1. Un pei maaka u sa buta da useei?

 U DI u da tuutuu Keesitu sëmbë, mbei u lobi Jehovah gaanfa seei. U kë du hii soni di u sa du a di dini di u ta dini Jehovah. Ma fuu sa du di soni aki, nöö u musu buta maaka da useei a di dini di u ta dini Jehovah. U sa mbei möiti u ko abi dee fasi dee Keesitu sëmbë musu abi, u sa lei u du wan wooko u heepi di ölganisaasi, söseei u sa suku fasi u heepi wotowan. b

2. Faandi mbei u musu mbei möiti fuu buta maaka da useei, söseei fuu dou de?

² Faandi mbei u musu mbei möiti fuu ko dë möön bunu dinima u Jehovah? Di möön fanöudu soni, hën da u kë di Tata fuu a liba ala wai ku u. Jehovah ta wai te a ta si taa u ta wooko ku di köni di u abi u dini ën. Boiti di dë, u kë ko dë möön bunu dinima u Jehovah, u di u kë heepi dee baaa ku dee sisa fuu möön gaanfa (1 Tes. 4:9, 10). Aluwasi un longi u dë a di tuutuu lei, tökuseei hii u tuu sa mbei möiti u ko dë möön bunu dinima u Jehovah. Boo luku unfa u sa du di soni aki.

3. Andi apösutu Paulosu bi da Timoteo taanga faa du, te u luku 1 Timoteo 4:12-16?

³ Timoteo bi dë wan njönku kijoo, söseei a bi dë wan gaanwomi u kemeente di apösutu Paulosu bi manda di fosu biifi dëën. A bi ta du di wooko fëën a wan bunu fasi. Ma hii fa a bi dë sö, tökuseei Paulosu bi dëën taanga faa mbei möiti u ko dë wan möön bunu dinima u Jehovah. (Lesi 1 Timoteo 4:12-16.)  Te i ta lesi dee soni di Paulosu bi sikifi, nöö joo si taa a bi piki Timoteo taa a bi musu du tu soni di bi o mbei a go a fesi a di biibi. A bi musu mbei möiti u ko möön abi fasi di Keesitu sëmbë musu abi. Fasi kuma lobi, biibi ku di tja di a bi musu ta tja hënseei a wan bunu fasi. Söseei a bi musu mbei möiti u lesi möön bunu, u da sëmbë taanga a wan möön bunu fasi, söseei a bi musu lei sëmbë soni a wan möön bunu fasi. Woo luku unfa di woto u Timoteo sa heepi u fuu buta bunu maaka da useei di o mbei taa u toon möön bunu dinima u Jehovah. Söseei woo luku wantu fasi fa u sa du möön soni a di diniwooko fuu.

4. Faandi mbei u sa taki taa Timoteo bi dë wan bunu dinima u Jehovah, te u luku Filipi 2:19-22?

⁴ Faandi mbei u sa taki taa Timoteo bi dë wan bunu dinima u Jehovah? Wë u di a bi abi dee fasi dee wan Keesitu sëmbë musu abi. (Lesi Filipi 2:19-22.) Dee soni dee Paulosu bi taki u Timoteo ta lei u taa Timoteo bi abi sakafasi, taa a bi ta hoi hënseei a wotowan, taa a bi ta wooko taanga, söseei taa a bi dë u futoou. A bi lobi dee baaa ku dee sisa fëën, söseei a bi ta booko hën hedi ku de. Dee soni aki bi mbei taa Paulosu bi ko lobi Timoteo gaanfa seei, nöö fëën mbei an bi ta fëëë u dëën gaan faantiwöutu (1 Kol. 4:17). Ee u ta mbei möiti u ko abi dee fasi di Jehovah lobi, nöö Jehovah o lobi u, söseei woo sa möön heepi di kemeente.​—Ps. 25:9; 138:6.

5. (a) Unfa i sa ko sabi na undi u dee fasi dee i abi i musu wooko nëën faa ko möön bunu? (b) Te u luku di peentje, nöö unfa di möön njönku sisa ta mbei möiti u dou di maaka di a buta u lei taa a ta möön fii da wotowan?

⁵ Buta wan maaka di i kë dou. Begi Jehovah, nöö i luku undi u dee fasi dee i abi dë fanöudu fii wooko nëën faa ko möön bunu, nöö i buta pakisei nëën. Kandë joo ko si taa i musu ta möön fii da wotowan nasö taa i musu ta möön dë kabakaba u heepi dee baaa ku dee sisa fii. Nasö kandë joo ko si taa i musu ta möön libi fiifii ku wotowan, söseei taa i musu ta möön da de paadon. Kandë i sa hakisi wan gaan mati fii faa heepi i fii du dee soni aki möön bunu.​—Nöng. 27:6.

6. Andi i sa du fii sa ko abi möön bunu fasi?

⁶ Mbei möiti u dou di maaka fii. Unfa i sa du di soni dë? Wan fasi fa i sa du ën, hën da te i ta tei i ten u öndösuku soni di ta taki u di fasi di i kë wooko nëën. Boo taa ee i kë ko ta möön  da sëmbë paadon, nöö a bi o bunu fii lesi soni di ta taki u di fasi dë. A bi o bunu tu fii kai pakisei a woto u sëmbë di dë a Bëibel, di bi lo’ u da wotowan paadon, söseei u sëmbë di an bi lo’ u da wotowan paadon. Buta pakisei a di fasi fa Jesosi bi ta du soni. Hii juu a bi ta dë kabakaba u da wotowan paadon (Luk. 7:47, 48). An bi ta buta pakisei a dee föutu u de, ma a bi ta buta pakisei a dee bunu soni di de bi sa du. Ma dee Faliseima de de bi ta „wisiwasi otowan” (Luk. 18:9). Te i kai pakisei a dee woto aki te i kaba, nöö hakisi iseei dee soni aki: ’Unfa mi ta si wotowan? Na undi u dee fasi u de mi ta buta pakisei?’ Ee a ta taanga da i fii da wan sëmbë paadon, nöö mbei möiti fii sikifi hii dee bunu fasi fëën buta a wan pampia. Baka di dë, nöö i hakisi iseei taa: ’Unfa Jesosi ta si di sëmbë aki? A bi o dëën paadon u?’ Ee u du di soni aki, nöö a sa heepi u fuu tooka di fasi fa u ta pakisei. Kandë bigibigi a o dë fuu mbei taanga möiti fuu da wan sëmbë paadon te a du wan soni ku u di hati u. Ma ee u ta mbei di möiti dë go dou, nöö pikipiki an o ta taanga da u sö möön fuu da wotowan paadon.

7. Na un fasi Jehovah ta wooko ku baaa ku sisa di sa u du wan wooko, te u luku Nöngö 22:29?

⁷ Wan woto maaka di i sa buta da iseei, hën da fii lei wan wooko u heepi di ölganisaasi. Pakisei dee sömëni baaa ku sisa di de abi fanöudu u heepi mbei Bëtëli, kamian ka u ta hoi gaan komakandi ku Könuköndë zali. Sömëni baaa ku sisa ko sa u du dee wooko aki, u di de ta wooko makandi ku wotowan di sa’ u du dee wooko aki kaa. Kumafa u ta si a di peentje, nöö baaa ku sisa tuu ta lei unfa de musu seeka dee kamian ka u ta dini Gadu. A dee lö fasi aki Jehovah „di kaba Tiima u mundu fu nöömö” ku Jesosi Keesitu „di kaba hei Könu a hii könu liba”, ta wooko ku dee baaa ku sisa u du gaan soni da de. (1 Tim. 1:17; 6:15; lesi Nöngö 22:29.) U kë wooko ku di köni fuu u tja gafa ko da Jehovah, ma na u tja gafa ko da useei.​—Joh. 8:54.

8. Unfa i sa ko sabi un soni i sa lei u du möön bunu?

⁸ Buta wan apaiti soni di i kë lei u du kuma maaka. Andi i sa lei u du möön bunu? Hakisi dee gaanwomi a di kemeente nasö di keling-gaanwomi andi de si kuma i sa lei u du möön bunu. Ee de piki i fii mbei möiti u ko dë wan möön bunu takima nasö wan möön bunu leima, nöö i sa hakisi de na un soni de si kuma i musu wooko nëën fii sa dou di maaka dë. Mbei taanga möiti fii sa du dee soni di de lei i fii du möön bunu. Unfa i sa du di soni aki?

9. Unfa i sa du soni u dou di maaka fii?

⁹ Du soni u dou di maaka fii. Boo taa i kë mbei möiti u toon wan möön bunu leima. Ee sö a dë, nöö i sa lei soni a di brochure de kai Ko toon wan möön bunu lesima ku wan möön bunu leima. Te de da i wan taki fii hoi a di mindi wiki komakandi, nöö i sa hakisi wan baaa di abi öndöfeni faa heepi i luku ën a fesi, ee soni dë di i musu tooka faa ko möön bunu. Ko abi wan bunu në, u di ja ta hoi di taki fii nöö a kaba, ma u di i ta seekëën bunu a fesi, söseei u di i ta lei taa i dë u futoou.​—Nöng. 21:5; 2 Kol. 8:22.

10. Konda wan woto di ta lei andi u sa du fuu dou wan maaka di ta taanga da u.

¹⁰ Andi i sa du te di maaka di i buta u dou, da wan soni di ta taanga da i fii du? Hoi dou! Wan baaa de kai Garry an bi sa ta lesi sö bunu. A ta mëni jeti fa a bi ta fii sen te a bi musu lesi wan soni a komakandi. Ma a bi ta mbei möiti go dou faa sa lesi möön bunu. Di baaa aki bi taki taa di lei di a bi lei soni a dee buku fuu, söseei di heepi di dee baaa dee abi öndöfeni bi heepi ën, bi mbei taa a bi sa hoi taki a peipei kemeente ku dee gaan komakandi fuu.

11. Andi o heepi u fuu du möön soni a di dini di u ta dini Jehovah, leti kuma Timoteo?

 ¹¹ Timoteo bi ko dë wan leima di bi ta da lei a wan gaan apaiti fasi ö? Wë di Bëibel an ta taki soni fëën. Ma an dë u taki taa Timoteo bi nango a fesi seei a di fasi fa a bi ta tja dee faantiwöutu fëën, u di a bi ta du soni leti kumafa Paulosu bi lei ën (2 Tim. 3:10). Sö nöö useei o sa du möön soni a di dini di u ta dini Jehovah, te u ta mbei möiti u du soni a wan möön bunu fasi.

12. Un wini i feni di wotowan heepi i?

¹² Hii u tuu ta feni wini u di heepi di wotowan ta heepi u. U ta tei ën u bigi seei te dee baaa u di Hatiwosu Komite ta ko heepi u, söseei te dee baaa ta ko luku u te u dë a hatiwosu. Te fuka ta miti u, nöö u ta wai te wan gaanwomi di ta booko hën hedi ku wotowan ta tei hën ten u haika u, söseei te a ta heepi u fuu ko ta fii bunu baka. Te wa kaba sabi unfa u musu heepi wan sëmbë di u ta lei soni u Bëibel, nöö u ta wai seei te wan sëmbë di ta du di pioniliwooko, söseei di abi öndöfeni ta ko ku u a di sëmbë, nöö a ta lei u andi u sa du u heepi di sëmbë. Hii dee baaa ku dee sisa aki tuu ta wai te de ta heepi u. Useei sa ta wai sö tu te u ta dë kabakaba u heepi dee baaa ku dee sisa fuu. Jesosi bi taki taa: „Dee sëmbë ta da sëmbë soni, de dë waiwai möön leki dee sëmbë ta feni” (Tjab. 20:35). Ee i kë du möön soni da Jehovah, nöö i sa du dee soni dee u taki aki, nasö woto soni jeti. Ma andi sa heepi i fii dou dee maaka aki?

13. Andi u musu hoi a pakisei te u buta wan maaka?

¹³ Buta maaka di ta lei gbelingbelin andi i kë du. Kandë i ta pakisei taa: ’Mi bi o kë du möön soni a di kemeente.’ Ma a sa taanga da i fii sabi unfa i sa dou di maaka dë, söseei a kan taa nöiti joo sabi un ten i dou di maaka dë. Fëën mbei i musu buta maaka di ta lei gbelingbelin andi i kë du. A bi o bunu fii sikifi di maaka fii buta a wan pampia, söseei fii sikifi unfa i sa du soni fii dou ën.

14. Faandi mbei u musu hoi a pakisei taa soni sa tooka a di libi fuu te u buta maaka da useei?

¹⁴ Te u buta maaka, nöö u musu hoi a pakisei taa soni sa tooka. Faandi mbei u musu hoi di soni aki a pakisei? Wë u di wa sabi unfa soni o waka a di libi fuu. Boo luku wan woto u fusutan di soni aki. Apösutu Paulosu bi heepi seti wan njunjun kemeente a di foto Tesalonika,  nöö a bi kë fika a di foto dë u heepi dee njunjun Keesitu sëmbë dee bi sai dë. Ma u di sëmbë bi ta du ku de, mbei Paulosu bi musu kumutu a di foto (Tjab. 17:1-5, 10). Ee Paulosu bi fika a di foto, nöö a bi sa mbei taa hogi miti dee baaa ku sisa fëën. Ma tökuseei Paulosu bi mbei möiti u heepi de go dou. A bi fiti hënseei a di fasi fa soni bi tooka nëën libi. Bakaten hën a manda Timoteo u go heepi dee njunjun Keesitu sëmbë u Tesalonika, u de ko abi wan taanga biibi (1 Tes. 3:1-3). Dee sëmbë u Tesalonika bi musu u ta wai taa Timoteo bi dë kabakaba u go heepi ka heepi bi dë fanöudu!

15. Unfa dee maaka fuu sa tooka te soni tooka a di libi fuu? Konda wan woto.

¹⁵ U sa lei wan soni u di soni di bi miti Paulosu a Tesalonika. So juu u sa buta taa u kë du wan soni a di dini di u ta dini Jehovah, ma tökuseei soni sa tooka di sa mbei taa wa sa dou di maaka fuu (Peleik. 9:11). Ee sö a dë da i, nöö dë kabakaba u buta wan woto maaka di i sa dou. Wan baaa de kai Ted ku hën mujëë Hiedi bi du di soni dë. U di wan u de bi ko dë ku suwaki mbei de an bi sa wooko a Bëtëli möön. Ma di lobi di de abi da Jehovah mbei taa de bi suku wan woto fasi u du möön soni a di diniwooko u de. Di fosu soni di de bi du, hën da de bi bigi ta du di kowoonu pioniliwooko. Bakaten de bigi ta du di apaiti-pioniliwooko, söseei Baaa Ted bi lei unfa a bi sa du di keling-wooko sö taa a bi sa tei kamian da di keling-gaanwomi. Ma te u kaba fëën, di jaa di wan keling-gaanwomi bi musu abi u du di wooko fëën bi ko tooka. Baaa Ted ku hën mujëë Hiedi bi ko si taa de an bi sa du di wooko dë möön, u di de bi pasa di jaa dë. Hii fa di soni aki bi mbei de fii tjali, tökuseei de bi ko si taa de bi sa du woto soni da Jehovah. Baaa Ted taki taa: „U lei taa sömëni fasi dë fa u sa dini Jehovah, nöö fëën mbei wa musu ta buta pakisei a wan kodo fasi nöö.”

16. Andi Galasia 6:4 ta lei u?

¹⁶ Wa sa sabi unfa soni o waka a di libi fuu. Fëën mbei a dë fanöudu taa wa ta si kuma dee soni dee u ta du a di dini di u ta dini Jehovah, hën ta mbei taa Jehovah ta kai u gaan soni, söseei wa musu tei dee soni dee u ta du da Jehovah maaka ku dee soni di wotowan ta du dëën. Sisa Hiedi taki taa: „Ja o ta dë waiwai möön ee i ta tei di libi fii maaka ku di libi u wotowan.” (Lesi Galasia 6:4.) A dë fanöudu fuu ta suku fasi u heepi wotowan, söseei fuu dini Jehovah go dou. c

17. Andi i sa du fii sa dou dee maaka fii u du möön a di dini di u ta dini Jehovah?

¹⁷ Joo sa du möön soni a di dini di u ta dini  Jehovah, te ja ta biinga a gudu baka, söseei te i ta mbei möiti u libi a sö wan fasi taa ja ta abi paima di an dë fanöudu. Buta pikipiki maaka di o heepi i fii dou dee möön gaan maaka fii. Boo taa i buta taa i kë du di kowoonu pioniliwooko. Wë i sa bigi du di heepi pioniliwooko hiniwan liba fii sa dou di maaka dë. Ee i kë toon wan dinai, nöö i sa mbei möiti fii ta peleiki möön hia. Söseei i sa go luku dee baaa ku dee sisa dee dë ku suwaki nasö dee ko gaandi. Dee soni dee i ta lei nöunöu sa heepi i fii sa du möön soni a di dini di u ta dini Jehovah a di ten di ta ko. Dë kabakaba u du hii soni di i sa du a hiniwan wooko di de da i fii du.​—Lom. 12:11.

18. Andi i ta lei u Beverley, te i luku di peentje?

¹⁸ Wa ta gaandi poi u buta maaka da useei, söseei u mbei möiti u dou de. Boo luku di woto u wan sisa de kai Beverley, di abi 75 jaa. Di sisa aki abi wan suwaki di ta mbei a ta taanga dëën faa waka. Ma tökuseei a bi kë du möön soni a di ten di u ta kai sëmbë u ko mëni di dëdë u Jesosi. Fëën mbei a bi buta wan maaka di a bi kë dou. Sisa Beverley bi wai seei di a bi dou di maaka fëën. Di möiti di a bi mbei bi da wotowan taanga u deseei du di peleikiwooko möön hia. Jehovah ta tei di wooko di dee baaa ku dee sisa fuu dee ko gaandi ta du u bigi, aluwasi ee soni tooka a di libi u de di mbei taa de an sa du hia soni möön.​—Ps. 71:17, 18.

19. Andi da wantu maaka di u sa buta da useei a di dini di u ta dini Jehovah?

¹⁹ Buta maaka di i sabi taa i sa dou. Mbei möiti fii ko abi fasi di o mbei Jehovah lobi i. Lei wan wooko fii sa du möön soni da di Gadu fuu ku di ölganisaasi fëën. Suku fasi fii ta möön heepi dee baaa ku dee sisa fii. d Nöö leti kuma Timoteo, Jehovah o mbei i feni gaan bunu, „nöö sëmbë o si taa i nango fesi seei”.​—1 Tim. 4:15.