1. Sortu marki wi kan poti gi wisrefi?

 LEKI tru Kresten, wi lobi Yehovah srefisrefi. Wi wani du ala san wi man na ini a diniwroko fu en. Efu wi wani du ala san wi man gi Yehovah, dan wi musu poti marki. Wan tu fu den marki di wi kan poti na fu kweki moi Kresten fasi, fu leri fu du wan spesrutu sani èn fu leri san wi kan du moro gi wi brada nanga sisa.

2. Fu san ede meki wi musu poti marki èn wroko tranga fu doro den?

² Fu san ede wi musu tan meki muiti fu go na fesi? We, a moro prenspari reide, na fu di wi wani plisi wi hemel Papa. Yehovah breiti te wi e gebroiki den koni fu wi fu dini en. Boiti dati, wi wani go na fesi so taki wi kan yepi wi brada nanga sisa moro bun (1 Tes. 4:9, 10). A no abi trobi o langa wi de na ini waarheid, toku wi alamala kan go na fesi. Meki wi go luku fa wi kan du dati.

3. Soleki fa 1 Timoteyus 4:12-16 e sori, dan sortu deki-ati na apostel Paulus ben gi Timoteyus?

³ Timoteyus ben de wan yongu man ete di na apostel Paulus skrifi a fosi brifi gi en. Aladi Timoteyus ben abi ondrofeni kaba leki owruman, toku Paulus ben gi en a deki-ati fu tan go na fesi. (Leisi 1 Timoteyus 4:12-16.) Te wi e prakseri den wortu fu Paulus, dan wi e si taki a ben wani taki Timoteyus go na fesi na tu fasi. A ben musu du muiti fu kweki moi fasi soleki lobi, bribi èn fu libi wan krin libi. Boiti dati, a ben musu tan meki muiti fu leisi  bun, fu gi sma deki-ati èn fu gi leri. Wi o luku fa na eksempre fu Timoteyus kan yepi wi fu poti marki di o meki wi tan go na fesi. Wi o luku tu san na wan tu fasi fa wi kan du moro na ini a diniwroko.

4. Te wi e luku Filipisma 2:19-22, dan san ben meki taki Yehovah ben man gebroiki Timoteyus na ini a diniwroko fu en?

⁴ Fu san ede Yehovah ben man gebroiki Timoteyus na ini a diniwroko fu en? Fu di a ben abi moi Kresten fasi. (Leisi Filipisma 2:19-22.) Te wi e luku san Paulus ben taki fu Timoteyus, dan wi kan si taki a ben de wan sma di ben abi sakafasi, a ben e tai hori na Gado, a ben e wroko fayafaya, èn a ben de fu frutrow. A ben abi lobi gi trawan èn a ben e broko en ede nanga en brada nanga sisa. Dati meki Paulus ben lobi Timoteyus èn a no ben e draidrai fu gi en muilek toewijzing (1 Kor. 4:17). Na so a de tu taki te wi e meki muiti fu kon abi moi fasi, dan Yehovah o lobi wi èn wi o man du moro gi a gemeente.​—Ps. 25:9; 138:6.

5. (a) Fa yu kan sabi na sortu Kresten fasi yu musu wroko? (b) Soleki fa wi e si tapu a prenki, dan fa wan yongu sisa meki moro muiti fu sori taki a e firi gi trawan?

⁵ Poti wan spesrutu marki. Begi èn denki bun fu den fasi di yu wani kon abi. Baka dati, teki wán èn du muiti fu kon abi a fasi dati. Fu eksempre, yu kan du moro muiti fu sori taki yu e firi gi trawan, noso yu kan du moro gi yu brada nanga sisa? Noso yu kan du moro muiti fu libi na ini freide nanga trawan èn fu gi pardon moro esi? Yu kan aksi wan bun mati fu yu tu na sortuwan fu den Kresten fasi a denki taki yu musu wroko.​—Odo 27:6.

6. San wi kan du fu doro wan marki di wi poti?

⁶ Wroko tranga fu doro a marki di yu poti. Fa yu kan du dati? Wan sani di yu kan du, na fu ondrosuku a fasi di yu wani wroko na en moro fini. Kon meki wi taki dati yu wani meki moro muiti fu gi trawan pardon. Yu kan bigin leisi èn denki dipi fu Bijbel eksempre fu sma di ben de klariklari fu gi trawan pardon èn fu trawan di no ben wani du dati. Meki wi teki na eksempre fu Yesus. A ben de  klariklari fu gi trawan pardon (Luk. 7:47, 48). A no ben e poti prakseri na den fowtu fu den, ma a ben e poti prakseri na den bun sani di den ben e du. Na a tra sei, den Fariseiman na ini Yesus ten, „ben e si tra sma leki noiti” (Luk. 18:9). Baka te yu denki dipi fu den eksempre disi, dan aksi yusrefi: ’Fa mi e si trawan? Na sortuwan fu den fasi fu den mi e poti moro prakseri?’ Efu a muilek gi yu fu gi wan sma pardon, dan pruberi fu skrifi ala den bun fasi fu en. Baka dati aksi yusrefi: ’Fa Yesus e si so wan sma? A ben o gi en pardon?’ Te wi e du disi, dan dati kan yepi wi fu kenki wi denki. Na a bigin a kan muilek fu gi wan trawan pardon te den du wan sani di hati wi. Ma efu wi e tan meki muiti, a o moro makelek gi wi fu gi den pardon.

7. Soleki fa Odo 22:29 e sori, dan fa Yehovah e gebroiki wrokoman di leri fu du wan spesrutu wroko na ini a ten disi?

⁷ Wan tra marki di wi kan poti, na fu leri fu du wan spesrutu sani. Furu wrokoman de fanowdu fu bow den Betel, den Kongreshal nanga den Kownukondre zaal. Furu fu den sma disi leri fu du wan spesrutu wroko, fu di den wroko makandra nanga brada nanga sisa di abi ondrofeni. Soleki fa wi e si tapu a prenki, dan den brada nanga sisa leri fu du wan spesrutu wroko di de fanowdu fu sorgu taki den Kongreshal nanga Kownukondre zaal tan bun. Na a fasi disi èn na tra fasi Yehovah Gado „a têgo Kownu”, nanga Krestes Yesus a „Kownu fu den wan di e tiri leki kownu” man gebroiki den koni wrokoman disi fu du bigi sani (1 Tim. 1:17; 6:15; leisi Odo 22:29). Wi wani wroko tranga èn wi wani gebroiki den koni fu wi fu gi Yehovah glori. Wi no wani meki bigi gi wisrefi.​—Yoh. 8:54.

8. Fa yu kan kon sabi na san yu musu wroko?

⁸ Poti wan spesrutu marki. Sortu sani yu kan leri fu du moro bun? Yu kan aksi den owruman fu yu gemeente èn kande yu kan aksi a kring-owruman sortu sani yu kan du moro bun. Fu eksempre, efu den taigi yu taki yu kan tron wan moro bun takiman èn leriman, dan aksi den na sortu spesrutu punt yu musu wroko. Baka dati, du ala san yu man fu fiti a rai fu den. San kan yepi yu?

9. San yu kan du fu doro wan spesrutu sani?

⁹ Wroko tranga fu doro a marki di yu poti. Kon meki wi taki dati yu wani tron wan moro bun leriman. Yu kan studeri a brochure Meki muiti fu leisi bun èn fu gi leri. Te yu kisi wan prati na a mindriwiki konmakandra, dan yu kan aksi wan brada di abi ondrofeni fu arki a lezing fu yu na fesi. Baka dati, aksi en na sortu sani yu kan wroko ete. Sreka yusrefi bun gi a prati so taki ala sma kan si taki yu e wroko tranga èn taki yu de fu frutrow.​—Odo 21:5; 2 Kor. 8:22.

10. Gi wan eksempre di e sori san kan yepi wi fu du wan sani moro bun.

¹⁰ San wi kan du efu wi wani du wan sani moro bun, ma a muilek gi wi? No gi abra. Wan brada di nen Garry, no ben man leisi so bun. A e memre ete taki a ben e syen te a ben musu leisi nanga wan tranga sten na den konmakandra. Ma dati no tapu en, a tan meki muiti. Garry e taki: „Fu di den brada di ben abi ondrofeni yepi mi, meki now mi man hori lezing na den konmakandra, na den kring konmakandra èn na den kongres.”

11. San kan yepi wi fu du moro na ini a diniwroko fu Yehovah, neleki Timoteyus?

 ¹¹ A de so taki Timoteyus ben tron wan heri bun takiman noso leriman? Bijbel no e taki dati. Ma wi kan de seiker taki te fu kaba Timoteyus ben man tyari en frantwortu moro bun fu di a ben teki a rai di Paulus ben gi en (2 Tim. 3:10). Na so a de tu taki efu wi e meki muiti fu du wan sani moro bun, dan wi o man tyari moro frantwortu na ini a diniwroko fu Yehovah.

12. Fa trawan yepi yu?

¹² Wi alamala e kisi wini te wi e dini trawan. Te wi de na ati-oso, dan wi de nanga tangi te owruman fu na Ati-oso Kontakti Komte noso fu a Fisiti Grupu gi Sikisma e kon luku wi. Te wi abi fu du nanga wan muilek situwâsi na ini wi libi, dan wi de nanga tangi te wan owruman e teki en ten fu arki wi èn fu gi wi deki-ati. Te wi abi yepi fanowdu nanga wan Bijbelstudie, dan wi breiti te wan pionier di abi ondrofeni e go nanga wi na a studie èn e gi wi wan tu rai. Ala den brada nanga sisa disi breiti fu yepi wi. Wi srefi kan firi a prisiri disi efu wi e suku fasi fu dini wi brada nanga sisa. Yesus ben taki: „Wan sma sa de moro koloku te a e gi sani, leki te a e kisi sani” (Tori 20:35). Efu wi wani du moro na ini a diniwroko fu Yehovah na a fasi disi noso na tra fasi, dan san kan yepi wi fu doro a marki dati?

13. Te wi poti wan marki, dan san wi musu hori na prakseri?

¹³ Hori na prakseri taki yu musu poti wan spesrutu marki. Fu san ede? Fu eksempre, yu ben kan taki: ’Mi wani du moro na ini a gemeente.’ Ma a kan muilek gi yu fu sabi fa yu kan doro a marki disi èn kande yu no o man sabi o ten yu doro en kaba. Sobun, poti wan spesrutu marki. Yu kan skrifi a marki fu yu èn meki wan schema fu doro en.

14. Fu san ede wi musu de fleksi te wi e poti marki?

¹⁴ Te wi e poti marki wi musu fleksi tu. Fu san ede? Fu di wi situwâsi kan kenki. Fu eksempre, na apostel Paulus ben yepi fu seti wan nyun gemeente na ini a foto Tesalonika. A no de fu taki dati a  ben wani tan drape fu yepi den nyun Kresten. Ma sma di ben e frufolgu en dwengi en fu gwe libi a foto (Tori 17:1-5, 10). Efu Paulus no ben gwe, dan a ben kan meki ogri miti en brada nanga sisa. Dati meki a fiti ensrefi na a situwâsi èn a tan yepi den. Bakaten a seni Timoteyus go fu yepi den Kresten na ini Tesalonika fu tranga a bribi fu den (1 Tes. 3:1-3). Den brada nanga sisa fu Tesalonika ben musu fu breiti srefisrefi taki Timoteyus ben de klariklari fu go dini pe moro yepi ben de fanowdu.

15. San kan pasa nanga den marki di wi poti te a situwâsi fu wi kenki? Gi wan eksempre.

¹⁵ Wi kan leri furu fu san Paulus ondrofeni na ini Tesalonika. Kande wi poti wan marki, ma fu di a situwâsi fu wi kenki, meki wi no man doro a marki dati moro (Preik. 9:11). Efu dati de so, dan yu kan poti wan tra marki di yu kan doro. Dati na san Ted nanga Hiedi, wan trowpaar, du. Fu di wan fu den ben kon siki, meki den ben abi fu gwe libi Betel. Ma fu di den ben lobi Yehovah, meki den suku tra fasi fu du moro na ini a diniwroko. A fosi sani di den du, na taki den tron gewoon pionier. Baka dati den ben man dini leki spesrutu pionier. Èn den brada train Ted so taki a ben kan teki presi gi a kring-owruman te a no ben de. Bakaten, a yari di wan sma ben musu abi fu tan du a kringwroko kenki. Ted nanga Hiedi ben kon frustan taki den ben kon owru tumusi fu tan na ini a toewijzing fu den. Aladi den ben e sari, den ben sabi taki furu fasi de fu dini Yehovah. Ted e taki: „Wi leri taki wi kan dini Yehovah na difrenti fasi.”

16. San wi kan leri fu Galasiasma 6:4?

¹⁶ Wi no sabi ala ten fa wi libi o waka. Fu dati ede, wi no musu denki taki na a toewijzing di wi abi e meki taki wi warti na ini Yehovah ai. Boiti dati, wi no musu teki a toewijzing fu wi gersi nanga a di fu trawan. Hiedi e fruteri: „Yu o lasi a prisiri fu yu efu yu e teki a libi fu yu gersi nanga a di fu trawan.” (Leisi Galasiasma 6:4.) A de prenspari taki wi e suku fasi fu dini Yehovah nanga trawan. b

17. San wi kan du fu kisi moro frantwortu na ini a gemeente?

¹⁷ Yu o man du moro na ini a diniwroko fu Yehovah te yu no e feti baka gudu èn te yu no e meki paiman efu dati no de fanowdu. Poti pikin marki fu man doro  den bigi marki di yu wani doro. Fu eksempre, efu yu wani tron wan gewoon pionier, dan yu kan dini leki yepipionier ibri mun? Efu yu wani tron wan dinari na ini a diniwroko, dan yu kan du moro na ini a preikiwroko èn yu kan go luku brada nanga sisa fu yu gemeente di siki noso owru? Te yu kon abi moro ondrofeni, dan dati kan yepi fu kisi moro frantwortu na ini a ten di e kon. Awinsi sortu frantwortu yu kisi fu den brada, du dati nanga yu heri ati.​—Rom. 12:11.

18. Soleki fa a prenki e sori, dan san wi kan leri fu na eksempre fu Sisa Beverley?

¹⁸ Noiti wi owru tumusi fu poti marki èn fu doro den. Luku na eksempre fu wan sisa di nen Beverley èn di abi 75 yari. A ben abi wan seryusu siki di e meki taki a muilek gi en fu waka. Ma toku a ben wani du moro fu gi sma wan kari fu kon na a Memrefesa. Dati meki a poti spesrutu marki. Di Sisa Beverley doro den marki di a ben poti, a ben breiti srefisrefi. A muiti di a meki gi trawan deki-ati fu wroko tranga na ini a diniwroko. A wroko di wi owru brada nanga sisa e du warti srefisrefi gi Yehovah, awinsi fa a situwâsi fu den e meki taki den no man du so furu leki san den ben wani.​—Ps. 71:17, 18.

19. San na wan tu marki di wi kan poti?

¹⁹ Poti marki di yu man doro. Meki muiti fu kon abi fasi di e plisi Yehovah. Leri fu du wan wroko di o meki taki Yehovah nanga en organisâsi kan gebroiki yu moro bun. Suku fasi fu du moro gi yu brada nanga sisa. c Neleki fa Yehovah yepi Timoteyus, na so a o yepi yu tu so taki „ala sma kan si taki yu e go na fesi”.​—1 Tim. 4:15.