15, Kilombeeno Kipya 2014.
LOONO 84 Twipaane
KI’ABAKUILA MUANKA *
1. Abitungu tuate bipatshila kinyi bia mu kikudi?
ATUE bena Kidishitu ba binyibinyi tui bafule Yehowa ngofu. Atukumiina kupa Yehowa ki buwa kiatudi nakio mu mudimo waye. Anka bua kukita kioso akitungu mu mudimo wa Yehowa, abitungu tuate bipatshila, bu kuikala na ngikashi ya buina Kidishitu, kulonga mayele aakuasha, na kukimba mishindo ya kukuasha bangi. *
2. Buakinyi abitungu tuiatshile bipatshila bia mu kikudi na tufube ngofu bua kui bilombasha?
2 Buakinyi abitungu tuikale na lukalo lua kuenda kumpala mu kikudi? Kia kumpala, atukumiina kusangasha Nshetu sha kifulo e muiyilu. Yehowa ekala na muloo nsaa yamono atufubisha ngikashi yetu ngofu mu mudimo waye. Kia kabidi, atukumiina kuenda kumpala mu kikudi bua kumona mushindo wa kukuasha bakuetu balume na bakashi kalolo. (1 Tes. 4:9, 10) Sunga tatudi na bipua bi bungi mu bia binyibinyi, abitungu’shi atue boso tuende kumpala mu kikudi. Tutaluuleyi biatudi balombene kuibikita.
3. Muyile bi 1 Timote 4:12-16, Mpoolo mutumibua baadi munyingishe Timote bua kukita kinyi?
3 Nsaa ibafundile Mpoolo mutumibua mukanda waye wa kumpala kui Timote, yawa nsongualume e buwa baadi mupue kuikala bu mukulu munda mua mafuku e bungi. Anka Mpoolo baadi mumunyingishe bua kutungunuka na kuenda kumpala mu kikudi. (Badika 1 Timote 4:12-16.) Nsaa yobadika ano mayi a Mpoolo omono’shi baadi na lukalo lua’shi Timote ende kumpala mu ino mianda ibidi: pa kuikala na ngikashi ya mu kikudi bu kifulo, lukumiino, na buiselele na kulongamisha mayele bu kubadika munkatshi a bantu, kulanga, na kulongiesha. Atutaluula kileshesho kia Timote bua kumona mushindo wikale kuata bipatshila bi buwa akuitukuasha bua kuenda kumpala mu kikudi. Atutaluula dingi ingi mishindo yatudi balombene kutamisha mudimo wetu wa bulungudi.
IKALA NA NGIKASHI YA BUINA KIDISHITU
4. Muyile Bena-Fidipe 2:19-22, nkinyi kibaadi kikashe Timote bu mufubi a Yehowa e na muulo?
4 Nkinyi kibaadi kikashe Timote bu mufubi a Yehowa e na muulo? Nyi ngikashi yaye wa buina Kidishitu ibaadi ayimueneka. (Badika Bena-Fidipe 2:19-22.) Muyile abilesha Mpoolo, bua Timote atumono’shi baadi na kuiyisha, lulamato, kishima, na akukulupila. Baadi mufule bakuetu na kuibapasukila ngofu. Bu kipeta, Mpoolo baadi mufule Timote na ta baadi ekoko bua kumupa mashito e bukopo nya. (1 Kod. 4:17) Mu mushindo umune Yehowa etufulu na atuikala na muulo mu kakongie nsaa yatudi na ngikashi yadi mufule.—Mis. 25:9; 138:6.
Tala eyikashi dia buina Kidishitu diodi mufule ngofu, na diodi mulombene kuikala nadio (Tala kikoso 5-6)
5. (a) Mushindo kinyi odia kuata kitshibilo pabitale eyikashi dia buina Kidishitu aditungu’shi wekale nadio? (b) Anka bu biatuibimono mu kifuatulo, mushindo kinyi wi uno mukuetu mukashi nsongua akitshi muaye mooso bua kulombasha kepatshila kaye ka kuitula pa mbalo ya bangi?
5 Sangula kepatshila kampanda. Ela nteko na onangushene pa kipindi kampanda kia mu bumuntu bobe akitungu’shi olumbuule. Sangula eyikashi dimune aditungu’shi olumbuule. Bu kileshesho, we mulombene kuata kitshibilo kia kulonga bia kuikala wetuulu pa mbalo ya bangi, sunga kunyingisha lukalo lobe lua kukuasha bakuenu balume na bakashi. Okumiina kuikala mu butaale na bangi na kuibafuilanga lusa su? We mulombene kupeta bukuashi pa kuipushanga kuuku odi mukulupile bua nkulungula kiodi mulombene kukita bua kulumbuula.—Nki. 27:6.
6. Mushindo kinyi oodi mulombene kufuba bua kulombasha kepatshila koobe ka kuikala na eyikashi kampanda?
6 Ekitshishe bua kulombasha kepatshila koobe. We kuibikita naminyi? Mushindo umune wa kuibikita, mpa kulonga kalolo eyikashi aditingu’shi tulumbuule. Tupuandikishe’shi we muate kitshibilo kia kufuilanga bangi lusa. We mulombene kubanga kulonga na kunangushena pabitale bileshesho bia bantu ba mu Bible babaadi na bukidi bua kufuila bangi lusa na bia bashi baadi bafuile bangi lusa. Tutaluule kileshesho kia Yesu. Baadi akumiina kufuila bangi lusa. (Luk. 7:47, 48) Dingi, ta baadi emeena pa bilubilo biabo nya, baadi atuulu binangu ku kiabadi balombene kukita. Anka ba Fadiseo ba mu mafuku a Yesu “babamonanga bangi bantu bu kushii kintu.” (Luk. 18:9, Kilombeeno Kipya 2014) Kunyima kua kunangushena ku bino bileshesho eyipushe’shi: ‘Nkinyi kiamonaa mui bangi? Nasangulaa kuimena pa ngikashi kinyi yabadi nayo?’ Su ta mbikubofuile bua’shi ofuile muntu lusa, tompa kufunda mulongo wa ngikashi i buwa ya yawa muntu. Akupu weyipushe’shi: ‘Yesu amonaa uno muntu mushindo kinyi? Mmulombene kumufuila lusa su?’ Kulonga mu uno mushindo, nkulombene nkukuasha bua kushintuula mueneno oobe. Bua musango wa kumpala, mbilombene kuituikeela bukopo bua kufuila muntu ekele muituluishishe lusa. Anka su tu batungunuka na kuitatshisha pabitale uno muanda, mu kuenda kua mafuku atuikala atufuila bangi lusa kushi lukalakashi.
LONGA MAYELE AAKUASHA
Longiesha bangi bua kulumbuula bintu mu nshibo yetu ya Bufumu (Tala kikoso 7) *
7. Mu kuipushena na Nkindji 22:29, mu mishindo kinyi mukuete Yehowa kufubisha bantu abauku kufuba kalolo lelo uno?
7 Kangi kepatshila akatungu’shi wekale nako nka kulonga mayele aakuasha. Banda kutala bungi bua bafubi abutungu bua kufuba ku mashibo a Betele, mashibo a Bikongeeno, na mashibo a Bufumu. Be bungi ba kuabadi mbalongie bia kuikala na ino ngobesha pa kufuba pamune na bakuetu balume na bakashi abauku bia kukita ino midimo kalolo. Anka bu biatuibimono mu kifuatulo, bakuetu boso balume na bakashi bakuete kulonga mayele ena muulo aakuasha bua kubamba mashibo a bikongeno na mashibo a Bufumu. Mu ino mishindo na mu ingi, Yehowa Efile Mukulu, ‘Mfumu a ikalayika,’ na Kidishitu Yesu, ‘Mfumu a ba . . . mfumu,’ bakuete kukita midimo ya kukanya ku bukuashi bua bantu abauku kufuba kalolo. (1 Tim. 1:17; 6:15; badika Nkindji 22:29.) Atukumiina kukita muetu mooso na kufubisha ngobesha yetu bua kutumibisha Yehowa, kushi bua kuitumbisha atue banabene.—Yo. 8:54.
8. Mushindo kinyi odi mulombene kusangula mayele odia kulonga?
8 Sangula mayele kampanda okumiina kulonga. Mayele kinyi odi mulombene kulonga? Ipusha bakulu ba mu kakongie keenu na pangi mukunkushi a kifunda, bua’shi bakulungule mayele kampanda aatungu’shi olongie. Bu kileshesho, su bakulungula’shi abitungu olongamishe ngobesha yoobe ya kuakula na kulongiesha, ebayipushe bakulungule ngikashi kampanda ya mu ngakuilo ayitungu’shi olumbuule. Akupu obangie kuikitshisha bua kuiyilumbula. We kuibikita mushindo kinyi?
9. Mushindo kinyi odi mulombene kulombasha kepatshila koobe ka kulonga mayele kampanda?
9 Ekitshishe bua kulombasha kepatshila koobe. Puandikisha’shi okumiina kulongamisha ngobesha yoobe ya kulongiesha. We mulombene kuilongiela broshire a Epaane mu kubadika na kulongyesha. Su abakupa muisambo mu bisangilo munkatshi mua lubingo, we mulombene kuipusha mukuetu auku kulongiesha kalolo, bua’shi akutemeshe kumpala kodia nkakita wawa muisambo mu bisangilo, na akulungule ma mbalo aatungushi olumbuule. Lumbuula muisambo obe kumpala kua nsaa bilombene’shi bantu bamona biokuete kuitatshisha na’shi we muntu akukulupila.—Nki. 21:5; 2 Kod. 8:22.
10. Tuusha kileshesho kia mushindo watudia kulonga bia kutamisha mayele.
10 We mulombene kukita naminyi su kepatshila koobe nkakukita mayele kampanda aamuekaa bu e bukopo koodi? Tokookanga! Ungi mukuetu abetanyina bu Garry ta baadi auku kubadika kalolo nya. Atentekiesha mushindo ubaadi mukalakashue nsaa ibatompele kubadika n’eyi dibukopo mu bisangilo bia kakongie. Anka batungunukile na kukita muaye mooso bua kulumbula mushindo waye wa kubadika. Amba binobino’shi pa muanda wa malongiesha aadi mupete, e na mushindo wadia kukita miisambo ku nshibo wa Bufumu, ku bikongeeno bia kifunda, na ku bikongeeno bia mafuku asatu!
11. Anka bu Timote, nkinyi kilombene kuitukuasha bua kuikala na ngobesha ya kukita bi bungi mu mudimo watufubila Yehowa?
11 Timote baadi mufikie muntu auku kukita miisambo kalolo na kulongiesha kalolo naminyi? Bible te biakula nya. Anka, kushi mpaka Timote baadi muende kumpala ngofu mu kulombasha kua mashito aye, pa kulonda elango dia Mpoolo. (2 Tim. 3:10) Mu mushindo umune, su tubapete mayele kampanda, atuikala na ngobesha ya kukita bi bungi mu mudimo watufubila Yehowa.
KIMBA MISHINDO YA KUKUASHA BANGI
12. Mushindo kinyi odi mupete bukuashi bua bangi?
12 Atue boso tuibapue kupeta bukuashi bua bangi. Nsaa yatudi na maladi ku lupitalo, atuikalaa na muloo nsaa yabafiki mu kuitutala kui bakulu abafubaa mu Komite a kuipushena na ba munganga, sunga Tusaka tua kutala bantu abakumbu. Nsaa yatudi na lukalakashi lui bukopo mu nshalelo etu, atuikala na muloo apetupasukila mukulu na kuata nsaa ya kuituteemesha na kuitunyingisha. Nsaa yatudi na lukalo lua bukuashi bua kulonga Bible na muntu, atuikala na muloo su mbala-mashinda bakumiina kupetekielua nsaa ya tukuete kulonga Bible na muntu na kuitulesha ma mbalo aatungu kulumbuula. Bano bakuetu balume na bakashi boso be na muloo wa kuitukuasha. Atuikala na muloo nsaa yatuipana mu kukuasha bangi. Yesu bambile’shi: ‘Muloo wa kupaana ngukile wa kupebwa.’ (Bik. 20:35) Su okumiina kutamisha mudimo oobe, mu ino mishindo sunga ingi i mumune na ino, nkinyi kilombene nkukuasha bua kukumbasha bipatshila biobe?
13. Nsaa yatuata kepatshila, nkinyi akitungu’shi tulamiine mu binangu?
13 Tokumanga kuata kepatshila kashi kemeene pa muanda kampanda. Bu kileshesho, we mulombene kupuandikisha’shi, ‘Nakumiina kukita bi bungi mu kakongie.’ Anka, mbilombene kuikala bukopo bodia kuuka mushindo odia kulombasha kano kepatshila, na we mulombene kumona’shi bi bukopo bodia kuuka su we mupue kuikalombasha. Biabia ata kepatshila kampanda kushi kukumakana. We mulombene kufunda kepatshila mpa na mushindo okumiina kuikalombasha.
14. Buakinyi abitungu tuikale na nkatshinkatshi nsaa yatuata bipatshila?
14 Nsaa yatuata kepatshila abitungu dingi tuikale na katshinkantshi. Buakinyi? Muanda ta tui na matalua ku mianda ilombene kuitufuila mu nshalelo etu nya. Tuate kileshesho: Mpoolo mutumibua baadi mukuashe bua kutuula kakongie kapia mu kibundi kia Tesalonika. Na kushi mpaka baadi na lukalo lua kushaala muanka buadia kukuasha baaba bena Kidishitu bapia. Anka beshikuanyi abakitshiine muabo mooso bua kutusha Mpoolo mu lupata. (Bik. 17:1-5, 10) Su Mpoolo baadi mushaale muanka, baadi mulombene kutuula bakuabo mu masaku. Anka Mpoolo tamukokie nya. Baadi mukumiine kuakua kushintuluka kua mianda mu nshalelo aye. Kunyima batumine Timote buadia nkakuasha baaba bena Kidishitu ba mu Tesalonika, bua kuibakuasha bapete lukumiino lui bukopo. (1 Tes. 3:1-3) Kushi mpaka, bena Tesalonika babaadi na muloo wa kumona’shi Timote epaana bua kuenda mbalo yoso i lukalo lua bukuashi!
15. Mushindo kinyi ulombene kushintuluka bipatshila bietu nsaa ayishintuluka mianda mu nshalelo etu? Tuusha kileshesho.
15 Tui kulongiela ku kileshesho kia Mpoolo mu Tesalonika. Tui balombene kuikala na kepatshila anka mianda ya mu nshalelo eetu ngilombene kushintuluka, na yetukutshishua kulombasha kepatshila keetu. (Mul. 9:11) Su bino bia kukitshikila, kumiina kushintuula kepatshila na kuata kepatshila koodi mulombene kulombasha. Bino nyi bibakitshine ungi mulume na mukashi aye abetanyina bu Ted na Hiedi. Pa muanda wa maladi babakatukile ku betele. Anka, kifulo kiabo bua Yehowa kibaadi kibatakule bua kukimba ingi mishindo ya kutamisha mudimo wabo wa bulungudi. Kia kumpala, ababangile mudimo wa bu ba mbala-mashinda ba mieshi yoso. Kunyima babadi bebatuule bu ba mbala-mashinda ba nsaa yoso, na Ted abadi bamulongieshe bua kuikala bu mukunkushi a kifunda mukuashi. Akupu bibaadi abitungu’shi bemikie mudimo wabo wa kukunkusha kifunda muanda abadi bapue kukisha bipua abitungu’shi mukunkushi a kifunda ekale nabio. Ted na Hiedi babamuene’shi pa muanda wa bununu ta be na mushindo wabadia kufuba dingi uno mudimo. Sunga bibaabadi babofule kuishimba, babaadi bashingule’shi mbalombene kufubila Yehowa mu ingi mishindo. Ted amba’shi: “Tui balongie’shi ta tui balombene kutuula binangu bietu penda ku mushindo umune wa kufubila Yehowa nya.”
16. Ndilongiesha kinyi di’atulongiela mu Bena-Ngalatea 6:4?
16 Ta tui na matalua ku mianda yoso ilombene kuitufuila mu nshalelo etu nya. Biabia ki na muloo, nkupela kupuandikisha’shi tui na muulo ku meso kua Yehowa pa muanda wa mashito atudi nao, sunga kuipuandikisha na bangi be na mashito atushi nao. Hiedi amba’shi: “Muloo oobe aushimina nsaa yopuandikisha nshalelo odi naye na nshalelo e naye namu bangi.” (Badika Bena-Ngalatea 6:4.) Bi na muulo buatudia kukimba mishindo yatudia kukuasha bangi bua kufubila Yehowa. *
17. Nkinyi kiodi mulombene kukita bua kukumbasha ngikashi itekibue bua kupeta mashito mu kakongie?
17 Mbilombene nkubofuila bua kukita bibungi mu mudimo wa Yehowa, su we na nshalelo mupeelepeele na opele kuata bishiyo bi shi na muulo. Ata bipatshila bipeela abikukuasha bua kuata bipatshila bikata. Bu kileshesho, su kipatshila kiobe kikata nkia kuikala mbala-mashinda a mieshi yoso, we mulombene kufuba bu mbala-mashinda mukuashi kubanga binobino su? Su kepatshila kobe nka kuikala mufubi a midimo, we mulombene kubanga kulambukisha nsaa i bungi mu bulungudi, kuenda mu kutala abakumbu na abapu kununupa mu kakongie kenu su? Mianda yolongo binobino ngilombene nkushituila kibelo kia kupeta mashito akata mu mafuku e kumpala. Ata kitshibilo kia kukita mupunda ngobesha yoobe mu mudimo oso wabakupa.—Lom. 12:11.
Sangula kepatshila kamune kodi mulombene kulombasha (Tala kikoso 18) *
18. Anka bu bi’atuibimono mu kifuatulo, nkinyi akikulongiesha kileshesho kia Beverley?
18 Bununu ta mbulombene kui tukutshishua bua kuata bipatshila na kuibilombasha nya. Tuate kileshesho kia mukuetu mukashi abetanyina bu Beverley taadi na bipua 75. Baadi na mukumbo wi bukupo ubadi aumukutshikua bua kutambuka. Anka baadi akumiina kukuatshishena kampanye ka Kitentekiesho. Aye nkuata bipatshila kampanda. Nsaa ibadi Beverley mulombashe bipatshila biaye bua kampanye, baadi na muloo wi bungi. Kuitatshisha kuaye kubadi kutakule bangi buabadia kufuba ngofu mu bulungudi. Yehowa ataa mudimo wa bakuetu balume na bakashi babapu kukula na muulo, sunga bekala’shi nshalelo abo ebakutshishua kukita biabakumiina kukita.—Mis. 71:17, 18.
19. Mbingi bipatshila kinyi bia mu kikudi biatudi balombene kuata?
19 Eatshile bipatshila biodi mulombene kulombasha. Ikala na ngikashi i buwa ayisankisha Yehowa. Longa mayele kampanda alombene nkukuasha bua’shi Efile Mukulu etu na ndumbuluilo aye bakufubishe. Kimba mishindo ya kufubila bakuenu balume na bakashi nsaa yooso. * Anka bu Timote, miabi ya Yehowa ayikukuasha ‘bwa’shi kwenda kwobe kwa ku kumpala kumwekwe patooka kwi bantu booso.’—1 Tim. 4:15, Kilombeeno Kipya 2014.
LOONO 38 Akakunyingisha
^ par. 5 Timote baadi mulungudi a mukandu wibuwa auku kulongiesha kalolo. Anka Mpoolo mutumibua baadi mumunyingishe buadia kutungunuka na kuenda kumpala mu kikudi. Pa muanda Timote balondele elango dia Mpoolo, Yehowa baadi mulombene kumufubisha ngofu. Na baadi mulombene kukuasha bakuabo balume na bakashi ngofu. We bu Timote na lukalo lua kufubila Yehowa na kukuasha bakuenu balume na bakashi su? Kushi mpaka, ngi biodi. Mbipatshila kinyi bilombene nkukuasha bua kuibikita? Na nkinyi akitungu’shi okite bua kuata bino bipatshila na kuibilombasha?
^ par. 1 KISHIMA KIABADI BAPATUULE: Bipatshila bia mu kikudi abipushisha kintu kioso kiatudi balombene kuitatshisha bua kukita bua kufubila Yehowa ngofu na kumuikasha na muloo.
^ par. 16 Tala mukanda wa Belumbuule bwa kukita akikyebe Yehowa mu mutue wa muanda awamba’shi: “Kwenda mu kufuba mbalo i lukalo lwa balungudi bebungi” mu shapitre a 10, kik. 6-9.
^ par. 19 Tala mukanda wa We kuikala na muloo bua loso! Mu dilongiesha 60 mu mutue wa muanda awamba’shi: “Tungunuka na kunyingisha kipuano kiobe na Yehowa.”
